ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

طهقان الأخضر

حكمة اليوم

أنا و طهقان و الداخل بينا خيبان
-------------------0o0--------------------


سيداتي انساتي سادتي صباح الخير للي عنده صباح و مساء الخير للي عنده مساء و عصر الخير للي عنده... يووه بقى السلام عليكم و رحمة الله و بركاته و من الاخر انتم عارفين اننا في شهر فضيل الصوم فيه واجب و النوافل فيه مستحبة و كذلك كل دروب الخير من صدقة و قراءة قران و دعاء و اطعام الفقراءو.... ايوة جينا لمربط الفرس من اول رمضان يا سادة و انا مكلبشة في المطبخ بكلبش دوبل رجل في البوتاجاز و الرجل التانية على الحوض و من ساعة ما افتح عنيا طبيخ اشي حلو و حادق و محمر و مشمر



واحد من الجماهير يسالني طيب ليه كده يا طوطة؟ انا عارفاه الواحد ده كل مرة يسالني ارد عليه و اقوله اصل يا سيدي سي طهقان نور الله وجهه كل يوم يعزم حد من قرايبه او معارفه او اصحابه على الفطار و معني انه عازم حد يعني بالميت اللي حيجي حداشر اتناشر نفر ..طبعا ما هو سي طوطو عمدة الطهقانين في قاهرة المعز.. و لو انا اشتكيت او قلت الرحمة يا خلق يا هو.. يقولي انت مش عايزة تطعمي و تخدي ثواب افطار صائم


يعني يا ناس الواحد يفطر ناس اغنياء و لا يعمل وليمة للفقراء بس تقولوا لمين الواجب واجب و لابد منه


المهم يوم الجمعة زوجي المغوار قابل الاستاذ محسن على باب الاسانسير بعد صلاة الجمعة و اخده في ازيك؟ عامل اية؟ مما اصفر عن عزومة على الفطار هو و الست حرمه المصون


اه ياني!! معني ان الاستاذ محسن يجي يعني اتحاد ملاك العمارة الخمستاشر دور كلهم عندي على الفطار.. اه ما احنا في رمضان و اللمة حلوة و كسر وسطي واجب وطني لابد منه



و علشان انا مسحوبة من لساني و عمالة اقول عندي شغالة ..عندي شغالة البت طفشت مني و من شهرين تلاتة و انا العب دور اوشين في جميع المحافل الدولية


حدش يعرفلي عنوان مخدماتي بريمو لحسن خلاص بدأت اسرب و الكوع اتشرخ



دخلت المطبخ و ضربت الاسلاك الشائكة على الباب و لغمت العتبة و خطيت عشر شولة رمل قدام البوتاجاز..علشان سي طوطو ميجيش ينط في قفايا و يقولي بتعملي اية؟ حاكم مش مستحملة كلمة منه و انا في الورطة دي


و قررت اعمل صنفين خضار ..بامية باللحمة الضاني و ملوخية بالارانب و صينيتين رقاق و شوية مقبلات على جنب كده و طبعا بكميات كبيرة علشان يكفي الجرمق القادم غير العصائر و الخشاف بتوع كل يوم


و يادوب خلصت و الرز اللي بالشعرية على النار بيتشرب و يدق الهاتف


ترن ترن



طهقان: الو.. ايوة ..اهلا وسهلا.. يا خبر... طيب... حصل خير... تتعوض ..مع السلامة


انا: مين يا طوطو؟


طهقان: ده الاستاذ محسن


انا : مالة بيقولك انه عزم الشارع و الشوارع المجاورة عندنا النهاردة


طهقان: لا يا طوطة ده بيعتذر اصله افتكر انه معزوم عند حماته على الفطار النهاردة


مرشات عسكرية و غيوم في منطقة المطبخ تتجه نحو الريسبشن مع احتمال هبوط كبشات على الدماغات


و دخان يتصاعد من انفي لا اعلم مصدره اجزكتلي.. مع شرار قادم من مقلة العين اليسرى و جحوظ في العين اليمنى و تشنج في الحاجبين اللي نزل نزل و اللي طلع طلع


انا: نعم...و الاكل اللي انا عاملاه ده كله مين حياكله!!!0


طهقان: و ماله يا حبيبتي نفطر بيه


انا:افندم؟! نفطر بتلاتة كيلو بامية و تلاتة كيلو ملوخية و اربع ارانب و صنيتين رقاق و اربعة كيلو رز!!!!سيادتك


طهقان: لا ما احنا حنبعت لبتاع الجراج و البواب و ميمي الحلاق و الست جارتنا و ننزل شوية لمأدبة الرحمن اللي على اول الشارع



---0---


و قد كان يا سادة يا كرام ما يحلى الكلام الا بذكر


النبي عليه الصلاة و السلام

وزعت الاكل و بقيت الملوخية لصعوبة نقلها الا في زجاجات مع احتمال الدلدقة و الزروطة

ثلاثة كيلو ملوخية فطرنا و اتسحرنا بيهم جمعة و سبت و احد و باقي حلة حنفطر بيها الاتنين ان شاء الله علشان يحرم طوطو يعزم


الغريب في الامر اني الاحظ على طهقان بعض الاشارات الغريبة فقد تحول وجهه للون الاخضر و اثار تقلية التوم يسمعها و يراها اي كفيف مع تصاعد ادخنة خضراء في سماء غرفة النوم
عايزة اوديه لدكتور تقريبا محتاج يغير المنظم

و دي نهاية كل اللي يعزم الاستاذ محسن


و السلام عليكم و رحمة الله و بركاته

إمضاء طهقانة




62 comments:

حــلم said...

بوست زى السكر
:)
تحفة بجد يا بسكوتة.. مغامرة طبيعية واردة الحدوث فى كل بيت يحتوى على مطبخ
:)
كل سنة وانت طيبة

البدراوى said...

عموما اديكى اخدتى ثواب يا طهقان فى البواب وميمى الحلاق
ويجعله عامر ان شاء الله
رمضان كريم

سجدة said...

هههههههههه
والله انتى ست طيبة
ومعلش يا ستى اديكى اخدتى الثواب
المهم النية
بقولك ايه بلاش تقولى ان طوطو بيعزم ناس كتير
احسن تلاقيه عازم كل المدوننين مرة واحدة فى البيت ساعتها بقه ولا اربعة كيلو ملوخية ولا عشرة هيكفوا
كل سنة وانتى طيبة وفى سعادة

lamada said...

هههههههه
عسل والله يا طهقانه
بس انتى وطهقان متفقين علينا ولا ايه
نازلين على المحمر والمشمر واحنا ناس غلابه صايمين ولا دى تصبيره يعنى لحد الفطار الى يجوع يدخل يبص لطبق الملوخيه والارانب شويه
يا سلاااااااام
ريحت التقليه داخله فى نخاشيشى وصلالى لحد هنا
تسلم ايديكى يا ست الكل
بس الرحمه يا عم طهقان شويه صراحه العزومات فى رمضان تقطم الوسط والجيب
وياست طهقانه انتى ليكى الجنه لسببين اول سبب طبعا انتى عرفاه
تانى سبب انك فطرتى الناس دى ومن قدم شىء بيداه التقاه
وهنيالك يا فاعل الخير

Ahmed Mubarak said...

طب كويس..من ناحية تانية..ارتحتي انك تطبخي كل حاجة كذا يوم
:D:D:D
بايت بايت مش مشكلة.
رمضان كريم

سمـــــــــــا said...

هههههههههههههههههه بجد سكر بس معلش بقى ادى اخرة اللى يتجوز انتى المفروض انتى دبحتيله القطة من الاول وعملتى فيها القطة البراوية ولما يحب يعزم حد قوليله عيونى يا حبيبى وتعملى الاورد كله من ابو شقرة ولما جيبه هيتلسع بعد مرتين قولى تلاتة بالكتير هتلاقيه لوحده قاطع كل الناس

طب ممكن تباصلينا انا وناردين حلة الملوخية اللى فاضلة دى علشان بنحبها اوى :))

تحياتى بوست عسل

My Hope$ said...

جوعتيني يا طهقانة
باين عليكي طباخة متفوقة بسم الله ماشاء الله
يابنتي هو اطعام الصائم ثوابةكبير وكل حاجة
بس طبعا مش لدرجة انك تتعبي نفسك كدا
حرام عليك ياطهقان
ادخل ساعدها ولا اعمل السلاطة حتي
يلا
سلام

simple girl.. ..simple dream said...

بوست جامد كالعادة
انا فعلا بئيت بستنة بوستاتك زى ما بستنى سوبر هنيدى كل يوم على القناة الاولى
انا اصلا لسة عاملة بلوج جديد ومن الاسباب اللى كبرتها فى دماغى هو اعجابى بكتاباتك
ياريت بئا تنورى البلوج بتاعى وتبوصي عليه وتقوليلى رأيك

شهيدة said...

كالعادة بوست جميل جدا

واسلوب أجمل

بجد معاكي حق

التدبيس في العزايم حاجة مزعجة جدا

بس هنا في البيت عندنا بابا اللي بيدبسنا في العزايم عادة... هههه

الواحدة بجد بيتقسم ضهرها نصفين ورجليها بتتورم
.....وووو

بس برافو عليكي عرفت تعملي ايه في الآخر

بس اقلك استني شوية على ما تاخدي الأستاذ طوطي الى الدكتور عشان يفتكر الحكاية دي لأطول مدة ممكنة

ههههه

موفقة دائما

امضاء شهيدة :)
اورفوار :)

shahy said...

خفة دمك كالمعتاد

حصل معايا الموقف دة قبل كدة بس انا بقى جوزي عزم الناس ونسي ياخد منهم الاوكي ولقيتة داخل لوحدة بدون اي حد واول حاجة قالهالي
ماتزعليش هاناكل احنا كل الاكل دة وقعدنا اسبوع ناكل في اكل العزومة بس احنا مكناش في رمضان

تعيشي وتاخدي غيرها

تحياتي

آخــر قــرصان said...

تحياتى ليكى
مدونتك اكتر من رائعة
فى هدية بسيطة ليكى
اتمنى مرورك على مدونة العبد لله المتواضعة..
مش حرضى الا انك تاخدى الهدية ومستنى رأيك فيها
اتمنى دوام التواصل ..
وسلاموووز

Desert cat said...

هههههههههههههه
وحشتينى والله يا طهقانة
معلشى بقا يا حبيبتى
كل رمضان وانتى طيبة

مواطن زهقان said...

هههههههه
بجد بوست دمه خفيف جدا

وكل سن وانتى طيبة
بالرغم انها متاخرة

أسامه يوسف said...

ياعينى
بعد الغلب ده كله
وأنا أقول Hulk متغير شويه
ده انا اتوغوشت عليه "حلوه اتوغوشت"
بس انت وقعتى بلسانك
بتعزمى كل يوم ناس
طاب مافيش يوم لينا احنا زمايلك فى التدوين
وانا على فكره فاضى الاسبوع الجاى للى عايز يعزمنى

صحيح انت نسيتى الساطور أول ماغيرتى ديزاين البلوج ليه حد يتخلى عن المبدأ بتاعه

Esmat said...

سلام يا جميل عليكى
إيه يا عسل الطعامة دى والله انا اعتذر إزاى لم ادخل عندك من قبل
كل سنة وانتى وطهقان طيب
معلشى الاعمال بالنيات وتعبك مش حيروح على الفاضى لكى الثواب برده
ومالها الملوخية اه لو قولتى لى كنت اخدت جوزى وابنى وعلى اول طيارة وبقينا عندك ويجعله عامر
والعزومة الجاية للاستاذ محسن لازم تبيتوه من بالليل عندكم فى الشقة وتربطوه حتى موعد الفطار
علشان تعبك يا جميل
و ديما عامر

القلم السكندري said...

كان الله في عونك يا طهقان

ملوخية لمدة 3 ايام؟؟؟

اصبر واحتسب

الا هو الأستاذ طهقان مش هيعزم المدونين بالمرة ولا ايه؟؟

كل سنة وانتي طيبة يا أستاذة طهقانة

انا كنت مستنيلك بوست في اول رمضان نقولهالك فيه بس انتي السبب في انها جت متأخر

تحياتي

Mustafa Şenalp said...

very nice a blog.:)

Mohamed_sobhy84 said...

طب ملوخيه ماشي برغم اني مبحبهاش
بس في رمضان يتاكل اكل متحنط 3 ايام
انا من وجهه نظري ان من اسوأ الاختراعات اختراع التلاجة
كان زمان ىالاكل بيتاكل صابح
دلوقتي لازم يتحنط 3 او 4 ايام يتاكل فية
و بالنسبة للخضار ممكن يشوف اي بلد هتنتج فيلم الرجل الاخضر و يروح يمثل البطوله اهو يوفر تمن المكياج من الانتاج

دماغ حرة | Free Brain said...

يخرب عقلك يا طهقانه .. زي العسل .لا بجد استمتعت وانا باقرا التدوينه دي والتدوينات بتاعتك كلها بشمل عام يعني انا لسه دي تالت زيارة لي ولا حاجه ..
لا بس جبتي رجلي !! في مدونات الواحد اول ما يقرا فيها دقيقتين يلاقي الماوس طالع لوحده عالفيفوريت وبيكليك على آآآآد ...
وعايز اقلك حاجه بقى
بكرة عم طهقان ده لما يجيلوا عقد عمل في الصومال ولا حاجه هتقعدي فاضيااااا وتقولي فينك يا طهقان يا خويه .. يا مونسني يا مطهقني .. ياربي كان ضل راجل .. وتقعدي خايفه عليها من بنات الصومال ومن شقاوتهم ومش بعيد نلاقيكي بعديها بتدوني من هناك ..

على رأي المثل
لو كان جوزك طهقان وانت طهقانه منه اعملي مدونه واكتبي وكده يعني

مثل جميل والله

مستني حاجه جديده يا طهقانه متتأخريش والنبي

علوة said...

انا جعت

المهم بتعرفي تطبخي بعد الفيلم ده كله ولا ايه

لا انا دلوقتي بس تأكدت إن طهقان لازم يجي الجيش معايا
ومش ظابط احتياطي .. لا

أركان حرب

صباح الفل

imagine said...

سلام
طهقانة ازايك النهار داه،هوّا طهقان ليسّا عايز يعزم حدّ تاني بعد العزيمة الحلوه دي وللا خلاص حرّم؟
على كل حال البوست بتاعك حلو جدا جدا،وربنا يكون في عون كل الطهقانات يا رب وينتقم من كل الطهانين الظالمين.هاهاها0
سلام

Echo Of Silence said...

بوست جميل كالعادة
وربنا يكون فى عونك يا جميل
وكل سنة وانت طيبة

على فكرة انا متابعك من زمان - بس مش كنت بعلق - بس كان لازم اقول
رمضان كريم
وانت كريمة وكمان طهقان كريم
والاكيد الاكيد ان الله اكرم
باى

sha5abet said...

هاى هاى طهقانه
انا بجد طبعا متابعاكو من زمااااااااااان اوى
بس انا كنت بسيب الكومنتس عند طهقان
عشان انا مكنش عندى بلوج
عندى سبيس بس
بس مش عايزه اقولك انى عملت بلوج مفيهوش اى حاجه
بس عشان اسيب كومنتس :)
وببعتلك السلام مع طهقان
اللى اكيد مش بيوصله
انا اسمى sh5abet
شوفيه كده كان بيوصله ولا لاء؟
سمعت كده انك بتقولى ابعتولى على الميل
والله بجد عايزه اخد ميلك
بس ازاااااااااااااى؟
انا مش عارفه هو فين الحقيقه
ياريت الطريقه اللى ممكن اخده بيها
يلا سلام :)

عصفور اسكندرية ( المواطن المطحون ) said...

السلام عليكم
كل سنه وانتم بخير

بجد مدونه ملهاش حل
والتدوينه دي هههههههههههههه
ربنا يكون في عون الراجل الاخضر 3 كيلو ملوخيه ايه الكرم دا
بس سؤال انتي قطفتي الملوخيه دي في اد ايه وخرطيها في اد ايه

...................
بجد مدونتك تحفه واسمحيلي ابقي قارئ دائم هنا الي ان يشاء الله

truelove said...

ياستي اعتبري نفسك عملتيمائدة رحمن للفقراء وانا بتضامن معاكي من اجل خملة لا للعزوماتن في رمضان ربمضان عبادة وبس ياعالم نبقى نتعزم طول السنة حرام

Doba said...

ربنا يديكى الصحة ويوفقك
رمضان كريم
وكل سنة وانتم طيبين

بالراحة شوية يا طهقان عالموزة كده حرام

كفاية - حرام

يلا باى

الشنكوتي الكبير said...

ربنا يعوضك
ابقي لما يفيض عندك حاجه ابعتي لأخوكي الشنكوتي الغلبان
ده انا بحب الملوخيه قوي
سلااااااااااام

الفتى رحال said...

بوست اكثر من رائع

كتاباتك اكثر من رائعه مما اجبرنى على الأشتراك والرد

كل الود لشخصك

رحال

mesh2dra said...

السلام عليكم

حضرتك "ث"كر يا طنت
بصي يا بستوكة
انا المرةد دي حقول الحق
ذنبه إيه اونكل طهقان
ما هو الراجل هو اللي اعتذر
صحيح هو عزم الراجل من غير ما تتشاوروا:P

انا لو منك كنت وديتلهم الاكل في بيتهم
اشركتهم في الملوخية اللي استمرت 3ايام
طب العيال ذنبهم ايه


سلاماتي لاونكل طهقان وللعيال
:)

Anima said...

اصله مش نباتي يا حبيبتي

طيب ما تعزميني المرة الجاية انا و المدونين اصلي نفسي ادوق الملوخية

Ma-3lina said...

طيب كنتى انتهزتيها فرصة و عزمتى البلوجرية و اهو احنا برده تجوز علينا الصدقة هههههههههه

alnagar said...

بوست رائع
مدونة جميلة

سهر الليالى said...

كل سنه وانتى وطهقان بيه بخير
وخصوصا بعد سيل الملوخية دة
:D
بس الحمد لله ربنا حقق لك امنيتك ووصل الاكل لمائدة الرحمن
بس قوليلى انتى عملتى كل الاكل دة ازاى
ربنا يديكى الصحة

يا مراكبي said...

ما لكوش حق .. طيب كنتوا إبعتولي الكل ده وإعتبروني مائدة رحمن برضه وألا حاجة

:-D

كويس إنها جت على الملوخية وبقى أخضر في أخضر

فيه أكل تاني بيعمل ألوان تانية .. كويس إنها جت على قد كده

julieeet said...

الله يكون فعونك عشان كل الغزومات دي

بس اديكي اخدتي ثواب



ياريت تزوريني وتقوليلي رايك

سلاماااااااااتي

إنـســانـة said...

بجد يا طوطة كل بوست ليكى بيثبتلى قد ايه طوطو وكل الرجالة مفتريين ويطهقوا بجد

ربنا يكون فى عووووووونك ويسامحك يا استاذ طوطو

وكل سنة وانتوا طيبين

غمض عينيك said...

لا لا عندك حق
دانتي كنتي خلتيه يتسحر كمان ملوخية
واخونا محسن ده جاي يعتذر كده قبل الفطار بكام ساعة
دانتي كنتي حبستيه هو كمان وخليتيهم ياكلوا بالاكراه وتحت تهديد الكبشة

يلا حصل خير
وكل عزومة وانتي طيبة

3abdo me7tas said...

مقدرش اقول غير

الله معاك ومعاك قلوبنا
مش فاكر بقيت الأغنية بصراحة :S
ربنا معاكى ويصبرك
:D

تحياتى

عمر said...

انهارده تبقى اول مره اتشرف بالدخول عندك وبجد اتبسط جدا ايه الزوج الجامد ده انا لو منك اخبيه عشان متحسدش بس هوه ده كده محترم جدا على الاقل احسن من المسلسل العربي القديم "يوميات ونيس"اللي خلاهم ياكطلوا مش فاكر كام طن طماطم صبح و ضهر وليل
بس انا دلوقتي لو حاولت اتخيل الموقف هصيغ الحوار كالاتي
طهقان :انتي عارفع يا حبيبتي انا قبلت مين انهارده على باب الاسانسير
طهقانه:مين يا حبييييبي
طهقان :الاستاذ محسن جارنا اللي في الدور الاول تحت
طهقانه :ها....وبعدين
اعدنا نتكلم كتير ما هوه ده الاخرتي
طهقاته ها.....وبعديييييين
طهقان :ابدا يا حبيبتي بس احنا مخصناش كلام فاضطريت اعزمه على الفطار
وطبعا مش هعزموا لوحدو
طهقانه:ايه؟
طهقان :متألقيش انا قصدي قولتلو يجيب مراتو معاه
وبعدين وهوه على الباب يكمل الصدمه ويطير
وبعد كده كل الحصل ده
كل سنه وانتي طيبه وبعدين اما انتوا كان عندكوا الاكل ده كله قوليلي وانا هاكل اي اكل زياده انتي مش عايزاه

آخــر قــرصان said...

طهقــــــــــــــــانة
برجاء زيارة مدونتى للاهمية
هذه رسالة مسجلة
مع تحيات شركة ام نبيل

aliwa said...

يا خساره الباميه با اللحمه الضانى وملوخيه الارانب والعصاير وكل الكلام الجامد ده ويا بخت الجماعه اللى كانوا فى مائده الرحمن وكل من اسعفه حظه واكل وبا النسبه للاستاذ طهقان اللى حصله من اكل جرعه الملوخيه الذايده كفى ووفى جدا

MOSLIM said...

لكى ياسيدتى
ده جوزك ده والله العظيم
ربنا يكون فى عونك

صاحب البوابــة said...

خبر عــــاجل

ألف ألف مبروك

تم فجر يوم الثلاثاء 2 أكتوبر 2007 م الافراج عن شيخ المجاهدين أبو الفتوح شوشة 86 عاماً

ومما هو جدير بالذكر أن الإفراج لم يتم إلا بعد تدهور حالة الشيخ الصحية تدهوراً خطيراً

بعد إصابته بجلطة قلبية مفاجئة وهو قيد الإعتقال في محبسه

جعله الله في ميزان حسناتك يا شيخي العزيز

------------

جاري التحديث

زوجه مفروسه said...

يخرب عقلك يا طهقانه
كنت هفطس من الضحك
كله كوم وتصاعد ادخنة خضراء في سماء غرفة النوم ده كوم تاني...

كلنا شهداء المطبخ وضحايا عزومات
هما تعبانين في حاجه

Echo Of Silence said...

دة كان تعليقى على تعليقك عندى فى المدونة
وانا اسف انى بنسخهولك هنا - بس كان لازم - وهاتعرفى لية لما تسمعى الكلام وتزوى البوست الاول او البروفيل
التعليق هو


ست الكل - طهقانة
قبل ما اقول اى كلمة- ليا عندك طلب - افتحي اول بوست فى المدونة - وشوفى رايك اية ؟
ولا بلاش دى - افتحى البروفيل بتاعى وقولى رايك - لان كدة مش حلو خالص

شوفى بقى وانا اخوكي - على راى السعوديين
بالنسبة لاحلامك ان يكون عندنا هيئة فى مصر - دة مش اسمة حلم - دة يبقى كابوس - صدقينى
ممكن نقول ياريت يبقى عندنا توعية بشكل جديد - انما تحكمى بشر على بشر وتقوليلي بيطبقوا الشريعة - لا - معلش بقى - مش معاكي خالص
مش ناقصة كبت حريات هى
وفكرى تانى فى البوست او شوفى البوست اللى جاى - وبعديها قررى - نفسك فى هيئة ولا ما نفسكيش
اورررفوااار
وكل سنة وانت طيبة

yomna said...

الاول كل سنة و انتى طيبة يا توتة
مش عارفة بمناسبة رمضان اللي قرب يخلص و لا بمناسبة العيد اللي جاي و لا 6 اكتوبر...شوفي انتى بقى و اختاري براحتك...احنا في بلد ديموقراطي

بس بجد انتى زي العسل ...انا معرفتش امسك نفسي بصراحة و انا بقرا الكلام ده..
و على فكرة كل اللي قلتيه ده هو السبب في انى مش مقتنعة بفكرة الجواز خالص و شايفاه وجع دماغ ع الفاضي...يابنتي مفيش احسن من الحرية بلا جواز بلا وجع دماغ

3ala asm masr said...

بوست هايل وياريت تقوليلنا كام وصفه كده من وصفات اكلك الجامد جدا ده

عصفور اسكندرية ( المواطن المطحون ) said...

لاول مرة بالاسكندرية : دعوة لكل مواطن ولكل مدون حر: لحضور .............

ملتقي الدفاع عن سجناء الراي وحقوق الانسان بالإشتراك مع ....

تجمع المدونين الطامحين في وطن عربي بدون سجين رأي واحد

و بحضور نخبة من الصحفين والسياسين والمدونين

فرصه حقيقيه ليجتمع المدونين مع بعضهم البعض

ويعلنوا تضامنهم مع حرية الصحافه والكلمه في مصر

موعدنا : الجمعة 18/ 10 الساعه 5

بنادي المحامين بجليم كورنيش البحر الاسكندرية

اعلن عنا في مدونتك

الأميره أوسه said...

يـــعنى هى جات عليا
مش تعزمينى أنا بموت فى الأرانب
طيب أعزمينى وأنا هاقولك متشكره
أيه حكاية الدخان الأخضر فى البلوج بتاعك ده
دى آثار الملوخيه
بس الملوخيه دى مش حلوه الظاهر نسيتى تشهقى أنا لما اعمل ملوخية
شــهقتى بتزلزل البيت
تعيشى وتطبخى

HafSSa said...

لوووووووووووووووووووووووول
مش معقولة يا طهقانتي كل مرة بتفطسيني من الضحك كده
لكن المرة دي بجد صوتي طلع ف يالمكتب و المدير زغري لي بعنيه

بجد دمك عسل و اسلوبك تحفة
معلش بعد كده ابقي انتي اتصلي بالمعازيم و اكدي عليهم بدل تعب القلب ده
انا حروح عند طهقان و اسمعهولك كلمتين على جنب

اوفيديرسيهين
يعني اوروفوار بالالماني

عصفور اسكندرية ( المواطن المطحون ) said...

تم تغيير الميعاد
لاول مرة بالاسكندرية : دعوة لكل مواطن ولكل مدون حر: لحضور .............

ملتقي الدفاع عن سجناء الراي وحقوق الانسان بالإشتراك مع ....

تجمع المدونين الطامحين في وطن عربي بدون سجين رأي واحد

و بحضور نخبة من الصحفين والسياسين والمدونين
وحضور ابراهيم عيسي
فرصه حقيقيه ليجتمع المدونين مع بعضهم البعض

ويعلنوا تضامنهم مع حرية الصحافه والكلمه في مصر

موعدنا : الخميس 18/ 10 الساعه 5

بنادي المحامين بجليم كورنيش البحر الاسكندرية

اعلن عنا في مدونتك

مدونه يلا نفضحهم

رئيس جمهوريه نفسى said...

بوست لذيذ والحمد لله الواحد قراءه بعد الفطار لحسن كان جاع ومش مشكله حتى لو الاستاذ محسن اعتزر اديكى كسبتى ثواب قد كـــــــــــده

hisham said...

نمط جديد من الكتابة
أحييك كثيرا عليه
أقرب مايكون للنص المرئى
الحوار عالى جدا
وتقريبا السيناريو شكله جاهز
حقيقى نص مكتمل المقومات لعمل تليفزيونى لطيف
عليكى حقا بالسعى فى هذا الإتجاه
لأن أدوات العمل مكتملة
واللغة تحمل سمات مرئية مكتملة
استمتعت كثيرا بقراءته
وتحياتى

My Hope$ said...

سلام عليكم
ازيك يا طهطه
كل سنة وانت طيبة
وعيد سعيد عليكي يارب
سلام

a Dreamer with feet on the Floor said...

I enjoyed reading what U have wrote. U seem 2 B a good Couple ..U and Ur man...
I wish U luck and many many happy Ramadans.....
I wish I have this Humour and sence in my family..
thx

سكوت هنصوت said...

كل سنة وانت طيبة يا بستوكة

و ياعيني على سي طوطو...الي لبس ملوخية اربع ايام متتالية

مع ان كورس علاج بيت الكلاوي بيقول يومين و تغيروا عشان الصحة العامة

يا ترى عملتي الكحك ولا لسة

koukawy said...

انتوا كان لازم تبعتوا الملوخيه علي شقة الاستاذ محسن
و يبقي يغير هو المنظم و يقرط علي البلف
هههههههههههههه

koukawy said...

او كنتي تبعتي طهقان ينام جنب الاستاذ
محسن و خليه يشوف نتيجة اللي يعتذر عن عزومه

mostafarayan said...

طيب مش كنت تعزيمميني كنت هاجي مش هعتذر

Anonymous said...

一夜情聊天室,一夜情,情色聊天室,情色,美女交友,交友,AIO交友愛情館,AIO,成人交友,愛情公寓,做愛影片,做愛,性愛,微風成人區,微風成人,嘟嘟成人網,成人影片,成人,成人貼圖,18成人,成人圖片區,成人圖片,成人影城,成人小說,成人文章,成人網站,成人論壇,情色貼圖,色情貼圖,色情A片,A片,色情小說,情色小說,情色文學,寄情築園小遊戲, 情色A片,色情影片,AV女優,AV,A漫,免費A片,A片下載

情色,A片,AIO,AV,日本AV,色情A片,AV女優,A漫,免費A片,A片下載,情色A片,哈啦聊天室,UT聊天室,聊天室,豆豆聊天室,色情聊天室,尋夢園聊天室,080視訊聊天室,080聊天室,080苗栗人聊天室,免費視訊聊天,上班族聊天室,080中部人聊天室,視訊聊天室,視訊聊天,成人聊天室,一夜情聊天室,辣妹視訊,情色視訊,成人,成人影片,成人光碟,成人影城,自拍

A片,AIO,AV,日本AV,色情A片,AV女優,A漫,AIO交友愛情館,線上A片,免費A片,A片下載,情色A片,微風成人,嘟嘟成人網,成人,成人影片,成人光碟,成人影城,成人交友,愛情公寓,色情聊天室,情色貼圖,色情,色情影片,做愛,情色,哈啦聊天室,聊天室,UT聊天室,豆豆聊天室,尋夢園聊天室,080視訊聊天室,080聊天室,080苗栗人聊天室,自拍,性愛

情趣用品,情趣用品,情趣,情趣,A片,A片,情色,A片,A片,情色,情趣用品,情趣用品,A片,A片,情色,情色

情色視訊,美女視訊,辣妹視訊,視訊聊天室,視訊交友網,免費視訊聊天,視訊交友90739,視訊,免費視訊,情人視訊網,視訊辣妹,影音視訊聊天室,視訊交友,視訊聊天,免費視訊聊天室,成人視訊,UT聊天室,聊天室,豆豆聊天室,色情聊天室,尋夢園聊天室,聊天室尋夢園,080聊天室,080苗栗人聊天室,上班族聊天室,小高聊天室

Anonymous said...

福~
「朵
語‧,最一件事,就。好,你西.............................................................................................................
..................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘

arab girlscool said...

This is such a nice addition thanks!!!
شات صوتي شات صوتي
عرب كول
شات صوتي مغربي
دردشه صوتيه
انحراف كام
منتديات منتديات عرب كول