ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

طهقانة -اول مرة



انا طهقانة من جوزي و عمايله و تصرفاته اللي تطهق بلدوححكيلكم عن عاملة من عمايله اللي تفرس

كنا قاعدين في الفود كورت في مول كبير انا و هو على ترابيزة واحدة و الاولاد راحو يلعبوا و مستنيين واحد صاحبه و مراته عازمينهم على العشا
و احنا قاعدين مستنيينهم قام يشتري سوفت درينك قبل ما ييجوا و ساب موبيله اخذت الموبيل و دعبست فيه لقيته كاتب اسمه في البلوتوث ((الجامد))و نيلة ايه ي يا ابن الايه جامد ايه يجوا يشوفوا
رجعت الموبيل زي ما كان و لا كاني شفت حاجة و شوية و رجع و شوية كمان و صاحبه و مراته وصلوا و انقسمنا فريقين الستات على تيبل و الرجاله على تيبل
كويس
و انا قاعدة معاها فتحت البلوتوث بتاع موبيلي و كتبت الاسم
(( احب الجامد))
و رحت باعتاله مسج دلع لقيته استقبلها و راقبته لقيت عنيه لمعت و بانت عليه السعادة و الرغبة في البلبطة في بحر المغامرة
طيب لما نشوف حتوصل لحد فين
راح باعتلي مسج فيها رقم موبيله و سميل فيس
اوبا بقى كده طيب استنى عليا اما لعبتك على الشناكل
طلبت من صاحبتنا نقوم نتمشى و نلف على محلات الاكسسوارات و انتهزت الفرصة و دخلت محل موبيل و اشتريت خط هوليداي من اللي بيشتغل 45 يوم و يفصل و رحت مزوغة من صاحبتنا و هي بتسأل على اسعار حاجات في المحل و طلبته و غيرت صوتي و كلمته بدلع و اخنفيت
اصل انا لما اتدلع اخنف الله يمسيكي بالخير يا سكيننة
انا : النووووو
هو:( بدهوله و هطل ) ا لل للو ايوة
انا: الجامد؟
هو: اهلا اهلا
انا: اسيك؟
هو : كويس ازيك انتي؟
انا: كويسه انت قاعد فين ؟
هو: ا ا انا في الفوت كورت قدام محل ...... و ..و
انا: ده انت قاعد قريب مني بقى
هو: ا ه .. بس انا قاعد مع واحد صاحبي
انا : لابس ايه يا جامد
هو: لابس قميص ...و...
انا: اه شايفاك ده انت هاندسم خالص مالص
هو : (بضحكة بلهاء) هاهاها متشكر يا قمر
عرف منين اني قمر الكذاب استنى عليا
انا: طيب اشوفك تاني ازاي؟
هو: اتصلي بيا بس قبل 4 العصر بس استني انت قاعدة فين و لابسة اية و ..و..
انا:اشمعنى بعد 4 انت متجوز؟
هو: لا لا لا...بس علشان نبقى براحتنا
بقى لا يانهار مش فايت امال 11 سنة جواز دول اية؟ و العيال اللي ملقحة دول مين؟
انا: طيب يلا باي بقى

هو: استني عايز اشوفك انت قاعدة فين؟ و..و..
انا : قفلت الخط و بقيت عايزة اشتري ايد هون و انزل بيها على نافوخه بس مسكت نفسي و قلت و النبي لشخلعه و اهشكه و افرجه

رجعت الشريحة بتاعتي في الموبيل و اتصلت بصاحبتنا و رجعنا قعدنا على الترابيزة معاهم و كبست على نفسه لحد ما روحنا و هو طول القاعدة عينه زايغة و عمال يبص على كل واحدة حولينا فاكرها هي الزبونة اللي اتصلت و انا قاعدة جانبه و لا حاسس بيا

و احنا مروحين لقيته منشكح و منهرش و عمال يصفر و يطبل على الدريكسيون اكن فرح خالته
عاملت روحي مش مركزة و قعدت اتكلم مع العيال في اي كلام

تاني يوم.. راح الشغل و على الساعة 11 اتصلت بيه من الشريحة اياها
انا: النوووو
هو:اهلا يا جميل
انا: وحشتني
هو: انتي اكتر كده برضه متخلنيش اشوفك
انا : استنى بس مش نتعرف الاول و بعدين نتقابل
هو:طيب حشوفك امتى
يا نهارك مش فايت و كمان عايز تقابلها مع سبق الاصرار و الترصد
انا: انت عندك كام سنة؟
هو:30 سنة و كام شهر
يا ابن الكذابة مواليد 60 و لسة 30 سنة ليه كنت واخد عشر سنين اجازة رضاعة طفل
انا: ياه انت كبير عليا انا 25
هو: و ماله هو في احلى من كده
انا: بس انا شايفة شعر ابيض في راسك امبارح؟
هو: ها ها ها ها لا ده من الخضة
انا:هيهيهيهيهي (بدلع بس من جوه بابور مولع)
هو: طيب انت بتشتغلي فين؟
انا: حسب ساعات و ساعات
هو: طيب...
قاطعته
انا باي بقى اكلمك بكرة في نفس الميعاد
و قفلت الخط و انا مولعة و فاضلي لتر بنزين و انفجر
و فضلت كده اتصل اتدلع عليه و مديلهوش اي معلومات عني خمس ايام لحد يوم الخميس و طبعا سمعني كلام عجب و كذب يودي كلية الطب و قالي نكت عمره ما حكهالي و هراني مسجات معاكسة و ادالت و غرام و اخيرا فاض بيا و قلت لازم اكشفه قدام نفسه
اتصلت
انا: النووو
هو: اهلا يا حبي
حبي؟!! و انا كل ما اتصل بيه و انا مراته يقولي نعم يا ماما و لو حد ساله مين يقولة ----البيت-----
انا: فاضي بكرة الصبح عندي تدريب في الناتي و عايسة اشوفك
هو: طبعا الساعة كام
انا : 12 كويس؟
هو : اوك يا قمر
انا: اوك سلام
هو : استني بس حعرفك ازاي؟
انا: زي ما قلتلك قبل ده انا شبه نيكول سابا بس للصراحة عنيا مش زارقة عنيا خضرا و حكون لابسة شورت تنس و بادي بينك
هو: اتفقنا يا قمر( و طبعا انا حسيت بالريالة بتنزل على سماعة التليفون و هو بيقول العبارة الاخيرة دي)
استنى اما نشفت ريقك

و لما روح سبع البرومبة قلتله عايزين نفسح الاولاد بكرة يا بيسو
قالي لا بكرة مش فاضي عندي مشوار واحد صاحبنا عنده المرارة و حيعمل عملية و لازم اروح معاه علشان نعمل التحاليل اللي قبل العملية و..و...و.. و عاملي قصة
قلتله: طيب اروح انا عند ماما بقى و لما تخلص ابقى تعالى اتغدى معانا
قالي: لا ما انا يمكن اتغدي معاه
كمان ناوي على غدا طيب حوقف اللقمة في زورك ان شاء الله

تاني يوم من الساعة 10 صحي و لبس و نزل مش عارفة ليه بدري كده بس احسن
اخدت العيال عند ماما و طلعت على النادي و لقيته مستني في المكان اللي اتفقنا عليه و عمال يتصل برقم الزبونة و انا مش مركبة الشريحة اصلا
اتصلت بيه من موبيلي و قلتله
انا:انت فين يا بابا
هو: ايوة...بزهق... ما انا قلتلك مع صاحبي
انا: طيب انا بس حبيت اقولك اننا رحنا النادي علشان ماما عندها ضيوف
هو: اتسرع و اتلجلج و انا شايفاه حط ايده على راسه
و قالي: نادي اية؟
قلتله: النادي الفلاني(اللي هو نفس النادي بتاع الرونديفوه)
هو: ليه كده الجو برد العيال حتعيا خديهم و روحي احسن
انا: طيب طيب

بس و عنها و ركبت شريحة الزبونة و اتصلت بيه
انا: النوووو
هو: انت فين يا جميل الساعة 2 مش تيجي بقى
انا: انت فين بالظبط
هو: جنب ملعب التنس زي ما اتفقنا
انا: طيب انا جايه اهو فايف منتس
هو: اوك(بحماس منقطع النظير)


و رحت واخده بعضي و عملت هجوم مباشر عليه من الخلف
و قلتله:بيسوووو انت هنا
هو: اتلهى و اترزى و بقى عرقه مرقه و قالي انت ايةجابك هنا
انا : انا روحت العيال علشان البرد و قلت اجي الف التراك الله امال فين صاحبك !!!و اية التسريحة الجميلة دي ؟؟انت رحت عند الحلاق؟ و صبغت كمان! واو صغرت 5 سنين يا مضروب
هو: الفار لعب في عبه و قالي لا ..اصله... اجل ... تعالى نروح ناخد العيال و نتغدى برة
انا دوست على ريديل و انا واقفة معاه من شريحة الزبونة و استمتعت بوشة و هو بيجيب الوان و العرق بيفط من سحنته و هو حاسس ان البت جت و حتطب علينا
قالي: يلا يلا الجو برد النهاردة
قلتله: مش حترد على التليفون
قالي: مش مهم بقى
قلتله: طيب استنى حروح التويلت و ارجعلك
قالي: طيب
و انتهز الفرصة وراح متصل على رقم الزبونة
رديت بصوتي الأصلي
انا: الو
هو:بتردد..........انت فين؟
انا: ما انا لسة قايلالك رايحة الحمام
هو: اية(بصدمة)
انا: انت لسة معرفتش يا مدهول اني بشتغلك من اسبوع عاملي فالنتينو يا بيسو
طيب قبل ما تبص برة بص جوة
صدق اللي قال زي القرع تمد لبرة
سلام بقى علشان رايحة اقابل الواد بتاعي

و طلعتله لساني بمنتهى الانشراح اللي يضحك في الاخر هو اللي يضحك اكتر

و قفلت التليفون و رحت عند واحدة صاحبتي اتغديت معاها و سبته طول اليوم يضرب روحه تلاتين صرمة
و الحلقة الجاية حقولكم عملت فيه ايه بعد كده

محدش يقولي سيبيه لاني بحبه رغم حركاته القرعة اللي تطهق بس
بحبه
امضاء
طهقانة

38 comments:

el2ahwagi said...

lool gameela...
rasheeqa...

khefet dam betwagehna bewaqa2e3 we molabasaat malmoosa gedan men sardik elrasheeq awi....

2ederti teshedeeni atabe3 ela7daath elsakhera welibtesama mafar2etneesh ..lol

enti mawhooba...!

Mony The Angel said...

lloooooooooollllllllllzzzzzzzzzzz
eh da bgad :D
to7fa awe
bentezaar al post alqadem ;)

أميرة البلطجية said...

بصراحة انتي بطلة
بس حكاية مسخرة
ربنا يهديهولك
واهو كله عشان العيال
هههههههه

أُكتب بالرصاص said...
This comment has been removed by a blog administrator.
MAKSOFA said...

بصراحه شدتني المغامرة من اول البوست لأخره
اسلوبك ساخر وحلو
وفي انتظار ما فعلتيه
وبعدين مين قالك تسيبيه دا الجوز اللي زي ده لذيذ ومسلي خصوصا انه موش عارف يداري مغامراته

الدبور said...

السلام عليكم

ايه اللي انت عملتيه ده
بس اقولك 90% من الرجاله بيسقطوا في الاختبار ده
لان الراجل بطبعه طفس وزي البحر بيحب الزياده وانت عارفه ان القلب يسيع من الحبابيب عشرة خمستاشر
بس كان لازم ده يحصل علشان كل ماتكلموا واحده في التليفون يسترجع الموقف و يقول لتكون هي و يمشي مستقيم
هو ده الكلام بس بجد ضحكتيني من قلبي
وبخصوص ال100 جنيه بتاعت الماتش ابقي اقري الردود في البوست هناك و انت تعرف الحقيقه المرة
وانا هضيف لينك المدونه بتاعتك عندي وداومي الزيارة

تحياتي
الدبور

الدبور said...
This comment has been removed by a blog administrator.
الحصان الأسود said...

هههههههههه

ان كيدهن عظيم


بس برافو عليكي بجد

ولا شارلوك هولمز

ادم المصري said...

اوعي تسيبيه
اوعي تسيبيه
اوعي تسيبيه


لاني متاكد موت انك بتحبيه
وعشان كمان بصراحه كدا
يتاح لنا الفرصة نسمع مقالب تاني
انيهاهاهاهاهاها


انتي بصراحه حد مشكلة ..ياعني انا لو مراتي هتعمل معاا كدا انا البد لها في البيت

ع العموم هو اكيد هيحرص بعد كدا .. يبقي انتي لازم تعملي خطة جامدة المرة الجاية
هههههههههههههههههه
ماشي

سلام

3ola said...




السلامو عليكو

اول شي التدوينة وصلتني عن طريق الايميل مش عارفة ازاي :S شكلو نظام جديد ولا حاجة


اللا ما علينا

المهم ان المقلب بجد تحفة تحفة ويفطس من الضحك ههههههه ادي الستات ولا بلاش ,,,


المهم انو يكون اتعدل بعد كدة وعرف قيمتك ياختي ,, وربنا بقدرك دايما تضحكينا وكمان تاخدي بالك من جوزك


تحياتي وسلاماتي

علا من غزة

Epitaph said...

زي العسل

انا مستنية الجديد

و مذكرات طهقان
ههههههه

جبهة التهييس الشعبية said...

لا تسيبيه ايه؟

ده انت تمسكي فيه باديكي وسنانك

احمدي ربنا انه بيبص لستات مش حاجة تانية

تعالي عندي

عايزاكي

ايوة عندي في الجبهة

فيه اجتماع للاعضاء

ضروري

جبهة التهييس الشعبية said...

بتش يا طشهقانة

انا مسحت لك بيه البلاط

وعرفته غلطه

وقلت له انك جوهرة واننا ح نتشلم عليه نخلي اكبر حتة فيه قد شريحة الموبايل اللي اشتغلتيه منها

بس كلام في سرك

حاجي عليه يا به

فيه ازمة رجالة في البلد

ام العيال said...

اما حته درس
بس ايه؟؟؟؟
يا صبرك لو انا كنت رحت فيها

nadine said...

بصراحة
انا معجبة جدا بالدويتو اللى انتوا الاتنين عملينه ده
بجد حلو جدا

بالنسبة للموضوع
مانكرش انى قعدت اضحك جامد عالموقف
بس بعدين حزنت
ايه اللى ممكن يكون خلاه يعمل كده؟
و ليه زى ما بيقولوا إذا بدا الجواز ينتهى الحب؟
و ليه اصلا مابقاش فيه لغة حوار بين الزوجين؟ بدل المواقف اللى بتحرج الواحد دى؟

بس فى الآخر
انا معجبة جدا بيكى عشان اخدتى موقف
مين عارف
يمكن المقالب دى هى اللى تفوقه فى الآخر
عموما
ربنا يخليكوا لبعض
و مبسوطة قوى انى شفت البلوج ده

سلامى ليكم

Aoossa said...

ده أنتى اللى جامده جدآ
بس مقولتيش صبغ شعره لون أيه
هو أكيد شعره أبيض تانى من الخضه
أنا لو منك كنت جبت العيال وجبت أطفال
مصر كلها وزفيته وشيلت شعر دماغه بالموس

tona said...

يخرب عقلك بجد


بس تعرفي انه هو دا الهم اللي يضحك فعلا


بس هو من اسم البلوج كده ناوي يكتب معاكي هنا ولا ايه ؟

ياسمين said...

بوست فى منتى خفة الدم و حرقة الدم فى نفس الوقت

ولسة بتحبيه

ربنا معاكى يا بنتى

نفسى أعرف بس هو صالحك ازاى؟؟

طهقان said...
This comment has been removed by a blog administrator.
Ghada said...

:)))
مسخرة! أنا مستنية أشوفه هايكتب إيه!

karakib said...

جامد جامد جامد جااااااااااااامد
قشطه أنا مستني التدوينه الجايه
ما تتأخروش شكلكم هتبقوا تحفه من تحف المدونات المصريه

الأباصيرى said...

يخرب بيت جنانكم

عسل والله عسل

انا هضيفكم عندى فى قايمة البلوجات المميزة

بس عايزين نشاااااااط

تحياتى

يا مراكبي said...

أعزائي طهقانة وطهقان

أهلا بيكوا في رابطة الطهقانين .. حقيقي أنا سعيد جدا بالصدفة السعيدة دي لأني اليومين دول بدأت برضه أكتب عن حياتي الزوجية .. بصرة .. عجبتني كتير كتاباتكم إنتوا الإتنين

أنا في الحقيقة مش هأدافع عن أخويا طهقان لأني مش معاه في اللي حصل منه ده .. لكن في نفس الوقت لازم نعرف إيه الدوافع اللي دفعته لكده وهو ده الأهم .. والكلام ده لأختنا طهقانة

وعلى فكرة .. رد فعل طهقان ممكن يكون ليه أشكال تانية كتيرة زي مثلا الإستغراق في الشغل أو الهوايات .. يعني مش كل الناس بيكون رد فعلهم هو الإنجذاب لواحدة تانية

عارف إنك هاتقولي إن ده أحسن .. بس بالعكس .. مش أحسن ولا حاجه .. الستات برضه ما بيحبوش كده

عموما أكرر سعادتي بمعرفتكم ويشرفني إننا نقرأ لبعض .. مع خالص تحياتي

el2ahwagi said...

bastokka ..

2afalti elblog eltani wetafaraghti letah2an.. lol
yag3alo 3amer ..!

Sampateek said...

و جالك قلب تبصي في وشه بعد اللي عمله ده؟
انا لو منك كنت خليتهاله ضلمة

بس نعمل اية بقى بحبه يا بابا
اهههه

ahmEd_H said...

سورى بس بجد انتى مصيبة

غلطة الرجاله انهم دايما بيصدقوا

أن كيدهن عظيم

تعيش و تاخد غيرها يا جامد

Hannoda said...

اتوا بجد عسل وربنا يصبرك يا طهقانة عليه أنا لسة ماقريتش اللي قاله في البوس الجديد ... بس مش عارفة؟؟ معقول فيه مبرر
بس انتوا على فكرة زي العسل.. وأ،ا سعيده بيكم طحن

koukawy said...

انا بس عندي سؤال هو انتوا متجوزين فعلا و بتحكوا عن حياتكوا الشخصيه عادي كده؟
و لا دي قصص مؤلفه؟
اصل لو حقيقيه مستغربه انكوا بتحكوها عادي لأي حد دي في حد ذاتها مقدره مش اي حد يقدر عليها

أشرف حمدي said...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

يخرب عقلك
مش ممكن بجد
بس حقيقي القصة دي حقيقية ولا تأليف ؟؟؟
أحييك علي هذه المدونة الرائعة
سلام بقى عشان رايح أشوف مدونة جوزك
تحياتي

hebaz said...

أيه البلوج المسخرة ده
بجد فكرة جامدة و أنتى يا طهقانة ليكى الجنة
مستنية البوستات الجديدة

Guevara said...

طهقانة
اسمتعت وانا ببحر في عالمك الخاص واسلوبك الساخر من الاحداث ولكني يا عزيزتي يا طهقانة اضع عليك عب امتنعنا باسلوبك الجميل في الكتابة الي مزيد من الابداع
تحياتي ليك والي طهقان لانة بطل من ابطالك

gaber said...

بجد انت رفقية عمر رائعة
روحك جميلة وظريفة بس تكوني بتكلمي معاه بنفس اللغة المكتوبة
دنا كنت اعد الدقايق عشان اروح البيت

Ahmed said...

gamdaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaa moooot begad mas7'ara ana awel mara ashoof ketabatek bas alla yenawar gamda bas 3awez minik 7'edma akeed fe sabab le kol eli beye3milo el ma7roos gozek 3awz 7ala2a 3an el asbab

sdsd said...

انا اول ماشوفت البوست دة قولت لنفسى هى ليه ماكنتش بتعمله الحاجات دى عادى كدة من غير اشتغالات ولا مقالب ... يعنى تكلميه على الموبايل تقوليله وحشتنى ياحبيبى وهترجع البيت امتى. او انا النهاردة موضبة لك قعدة مسخرة واوعى تتأخر. يعنى حاجات طرية كدة تروق الدنيا.انا مش بقول ان اللوم كله عليكى بالعكس الراجل دوره مهم جدا فى ان حبل المودة مايتبريش بينكو . بس لنتى تبئى عملتى اللى عليكى ولو اصلا الحب موجود فانا متأكدة انه هيجيب نتيجة.كمان فيه علامات على بداية الفتور لازم ناخد بالنا منها. اول حاجة انه بيقولك ياماما, انا مش عارفة انت ليه سايباه يقولك كدة طب مايقول ياحبيبتى ولا ياروحى لكن ليه ماما جاك مو .
ثانيا بيقول عنك فى الشغل "البيت" كأن ليكى ضرف وازاز . الكلام دة لازم يتشال من القاموس الزوجى ويتحط بداله كلام حنين
ويجعله دايما عامر

واحده من أصحاب القمر said...

طهقان وطهقانه
تحفه بجد جدا
ست قويه وجميله اخيرا وجدتها تلك الطهقانه المشاكسه .
ولكن وعلي طريقه اصحاب القمر ليه كسفتيه وعرفتيه .....زززززز
بيني وبينك غلبان بزمتك مكنش صعبان عليكي
ده عشره العمر الجميل رغم الطهقان
خدي بالك عليه وبالنجاح يا سيدتي
كل التوفيق في رحلتك الزوجيه الرائعه
سأبقي هنا كثيرا
اميره جمال

Anonymous said...
This comment has been removed by a blog administrator.
Anonymous said...
This comment has been removed by a blog administrator.
arab girlscool said...

This is such a nice addition thanks!!!
شات صوتي شات صوتي
عرب كول
شات صوتي مغربي
دردشه صوتيه
انحراف كام
منتديات منتديات عرب كول