ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

فلفل شطة


لاحظت الفترة الأخيرة على طهقان انه بقى قليل الكلام قليل الأكل كثير النوم ، و بما إني قارئة في مجال الطب النفسي ،خفت يكون عنده اكتئاب ، يا نهار ابيض في واحد متجوز ست فيري انترستنج زيي و يجيله اكتئاب !!!دي حتى تبقى عيبة في حقي.
فقرت إني أخرجه من الحالة دي بعون الله...
طهقانة: ايه رأيك يا طوطو.. ما تيجي ننزل نتمشى شوية حولين سور الحديقة الدولية؟ رياضة يعني
طهقان: (هز رأسه رافضا) توء
طهقانة: طيب تعالى نروح المول اللي جنبنا نتفرج على المحلات و أعزمك على اتنين كابتشينو على حسابك؟؟
طهقان: (يتململ في جلسته) لأ

طهقانة: شفت مدام هدى جارتنا اشترت بغبغان إنما سكر خالص ، من النوع اللي بيتكلم ،بس يا حرام أول ما جابته ماكنش راضي يتكلم
بقت تحط له فلفل حراق ،و من ساعتها مبطلش كلام هاهاها
طهقان: (أخد نفس عميق و زفير قوي) اه
طهقانة: القطة بتاعة مدام ماجدة كانت حامل و خلفت خمس قطط و... و...
طهقان: (بصوت مرتفع) إفصلي بقى يا شيخة... دي التلاجة بتفصل!0
طهقانة: الله... حمدلة على السلامة ايوة كده صوتك وحشني يا طوطو.. ده أنا كنت خايفة تكون بلعت لسانك و مكسوف تقولي ،بمناسبة التلاجة.. سهام صاحبتي اشترت تلاجة ا ل - جي أربعة و عشرين قدم من السوق الحرة و دفعت بالدولار تصور!!0
قام طهقان و سابني قاعدة و اتجه إلى غرفة النوم ، و أنا وراه ...اسيبه يعني و لا اية؟
طهقانة: انت حتنام تاني و لا اية؟ ما تيجي اشغلك الفيلم اللي بتحبه فيديو و .. و...
طهقان: يا طه طه ارحميني بقى ..أنت عاملة زي مكنة الفيشار بس انتي مكنة كلام !!!اسكتي شوية ..أقولك؟..روحي نامي
و قفل باب الغرفة و قال من ورا الباب
طهقان: انا حنام محدش يصحيني

طيب أنا زعلانة بقى و مقموصة كمان ، ده جزائي اني عايزة أخرجه من دور الاكتئاب اللي عنده
و فكرت شوية.. لاقيت ان نصف الأزواج بيجيلهم الدور ده في مرحلة من مراحل الزواج ، و بنسميها إحنا دكاترة الجواز بالـ ( سكتة الزوجية)0
طيب دي علاجها اية ؟؟
همممم
فكرة كويسة....
سبت طهقان ينام و دخلت المطبخ عملت الغدا ، صينية خضار تورلي عجب و للي ميعرفش التورلي هو الخضار المشكل.
وعملت رز بالشعرية و شوربة و وضبت السفرة و دخلت صحيت سي طوطو يتغدى
قعد مكشر على السفرة ،و قبل ما نبدأ الأكل اتصل بيه صلاح صاحبه
طهقان: انفرجت أساريره (محدش يسئل اساريره دي فين) الو ...هاهاها أهلا أهلا ...آه كنت نايم شوية...يا راجل ..إمتى؟؟...طيب.. نتقابل و نشوف الماتش سوا بقى..... هاهاهاها ... اه و....و ...
شاهدين يا ناس الراجل بيتكلم بربند مع أصحابه و بيضحك و صوته جايب آخر الشارع و مع مراته حبيبته.. النسمة.. الوديعة اللي هي أنا عامل فيها جهاز تلغراف و بيرد بالمختصر اللي مش مفيد كمان
طيب لما نشوف أخرتها
خلص التليفون و بدا طهقان الأكل، و يادوب حط أول معلقة تورلي في بقه و بصيت لقيته عرق و مناخيره ساحت
طهقانة: مالك يا طوطو؟
طهقان: ايه ده الأكل حامي كده ليه؟؟
طهقانة: بجد؟؟ أصلي حطيت قرن فلفل حراق في التورلي
طهقان : (أخد الملعقة التانية) لا لا... ده حراق قوي!!0
طهقانة: كويس انا سمعت إن الفلفل الحامي بيموت الميكروبات
طهقان:( أخد المعلقة التالتة) أنتي متأكده انه قرن فلفل واحد؟؟ ده تقريبا نص كيلو فلفل شطة !!0
طهقانة: طيب كل بالهنا و الشفا

و نجحت خطة مدام هدى مع البغبغان ..الفلفل الحراق جاب نتيجة هايلة، طهقان طول الوقت عمال يتكلم من ساعة ما أكل صينية التورلي ، و مش بس كده و رايح جاي على الحمام ، و معرفش ينزل يشوف الماتش مع صاحبه صلاح و بكده ضربت عصفورين بحجر واحد
نياهاهاي (ضحكة شريرة)0
اعمل اية بس ؟! ما أنا خلاص طهقت من طهقان و عمايله و صمته الرهيب اللي غلب صمت أبو الهول و كان لابد من حل لوزعي لزحلقة الكلام من بقه
و لا إية؟
اوروفوار
إمضاء طهقانة

76 comments:

واحدة مفروسة said...

هيييييييييييييييه
انا اول تعليق

واحدة مفروسة said...

تصدقىيا طهوقتى....انها فكره جهنميه انا حعملها مع جوزى
اصل طاطا...ده اسم الدلع بتاع جوزى....بس هوه مالوش دعوه بطهقان...
البيه بيجى يوم الجمعه ....من الصبح يبقى قاعد قدام التلفزيون دون كلام ..اقول يا بت معلش تعب الاسبوع....بعد الصلاه
هه يا جميل حنخرج؟ لأ انا تعبان و مصدع و مش قادر اتكلم ولا اعمل حاجه
اسيبه ياختى و ابلع لسانى الراجل تعبان...وبعد شويه يجيله...تليفون يقعد يرغى ساعة
والضحك يسمع ميدان التحرير ..وهوب يقوم ينط و يلبس و ينزل فى 10دقائق
الله فيه ايه مش كنت تعبان...اه بس 5 دقائق و راجع
و الخمس دقائق يا اختى يبقوا 10ساعات...الصراحه بيرجع معرفش الساعه كام اصلى ببقى نمت
انما الشطه ديه اختراع جميل....اهو منها تقتل المكروبات ...ومنها تقتل الفرسه اللى ببقى فيها و مش عارفه اعمل اييييه

أحمد الشاعر said...

بصراحة أنا اول مرة اعلق في البلوجرز كله
بس انا متابعك من زماااااااااااااان جدا
من قبل الليلة الحمرا بتاعت برشلونة :)
بس بجد انتي تحفة
و عايز اسأل ليه طهقان ما بقاش يكتب خالص؟؟
و بعد أذنك ارحمي الراجل شوية
حرام قوي اللى بتعمليه فيه ده

maha miho said...

هههههههههههههههههه
يا جامدة
انما بجد والله انا عايزة اسألك،، هي فين الأسارير دي أحسن السؤال ده موتني من الضحك
انيت لازم تعملي كتاب ماليش دعوة

smraa alnil said...

المشكلةانه قدر ياكلوا كله

fahd said...

عثل عثل والله عثل

جميلة قوي

صحيح انتي قولتي التورلي خضار مشكل طيب الرز بالشعرية يعني ايه

Ahmed Mubarak said...

والله الراجل ده بيصعب عليا
:D

حمامة said...

انتى مية مية يا طه طه
انا هتعلم منك بقى علشان لما اتأهل ان شاء الله اعرف اتعامل

:D

يا مراكبي said...

ده بجد ليه حق في موضوع الإنفصال ده

حتى أساريرة مستكتراها عليه؟

خالتى بمبة said...

بس مدام هدى مقالتلكيش عالجت البغبغان ازاي من الاثار السلبية للشطة ههههها

Dear England said...

الراجل كائن غلبان مش عايز من حياته الزوجية غير 3 حاجات مراته تأكله كويس وتسيبله الريموت كنترول وتسيبه في حاله. يعني مش حاجات صعبة. السؤال المهم دلوقتي الشطة بتخلي الرجالة تتكلم وايه اللي يخلي الستات تسكت وتبطل زن هههههههههههه

مصري بالغربة said...

يا طهقانة حرام عليكي ارحمي الرجل شوية , يعني يوم ما تعمليله اكله حلوة تحطي مر فيها فلفل احمر

ده حتى كتر الشطة بيجيب بوا---

يعني انت عايزة تعملي ف الرجل ايه اكتر من كده

على فكرة لو اتجوز عليكي يبقى من حقه على الاقل مراته التانية مش حتعمله التورلي بالشطة زيك كده

gehad_fci said...

لاحول ولا قوه الا بالله
ربنا يكون في عونك يا طهقان
بس انا ليا سؤال من كتر الحاجات اللي انتي بتعمليها في طهقان مبيعملش حاجه تطهقك او بيضربك مثلا ههههه؟؟؟

الطائر الحزين said...

الايام دول

Desert cat said...

تصدقى اختراع عبقرى يا طوطو
انا هعمله مع اى حد بزه وغالى على قلبى ويفضل مكتوم بما مش متجوزة هعمل عزومة زى مذبحة القلعه كدا
واكل اللى مكتوم فلفل حراق
يمكن عقده لسانه تتفك

mohra said...

والله حرام عليكى:))

shayma said...

لا جامده فكرة الشطه دى
بجد فكر جهنميه

وكمان مش هتنزله من البيت
ههههههههههههه

سلامى يا بستوكه
:))

صحفية روشة said...

الرحمة يا طهقانة
دى عمله تعمليها
الحديقة الدوليه؟
انتى ساكنه فى مدينه نصر ولا ايه
؟
:p

klmat said...

ازيك يا طاطا
حد يبقى معاه خفه الدم دى كلها ويسكت
توقعاتى ان كل الستات حايعملوا تورللى بالشطه الله ينوروفى انتظار باقى النصايح
وحانشوف النتائج المبهره التاهيل حاتحصل

ربنا يسعدكم ياربخالص تحياتى

أم أحمد said...

انا برضه ذيك جوزي بيغيظني لما يبقي واكل سد حنك في البيت وبرة بالع راديو وضحكته تسمع آخر الشارع
وهو أنا ماليش نفس ذيهم عشان يفرحني بضحكته
حكم
برة وجوة فرشتلك وانت مايل وايه يعدلك

دنيتى الجميله said...

ههههههههه
بجد انتى جميله اوى يا بستوكه
افكارك شقيه جدا وممتعه جدا
بس انا مبحبش الشطه
يعنى اعمل ايه مكولش التورلى اللى بحبه
ههههههههه
يلا ادينا شويه نصائح
مستنيين
سلااام

كلام على بلاطة said...

عجيب امر البنى ادم
بعطى نفسه القاب من غير ما ياخد باله
ازاى طهقانة وازاى فرى انترستنج
ولا فرى انترستنج ليها معنى تانى
وعنوان البوست هايل فلفل شطة
طب خليه فلفل مخلل ...فلفل لخضر
عموما اكيد بتهزرى ...اكيد
تحياتى

tamer.sala7 said...

إن كيدهن عظيم

gehad_fci said...

فين طهقاااااااااااان؟؟؟؟؟
الراجل مش عامل ولا بوست
اوعى تكونى عملتى فيه حاجه
ارجع يا طوطو

snohe said...

معقول برضو
اسلوبك حلو

صحفية روشة said...

اذا مكنتش انا هفقسك
مين هيفقسك يا روحى
امووووووووووووووواه
المذاكرة مغلبانى
ادعيلى

Son of Egypt said...

بالزمه مش حرام
اولا انا برحب بيكى وانا اول كومنت لى عندك
انما بصراحه انتى بتقولى انك طهقانه
انما بصراحه اللى يطهق الراجل الغلبان ده
دا انتى ياشيخه يوم ما جيتى تدلعيه وتخرجيه من تعبه قولتى له تعالى نتفسح وهى الفسح دى ببلاش
وبعدين سابك ونام ولما جيتى تدلعيه فى البيت من ابو بلاش
عملتى فيه مقلب
ياشيخه بالزمه مش حرام
وتقولى انتى اللى طهقانه
امال هو يعمل ايه ؟؟؟؟؟؟؟
ههههههههههههههههههههههه
اتمنى تشريفك لى ولمدونتى

شـمو نشـادر said...

هههههههههههههه
والنبى عسل ..
حلوه فكرة الشطه دى ..
بس ممكن بعد كده يغضب ع الاكل ويقضيها ديليفرى ..
وبعدين لما الراجل يبقى طهقان ابقى سيبيه بقى ..
لحد ما يفك ..
ولا هو مبيفكش خالص ؟!
بوست زى العسل ..
تحياتى ..
أسامة أمين

ضد الظلم said...

هههههههههههههههه
يا لاهوى يا نصبتى ربنا يستر علينا دى افكار فظيعه
تحياتى

إنـســـانـة said...

فكرة جناااااااااان يا طهقوتى بجد .. انا خطيبى قليل الكلام اوى وانتى عارفانى بالعة تلات راديوهات .. فطول مانا بتكلم وهو ساكت كدة شكلها مش حلو فى حقى

إن شاء الله اعمل حسابى فى فلفل حراق كتييير فى الجهاز ههههههههههههههههه


سلامى للأستاذ طوطو والأولاد

appy said...

هههههههههههههه ما هو الستات دول عاملين زى اذاعه الراديو بجد عارفه حلنا يركبوا لنا فيبريشن هههههههههه علشان نتهد يمكن الراجل تعبان يالا اهو يستاهل اللى حصل له وفكرة حلوه اجربها ههههههههه لما اتجوز ولو ان بيجله ساكته زوجيه من دلوقتى

semsem said...

هههههههههههههه

احسن بردو على شان المرة الجايه يحرم
مايتكلمش معاكى

بس مش شايفه ان الفلفل كان زياده شويا

تحياتى

قلب محطم said...

مع طهقانة .. للنكد فنون

تحياتي

Sally said...

هههههههههههه
فلفل فلفل
المهم جه بفايده

دمتى بخير أختى
سالى

ody911 said...

طهقانة هانم

صباح الخير على الحلوين بس الوحشين لاء
آه

وحشنى كلالامك بجد يعنى

وآسف على عدم المتابعة الدورية بس زى ما إنتى عارفة أخوكى مشغول حبتين ثلاثة فى الدنيا دى

إن شاء الله نطلع منها على خير يارب


أما بقة بخصوص الشطة فكدة برضوا تولعى بق الراجل عشان يتكلم

طيب كنتى قوليلو لو متكلمتش هحطلك شطة

ساعتها هيفضل يتكلم ومش هتلاحقى علية

بس بينى وبينك فكرة جامدة

ومعلش بقة يستحمل شوية

مرة تانى وحشتنى مدونتك

وآسف على عدم المتابعة الدورية
وعادى بقة
أودى لسة مشغول

بنوتة من وسط البلد said...

لا جامدة يا طهقانة
بس ما تكتريش الفلفل وتستحليها
لا الموضوع يقلب ببواسير وساعتها انتى الى هتحتاسى


بس لما هو اكل التورلي .. امال انتى اكلتى ايه :)

يا صباح الفلافل

القلم السكندري said...

ياطهقااان كان الله في عونك

الشاعر قال:

ومن لم يذد عن حوضه بسلاحه**يهدك(ومن لا يظلم الناس يظلم)




الاخت طهقانة انا مقصدش حاجة طبعا انا بهدي النفوس



تحياتي

رئـــــيسـة حزب الأحلام said...

ههههههههههههههههههههههه
الله يكون فى عونك ياطهقان فلفل حراق ياشيخة

la3lahakhier said...

كويس انك قولتيلى
انا حبطله خالص
بس انا مابكلوش اصلا يبقى بتكلم كتير ليه
يستاهل طهقان المرة دى
هههههههههه
كل التحية

Anonymous said...

سؤال غبى معلش هو فعلا بجد فعلا بجد بجد انتى عملتى كده ؟؟ وفعلا الشطة بتخلى الناس تتكلم ؟؟؟؟؟!!!!!!!

انا بسأل بجد

الباحث عن الحقيقة said...

هو انتى حطيتى كام قرن فلفل في التورلي
وهو شغال يلهط
يعنى مكنش مصدق من اول مره
صحيح يا مأمن للستات يا مآمن للتعلب فات
واذا كان المطبخ هو اللى مقويكم علينا
فلابد من تحرير المطبخ من ايديكن
يعيش المطبخ حر مستقل
وسلملي ع التورلي

momken said...

طيب الخطه نجحت معاه
وانتى ماكلتيش من التورلى
ماهو المفروض انه ينتظر لما انتى تكلى من الصنيه وبعد ياكل بعد منك
محدش عارف يا بنتى الزمن مخبيله ايه

ولا انتى كنتى عامله لروحك بطاطس بوريك

البوست جامد اوى
تحياتى

قلب صغير said...

ماشاء الله عليكي ياطهوقتي
انا خت منك اول درس
ومن هنا ورايح خدي مننا فلوس بقي

بس والله طهقان صعبان عليا

عاشقه الجنه said...

هههههههههههههههههه
انتي بهدلتي طهقان علي الاخر
بس برافو عليكي خليتيه ينظق
انتي ماشاء الله عليكي اسلوبك يجنن
بالتوفيق يارب
بس خفي شوه عالراجل
تسلمي يا قمر

كوارث said...

ههههههههههههههه
لا اله الا الله
حرام عليكم اللي بيحصل ده والله
انا مش ناوي اتجوز
خدت قرار خلاص
فلفل حراق !
وعشان يتكلم !
يا بخت من كان اخرس طبيعي
بيفيد جدًا في الموقف ده

monaliza said...

طب وانت كلتى منها ازاى وهى حامية كده؟

funckydoctor said...

مدونة جامدة اخر حاجة
بجد موت من الضحك
ههههههه
أكيد هازورها تانى

أمين المكتبة said...

والله احنا غلابة .. انت اللي مفترية ياطهقانة .. الراجل مننا أي حاجه تسعده وترضيه .. يمكن طهقان ده ايديشن خاص بس اعمليله اب ديت وانا واثق انه بعد الابديت هينزله السوفتوير الجديد اللي فيه الطيبة والليونه

الا صحيح .. إواعي ياطهقانة لما مدونتك تكبر تتعوجي على زوارك ومترديش عليهم

سكينة said...

برافو عليك
أيوه كده لا صمت مع الشطة ولا شطة من غير جواز
:)

FaceMoon said...

حرام عليكى ياطهقانة
خليكى رومانسية برضة
ربنا يخليكوا لبعض

Sally said...

ازيك يا طهقانة
مبروك النيو لوك
جميل جدا
تسلم ايدك

سلامى لطهقان والطهقانين الصغيرين
دمتم جميعا بخير

Soooo said...

لك الله ياطهقان
لك الله ياخويا

نصيبك كده
----
بعيدا عن اي حاجه
انا لما بتطلب معايا اروق شويه .. باجي اقرى مواضيعك

ربنا يسعدك ويكرمك ويبسطك ويرضيكي دنيا وآخره يارب


سلاموووووووووز

عمرو النوبى said...

ههههههههههههههههههههههههههه
ههههههههههههههههههههههههههه

والله بجد صعبان عليا الراجل الغلبان ده

جميل اوى يا طهقانة هانم

بجد تحفة

تحياتى

رئيس جمهورية اسوان العربية

ياريت تشرفينى فى المدونة بتاعتى

واحدة مفروسة said...

ايه اللووك القوى ده انا كنت جايه اشوفك اتأخرتى علينا ليه
لقيتك داهنه المدونه و مغيره عفشها هههههههههههههه

ana ga3an said...

الافترا اخرتة وحشة
اتقي الله في الغلبان اللي معاكي

وعلي الباغي تدور البواغي

صحفية روشة said...

المدونه كدة شكلها احلى ميت مرة يا طهقانه

اجار الدين كشمش said...

سسسسسسسسسسسسلام

Misrdream said...

والله دمكوا زي العسل

شفقة و احسان said...

انتم بتقلدونا ولا ايه....ههههههههههه لا بس بجد دمكم شربات

Monaliza Smile said...

ههههههههههههههههههههههه

انتو سككككككككككككر

عاشقة الحب said...

و الله فكرة حلوة
ممكن ابقى اجربها مع اي حد طهقان


مع تحياتي
عاشقة الحب

المستنصر بالله said...

انتى مدونة حضرتك ممتازة ومميزه جدا اول مره ازورها بالتوفيق دايما يارب

صيدلانيه طالعه نازله said...

انا برضه عندى نفس المشكله بس انا جوزى بيتعب من الشطه يعنى عشان احل عقده لسانه اقوم افطسه
يالا نحاول و اهو نكسب شرف المحاوله


وجه الشيطان الاحمر اللى بيبقى فى الياهو مسينجر ظهر اهوه شايفاه

mo'men mohamed said...

بنا يكون فى عونه !!

السلام عليكم

كراكيب said...

نياااهاااهااااا
حلوة الحركة دي يا طهقانة وياعيني عليك يا عمو طهقان ربنا معاك كدة واحتسب بقى اللي بيتعمل فيك عند ربنا ما انت مالكش غيره

بس الصراحة تتقال انتي فعلا فيري انتيرستينج

Sara Swidan said...

مصيبة لو كنتي بتعملي كدة بجد ..

و لو كان هوة كمان بيعمل كدة بجد ...

3abratalsabeel said...

والله جدعة يا طهقانة
فلفل شطة ،روزمارى ،كمون ،زعتر ...اى بهارات هتنفع معاهم ،
انتم السابقون ونحن اللاحقون ان شاء الله شكلهم كلهم نفس النظام ،انا هجيب الشطة من دلقوتى واشيلها فى دولاب المطبخ ،عشان اول ما يوصل للسكتة دى اخليه ينطق على طول

الى الامام دائما
سلام عليكم

Sharm said...

صيف سعيد لك وللجميع

Esraa Hamed said...

ههههههههههههه

و الله الراجل ده صعب عليا
بس جامده حركة الفلفل دي و الله

صحفية روشة said...

هاى طهقانه
بوست حدث فى مثل هذا اليوم
دخل لوحة شرف
هننشره هناك
للتفاصيل ادخلى لوحة شرف
__________________________________
ميفوتكش البوست الجديدعلى نميمه
(فال الله ولا فالك)
__________________________________
للى عاوز يزور لوحه شرف يدخل مدونتى وهتلاقو لينك لوحة شرف فيها
لوحة شرف هى لوحه شرف لكل من دون فابدع وينشر بها افضل بوستات كتبها البلوجرية

صحفيه روشه said...

عععغتغت

كاتب مصري said...

تحيتي
ممكن تقبلي دعوتي لمدونتي
يارب تعجبك هي صحيح متواضعة في نظري بس في ناس بتقولي حلوة جدا يارب تزوريها وتقولي رأيك
تحستس ومستنيكي ع المدونة هنا
http://kanyatklam.blogspot.com/

حـريــة الــفـكــر والابــداع said...

السيدة الكريمة
شكرا لزيارتك لمدونتى
كنت اتمنا مزيد من الايضاح لمدخلة حضرتك
وشكرا

Matra7na said...

Hii everyone, this is Farah, a student doing a research about Blogging, momken please tes3dooni w te7elo l survey da???, I would be more than thankful


http://freeonlinesurveys.com/rendersurvey.asp?sid=3my3gf38kl7dwn4514955

I don't need your names or identities, they are totally anonymous

Thank you very much for your help

Anonymous said...

福~
「朵
語‧,最一件事,就。好,你西.............................................................................................................
..................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘

arab girlscool said...

This is such a nice addition thanks!!!
شات صوتي شات صوتي
عرب كول
شات صوتي مغربي
دردشه صوتيه
انحراف كام
منتديات منتديات عرب كول