اكيد كلنا نعرف حد رغاي و تلم و بيتفزلك و مابيبطلش زن و قر و كلام في الفارغة و المليانة
و ده بنسمية في معجم الطهقانين:0
و طهقان جوزي عنده ابن خاله من النوع ده، هبط علينا ببراشوت الأسبوع اللي فات. قال اية بيخلص ورق في القاهرة الكبرى، و على السادة المقيمين خارجها حمد ربنا إنهم مش قرايبه.0
و من ساعة الأستاذ حقنة ما هبط عندنا ؛ و أنا طلعان روحي منه ،لا بيبطل كلام و لا قر و لا نق، ده غير انه حاططني تحت المكروسكوب و عمال يحلل كل تصرفاتي و كلامي و يعدل عليا.0
و يكلمني عن فلانة و علانة من قرايبه اللي بينشفوا ملوخية و بامية و بيعملوا رجل الكيكي في البيت من غير مساعدة من خدامة و لا تيك اواي.0
و يقولي إن القهوة الإسبرسو اللي بشربها دي ملهاش طعم و لا كسم ؛ و إن مفيش أحسن من قهوة السبرتاية و ريحة السبرتو المحروق تخنق اللي خلفوني علشان القهوة يبقى لها شمخة.0
ده غير الغسيل اللي مش عاجبه في الغسالة الاوتوماتيك؛ و بيحكي و يتحاكى عن غسيل أخته اللي بيرقص على المنشر و اللي بتصحى من الفجر تعلق عليه في البستله على البابور و تمرشه بالبطاس و تزهره بالزهرة، تقولوش حتأخد بيه الأوسكار؟!0
يخرب بيت كده
بيحسسني ان نص وشه عنين تنقد، و باقي وشه بق..0 ...
اما مناخيره فمحشورة في كل صغيرة و كبيرة في حياة غيره.0
و مش بس كده.. لا ده كمان مسك طهقان و قعد يقوله :ليه طهقانة هي اللي ماسكة مصروف البيت؟؟ الستات مسرفه ،انت تهبد المرتب في جيبك ..و تديها كل طلعة نهار عشرة جنية تدبأ نفسها بيها..على أساس اني حجيب عشر بيضات بمليم و حخبز في البيت و حشحت البصل و اللحمة و الخضار من الجيران!!0
و قاله كمان: أنت تسيب الشقة الكبيرة اللي أنت قاعد فيها دي، اللي شبه الفسحاية اللي عيال البلد بتلعب فيها الكورة و تاخدلك شقة إيجار جديد على القد كده ،و تأجر دي مفروش ..تجيبلك في الشهر الشئ الفلاني.0
ده غير إن مدارس الأولاد اللغات مش عاجباه؛ و شايف إن مفيش أحسن من المدارس الحكومة .ده مش ناقص غير يقوله نوفر مصاريف أتوبيسات المدرسة و نجيب لهم حمار بحزمتين برسيم في اليوم يوصلهم!!0
فكرت ازاي ازحلقه من البيت.. بس ده محتاج مصنع صابون بحاله علشان يتزحلق
و خفت كمان لو زحلقته يقع تتكسر رقبته و اتدبس فيه شهرين لحد ما يفك الجبس.0
و خلص مصلحته و مشي الحمد لله أخيرا
البيت مش ناقص حقن ، كفاية عليه حقنة واحدة هيهيهيهيهيهي
دي حاجة تطهق بجد
....
