ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

طهق منه فيه(عائلي)ه


طهقان مطحون في الشغل اليومين دول و يا دوب بيجي يتغدى و ينام و يصحى يروح الشغل تاني و يرجع يتعشى و ينام
و بيعتذر لكم عن انقطاعه المؤقت عن التدوين
الخلاصة...اني مش لاقية حد اطهقه وعندي نقص طهقان في الدم
يرضيكم كده؟؟!!
طيب اعمل اية بقى اسيب نفسي اموت !! لا طبعا لازم الاقي حد اطهقه و امارس عليه هوايتي

قوم اية...استغليت فرصة ان مجدي ابن عمتي نتاوي مبتدئ و لسة يا دوب بيحبي في عالم الشات و عامل نك نيم(اسم مستعار) جديد و متأمع بيه و مسمي نفسه قال اية
فارس الليل
و بيمشي بيه علشان يوسعه رايح جاي من ياهو للهوت ميل للبالتوك و رحت صايداه
تعالى يا ابني لما اطهق فيك شوية
عملت اسم مستعار (ده ملوش اي علاقة بالشعر المستعار دوكهه للقرع و دوكهم للفاضيين امثالي) بس كان اسم جامد حبتين

سحر العيون الناعسة

و حطيت صورة جامدة برضه و دخلت عليه الشات بوكس عند عمنا ياهو في (بي ام) بمبي و قلوب بتنطر من السما و حركات ..الواد اتدهول و ريالته بقت بتخر على الكيبورد
و قلتله اني 19 سنة و اني شبه اللي تنقرص في نني عينها نانسي عجرم و ان فيا ملامح من اللي تنشك في ركبها هيفا وهبي و سرحت بيه سرحة جامده ..شعري ابصر اية و عنيا مدرك اية و...و...و
الواد الغلبان صدق زي ما كل الرجالة الغلابة بتصدق و تتدلق على بوزها(تعبير يشبه الرجل من دول بالجردل) في عالم الشات الخيالي السرمدي المتلولو


بس و الله انا كان قصدي خير كنت عايزة افهمه ان مفيش اسهل من الكلام و اننا في عالم الكلام عندنا حروف كتير نرصها جنب بعض بالطول أو بالعرض مش شرط فيها الصدق و القانون لا يحمي المغفلين
اقصد الشات لا يحمي المتدهولين

ياما ناس قالوا على نفسهم دكاترة و هم سباكين و ياما ناس ادعوا التدين و هم حرامية و الطويل فيهم قصير و الرفيع فيهم تخين على راي نجاة البعيد منهم قريب
و بعد ما بعته المريخ في ساعتين تلاتة.. سألته
سحر العيون الناعسة: مقلتليش... ازي شروق عاملة اية؟

الواد فقد النطق و الكيبورد و ازبهل.. و بعد فترة صدمة و صمت
فارس الليل:م..م..مين؟
سحر العيون الناعسة: شروق بنتك يا مجدي


لقيته راح طالع ساين اوت من البروجرم و تقريبا طفى الكمبيوتر واحتمال يكون قطع الكهربا عن البيت و يمكن عن الحي كله
سبتله اوف لاين ماسج
يا مجدي انا طهقانة بنت خالك ..اوعى تصدق كل اللي يتقالك و اتعلم في دنيا النت دي متصدقش الا نفسك و متثقش الا فيك لان شباك النت مُتنفس لكل المرضى النفسيين اللي اعتزلوا قرقضة ضوافرهم و بدؤا يعملوا شات
و
اوروفوار

إمضاء

101 comments

أشباح في بيتي


طهقانة:الو..طوطو..انا بشوف أشباح بتتحرك في الشقة
طهقان: اقفلي يا ماما انا عندي شغل
طهقانة: الو ماما انا بشوف اشباح بتتحرك في الشقة
أمي: قومي بس جربي كيكة المايونيز اللي قلتلك عليها حتعجب الاولاد قوي
طهقانة: سوسو انا بشوف أشباح بتتحرك في الشقة
سوسو:هههههه طيب نعملك زار بقى!! استني حعدي عليكي كمان ساعة ننزل نروح تشيلز بيبقى رايق الصبح

طيب اكلم مين؟ مين ممكن يتفهم احساسي و يصدقني اذا كان جوزي مش فاضيلي و ماما و لا على بالها و سوسو بتسخر مني
يا اخوانا انا بشوف اشباح بتتحرك في الشقة و بسمع اصوات تكتكة و نقر و انا نايمة و يوم الجمعة اللي فات المخدة اتشدت من تحت راسي و صحتني من النوم ده غير الانفاس اللي بسمعها ورايا و انا واقفة في المطبخ كان في حد معايا في الشقة


الحكاية تبدأ أول ما قررت اخد اجازة من الشغل و ارتاح في البيت و اتفرغ للاولاد و لسي طوطو كنت في الاول منسجمة جدا و مرتاحة للقرار ده بس مع الوقت بدات احس بالملل و تظهرلي الحاجاتي دي.. الغريبة ان اول ما الاولاد بيرجعوا من المدرسة كل شئ بيختفي

جبت كاسيت و شغلت شريط قران لسورة البقرة طول اليوم و كل يوم.. بس احساس الخوف جوايا و الاشباح اللي بتتحرك في ركن عيني و انا قاعدة على الكمبيوتر مثلا مش قادرة اتغلب عليها

حاولت اتكلم في الموضوع ده مع طهقان بس هو بيعتبرني بخرف و مش بيديلي اي تركيز او اهتمام يعني انا لو مش ست مؤمنة كنت لجأت للدجالين و بدأت بقى ابخر و البس سبح و اعمل حركات حابس حابس دي


طيب انا سامعة صوت كركبة في المطبخ دلوقتي و انا بكتب لكم و الغريبة اني اول ما ادخل المطبخ و انور النور الصوت يختفي لا انا لازم اروح لدكتور نفساني انا باين اتجننت

بعد ساعتين


دخلت المطبخ لقيت الفازة اللي فيها الزرع واقعة على الترابيزة شوفتوا بقى في حاجة مش طبيعية في البيت اتصلت بطوطو و قلتله: انا لايمكن ابات في الشقة دي تعالى حالا شوفلك حل

و بعد شوية

طهقان: اية يا ماما جيباني على ملا وشي ليه فيه اية؟

طهقانة : شوفلك حل انا مش مجنونة انا بسمع كركبة في المطبخ و بشوف اشباح بتجري في الشقة اتصرف انا حتجنن

طهقان: طيب اعمل اية؟ اسيب شغلي و اجي اقعد جنبك و ....و بينما نحن في هذا الحوار و اذ فجأتا نسمع صوت حاجة بتتكسر في المطبخ
لا ده بقى صوت واضح و جلي و مش تهيؤات و طهقان سمعه معايا كمان

جرينا على المطبخ انا و هو لقينا البولة البايركس بتاعة السلاطة اللي كانت على الرخامة واقعة في الارض و متدشدشة ميت حته

طهقانة: (بصريخ)صدقت....انا مش بيتهيالي.. شوفت بعينك؟؟ انا لايمكن اقعد في البيت ده ساعة واحدة انا رايحة عند ماما
و فجأة

عااااااااااااااااااااااااااااااااااااااااااااااااااا ياااااااااااااااااااااااع يييييييييييييييييييييييه
فـــــــــــــــــــــــــــــــــــــــــــــــــــــــــــاااااااااااااااااااار

و في تصرف لا ارادي بحت و لا ينم عن اي شئ البتة .. طلعت وقفلت باب المطبخ على طوطو و هو محبوس في المطبخ مع الفار و عمال يخبط بهستيرية على الباب و انا ماسكة الاوكرة من برة و عمالة اصرخ
طهقان:افتحي يا طهقانة خرجيني
طهقانة:لا يمكن لو فتحت الفار حيخرج برة
طهقان:طلعيني من هنا بقول

طهقانة:لاأأأأأأأأأأأأأأأأأأأأأه


و بالاتصال ب 911 اقصد بالبواب طلع يجري و انا دخلت الاوضة و قفلت عليا و سمعت صوت طراخ و بوم و ديش و حاجات من دي و فجأة دخل عليا طوطو و هو وشة زي الجزرة و قالي

طهقان:خلاص موتناه

طهقانة:بجد احلف

طهقان: انت ازاي تقفلي عليا الباب و تسيبيني مع الفار لوحدنا اقصد في المطبخ يعني


طهقانة: علشان تصدق اني كنت بسمع اصوات و بشوف حاجات بتتحرك

طهقان:اهو كان مسليكي و عامل لك حس في الشقة

طهقانة:كده طيب انا غلطانة اني ندهت البواب كنت سبتك تتونس بيه

اما فعلا راجل يطهق
إمضاء
58 comments

حدث في مثل هذا اليوم



في مثل هذا اليوم ....من خمستاشر سنة و احنا لسة طهقانين جداد كانت الحياة جميلة رغم انها كانت صعبة
فاكر يا طهقان لما اتجوزنا في الشقة الصغيرة اللي في الدور الثامن و اللي كانت من غير اسانسير و كنا نشتري بجنيه لب و نقعد نقزقز على السلم لحد ما نوصل و نترمي على الكنبة من التعب
و لا يوم الفرح لما اصريت انك تشيلني قلتلي حشيلك من السادس و على ما وصلنا الدور السادس جبت زيت

ولا فاكر الاوضة المثلثة اللي كانت محندقة و يادوب حاطين فيها كنبة نونو و اوضة النوم اللي اضطرينا نهد بلاكونتها علشان توسع شوية و تكفي الدولاب البلاكار، و لا المطبخ كان اتجاه واحد يا رايح يا جاي مينفعش اتنين يدخلوا سوا. و الحمام بقى كان فضيحة لا ممكن ابدا تدخل الا و تسيب الباب مفتوح و اي حد معدي يمسي عليك و انت تقوله: اتفضااااال ، بس تصدق كان حمام ونس و مسلي و كنا بنعرف نتفرج على التليفزيون الاربعتاشر بوصة و احنا بنعزف احلى السمفوكيات
فاكرين نورا في فيلم( جري الوحوش) لما كانت بتقول : قطعت يا اختي كتر الاوض كنا ملمومين في اوضة واحدة دلوقت كل واحد مننا في اوضة و مبنكلمش بعض
فعلا عندها حق


القصد يا اعزائي البلوجرز اننا بدانا حياتنا -قبل عصر اللاب توب- ببساطة شديدة كاي اتنين خريجين جداد معندهمش امكانيات... لأ... كان عندنا اشتراك ابونية في مترو الانفاق و كنت اركب انا عربية الستات و هو العربية اللي قبلي و نقعد نبص لبعض من الشباك اللي بين العربيتين قال يعني الشوق مقطع بعضه بقى لحد ما نوصل
و كانت كل فسحنا تمشية و لا نجرؤ نفكر نتعشى و لا نتغدى بره طبعا ما هي عشوة برة يعني غذا عيش حاف خمس ست ايام أونروح بقى نتسحتج عند حماتي أو عند امي علشان نتغدى و نتحجج انهم وحشونا و اننا منقدرش نغيب عنهم و انت القلب الكبير و حاجات من دي.

فاكر يا طهقان لما عييت مرة و مكنش معانا فلوس نروح لدكتور و اضطرينا نبيع انسيالي الدهب علشان نشتري مضاد حيوي... لا استنى انا مش بسيحلك واللهي... انا بس بفتكر احلى ايام كنا بنميل فيها على بعض في ازمتنا و صدقني مفيش حد في الدنيا مامرش بفترات جفاف و امساك زي دي
0
طيب فاكر عم فرج بتاع الادوات الكهربائية اللي كنا بنشتري منه الحاجات بالقسط؟ كان راجل طيب انا فاكرة مرة اشترينا منه مضرب بيض تمنة حاجة و اربعين جنيه و كنا بندفع قسط 13 جنيه كل شهر. الغريبة اننا مستخدمناش مضرب البيض الا مرة او مرتين بس كان عندنا رغبة اننا نشتري كل كماليات البيت، و كنا بنفرح جدا لما نجيب حاجة جديدة زي السجادة اللي اشتريناها من اوكازيون النساجون الشرقيون.. فاكر! و لا الستارة البلاك اوت اللي جبناها من وكالة البلح بعد طول صبر و نوم في عز الشمس ما هو اصل لما هدينا البلاكونة عملنا شباك الوميتال و حطينا عليه ستارة عادية ماكنتش بتحجب ضوء الشمس
فاكر يا طوطو لما انا دخلت اوضة النوم و قفلت الباب و معرفتش افتح الاوكرة الا لما رجعت انت من الشغل و فتحتلي من برة!! قعدنا وقتها نعيط و نضحك قال يعني اخدت افراج من الحبس الاحتياطي و انت جبت ابو الغيط و جيت تستقبلني

و لا لما كانت الكهربا تقطع كانت المية كمان تقطع و كنا بنعيش العصر الحجري في القرن العشرين فاكر لما كنت تقولي : كوزيه مواه سيلفوبليه
علشان اجيب لك كوز المية تتوضا ههههههه

و لما جاتلك الوظيفة اللي في الشركة الاستثمارية و اشترينا شقة جديدة و جينا نعزل... كنا بنودع الشقة بالدموع لانها رغم ايامنا الصعبة فيها الا انها كانت اجمل ايام

في عيد جوازنا يا طهقونتي بقولك الحب الحقيقي مواقف وتشابك مش كلام... بهديك احلى هدية ممكن حبيبة تهديها لحبيبها
تعبيرا عن مدى الدفا و الود اللي بينا
ربنا يخليك ليا و تفضل طهقان على طول

إمضاء
67 comments

طهقان الأخضر

حكمة اليوم

أنا و طهقان و الداخل بينا خيبان
-------------------0o0--------------------


سيداتي انساتي سادتي صباح الخير للي عنده صباح و مساء الخير للي عنده مساء و عصر الخير للي عنده... يووه بقى السلام عليكم و رحمة الله و بركاته و من الاخر انتم عارفين اننا في شهر فضيل الصوم فيه واجب و النوافل فيه مستحبة و كذلك كل دروب الخير من صدقة و قراءة قران و دعاء و اطعام الفقراءو.... ايوة جينا لمربط الفرس من اول رمضان يا سادة و انا مكلبشة في المطبخ بكلبش دوبل رجل في البوتاجاز و الرجل التانية على الحوض و من ساعة ما افتح عنيا طبيخ اشي حلو و حادق و محمر و مشمر



واحد من الجماهير يسالني طيب ليه كده يا طوطة؟ انا عارفاه الواحد ده كل مرة يسالني ارد عليه و اقوله اصل يا سيدي سي طهقان نور الله وجهه كل يوم يعزم حد من قرايبه او معارفه او اصحابه على الفطار و معني انه عازم حد يعني بالميت اللي حيجي حداشر اتناشر نفر ..طبعا ما هو سي طوطو عمدة الطهقانين في قاهرة المعز.. و لو انا اشتكيت او قلت الرحمة يا خلق يا هو.. يقولي انت مش عايزة تطعمي و تخدي ثواب افطار صائم


يعني يا ناس الواحد يفطر ناس اغنياء و لا يعمل وليمة للفقراء بس تقولوا لمين الواجب واجب و لابد منه


المهم يوم الجمعة زوجي المغوار قابل الاستاذ محسن على باب الاسانسير بعد صلاة الجمعة و اخده في ازيك؟ عامل اية؟ مما اصفر عن عزومة على الفطار هو و الست حرمه المصون


اه ياني!! معني ان الاستاذ محسن يجي يعني اتحاد ملاك العمارة الخمستاشر دور كلهم عندي على الفطار.. اه ما احنا في رمضان و اللمة حلوة و كسر وسطي واجب وطني لابد منه



و علشان انا مسحوبة من لساني و عمالة اقول عندي شغالة ..عندي شغالة البت طفشت مني و من شهرين تلاتة و انا العب دور اوشين في جميع المحافل الدولية


حدش يعرفلي عنوان مخدماتي بريمو لحسن خلاص بدأت اسرب و الكوع اتشرخ



دخلت المطبخ و ضربت الاسلاك الشائكة على الباب و لغمت العتبة و خطيت عشر شولة رمل قدام البوتاجاز..علشان سي طوطو ميجيش ينط في قفايا و يقولي بتعملي اية؟ حاكم مش مستحملة كلمة منه و انا في الورطة دي


و قررت اعمل صنفين خضار ..بامية باللحمة الضاني و ملوخية بالارانب و صينيتين رقاق و شوية مقبلات على جنب كده و طبعا بكميات كبيرة علشان يكفي الجرمق القادم غير العصائر و الخشاف بتوع كل يوم


و يادوب خلصت و الرز اللي بالشعرية على النار بيتشرب و يدق الهاتف


ترن ترن



طهقان: الو.. ايوة ..اهلا وسهلا.. يا خبر... طيب... حصل خير... تتعوض ..مع السلامة


انا: مين يا طوطو؟


طهقان: ده الاستاذ محسن


انا : مالة بيقولك انه عزم الشارع و الشوارع المجاورة عندنا النهاردة


طهقان: لا يا طوطة ده بيعتذر اصله افتكر انه معزوم عند حماته على الفطار النهاردة


مرشات عسكرية و غيوم في منطقة المطبخ تتجه نحو الريسبشن مع احتمال هبوط كبشات على الدماغات


و دخان يتصاعد من انفي لا اعلم مصدره اجزكتلي.. مع شرار قادم من مقلة العين اليسرى و جحوظ في العين اليمنى و تشنج في الحاجبين اللي نزل نزل و اللي طلع طلع


انا: نعم...و الاكل اللي انا عاملاه ده كله مين حياكله!!!0


طهقان: و ماله يا حبيبتي نفطر بيه


انا:افندم؟! نفطر بتلاتة كيلو بامية و تلاتة كيلو ملوخية و اربع ارانب و صنيتين رقاق و اربعة كيلو رز!!!!سيادتك


طهقان: لا ما احنا حنبعت لبتاع الجراج و البواب و ميمي الحلاق و الست جارتنا و ننزل شوية لمأدبة الرحمن اللي على اول الشارع



---0---


و قد كان يا سادة يا كرام ما يحلى الكلام الا بذكر


النبي عليه الصلاة و السلام

وزعت الاكل و بقيت الملوخية لصعوبة نقلها الا في زجاجات مع احتمال الدلدقة و الزروطة

ثلاثة كيلو ملوخية فطرنا و اتسحرنا بيهم جمعة و سبت و احد و باقي حلة حنفطر بيها الاتنين ان شاء الله علشان يحرم طوطو يعزم


الغريب في الامر اني الاحظ على طهقان بعض الاشارات الغريبة فقد تحول وجهه للون الاخضر و اثار تقلية التوم يسمعها و يراها اي كفيف مع تصاعد ادخنة خضراء في سماء غرفة النوم
عايزة اوديه لدكتور تقريبا محتاج يغير المنظم

و دي نهاية كل اللي يعزم الاستاذ محسن


و السلام عليكم و رحمة الله و بركاته

إمضاء طهقانة




58 comments

فصل حلات

حكمة اليوم:ان كان فيه الخير ما كان رماه الطير

زارتني بنت خالتي سوسو و جوزها ادهم من كام يوم، و كانت زيارة لذيذة جدا، قعدنا نضحك لما بطننا وجعتنا و كالعادة اتلم تنتون على تنتن ..اقصد اتلم طهقان على ادهم و الاتنين حاسين انهم من معسكر الاعداء و انهم وقعوا اسرى في حرب الجواز، وقعدوا يندبوا حظهم و يفتكروا ايام العزوبية و ازاي كانوا مبرطعين شمال و يمين و مفيش لجام بيشدهم و انهم دلوقتي خلاص اتربطوا في الساقية و اتغمضت عنيهم و مش عارفين لا يفكوا و لا يهربوا
و من الناحية الاخري اتلمينا انا و سوسو في حزب اليمين على الكنبة البحري و قعدنا نندب حظنا و دار الحديث التالي:0

طهقانة: رماني ابويا ظلمني ابويا مش كنت قاعدة هنومة في بيت العيلة انا عارفة اية اللي سرعني على الجواز!!!0
سوسو: ايوة يا طوطة اتقطفتي بدري يا حبيبتي ..مش كنا فضلنا متهنيين في بيوت اهالينا ضحكوا علينا بالفستان الابيض و الطرحة
ادهم: نعم يا اختي... ده انت لو لسة لحد دلوقتي من غير جواز كان زمان السي ان ان عاملة نشرة ابحث مع الخاطبة
طهقان: ايوة يا ابني كانوا بقوا الجوز عوانس و نزلوا صورهم في روتانا سينما مع سوسو و طوطة مش حتقدر تغمض عنيك
هههههههههههههههههههههههههه
طهقانة: هو انا بعرف اغمض عنيا دلوقتي يا سوسو يا حبيبتي!! ده يصحى الساعة ستة الصبح ياخد دوا الضغط و يقعد يخرفش في كيس الدوا يصحيني، و يادوب اغمض تاني يقوم يدخل الحمام و يخبط في الباب افز من نومي تاني
طوطو: نعم يا اختي لا حوشي انا اللي بغط في نومن عميق ده انت فازعة اهلي طول الليل تفزي و ترفسي و قلتلت ميت مرة بلاش تشوفي افلام الرعب بتاعة تشانل تو علشان بتطلع على عيني كل ليلة مفيش فايدة
ادهم: اية ده هي كمان؟ دي سوسو مدمنة افلام اكشن و خلتني اشترك في اوربت مخصوص علشان تشوف افلام فان دام و جاكي شان اول باول و اجارك الله السرير بالليل بيبقى كله شلاليت و بواني
سوسو: ايوة طبعا لازم نتدرب لكم.. انتم اصلا جنس غدار و لازم كل زوجه تتسلح بسلاح الضرب تحسبا لاي هجمات متوقعة
طهقانة:على الاقل انا بشوف افلام رعب على مستوى هو بقى يا سوسو مدمن روتانا زمان و يحب موت الابيض و اسود و افلام بتاعة منى...أحمد و يقعد يدمع و يتشحتف على رد قلبي و حبيبي دائما و يحب زي عنيه افلام النكد و الفراق و القرع ده
طهقان:ايوة طبعا راجل حساس مش جلدي منحس من افلام مصاصي الدماء
ادهم: انا بقول نعمل فصل قوات و انسحاب بدل ما تقلب بغم
طهقان : انا بقول كده برضه لحسن التربنة بايخة في الحر
هههههههههههههههههههههههه
طهقانة: كويس جدا فكرة فصل القوات دي، انت تاخد صاحبك و تطلع على شقتكم و انا و سوسو نبات هنا و اهو نرتاح منك شوية
سوسو: فكرة جنان انا موافقة
طهقان: و احنا حناخد معانا كل اللي ليه علاقة بجنسنا اللي مش عاجبكم
طهقانة: ازاي بقى يا سبعي؟
طهقان: ناخد كل حاجة مذكرة في البيت زي السرير و البوتاجاز والتليفزيون و الراديو والمكيف و نسبكم توحوحوا
ادهم: ايون فكرة ممتازة و متنساش السخان و الانتريه و الصالون و نسيبهم على الحصيرة


طهقان: و ناخد الشبشب و نسيبهم حافين
ههههههههههههههههه
طهقانة: هايل جدا بس احنا معانا السجادة و البطانية و المرتبة و الملة و الاهم التلاجة و الغسالة و الغلاية و الستارة و الحلة و متسيش ناخد اللمبة و النجفة و الاباجورة و نسيبهالهم ضلمة
سوسو:ايوة صحيح و هو السرير لزمته ايه من غير ملة و مرتبة و ملاية و كفرته
ابقوا ناموا واقفين بقى على الحيطة..لا صحيح ده حتى الحيطة تبعنا ناموا على الرصيف بقى
ههههههههههههههههههههههههه
طهقانة: يا بنتي اساسا الشقة معانا هم يدوروا على جحر بقى و يتغطوا بجرنان
ادهم: الله الله انتم اخدتوا الكلام بجد و لا ايه هو احنا نقدر نعيش من غيركم و لا الحياة يبقالها طعم
طهقان:ايوة ده اللي اسمه لم الدور و اوعى تتهور لتتعور.. كده يا ابو الاداهيم بتبيعني و تحدفني في اول ملف؟!

لا ما انا كمان مقدرش اسيب طهطه امال مين يطهقني
و متنساش ان الراجل اللي ميخفش من مراته ميبقاش راجل و هم الخير و البركة و كده
تعالى بقى نشرب فنجانين قهوة في البلاكونة قبل ما يسحبوهم مننا
هههههههههههههههههههههه

=======
و هكذا يا اعزائي اثبتت الانثى ان التاء المربوطة لا يمكن الاستغناء عنها و ان المذكر لوحدة ميسقفش و ان الراجل عارف في قرارة معاميق نفسه انه ميستغناش عن الست بس مش بيعترف بكده



دي حاجة تطهق


اوروفوار


امضاء طهقانة
58 comments

النظارة السوداء و البتاع الاسود



الراجل طهقان ده طهقني خالص و مبقتش قادرة استحمله اكتر من كده و يظهر اني حضطر استخدم الساطور بتاعي في تقسيم البادي بتاعه و توزيعه على محافظات الجمهورية ليكون عبرة لامثاله من الطهقانين
من ساعة ما الشقة اللي في العمارة اللي قدام عمارتنا ما سكنت و هو معسكر في البلاكونة و شوية شوية يبني كشك سجاير و يسترزق منه بالمرة

اصل انتم متعرفوش الشقة سكنتها ست غندورة اربعينية و ده نسبة الى انها عندها اربعين سنة مش انها ام اربعة و اربعين بس ست من اللي بيترسموا على علب الصابون اللي هي يعني صحتها مسعداها و عندها الرئتين مليانين هوا نقي مش عادم سيارات و ميكروباصات زي حالتنا و بتتعامل مع كوافيرهرجي بريمو تشطيبه نضيف سوبر لوكس
لا و الاكادة انها على طول حرانة ،طراوة مش طراوة هي لابسة بتاع كده قصير اسود بحمالات و دايرة بيه في الشقة و مفتحة الشبابيك و لافة شعرها بالبكر تونتي فور اورز و عمكم طهقان مركب في عنيه تيليسكوب مش علشان يشوف هلال رمضان -كل سنة و انتم طيبين -لا بس علشان يحدد مقاس الشقة بالسنتيمتر المكعب
و علشان يسبك الدور اشترى نضارة شمس سودا علشان معرفش عنيه بتبص فين و مجلة نص الدنيا و قاعد في البلاكونة قال اية بيقرا ،سبع ايام بيقرا نفس المجلة باين حيمتحن فيها
طهقانة: ادخل من البلاكونة يا طوطو شمس عليك
طهقان: هه..لا اصل انا بتشمس
و بالليل
ادخل من البلاكونة يا طوطو برد عليك
طهقان : لا اصل انا بتهوا
و مش قادرة اقوله انت قاعد تبص على الست جارتنا دي لحسن يعملي فيها يوسف وهبي في فيلم اعترفات زوج و يقولي كده تشكي فيا يا نظنظ
و قاعدة بقرقش على سناني مستنياه يقع في غلطة و اهو حصل
الاسبوع اللي فات قلتله
طهقانة: مش حتيجي معانا النادي علشان تمرين الاولاد يا طوطو؟
طهقان: لا انا حقعد اتفرج على الماتش
طهقانة : براحتك يا روحي
و شوية و بصيت لقيته بيلبس و خارج
طهقانة: الله.. مش انت قلت مش خارج؟
طهقان: لا اصل افتكرت ان الحلاق حيمشي اقصد حيقفل اقصد حيبقى فاضي ساعة الماتش و اهي فرصة احلق
طهقانة: طيب(الله يطولك يا روح)0
و طلعت ابص عليه من البلاكونة لقيته فتح كبوت العربية و واقف يبص على العفشة تقريبا وحشته قال يطل عليها
الغريبة لا بيغير زيت و لا بيزود مية امال اية !!اه ده مشبه عليا العنكبوت اللي بيفرش شبكته علشان يصطاد الدبانة
شوية و لقيت الست الغندورة جارتنا نازلة تتمخطر ببتاع كده لابساه بلبيسة او يمكن دهنت جتتها زيت تموين علشان تعرف تدخل جواه و حاطة احمر و اخضر و حمصي و اللي فرحني اني اخيرا شفت شعرها من غير بكر، و ندهت على السايس جاب لها العربية و عمكم طهقان واقف يرمقها بنظرات حالمة تميل الى الكوابيس و ملزق حواجبة بالسوليتيب لفوق اصله خايف ليربش و يضيع عليه ثانية من المشهد و فاتح بقة خمسة و اربعين درجة و امطار من العرق بتنهمر على سحنته باين من هبو الصدمة

اعمل اية يا ربي ارمي روحي عليه من البلاكونة اجيب اجله بس الخوف اني اتعور، طيب ارمي عليه انبوبة غاز خسارة دي بالشئ الفلاني ده غير اني مركبة غاز طبيعي و معنديش انابيب ابقوا فكروني اوصي حد نازل من العرلق يجيبلي معاه سيارة مفخخة تنفع في يوم زي ده
المهم الست طلعت بالعربية و سي طوطو وراها
حيطلعلي واحد من الجماهير يقولي ان بعض الظن اثم مش يمكن الراجل رايح يحلق فعلا و الست نزلت صدفة
حقوله سيادتك لو سمحت اقعد لنا على جنب علشان سي طوطو رجع بعد نص ساعة من غير حلاقة و لا غيره قال ايه ميمي الحلاق زحمة و قال يروحله بعدين ما احنا مش حنخلص كل نص ساعة ينط في الشارع على حس الحلاقة مش كان يبقى اقرع و يريحني
و دي ميزة الراجل الاقرع للستات اللي مبتقدرش الصلع لا يقولك رايح احلق و لا اصبغ و لا افرق هو الفرق عنده رباني
المهم الست الغندورة جارتنا زودتها قوي و كل يوم البتاع ابو حمالات يقصر عن اليوم اللي قبله مش فاهمة بيكش في الغسيل و لا هي اللي بتطول حاجة تطهق بصحيح
و عملت خطة محكمة و لمحتها بتجهز نفسها تنزل قمت نطيت نزلت الشارع قبلها و قعدت اتكلم مع البواب في اي كلام لحد ما نزلت
اخدتها في اهلا وسهلا و العمارة نورت و اموة اموة و..
طهقانة: ان شاء الله تكوني مبسوطة في الشقة الجديدة
الغندورة: اه جميلة جدا
طهقانة: بس انا ملاحظة انها قبلي و يظهر حر حبتين ده انت يا حرام مش طايقة هدومك و طول النهار لابسة اسمه ايه ده ...هي هي هيء مش خايفة يا حبيبتي يجيلك برد في سلسلة ضهرك و لا انت مركبة سلسلة ابلاتين هاهاها انا بس خايفة عليكي لحسن بعدين يجيلك روماتيزم في ركبك و لا التهاب رئوي في صدرك و لا....0
الغندورة: فرصة سعيدة خالص باي(وشها احمر و اتكسفت طلع عندها شوية دم)0

يومين اتنين يا اخوانا و كان الجنود البواسل لشركة قبنوري النوري كونوري بيركبوا التند على الشبابيك بتاعتها و لا خط برليف قطعت عن سي طوطو مية و نور و حرمته من لذة العبور و رجع تاني يقعد في الليفنج و اعتزل قاعدة البلاكونة

طهقانة: الشمس حلوة برة يا طوطو ما تطلع تتشمس
طهقان: لا ما خلاص
طهقانة: خلاص اية؟
طهقان: اصل الشمس غابت اقصد بقت حامية
و بالليل
طهقانة: الجو حلو برة.. ما تتطلع تتهوا
طهقان: مش عايز اتهوا و لا اتنيل سيبيني في حالي

شاهدين عليه يا اخوانا طهقني موت مش عارفة اعمل معاه اية




امضاء


طهقانة
53 comments

اللي على راسه بطحة



مخبيش عليكم اول ما اتجوزنا مكنش كده كان سريع و طالع نازل فريرة لكن من ساعة ما الحر هجم و هو اللي جاله جاله و كل يوم و التاني راكن و لا بيصد و لا بيرد و مش راضي يشتغل و غلبت اسايس فيه و اجيبله كل اللي ممكن يحركه مفيش فايدة واقف محلك سر مش عارفة من السن و لا من الحر و لا من كتر ما تعب ماهو اصله بقاله حوالي 14 سنة شغال مبيونش
طهقان: ايه ده يا ست انت!!!! انت لسعتي و لا اية؟
طهقانة: في اية يا طوطو ناكش شعرك و ودانك حمرة كده ليه ده انا بكتب بوست جديد اية مزعلك
طهقان: مطهقاني و فضحاني اول و تاني و مجرساني اون لاين من المحيط للخليج و اخرتها معاكي
طهقانة: اية اللي فاضحك يا طوطو؟
طهقان: هو الواحد اكمنه زهقان حبتين و قرفان و ملزق من الحر تقومي تجرسيني بالشكل ده
طهقانة: شكل اية يا راجل انا جيت جنبك
طهقان: اهو ما انت كاتبة اني لا بصد و لا برد
طهقانة: اه هيهيهيهيهيهيهي و انت اخدت الكلام على نفسك ليه؟
طهقان: امال مين يا ست انت انت متجوزة غيري
طهقانة: هو اصله مبقاش في منه رجا و لازم يتغير.. تعب بقى
طهقان: يانهار مش فايت يتغير ازاي
طهقانة: ايوة طبعا شغال من 14 سنة و بدأ يشحر حفضل صابرة عليه لامتى انا تعبت
طهقان:كده عيني عينك
طهقانة: و فيها اية بس لما نجدد و نجيب واحد جديد اسرع و احدث
طهقان: لا انت عايزة علقة
طهقانة: ما انا كمان تعبت كل يوم طالعة نازلة على رجليا لازم بقى نغير الاسنسير
عنها و لقيت طوطو احمر وبرق و قطع زراير البجاما
طهقانة: طوطو مالك يا حبيبي بتضرب دماغك في الحيطة ليه؟ هي التربنة وحشتك؟
و كمان بتعض في صوابعينك؟
لا انت بقيت تطهق خالص مالص


اوروفوار


امضاء
طهقانة
41 comments

الإعتراف سيد الميدلية

وحشتوني
لا انكر عليكم البتة ان الكوافيرهرجية اللي عملتلي العَمرة اقصد النيو لوك كانت ايدها تقيلة حبتين و حبت تشتغل بضمير فيظهر انها زودت المونة و ادتلي وشين تلاتة زيادة باين عليها كانت فكراني هربانة من قضية تموين و عايزة اتفادى لجان تفتيش طريق العلمين اكمني يعني كنت وش مصايف و ناوية اشرخ على مارينا
مطولش عليكم قولي طولي طبعا بعد ما اديت لطهقان الطريحة التمام و غسلت اثار التشوية اللي حصلي في وشي و سرحت ليفة الحمام اللي عملتهالي الكوافيرهيرجية سالفة الذكر ضربت الكاجوال و جهزت الشنط و ستفت البراشوتات و عزفنا انا و طوطو الاقلاع على اول عربية الى الساحل الشمالي يومين نكاهة بعد الغم و النكد و الخناق اللي احنا فيه
و زي ما قالوا اللي قبلنا رحت اتفسح جه ورايا يتأنزح و الأنزحة اعزائي البلوجرية كلمة عامية معناها..هم.. يعني مش عارفة
و المقصود اني بعد ما ضربت المشوار الى مارينا اللي هي المفروض قرية سياحية خمس نجوم لصفوة حرامية البلد و اللي تمن الفيلا فيها يقف بكام مليون لقيتها لمت حسالة اشاشة البلد و كل اللي معاه كام ملتوش راح و اجر فيها و ظهرت على شواطئها الحلل و الملايات المحلاوي ام كاروهات و البنطلونات الاسترتش اللي تحت الجلابية و اجري ياما على البحر بلبطي
ياختشييييييييييي
و طبعا لا مانع من بعض العبارات السانتيمنتال اللي بترشق في الودن من عينة
انتشي يا بتششش تشاعلي اطشفحي... سنتوتش المكرونة حيبرد
انت يا ياد يا ابن ال تييييييت ده من باب الهزار و الترويح عن النفس
الولد: اما عايز اتصير...الام: ماعندك البحر اهو اتصير فيه
خلاصة القول بقينا قاعدين انا و طوطو مقهورين على حال البلد اللي وقعت فريسة في ايدين الهليبة و اللي ساوت بين اصحاب الشهادات و الخبرات و المناصب مع اصحاب السيفونات و الشكمانات و النقاشة

و قلنا نهرب من هذة البوتقة محدش يسالني بوتقة يعني اية و نروح ما يسمى شاطئ السيارات و ده شاطئ مغلق لملاك الوحدات في مارينا و مبيدخلهوش غيرهم
قلنا كويس يبقى ملموم و نضيف و مش حنلاقي هناك لا محشي و لا كشري ولا حد ماسك ازازة ملوخية و فحل بصل بيمز بيه
لميت العيال و العوامات و الفوط و ترمس الشاي و الطواقي و رحنا انا و طوطو بصدر مفتوح نامل في غدن مشرق

و عاديكم
اللي حصل لا ينحكي و لا ينقرا و الناس خيبتها السبت و الحد و احنا خيبتنا ما وردت على حد و غطيني يا مامي و ميك فويس و انا لما اقلب انجليزي تعرفوا ان الامر جلل

جعمزت تحت الشمسية و ابتسامة ستة كيلو على وشي و طوطو فرد الشيزلونج و قعد يستجم و فجأة لقيت مزة –في بعض المعاجم بيسموها ملة- بتعدي من قدامنا مع سبق الاسراف و التأصد و هي لابسة ايشارب.........بس
ايون ايشارب بس و كمان الهوا عمال يفسحه شمال و يمين و اللي ما يشتري يتفرج
عنها و لقيت عنين طوطو طلعت من وشه و حواجبه طارت و قلبه خرج من صدره و بقى عمال يدق دمدم تك دمدم تك تك
قلت يا بت متنكديش على نفسك فريش فريش و احنا في رحلة
مفيش ثواني و ست ارشانة معدية بمايوه بكيني و وراها نصف دستة مايوهات بيك من غير ايني و على الشمال توبليس و على اليمين كاش مايوه من غير مايوه
يا دهوتيييييي
انا:ايه جهنم الحمرا اللي جبتنا فيها دي يا سي طوطو قوم بينا
طهقان: و احنا مالنا بس احنا خلينا في حالنا سيبي العيال يبلبطوا في البحر
انا:قوم يا راجل مفيش بحر و لا بلبطة و لا نيلة ده مصيف مهبب من اوله
طهقان: يا ستي يعني لا عاجبك الحلل و الكشري و لا الباتون ساليه اللي معدي ده
انا: اسمع رجع عنيك لمكانها بدل ما وقعهملك و اخليك تصيف في الكيت كات مع محمود عبد العزيز
طهقان:طيب يلا بينا
و سمعته بيقول بصوت واطي :ضيعتي علينا المصلحة و كلام برطمة تاني مسمعتوش
و روحنا البيت مليت البانيو و نزلت العيال تبلبط و عملت لطوطو كباية الشاي ام نعناع اياها و تاني يوم رجعنا قعدنا وسط الملايات المحلاوي و حلل المكرونة و انا كلي سعادة
صحيح يا ولاد مفيش احسن من البنطلون الاسترتش اللي تحت الجلابية و صدق اللي قال
الفقر سترة و نفسي اعرف ابن هرمة مين اللي قال البلد اللي ميعرفوكش فيها شلح و امشي فيها
و الشخص الحكيم اللي قال
قال يا ابويا شرفني قال لما يموت اللي يعرفني
و كفاية بقى

و اوروفوار
54 comments

دش في كنتاكي


الحقيقة المرة ده موقفي صعب جدا جدا و مش عارفة اتصرف ازاي حاسة اني في نص هدومي من الكسوف و ححكيلكم الحكاية من الاول علشان تعذروني و تحسوا بيا

نزلت اتمشى في النادي يوم الجمعة بصيت لقيت فريد جوز مها بيلف التراك مع واحدة اسمها هالة مرات مدحت و دول كنت اتعرفت عليهم في عيد ميلاد جارتنا و معرفتي بيهم سطحية

وقال هاتك يا ضحك و هزار و كانهم لسة في شهر العسل ،قعدت اشمشم يمكن الاقي جوز دي و لا مرات ده مفيش
عنها و رحت زارعة فدانين درا و لبدت فيهم لما اشوف اخرتها و بما اني مش فضولية و لا حشرية و شعاري في الحياة دع الملك للمالك، قررت اعرف حدود العلاقة بين المدهول فريد و الموكوسة هالة

بعد ما لفوا التراك قعدوا شربوا عصير و سبلوا و اتنحنحوا شوية و بعد كده قاموا، رحت هوووب قايمة وراهم ركبوا عربية فريد و مشيت وراهم بعربيتي لقيتهم وصلوا بيت مها و راح منزلها على اول الشارع
اوبااا …و ليه منزلها على الناصية! و منزلهاش قدام البيت! لازم في الموضوع ان
روحت البيت و انا بقرقض ضوافري من الغيظ و بما اني مليش غير طهقان اغلس عليه و اطهقه مسكته كتفته و حكيتله الحكاية من طقطق.. لسلامو عليكم
قالي: و انت اية مزعلك؟! ملكيش دعوة
انا: ازاي مليش دعوة مش اصحابنا و لازم نوعيهم و نفوقهم و ننصحهم
هو: و فيها اية يمكن قابلها بالصدفة في النادي و وصلها ذوقيا
انا: نعم و ليه نزلها على الناصية ؟؟ اكيد حاسس انه بيعمل حاجة غلط خايف حد يشوفه
هو: لا ابدا تلاقيه نزلها كده علشان يلف و يرجع على طول بدل ما ياخد الشارع لاخره ،خليكي حسنة النية و بلاش تفكري في نظرية الخيانة اللي مسيطرة عليكي دي

كتمت غيظي في قلبي و سكت
و قررت انزل بدري تاني يوم و معايا فدانين الدرا و اقف قدام بيت هالة و اشوف اخرة الموضوع ده و لو ثبتلي ان الراجل فريد ده بيلعب بديله.. حمسكه اغسله و انشره و احذره اني حقول لمراته يمكن يرجع لعقله، و اهو الواحد يعمل الخير و يرميه البحر و يمكن يقعدلي في سي طوطو لما يلعب في عداد عمره و يفكر يلعب بديله

وصلت لقيته بيركبها عربيته شوفوا البجاحة كده في وضح النهار و شرخوا على كنتاكي ، و انا …ورااااهم
لقيت سي فريد قاعد مع الست هالة و طالب لها مايتي زنجر و شوب كولا و واحد كولسلو و قاعدين يدردشوا و هيهيهيئ… هوهوهوؤ
اتفرست و اتنقط و رحت نازلة عليهم زي البراشوت
طهقانة:بغلاسة: صباح الخير
فريد: اهلا اهلا مدام طهقانة ازيك و ازي الاستاذ طهقان ان شاء الله يكون كويس و …
انا: امال فين مدام مها؟؟
هالة: بقالي كتير مش بشوفها الصراحة.. ازيها عاملة اية؟
انا: برخامة:كفاية بتشوفي الاستاذ فريد اهو برضه من ريحتها
هالة: بصتلي باستغراب و ابتسمت هههههههه
فريد : تحبي تاخدي اية؟ نايتي زنجر ده هايل و..0
انا: انا بقول نتصل بمدام مها تيجي تفطر معانا و لا اية؟
فريد: و الله فكرة بس اظن ان مدحت عنده شغل النهاردة مش حيقدر يجيبها .. و مها مبتعرفش تسوق
انا: و مال مدحت بمها ؟؟
فريد:الله مش مراته



يا نهار مش فايت اية مراجيح المولد اللي انا ركبتها دي و بتلف بيا و بعدين اية المطرة اللي بترخ فوق دماغي دي احنا مش في الصيف و لا اية؟
انا: ح. ض. ر. ت .ك بتقول مين متجوز مين؟؟
فريد: مدحت متجوز مها
هالة: ايوة مدام مها مرات مدحت انت كنت فاكرة اية؟

و افتكرت اني يوم عيد ميلاد جارتنا اللي اتعرفت عليهم فيه كان في ناس كتير و ان مها و فريد و مدحت و هالة كانوا قاعدين سوا و مش فاكرة بالظبط لما اتعرفت عليهم كان مين متجوز مين

انا :طيب استاذن انا علشان اروح اتنشف… اقصد اتمشى… سلام


و لما حكيت لطوطو لقيته اتفرس و اتنقط و ودانه الجميلة احمرت و قعد يضرب دماغه مني في الحيطة ليه بس انا عملت اية؟
ده انا كان هدفي نبيل و كنت عايزة اوعيهم قبل ما حد تاني غيري يعرف
انهم.. هاهاها …متجوزين
بس طوطو يطهق ليــــــــــــه!!!



هي دي حاجة تطهق؟؟؟؟
امضاء طهقانة
105 comments

استراتيجية الهزيمة


من يوم ما اتسرقت تدوينتي و اتنشرت في المنتديات بدون وجه حق و انا معنوياتي و معنويات طهقان في الارض و حسينا اننا متقلبين في بلدنا في كل حاجة مش فاضل غير يسرقوا الفانلة من تحت السديري والقميص ابو ست زراير و الجرفتة المقفولة
و من كام يوم حبيت ارفع معنويات طوطو شوية فقلتله تعالى نلعب كونكت فور في البلاكونة.
عنها و رحت عملاله مج شاي بالنعناع معتبر و ناصبة اللعبة على التربيزة و بسم الله نويت اتغلبله- طبعا في سري
و دي يا جماعة المدونين تسمى ((استراتيجية الهزيمة)) اللي بتنص على ان الست مننا لما تلاقي جوزها لا بيهش و لا بينش و موده واقع من الدور العاشر و معدي عليه قطر لازم تفرفشة و تهيصه و احسن وسيلة لكده انها تلعب معاه اي لعبة و تسيبه يغلب فيها علشان يفتكر نفسه عنتر و ياخد نيشان اذكى اخواته و اهو كله تدريب لقدراته النفسية و نفخ في عبقريته و نصاحته و اللي ميعرفش يقول...يلا ما علينا
و اتفقنا الفورة تبقى من خمسة و اتغلبت دور و التاني و لقيت طوطو بدأ يتحمس و يحس ان زمانه ضحكله و انه شرب من نهر العبقرية الجاري و قلت في عقل بالي اكسبي الدور ده يا بت لحسن حتبقى مكشوفه و يحس اني بتغلبله قصد و فعلا كسبت الدور التالت قام اتعدل في قعدته و قالي



طهقان: مخدش بالي اصلك مقربة اللعبة منك و انا مش شايف كويس
القصداتغلبت-بمزاجي- الدور الرابع و الخامس و السادس و هييييييييييه




طوطو كسب يا بلوجرز



العاب نارية و مرشات عسكرية



لقيت وشه احمر من الفرحة وصغر يجي عشرين سنة و بانت عليه علامات العبور و الانتصار و فرحت لان خطتي نجحت و لسة حجني ثمار الاستراتيجية لقيت سي طوطو بيرفع سماعة الموبيل
طهقان: الو..سيد...ما تيجي نسهر في النادي ...انا جايبلك لعبة حلوة قوي.... اسمها كونكت فور.... حتعجبك خالص..... طيب نتقابل بعد ساعة... سلام

يا نهار مش فايت بقى يا طوطو انا اضحي و اتغلبلك علشان ارفعلك روحك المعنوية و انت تسيبني بهزمتي و تنزل تلعب مع صحابك
و تلعب معاهم اية؟؟ كونت فور؟؟؟ يا عيني على ولادك يا مصر
صحيح يا اولاد
يا مأمنة لطهقان يا مأمنة للحلة في المزلقان

و نزل سي طوطو بمعنويات مرتفعة و رجع الساعة 12 بالليل معنوياته في الحضيض
انا: مالك يا طوطو منزل ودانك تحت ليه ؟
طهقان: اللعبة دي سمجة قوي
انا: ازاي ما هي كانت عجباك
طهقان:لا لا دي بايخة خالص ده حتى سيد كسبني 17 -2
انا:كتمت ضحكة و قلت امال فاكره حيتغلبلك زيي
طهقان : ليه انا كسبتك بشرف
أنا: كسبتني اية ده انا قلت افرفشك شوية و اتغلبلك علشان ارفع معنوياتك رحت انت النادي و نكدت على نفسك

طهقان: طيب تعالي العبي معايا فورة تانية و انا اثبتلك اني حريف فيها
انا : لااااا انا حنام تصبح على خير

و من ساعتها يا اخوانا و طهقان ضارب خيمة في البلاكونة و قاعد يلاعب نفسه كونكت فور مش فاهمة بيتدرب و لا بيثبت لنفسه انه يقدر يكسب...نفسه!!؟
مش دي برضه حاجة تطهق؟؟؟؟


امضاء



92 comments

طهقانة حتنشر علشان خاطر عنيكم


اسعدتوني بكلامكم و تشجيعكم و رغبتكم في استمرار المدونة و حسيت ان العلاقة بنا متبادلة من الامتاع انا بحاول

اسعدكم و انت بتسعدوني بدعمكم و حتى نقدكم

و هو ده المكسب الحقيقي

اشكركم و اتمنى اني اسعدكم دايما
***
اما عن اللي بينقل من مدونتي و يدعى انها مقالات ليه، فانا كشفت راسي و دعيت عليه يجيله و يحط عليه و يبقى عامل زي ملاية السرير و يا رب يا رب سرته تقع

اوروفوار

انتظروا البوست القادم غدا

استراتيجية الهزيمة

18 comments

رحلة البحث عن..فانلة



اوه ماي جاد..انا اتبهدلت اليومين اللي فاتوا دول بهدلة . حبة على لسان ميمي الحلاق و حبة على ايدين الباشمهندش طهقان ،بس الصراحة بعد اي بوست بيضرب فيه النار عليا ..بشده و اعلقه ..فبيضطر يصالحني بهدية محترمة و دي فايدة التسييح اللي بنعمله على بلوجرز
و بعد ما قال فيا بوقين حمضانين البوست اللي فات،هبشت منه مبلغ محترم نزلت اشتريت بيه هدوم للسمر و كل سنة و انتم طيبين و ربنا ما يقطعش لكم بيريود
و طلبت منه انه يفرز الهدوم بتاعته اللي في الدولاب و يطلع القديم اللي صغر عليه علشان بعد ما جبتله شوية تيشرتات بجليتر و استراس الدولاب بقى زحمة و قرب يطلع لسانه من الخنقة.0

استنيت يوم و اتنين و هو مطنش و مكسل يقيس و يفرز!! قلت يا بت مبدهاش افرزي انتي
بس.. و عنها و طلعت نص الدولاب .. اكتشفت ان في قمصان من ايام الاحتلال البريطاني على بيت ابويا- اقصد من ايام الخطوبة- و تيشرتات قديمة تقريبا من ايام ما كان في ثانوي و بنطلونات ركبتها عامله اير كوندشن و فتحات تهوية و بلاوي فوقنية و تحتنية و ربنا امر بالستر و مهما كان ده جوزي و انا فضح و غطى عليه

المهم..لميت اللي طلع كله و حطيته في تلات اكياس و نزلت اديت السايس –بتاع الباركينج- كيس و ابن البواب كيس و الكيس التالت شيلته في شنطة العربية علشان ابقى اديه لبواب عمارة ماما- كان مواصيني على فوط للكليننينج-.

و طلعت البيت حامل في الوديع و لا كاني عاملة حاجة،ما انا هدفي حسين اقصد نبيل و كل همي اوضب له الدولاب و في نفس الوقت اللي مينفعناش ينفع غيرنا و ربنا يجعل بيوت المحسنين عمار.0
جه سي طوطو اتغدى و نام و صحي فتح الدولاب
ان.. ان …اه - موسيقى تصويرية- ديج
طهقان:ايه ده... فين الهدوم؟
انا: هدوم اية يا حبي!!!-ببراءة منقطعة النظير- ده انا رتبت لك الدولاب.
طهقان:فانلاتي ...بنطلوناتي... قمصاني...وديتيهم فين؟؟؟
انا: بضحك يمكن يفك-ايه ده يا طوطو انت مالك زي ما تكون فتحت مغارة علي بابا كده و ناقص تقول ياقوت.. مرجان.. سوليتير.. ثانكس جود
طهقان :فين البنطلون المقطوع من ركبته- متقلش كده يا حبي انا قلت اير كوندشن بلاش فضايح- ده انا شايله علشان بيفكرني بيوم ما اصطدت سمكة كبيرة في شرم... و فين القميص اللي كنت لابسه يوم ما جيت اخبطك-اقصد اخطبك- وفين؟؟ و فين؟؟؟0
و قعد يعد في شوية هلاهيل من ايام الهكسوس تقولوش عامل الدولاب البوم طوابع و بيشيل فيه ذكرياته المنصرمة

كل ده و انا راسمة براءة الاطفال على ماي ايز وقاعدة قطة و ديعة و لا كاني عامله مصيبة
و بعدين لقيته سخن و احمر و وشه جاب سوائل و قال بنبرة مريحتنيش خالص البته: طهقانة....فين الفانلة المقلمة بالعرض اللي فيها بقعة كلور على كتفها....
انا: و دي عايزها ليه دي كمان دي بايظة
هو:دي بالذات ليها ذكريات لا يمكن استغنى عنها ...شوفي..كل اللي فات كوم و الفانلة دي كوم تاني
انا: اسمها تيشرت يا نور عيني
هو: متجننينيش …تيشرت.. فانلة… قرد ازرق.. انا عايزها ..تقبي و تغطسي و تطلعيها.0

بس يا اخوانا و عنها و راح لابس و نازل و هابد الباب وراه و سابني انا لنارالحيرة- بريئة مش كده؟-طيب اعمل اية و اسوي اية اند وات اي كان دو


معقول بعد ما اديت السايس جفت اقوله بليز هاتها تاني!!!0
و لا بعد ما ابن البواب راح خيط الفاتحة اللي في البنطلون اقوله افتحها تاني عايزين نركب فيها دش!!!0

اه صحيح… ده الكيس التالت لسة في شنطة العربية يا رب تكون فيه...نزلت نطيت في شنطة العربية و قعدت ادور في الكيس ملقتش التيشيرت اللي عليها الكلور..اقصد اللي عليها العين.0

تيب و بعدين...رحت للبواب و انا فيري ساد و قلتله بمنتهى الئلاطة:بقولك اية في تيشرت في الكيس اللي ادتهولك جت غلط فيها علامة سنييه على كتفها ملقتهاش في الكيس اللي ادتهولك؟؟؟0
هو: لا ابدا يا هانم ده مفيش غير القميص الدايب و البنطلون المنحول و ال....0
انا: بسسسس ...خلاص يبقى راحت في كيس تاني ..اوروفوار
*****

و مشيت و انا طهقانة يعني لازم التيشيرت الممسوحة دي يعني يا سي طوطو

بس كده مفيش غير كيس السايس رحت لقيته نايم.. صحيته و قلتله نفس اللي قلته للبواب قالي: و الله ما عارف يا ست هانم هو كان في شوية فللات بايظة عملتهم خرق لتلميع العربيات و بعد ما لمعت بيهم غسلتهم و نشرتهم في المنور
نطيت في المنور لقيت التيشرت -ام بقعة كلور على كتفها- منشورة في الوسط بس الصراحة بقت فيري فيري بيئة بعد ما اتلمع بيها الكارات

قلتله:تيب يا عم السايس دي جت غلط اسمحلى اخدها- من غير ما يرد- اوروفوار

و اخدتها و يا فكيك على فوق...اغسلها انها تنضف... ابدا
اسشورها انها تنشف... نيفر
اكويها ان لونها يرجع…ان يا باه

بس.. و رجع طهقان النان كونان و شاف التي شيرت – هي صراحة في حالتها دي بقت فاللة- و قعد حيعيط جنبها
قالي بصوت حزين منكسر: عملتي فيها اية؟؟ -
!واخدها في حضنه.. تقولوش حد من عياله
انا: فيري سوري يا طوطو ات واز اميستيك
طهقان: حرام عليكي دي كانت اول تيشرت اجيبها من اول مرتب ليا
انا:خلاص يا طوطو نو بروبليم اشتريلك واحدة تانية
طوطو: اعمل فيكي اية بسسسسسسسس
و من ساعتها و انا شامة ريحة شياط و طوطو مطلع دخان اصفر من ودانه -باين زيت الفرامل سرب على الدبرياج و محتاج عمرة متور- و ناكش شعره
و اللي طالع عليه::: يجوا البلوجرز يشوفوا و قال بيسألوا بطهق من اية؟!0






******
بجد يا جماعة بزمتكم دي حاجة تطهق؟؟؟؟
اوفكورس نوت... و لا اية؟


امضاء طهقانة


84 comments

نهيتك ...ما انتهيتك

طلب مني سي طهقان ابعتله ايميل مستعجل من البيت لان النت مفصول عنده في الشغل و ادالي الباسورد بتاعته و قالي على مكان الفايل اللي عايز يرفقه برسالته و كان ايميل عمل عادي خـــــــــــــــــالص
اللي مش عادي اني بعد ما بعت الايميل لقيت الفرصة سانحة في الدعبسة في جيوب ايميله يمكن الاقي حاجة كده و لا كده
و اللي حسبته لقيته و شفت بعيني محدش قالي و جنت على نفسها براقش
لقيت يا اخوانا في الانبوكس بتاريخ شهرين فاتوا رسالة من موقع اسمه ((زوااج))0
فتحت الرسالة لقيت فيها بيانات موزة ذات اربعين ربيعا هيفاء جعداء فيحاء و كده
و تعليق من الموقع انها تتوافق مع الطلبات اللي سعادة المشترك كان مقدمها
يطلع مين المشترك يا ترى؟؟(بجز على سناني)0
سي طوطو طبعا.. بس عاديكم و الدم غلي في عروقي و حسيت بميول دموية و رغبة في التكسير و التقطيع و التكييس
و عنها و قعدت ادعبس تاني في الاوت بوكس و التراش و كل الحافظات في الايميل
لقيت بلاوي يستاهل عليها يتركب في سيخ شاورمة و يتنسل من لحمه نسايل

و اكتشفت الحقائق التالية :البيه العتل الصنديد المقدام مشترك في موقع للبحث عن زوجة من سنتين و الموقع بيرسله بيانات كل مشتركة تضيف بياناتها اول باول و اللي تكون بيناتها مناسبه لطلباته يبعتله ايميل مفصل عنها و اكيد بيبعت لها ايميل ببيناته كمان

كده يا طوطو بعد اكتر من 10 سنين جواز لبستلك فيها الايشي و الشفتشي و الفستان ابو وردة مشمشي و هنيتك و دلعتك و انت لا كنت وش دلع و لا ليك فيه
بعد ما كلينتك و انت كنت فاكر الكولونيا دي بتتحط على الفول، بعد ما سهرتك و انت مكنتش بتسهر غير من قرص الناموس، بعد ما ... و... و....0

طيب يا طوطو ان ما لعبتك على الشناكل و خليتك تقول كان مالي و مال المشاكل
و قعد مخي يلف و لا قطر مفيهوش فرامل لا عارفة انام و لا اقوم و لا اعمل اي حاجة
و جم الاولاد من المدرسة و مفيش غدا اتعمل بعت جبت سندوتشات من جاد و وصل السبع المغوار لقاني بطلع دخان من وداني و وشي زي الجزرة

طهقان: مالك يا روحي
انا:طلعت روحك- في سري- تعبانة عندي صداع
هو: طيب متنامي شوية تريحي
أنا: طيب الغدا على الترابيزة
هو:ايه ده سندوتشات؟
انا: بالسم الهاري- في سري- مقدرتش اطبخ

و سبته و دخلت الاوضة و انا بسن سناني
افاتحه في الموضوع؟؟؟ اعرفه اني عرفت؟؟؟؟ اتصل باهله يجوا يشوفوا حل معاه؟؟؟؟
اصوت و الم عليه الجيران و اخلي اللي ما يشتري يتفرج عليه؟؟؟
لا مقدرش انا بنت ناس و مقدرش اعمل كده, اتصل بيه و اقوله اني من الموقع اياه و اشوف ميته اية؟؟؟لا مش حتخيل عليه ما
انا عملتها فيه قبل كده ده غير انه اكيد مش سايب رقم تليفونه في الموقع لزوم السكرته

مخي سااااح من التفكير لحد ما وصلت لفكره نميسه تقفشه و تبين معاميق نفسيته الدفينة


نمت و ربيت سهره و استنيته نام بالليل و قعدت ادبر له المكيده
دخلت الموقع اياه و عملت اشتراك باسم مستعار (نهى)و حطيت صورة خطيرة لقيتها على النت في برنامج شات و عملت بيناتي تحل من على حبل المشنقة و كتبت عنواني نفس الحي الراقي اللي احنا ساكنين فيه و طبعا المراسلة على ايميل جديد بنفس اسم المزمازيل نهى
و اللي هي انا بس بعد الحادثة

اوتو ماتيك بتتبعت بينات المشتركة الجديدة لكل اليوزرز التانين ، و دي اول عقدة في الخية
تاني يوم لقيت بتاع خمسة و خمسين طلب مقابلة للست نهى بس طلب سي طوطو مش فيهم
مبدئيا دي حاجة كيويسة و لو ان ممكن ميكونش شاف الميل لسه-سوء ظن عارفة-0
حاولت ادخل على الايميل من البيت اعرف فتح الرسالة و لا لا لقيته غير الباسورد ابن الحريصة
يوم.. اتنين ..تلاتة ..مفيش لا حس و لا خبر و انا واخدة جنب و بتكلم من تحت الفك الايسر و رافعة الحاجب الايمن و عاملة حظر تجول في البيت و معلقة الاحكام العرفية

رابع يوم –يوم الجمعة- قاعدين نفطر الصبح مع الاولاد و طوطي الصغير
بيقول:حلو قوي الفول يا مامي
فرد طهقان و هو حاسس ان الدنيا مغيمة و في احتمال سقوط امطار في الفسحة:ما هي مامي احسن واحدة تطبخ في الدنيا.... اماااااال!!!0
انا: من تحت عقب النضارة نظرة راشقة و ابتسامة صفراء- يا سلام
بعد الفطار نده على الشغالة: اعملي اتنين شاي و هاتيهم البلاكونة يا بنتي

و قالى بابتسامة منافقة و مسح جوخ و حليطة: تعالى نقعد نتشمس شوية قبل الصلاة
تقريبا محبش ان المطرة تنزل في الصالة و تغرق الدنيا و تبوظ السجاجيد الشنواه و حب ياخد الدش في البلاكونة
هو: مالك يا روحي شايفك معصبة بقالك يومين؟
انا: اصلي مستنية ايميل مهم و موصلش
هو: من مين يا حياتي؟
انا: من موقع للبحث عن عريس اسمه زواج تعرفه؟
هو: انااا مييين ايهه...ازاي؟
انا: مش انت مشترك فيه من سنتين برضه؟
هو: يا شيخة ده هزار ههههه انت اخدتي بالك من الرسالة اللي كانت في الايميل هههههههه دي حاجة كده تفاريح هههههه بشوف العاهات اللي بتتبعت و اقعد اضحك ههههه ميبقاش عقلك صغيرهههههه هو انا الاقي زيك لو حتى دورت ميت سنة ...اية ؟؟ انت بتقولي مشتركة فيه ؟؟ ليه بقى يا ست هانم انت عايزة تتجوزي؟-بغضب-
انا: لا ابدا تسالي هههه تفاريح هههه هزارههههه و كده
॥هو: لا لا لا لازم نلغي الاشتراك بتاعنا احنا الاتنين بلاش وجع دماغ

و انتهى الحوار على كده


لكن منتهاش الموضوع
بالليل لقيته فاتح الايميل و بخطوات باليهية رشيقة على اطراف صوابعيني جيت وقفت وراه لقيته بيمسح ايميل كان في الدرافت كان ناوي يبعته
بعنوان
الى العزيزة نهى


اطهق و لا مطهقش؟؟؟؟؟؟؟
دي حاجة تطهق صحيح
امضاء
125 comments

اقراا الحادثة

بعد مكالمة التليفون السودا اقصد الحمرا اللي فاتت لميت هدومي و على بيت ابويا عدل و طبعا لما بابا عرف اللي عايز سي طهقان يعمله قرر يرفع عليه قضية حجر و يطلعله شهادة معاملة اطفال
و بعد هزيمة الأهلى و الاربع شلاليط اللي خدناهم، لقيت يوم الاربع الصبح باب بيت ابويا بيخبط و سي طهقاااااااان لابس احلى قميص و بنطلون بينيتون و معاه بوكيه ورد مستورد من اللي بالشئ الفلاني و على وشه ابتسامة عريضة
و بيقولي: انتي زعلتي يا روحي انا مقدرش على زعلك انتي بس فهمتيني غلط
و قعد يبرر و يشرح موقفه و ان التعبير خانه و حصل سوء التفاهم ده
المهم رغم اني كنت شاكة من بوقين الحنان دول بس قلت يا بت الست مننا ملهاش الا بيتها و لازم ارجع بيتي
و احنا في العربية راجعين بيتنا قالي:عندي ليكي خبر جديد لانج
أنا :خير اية حتعزم الاستاد عندنا على الغدا ،و تبعت دعوة لاسمه اية ده يجي يشجع؟
هو: لا حزري فزري مين جي يقعد عندنا يومين
انا: مين(و بطني كركبت)0
هو:مامااااااا
انا: يانهار اسود اقصد يا خبر .....حماتي؟؟؟؟؟؟
اتاريك يا فرطوس جي تصالحني و ترجعني البيت علشان لما الست الوالدة تيجي تلاقي الأمن مستتب-في سري طبعا-0
هو:ساكتة ليه؟
انا:بلعت ريقي_من الفرحة طبعا جالي ازبهلال
هو:شوفي البيت ناقصه ايه و انا انزل اجيبه بكرة قبل ما اروح اجيبها من على المحطة
انا:طيب

و سرحت بخيالي و كاني وقعت في بير غويـــــــــــــــط و افتكرت اخر مرة جت عندنا و اللي حصل اهيئ اهيئ

حماتي ست كبيرة ربنا يدلها الصحة متعودة تصحى الفجر و متنمش تاني و لا تنيم حد في البيت و طبعا بعد خمستاشر فتح و قفل في باب الاوضة و الحمام انا بقلق و بقوم اشوفها يمكن عايزة تفطر و لا حاجة تقوم هيا مشكورة تدخل ورايا المطبخ و تقعد تسالني عن حاجة حاجة في المطبخ و ده لزمته اية؟ مش مصاريف على الفاضي! و ليه مبتخلليش خيار ؟و لية مش بتنشفي بامية ؟و لازمة الحليب البودرة اية؟ و لية معودة العيال على السندوتشات؟ خليهم يغمسوا افيد! واية لازمة الشغالة؟ده حتى شغل البيت بيجري الدم..و..و مفيش صغيرة و لا كبيرة الا و تدخل فيها و طبعا تمصمص شفايفها امتعاضا و تحصرا علي ابنها و فلوسه اللي بتترمي على الارض و مفيش مانع في السكة كده تفكرني ببنت خالته الست الشملولة اللي بتحشي الزيتون الاخضر جزر مخلل و بتعمل الرز مفلفل و اللي كان نفسها تجوزها لطهقان بس كل شئ قسمة و نصيب بقى


تخلص وصلة حشر المناخير في كل صغيرة و كبيرة تبتدي وصلة العيال..العيال دول مطولين شعرهم كده ليه؟ انت عاملاهم زي البنات!! مش حتخاوويهم بقى؟ انت مش ناوية تلحقي تيجيبي حته عيل كمان قبل ما تكبري؟ و..و..و...............يا دهوتي

اجي على الساعة 11 ابقى زي الفرخة الدايخة عايزة انام الاقيها هي نامت و هي قاعدة تتفرج على التليفزيون بس انا لازم اقوم اتربط في المطبخ و اعمل الغدا علشان النبي حارسه لما يجي يلاقي المحمر و المشمر جاهز و يتفشخر قدام امه بمراته الطباخة الجامعية البريمو
ادخل المطبخ على طراتيف صوابعي الاقيها في قفايا...... ها حتطبخي اية النهاردة؟؟؟...يا مصيبتي
و لما يوصل سبع البرمبة و يقعد معاها يودودوا و ادخل عليهم بصنية الشاي الاقيها سكتت و بطلت كلام كاني دخيلة عليهم و مليش حق اسمع حواراتهم
و يا ويلي لو دخلت انام العصرية بعد مجهود اليوم الطويل اصحى الاقيها ضاربة بوز و تقعد تلقح بالكلام ان نوم العصاري بيوجع الكلاوي و ان كتر النوم بيطخن و انها بتزهق عندنا ماهي قاعدة ياحرام لوحدها و هو يقعد يطبطب عليها و اطلع انا بنت سكستين هوهو....يا حوستي
و حسيت بهزة شديدة فوقتني
اتارية بيفرمل علشان يركن اصل وصلنا البيت
هو:حمدله على السلامة يا روحي
أنا:طهقان
هو :نعم يا حياتي
انا:بصريخ -عايزة ارجع بيت ابوياااااااا عااااااااااااااااااااا عاااااااااااااا عااااااااااااااااااا
---------------------
تحديث
الست الحاجة حماتي شرفتنا و نورتنا و ملت علينا البيت فرح و سرور طبعا حاسين بنبرة مختلفة في صوتي
معلش الجبن سيد الاخلاق
و انا ناصبة اللاب توب في الكوريدور و الست بيني و بنها خطوة و نص لا بتسلم و لا بتبص
و انا من مزنقي هذا احب ان اقول ان حماتي دي
روحي روحي روحي
و اني انام مبكرا لاستيقظ مبكرا و اغسل يدي قبل الاكل و بعده
و اللي مربتوش الايام و الليالي تربيه حماته
اختكم
مزنوقة مؤقتا (طهقانة سابقا)0
82 comments

مودي و مودك و اتفرقوا المودات


خليكو شاهدين يا بلوجرز على سي طهقاااااااااان


يوم الخميس اتفقنا نخرج نفسح الاولاد في الميريلاند بعد المغرب وهو اتغدى و نام شوية و صحي قبل المغرب لا بيه و لا عليه وشه مقلوب و حواجبه تمنيات(^^)عملت له الشاي و لبست الاولاد و لبست و هو قاعد في الريسبشن مطفي النور و عايش في فيلم الشموع السوداء و فاضل يجيبلي( روي)0


أنا: مش يلا تلبس يا طوطو


هو:ايوة(بسئالة)0


أنا: طيب يلا علشان نروح بدري(بدلال)0


هو:مستعجلة على اية هو الميريلاند حيدوّر و يطلع(بغتاتة)0


أنا:لا بس علشان الاولاد متعودين يناموا بدري و ساعتين و حيقفّلوا ،يلا قوم بقى(بدلع)0


اما اشوف اخرتها معاك يا سي يوسف وهبي القرن الواحد و عشرين(في سري طبعا)0

قام دخل الحمام نص ساعة قلت يا بت و ماله تلاقيه بيحلق دقنه و طلع من الحمام دخل يلبس نص ساعه تانية ،في الوقت ده الولد الصغير كان اكل كريم كراميل و بهدل هدومه و دخلت اغيرله


نسيت اقولكم الشغالة اجازة خميس و جمعة و انا باخد لقب اوشين لحد ما ترجع


و لما استغيبته دخلت لقيته لابس اقدم بنطلون جينز عنده و تيشرت كانت عنده من سنتين و بيلبسها لما يروح يغير زيت العربية او يشحم


قلتله :خير مكجول ليه؟


قالي :عادي


قلتله: ليه ملبستش حاجة شيك؟


قالي :العيال حيبهدلوني انسب حاجة لهم الجينز


طيب انا ذنب مامتي اية؟ تخرج معايا كده و بعدين محلقتش ليه؟


قال: بريح دقني في الويك اند


قلت : يعني طول الاسبوع تحلق الصبح و انت رايح تقابل المهندس فخري و الاستاذ لمعي و يوم ما تيجي تخرج مع مراتك تنزل بعبلك ده انت فاضل تعلق فوطة صفرا


دي كانت استفتاحية الخناقة اللي انتهت بفصل القوات و لم بطانيته و مخدته و راح نام في المغضبة اقصد في اوضة الصالون


نصيحة::: لكل حديثي الزواج يجيبوا كنبة الصالون مريحة علشان في الغالب حيناموا عليها كل ويك اند


و هكذااااا يا اساتذاااااا

اكتبوا عندكم القاعدة الفيزيائية دي
مودي كويس =مودك طهقان
مودي طهقان= مودك كويس
مودي+مودك=ليلة كحلي
ليه كده ؟باستمرار لما انا اكون مفرفشة و فاني و عايزة اضحك و اهزر الاقيك انت معكنن و ملكش مزاج و منزل ودانك لتحت

و لما تنكد عليا و توصلني لمود الطهق تبتدي انت تفرفش و تروق و كانه واجب
قومي بتحاول تؤديه باستماته كل مرة
و الغريبة انك بتستغرب قوي و تقول: الست دي منكده ليه؟
ما هو انت لو تراجع تصرفاتك الخمس ست ايام اللي فاتوا حتعرف انا اية وصلني للهم ده
و على فكرة الست مننا لما بتدخل في مود نكد بيبقى صعب تطلع منه بنكتة بايخة و كانك بتغير محطة التليفزيون بالريموت
كده تسليك كده توليع
كده تنكيد كده تهريج
لا لا و الف لا دي حاجة تطهق


امضاء طهقانة
--------------------------------------------------------------------
تحديث:::
تم نقل البوست الاول من قبل شخص يدعى تامر فرج و ذلك لمنتدى كريزي كريزي
و طبعا لم يذكر المصدر
ليه كده؟؟
حاجة تطهق بصحيح
--------------
تحديث2:::
ادارة المنتدى عملت تصحيح و وضعت اسم المدونة و الحمد لله
انا بس كنت طمعانة في عشرة جنية بدل نقل
اشتري للعيال 2 كيلو موز بس معلش البوست الجاي
64 comments