ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

طهقان بدائي متقولب

أنا متأكدة إن زي ما قناة فتافيت هي صديقة المرأة ؛ إنها في نفس الوقت عدوة الرجل!!0
و الدليل إن طهقان جوزي مش بيطيق يسمع اسمها ، و كل يوم يجي يسألني: طبختي اية النهاردة؟؟
و يا ويلي لو قلتله طبخت طبق من أطباق الشيف الفلاني في قناة فتافيت ، يفرهد و يزعق و يقلبلي جو البيت عواصف و أعاصير ، و يغرقلي الصالة أمطار موسمية
و زلازل و براكين.
المشكلة إن طهقان زي معظم الرجالة ، نمطي تقليدي متحجر يميل إلى الطقوس البدائية لكل الأشياء! 0
يعني مثلا البسلة لازم تبقى بالجزر ، و أنا شايفة إنها ممكن تبقى بالبشاميل؟! و القلقاس لازم يبقى بالسلق ،اية المانع نعمله بالصلصة ؟؟
و من هنا جه وجه الاختلاف بيني و بينه .. أنا عايزاه يخر ج من القالب المقولب اللي حاطط نفسه فيه؛ و هو مقولب نفسه و متمبك و ماعندوش أي رغبة في التغيير!0
و اللي مطهقني و فارسني انه ممكن يأكل أكلات جديدة برة البيت، يعني يروح مطعم صيني أو هندي ، لكن لما اعمله أنا الأكل الصيني في البيت ،أو ابعت اجيبله الهند لحد عنده ؛ يقلبلي المناخ و يبعت يجيب خط الاستواء لحد عندي!! 0
و لذلك قررت اعمل إضراب ، لعدم تقديره لمجهوداتي في متابعة برامج الطبخ ، و تمقيق عنيا في نقل المقادير و الوقفة على رجليا لحد ما اجهزله الطبخة الجديدة . 0
و لما جه من الشغل و لاقاني مطبختش سألني:0
طهقان: فين الغدا يا طهقانة؟؟
طهقانة: مطبختش .. أنا مضربة..هه
طهقان: مض.. اية؟ مضروبة من مين؟
طهقانة: مش مضروبة.. جتك ضربة.. أنا مضربة زي عمال المصانع
طهقان: ليه بتطالبي بزيادة المرتب؟ و لا عايزاني اعملك حوافز؟ و لا يمكن نفسك تاخدي ساعة رضاعة؟0.
طهقانة: لا مضربة علشان التلاجة مليانة حلل فيها طبخات جديدة عبقرية ..و أنت و أولادك مش راضيين تأكلوها!! 0
طهقان: يا ربنا... يعني عايزانا نأكل كوسة بالقرنبيت و قلنا ماشي... قال اية؟! القرنبيت مضاد للتأكسد
طهقانة: اولا.. ده مش قرنبيت.. ده بروكلي.. و ممتاز للحماية من السرطان
طهقان : و طبختلنا سمك بالمكرونة بالمعرفش اية!! و قلنا ماشي أكل صيني
طهقانة:دي ثمار البحر و هايلة للصحة و الحيوية.. ها ..
طهقان: انما تعملي فراخ بالمشروخ و تخرطي عليهم كرنب و ترمس و البتاع ده اللي بيلزق في السنان لا بقى دي بقت حاجة اوفر قوي... ارحمينا بقى
طهقانة: مشروخ اية؟؟؟ اسمه مشروووم و ده مكنش ترمس ده ذرة و ممتاز مليان بالعناصر الغذائية
و بعدين أنا حريحك و حرحمك و مش حطبخ تاني، وريني أنت بقى حتاكل اية؟! 0
طهقان: طيب كويس برضة ..عملتي طيب

و راح طهقان غير هدومه و لبس فوطة المطبخ و دخل المطبخ قعد ساعة و نص و أنا اسمع خبط في الحلل ، و كبايات بتتكسر ، و ريحة حاجات بتتحرق ، و اخيرا طلع بطبق بسطرمة بالبيض ناشف و معضعض و شكله متاكل قبل كده ، و رغيفين عيش محروقين
العيال اتعشوا و ناموا و أنا مبسوطة علشان شفت التطبيق العملي لمثل خالتشي: 0
يا ناكر خيري ..بكرة تدوق أكلي من عك غيري! 0
و تاني يوم راح الشغل و رجع يدعبس في التلاجة و يبرطم ، و دخل المطبخ تلات ساعات و طلع عامل حاجة شبه الكفتة بس مهروسة و مفصصة و قعد يأكلها و وشه جايب ألوان و علامات القرف باين على وشه ،و آثار البؤس معلمة عليه و لا أطفال الصومال
و لقيته بيسحب ناعم و بيقولي

طهقان:يعني.. هو الأكل الصيني مش بطال.. بس لو متحطيش بصل كتير
و كمان المشروخ ده بيزيق في السنان كده.. يمكن لو استوى شوية يبقى أحلى؟!0
طهقانة: و الله دلوقتي بقى مش بطال!! لما دقت أكلك؟؟ عرفت إن الله حق..
طهقان: طيب قومي بقى.. سخني الفاهيتا بتاعتك لحسن معدتي بقت على الحديدة
طهقانة: (ابتسامة الانتصار على العدو الغدار )ايون كده بس علشان تشقدر مجهوداتشي
و اعمل حسابك الغدا بكرة مكرونة بالتونة و الزيتون اكله جنان بتاعة الشيف..0....
بصيت لقيت طهقان مسك الطبق بتاع الكفتة المهجنة بتاعتة و راح حادفني بيه و قعد يصرخ ز ي طرزان و يقول كلام غريب تقريبا من اثر الكفته المفعصة اللي اكلها
شايفين بيعمل فيا اية؟؟ دي حاجة تطهق فعلا


امضاء

60 comments:

محمد عبد الغفار said...

طهقان ده غلبان اوى اوى اوى اوى ايه يعنى حتى شهر من غير طبيخ الحاجات دى عاوزه نفس وشويه صبر على البيض والتونه والمعلبات

وانت اللى بعد الشهر هتتحايلى عليه تطبخيله اكل طبيعى ويقول هو لأ

مالكم يارجاله مصر

ٍSOU said...

هم كدة يا ختشى ..ياكلوا و يطنططوا ...غلب بعيد عنك :))

بس خلىالوةاحد محايد حبتين .زمش كل الاكل الشعب المصرى بيقدر ياكلة و او يستوعبة ..اختاريلى حاجات قريبة من ارشيف الاكلات بتاعتة عشان يستوعب الجديد واحدة واحدة و بعدين مش لازم تقوليلة الاكلة دى عبارة عن اية ..هو كدة كدة مش هايفرق المكونات اوى .. لو عجبتة الاكلة افصحى عن السر غير كدة ..اكفى ع الخبر ماجور واوىعى تضعفى و تديلة سر الخلطة
نايهاهاهاهاهاهااا
:))

appy said...

والله والله المكرونه بالتونه هابله بصى اعملى والجوع والريحه هتاكله انا بعملها ولا يهمك

لماضة said...

طهقانه لا تنكري ان نفسك حلو في الطبيخ قوي قوي خصوصا الساعه دي وانا صايمه وفي انتظار المغرب
صراحه هموت
دايما مبدعه يا طهقانه في الكتابه والطبيخ

الطائر الحزين said...

كدة يسلم من اول ألم
لو انا منه كنت أجرت واحدة جت تطبخ

blue-wave said...

حلو البوست
بصى التجديد مطلوب بس تعرفوا تعملوة
لكن اللى بيحصل انكم بتتعلموا فينا
مش صح؟

واحدة مفروسة said...

هههههههههههههههههههههه
هههههههههههههههههههه
انتي بتتكلمي عن جوزي يا طهقانه
و المشروخ ده...ههههه عامله عقده هوه كمااان
وااله انتي بالظبط اللي بيحصل
بس اختك جبانه مش بتعرف تعمل زيك او بمعني اصح مش حسيبه يدحل المطبخ ولو على جثتي
ده لو دخل اصلا علشان يجيب حاجه بلاقى المطبخ فوقاني تحتاني
هههههههههههههه
بس فعلا يا بنتى معندهمش روح التغيير و الابتكار
انا رخره طهقت من موضوع الاكل ده
هههههههههههههههه
انا مره اول لما اتجوزت قلت افنن و عملت إيمنسية الا كريم
و ده يا عيني بص للطبق و يقولي مش حرام عليكي اللحمه تبهدليها كده ما كنتي سبتيهالي صحيحه احسن
ههههههههههههه
ولا إيه ولاإيه
هههههههههههههههه
تحياتي

maiosha said...

ههههههههههههههه
هاى يا طهقانة .. دى أول زيارة ليا .. بس مدونتك زى العسل والله

بس حرام عليكى طهقان يا شيخة .. فى حد ياكل بسلة بالبشاميل .. أنا اول مرة أسمع عن حاجة زى دى

إرحمى معدته شوية .. بصى خلى فتافيت دى يوم ويوم .. يعنى يوم أكل طبيعى ويوم مش طبيعى

علشان العيال كمان .. هو يستحمل إنما هم يستحملوا إزاى؟؟

زفته وقطران said...

هههههههههههههههههههه
معلش ياطه طه ياحبيبتي
هما الرجاله كده بيطمرش فيهم التطوير اللي الست بيتعمله
ولا تزعلي نفسك
من هنا ورايح اطبخي كل اللي نفسك فيه

اختك زفته

زفته وقطران said...

لا ياطه طه
انتي كده قاصده تغظيني
يعني انا بشتكي
من العيال
عشان انجلو اراب
تقومي تكتبيه
زعلانه
منك
زعلانه

خمسة فضفضة said...

السلام عليكم ورحمة الله وبركاته

هههههههههههه

ايه يا طوطه دانتي بتتكلمي علينا كلنا ولا ايه

برضو مش عارفه ليه جوزي اول مايلاقيني جايبه فتافيت يركبه ميت عفريت ، مع ان والله الاكل بتاعهم لو بصيتي للمكونات هاتلاقيه صحي جدا وتحسي انهم ناس بيراعوا ان يكون كل مكونات الاكل ليها فايده وفيها قيمة غذائية عاليه مع سعرات اقل
بغض النظر عن انه ساعات بيبقي عك في عك
بس اهو عك صحي
بس سيبك الواد جيمي اوليفير والبت جيادا دول عسل
واميريل اجاسي ده بيستظرف حبتين ، ومارثا تحسي انها ست رزينه كده وعاقله

بس حلو اوي نظام الاضراب ده
ايه رايك ننظم حملة عامه للاضراب عن الطبيخ ونسيب الرجاله يجوعوا عشان يعرفوا قيمتنا
:)))))))))))

سلام يا قمر

Eman said...

ههههههههههههههه

ايون كدة هو ده الكلام يعني انتي يا

اوختشي تاعبة نفسك في المطبخ علشانه

هو و العيال وعلشان صحتهم وكمان مش

عاجب ... دي حاجة غريبة

ده انتي حقك كنتي تطولي الاضراب كمان

شوية لغاية ما بعد كدة يتحايل عليكي

تعمليله حتي سمك بالبيض :))



مدونتك تحفة

كلبوشستان said...

ليا صديق في يوم اتخانق مع مراته

رجع البيت لقاها طبخاله وصفه من اياها بتاعتكم دي

فاصوليا بالتفاح

ما بقاش عارف هو بيحلي ولا بتغدا

قامت في دماغه يطلقها

ولسه لغايه وقتنا هذا مش مصدق انها وصفه التليفزيون


يا سحالي بلاش ينوبكم ثواب الاكل اللي مش عارفين حلو وحادق

ما بقناش عارفين الفاكهه من الخضار الاهي ربنا ..............

ولا بلاش لاحسن الموكوسة تدخل تقرا

ربنا يستر

فتك بعافيه يا طوطه يختي

whisper TaNgOoO said...

هقولك على حاجه
رغم انى مقتنعه ان الرجاله مفتريين ومابيعجبهمش العجب ومايملاش عينهم غير التراب

بس بالوصف اللى فى البوست ده
الله يكون فى عونه من الآكل ده

بس اقولك حاجه تانيه
استمري طالما الآكل عاجبك

بطوط حبوب said...

هههههههههههههه

لا يا عينى مظلومه خالص مالص
وحاجه تطهق فعلا

حد يكره البتاع بالشمروخ؟؟
ههههههههههههههه

كاااااااان الله فى عونك
استحملى بقى اهو ابو العيال وحبيبك برضه

موجة said...

طهقانة هانم
♥ ♥ ♥ ♥ ♥ ♥
تعرفي ان احلى حاجة عجبتني في البوست هي جملة ان كل راجل عصبي بدائي متحجر هههههه على وزن برجوازي متعفن ههههه
مش عارف ايه صراع الطبقات ده بس
بس حقيقي انا مشفق على طهقان باشا لإنه الراجل ممكن يسامح في اي حاجة الا الاكل إسأليني انا
ههههههههههه
بس بوست جميل كالعادة

خالص تحياتي
مجرد موجة
أحمـــــد

t3ban said...

متفتروش
ما فيش اكتر من الاكل في الشارع
بس انا ولو من الاستاذ طهان ااكل عيالي كل يوم معايا
و اسيبك تستحملي نتيجة افعالك

رئـــــيسـة حزب الأحلام said...

ايه ياطهقانة كمان مابتعرفيش تتطبخى
ربنا معاك ياطهقان بيه


ربنا المعين


تحياتى

Desert cat said...

بسلة بالبشاميل
ملها البسلة ببلح الشام يعنى دى حلوة جدا

نونو said...

المهم انك تجددى
واديينا بنتعلم فيهم
امال هما بيتجوزة لية علشان يلاقوة حد يتحكم فيهم
لازم نوريهم العين الحمرة هههههه
ههههههههههههههههههههههههههههههههه
تحياتى دومنا اصدقاء

Desert cat said...

العزيزة طهقانة
سوف تتم إذاعة حلقة خاصة بمدو نتكم فى برنامجنا الإذاعى
أنت تسأل والكمبيوتر يجيب
اذلذى يذاع يوميا الساعه 9.10 صباحاً على إذاعة البرنامج العام ما عدا يوم الجمعه
وموعد إذاعة الحلقة الخاصة بمدونتكم
هو يوم الاحد القادم 20/7/2008
تحياتى
وتمنياتنا بدوام التواصل

GeHaD-----(male) said...

يخربيت دمك اللي زي العسل دا
بلاش المشروخ دا بجد اصلي بقرف منه
تونه بالمكرونه حرام عليكي يا شيخه اتقي الله هو الحج طهقان عايش دلوقتي ولا ايه نظامه

Mohamed Dawod said...

الدخول الأول....ايه المدونه الجميله دى.....كوميديه بتقدير امتياز وانا معرفش؟ بس طهقان جوزك الحقيقه طيب قوى ازاى عدالك كده موضوع الاضراب من غير ما يحرمك ازاى متكرريهاش. كان لازم مثلا يخرج من المطبخ وهو مكسرلك اعز طقم صينى عندك او مضيعلك اهم حلة تيفال فى المطبخ او مكسرلك مثلا يعنى مجموعه لا باس بها من ادوات المطبخ اليوميه أو يحرق حاجه لدرجة الهباب تسيب أثر وعلامه ومشرط على وش البوتجاز......حاجات كده من اللى بنعملها كل يوم تعرفك ان مش كل الطير اللى يتاكل لحمه بالبشميل....تحياتى ليكى وربنا يعينه ويعينك

Ma 3lina said...

هههههههههه


زى ماما بالظبط تقعد قدام القنوات دى و تالف طبيخ


اول مرة اقف فى صف طهقاان

سبهللة said...

شاطرة عشان يعرفوا قيمتك

bos bos said...

هههههههههههههههههههه
ضحكتينى والله
بصى اطبخى اللى يريحك وهو هاياكل هاياكل هيعمل ايه يعنى

ههههههههههههههههههههههه

عروسة ننوسة said...

انتى دمك شربات بجد يا طقهانه...وطقهان مالوش حق سيبك منه واعملى اللى انتى عاوزاه واللى يكلمك تعاليلى بس انتى المدونه وسيبى الباقى عليا

Zakzoka said...

وحشتيني خالص مالص ياطقطوقةمفتقدينك جدا انا وبمبة اخبااااااااااارك اية انا زييكي بالظبط محدش بيقدشر مجهوداتشي خاااالص بس انا عندي حاجة تنقط اكتر ..في ثانية نطلع جبنة رومي من التلاجة ولا كأن فية حد طلعت عينة في المطبخ دة غير بقي الاسئلة علي السفرة كأنك في امتحانات ثانوية عامة وما ادراكي ما امتحانات الثانوية العامة ..................هية دي بالسمن ولا بالزيت؟ الفلفل كتير الملح قليل وهكذالحد اخرك تقولي اللي عاجبة ياكل واللي مش عاجبة هو حر وتحطي اعصابك في اجمد تلاجة وتاكلي انتي بالهنا والشفا........
زكزوكة

mohra said...

يعنى انتى متجوزه نمطي تقليدي متحجر و عايش فى القالب المقولب و انتى بتطبخى مشروخ بالبروكلى
فعلا الطيور على اشكالها تقع

كلام على بلاطة said...

خفى يا طهقانة
لاحسن طهقان يسيبك
ولا يطقهك بطريقته
تحياتى

Basma said...

علي فكره الكيد والغيظ من قناه فتافيت هو بسبب الشيفات القمر والمذيعين العسل.. واللهجه اللبناني اللي بتأخد العقل
;)
مقابل طبعا كل الجمال والرجوله والطعامه المصري
لازم الرجاله تقلق وتطالب بأغلاق المحطه كمان

bastokka طهقانة said...

سيداتي انساتي سادتي
احب اعرفكم اني بفضل الله ثم دعاء الوالدين ثم النظرة المبعدية لفريق عمل برنامج انت تسأل و الكمبيوتر يجيب
حتتذاع حلقة عن مدونتي طهقانة يوم الأحد القادم20-7
على موجة اذاعة مصر الرئيسيه اى البرنامج العام على موجة اف ام 107 واربعه من عشره الساعه التاسعه وعشر دقائق صباحا كما يمكن الأستماع اليها بالضغط على رابط تحت الساعه الى اليسار فى موقع البرنامج
http://dear.to/cairo

و انا من هذا الكومنت بعلن شكري و تقديري لفريق البرنامج و ربنا يعلي مراتبهم و لحافتهم و كوفرتاتهم و يديلهم كل خير


و احب اعرفكم اني استقبل التهاني و الهدايا و اكياس المانجا و التين و البطيخ على بريدي الالكتروني
bastokka@gmail.com

و ربنا يجعل بلوجات المحسنين عمار
اوروفوار
طهقانة
عبير عبد الشافي

شهد الكلمات said...

و الله و بصراحة يا عبير انا اللي طهقانة من القناة دى
اختي قرفانه بيه ليل و نهار و عملنا نفسها الشيف فتكات و تفضل تعك طول النهار و تموع نفسنا
و يا سلام بقي لما خطيبها يجي عندنا الراجل مش بيقدر يفتح بقه و بياكل و هو ساكت قهرا ماهو مايقدرش يفتح بقه
و تدخل تولع في المطخ و تقولنا ده بروفترول
و تحرق في الصواني و تقول ده مش عارفة اية ولا اكنها بتكتشف الذرة
لما حياتنا بقت خل

عموما بما اني من نون النسوة فانا برده احيكي ع اسلوبك في التعامل مع طهقان افندي جوزك
هما كدة مابيجوش غير بال........ولا بلاش
هههههههههههههههههههه
مدونتك جميلة جدا
دي اول زيارةو من المستحيل تبقي الاخيرة

تحياتي

سنابل قمح said...

شاطرة يا طهقانة
أى حاجة تزعلك اديها إضراب على طول
هى فوضى وللا ايه

نونو said...

ههههههههههههههههههههههههه
السلام عليكم
والله انتي عسل
وبالهنا والشفا لطهقان
كلمة في ودنك
امال هنجرب في مين يعني
يا ما جربت في زوجي وكان بياكل واكتشف لوحده انه بيتجرب فيه
نورتي وشرفتي مدونتي واتمنى دوام التواصل
تحياتي

الفارس الملثم said...

لا فعلا طهقان ده مش بيقدر النعمه , بس الحمدلله انك مفكرتيش تعملي اكله شعبيه صينيه زي فيلم هنيدي بتاع فول الصين العظيم

بجد بوست دمه خفيف جدا جدا

د. موني said...

هههههههههههههههه
انت فعلا عسلووووووووووووز
بجد دي اول زيارة ليا بس استمتعت كتير بمروري فيها
للاسف فعلا دي مشكلة ازلية عند الرجالة صحيح مش كلهم بس كتير منهم بغلب عليه الطابع الروتيني المتحجر ( لكن بره البيت نووووووو وقدام واحدة ست غير زوجوجته لالالالالا راجل متحضر بيكرة الروتين ويعشق التغيير ويحب يعيش)بس علي فكرة الست الشاطرة الذكية هي اللي تقدر توصل لنفس نتيجتك
تحياتي
د. مونى

وينكى said...

ههههههههههههههههه
ادى اخرة العك
على فكره انا كمان بحب ادخل المطبخ واعمل فيه ابداعاتى اللى تتسجل باسمى
بس عشان ماحدش فاهم عبقريتى قررت اقول انى ما بعرفش اطبخ
طب هما الاولاد كانوا بياكلوا ايه وقت الاضراب؟؟

mohamed hesham said...

ارحموا من في الأرض يرحمكم من السماء ...

shabfa2re said...

كويس انه طقهان بس

وميض ابتسامة said...

انت فعلا مفترية .. الستات خلاص مبقاش عندها رحمة الراجل نفسه ياكل الاكل بتاع زمان وانت مصرة برضة على عك الايام دى ..يا كدة يا اضراب ونيران وزعابيب ..مش بقولك مفترية
بس احب اضيف عشان اديك نصف حقك وكفاية عليك كدة .. انا لم اتمالك نفسى من الابتسام فى اول الامر ثم الضحك فعلا .. بصراحة بقى ومن الآخر انت دمك خفيف جدا وانا نويت والنية لله اكمل مواضيعك السابقة بس ربنا يستر من اللى فات والساطور اللى عمال يلف معانا منين منروح .. تحياتى لزوجك العزيز طهقان والله يكون فى عونه من فضائيات فتافيت ..والسلام

حمامة said...

بقالى كتير مجتش
وحشتنى المدونة اوى
بس الحمد لله مش فاتنى كتير
***

تعرفى ان والدى كتير هو اللى بيطلب من ماما انها تغير هى بقى اللى متحجرة :D
اصل والدى نفسه حلوة وبيحب التغيير
اما ماما مبتحبش تجرب خالص

انا عن نفسى ممكن اجرب بس حاجات تبقى خفيفة ومفهومه وسهله انى اجيبها اساساً وبعدين اراعى المكونات لانى كنت سمعت ان اللخبطه الكتير ف الأكل بتجيب امراض

ربنا يهدي طهقان يارب
ومعلش يا ستى ابقى ف نص الاسبوع كده ولا حاجة اكليه اكله معلومة الهوية

:D

Unique Gurl said...

اقولك حاجة حلوة
خليكي في الاولاد و اكليهم كويس
و فكك منه و هو حتلاقيه بيأكل من غير ما يتكلم
(هما الرجاله كدة اللي يلاقي دلع و ميتدلعش )
ده اول تعليق ليا بس انشاء الله مش الاخير :)

fire bird said...

على فكره

انا اول مرة آجى عندك

بس بجد المدونة بتاعتك جميلة جدا

ودمك زى العسل

ومدونتك متميزة

وتخلى الواحد يقرى وهو مستمتع

بجد هايلة

ارق تحياتى

amr said...

الله!!!!! دي حاجة جميلة جدااااا ..... وانا اللي عمال ادور على عروسة ... لا يفتح الله يا عم ... نقضيها كدة احسن ... اية دة ... بس انا عايز اتستر و اعف نفسي ... دة احنا حتى في الصيف .... يخرب بيت الصيف و بلاوية و اللي بيقلعوا فية ... بس انا خايف اتجوز ابقى متقولب كدة و روتيني كدة ... مع اني والله بكره الروتين مووووووت ... انشاء الله ربنا يكرمني بواحدة تعرف تساعدني على عدم التقولب و على التجديد ....
يا نهار ابيض !!! دة احنا هانشوف ايام سودا :((((

همس الاحساس said...

هههههههههههههههههههه

تصدقى مش بطلت ضحك



بجد البوست خيف وفيه مضمون رائع وكمان باسلوب كميدى رائع جدا


\


\

التغيير مطلوب صحيح لكن للحق لما باجى اعمل شىء جديد

ربنا يستر لازم البيت كله يعيا ويروح المستشفى ربنا يكون بعون زوجى ان شاء الله

هههههههههههههههههه


بهزر يا قمر

بسى قصدى سعات احنا بنزودها اوى ونعمل حجات غير تقليديه من باب التغيير بسى سعات بتكون اوفر شويه

المعقول حلو نغير بسى بلاش نكون اوفر

تسلمو يا قمر

واتمنى تقبلينى صديقة

اختك
همس

دعوة للأمل said...

مدونة ظريفة و دمها خفيف و تحياتى لكى و لطهقان

ادم المصرى said...

اهااا بحبها جدا بجد تسلم ايدك انا جى اكل عندك مانع

خالتى بمبة said...

انتى معاكى حق كلنا وراكى وهحدد يوم 24 يوليو يوم الاضراب عن الطبخ عشان 23 يوليو اجازة الثورة هههههه يعنى هكون اجازة مش فاضية اضرب وحشتينى مووووووووت امووووووووووه

أحسن تـستاهـل said...

يا دي فتافيت اللي مجننة الستات والرجالة
وبعدين مسلسل نور اللي مجننا ده
كل شوية تيجي حاجة تجننا
لالالالالا شوفولكوا صرفة بأه
عارفة؟؟ انا عايزة اتفرج على المدونة دي فيديو
ههههههههههههههههه
هتبقى فل أوي

مها ميهوووو

maryooom said...

اكلك رائع رائع يا طهقانه انا بحب الابتكارات جامد طحن ولعلمك انا بعمل المكرونة بالتونة والزيتون جامده جدا جربيها بالرز بقي والصنوبر هتبقي احلي بس رز سمك خدي بالك

enjy said...

يااااااااااااااربنا على العسل والنعمة انت تحفة وباقولك ايه استمرى فى الاختراعات وعلى فكرة انا باحب المكرونة اللى بالتونة جدا

Ibrahim said...

ههههههههههههه
دي مش حاجه نطهق
دي حاجه تموت من الضحك
بجد
ربنا يسعدك انت وطهقان

تحياتي
،

almasry said...

شكرا حبيبتى على زيارتك ليا



تحيــــــــاتى
المصــــــــــــــرى

همس said...

هههههههههههههههههههههههههههههه

تعرفى احسن كدا

رجاله مبيحمدوش ربنا على النعم اللى هما فيها


بس بجد ابقى قليلنا المكرونة بالتونة دى بتتعمل ازاى سمعت عنها كتير

اول مره ادخلك المدونة بس بجد زى العسل

تحياتى

funckydoctor said...

طهقان ده بيصعب عليا حرام عليكى الراجل
يعنى اطبخى له حاجة عادية حتى لو مرة فى الاسبوع

mercy devil said...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
والله ما قدرت اكمله من كتر الضحك الله يخرب بيت صحابك ايه ده
عاوز تعملى طهقان الغلبان فأر تجارب لمطبخك ؟ والله حرام
الراجل ده هيخش الجنة من اوسع أبوابها بس مطبخك
المشكلة بقة عربية الاسعاف جت ولا لأ بعد الاكل طبعا ؟
الراجل كافى خيره شره ع البسلة ام جزر عاوزه تاكليه مكرونة بالتونة !!! ربنا معاك يا طهقان يا خويه ويصبرك كمان وكمان
هههههههههههههههههههههههههههههههههههههه

صدى الصمت said...

مش ممكن أكنك بتوصفى جوزى بالظبط بس الفرق الوحيد إنه متعقد من الشيف أسامة السيد مش من قناة فتافيت والله يابنتى مافيش حد مقدر عبقريتناوتعبنا فى الزمان ده

Anonymous said...

福~
「朵
語‧,最一件事,就。好,你西.............................................................................................................
..................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘

arab girlscool said...

This is such a nice addition thanks!!!
شات صوتي شات صوتي
عرب كول
شات صوتي مغربي
دردشه صوتيه
انحراف كام
منتديات منتديات عرب كول