ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

ارجوك اعطني هذا الريموت


خبر في جريدة ((طهقانة اليوم))0

((
لقد أثبتت التكنولوجيا الحديثة أن ريموت كونترول التليفزيون هو عامود الرجل الفقري في المنزل. ليس هذا و حسب بل انه يعد جزء لا يتجزأ من كرامته و رجولته و كبريائه))0
فعلا صحيح ..الراجل من دول يدخل البيت يدور على الريموت، و اول ما يمسكه في ايده يحس انه امتلك زمام الأمر في البيت ،و تبان على وشة علامات السعادة، و تلمع عنيه برغبات التملك، و يشعر ان ضغطة واحدة من أصابعه الفريدة بتغير قناة- تقوليش قناة السويس يا خي- مما يقلل من إحساس الضغط النفسي عليه

بصراحة هو معذور ضغوط الحياة و مشاكل الشغل بتخللي الراجل حاسس انه قليل الحيلة و انه بيلف في المفرمة مستني السكينة تفتفته. و لما بيفرد قدام التليفزيون بيحس انه بقى مالك زمامه و ده بيعوض الإحساس بقلة الحيلة طول النهار.
و بعد ما تأكدت بنفسي من صحة النظرية دي ،و بإن طوطو مبيحسش بارتياح إلا و هو ماسك الريموت، و يقعد يقلب الستميت قناة في حركة هستيرية ،و هو مش راضي يرسى على قناة علشان ميفقدش متعة الضغط على الريموت و التغيير
قعدت افكر يا ترى هوبيعمل كده ليه؟؟؟
يمكن عنده رغبة دفينة في التغيير و اكمنه مش قادر يغير حياته بيغير قنوات التليفزيون؟؟؟
و لا يكون نفسه يسيطر على ما حوله و مش قادر قوم بيطلع ده في سيطرته على ما يشاهد و يسمع بل و ما يشاهد و يسمع الآخرون
و لا يكون و هو بيغير القنوات بيفكر في مشاكل و بلاوي الشغل و مش مركز مع التليفزيون اصلا و بحركة تلقائية بيدوس على زرار التغيير
تفتكروا ليه بشوف في عنيه متعة السيطرة و هو ماسك الريموت؟؟ ده حتى لما بيقوم يروح الحمام بياخد الريموت في جيبه يظهر بيخاف اخده و هو هناك و اقلب في القنوات و لا حاجة

المهم انتم عارفين أنا بحب اعاكسه و اطهقه فعملت اية بقى؟....!....0
استغليت فرصة اني في العتبة و اشتريت ريموت كونترول للتليفزيون من النوع الصيني اللي بيتباع على الرصيف ده و خبيته تحت شلتة الكرسي.
استنيت لما طهقان اخد مركزه قدام التليفزيون و طلع الريموت من جيبه و بدا رحلة التقليب و وقف عند فيلم أجنبي، و راح قاعد يقرا الجرنال !!0
رحت مطلعة الريموت من تحت الشلتة و مغيرة و جايبة محطة عربية و لا كأني عملت حاجة.
انتبه و بص باستغراب للريموت في ايده، و راح مقلب تاني و جاب النشرة و رجع يقرا الجرنال برضه .
رحت مغيرة و جايبة قناة اغاني
راح هازز الريموت في ايدة و قعد يخبطه و غير تاني جاب ماتش كورة
و قعدت كده بتاع نص ساعة كل ما يجيب قناة و يرجع لقراءة الجرنال اغير انا و اجيب حاجة تانية
بصراحة بيقى شكله عسول خالص و هو متعصب و ودانه حمرا و الدخان بيطلع من مخانيره هاهاهاهاها
لحد ما وقف و قال: لااااه ...اية اللي بيحصل ده الريموت ده بينط لوحده و لا اية؟!0
طهقانة: (ببراءة) مالك يا طوطو؟ مش انت بتقرا الجرنال؟ سيبني بقى اشوف اللي انا عايزاه
طهقان: و انت بتغيري ازاي؟؟
طهقانة : بقلبي يا حبيبي.. انت عارف قلب المؤمن ريموته .
طهقان: لا بجد قولي ازاي بتغيري و الريموت في ايدي؟!
طهقانة: معايا واحد استبن اشتريته من العتبة النهاردة هيهيهيهي



طهقان : كده طيب صبرك عليا..... و طلع يجري ورايا بالجرنال بعد ما برمه و قعد يضربني بصفحة الحوادث ..و يقولي: جننتي اهلي و انا اقول الريموت في عفريت و لا ايه!! انت عايزة تفرسيني؟؟؟
طهقانة: ( و انا بجري) لا يا طوطو عايزة اطهقك بس هاهاهاها
رغم انها كانت علقة حلوة.. بس تأكدت وقتها ان الراجل لا يتقبل أن يدوس احد على طرف ....ريموته في البيت
و انه مستعد التليفزيون يتسرق بس الريموت لااا و الف لا

امضاء طهقانة

35 comments:

Unique said...

الانطباع الاول .. انك خبيرة نفسية مهمتك تحليل العلاقة الوثيقة بين طهقان والريموت

الانطباع التاني .. انك شريرة وعندك خطط طهق ما حصلتش

الانطباع التالت .. صعبتي علي انك اتضربتي وبصفحة الحوادث يا عيني

الانطباع العام .. بوست مية مية .. رائع

تحياتي

خمسة فضفضة said...

السلام عليكم ورحمة الله وبركاته

ههههههههههه
اه منك يا طوطه انت هاتجنني الراجل ودخوله العباسية اكيد وحتما ولابد هايبقي علي اديكي

ارحميه شويه بقي

هههههههه

سلام

Miss. Sosa said...

كله الا الريموت .... هو الراجل ايه غير ريموت وقال علي رأي المثل الراجل اللي ملوش ريموت عيشته مش افضل من الموت

la2 keda mosh 7elw said...

افتكر زمان وانا لسه داخل علي جواز اصحابي نصحوني ماتجوزش إلا لما اجيب دراع الأتاري و حصل و عشت اسعد أيام حياتي ولما ظهر اختراع التلفزيون ابو ريموت حسيت ان الدنيا زهزهت لي و من ساعتها الدنيا بقت زبادي ف الخلاط .... عجيبه منك يا طهقانه هو الراجل مننا هيدوم له ايه غير ريموته و الحجرين !!!!؟؟ ههههههههه

خالتى بمبة said...

انتى عايزة تسلبيه اعز ما يملك ويسكت ويعديها دا اللى عمله ده اقل واجب من راجل دمه حر انتى عارفة الريموت بالنسبة للراجل ده زي شنبه بالظبط ازاي يبقى معاكي نسخة منه

ِAli Abu-Taleb said...

سبحان الله نفس اللي بيحصل معايا
احنا يا رجالة بنؤمن بالمثل
عض قلبي ولا تعض ريموتي

واحدة مفروسة said...

طهقانه انتى كنتى فين من زمان ...انتى توهتى فى العتبه و انتى بتجيبى الريموت...ايه الغيبه ديه كلها...المهم حمدلله على السلامه........طيب ماكنتى اشترتيلك تلفزيون تانى ودش تانى بالمره بدل ما تطهقى الراجل....لألألألأانا شخصيا مااعملهاش هيه الحياة بيبقى ليها طعم من غير لما تطهقى جوزك و تفرسيه..........انا بقى استسلمت و سبتله الريموت اصلى لما كنت افرسه كان اسهل حاجه يقوم يخرج...قلت لا هوه نا حخسر الراجل علشان ريموت...بلاها الريموت.....المهم هوه يكون قدام عينى ..الشيطان شاطر بره البيت ..........وبقى هوه معاه الريموت حبيبه...وانا قدامى جوزى حبيبى هههههههههه

gehad_fci said...

ههههههههههههههه
والله فعلا انتي تطهقي الله يكون في عون الراجل
هههههههه
مش قادر امسك نفسي من الضحك
انا قريت كل بوستاتك جامده جدااااا
سلامي
جهاد (ولد)ووو

الطائر الحزين said...

معندنيش ريموت الحمد لله

وبكتفى فى الجورنال بجيبة كل اسبوع يوم الجمعه وطبعا بيبقى صفحاتة كثيرة والحوادث فيه على كيفك


ارحمى الراجل يا شيخة

مفقوعة مرارتي من حماتــــــــــــي said...

يستاهل
بس مش كنتي أشتريتيلي واحد معاكي

أحسن المنيل جوزي فيه الداء المزعج ده برضه
ماتخافيش كنت هاأدفعلك

لماضة said...

ههههههههههههههههههههه
هههههههههههههههههههه
ههههههههههههههههه
انا هموت من الضحك
يخرب عقلك يا طهقانه وافكارك اللي تودي في داهيه دي
بس بجد حركة جامدة جدا متطلعش الا منك
انا مش عارفه اعلق من كترالضحك
خصوصا واني متخيله منظر طهقان وهو بيقول سلام قول من رب رحيم

حمامة said...

تقوليش قناة السويس يا خي

هههههههههههههههههههههه

رهيبة بجد

تصدقى فعلاً

انا اخواتى كده وبابا كمان

يا سلام وهما ماسكين الريموت ف ايدهم

تحسى انهم ملكوا الدنيا وما فيها

ومش بيرضوا يدوه لحد ابتااااااااً

:D

FaceMoon said...

ههههههههههههههههه
فطستينى من الضحك كل مرة تتضحكينى
بجد من كتر واقعية اللى انتى كاتباة انا بضحك
لان انا بابا كدة برضة لازم وحتما ولابد ياخد الريموت دة جزء لا يتجزأ من وجودة وشخصيتة فى البيت واحنا كلنا نتفرج على اللى هو عايزة واللى هو طبعا قناة الجزيرة او القنوات الرياضية
بصى يابنتى الرجالة كلهم زى بعض
متغبيش علينا تانى بقى
تحياتى

HafSSa said...

لووووووووووووووووووووووووووووووووول
كده يا طهقانة
موتيني من الضحك

تسلم ايدك
ايوة كده ارجعلينا و ضحكينا من تاني

تحياتي

صحفية روشة said...

الرحمه يا ست الطهقانين
طهقان خلاص هيطلع من هدومه
__________________________________
ميفوتكش البوست الجديد (شيوخ على ما تفرج)
__________________________________
للى عاوز يزور لوحه شرف يدخل مدونتى وهتلاقو لينك لوحة شرف فيها
لوحة شرف هى لوحه شرف لكل من دون فابدع وينشر بها افضل بوستات كتبها البلوجرية

محمد عبد الغفار said...

الفكره جهنميه انما الخاتمه مش اللى هى


مش هتبطلوا افترى بقى

القلم السكندري said...

سبحان الله

الراجل من دول يبقي طهقان

وانتو في قمة الروقان


تحياتي لمملكة الطهقانين في مصر والعالم العربي

Anonymous said...

السلام عليكم

لذيذة اوى المدونة بجد

بس اتمنى ان كل ده يكون حقيقى

مش عارفة قرات فى احد المنتديات ان ده تاليف كاتب اسمه د/ طارق فاروق


مين طارق فاروق ده ؟؟؟؟؟؟؟

انتم؟؟؟؟؟؟؟

nana said...

جميل جميل جدا خلتيني اضحك من قلبي

شكرا

la3lahakhier said...

السلام عليكم
ضحكتينى وانا ماليش نفس اضحك

ياسمين حميد said...

ههههههههه
مقلب ظريف جداً
بس خليتيني أفكر، يمكن اخواتي البنات أصلهم رجالة باين؟
أصل في بيتنا بيبقى في حرب على الريموت كل يوم، اللي تمسكه في إيدها أول اليوم ماتسيبوش، ولما تمشي تخبيه
ويقعدوا يقلبوا في القنوات ونادراً ما يصبروا على قناة واحدة
لحد ما طهقوني

المرة الجاية وانا رايحة هناك هاخد معايا ريموت زي بتاعك
:-P

Ahmed Mubarak said...

يا خبر ..

مع انه صعبان عليا .. بس بجد لذيذه منك موت يا بستوكه ..

انتي مشكله
:D
تحياتي

صاحب المضيفة said...

ههههههههههه


مواقف جميلة وعلقة هنية


مدونتك جميلة ورقيقة


دمت بخير

إنـســـانـة said...

ههههههههههههههههههه

عفرييييييييتة

Heba said...

بجد عرفتي تطهاقي في اليربموت والتلفزيون..
بس بجد احلى بلوج دخلتو يا طهقانة بتعرفي تخليني اضحك من قلبي

عاشقة الوطن said...

السلام عليكم

ازيك ياطهقانة
هو الظاهر الرجل فعلا مبيحسش بانه موجود فى البيت غير لما بيمسك الريموت ويقلب زى ماهو عاوز

تحياتى ياطهقانة
وطهقيه زى ماانتى عاوزة

whisper TaNgOoO said...

ههههههههههه
انا اول مره ادخل هنا
بس بجد اسلوبك حلو اوى يا طهقانه
ربنا يهديلك جوزك

Sally said...

كانت عندى المشكلة دى برضه
ولسه يعنى بس مش أد كده الحمد لله
أصل ايه بقى
ابنى الصغير من كتر ما بيعد معايا طوول النهار خد على الحاجات اللى بحب اتابعها و بقى بيتابعها هو كمان بحكم الديكتاتورية بتاعتى اللى بأُسقطها عليه

قوم كل ما ييجى زوجى المصون يقلب فى القنوات ابنى حبيبى وروح قلبى يعيط ويرمى نفسه عالأرض ولا يمكن يسكت أبدااااااااا إلا لما يرجع المؤشر عالقناة اللى كنا (( انا ودودو )) بنتابعها
هههههههههههههه
العيال بتنفع برضه
هههههههههههههههه


ركزى مع أولادك
وابنك على ما تربيه برضه
هههههههههههههه

دمتى بخير

رئـــــيسـة حزب الأحلام said...

حلوة اللعبة دى انتى هتجيبيلوا العصبى
والله انتى زى العسل
بس الرجالة بيحبوا التحكم فى كل حاجة ويحسوا انهم مالكين كل شئ

يا مراكبي said...

أنا أكتر حاجة أسعدتني .. العلقة اللي في الآخر

ناس ما تجيش غير بصفحة الحوادث صحيح

yomna said...

ريموت الراجل زي عود الكبريت ملوش غير ماسكة واحدة... وهي طبعا من الراجل...مبيحبوش ابدا ان الست تاخده كانه مبينكشفش على رجالة

بس ياعيني عليهم ما هما مساكين برده...مفيش حاجة بيقدروا يتحكموا فيها دلوقتي غيره...يلا سيبيهم يفرحو بحاجة و يتلهوا فيها عشان ميقرفوناش احنا

Esraa Hamed said...

ههههههههههههههههههههههههههههههههههههههههههههههه

بجد البوست تححححححححفة فعلا
موتيني من الضحك بجد
حلوة اوييييي فكرة الريموت اللي من العتيه ده
بجد تحححححفة

دمتي بتألق

ساسو said...

ههههههههههههههههههههه والله انتي عسل
هي الحياه متمشيش اللي كده مش كله جد جد لازم حبه هزاار
انا كنت مفكره ان مرض الريموت ده عندنا بس
اخويا كده يجي من بره يمسك الريموت يروح في اي حته في البيت يخدو معاه (بيفسحه)
يسيب التلفزيون ويروح يقعد علي الكمبيوتر وبرضه يخده معاه
لغايت اما جنني والله
بكره مراته تعمل فيه زي ما انتي عملتي واكتر

(انا لازم اوصيكي تجيبي لي ريموت من العتبه)
بااي بااي
ياعسل

Anonymous said...

6K聊天室,080中部人聊天室,聊天室交友,成人聊天室,中部人聊天室,情色聊天室,AV女優,AV,A片,情人薇珍妮,愛情公寓,情色,情色貼圖,情色文學,色情小說,色情,寄情築園小遊戲,AIO交友愛情館,情色電影,一葉情貼圖片區,色情遊戲

言情小說,情色論壇,色情網站,微風成人,成人電影,嘟嘟成人網,成人,成人貼圖,成人交友,成人圖片,18成人,成人小說,成人圖片區,微風成人區,成人網站,免費影片,色情影片,自拍,hilive,做愛,微風成人,微風論壇,AIO

情趣用品,情色,成人,A片,自拍

情趣用品,色情,成人影片,色情影片,免費A片

情趣用品,成人網站,A片下載,日本AV,做愛

情趣用品,美女交友,A片,辣妹視訊,情色視訊

情趣用品,色情聊天室,聊天室,AV,成人電影

A片,aio,av女優,av,av片,aio交友愛情館,ut聊天室,聊天室,豆豆聊天室,色情聊天室,尋夢園聊天室,080聊天室,視訊聊天室,080苗栗人聊天室,上班族聊天室,成人聊天室,中部人聊天室,一夜情聊天室,情色聊天室,情色視訊,美女視訊,辣妹視訊,視訊交友網,免費視訊聊天,視訊,免費視訊,美女交友,成人交友,聊天室交友,微風論壇,微風成人,sex,成人,情色,情色貼圖,色情,微風,聊天室尋夢園,交友,視訊交友,視訊聊天,視訊辣妹,一夜情

arab girlscool said...

This is such a nice addition thanks!!!
شات صوتي شات صوتي
عرب كول
شات صوتي مغربي
دردشه صوتيه
انحراف كام
منتديات منتديات عرب كول