الحلوة خوخة جت بعد دوخة

الحلوة خوخة جت بعد دوخة... بنوتة صغنونة جميلة

يا رب بارك يا رب احمي...شيلوني بحنية دي مامتي تعبت فيا

كل شئ صغنن حلو

ياختي جمالو حلو ...ياختي كاميلة

الخلاصة...الطهقانين زادو واحدة نونو

مغلق مؤقتا لظروف الفقس

اعزائي قراء و محبي مدونة طهقانة
اسألكم الدعاء لطهقانة
فقد اقتربت من مرحلة الفقس
و نسال الله أن ييسر لها و ينجي جنينها و يوفقها للخير

و لنا عودة بصور طهقانة النونو إن شاء الله
و ربنا يرزقكم جميعا بالذرية الصالحة
و منجيلكوش في حاجة وحشة

إمضاء
طهقانة

ألعاب للمتزوجين- فقط

من ساعة ما حملت و انا بقيت شبه حرف (B) و تطور الموضوع الى حرف (D) و اخيرا لاحظت اني دخلت في زمرة حرف (O) شكلا و موضوعا و بقيت بعرف امشي بجدارة مشية البطة المتزغطة ، و بنهج من مجرد التفكير في اني لازم اقوم اروح الحمام ،و طبعا انتم عارفين ان الحياة اصلا روتينة مملة و انها مليانة هموم و مشاكل و مش ناقصين اقلب عليكم المواجع

و لاني دايما ببحث عن التغيير و التطوير؛ عملت شيرش (الله يمسيك بالخير يا شعبولة) على عمنا جوجل على طرق مبتكرة في تجديد الحياة الزوجية و نعنشتها

و لقيت مواقع كتيرة منزلة أفكار لالعاب زوجية مبتكرة تضيع ممل الروتين اليومي و ترجع الشباب و تصطاد الراجل في سنارة البيت و متنسيش يا أختشي منك لها إن الراجل طفل صغير مهما شعره وقع و أصلع و عجز

و اللعب برضه احسن من الخناق و النقار و الطهق و لا اية؟

بس للأسف معظم الألعاب كان لازم اشتريها من على النت و ده طبعا يدخلنا في كريدت كارد و أبعت و استنى و كلام من ده ،و أنا ست عملية مدبرة زي ما انتم عارفين.. احم ..احم

فقررت اخد أفكار الألعاب دي و اخترع أنا (نظرة شريرة ضاحكة)

لاحظت إن معظم الألعاب بتركز على مفاجأة الخصم (اقصد الشريك) و تنمية الترقب و رفع نسبة الشغف عنده، من الآخر أزاي الست تخرع جوزها !! و بعضها بيعتمد على تنشيط حاسة الشم أو التذوق أو حتى حدة النظر.... و كان ما كان

(طفيت نور الأوضة بالليل)

طهقان:بسم الله الرحمن الرحيم ...اية اللي بينور في الضلمة ده؟؟؟

طهقانة:تراراااااراااا ...اية رايك يا طوطو؟؟؟

طهقان:يا امة...انت حاطة اية على وشك يا طهقانة؟؟

طهقانة:دي الوان فسفورية من بتاعة الواد طوطو الصغير يا طهوقتي حددت بيها مواطن الجمال في وشي علشان تنعم بيها حتى في الضلمة(بربشة سريعة)

طهقان:مواطن اية و معالم اية؟؟!! ده انا قطعت الخلف يا امي ....اية المفأجات الغريبة دي!! نوري النور بسرعة

طهقانة:(نورت النور ) اهو يا طوطو بعملك ريفريش و انت عارف اني ست فيري انترستنج و بحاول اجدد في حياتنا العاتشفية

طهقان:يا ساتر يا رب .. بس ابقى نبهيني بعد كده لحسن يجرالي حاجة.. و التغيير يجي في خانة الحالة الاجتماعية من متزوجة الى أرملة

طهقانة:بعد الشر عليك يا حبيبي... يلا بقى نلعب شوية.. انا مخبية حاجة انت بتحبها في حتة في الأوضة، لو لقيتها ؛حديلك بوسة كبيرة و رغيف بلدي تاكلها بيه

طهقان:ايه؟؟ بوسة؟؟ و رغيف؟؟ هو انا رايح احلق تحت الكبري حتديني بيضة و رغيف!!

طهقانة:يلا بقى متبقاش كسلان.. قوم دور علشان تنمي عندك حاسة الشم ،و ترفع معدلات الترقب و ده حيساعد هرمونات البهجة انها تشع منك

طهقان:هو انا شامم ريحة غريبة !!بس مش عارف مصدرها !!؟؟

.. شااا شااا شااا

(و بعد شوية دعبسة في الادراج و الدواليب)

طهقانة:ها .. قربت ...شمشم كمان

طهقان:يانهار شم النسيم؟!!! اية ده؟؟؟ رنجة؟؟؟ في دولاب اوضة النوم؟؟

طهقانة:اية رايك بقى؟؟ دي مش اي رنجة!! دي من عند حافظ ( ملك الفسيخ) ، اهو شم النسيم على الأبواب و انا عارفة انك بتحبها .. خد الرغيف بقى

طهقان:(في زهول) بس انا بعد ما اكل الرنجة دي مش هرمون البهجة اللي حيرتفع عندي !!! ده هرمون العطش و النوم اللي حيشر مني

طهقانة:كده؟؟ طيب... استنى.. بلاش تاكلها دلوقتي خليها ابقى احبس بيها.

طهقان:احبس بيها اية ؟؟ربنا يستر

طهقانة:مش انت بتحب الشيكولاتة؟؟ انا مخبية في الاوضة عشر شيكولاتات من الصغيرة المدورة (ام& ام ) لو لقيتهم كلهم في اقل من ثلاث دقايق حديلك جايزة فظيعة

طهقان:انا لسة حدور؟؟ يا امي انا عايز انام

طهقانة:يلا بقى متبقاش بايخ ..ده انا تعبت لحد ما خبتهم

طهقان:طيب هاتيلي النضارة من جيب البنطلون.. لما نشوف اخرتها معاكي

طهقانة: لا يا شاطر ..من غير النضارة.. حسس و دور لحد ما تلاقيهم

طهقان:ده اية الذل ده؟؟ انا في اختبارات الفنية العسكرية و لا اية ؟؟ انا شايفك اصلا لما حشوف شوكولاتات نونو مستخبية!!! انت بتعملي فيا كده ليه يا طهقانة؟؟ بتحسسيني بالعجز؟؟

طهقانة:الله؟؟ هي الالعاب جابت نتيجة عكسية ليه كده؟ اممم ...طيب ماشي حنتغاضى عن موضوع النضارة و حسمحلك بيها المرة دي ..

طهقان:ليه هو في مرات جاية!!! يا قوي يا رب

طهقانة:شاطر اديك لقيت اتنين ....تلاتة....اربعة...خمسة...شطور يا طوطو يلا دور كمان

طهقان:لقيت تمانية بس مش لاقي الاتنين الباقيين يمكن تكوني اكلتيهم و ناسية ما انتي بتاكلي الاخضر و اليابس اليومين دول

طهقانة:الله اكبر .. مش باكل لاتنين يا طوطو!!

طهقان:ما انا ملاحظ من ساعة ما دخلتي السابع و انتي استقريتي في المطبخ و بقيتي من سكان التلاجة وعندك نشاط في هرمون السندوتشات و تحاليل المحشي مرتفعة معاكي

طهقانة:طيب يلا قوم غمض عنيك بالايشارب ده و انا اسقفلك و لو عرفت تمسكني حديلك مفاجاة فظيعة

طهقان:طيب ما انا ماخدتش المفاجاة الفظيعة بتاعة اول لعبة!!!

طهقانة:ما انت ملقيتش العشرة كلهم لقيت تمانية بس ..يلا قوم اغمضلك عينك

طهقان:يا بنتي اتهدي الله يهدك... انا لسة حلعب مساكة في السن ده!!

طهقانة:انت لسة شباب يا طوطو.. و انا و انت لازم نكون زي السكينة في الجاتوة على راي اللمبي

طهقان:لا و انت الصادقة لازم نكون زي المسمار الألاوز في الصامولة

طهقانة:(تصفيق منتظم) يلا حاول تمسكني

طهقان:اي...رجلي (رفع الايشارب من على عنينه)

طهقانة:سلامتك يا طوطو دي رجلك خبطت في الكوميدينو

طهقان:ادي اخرة اللعب مع العيال ..فين المفاجاة الزفت دي بقى؟؟

طهقانة:تراتراااااا.. اهية يا سيدي

طهقان:ايه ده؟؟؟؟؟ فاتورة الكهربا؟؟؟كااااااااااااام؟؟ انت فتحتي مصنع ملابس في البيت و لا اية؟؟؟ 700 جنية ليه؟؟؟

طهقانة:ما هي فاتورة الشتا كلة يا طوطو؟؟ و بعدين ما انا طفيت النور و حطيتلك الوان فسفورية معجبكش و قلتلي نوري النور!! اعمل اية تاني

طهقان:حسبي الله و نعم الوكيل (ملامح مجعدة تنم عن ضيق مع غضب مع طهق)

طهقانة:يعني بعد كل التسلية و الفن اللي عملتهولك لسة طهقان ؟!!!

دي حاجة تطهق بجد

اوروفوار
امضاء

الحلة عالبابور..عشي عيالك

لاحظت في الفترة الأخيرة ان طهقان شعره بقى يقع كتير قوي ، في الأول قلت يمكن من الشتا و الجفاف و بعدين حسيت إن الموضوع بقى كونفدنسيد على الآخر و بقى عامله أزمة نفساوية عميكة فكان لازم أتدخل

أمال؟!! هي الست ليها مين غير جوزها.. و شعره

طهقانة:مالك يا طهقان متضايق ليه ؟و عمال تنفخ 5 نفخات في الدقيقة ؟

طهقان:انتي يعني عدتيهم يا مدام ريختر؟

طهقانة:ايون طبعا امال اية؟ هو أنا ليا مين غيرك

طهقان:الوصفة المنيلة اللي عملتيهالي أمبارح من موقع فلنكات بتاعك ده.. فضحتني النهاردة في الشغل

طهقانة:أولا ..اسمه موقع فتكات و بعدين دي وصفة متجربة لعلاج تساقط الشعر و حتجيب نتائج مزهلة، بس لازم تكررها مرتين في الأسبوع

طهقان:أكررها؟؟ ده على جثتي، أنا مش عارف أصلا طاوعتك أزاي !! في واحد عاقل يحط على راسه زيت زيتون مخلوط بالثوم ؟؟ده أنا كان فاضلي عصره ليمون و ابقى صوص سلطة محصلتش

ده كل زمايلي بقوا يقولوا اية الريحة التقلية دي!! و أنا قاعد في نص هدومي

طهقانة:ليه هو مش أنت غسلته بالشامبو الصبح كويس؟

طهقان:غسيل اية هو ده يحوق معاه غسيل؟؟ دي ريحة الثوم كانت مفحفحة و لا الزيت!! كأني بايت في قرطاس بطاطس محمرة

طهقانة:ما انا قلتلك ..خلينا على وصفة النسكافيه ريحتها مقبولة و بتجيب نتايج هايلة!

طهقان:تقصدي تقولي لبخة النسكافية!!! ...ده أنا يومها كل اللي يسلم عليا يقولي أنت ضارب نسكافية في العضل و لا أية؟

طهقانة:ده بحث ألماني بيؤكد إن الكافيين اللي في النسكافية بيقوي الشعر و يمنع تساقطه.. اعترض عليه بقى

طهقان:و مقالوش بقى نسكافية عادي و لا 3 في واحد؟

طهقانة:خليك كده أفضل أتريق... و أنا عمالة اقدح زناد فكري علشان الاقيلك حل لمشكلتك

طهقان:ما كله بسببك.. هو أنا لولا بشد في شعري منك مكنتش اقرعيت

طهقانة:نعم يا خويا؟؟ انت شعرك بيقع من تلوث البيئة و الدخان اللي إحنا فيه مش مني أنا!! ده أنا بلسم

طهقان:و أنت الصادقة... أنا شعري بيقع من الزمن

طهقانة:طيب يا حبيبي ما دام أنت عارف كده ..ما تبقاش تحلق عنده تاني ..نياهياهاهاهاي

(مخدة طائرة تستقر في دماغي) غير معلومة المصدر قد تكون نيران صديقة

و ماسكتش ..فضلت اعمل سيرش على النت على كل الحاجات اللي بتساعد على عدم تساقط الشعر و اعملها لطهقان، و هو مش مقدر مجهوداتي للمحافظة على عدم التصحر اللي هجم على رأسه

طهقان:اية ده يا طهقانة؟ النهاردة سبانخ!! و أمبارح ملوخية!! و أول أمبارح كبدة؟ انت شغالة في الغوامق ليه؟

طهقانة:اصلي قريت ان نقص الحديد بيسقط الشعر يا طوطو فقلت لازم أسلحك بكام سيخ حديد علشان نسيطر على المشكلة

طهقان:مش كفاية زيت الزنك اللي شربتهولي و عاملي إسهال أمبارح؟!

طهقانة:ما هو اصلي قريت إن الزنك عنصر هام جداً في نمو وقوة الشعر

طهقان:مش كنت اتجوزت واحدة جاهلة..لا تقرا و لا تجرب فيا!!.. أنا استويت الصراحة

طهقانة:بس تعرف في حل كويس لسة مجربناهوش ...بيقولوا إن التنويم المغناطيسي يساعد في علاج الصلع

طهقان:ما تعمليلي عمل احسن!! و تعلقيلي حجاب ضد التساقط و تحطيلي جزمة عيل صغير و تكتبي على ضهري (إن كان الشعر عزيز ما كنش طلع لعبد العزيز)

طهقانة:أقولك أية...العمل عمل ربنا

و نزلت اعمل شوبينج و ليقت حاجة كويسة قوي ترفع من روح طهقان المعدنية و ترجعله ثقته في نفسه بعد ما راسه اصلعت و رغم اني غلبت اقوله اني بحبه رغم صلعه و ان اشهر نجوم الكورة في العالم صلع الا ان الحزن كان مسيطر عليه ، بس هو اللي متجوز ست انترستنج زيي يزعل ابدا..نيفر

طهقانة:جبتلك النهاردة هدية انما جنان من عند بازار ميشو يا طوطو.. بس على الله تعجبك.

طهقان:خير ..اللهم اجعله خير؟؟ جبتيلي زيت و لا سفوف و لا لبوس المرة دي؟

طهقانة:لا لا جبتلك حاجة على الموضة

طهقان:ايه ده؟ راس مين دي؟

طهقانة:دي مش راس حد يا حبيبي دي باروكة رجالي منها تدفيك في الشتا و تحوش عنك الشمس في الصيف و منها ترجعك شباب تاني

طهقان:باروكة.. أنا البس باروكة؟ و ماجبتليش فستان ليه بالمرة؟!!

طهقانة:يا سلام عليك يا طهقان... أنت على طول مكسر مقاديفي كده!!

طهقان:يا ستي أنا مبسوط إني اصلعيت.. و علشان تنبسطي أنا ححلق باقي شعري زلابطة خالص علشان أريحك

طهقانة: اهو أنت كده دايما كاسر خاطري و موقف المية في زوري ...و أنا أقول للناس أية لما يشوفوك أصلع زلابطة و لا زلاوزة كده؟؟

طهقان:قوليلهم طهقان غير اسمه و بقى (((صلعااااااااااان)))

طهقانة: كده؟؟ طيب ...الحلة على البابور عشي عيالك .. أنا رايحة بيت أبويا مش راجعالك

دي حاجة تطهق بجد

أوروفوار

إمضاء

كلاكيت..خامس مرة

في سهرة صفا و دفا تحت البطانية و قدام التليفزيون و الست سومة بتغرد(كلموني تاني عنك..فكروني) و كباية الشاي بلبن و الكيك عاملين جو دافئ جميل، انتهزت الفرصة و قلت أمهد لطهقان الشارع و ارصف الرصفان و أشجر كام شجرة كده في شارع جوزانا المصون..و دار بنا الحوار التالي:

طهقانة:ياختي جماله حلو ..بص يا طهقان صورة النونو ده جميل ازاي ..يا حلاوته كدة و هو عامل زي كيلو الملبن بالمكسرات

طهقان:مكسرات؟؟ تقصدي تقولي بالمدشدشات ..هي دي عيال دي ؟ العيال اهيه نايمة جوة ، أربع عفاريت بيدشدشوا البيت كل يوم

طهقانة:لا يا طوطو..ده نونو صغنون في البيت كده يعمل حس و يتنطط و الرايح و الجاي يلاعبه و يبوسه ..شكل تاني برضه

طهقان:ايوة فعلا شكل تاني..اهو ده الشكل اللي أنا اعرفه

طهقانة:ههههه ..طيب و الله عسول برضه ..كل البيبيهات امورة و هي نونو كده

طهقان:امورة اية و نيلة اية.. انتي ناسية الواد طهقان الصغير لما كان نونو كان بيسهرنا للصبح احنا و الجيران و طول الليل يأوأ و يخليني اروح الشغل عامل زي الصرصار اللي بايت في علبة بودرة صراصير

طهقانة:أصل أنا كنت وقتها صغيرة و مش فهماله ،و لما بيعيط بقعد اعيط جنبه ، بس دلوقتي خلاص بقيت مخضرمة

طهقان:و لا البت (طهقانة الصغيرة) كانت عضوة في الفريق السوبرانوا بتاع الأوبرا و هي لسة في اللفة، و كان صوتها يصحي الميت

طهقانة:(طهقانة الصغيرة) !!..دي كانت قمر و هي صغيرة ،يا سلام كده على حتة كتكوت صغنن يملى علينا البيت فرحة و سرور

طهقان: تقصدي ديناصور يملى البيت بامبرز و سيريلاك و كع يا أبو الطهقانيين، و شوية و الديناصور يكبر و عايز يدخل المدرسة و اجري يا ابو الطهقانين، و الديناصور عيان و عايز دكتور و الحق يا ابو الطهقانين ، لما ابو الطهقانيين خلاص جاب زيت وموتوره فوت.

طهقانة:يا سلام عليك يا طهقان ..دي حتى العيال بتيجي برزقها ، على الأقل تلاقي حد يحبك ويحن عليك لما تكبر

طهقان: من الحب ما قتل ...و بعدين يا اختي .. انت خسرانة حاجة!! ما انتي بتخلفي و انا اللي بتربط في الساقية

طهقانة:ساقية اية بس يا طوطو !!..ده حتى الأب بيفرح اكتر من الأم بالنونو الجديد ،و بيحس انه لسة شباب منتج فعال في المجتمع ،و انه مسلمش النمر و اتسحبت رخصه في الحياة.

طهقان: لا أنا عايز تتسحب رخصي و اخد غرامة و عنديش مانع يسحبوا العدة كمان..

قال يفرح... قال... فاكرة الواد (طهقان الثالث) لما فتح درفة المطبخ و احنا نايمين ومسك قزايز الزيت و أكياس الدقيق و عمل لوحة تشكيلية على بلاط المطبخ ..فاكرة يومها أنا كنت حموت من الغيظ ازاي!؟

و لا الواد (طهقان الرابع) لما وقع اتعور ساعة الفطار في رمضان و بقيت بجري بيه على المستشفيات مش لاقي حد يخيطه

طهقانة:بكرة أفكرك.. لما حتبقى مزقطط من الفرحة

طهقان:بكرة اية؟؟؟ حبقى مين؟؟

طهقانة: الله..هو أنا مقلتلكش؟

طهقان: أنا شامم ريحة شياط... قولتيلي اية؟؟

طهقانة: (ابتسامة ساحرة)مش أنا ...... حامل في الرابع و حكملك الطهقانين خمسة !!

طهقان: اية؟؟؟؟؟؟؟؟؟ مين؟؟؟؟؟؟؟؟ امتى؟؟؟؟؟ ازاي؟؟؟؟؟؟

طهقانة: شفت؟؟ حتموت من الفرحة ازاي!!

طهقان: عااااااااااااااااااااا(برطمة كتيرة.. الرقابة خذفتها)

طهقانة: ده بدل ما تقولي مبروك يا حبيبتي.. نفسك في اية اجيبهولك؟؟؟و أوعي تشيلي تقيل و ارتاحي في السرير... زي ما بشوف في الأفلام؟

دي حاجة تطهق بجد

اوروفوار

امضاء

جيش الطهقانين.. يناديكم

طهقانة:يلا يا راجل.. قوم بينا
طهقان:على فين يا ست إنتي؟
طهقانة:يلا بينا نروح نطوع و نعمل جيش عربي مشترك و نحارب إسرائيل
طهقان:اهمدي يا طهقانة... بقى الحكومات العربية مطنشة و أنتي اللي حتجيبي رجل الكيكي من ريشه!!
طهقانة:ايون و فيها إيه؟..تعالى نعمل حملة على الفيس بوك ،و نجمع متطوعين للمشاركة في الجيش العربي المشترك من كل الدول العربية ،علشان المنيلة إسرائيل متعرفش تحارب مين و لا مين ،و يتفرق دمها بين القبائل،و نعرف نجيبها من شواشي شعرها و نمسح بيها بلاط فلسطين
طهقان:و حتجيبي السلاح منين بقى يا ست المرشال طهقانة؟؟و لا تكوني ناوية تضربيهم بالمصاصات و اقلام الروج!!

طهقانة: لأ طبعا...ما هو في بلاد معندهاش متطوعين بس اغنيا، فحيدفعوا فلوس نشتري بيها سلاح و طيارات و دبابات و نبألجهم.
طهقان:آه.. و تنزلي شارع عبد العزيز بقى ..تشتري خماشر دستة بنادق من الصيني على كام نبلة عمولة و تشرخي على فلسطين تحاربي ..مش كده؟!

طهقانة:لا يا ناصح.. حنشتري سلاح من روسيا أو من ايران و ممكن نصنع سلاح كمان، ده مفيش أسهل من الأذية ،بس إحنا اللي كنا مطولين بالنا و عمالين نقول بكرة يعقلوا، و حتى لو معرفناش ..حنشتري عصايات مقشات و رجلين كراسي بمسامير مصدية و نروح نطيح فيهم ...هي موتة و لا أكتر؟!
طهقان:أنت فاكرة الحرب سهلة؟ و لا لعبة؟ يا بنتي أنتي حتحاربي بنت أمريكا البكرية يعني حتتفركي في نصف ساعة أنت و الجيش العربي بتاعك

طهقانة:يعني لا نافعة معاهم المظاهرات!! و لا نافع معاهم الشجب و لا النداءات اللي عمالين ينادوا بيها الحكام طول النهار لما صوتهم اتنبح يا ضنايا!! و لا الاتحاد الاوربي ده كمان... باينة طالع بسبوبة من القصف ده و بيحابي لاسرائيل و لا يمكن متجوزها عرفي ، و مجلس الأمن إكمنه مأمن على نفسه.. بيقول: أيكش تولع ....و أنت جاي تقولي: الجيش و الحرب مش حتنفع؟!!! دي حاجة تطهق بجد
طهقان:دول مش حينفع معاهم غير الدعاء ..اتوضي و صليلك ركعتين و ادعي عليهم ربنا يأخذهم وربنا كبير
طهقانة: و نعم بالله ..ربنا قادر على كل شئ، بس لازم نعمل حاجة عملية قدام عداد الشهداء اللي عمال يرف ده..تبرعات بالدم، بالفلوس ،بالهدوم، بأي حاجة... أي حاجة... أنا حطق
طهقان:حتى التبرعات دي متعرفيش بتروح فين!؟ و لا بيتنهب منها أد أية!؟ و يا ترى بتروح للشعب الفلسطيني المطحون بجد و لا بتروح في كروش السلطة الفلسطينية!؟
طهقانة:يعني إيه؟ أطق؟؟ و أتفرس؟؟ كده ..فطيس كل ليلة و أنا شايفة القصف عيني عينك على الهوا مباشرة
طهقان:تعرفي أحسن حل إيه؟
طهقانة:إيه يا بعلي؟؟ قول ؟
طهقان:تفرمتي الدش، و تشيلي منه كل قنوات الأخبار ،و تسيبي ميلودي هيتس و موجة كوميدي بس علشان ترتاحي و تفرفشي، و تسيبيني أنام
طهقانة:بقى كده؟؟؟؟ طيب... اعمل حسابك تطلع تنام في البلاكونة بقى الليلة، علشان أنا ححول البيت لسكنات عسكرية، لشحن قوى الشعب الثائرة و تجميع أكبر عدد من المتطوعين للتدريب على الحرب الطهقانية القادمة ضد إسرائيل.
طهقان:بلاكونة !!في البرد ده يا مفترية؟؟ واحد اتنين الجيش العربي فين
طهقانة: ها مين يحارب معايا؟؟؟؟؟؟؟؟؟؟؟؟؟؟؟؟؟؟؟؟

أوروفوار
امضاء

الست ظي ظي الحيزبون

محدش يجي جنبي... و لا يهوب ناحية البوست ده ...علشان في حاجات بتتحدف، و لهاليب نار بتفط ،و طوب بيتزئل من كل ناحية ،و من الآخر كده أنا نــــــار ...على زيت حار الساعة دي .
و السبب إن الست زيزي جارتنا عادت من أرض المهجر ،و قررت تشتي عندنا في عمارتنا المتواضعة ،بعد ما كانت مقيمة عند أبنها في أمريكا النيكة كونيكا ،و هي أمريكا كده متحدفش علينا إلا البلاوي

و الست ظي ظي يا جماعة ...ست كبيرة في السن بس صحتها مسعداها، تهبط علينا زي العمل الرضي كل عام شهر أو شهرين في السنة ،و هي دكتوراه في توصيل الخناقات للمنازل، تقدروا تقولوا إنها مهندسة في تسليك بوابير الجاز و البوتاجازات الستة شعلة، تعرف ترمي فتيل الخناقة من دول في حجر الزبون ،و تولع في الديناميت و تتوكل على الله ...بس يا معلم.. و تلاقي الخناقة شعللت في البيت أول ما الست ظي ظي تخلع رجلها من الشقة.

و عندها القدرة على تحويل شهر العسل إلى شهر مش و فسيخ و زعابيب و أمطار و كل المصايب اللي تتخيلوها.

تصحى الصبح الساعة 7 ،و تدق عليا جرس الشقة ،و يادوب افتح الباب ..الاقيها زي الطلقة دخلت اقتحمت الصالون و تقوم قاعدة و ضاربةرجل على رجل في ثانية، و تهبد السيجارة في بقها و تبدا تسلك البابور تمهيدا للتسخين و يدور بنا الحوار التالي:

ظيظي هانم:ازيك يا طهقانة؟ أخبارك اية؟ واضح ان الحال مش اد كده... انا ملاحظة بقالك سنة و نص مغيرتيش العربيةبتاعتك.

طهقانة:أصل..

ظيظي هانم:أنا عارفة ...اكيد طهقان قارص عليكي في المصروف ...زي ما عمل كاظم ابن اخت مدام صافيناز صاحبتي قعد يقرط على مراته ... اتضح بعد كده انه بيحوش علشان يتجوز واحدة تانية

طهقانة:لأ....دا...

ظيظي هانم: ايوة ايوة ...ما هو انت اخر من يعلم... مين عارف هو بيصرف فلوسه على مين ؟؟مش يمكن مصاحب ؟و لا لايف على واحدة من اياهم ؟مفضية جيوبه اول باول

طهقانة: لا يمكن...

ظيظي هانم: انت اصلك لسة متعرفيش حاجة ...قومي اعمللنا فنجالين قهوة و انا احكيلك بلاوي الرجالة

طهقانة: حاضر..

(في عقل بالي : اية الست الأومليت دي!!! أنا ناقصة حموضة على الصبح)

طيب...لما نشوف اخرتها معاكي.....أنا قررت الف الفتيل و ابرمه و اوجهه الناحية اللي جاي منها و يا يفرقع في وشي يا يفرقع فيها و يبقى عليا و على اعدائي و لما رجعت بفنجان القهوة قلتلها:

طهقانة:في حد يسيب اوكازيونات موسم الكريسماس في أمريكا و ينزل مصر يا ظيظي هانم؟!!!!

ظيظي هانم:لا... اصل...

طهقانة: هو ابنك نزلك مصر علشان متشتريش في الاوكازيونات و لا اية؟؟اه اكيد... ما انت تلاقيكي بتفلسيه و تلاقيه عايز يحوش علشان يهاجر جزر القمر و متعرفيش توصليله

ظيظي هانم: لا ...ده أنا...

طهقانة: ايوة ما انا عارفة... انت مسكينة متقدريش تقوليله انا عايزة ارجع اميركا تاني احضر الكريسماس و ابقى انزل مصر بعدين...ده مستحيل يوافق..و لا تلاقيه واخد مراته و طالع رحلة ، و نزلك علشان يوفر مصاريفك ..يا مسكينة صعبانة عليا

ظيظي هانم:(سرحت شوية و قالت:) اه تصدقي ممكن ...انا كنت بشوف مراته بتكلم شركات سياحة و أول ما أدخل عليها تقفل الخط!! و لما أسألها تقولي :ده أنا بدور على تذاكر مخفضة علشان تنزلي مصر يا حماتي..

طهقانة: شوفتي بقى..جالك كلامي..أكيد بيجهزوا لرحلة لجزر الباهاما يقضوا الكريسماس هناك ..أنا لو منك.. الحق أرجع علشان أسافر معاهم..استني.. أنا حتصلك بشركة السياحة أحجزلك على أول طيارة

واللي فرسني اني صحيت النهاردة الصبح على صوت دوشة و خبط و جر ...أتاري إبنها المحروس (جيمي) جاب عياله و نزل مصر يقضي الكريسماس معاها بعد ما لقى تذاكر مخفضة ليه و لعياله .

يا دهوتي يعني فيها شهرين تلاتة الست ظيظي قاعدة فيهم على قلبي، و كل يوم تشلني بمحاضرة شكل

افرهد ...و اتفرس... و اطهق بقى ...و لا لأ؟!!!

مفيش غير إني أدب معاها خناقة و أقاطعها ....و لا احدفها بشوز مقاس 46... ما هم الأمريكان مبيجوش الا كده

دي حاجة تطهق بجد

أوروفوار

إمضاء

الخروف المسورق

الأول كل سنة و انتم طيبين، و ينعاد عليكم بكل خير و سعادة و هنا ،و يا رب العيد الجاي اللي مش متجوز يتجوز علشان يطهق و يجي يقعد جنبنا.

و طبعا مفيش عيد من غير فتة و مفيش فتة من غير لحمة و مفيش لحمة من غير خروف.
بس مش كل خروف زي خروف العيد بتاعنا خروف يطهق بصحيح
أكل ستارة البانيو و بهدل باب الحمام من كتر ما نطحه و كل ده علشان طهقان و هو جايبة من السوق حبسه في شنطة العربية و خاف لينط فقفل عليه الشنطة و على ما وصل البيت كان الخروف أغمن عليه
و طبعا طهقان قعد يفوّق فيه و يرش على وشه ماية و يلطشه بالقلم لحد ما فاق.
و أول ما فاق طلع يجري و طهقان يجري وراه و عم سلطان البواب وراهم الحق يا عم ....حلق يا بيه.... أوعى يا شاطر
و الخروف على صرخة واحدة ماااء... ماااااء
بس على مين ؟؟!!مسكوه متلبس بالفروة بتاعته و جابوه حبسوه عندي في الحمام لحد أول يوم العيد لما يدبحوه
و من ساعة ما دخل البيت و هو عامل لنا خساير و مطلع اللالو على عنينا
الصبح ماااء .....و الظهر ماااء .......و باليل مااء
مش عارفين ننام و لا ندخل الحمام و عامل لنا احتباس في المزلقان
كل شوية أنده على طهقان:
يا بابا تعالى اربط الخروف علشان طهقانة الصغيرة عايزة تعمل بيبيه
لكن الأستاذ خروف عنيد و مبيحبش حد يفرض إرادته عليه، ويصر انه يفضل مفكوك و يعرف بنعمل أية بالظبط في الحمام!! يا خوفي ليكون بيصور و يبهدلنا بلوتوث بعد كده.
و كله كوم و لما طهقان الصغير حب يركبه و يتفسح بيه شوية، فضح الدنيا و كان شوية شوية يطلب لنا البوليس و جمعيات الرفق بالحيوان باين عليه خروف متعلم و حيعمل لنا قلق.
أنا خلاص قطعت العيش البلدي و حمصته بالزبدة و قشرت الثوم علشان التقلية ،و مش فاضل غير سلق اللحمة و عمايل الرز بالسمنة البلدي مع رشة فلفل اسود و ريحة الخل على التقليلة بقى .....يمييييييي .....ما قلقوش
و طبعا كلكم معزومين تفطروا معانا بكرة لو عرفنا ندبح الخروف الرخم ده
و العنوان ميتوهش
مدينة الطهقانين شارع عباس الطهقان تقاطع مطهق طهيق عمارة الست طهقانة
و حتعرفوا الدور و الشقة من ريحة التقلية
و الدعوة عامة

و كل سنة و انتم طيبين

اوروفوار
امضاء

مين يشرب معايا؟

صديقتي من أيام الجامعة... انقطعت بنا الاتصالات و المقابلات لكن لسة بنبعت لبعض إيميلات من وقت للتاني

و فوجئت بإيميل منها ؛إن في اوكازيون فظيع في كارفور المعادي يوم الخميس، و عروض تجنن على الأجهزة الكهربائية و عجبني من ضمن العرض : فرن مايكروويف سعره خيالي

طبعا ما صدقت و جريت على طهقان جوزي الطيب الأمير اللي مفيش زيه

و قلتله

طهقانة: يلا بينا على كرفور يا طهقان يا أمور

طهقان:ليه يا طهقانة ..خير؟

طهقانة:كاروفور عامل اوكازيون جنان ..و لقيت عنده الفرن اللي نفسي فيه و نازل بنص سعره.... يلا نلحق قبل ما العرض ينتهي

طهقان: ما أنتي عارفة... أنا ماليش في اللف و الشوبنج، خدي أنتي الفلوس و انزلي هاتيه... و اهو بالمرة تأخدي معاكي العيال يشمو هوا

طهقانة:و اسيبك لوحدك يا طهقان في يوم الاجازة؟!

طهقان:معلش يا حبيبتي.. أنا حقعد أشوف التليفزيون و أتفرج على برنامج النكد شو و أنتي روحي، و متتأخريش عليا

طهقانة: أنت عارف مشوار كارفور المعادي ده ميقلش عن ساعة رايح و ساعة جاي و يمكن ساعتين لف جواه كمان

طهقان: معلش يا طهقانة... أنا حستناكم بس أبقى هاتلنا حاجة دافية نتعشى بيها سوا

طهقانة:طيب.. أنا حقوم البس الاولاد ،علشان الحق أروح و أجي بسرعة

و فعلا رحت لحد كارفور و اتفاجئت اني مالقيتش لا اوكازيون و لا غيره ،و لا حتى أي عامل هناك عنده فكرة إن كان في اوكازيون من أصله!!

رجعت اجر أزيال الخيبة، ما نابني إلا ساعتين سواقة رايح جاي، و لا جبت اللي كان نفسي فيه

و اشتريت العشا و رجعت لقيت طوطو مطرح ما سبته

طهقان: انتو جيتوا يا حبيبتي ؟ ها ..عملتي اية؟

طهقانة: و لا حاجة ..مالقتش في اوكازيون و لا غيره... يا دوب جبت شوية طلبات و اشتريت العشا و جيت

طهقان:طيب... يلا نتعشى لحسن واقع من الجوع

طهقانة:ما شاء الله يا طهقان أنت نفسك مفتوحة موت الليلة!!.. عيني عليك باردة

----

و فات أسبوع ..و وصلني نفس الايميل مع اعتذار من صاحبتي إن الاوكازيون الأسبوع ده مش اللي فات

و اللي حصل الأسبوع اللي فات هو نفسه اللي حصل الأسبوع ده و رحت مالقتش أي اوكازيون و لا حاجة

و رجعت لقيت طوطو قاعد في سلام و هدوء و بنفس النفس المفتوحة على الأكل

مش عارفة ليه الماوس لعب في عبي ؟!! و مسكت سماعة التليفون و اتصلت على صاحبتي اللي بعتت الايميل ملقتش حد بيرد !!،اتصلت على مامتها وعرفت إنها سافرت الخليج من حوالي سنة و نص مع جوزها

الله!!.. أمال متابعة أخبار كارفور و اوكازيونات مصر أزاي؟

امممم... في حاجة غريبة في الموضوع...

استنيت الايميل بتاعها للأسبوع الثالث و فعلا وصل باعتذار برضه إن الاوكازيون الأسبوع ده مش الأسابيع اللي فاتت و إن الخصم بقى 70 % مش 50 % و إن الفترة محدودة ،و البضاعة معدودة ،و يا الحق يا مالحقش ،و شوي شوية حيرموا البضاعة في حجري و يلموا الفلوس آخر الايميل

آه.. كده بقى مابقاش إعلان على النت، كده تحرض على المشوَرة و بيبعتوني.... بس لمصلحة مين يا ترى؟

مين من مصلحته اسيب البيت في الويك اند تلات أربع ساعات أنا و الأولاد ؟

مين عارف ان نفسي في فرن مايكروويف؟

مين عارف إني أثق في كلام صاحبتي دي؟

مين ؟ يا ترى مين؟

و المرة دي بلعت الطعم بمزاجي ،و لبست العيال و ودعت طهقان ،و نزلت ركبت العربية كأني رايحة على كارفور في الرحلة الأسبوعية للبعتان، و لفيت و ركنت في الشارع اللي قدام العمارة لما نشوف بقى أخرتها أية؟

مفيش ربع ساعة، و لقيت طهقان نازل لابس تريننج و معاه منفضة اقصد مضربة تنس على ضهره و ركب عربيته و طلع

و أنا ....... وراه

و ماقلكوش بقى على نوافير النار اللي كانت بتبظ من نافوخي بألوان الطيف و الدخان اللي كان طالع من مداخن مخي

ماكنتش خايفة غير من صوت سناني و هي بتجز على بعضها ...لا يسمعه طهقان و يتنبه إني وراه

وصل البيه للنادي و نزل في حركة رشيقة ،و معاه منفضة التنس ،و فريرية كان في ملعب التنس، و سلم على بت كده تطلع من دور أحفاده و هاتك يا لعب معاها

و أنا و العيال اتسرسبنا و قعدنا في المدرج نتفرج على طهقان و هو بيتدرب على التنس مع المدربة الشابة المفعصة اللي شبه عصعوصة القصب الممصوص

و كل ما تقع منه الكورة نصقف و نقول: هييييييييه و هو مش واخد باله فاكرنا شلة عيال بتهيس

و كل شوية يبص في الساعة بتاعته ...خايف لا الوقت يسرقه و ارجع من المقلب بتاع كارفور ملاقيهوش في البيت

و مع أول بوينت(جون) يجيبه في الآنسة عصعوصة رحنا أنا و العيال في نفس واحد

قلنا: طوطو.....طوطو....هووو.. هووو

راح لافف و بص علينا و شاف العنين الحمرا اللي بتنط من وشي و الابتسامة الصفرا في الوش البافته و الليلة السودا اللي حيشوفها

باختصار شاف علم مصر في وشي

اتلهى و اترزى و جاب عرق و زيت و سوائل تانية لا داعي لذكرها محافظة على مشاعر مناخير القراء

و في طريق العودة للبيت ..على أساس إن لينا بيت نتخانق فيه، و مايصحش ننشر غسيلنا الديرتي قدام الناس ، و الست الجدعة تدي جوزها برستيجه قدام الناس و تبقى تسحبه منه في البيت ....حصل التالي:

طهقان:و الله أنا كنت حقولك... بس كنت عارف انك حترفضي ..اكمن المدربة ست، و الحصة بمية و خمسين جنية و حتقعدي تقولي هي قلة رجالة يعني !!و تهريني أمثال من عينة: اللي تسكر بيه تتعشى بيه، و تسدديها زي ما سددتي مشوار الجيم

طهقانة:تقوم تبعتني كارفور 3 أسابيع ورا بعض؟؟؟ يا قادر!!!

طهقان:أنا اصلي قابلت ماهر جوز صاحبتك على النت، و قالي انه سافر الخليج ..و قلت أكيد مش حتعرفي تكلميها، قمت قلت اهزر معاكي و اعمل إيميل شبه إيميلها و ابعتلك منه ،علشان عارف انك بتحبي الشوبنج و قلت تتسلي وقت التدريب بتاعي بدل ما تزهقي...

طهقانة: تقوم تشربني المقلب ده؟!! اتاريك.. بتبقى واقع من الجوع بعد التدريب.. و بتلتهم الأخضر و اليابس

طهقان:دي كل الحكاية ساعة تدريب في الأسبوع... اهو الواحد يستعيد شبابه الضائع

طهقانة:شبابه!!؟؟!!...طيب.. أنا حخلصك من شبابك الضائع ده للأبد، علشان ماتدورش عليه تاني

طاااااااااااااخ ......بووووووم ......دييييييييييييج

دي حاجة تطهق بجد

اوروفوار

إمضاء

كلنا ليلى

ايون أنا ليلى.. و لا في ليلى الولو مني ..طبعا ما الست في بلادنا دي مقهورة و مظلومة و طهقانة.
و الراجل سواء كان أبوها أو أخوها أو ابنها بيمارس عليها كل أنواع القهر و التنطيط و الفزلكة
و تلاقي الواد من دول لسة عنده 6 سنين و يقول لأخته الكبيرة:
انكسحي ادخلي من السباك لحثن اقول لبابا يضلبك لما يجي من السغل
و لما يكبر شوية يقولها:
فزي انزلي اشتري الفطار
و لما تقوله : مش كنت بتقول معندناش بنات تبص من الشباك؟
يقولها:دي حاجة و دي حاجة
ايون...جينا لمربط الفرس اللي فارسني و ناقطني و مطهقني
الازدواجية في المعايير
الراجل من دول في الوقت اللي بيخنق في الست و ميخلهاش تتنفس و لا تطل من شباك و لا تروح لصحبتها ،معندوش أي مانع إنها تتدلدل من البلاكونة علشان تنشر هدومه!! أو تنزل تشتريله العيش و اللبن و الشوارع ضلمة و برد في عز الشتا
الازدواجية اللي طلع عليها أمثال كتير بالبلدي قالوا:
(دي حلوة و دي كخة)
و قالوا على الراجل اللي بيقفلها على أخواته البنات و ميقدرش يفتح بقه قدام مراته (حمش اخواته ،......مراته)
مكان النقط لفظ ابيح
مش بس الازدواجية اللي مطهقاني لا كمان في حاجة تانية عكسها خالص مطهقاني قوي قوي و هي
التمدن و اللارجنة
و إحنا كلنا عارفين المثل اللي بيقول:
قال يا أبويا شرفني ...قال لما يموت اللي يعرفني
أنا طهقانة...لاني بشوف ناس بسطاء جدا سايبين لبناتهم السايب في السايب و عاملين خوجات . البنت تخرج وقت ما هي عايزة و تتأخر برة و أبوها قاعد في البيت مانتخ و ميت فل و لا كأن في حاجة حصله
هو كده بيفرط في ليلى و مديلها حرية وشها حرية و ضهرها ضياع و صياعة و أخرتها سودة و مبسوط قوي انه راجل لارج !!
لأ ده كده مش لارج ده كده اكس لارج
اخس عليه و على اللي زيه
***
ليه ادم ما يحتضنش ليلى بجناحه.. بدل ما يحطها تحت جناحه!!!
يعني يا ناس مافيش وسط؟؟؟ ماينفعش نحافظ على الستات من غير ما نخنقهم؟؟!! ماينفعش نديلهم حرية تفيدهم و ماتضيعهمش؟!!! ماينفعش نربي و نغرس الدين في البنات و بعدين نجني ثمرة ده كله حشمة و حياء؟!!


الحياء؟؟؟؟الكلمة دي قربت تنقرض من معجم الحياه.. و ادم السبب
لأنه مرباش ليلى على الحياء اللي قال عنه الرسول صلى الله عليه و سلم:
الحياء ما كان في شئ إلا زانه و ما نزع من شئ إلا شانه
الحياء اللي يخليها تتكسف تعمل الغلط و تبعد عنه و في نفس الوقت يديلها الشجاعة في الحق و الاقدام على تطوير نفسها ثقافيا و علميا من غير ما تفرط في انوثتها و تتمرمط في الشوارع و الاوتوبيسات ليل نهار بحجة التمدن و التحرر
كلامي لكل ليلى و ادم........نفسي أشوف في مجتمعي مساحة من التفاهم والاحترام و التقدير و الحب
بين كل ليلى و ادم
و يبقى في الآخر لا تفريط و لا إفراط

و اوروفوار

إمضاء

الغش اخرته مش

علي سفرة الإفطار ..دار هذا الحوار

طهقان: أنا طهقت من اللي بيحصل في البلد ، و مش عارفة اية الحل ؟! المفروض اننا في شهر فضيل و المفروض إن الصيام بينقي النفس البشرية و لكن اللي بيحصل غير كده للأسف

طهقانة:شايف شباب الحي.. معلقين لمبات ملونة و فوانيس في كل شارع احتفالا بقدوم رمضان ، كل ده كويس ،لكن انهم يسرقوا النور من عامود النور اللي في الشارع ده اللي مش كويس خالص

طهقان:هو مال قمر الدين طعمه غريب كده

طهقانة:مش عارفة!! أنا برضه ملاحظة انه بيقرقش ، تقريبا ضايفين له جزر و قرع عسلي لأنهم ارخص من المشمش

طهقان:جزر!!...و أنا اقول وداني طولت ليه و حاسس إني بحن للعب مع الأرانب

هههههههههههههههه

طهقانة:يعني هي جت على قمر الدين!!.ما عندك الكفتة اللي لما تشتري واحدة تاخد التانية مجانا ؛ طلعت كلها فول صويا و مفيهاش ريحة اللحمة

طهقان: كويس انها جت على فول الصويا و ما ضافولهاش لحمة نونو و لا لحمة هوهو و لا لحمة نهق

طهقانة:هههههههههه ايوة صحيح ..اهو برضه الفول صديق البيئة

طهقان:شوفتي صاحبنا صلاح... مسكين اشترى حبوب منشطة من الصيدلية و من ساعة ما اخدها و هو في النازل، و ماكتشفش السبب إلا لما شمعوا الصيدلية بالشمع الأحمر و اكتشف إن الحبوب كانت مغشوشة

طهقانة:مسكين ...اتاري يا عيني اللي يشوفه رايح يفتكره جاي

طهقان:لا و كله كوم و حليب الأطفال اللي غاشينه بالنشا كوم... و العيال يا عيني يجيلهم لين عظام و كساح و إحنا مش حاسين

طهقانة:النشا هين .. الدور و الباقي على حلويات الأطفال المسرطنة اللي مغرقة السوق

طهقان:اصلهم عرفوا إن مستشفى السرطان للأطفال اشتغلت.. فقالوا لازم يجيبولها زباين.. دول كمان منزلين سجاير مسرطنة مشعة في مصر بتجيب فشل كلوي كنوع من التغيير يعني

طهقانة: يا ساتر يا رب ..تعرف ...الست البوابة بتحكيلي انها اشترت من الجمعية عسل نحل رخيص، لقيته كله مية بسكر و مفيهوش طعم العسل

طهقان:اه.. ما هما بيستغلوا غلا الأسعار و بيغرقوا السوق ببضايع مغشوشة و الناس ما بتصدق تلاقي حاجة رخيصة.. بتشتري الهوا

طهقانة:ايوة...حصل معايا لما لقيت السوبر ماركت عامل عرض على نوع صلصة جديد واشتريت منه كمية ،و طلع كله لون صناعي و دقيق و طمطماية واحدة في كل برطمان

طهقان:و يمكن مفيش طماطم من اصله..ده العصير كمان تلاقية كله مية بسكر و مكسبات طعم و لون و يفرحونا بصورة مانجاية على الكرتونة و كان الله بالسر عليم

طهقانة: لا و طالعين لك في حاجة جديدة.. عمالين يغلوا السعر و ينقصوا الكمية

طهقان: شوفتي رغيف العيش الفينو بقى قد اية؟ عمال ينكمش .. ده بكرة يعبوه في شريط دوا و نبقى ناخد الرغيف من دول و نشرب وراه كباية مية زي الاسبرين

طهقانة: انا حقوم اكويلك الجلابية بقى علشان تنزل تصلي التراويح

طهقان: طيب يا حبيبتي

بعد دقائق قليلة..............بوووووووووم

طهقانة:الحقني يا طهقااااااااااان... حريقة

طهقان:الله اكبر... الله اكبر...يا ساتر يا رب

طهقانة: كويس انك شلت الفيشة قبل ما ترش المية ..أعوذ بالله قلبي وقف من الخوف

طهقان:اية اللي حصل؟

طهقانة:المشترك الصيني المنيل ده... يا دوب وصلت فيه المكواة لقيته فرقع و النار مسكت في باسكيت الزبالة كانت حتحرق البيت لولا ربنا ستر

طهقان:هو الغش وصل للصين كمان!!

طهقانة:ده الصين دي هي اصل الغش التجاري..عمالين يقلدوا العلامات التجارية و الماركات العالمية و يغرقوا السوق بالبضاعة المضروبة بسعر رخيص و الناس بتفرح بالرخص و تشتري و ادي النتيجة البيت كان حيولع

طهقان: مش لو كان المشترك ده صيني أصلا!! ما هم هنا بيصنعوا الحاجات دي تحت الكوبري و يلزقوا عليها صنع في الصين

طهقانة:على كده الغش بقى فن و ليه نجوم و اساتذه و بكرة يعملوله مسلسلات

طهقان: امال اية و الغش ليه فروع.. فرع عدم إظهار العيب في السلعة، وفرع التلاعب في عناصر البضاعة، و فرع اللعب في تاريخ انتهاء الصلاحية

طهقانة:يعني من المتوقع يفتحوا معهد للغش التجاري و ينزل في التنسيق السنة الجاية و يخرج غشاشين أكاديميين على مستوى

طهقان:ايوة يا حبيبتي عقبال ما تشوفي أولادك

طهقانة:تف من بقك يا شيخ ده من غشنا فليس منا

طهقان:اه طبعا أنا بهزر بس ..ده اللي يحكمني على الغشاشين دول اربطهم في شجرة و اللي رايح و الجاي يحدفهم بالطوب

طهقانة: لما أقوم بقى أعملك الشاي أبو نشارة الخشب و اجيبلك حتتين كنافة من اللي معمولين بالزبدة المغشوشة بزيت التموين ههههههههههه

طهقان: يمهل و لا يهمل

دي حاجة تطهق بجد

أوروفوار

إمضاء

عينه.. حبيبي ..عينه

اليومين دول أنا مشغولة جدا ،و للأسف مش قادرة أتابع مدوناتكم العزيزة ؛ لاني و الحمد لله مسكت شغل جديد و مطحونة فيه ،و اغلب شغلي على الكمبيوتر،فبعد ما بخلص شغل مش ببقى قادرة افتح عيني و ببقى شبه الضفدعة المتبنجة.0

و اللي مستغرباله.. إن طهقان بيعاني من فراغ طاحن و كل ما يشوفني مشغولة يقعد يقولي
طهقان: يا بختك لاقية حاجة تعمليها
طهقانة:يا بختي اية!! د ه أنا طلعان عيني و نفسي افرد ظهري شوية
طهقان:على الأقل لاقية حاجة بتحبيها تعمليها، مش أنا اللي زهقان و طهقان على الآخر
طهقانة:طيب ما أنت قاعد تقلب في التليفزيون و مروق اهو حد طايل؟!
طهقان:لأ و أية..مرتبك أد كده.. و بتروحي الشغل ساعتين و ترجعي.. يعني آخر هنا
طهقانة:ايه يا طهقان؟؟ انت بتقر عليا و لا ايه؟

طهقان:لا يا ستي اشتغلي وهيصي ....و بلاش إحنا
طرااااااااااااااااخ...ريحة شياط...اجواء مضلمة

طهقانة: اية اللي حصل ده ...يظهر النور ضرب
طهقان:لما أروح أشوف في اية!!
بعد دقائق...
طهقان: ده كان في قافلة في النور و أنا صلحتها
طهقانة:اية ده.. الكمبيوتر مش راضي يفتح!!...يوووه ..يظهر الباور سبلاي أتضرب
طهقان:و انتي حتغلبي !!ما عندك اللاب توب
طهقانة:ارحمني بقى لحسن أنت بقت عينك صفرة اليومين دول

اليوم التالي بعد عودتي من العمل

طهقانة: يا ساتر يا رب الجو نار برة
طهقان: و انت بيهمك؟ ما عربية الشغل مكيفة و من الباب للباب ، أمال أنا اعمل اية ؟!اللي بسوق في الزحمة و الحر و إشارات و غرامات و...

طهقانة:أنت شامم من قاسم أفندي ليه اليومين دول يا طهقان!!
طهقان:أنا مش بقر و لا حاجة... أنا عيني باردة ،بس اصل ناس ليها حظ و ناس ليها قانون المرور

يدق جرس الهاتف...ترن ترن ...ترن ترن

طهقانة:الو ..مين..ايوة.. طيب.. حصل خير...أوك ..سلام
طهقان:مين؟ من سيربح المليون بيقولولك: أنك فزتي بعمرة؟
طهقانة:لا يا شرارة بيه.. ده سواق عربية الشغل بيقول : إن العربية أتعطلت و حروح الشغل بكرة بالميكروباز..ارتحت؟؟

في اليوم التالي...
طهقان: اية ده أنت رجعتي بدري كده ليه؟
طهقانة:يا دوب سلمت الشغل و قلت أجي اطبخ لك أكله حلوة
طهقان:و لحقتي تطبخي !! وعملتي سلطة كمان!! ده اية السرعة دي كلها
طهقانة:أي....آه
طهقان:مالك؟ أنت عورتي أيدك بالسكينة..معلش
طهقانة:لا.. لا ..لا..أنت بقى فولتك عالي اليومين دول، و سرك باتع ،كويس إني متحولتش ضفدعة .

بعد المغرب
طهقانة:انا نازلة رايحة عيادة دكتور الأسنان يا طهقان، مش عايز حاجة؟
طهقان:هو أنتي كل أسبوع عنده!!

طهقانة:اعمل اية الحشو وقع و ضرسي مجنني..و لا اكمنك أنت سنانك حديد و معندكش و لا سنة مسوسة حتتريق على المساكين اللي زيي؟؟!!
طهقان:الله اكبر

في عيادة دكتور الأسنان...

طهقانة:الله؟؟؟ طهقان اية اللي جابك؟
طهقان:سناني ..مش قادر...فكي كله بينقح عليا... يظهر ضرسي أتكسر

طهقانة:من اية يا طوطو؟؟

طهقان:مفتاح الدولاب أتعوج ،حاولت أعدله بسناني ،و من ساعتها و أنا حموت من الوجع، يظهر في حد قر عليا و عينه رشقت
طهقانة:مش أنا شووور ...أنت عارف أنا عيني كوول

داخل غرفة الكشف..

طهقان:كويس إني لقيتك يا دكتور، ده أنا تعبان قوي
دكتور الأسنان: أنت لحقتني فعلا.. ده أنا مسافر بكرة سويسرا
طهقانة:عندك مؤتمر لطب الأسنان هناك يا دكتور؟
دكتور الأسنان: لا.. ده أنا رايح أصيف أنا و الأولاد
طهقان:دي سفرية بالشيء الفلاني.. ده كفاية مصاريف الطيران
طهقانة:متنساش يا طوطو إن دكاترة الأسنان بتكسب كويس.. ده الضرس الواحد بيحشوه بقد كده
دكتور الأسنان: اهو.. الواحد يفسح الأولاد و يغير مناظر
طهقان:مناظر أية يا راجل!!..ده أنت حتبقى في نعيم و حتغسل عنيك من الحتت المصري و تشوف السحالي السوسري مين قدك
الممرض: دكتور...في واحد برة بيقول انه مفتش من مصلحة الضرائب .. ادخله؟
دكتور الأسنان: يا نهار مش فايت ..دي مصيبة أية دي؟

طهقانة:طيب ..نستأذن إحنا بقى و نجيلك بعد ما تطلع من السجن اقصد ترجع من السفر بالسلامة
طهقان:آه.. أنا شايف الوقت مش مناسب ...سلام عليكم