ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

عينه.. حبيبي ..عينه


اليومين دول أنا مشغولة جدا ،و للأسف مش قادرة أتابع مدوناتكم العزيزة ؛ لاني و الحمد لله مسكت شغل جديد و مطحونة فيه ،و اغلب شغلي على الكمبيوتر،فبعد ما بخلص شغل مش ببقى قادرة افتح عيني و ببقى شبه الضفدعة المتبنجة.0
و اللي مستغرباله.. إن طهقان بيعاني من فراغ طاحن و كل ما يشوفني مشغولة يقعد يقولي
طهقان: يا بختك لاقية حاجة تعمليها
طهقانة:يا بختي اية!! د ه أنا طلعان عيني و نفسي افرد ظهري شوية

طهقان:على الأقل لاقية حاجة بتحبيها تعمليها، مش أنا اللي زهقان و طهقان على الآخر
طهقانة:طيب ما أنت قاعد تقلب في التليفزيون و مروق اهو حد طايل؟!
طهقان:لأ و أية..مرتبك أد كده.. و بتروحي الشغل ساعتين و ترجعي.. يعني آخر هنا
طهقانة:ايه يا طهقان؟؟ انت بتقر عليا و لا ايه؟

طهقان:لا يا ستي اشتغلي وهيصي ....و بلاش إحنا
طرااااااااااااااااخ...ريحة شياط...اجواء مضلمة

طهقانة: اية اللي حصل ده ...يظهر النور ضرب
طهقان:لما أروح أشوف في اية!!
بعد دقائق...
طهقان: ده كان في قافلة في النور و أنا صلحتها
طهقانة:اية ده.. الكمبيوتر مش راضي يفتح!!...يوووه ..يظهر الباور سبلاي أتضرب
طهقان:و انتي حتغلبي !!ما عندك اللاب توب
طهقانة:ارحمني بقى لحسن أنت بقت عينك صفرة اليومين دول

اليوم التالي بعد عودتي من العمل

طهقانة: يا ساتر يا رب الجو نار برة
طهقان: و انت بيهمك؟ ما عربية الشغل مكيفة و من الباب للباب ، أمال أنا اعمل اية ؟!اللي بسوق في الزحمة و الحر و إشارات و غرامات و...

طهقانة:أنت شامم من قاسم أفندي ليه اليومين دول يا طهقان!!
طهقان:أنا مش بقر و لا حاجة... أنا عيني باردة ،بس اصل ناس ليها حظ و ناس ليها قانون المرور

يدق جرس الهاتف...ترن ترن ...ترن ترن

طهقانة:الو ..مين..ايوة.. طيب.. حصل خير...أوك ..سلام
طهقان:مين؟ من سيربح المليون بيقولولك: أنك فزتي بعمرة؟
طهقانة:لا يا شرارة بيه.. ده سواق عربية الشغل بيقول : إن العربية أتعطلت و حروح الشغل بكرة بالميكروباز..ارتحت؟؟

في اليوم التالي...
طهقان: اية ده أنت رجعتي بدري كده ليه؟
طهقانة:يا دوب سلمت الشغل و قلت أجي اطبخ لك أكله حلوة
طهقان:و لحقتي تطبخي !! وعملتي سلطة كمان!! ده اية السرعة دي كلها
طهقانة:أي....آه

طهقان:مالك؟ أنت عورتي أيدك بالسكينة..معلش
طهقانة:لا.. لا ..لا..أنت بقى فولتك عالي اليومين دول، و سرك باتع ،كويس إني متحولتش ضفدعة .

بعد المغرب
طهقانة:انا نازلة رايحة عيادة دكتور الأسنان يا طهقان، مش عايز حاجة؟
طهقان:هو أنتي كل أسبوع عنده!!

طهقانة:اعمل اية الحشو وقع و ضرسي مجنني..و لا اكمنك أنت سنانك حديد و معندكش و لا سنة مسوسة حتتريق على المساكين اللي زيي؟؟!!
طهقان:الله اكبر

في عيادة دكتور الأسنان...

طهقانة:الله؟؟؟ طهقان اية اللي جابك؟
طهقان:سناني ..مش قادر...فكي كله بينقح عليا... يظهر ضرسي أتكسر

طهقانة:من اية يا طوطو؟؟

طهقان:مفتاح الدولاب أتعوج ،حاولت أعدله بسناني ،و من ساعتها و أنا حموت من الوجع، يظهر في حد قر عليا و عينه رشقت
طهقانة:مش أنا شووور ...أنت عارف أنا عيني كوول

داخل غرفة الكشف..

طهقان:كويس إني لقيتك يا دكتور، ده أنا تعبان قوي
دكتور الأسنان: أنت لحقتني فعلا.. ده أنا مسافر بكرة سويسرا
طهقانة:عندك مؤتمر لطب الأسنان هناك يا دكتور؟
دكتور الأسنان: لا.. ده أنا رايح أصيف أنا و الأولاد
طهقان:دي سفرية بالشيء الفلاني.. ده كفاية مصاريف الطيران
طهقانة:متنساش يا طوطو إن دكاترة الأسنان بتكسب كويس.. ده الضرس الواحد بيحشوه بقد كده
دكتور الأسنان: اهو.. الواحد يفسح الأولاد و يغير مناظر
طهقان:مناظر أية يا راجل!!..ده أنت حتبقى في نعيم و حتغسل عنيك من الحتت المصري و تشوف السحالي السوسري مين قدك
الممرض: دكتور...في واحد برة بيقول انه مفتش من مصلحة الضرائب .. ادخله؟
دكتور الأسنان: يا نهار مش فايت ..دي مصيبة أية دي؟

طهقانة:طيب ..نستأذن إحنا بقى و نجيلك بعد ما تطلع من السجن اقصد ترجع من السفر بالسلامة
طهقان:آه.. أنا شايف الوقت مش مناسب ...سلام عليكم

في السيارة في طريق العودة للمنزل

طهقانة:طهقان...هو إحنا قرينا على الدكتور؟؟
طهقان:لا يا حبيبتي ده قضاء و قدر
طهقانة:طيب حاسب القطة اللي معدية دي
طهقان: و انتي شفتيها في الضلمة دي؟؟ ياااااه.. نظرك6/6
طهقانة: آه.........عنيـــــــــــــــــــــــا

دي حاجة تطهق بجد
اوروفوار

امضاء

53 comments

طهقان كريم





طهقانة:رمضان كريم يا طهقان

طهقان:الله أكرم يا طهقانة..مش مرتاح للبوء الناعم ده

طهقانة:أبدا يا حبيبي أصلي عايزة انزل أجيب حاجة رمضان و هدوم المدارس و كل سنة و أنت طيب بقى

طهقان:آه..رمضان و المدارس داخلين في بعض السنة دي عاملين قافلة ..مش كانوا قالوا حيأجلوا المدارس لبعد العيد؟!

طهقانة:لا ..يأجلوا مين؟؟ أمال مين يطلع روحه و يشحت؟؟

طهقان:طيب ابقى خدي فلوس من الدولاب، بس ابقى خفي أيديك في المصاريف، أنت عارفة لسة داخل علينا عيد

طهقانة:متخافش يا حبيبي، أنا حروح هايبر ماركت بيبيع بالجملة أسعاره رخيصة خالص ...اطمن و حط في بطنك بطيخة سلايسز

طهقان:من ناحية مطمن ..فانا مش مطمن، و حاسس إني متركب في سيخ شاورما و حد عمال ينسل من لحمي بسكينة تلمة

طهقانة:انت مقامك سكينة تلمة برضه يا روحي!!! أنت مقامك ساطور فرنساوي و يكون مسنون كمان

اليوم التالي..عندما عاد طهقان من العمل:

طهقان:اية الصناديق دي كلها اللي مالية الصالة؟؟ أنتي فتحتي بقالة هنا و لا إية؟

طهقانة:لا يا حبيبي دي حاجة رمضان

طهقان:اية؟؟!! كل دي؟

طهقانة: أصل الكرتونة ارخص من الفرط ،عندك مثلا كرتونة المكرونة دي، أرخص من لو اشتريت أكياس مكرونة لوحدها بحوالي سبعة جنية، قيس أنت بقى سبعة ؛عشرة جنية في كل حاجة ،ده أنا وفرتلك وفر

طهقان:و الكمية دي كلها حناكلها في كام سنة!!

طهقانة:كام سنة اية؟ اهو رمضان داخل و كل سنة و أنت طيب

طهقان:يا دي كل سنة و أنت طيب، و دفعتي كام في الحاجات دي يا ست الواعية؟؟

طهقانة:أبدا..ألفين جنيه بس، ده غير اني رحت مصنع ملابس المدرسة و اشتريت منه بأسعار ارخص من أسعار السوق.

طهقان:ألفين جنية يا مفترية !!خزين رمضان و هدوم المدرسة؟

طهقانة:لا ده خزين بس..ملابس المدرسة عملت 900 جنيه و لسة الجزم و الشنط والكراريس و ...

طهقان:قومي لمي هدومك يا طهقانة..

طهقانة:حنسافر فين دلوقتي يا طهقان؟..لسة حنصيف ؟؟ لا خلينا نوفر بقى..

طهقان:قومي لمي هدومك و هدوم العيال

طهقانة:طيب مادام مُصَّر بقى، نروح مرسى مطروح علشان إسكندرية رطوبة دلوقتي..اخدلك العوامة؟!!

طهقان: قومي لمي هدومك.. حوديكي عند أهلك يشوفولي صرفة فيكي

طهقانة:كده؟؟بعد اللي عملته ده كله؟؟ طيب اوك ..بس خلي بالك شوال الرز اللي وصيت عليه العطار حيجي الساعة 9 متنساش تاخده من الراجل و تديلة 150 جنية و لو جاب داستة قمر الدين متنساش تــ.....

طهقان:تييييييييت.....تييييييييييييييت

طهقانة: هي وصلت لتيت يا طهقان و كمان بتزمرلي!!!

لا دي بقت حاجة تطهق خالص

أوروفوار

إمضاء


54 comments

الخدامة الهدامة ...سينات

هبطت عليا من السما شغالة جديدة ،بعد بحث مضني عن واحدة تساعدني و خصوصا ان رمضان على الأبواب.... كل سنة و انتم طيبين.
و حبيت انكم تشاركوني الحوارات النقاوة اللي دارت بيني و بينها ، و اللي يعرف عنوان دكتور بيبيع مرارة مستعملة نضيفة يبقى يقولي
يلا بينا.....

حوارات نقاوة...من يوميات الخدامة الهدامة


سينات: في شوية عصير مانجة في التلاجة ..اجيبهوملك بدل ما يحمضوا يا عمو؟
طهقان: على اساس اني البلاعة اللي بترموا فيها الاكل البايظ يعني و لا اية!!0
طهقانة: يا بنتي اسمها تتعشى و لا تنام خفيـــــف


سينات:البوتيجاز مش راضي ينطفي يا ابله ...اطش عليه شوية مية؟؟
طهقانة: يا نهار مش فايت.. عايزة الغاز يخنقنا وتفجري بينا البيت يا زينات!! حرام عليكي
سينات: ليه يا ابلة ما أنا كنت بطفي الكانون كده في البلد!!!0
طهقان: لا ارمي عليه شوية رملة أحسن ...يا مثبت العقل في الراس
طهقانة: اسكت... لتصدقك و تردملنا المطبخ



طهقانة:حتعملي اية بالليفة اللي مليانة صابون دي يا زينات؟
سينات:حصبن بيها البتاع اللي عمو طهقان بيشتغل عليه
طهقانة:بتاع اية ده!!!...مصيبة لتكوني عايزة تصبني اللاب توب
سينات:متخفيش يا ابلة ما انا حاشيل الفيشة الأول
طهقانة: لاااااااااأأأأأأأأأأأأأأأه



سينات: الواد ابنك يا بلة مش راضي يستحمى... مع اني غليت له المية و مليت بها البستلة البيضة الكبيرة اللي في الحمام
طهقانة: غليتي اية؟؟؟ لا يا حبيبتي هو متعودش يتسلق في البانيو
طهقان: مية مغلية ..هي حتحميه و لا حتولده؟!0


سينات: عمو طهقان...الواد ابنك الكبير بيضرب الواد اخوه الصغير اكمنه لابس البوكس بتاعه و انا قلتله سيبه يلعب بالبوكس بتاعك شوية مرضيش
طهقان: بوكس اية يا زينات!!! اسمه بوكسر و مش مفروض يلبس بتاع اخوه
سينات: البوكس يا عمو... اللي بيضربوا بعض بيه في المولد؟؟
طهقان: لا يا بنتي..ده بوكسر... اللي هو الـ... بتاع ابو حجر اللي بدكه ...البت دي حتطير برج من نافوخي


سينات: هو أنتي كنتي عايزة حلة الماية الوسخة اللي على البوتيجاز يا ابلة؟؟؟
طهقانة: مية اية يا بنتي؟؟؟ دي شوربة فراخ حطبخ بيها
سينات : ده انا كبتها في الحوض..... هي هي هي
طهقانة: يا رب صبرك




طهقانة: اية الزيطة دي على الصبح؟؟
سينات: ده الواد ابنك يا ابلة بيسوق العربية الكهربا ام خرطوم.... هي هي هي
طهقانة: يا نهار مش فايت... مقعدة الواد على المكنسة و بتسحبيها من الخرطوم !!!
طهقان الصغير: هي اللي قالتلي يا ماما: اركب و انا اثدك



سينات: ابلة.. انا دعكتلك كل الحلل السودا اللي في المطبخ بالسلكة خليتهملك بيبرقوا
طهقانة: حلل اية يا بنتي كل الحلل نظيفة ...يا دهوتي انت حكيتي الحلل التيفال بالسلك؟....يمهل و لا يهمل

طهقانة: فين زينات يا طهقان يا صغير؟
طهقان الصغير:طلعت البلاكونة و قفلت الثيث وراها يا ماما

طهقانة: ليه بتعمل اية بالليل كده؟
طهقان الصغير:بتلبث هدوم النوم يا ماما اصلها مكثوفة تغير قدامي
طهقانة: يا بوليس الاداااااب




سينات: انا غسلت الهدوم كلها يا ابلة و حطيت كرور في الماية لجل ما تنضف و تبقى فل
طهقانة: يا نهار ابيض...حطيتي كلوركس على البنطلونات الجينز بتاعة عمك طهقان..دي باظت كده يا بنتي
طهقان: شيلي الزفت الكلور من قدام البنت دي ..دي مدمنة كلوركس
دي ممكن تشربة علشان تبيض



طهقان: يا بنت يا زينات فين الروشتات اللي كانت على المكتب هنا؟؟
سينات:شورشتات اية؟ انا لقيت شوية ورق على المكتب رميتهم في الزبالة...بلا كركبة
طهقان: رميتي روشتات ست شهور يا مفترية تساوي 600 جنية ده انا كنت حوديهم الشغل و اخد الفلوس اللي دفعتها.... حتروحي فين من ربنا




سينات: يا ابلة ..الرسمة اللي في الفاليلة بتاعة الواد طهقان الصغير لزقت في المكواه ،قمت انا شداها و حكيت المكواه بالسلكة
طهقانة: سلكة تاني يا زينات..المكوة كده باظت حتفضل كل مرة تلزق، حد يكوي البلاستيك بالمكواه يا زينات؟؟؟






طهقانة: زينات...هو شعرك ماله ملزق كده النهاردة؟؟ انت حاطة عليه اية؟
سينات: اصل لقيت معندكوش جاز... قوم حطيت من المرهم اللي في الانبوبة اللي في الحمام
طهقانة: دهنتي شعرك بمرهم التسلخات يا زينات؟؟؟!! ...كويس برضه اهو مطهر




سينات:ابلة.... السلطنية الازاز نطت من ايدي وقعت اتدشدشت
طهقانة: دي رابع بولة بايركس تطير من ايدك يا زينات!! مش حنلاقي سلاطين نغرف فيها بعد كده ، حناكل من الحلة يا امي.0

الله؟!!!فين السيراميك اللي كنت شايلاه تحت الحوض يا زينات؟

سينات: رميتة من البلاكونة يا ابلة ..انتي كنتي عايزاه؟

طهقانة: اية؟؟؟ رمتية من العاشر يا قادرة؟؟؟ و لو كان نزل على نافوخ واحد جاب اجله !!!كان زمانك مشرفة في ابو زعبل

سينات: متخفيش يا ابلة انا رميتة بالليل هو و صفيحة البوية اللي كنتي مخزناها ..بلا كركبة

طهقانة: اشد في شعري يا نااااااااااس!!!0



طهقانة: اية اللي بتلمعي بيه الترابيزات ده يا زينات؟؟
سينات: ده كيس مخدة يا ابلة
طهقانة: كيس مخدة ؟؟ده بتاع طقم الملاية الكنافاه... ده غالي يا بنتي
سينات: ما انا حخسلة بعد ما انفض بيه الشيش يا ابلة




طهقانة: ايه ده؟؟ ايه الريحة دي؟؟
سينات: يمكن ريحة الدوا اللي تحت حوض الحمام؟ اصل انا لقيته بيلمع البلاط قوم مسحت بيه الحمام
بووووووووووم
طهقان: ااااااااي
طهقانة: مالك يا طهقان؟؟ اتزحلقت يا حبيبي ..معلش اصل زينات مسحت الحمام بزيت اللافندر بتاع التدليك





طهقانة: اية اللي منشراه ده يا زينات؟؟؟؟؟؟؟
سينات: دي اكياس الشاي ابو فتلة.. اللي عمو بيشربه... بعد ما بطلعها من الكباية.. بنشفها و احطهاله المرة اللي بعدها
طهقانة: طيب وطي صوتك... بدل ما يقوم يرجع في حجرك و يطردني أنا و انتي
و متعمليش كده تاني ..يا ربـــــي




طهقانة: زينات ..خدي يا بنتي مرتبك اهوه كــــامل و قبل ما الشهر يخلص كمان، و روحي بلدكم رمضني مع اهلك، و احنا حنبقى نبعتلك فلوسك كل شهر لحد عندك
سينات: ليه يا ابلة؟؟..ده انا لسة كنت عايزة اصبن حيطان اوضة المسافرين بالجاز قبل رمضان
طهقان: ابوس ايدك بلاش... كفاية الصالون الايتامين اللي غسلتيه بالكلور و مرمطي ..اقصد بيضتي اهله
طهقانة: افتكرلك اية يا بصلة!! و انتي كل قطمة بدمعة...روّحي يا بنتي و القلب داعيلك



دي حاجة تطهق بجد


و اوروفوار


امضاء
57 comments

طهقان.. ايرون مان


الخميس اللي فات زارتنا أسرة عماد صاحب طهقان الانتيك اقصد الانتيم و عشرة العمر و زميل التطفل اقصد الطفولة و الدراسة و اللي عايش هو و أهله في احد دول الخليج و بسلامته نازل مصر أجازة.
و اللي خلاني افوجأ :اني على ما اذكر عماد ده كان سوفيف و معصعص و شبه الهيكل العظمي بس متغطي بجلد بشري و اللي جالنا ده حاجة كده اللهم صلي على النبي شبه بلالين العيد قال اية؟؟؟عماد بيلعب رياضة و مشترك في جيمينزيوم و بقى عنده مجانص و عضلات ...مش بعيد على ربنا ده يحيي العظام و هي رميم

و قعد سي مجانص يقنع في طهقان انه ضروري يهتم بصحته و يلعب رياضة و اتفق معاه يروحوا يوم الجمعة جيمينزيوم كبير ؛ في فندق خمس غرز اقصد خمس نجوم .


قال اية؟ يلعبوا حديد
و انا سامعة الكلام ده و عمالة اقرقش على ضروسي، اكمنهم يعني قالوا: ان الجيم مختلط؛ ستات و رجالة و مفيش عندهم العقد بتاعتنا دي ،اللي هي عيب و ميصحش و بتاع
و الاكادة ان المرة الواحدة بالشئ الفلاني، مبلغ كبير يأكل عيلة بحالها اسبوع كامل
و بعد ما مشي سي شوازنجر من عندنا دار الحوار التالي:0
طهقانة:جيم ايه اللي اتفقتوا تروحوه ده يا طهقان؟ هو احنا برضه بتوع جيم؟
طهقان: و ماله يا ستي اروح اهتم بصحتي شوية ،بدل ما انا سايب نفسي ازيد و كرشي بقى شبه كرش سي حنفي
طهقانة:طيب ما انا ياما اتحايلت عليك نروح نتمشى في النادي و العيال بتدربوا و انت اللي بتتحجج
طهقان: تراك اية !!و نادي اية!! ده الجو ولعة ..انما الجيم ده مكيف
طهقانة:و ازاي تلعبوا في الجيم و الستات و الرجالة في صالة واحدة؟ينفع كده؟
طهقان: و فيها اية كل واحد في حاله


طهقانة:طيب ان كان كده ابقى اجي معاك بقى ..علشان اشجعك حتى
طهقان: لا لا لا ..تيجي فين؟؟ طيب دول ستات متحررة احنا ناس محافظين
طهقانة:طيب يا سعادة المحافظ.. لما انت محافظ حتروح مكان زي ده ليه!!0
طهقان: يووه..انا خلاص اتفقت مع عماد و حنروح بكرة المغرب نجرب .مش يمكن ميعجبنيش !0
طهقانة:ميعجبكش ازاي و كله مزز؟!0
طهقان: مزز اية يا شيخة دول اكيد ستات شبه الناموس الممصوصة، معصعصين من كتر الرياضة
طهقانة: ناموس؟؟ يا خوفي لناموسة من دول تمصك مني
طهقان:متخفيش يا ستي ابقى رشيني ريد قبل ما اروح الجيم... هههه


و راح سي طوطو نايم ، و سابني انا اتفلق و اهري و انكت في نفسي. ازاي اسيبه يروح جيم مختلط و يتصاحبلي هناك على ستات مايسة من بتوع هاي شله و يرجع مش عاجبه البيت و اللي فيه!!!0
بس انتوا عارفين انا مغلبش... دبرت له مكيدة تمام و ستفتها و الوظتها ،و استنى عليا لما تصحى الصبح يا سي ايرون مان عصرك
اتنديــــــــــــه

صحي طهقان الصبح لقاني شايلة البيت فقاني تحتاني و دار الحوار التالي:0
طهقان: اية ده انتي مهاجرة و لا اية؟
طهقانة:لا يا حبيبي ده انا بغير نظام البيت ، اصل اوضة الليفنج حر قوي و عايزة اجيب الصالون مطرحها و اودي الانتريه مكان الصالون
طهقان: و لزمتها اية بس الهده دي؟!
طهقانة:اهو تغيير يا حبيبي.. يلا ساعدني بقى نشيل المكتبة دي من هنا نوديها هناك
طهقان: دي تقيله قوي
طهقانة:و انت يصعب عليك حاجة ده انت واد جامد و حتشيل حديد، اهو تدريب يا حبيبي يلا يا حواش اقصد يا طهقان ...شيل
طهقان:امري لله..ما انا لو قلتلها تعبان حتقولي متروحش الجيم و ريح بقى
طهقانة:بتقول حاجة يا طوطو؟؟
طهقان: لا مبقولش ..يا قوي ..و ادي شيلة
طهقانة:و بعد ما تشيل المكتبة و تنقل الانتريه عايزاك تشيل ترابيزة السفرة علشان توسع لنفسك و تعرف تنقل الصالون
طهقان: ربنا على المفتري...حاضر

طهقانة: و انا في المطبخ يا روحي... لو عايز اي حاجة اندهلي بس

بس خلاص ..و بعد ما شال التلاجة و النيش و طلع المراتب في البلاكونة تتشمس بصيت لقيته فرهد...مش عارفة ليه!!0
و مسك سماعة التليفون و اتصل بسي عماد مجانص و قاله و هو بينهج:0
طهقان: معلش يا عماد... انا مش حقدر اجي معاك النهاردة خليها وقت تاني ...اصلي مرهق و محتاج ارتاح
طهقانة: احسن برضه يا حبيبي.. اصل في مسرحية حلوة قوي في التليفزيون نسهر نشوفها مع بعض
طهقان: مسرحية اية؟
طهقانة: المتزوجون
طهقان: عاااااااااااااااااااا ..حتروحي فين من ربنا

شاهدين؟؟ وفرت عليه الفلوس اللي كان حيكعها في الجيم و برضه مش عاجبه..مش كفاية كمان اني وفرت تمن علبة الريد اللي كنت حرشها عليه قبل ما يروح
دي حاجة تطهق بجد

اوروفوار
امضاء
57 comments

أهلي ..بيب..بيب..طوارئ



طوارئ.. طوارئ ...طوارئ.. و لجان تفتيش في كل حته في الفسحة و الكوريدور، و كذا كمين قدام التليفزيون و أسلاك شائكة حولين الريموت كونترول

اه... ما هو النهاردة في ماتش للنادي للأهلي.
يعني حال البيت يقف و محدش يجرؤ يطلب أي طلب، أو حتى يقترح أي اقتراح ؛ لان مزاج السيد المبجل المحترم طهقان أفندي متوتر بسبب الماتش
و أنا و العيال بنشجع إجباري غصبن عن حبة عينا
و اقعد أصلي ركعتين قضاء حاجة علشان الأهلي يكسب، ما هو لو خسر حتبقى ليلة ملهاش نهار عليا و على العيال و تلاقي العيال قاعدين يبتهلوا و يدعوا
طهقان الصغير: يا رب الأهلي يكثب علثان بابا يودينا تمرين الثباحة
طهقانة الصغيرة : آمين و كمان يا يب يجيب اجوان كتيه علشان بابا يفيح و ييضى يعشينا بية
طهقان الصغير: آمـيـــــن
طهقانة: يا رب النور يقطع علشان ينزل يشوف الماتش برة و اعرف اشوف أنا المسلسل
العيال الطهقانين في نفس واحد: آمــــــــــــــــــين





و هكذا يا أعزائي.. طهقان بيعمل لنا حظر تجول يوم الماتش، و مكهرب لنا البيت ، و ملغم لنا التليفزيون، و رافع الأحكام العرفية
يعني مثلا ممنـــوع حد يعدي قدام التليفزيون أثناء الماتش
ممنـــوع حد يرد على التليفون أو يتصل بالتليفون أثناء الماتش
ممنـــوع حد يلمس الريموت كنترول
ممنـــوع حد يلبس أي لون غير الأحمر

ممنـــوع طبخ أي صنف من غير صلصة طماطم يوم الماتش و الا يبقى فال وحش
ممنـــوع النفس و الكلام و التعليق و التنهيد و محدش يكح في البيت غيره ، طبعا ساعة الماتش


و أنا و العيال متعلقين في كعب جزمة لعيبة الكورة ، لو كسبوا ....يبقى عصر رخاء علينا نخرج نتعشى برة، و يفضل يزمر طول ما هو سايق تعبيرا عن السعادة ، و لا كأننا في زفة فرح بنت العمدة، و يخلي العيال يطلعوا أي حاجة حمرا من شبابيك العربية، فانيلة قديمة ماشي أو حتى بنطلون مقطوع بس المهم يكون أحمر.

و لو خسروا يبقى البيت ضلمة، يطفي الأنوار و يقعد في البلاكونة لوحده في الضلمة و يشرب قهوة سادة و شوية شوية يشغل مرشات عسكرية و ينيمنا من المغرب زي الكتاكيت .

اتفقت مع العيال اننا يوم الماتش نخرج نتفسح لوحدنا و نسيبه يتفرج على الماتش لوحده يمكن يحس بعدم وجودنا و يحس بقيمتنا
و فعلا استمتعنا جدا لان الشوارع كانت فاضية و المولات رايقة ، يظهر إن الشعب المصري كله زي طهقان بيحفروا خندق قدام التليفزيونات يوم الماتش
و الحمد لله بعد الماتش اتصل بينا فرحان و قال
طهقان: انتم فين انا بعد الماتش ما خلص ملقتكوش في البيت
طهقانة: لسة حاسس دلوقتي!! احنا في المول من قبل الماتش ما يبدأ بساعة
طهقان : طيب أنا جيلكم نتعشى سوا .
طهقانة: كويس إن الأهلي كسب.
طهقان: عرفتي منين!! هو أنت كنتي بتشوفي الماتش عندك؟؟
طهقانة: لا اصل لو كان خسر كنت قلتلنا باتوا عندكم في المول النهاردة
دي حاجة تطهق

و........0

أوروفوار
إمضاء
53 comments

القنوات في القالع

من ساعة ما الحر هجم..و انا مخي سايح و مش مركزة ،و بفرهد من أقل مجهود ، و عايزة بس اتسطب قدام التليفزيون و اعمل داونلود لنفسي قدام أي قناة ، ما هو مفيش أي تركيز من الحر.0
و أنا بلف بالريموت كونترول لقيت قنوات كتيرة جدا ظهرت ،و كأن في قناة بتظهر كل ساعة ،و معظمها قنوات أغاني و فيديو كليبات بس من النوع الاوفر اللي يعاقب عليه القانون

طهقانة: اية ده مين الست اللي بتشلح.. اقصد بتغني دي؟
طهقان: دي فلانة الفلانية
طهقانة: و دي طلعت امتى؟ أنا أول مرة أشوفها!!
طهقان:(من تحت النظارة) مبقلهاش كتير



طهقانة: و مين دي كمان؟
طهقان: دي علانة العلانية
طهقانة: يا سلام!!(متعجبة) ده أنت بقيت و لا دليل التليفونات ..من امتى بتحفظ أسماء؟؟؟ ده انت بتغلط في اسمي!!!
طهقان: اهو اصلي بحب اقرا الجرنال و جنبي دوشة و بشوف الأسماء بالصدفة
طهقانة: و دي بقى مطربة لا مرضعة؟!!0
طهقان: اشمعنى يعني !! اه ..هههههه يا شيخة انتي بتخدي بالك من حاجات غريبة
طهقانة:دي نصف الكرة الأرضية واخدة بالها، دول عاملين عمليات تجميل و تشحيم و تزييت و تقريبا مغيرين تيل فرامل كمان
طهقانة: ليه معلقين ييافطة على قفاها (المطربة تحت التليين) و لا اية!!ههههههه
طهقانة: مش بس كده دول كمان مركبين عدسات و رموش و شعر عيرة ومغيرين مقصات و نافخين على اكتر من 28
طهقان: ناقص تقولي إنهم مفروض مايمشوش إلا بشنطة إسعافات أولية و لا يأخدوا مخالفة
طهقانة: اه طبعا و ضروري كمان يكون معاهم ملاية علشان لما البوكس يجي يلمهم يتلفوا فيها وإلا يسحبوا النمر
ههههههههههههههههههههههههههههههههههههههههه


و قعدت اقلب في قنوات التليفزيون لقيت بلاوي متلتلة ، اشي خليجي و اشي اجنبي و اشي شفتشي
حاجة تطهق بجد ، يعمل اية الشباب الصغير لما يتفرج على الناس اللي بتتلوى دي ؟؟؟ و يرجعوا يقولوا نسبة التحرش الجنسي زادت!! ما هي لازم تزيد طول ما بنعرض لهم البلاوي دي !!!ده معظم الكليبات متصورة في اوض النوم و بالذات على السرير!! ماله الدولاب مثلا ؟!!! و لا الكوميدينو؟!!

و عنها و رحت ماسحة كل القنوات دي و عملت(لوك) قفل للتليفزيون كمان علشان محدش تسول له نفسه انه يعمل عليها(سيرش) بحث و يلاقيها تاني و انتم طبعا عارفين مين هو الحد ده
ومش أنا بس اللي لازم اعمل كده ...لا ده كل بيت بيراقب ربه و بيخاف عقابه و بيتمنى جنته و بيخاف على أولاده من الفتنة.
لان أصحاب القنوات دول بيتباروا في إثارة الشباب و كل يوم الوضع في النازل و المطربات في القالع
دي حاجة تطهق بجد


اوروفوار
امضاء

50 comments