ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

الأستاذ حقنة



اكيد كلنا نعرف حد رغاي و تلم و بيتفزلك و مابيبطلش زن و قر و كلام في الفارغة و المليانة
و ده بنسمية في معجم الطهقانين:0


بني آدم حقنــــــــــــــــة

و طهقان جوزي عنده ابن خاله من النوع ده، هبط علينا ببراشوت الأسبوع اللي فات. قال اية بيخلص ورق في القاهرة الكبرى، و على السادة المقيمين خارجها حمد ربنا إنهم مش قرايبه.0


و من ساعة الأستاذ حقنة ما هبط عندنا ؛ و أنا طلعان روحي منه ،لا بيبطل كلام و لا قر و لا نق، ده غير انه حاططني تحت المكروسكوب و عمال يحلل كل تصرفاتي و كلامي و يعدل عليا.0
و يكلمني عن فلانة و علانة من قرايبه اللي بينشفوا ملوخية و بامية و بيعملوا رجل الكيكي في البيت من غير مساعدة من خدامة و لا تيك اواي.0
و يقولي إن القهوة الإسبرسو اللي بشربها دي ملهاش طعم و لا كسم ؛ و إن مفيش أحسن من قهوة السبرتاية و ريحة السبرتو المحروق تخنق اللي خلفوني علشان القهوة يبقى لها شمخة.0
ده غير الغسيل اللي مش عاجبه في الغسالة الاوتوماتيك؛ و بيحكي و يتحاكى عن غسيل أخته اللي بيرقص على المنشر و اللي بتصحى من الفجر تعلق عليه في البستله على البابور و تمرشه بالبطاس و تزهره بالزهرة، تقولوش حتأخد بيه الأوسكار؟!0
يخرب بيت كده


بيحسسني ان نص وشه عنين تنقد، و باقي وشه بق..0 ...


اما مناخيره فمحشورة في كل صغيرة و كبيرة في حياة غيره.0
و مش بس كده.. لا ده كمان مسك طهقان و قعد يقوله :ليه طهقانة هي اللي ماسكة مصروف البيت؟؟ الستات مسرفه ،انت تهبد المرتب في جيبك ..و تديها كل طلعة نهار عشرة جنية تدبأ نفسها بيها..على أساس اني حجيب عشر بيضات بمليم و حخبز في البيت و حشحت البصل و اللحمة و الخضار من الجيران!!0
و قاله كمان: أنت تسيب الشقة الكبيرة اللي أنت قاعد فيها دي، اللي شبه الفسحاية اللي عيال البلد بتلعب فيها الكورة و تاخدلك شقة إيجار جديد على القد كده ،و تأجر دي مفروش ..تجيبلك في الشهر الشئ الفلاني.0
ده غير إن مدارس الأولاد اللغات مش عاجباه؛ و شايف إن مفيش أحسن من المدارس الحكومة .ده مش ناقص غير يقوله نوفر مصاريف أتوبيسات المدرسة و نجيب لهم حمار بحزمتين برسيم في اليوم يوصلهم!!0


فكرت ازاي ازحلقه من البيت.. بس ده محتاج مصنع صابون بحاله علشان يتزحلق
و خفت كمان لو زحلقته يقع تتكسر رقبته و اتدبس فيه شهرين لحد ما يفك الجبس.0

مكنش في حل غير كارت توصية من حد من معارفنا ،علشان يخلص مصلحته اللي جه علشانها و يسافر مطرح ما جه، و اهو مفيش احلى من الكوسة في بلادنا.0
و خلص مصلحته و مشي الحمد لله أخيرا
و حدفت وراه زير 50 لتر( ا ل - جي) نو فروست... يا رب ما يجي تاني
البيت مش ناقص حقن ، كفاية عليه حقنة واحدة هيهيهيهيهيهي

دي حاجة تطهق بجد
امضاء













52 comments:

بطوط حبوب said...

انا الاول ؟؟

فعلا انا الاول


طب المكافأه اد ايه
انا كسبت لولولولولولولولوووووووووووى

بطوط حبوب said...

بس متنكريش انه لما مشى انتى فرحتى

هى دى رسالته انه يفرحك بس بطريقه غير مباشره

يو اندر استند؟؟

Unique Gurl said...

انا الثانية
ااااااااه عارفاهم الناس دي
الحمد لله ربنا زاح الغمة:)

A7MeD F@hMy said...

ييييييييييييييييي
الحمد لله انه مشي
يا ساااااااااتر
مخنوق لك اوي
هههههههههه
تحياتي

شملولي بن سحلولي said...

بسيطة خالص يا ست طهقانة متقعديش معاه ومفيش حاجة تجبرك انك تقعدي مع ابن خالة طهقان حتي لو بكارت توصية من طقهان نفسه
علي فكرة الوقت اللي بيزوركم الحقنة فيه بيجي فيلم في اسبيس جلوكوز هويسبتل حلقة تجنن

يا مراكبي said...

ههههه

وده أستاذ حقنة من أي نوع؟ عضل وألا وريد؟

mohra said...

بصفتى نائبه عن الحقن احب اسجل اعتراض الحقن على تشبيهها بمثل هذا الشخص

la Princesa ... WHiSPeR said...

انا جيت
بجد انا بحب اجى البلوج ده اوى
بيضحكنى اوى
على الرغم من انه بيعقدنى من الجواز اكتر مانا متعقدة بس ييلا مش مشكله

المهم بقى اولا يعنى ايه ده رجل الكيكي !!!

ثانيا انتى شردتى الراجل اوى
بس هو لازم يكون فى حد يقرفك فى عيشتك كده

تعالى على نفسك علشان طهقان افندي دى بردو فى وشه

الفارس الملثم said...

ههههههههههههههههههه

طيب يا ستي احمدي ربنا انك عرفتي تسربيه بدري , لوكان قعد كمان شويه مش بعيد كان اقترح انه يمسك المصروف واهو رمضان قرب فيقول قضوها موائد رحمان

علي فكره اسلوبك يمتاز بخفة الدم جدا

تحياتي

محمد عبد الغفار said...

هذه النوعيه بابى مغلق فى وجههم الى الأبد

Ehab said...

كان عندي واحد من النوعيه دي يوم خطوبتي .... والكارثه انه قريبي
طلع القطط الفاطسه تقريبا كلها في خطيبتي و عيلتها كمان
ربنا يرحمنا من النوعيه دي

enjy said...

البشر الحقن دول؟ اقول عليهم ايه بس؟ حقن فعلا يخرب بيت القرف..........الله يكون فى عونك الحمد لله مشى استمتعى انت بعبير الحرية

shady said...

شكرا علي مرورك

انا قلت ارد بما اني تخصص حقن

بس مش شايفة حاجة ؟
الولاد بيقولوا علي البنات برده كده .. زي مالبنات بيقولوا

بس انا اللي اعرفه ان حقنة دا يعني بيرمي كلام بقصد التوقيع أو تهدية النفوس يعني .. اول مرة اعرف انها تمشي رغاي كمان

ما شاء الله العلم نور

شرفتينا يافندم في المدونة

كان نفسي اجيب شاي بس انتي عارفة النت

Desert cat said...

اصدقائى الأعزاء المدونين والمدونات
موعدنا السبت 26/7/2008 مع حلقة جديدة من برنامجنا الإذاعى
أنت تسأل والكمبيوتر يجيب
الذى يذاع يوميا الساعه 9.10 صباحا على اذاعة البرنامج العام ماعدا يوم الجمعه
والحلقة تتضمن رودو المدونين الأعزاء على بوست " حمدان وبهانة "
والتعليقات التى ستذاع
ابراهيم

محمد الكومى
سلوى سمير
واحد مش فاهم
جيهان على
دعوه للأمل
ياسر الوشاحى
امل
صبرنى يارب
استراليا
طارق الغنام
طهقاته

كما يمكنكم سماع الحلقة مباشرة فى نفس موعد اذاعتها الساعة 9.10 صباحا
من خلال موقع البرنامج
http://dear.to/cairo
تمنياتنا بدوام التواصل

حمامة said...

ههههههههه

يا عينى

حلوة تهبد المرتب دى هههههههه

يا ساتر ع الناس دى
خنيقة فعلاً
ربنا يكون ف عونك

ربنا ما يجرعه تانى يا ستى

:)

shaimaa samir said...

هههههههههههههههههههههههه

يا حبيبتى يا طهقانة
ليكى حق والله تطهقى

خللى بالك على طهقان وسيبك من اى حاجة

نورتينى بجد واسعدتنى كلماتك عندى
بس مجتيش مدونتى الاصلية
انتى معزومة فيها يا فندم
يسعدنى تشريفك

تحياتى

blue-wave said...

الله يكون ف عونكم
الحمد لله انه اتكل

وميض ابتسامة said...

ياست طهقانة

الظاهر ان انت ما ينفعشى معاك غير ابن خالة طهقان ده

عرف فعلا يربى لك الخفيف ويجبرك انك تسربيه و تخلصى له مصلحته

وأكيد حتوحشك نصائحه الغالية لك ولزوجك العزيز

تحياتى والسلام

نونو said...

السلام عليكم
انتي ازاي وطهقان ازاي يسيبه يتكلم في اللي ما لوش فيه
دة يتقالو اقف عند حدك انت ضيف كدة بالادب في الاول مرة واتنين وتلاتة عشان الحبايب لو تمادى تتقال صراحة والا تتفضى حقنته ويرحل
اعوذوا بالله من النوعيات دي
كان عندي شبهها من اسبوعين وخلوني اكتب تدوينة انين والحمد لله قدرت اني ارضي الله فيهم لكن كل حد يقف عند حده
ضيف يكرم ويحط لسانه في بقه هي ناقصاهم
ربنا يعينك يارب
تحياتي

my dream said...

ياحلولي ياحلولي
على راي الدكتورة برايد
طهقانه زارتني ياولاد وقالت كلام حلو على المدونه الجديده بتعتي قلت ايه اجبر خاطرها بزياره اتاريني انا الي انجبر خاطري بزيارتها
وعقبال الحبايب طلعت الي زارتني من كبار المدونين مدونه جميله قوي قوي

طهقانه
اخينا الحقنه ده في منه كتير قوي بس الحمدلله غمه وانزاحت الهي ربنا مايعدها
ويكفينا شر الحقن
مع وافر حبي
مروه

ana ga3an said...

يا فندم الضيف التقيل
نحطلة سم في الشاي
بيرسول في الكيك
قفا حمار في الباشميل

نشغلة التلفزيون علي معتز الدمرداش

oRiGiNaL HeArT said...

هههههههههههه
هى وصلت للشقة
لو كان لسة قاعد كنت هقولك اقتلووووووه
دى لو حماتى مش هتعمل كدة
ربنا رحمكم :)

موناليزا said...

كويس انك تعرفى حد قدر يخلص الورق بتاعه
اترحمتى من الروتين الجميل بتاعنا

مهيج الجماهير said...

هههههههههههههههه
الشخصيات الرخمة دى انا عارفها و ملسوع منها قبل كدة
بوست جميل
تحياتى

قلب مصرى said...

لمنع السيد حقنة من العودة مرة أخرى إلى منزل الطهقان لوحده فكرى فى إتباع الآتى:
أولاً واجب الضيافة لازم يكون سىء وليس معدوم كالشاى من غير سكر أو الخضار من غير لحم وهكذا.
ثانياً البوز الكشر فى خلقة أمه ليل نهار لحد ما يغور
ثالثاً تعمد ترتيب المكان الذى ينام فيه مع كثير من البرطمة أثناء وجوده ويستحسن لو تم هذا الترتيب بعد منتصف الليل
رابعاًاغسلى هدومه اللى جه فيها مع حاجة بتقع أو تبهت عليها علشان يحرم يرجع تانى
وهكذا حتى يتوقف تماما ونهائيا عن الزيارة مرة أخرى

أمة الله said...

السلام عليكم ورحمة الله وبركاته
من ساعة مدخلت المدونه حاسه كدا أني في فليم رعب مش عارفه ليه
وحكاية الأستاذ حقنه دي موجوده في كل مكان ولو أني شامه في الموضوع ريحة تريقه علي الصعايده بس ماعلينا
وفعلا من تدخل فيما لا يعنيه لاقيا مالا يرضيه

مؤمنه said...

السلام عليكم ورحمة الله وبركاته
الى يطلع من داره يتقل مقداره
والى يتدخل فيما لا يعنيه يلقى مالا يرضيه
وان كان حبيبك عسل ما تلحسوش كله
واتقى شر الحليم اذا غضب
ويا بخت من زار وخفف
كل هذه الامثله لقيتها تنطبق على ا لموضوع
المهم الحمد لله دلوقتى ما فيش حقن فى البيت
دومتى بخير
والسلام عليكم ورحمة الله وبركاته

bedo said...

الاشخاص دي مصايب على قد ما بتجننا على قد ما بتعلمنا الصبر وتطلع روحنا
عالموم ربنا ريحك

بيدو

صاحب المضيفة said...

ربنا يرحمنا من شر النوعية دي لاني مش باطيقها خالص خااااااااااالص


وربنا يعينك بجد على تحمل الشخص ده

انا تعبت وانا عمال اقرأ البوست بصراحة منه


تحياتي

قوس قزح said...

الحمدلله حكاية ان حد يجى يقعد كام يوم دى محصلتش معايا

و انا لو مكانك كنت هقوله و انت ماااااااااااااالك و اللى يزعل يزعل هو الواحد ناقص حقن

قوس قزح said...

الحمدلله حكاية ان حد يجى يقعد كام يوم دى محصلتش معايا

و انا لو مكانك كنت هقوله و انت ماااااااااااااالك و اللى يزعل يزعل هو الواحد ناقص حقن

سبهللة said...

بقولك ايه
النوع دة من الناس
بيبقى مسلى بالنسبة لى اوى لانى بصراحة مش بسكت لهم وانا اللى اعقد اشتغله واخليه هو اللى يطهق منى ويخلص ويمشى بدرى بدرى
عالعموم اديكى غيرت جو
وعقبال الزيارة الجاية
هههههههههه

shasha said...

مدونتك بجد من الطف المدونات اللى زورتها بس اعتقد ان الاستاذ حقنة معاه حق فى موضوع قهوة السبرتاية والله يكون فى عونك

سكينة said...

دي حالة طارئة تعالي شوفي الحالات المزمنة مع المتغربين اللي ميتين طول السنة وجاين ينتعشوا على قفانا اليومين الي هم هنا
تكشتفي أن الصابون عندنا مغشوش والناس قرارة وباصة في لقتمتهم والتربية عندنا مش عارفة ايه
بجد بجد حاجة تطهق على رأيك ما يسبونا في حالنا لكن ازاي دي النصيحة كانت بجمل شوفي انتي زمانك مديونة بقطيع من الإبل لأخينا الذي رحل

الطائر الحزين said...

ونعم كرم الضيافة
======
استحملى يومين يا ستى وفوتى ما دامت حالة طارئة
المهم اكيد مسيو طهقان بعدها لبس جلبية بلدى ولفح لبشتين قصب على كتفة وقعد يأزاز فيهم على السرير وهو بيقول سلم على ولدى يا ولدى سلم على

mohamed hesham said...

معاكي حق ... وما أكثر الحقن اليومين دول ...

دعوة للأمل said...

هههههههههههه
ربنا يكفينا شر الناس دية
و انا مبحبش الناس اللى بتحشر نفسها فى كل
حاجة
و اسلوبك متميز جدا فى الكتابة
تحباتى لكى

واحدة مفروسة said...

ياسااااااتر
دول بيبقىو رخمين اوي
الحمد لله انه مشي
اكسري وراه زير و قلتين
ديه حاجه تطهق بجد و تفرس كماان

اهه من حق هوه انتي برضه سمباتيك
انا كنت بحب المدونه بتاعة سمباسيك اوي

عاشقة الحب said...

ههههههههه
الحمد لله انه مشي
ربنا يستر ليجي تاني

هههههههه

الزواج.....روضة الحب said...

واااو
مدونتك تحفة
تجنن
بس
يعني أنا أهدي النفوس
وانتى تولعيها
وإيه يا بنتي الساطور اللي ماشي يدلع ده براحته عندك
إنتي خلاص نويتي
يالا علي بركه الله
بس ماتنسيش تسمي.

غمض عينيك said...

امال الساطور في البيت بيعمل ايه

شهد الكلمات said...

النوعية السودا دي احنا بنشوفها كل يوم
ربنا يعينك و الحمد لله انك خلصتي من قرفه
حمد الله ع سلامتك
كفارة

بوست جميل و دمه شربات

تحياتي

L0vElYGh0sT14 said...

الله يكون في عون طهقان ... لؤؤل

Eman said...

يا سااااتر ، ده ذنب طهقان علي فكرة
ربنا بعتلك ابن خاله علشان يخلص الانتي بتعمليه فيه
:)

صباح الخير يا مصر said...

طهقانه
*******
الشخصيه دى انا عارفها كويس وفكرتنى بشخص كثير النقد لكل شئ. عزمناه زمان يجى يصيف معانا فى بلطيم و عند وصوله و رؤيته للبحر سأل سؤال استنكارى بقوله :ولزمته ايه البحر ده هنا؟؟؟!!!!1

تحياتى

مدرسة الفشله بنات said...

انا برضو عندى واحد فى العيله
نص وشو بقى ودان والباقى ودان
بس يلا بركه انو مشى وريحك

حاجات جوايا said...

يا ساتر يارب
على فكرة الناس اللى من النوع ده بتبقى عينها وحشة
ربنا يحفظكم

وبعدين مين دى اللى تقوم الفجر تعلق على الغسيل في البستله على البابور و تمرشه بالبطاس و تزهره بالزهرة،

هو فيه حد لسه بيعمل كده ؟؟؟؟

ده ناقص يقول انها بتريش البط والفراخ فى حلة الميه المغليه مش بتجيبها متنضفة جاهزة هههههههههههه

عجبت لك يا زمن

كل سنة وانتى طيبة يا قمر

سالى

mercy devil said...

من تدخل فى مالا يعنيه سمع مالا يرضيه

وبدن تعليق !!!! ده كفاية

Anonymous said...

إزيك ياطقطوقة
الحمد للة انك خلصتي من الانسان الحشري دةوبعدين مين زعلان احسن تكون طهقانة بتتكلم علي الصعايدة دول بقوا متحضرين جدا دة أكيد جاي من كركر كان ناقص يقولك خسارة الغاز هاتي وابور جاز وولعي في البيت وكدة يكون عمل رجل الكيكي
وعجبي...........
زكزوكة

عايزه اتطلق و said...

عزيزتى الطهقانه انا لسه معلقه على التعليق الاجمل بتاعك فى مدونتى ...وقولت ادخل عندك اتفسح شويه بقه بجد مش هشكر فى المدونه وخفت الدم اليى كلنا فى عرضها الايام دى لتفتكرى انى بردهالك عشان ذوقك معايا انما فعلا فعلا ربنا يديم عليكى خفة الدم وروح الدعابه اللذيذ ده نعمه...اما الاستاذ حقنه فايه الحكايه هو فى كل عيله فيه حقنه ولا ايه انا بقه عندى استاذه حقنه ومتتخيليش لما اعرف انها عندنا باخد نفس عمييييق واحط اعصابى فى تلاجه ما انا متطره اعمل كده عشان صلة الرحم وببقا قاعده اتكلم معاها واقول يا رب ارجو الثواب لحد لما بقيت بستحلا الموضوع ده وبقت كل ما تيجى اجرى افتحلها الباب واقعد معاها واقول فى سرى هااااااا الثواب جه ..اما الاستاذ بقه فده كان صاحب طليقى قعد برضه يزن فى دماغه روح عيش فى مساكن الايواء واجر الشقه روح عيش فى بيت الشباب وبيع الشقه بس ربنا ستر اتمسكنت وقولتله هنروحححححح فييييييييين لحد لما عدل عن الفكره ..طبعا بهزر باباه اليى وقفله ..اما بقه لو الحقن فى الشغل فبالهنا والشفا واوعى اوعى تقولى اى ...فى رعاية الله وامنه يا طهقانه..

حبـــهــان said...

شوفى يا طهقانه
وكلنا طهقانين
هذه النوعيه
نطلق عليها إسم
خلقت لاعترض
هو حاسس ان ربنا خلقه علشان يعترض
مش علشان يعبد
ربنا
لاء ده حاسس انه موجود لتصحصح الاخطاء
حسبى الله
دول عشرتهم تقصر العمر

arab girlscool said...

This is such a nice addition thanks!!!
شات صوتي شات صوتي
عرب كول
شات صوتي مغربي
دردشه صوتيه
انحراف كام
منتديات منتديات عرب كول