ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

دش في كنتاكي


الحقيقة المرة ده موقفي صعب جدا جدا و مش عارفة اتصرف ازاي حاسة اني في نص هدومي من الكسوف و ححكيلكم الحكاية من الاول علشان تعذروني و تحسوا بيا

نزلت اتمشى في النادي يوم الجمعة بصيت لقيت فريد جوز مها بيلف التراك مع واحدة اسمها هالة مرات مدحت و دول كنت اتعرفت عليهم في عيد ميلاد جارتنا و معرفتي بيهم سطحية

وقال هاتك يا ضحك و هزار و كانهم لسة في شهر العسل ،قعدت اشمشم يمكن الاقي جوز دي و لا مرات ده مفيش
عنها و رحت زارعة فدانين درا و لبدت فيهم لما اشوف اخرتها و بما اني مش فضولية و لا حشرية و شعاري في الحياة دع الملك للمالك، قررت اعرف حدود العلاقة بين المدهول فريد و الموكوسة هالة

بعد ما لفوا التراك قعدوا شربوا عصير و سبلوا و اتنحنحوا شوية و بعد كده قاموا، رحت هوووب قايمة وراهم ركبوا عربية فريد و مشيت وراهم بعربيتي لقيتهم وصلوا بيت مها و راح منزلها على اول الشارع
اوبااا …و ليه منزلها على الناصية! و منزلهاش قدام البيت! لازم في الموضوع ان
روحت البيت و انا بقرقض ضوافري من الغيظ و بما اني مليش غير طهقان اغلس عليه و اطهقه مسكته كتفته و حكيتله الحكاية من طقطق.. لسلامو عليكم
قالي: و انت اية مزعلك؟! ملكيش دعوة
انا: ازاي مليش دعوة مش اصحابنا و لازم نوعيهم و نفوقهم و ننصحهم
هو: و فيها اية يمكن قابلها بالصدفة في النادي و وصلها ذوقيا
انا: نعم و ليه نزلها على الناصية ؟؟ اكيد حاسس انه بيعمل حاجة غلط خايف حد يشوفه
هو: لا ابدا تلاقيه نزلها كده علشان يلف و يرجع على طول بدل ما ياخد الشارع لاخره ،خليكي حسنة النية و بلاش تفكري في نظرية الخيانة اللي مسيطرة عليكي دي

كتمت غيظي في قلبي و سكت
و قررت انزل بدري تاني يوم و معايا فدانين الدرا و اقف قدام بيت هالة و اشوف اخرة الموضوع ده و لو ثبتلي ان الراجل فريد ده بيلعب بديله.. حمسكه اغسله و انشره و احذره اني حقول لمراته يمكن يرجع لعقله، و اهو الواحد يعمل الخير و يرميه البحر و يمكن يقعدلي في سي طوطو لما يلعب في عداد عمره و يفكر يلعب بديله

وصلت لقيته بيركبها عربيته شوفوا البجاحة كده في وضح النهار و شرخوا على كنتاكي ، و انا …ورااااهم
لقيت سي فريد قاعد مع الست هالة و طالب لها مايتي زنجر و شوب كولا و واحد كولسلو و قاعدين يدردشوا و هيهيهيئ… هوهوهوؤ
اتفرست و اتنقط و رحت نازلة عليهم زي البراشوت
طهقانة:بغلاسة: صباح الخير
فريد: اهلا اهلا مدام طهقانة ازيك و ازي الاستاذ طهقان ان شاء الله يكون كويس و …
انا: امال فين مدام مها؟؟
هالة: بقالي كتير مش بشوفها الصراحة.. ازيها عاملة اية؟
انا: برخامة:كفاية بتشوفي الاستاذ فريد اهو برضه من ريحتها
هالة: بصتلي باستغراب و ابتسمت هههههههه
فريد : تحبي تاخدي اية؟ نايتي زنجر ده هايل و..0
انا: انا بقول نتصل بمدام مها تيجي تفطر معانا و لا اية؟
فريد: و الله فكرة بس اظن ان مدحت عنده شغل النهاردة مش حيقدر يجيبها .. و مها مبتعرفش تسوق
انا: و مال مدحت بمها ؟؟
فريد:الله مش مراته



يا نهار مش فايت اية مراجيح المولد اللي انا ركبتها دي و بتلف بيا و بعدين اية المطرة اللي بترخ فوق دماغي دي احنا مش في الصيف و لا اية؟
انا: ح. ض. ر. ت .ك بتقول مين متجوز مين؟؟
فريد: مدحت متجوز مها
هالة: ايوة مدام مها مرات مدحت انت كنت فاكرة اية؟

و افتكرت اني يوم عيد ميلاد جارتنا اللي اتعرفت عليهم فيه كان في ناس كتير و ان مها و فريد و مدحت و هالة كانوا قاعدين سوا و مش فاكرة بالظبط لما اتعرفت عليهم كان مين متجوز مين

انا :طيب استاذن انا علشان اروح اتنشف… اقصد اتمشى… سلام


و لما حكيت لطوطو لقيته اتفرس و اتنقط و ودانه الجميلة احمرت و قعد يضرب دماغه مني في الحيطة ليه بس انا عملت اية؟
ده انا كان هدفي نبيل و كنت عايزة اوعيهم قبل ما حد تاني غيري يعرف
انهم.. هاهاها …متجوزين
بس طوطو يطهق ليــــــــــــه!!!



هي دي حاجة تطهق؟؟؟؟
امضاء طهقانة

107 comments:

YHYيــوســف الـمصـرى said...

والله انتى زى السكر
انا بدخل هنا اتفرج على الاسكتشات دى وبفضل اضحك ربنا يجعلك تقدرى ترسمى البسمة على وجهنا ديما
وبطلى رخامة بقى ودعى الخلق للخالق
تحياتى يا الذ طهقانة :)

shahy said...

يالهوي
ياخرابي
حرام عليكي ياشيخة
وكمان رحتي وحكيتي لطهقان
طيب كنتي سكتي وداريتي البلوة دي
كان لازم يعني تنقطي الراجل

تحياتي يا احلى طهقانة

Esmeralda said...

لااااااااااااااااااااااازم نتأكد قبل مانخرب البيوت او يدلق جردل المياه الساقعه فوق دماغنا

Esmeralda said...

و حتى لو مش مراته مش كده يا طوططا

Amr Ahmed said...

بتحطي نفسك في مواقف بايخةةةةةةةةة

ههههههههههههههه

بس المرة دي طهقان مطهقش اوي

عصفور المدينة said...

زوجتي تقول لك حق تشكي ما هو مافيش راجل بيودي مراته كنتاكي ويسبلها
التعليق من زوجة عصفور

Ahmed Shokeir said...

:)

Post of the day

يا مراكبي said...

شكلها مش ماشية معاكي اليومين دول .. فيه عكوسات كده ولا حاجة مش متظبطه

أنا بأقول تطلعي عمرة اليومين دول وتدعي ربنا هناك .. وأهو بدل ما تقعدي في البيت لوحدك إسبوع بحاله

أصل أنا وطهقان عندنا سفرية عمل مهمة جدا إتفقنا عليها في البوست بتاعه اللي فات

خمسة فضفضة said...

السلام عليكم ورحمة الله وبركاته

يستاهلوا انك تشكي فيهم
هو فيه واحد متجوز بيعمل مع مراته كده ......ههههههه
بس انا لو منك كنت قعدت خدت النايتي زينجر واهو حاجه تبلعي بيها الدش اللي نزل علي دماغك ده

mesh2dra said...

السلام عليكم


طهقانة
ده لو دل يبقى بيدل
على تقصير الرجالة كلهم
ما هي بردو امور مريبة

يضحك معاها وهات يا هزار
يعزمها من غير مناسبة
خير ان شاء الله

بس كلمة على جنب
في ودنك
الموقف ده اوفر اوى
متهيـألي تاخدى راحة

كلمة بقى مش ودنك
وايه المشكلة يعنى
هو خيرا تتتتتتتتتعمل شرا تلقى
وبعدين اونكل طهقان
بزعل ليه
حاااجة غريييييييييبة


تحياتي وسلاماتي

الربان said...

تحياتي
موضوع مهم لانه بيحصل كل يوم تقريبا في حياتنا..اقصد ان بعض الاشخاص يقعد يفنن و يؤلف ..و يفهم خطأ.

أشكرك انك لفتي نظرنا جميعا للموضوع لانه كما ذكرت يحدث كثيرا...و أحيانا يسبب مشاكل.

طريقة عرضك للموضوع ممتازة و أعتقد ان نصيحتك التي ضمنتيها للموضوع وصلت الينا...و يارب نعمل بها...و نفتكر دائما ان بعض الظن أثم.

تحياتي و تقديري

الأباصيرى said...

يابنتى أهمدى شوية وأكنى فى بيتكم

أية شغلانة الشاويش عطية اللى أنتى عايشة فيها دى

يكون فى عونك ياطهقان
بس معلش أستحملها على الأقل لغاية لما تبيع فدانين الدرة وتقبض ثمن المحصول
وبعدين قلسعها وشوفلك غيرها

أحنا جايين نهدى النفوس.. مفيش حاجة

الشنكوتي الكبير said...

جدعه يا طهقانه سيبك منهم
انتي عملتي الصح بس انتي نسيتي تتأكدي من بطايقهم مش يمكن بيضحكوا عليكي ما علينا فلتو المره دي
وبعدين قولي لطهقان متزعلش عادي يعني هم الستات كده كان ليهم اصول هولمزيه
يعني قرايب شرلوك هولمز
انا من اول المدونه هاموت من الضحك خصوصا من اللي كاتباه في الأول اللي سرته هاتقع وميلاقيش اللي يركبهاله
هههههههههههههههههههههههههههههههههههههههههههههههههههههه
ده انتي مصيبه الله يعينك يا طهقان
سلاااااااااااااااااااام

الحلم العربي said...

ههههههههههه
المرة دي حاجة تطهق فعلا
بس بصراحة انا مبسوطة ان النهاية طلعت كده علشان ما نفكرش نعمل فيها شرلوك هولمز تانى و نسيب الناس في حالها .....
بس أكيد شكلك كااااااان ..هههههههه
انتى عسل موت بجد ....بس موضوع المناخير المحشورة في كل حاجة دي بتوقع الواحد في مصايب كبيرة و الحمد لله المرة دي جات سليمة ...مش مشكلة الدش اللى اخدتيه في كنتاكي بس ارحم من ما كانوا عرفوا الحقيقة....
تحياتي لطهقان و المرة دي بجد ربنا يكون في عونه

الشنكوتي الكبير said...

انا فهمت ليه اللي انتي كاتباه عن السرقه في الأول
واضح انك اتقلبتي في كام موضوع من عندك انا كنت بحسب الموضوع ده مش منتشر قوي كده بس الظاهر ان الموضوع منتشر جدا
انا اختي كانت بتكتب في مجلة بص وطل سلسله اسمها يوميات اتنين مخطبوين عمر و ساره
وكانت بتكب حاجات جميله قوي فجأه بقى فيه خمستلاف واحد بينشروا السلسله دي في اماكن تانيه وينسبوها لنفسهم او مينسبوهاش لحد خالص
لحد كده هي سكتت وبعد كده اصبحوا يكتبوا اجزاء جديد منها اللي مقبول ومنها اللي بيخالف دينا الأسلامي وتقاليدنا وكل واحد ومزاجه
ربنا يحميكي ويستر على كتاباتك انتي كمان بجد مش عارف الحل ايه
سلاااااااااااااااااااام
آه صحيح بقيت المدونه تهبل بجد تحفه

الأباصيرى said...

طهقاااااانة العسل

صدقينى بحسد طهقان عليكى
(سامحنى يارب بكدب)

عاوزانى فى حاجة

استر يارب

سجدة said...

مش كنتى تسألى الأول فى النادى تطقسى كده لحد ما تعرفى الحقيقة
كده على طول
اوبا كان شكلك فظع موت
معلش يا سى طوطو قدرك بقه
الصراحة حاجة تطهق

momken said...

عجبنى فيكى مناخيرك الى حطاها فى كل حاجه واضح ان طهقان لما دفع دم قلبه علشام يرتبط بيكى مخدش باله من مناخيرك الارستقراطيه
بوست روعه جميل اوى انتى بتتفوقى على روحك
البوست فكرنى ببرنامج اذاعه قديم بتاع واحده اسمها خالتى بامبه الى بتقول
(ياعينى عليا)

Shower-Mirror said...

يعنى هو الراجل جوزك السكره جابلك شغاله تريحك من شغل البيت ..عشان انتى تفضلى تلفى فى الشوارع ورا الناس و تتحشرى فى اللى مالكيش فيه

طيب ....


انا هابعت فاكس لطهقان اخليه يرجع البت اوشين بلدها و يوفر اجرتها ... علشان تلاقى حاجه تشغلك بدل مانتى بترمى بلاكى على الناس كده


ههههههههههه

و دلوقتى بفى سيبينى اخلص الدينر بوكس اللى فى ايدى


اوفيدر زيهن

يعنى سلاموعليكو بالالمانى

Ma-3lina said...

فضحتينى وسط الاجانب
قصدى قدام طوطو

كدا يا طهقانة طيب اتاكدى الاول قبل متقوليلو و تفرحيه فيكى

بس برده زى السكر يا طهقانة

bo_sale7 said...

يااااااااااااااااه دنتي طلعتي حشرية بشكل

ماتسيبي الخلق للخالق يا ست انتي :)

Doba said...

يا نهارك مش فايت
عاملة كولومبوس للناس

ايه اللى بتعمليه ده وانتى مالك تتحشرى فى اللى ملكيش فيه مش طهطق برده كان راح النادى قبل كده علشان الرونديفو بتاع الجامد

اتلمو بقى مليتو البلد - هو الراجل هيطهق من شىء شوية وتحفة قوى الصورة بتاعة تشيييييييييز دى فعلا ملائمة للموقف

تحياتى يا بتاعت فدانين الدرة - ياك نتعلم ونبطل نلبد فى الدرة -- هبة

مدونة كسبان said...

يانهار ابيض
هو انتى كده مع الناس
اللى يدوبك علاقتك بيهم بسيطه"؟"؟
الله معاك ياطهقان
ومعاك قلوبنا
مخبر سرى
خد بالك ياطهقان
ده انت مش بعيد
تكون مستهدف ولا حاجه
ده ياطهقان بتراقب
مها وفريد ومدخت وكمان هاله
ربنا يستر عليك

Barracuda said...

آدي أخرة إللي بيحشر مناخيييره في مواضيع غيره... ماللي يعُك يعُك وقُطع ده على دي على الكل كليلة !!!
:)

بالعكس.. خصوصاً في المواضيع دي الواحد يخاف يحشر نفسه ويتدخل في الموضوع ويحاول يوعي ويصلح الكون.. لأن الزوجة بعد ما تعرف ان جوزها خاين والبيت يتخرب هتقولك انتي اللي خربتي بيتي .. الراجل كان هيلفله لفة .. ولا يضربله بلطة وييجي وهي تعمل مش واخدة بالها علشان المركب تمشي وخاطر العيال
والمهم انه بيرجع بيته اخر الليل علشان ينام ويخرج تاني الصبح..هيهيهيهي

والناس كلها تقولك انتي ... بريه منك بريه .. وفي احيان تانيه ( أو على حسب الحي اللي حاصل في الموضوع) احيه منك احيه... خربت بيت الوليه

تحياتي العطرة

bos bos said...

هههههههههه
يخرب عقلك ايه ده عملتى مخبر
بس مخبر ايه هايل
تحياتى

رفقه عمر said...

طيب وفدان الدرة راح فين اللى تعبتى وعملتيه
معلش حصل خير خيرها فى غيرها ان شاء الله
اكيد تتوفقى المرة الجايه ويكونوا اتنين تانين مش متجوزين وبرضه بياكلوا فى كنتاكى
بجد مش ممكن دمك زى العسل

ايوية said...

بصراحية يا طهقانة انتى مش غلطانة وملوش حق طهقان يزعل خالص انتى تتحطى على الجرح حتى يعنى

ربنا يكون فى عونك يا طهقان

حازم..بس مش دايما بكون مع نفسي حازم...بس الاكيد ان ضميري هو اللي دايما معايا حازم said...

تششششششششششش
اكيد ده الصوت اللي طلع منك لما الدش اتفتح عليكي لأنك أكيد كنتي مولعه من الاحراج
يا نهار ابيض انا مكسوفلك والله
ايه الاحراج ده
ربنا يكون في عونك
بس عارفه
تستاهلي عشان تحرمي تلبدي في الدره مره تانيه

Anima said...

في دي مالكيش حق فيها يا طهطه

بس و الله العظيم انت حلوة و دمك زي السكر

تعالي نغيظ طوطو شوية هههههههههههه

Sam said...

*LOL* this is just too funny! no u r not nosy at all! i wonder what they thought of you..:)

Desert cat said...

يا لهووووووووووووووووووى
انا لو مكانك بصراحة
وبمنتهى الصراحة يعنى
كنت حطيت دماغى تحت الدش ساعتين لما افوق
معلشى يا طهاقه يا حبيبتشى
ابقى خدى بالك المرة القادمشه يا حبيبتشى
عسل يا خواتى عسل
والله بحبك جدااااااااااااااا

كراكيب عادل said...

ازيك

لا وكانك مش عارفة طهقان

من رأي مكنتيش تتكلمي خالص

ولا تحكي

مبتحرميش يا طهقانة

يالا مفيش حد بيتعلم بالساهل

أُكتب بالرصاص said...

اكيد انت نيتك ما كانتش سليمة

ماكانش هدفك الإصلاح

إنت الظاهر كنت عايزة فضحية
علشان تكتبي بوست
"فضيحة في الدرة"


صحيح
من راقب الناس مات كمدا

ولا عزاء لطهقان

Ahmed AL-Hussany said...

هههههههههههههه
تصدقي بالله انا مبضحكشي من قلبي
اللا لما بدخل عندك او عند طهقان
المرة دي انتي جيتي تكحليها عمتيها
وبصراحة مش غايظني غير اخر كلمة
ليه بس انا عملت ايه؟
لا ولا حاجة خالص
على العموم ياريت يكون الدش عمل حاجة

ملاحظة صغيرة:
كان ممكن تعرفي انهم متجوزين من طلباتهم في كنتاكي
الراجل المتجوز بيدلق مراته في كنتاكي ويجيب ساندويتش علشان يخلص ويمشوا
انما الحبيبة فاكيد وجبات علشان يطولوا في القعدة
وهذا من تجربة شخصية
والله اعلم
تحياتي

Dr-hema said...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
يا نهار زى بعضه انا لو منك مش اخد دش لا اولع فى نفسى من الكسوف
دا انتى كنتى شوية لو متاكدتيش كنتى هتتدخلى فى اعراض ناس لا سمح الله يالله حصل خير
تحياتى

mohand said...

السلام عليكم
علي فكره انتو اسطوره
ما تعملو قصة فيلم
والله هتبقي هايله

أسامه يوسف said...

ياعينى يا طهقان
زمانه قرفان وزعلان
بصى ياطهقانه خوديه واعزميه على مايتى زنجر فى كنتاكى
ومش تنسينا
اللى ياكل لواحده يزور
وبعدين يا طهقانه هو انت تفرغترى للموضوع ده
أومال من هيأكل طهقان ويراعيه
ياعينى عليك ياطهقان

The Manager said...

ههههههههه
يا خبر !!

اهم حاجة انهم مخادوش بالهم

مش عارف كانوا هيعملوا إيه !!

تخاريف دكتور said...

هي دي حاجة تطهق؟؟؟ابدا

اوروفوار اوروفوار اوروفوار
انتى لسه مخلصة كورس الفرنساوى
بيقولوا الامتحان كان صعب
هه؟؟

شيرين said...

بجد انتي سكر واسلوبك تحفة ضحكتيني من قلبي على فكرة انا كنت جبت سيرتك انتي وطهقان في بوست من بوستاني في ايامنا الحلوة بعنوان انا والمدونيين ابقي اقري

وبصراحة قلبي مع طهقان من اللي بتعمليه معاه

تحياتي ياقمر

nana said...

اول مرة ادخل مدونة واقرا كل البوستس ورا بعض ومن غير توقف من اول ما فتحتى البلوج لحد اخر بوست
والنتيجة ان الرز شاط
ومش حاقولك جوزى عمل ايه
كفاية تعرفى ان زمايل طهقان حيزيدوا واحد
بس بجد بلوج هايلة
دمتى بخير وبدم زى العسل
تحياتى

Straniero said...

يا سـلام رواية جميلة أوي. لكن بغض النظر عن كل الحكاية, أنا أحيي طهقان وأعطيه كل حق. لازم نغيّر العادة المزمنة و نبطل كتر الظن وإلا سـنموت هما. على أي حال أسـلوبك سـلس و جميل في رواية ما حصل كرواية "حدوثة" لم تفصح عن فكاهيتها إللا في النهاية. شكرا لزيارتك وللفت إنتباهي للغلط الإملائي المرجح. إعذري عدم الإنتباه وأقبلي عذري المصطنع دي إلغربة الطويلة الله يلعنها

الجاهل said...

والله ليكى اسلوب ساخر سلس فكاهى جميل جدا
انا ضحكت بجد لان اسلوبك خلانى احس انى موجود معاكم وشايف ملامح وجهك بعد هذا الدش
وعامه.ده موقف يخلينا لانصدر الحكم الا بعد التأكد من اى موضوع
وسلامى لطهقان

Sabsoub said...

والله أنت عسل و دمك شربات ..أنا لما بكون طهقانة بدخل البلوغ تبعك عشان أضحك و أتسلى و أتونس ... نعيماً ع الدش اللي أخدتيه .. أنا لو كنت بحلك كنت عملت هيك ...

BackBone said...

ينهاااااااااااااار

ايه المصيبه اللي انتي عملتيها ده

بس سيبك انتي اهم حاجه ان النيه كانت صافيه

و مدام من جوه ابيض يبقه بره اشطه

كشفت راسي و دعيتلك ياطهقااااااااااااان

صفصف لادي said...

لا لا مش موافقكي يا طهقانة المرة دي لكن برضو موتيني من الضحك و انا متخيلة منظرك وانتي لابدة في الدرة
حقك كنت تستفيدي من الفدانين دول و توردي محصولهم لكنتاكي
هههههههههههههههههههههههه
تحياتي

wahed said...

بجد ضحكتيني بس كان موقف محرج كتير ,بس ده ناتج عن سؤ الظن ,أرحمي نفسك ههههههه

تامر حسين said...

هههههههههه
والله قصه موتتني من الضحك بجد تحياتي ليكي طهقانه
وليك بردو طهقان

ض/خالد said...

يعني الاستاذ الطهقان كان عنده حق لما حذرك وقالك خدي الموضوع بحسن نية

شاب نفسه يحقق حلمه said...

انا اول مره ادخل عندك
وبصراحه مش هقدر مدخلش تاني
لاني ضحكت ضحك عمري مضحكته قبل كده
هههههههههه
برافووو

نفسنا said...

ندعوكم لمشاهدة العدد الثانى من مجلة نفسنا

shaimaa said...

حسبى الله ونعم الوكيل فيكى
حرام عليكى ده انت حقنة

رينـــــــــــا said...

ههههههههههههههههههههههه
والله انتى فاضيه
بئا تعملى مخبر وتمشى وراهم
مش خايفه فى الوقت دا طهقان يقرر يجرب الكغامرة والا ايه
هههههههههههههههههههههههههههه
بس حته موقف انا لو مكانك كان زمانى موت اصلا

تحياتى يا طهوقتى

None said...

والنعمه انتي عسل

هاتي بوسه

raghda safwat said...

ايه المدونة الجامدة دى يا بنت ؟
انا شكلى هعمل لك لينك من عندى
هو فيه فعلا ناس بتنقل منك ؟
طب ليه فراغة العين دى ؟
هم مين و احنا نفضحهم و نقطع عنهم ميا و نور
انا عاوزة اقولك ان اكتر شئ عجبني في مدونتك هو انها شخصية و بتنقل انطباعاتك انتى عن الحياة مش سياسية و مليانة نكد و وجع دماغ و احلام ديناصورات
شكرا يا طهقانة
و كييب اين جردل بقى
keep ingrdl

رغدة

raghda safwat said...

انا لسه قارية البوست حالا
انا بشد ف شعري منك
معقولة فعلا طلعتى وراهم كنتاكى ؟
يا خبر
كان الله فى عونهم بصراحة
حلوة اوى الصورة بتاعة مقوم الاسنان
و بالمناسبة الموسيقى بتاعتك اسمها ايه ؟

صاحب البوابــة said...

كالعادة

تكتبين بشكل ساخر وكأنك تتنفسين

بصراحة موقفك كان محرج جداااااااااا

وطقهان لازم فعلاً ياخد موقف معاكِ

:P

truelove said...

يعني هما اللي بيقوله علينا ده من شويا ما هو من العمايل دي يبقى ليهم حق يقولوا علينا حشرين وبندخل منخرنا في كل حاجة

زين كملاوي said...

بصراحة أنت رائعة ياطهقانة ، دا فيلم مش حكاية وبس ، أيه قصة فريد مع مها ومدحت مع مها، بصراحة بس أنت بذلت جهد كبير ، وأنا أنصحك تدي النص دا لانور عكاشة ، حيعمل منه مسلسل ، وما عليه أنا حاختار الممثلين ..
شكراً على روعتك ، وتحياتي لطهقان

Taher said...

ههههههههههههههه

لا لا حاجة ما تطهقش

هو حاجة من اتنين يا يقتلك يا يتجوز عليكى

حاجة ما تطهقش ابدا

هههههههههههههههههههههههههههههه

واحدة من الناس said...

هههههه
أحيي فيكى عقلك وتصرفاتك السليمه... بجد مش بهزر أصل انا لو منك كنت هانزل عليه مش هاقوله
امال فين مدام مها؟؟
دا أنا كنت هافرج عليه الناس وأديله دروس فى الخيانه الزوجيه وأقلب نايتي زنجر على دماغه ودماغها
يالا جت سليمه أصلك مبتحبيش تتدخلى أنا عارفه
سلام يا طهطوهتى:))

S H A H said...

بس واضح انك تحبي تهتمي بالاصدقاء حوليكي, مش حشرية خاالص

بس بجد موقف مسخرة

MAKSOFA said...

ياداخل بين البصله وقشرتها
ماينوبك الا ريحتها

محض روح said...

لا فعلا الموضع محرج موت
كويس انها جت على قد كده
يالا علشان تتعلمي في المرات الجايه
:)
تحياتي ياجميل

Ana keda said...

هههههههه

والله بضحك اه ياوختى انتى عاوزةتعملى الخير بس محدش مقدرمجهوداتك

ابقى ركزى بقى لاحسن تشوفى طهقان اتنين ولا حاجة ركزى

egyboy said...

يعنى يا ست طهقانة لو كان دى انتى والأستاذ طهقان كدا مش كونتوا هترتاحوا من الطهق ده اسمعى كلامى ومتشكيش فى حد تانى ولا حتى طهقان
dr.mostafa

بعدك على بالى said...

المثل بيقول
من خرج من داره اتقل مقداره... اهمدى بقى

fanan fa2eer said...

يرضي ربنا اللي انتي عملتيه ده يا طهقانة؟
:))
والله أنا قاعدة حسيت ان دش الميه الساقعة ده نزل علي دماغي أنا من المفاجأة
ومش كنتي تأجري مخبر أحسن؟
بدل فدادين الدرا اللي كنتي عمالة تزرعيهم دول

بس دمك زي العسل
ربنا يخليكي لطهقان وتطهقيه كمان وكمان

زحل الفلكي said...

هههههههههههههههههه
موقف بااااااااااايخ اوي اوي
طب ليه بس كده
دع الملك للمالك

المرادي طهقان طلع عنده حق
:D:D
لازم نعترف بكده

Nouran said...

لا لا لا ملوش حق حاجة تطهق ايه ده حرام عليكي مش تتاكدي من مصدر المعلومات الاول
بس جامد اوي الموضوع ربنا يخليلك طهقان ويطهقك وتكتبلنا وتضحكينا كده ربنا يخليلكوا بعض يا ستي :)
وابقى خليه يوديكي كنتاكي من غير العيال هههههه

علاء said...

ياخبر !!!!!!!!!
حتة مقلب
جامد جدا
ههههههههههههههههه
يا ترى الست فكرت ايه لما قلتي على جوزها انه من ريحة الست التانية :)

Horas said...

مرة تانية
بجد المدنة شكلا وتنظيما وجهدا رائعة لكنها مضمونا تحتاج لتفكير واعادة صياغة جميل ان نضحك ونسخر بما يمر في حياتنا اليومية لكن الأجمل كيف نستفيد منه لنحيا حياة ممتعة جميلة ونضع يدنا علي أخطائنا ونعالجها وكذلك مزايانا فنحافظ عليها ونفيد من حولنا بتجاربنا
بجد لو المجهود والجمال الي في المدونة اتغير منطق استغلاله أعتقد الأمر هيختلف وتحياتي

عاشقة الوطن said...

طهقانة
ايه ياختى اللى انتى عاملتيه ده بس
الموضوع كبييييييير
يعنى كنتى لازم تتلخبطى كده
اهوه طلع الرجل مظلوم اهوه

يالا معلش
براحة كده قبل ماتظلمى حد مالوش ذنب

بس انتى عسل
وسكر

مدونة الدفاع said...

انتى صح الراجل طهقان مالوش حق يطهق خالص ولا يتجنن ولا يحرقلك فدانين الدره بتوعك واهو انتى بتاخدى خبره فى كيفية امساك الزوج اللى بيلعب بديله ويروح كنتاكى مع مراته يعنى ببساطه انتى بتدافعى عن حقك وزى مانتى مابتروحيش كنتاكى مع طهقان يبقى مفيش راجل يودى مراته هناك كمان لا انا معاكى والله معاكى يا طهقااااااااااااااااااان يا اخوياااااااااا

farfasha said...

زي العسل والله
وبجد بجد انا معجبه جدا بفكره طهقان وطهقانه دي
بس ياترى هل الكاتب واحد
ولا اتنين فعلا
وبالنسبه بقى للبوست
كويس انك عملتى كده بس كان لازم تتاكدي الاول عشان منظرك ادام طهقان
اهو اخد عليكي بنط يا حلوه ومش هاتعرفي تتكلمي معاه تانى
تحياتى

Halawa said...

ايه ده ياشيخة
أنا كنست عليك السيدة زينب

كنت هتولعي الدنييييييييييييا

لذيذة جدن
في شوية هبل تعالي شوفيه
لو فهمتي حاجة قوليلي

تحياتي

BaTresYa said...

يالهوي ... بجد موقف فزييييييع ...انا لو منك اعيت .. :(
بس ايه المحقق كونان ...بجد جامده اوي..تعيشي وتاخدي غيرها يا قمر

ضد الظلم said...

لا هى دى حاجة تطهق ابدااا انتى مظلومه دى حاجة تشل اه والله تشل ربنا يكون فى عون طهقان
هقول ايه ولا ايه اسلوب ساخر من اروع مايكون اسلوب يشد جدااا وفيه استفاده رائعه
دمتى بخير

Marvel said...

هههههه....حلوة قوي

MiMi said...

يخربيت مطنك علي رأي سنبل ،،ايه اللي عملتيه ده ، فالحة تكتبيلي كلمتين فرنساوي علي كلمتين الماني ،، طيب اعملي زي ما اصحاب اللغات دي بيتعملوا ،، تروحي الشارع الرئيسي عندهم ،، تلاقي كل واحد في حالة ومحتاله ولا ليه في الطور ولا في الطحين ،، خليكي في نفسك احسن اللي هتعمليه في الناس هيطلع عليكي ،، امشي جنب الحيط وخليكي في حالك ،، المرة الجاية هتكون الاكلة باسكوت ،، مش زينجر يا زينجر ،، الله يكون في عونك يا طهقان وليك حق تطهق ،،

Abdou Basha said...

لذيذة بجد..
حلوة حكايات النوادي.
:)

remaliza said...

عسوله برغم انك طهئانه
بس فعلا الفضول ده مرض فى كل ست مش انتى لوحدك بس المهم بئه نلحق نفسنا قبل مانغرق مش نتبل بس
بس بجد لذيذه موت

Hosam said...

عزيزتى
ان بعض الظن اثم
حتى لو فيه اثم انتى لو حبيتى تغيرى اى اثم تلاقيه فى حياتك
يبقا كل يوم هتكونى فى الاثم قصدى القسم
بس برضوا جدعه
فى حاجات تستفزنا وغصب عننا
مش هنسكت علشان منطقش
وخيرها فى غيرها
سلاااااااااااااام

اسكندراني اوي said...

يعني مش عارفه مين متجوز مين ورايحه تعكي في الحلل
روحي يا شيخه طهقتينا

طبعا دا هزار ولو الاسلوب مضايقك اسحب الكلام
بس تصدقي في ماس فعلا بتحط مناخيرها في اللي مالهاش فيه
وممكن تعك وتعجن وتدخل الدنيا كلها في بعض
اتنمى انك ما تكونبش واحده منهم يا طهقانه
بوست جميل
تحياتي

اسكندراني اوي said...

على فكره
انا اول مره ادخل البلوج ده
دمه خفييف وفعلا بيزرع البسمه بالرغم من البلاوي اللي الواحد فيها

لسه بقى حخش عند طهقان واشوف ايه النظام هناك

MONDAHESH said...

ههههههههههههههههههههههه

جامد موت الموقف ده


بس انا في حاجتين محيرني برده

طالما انتي من الاول مش عارفة مين متجوز مين ليه اول حاجة جت في دماغك انهم مش دول اللي متجوزين بعض؟؟

السؤال التاني ليه بقي بينزلها علي اول الشارع طيب؟؟

yasmina said...

بوست حلو كالعادة
ودايما لما بدخل عندك بتبسط وبضحك
بس هاي المرة انتي اللي غلطت مش طهقان
وانا بحب تطهقيه

وبعدين ليه بنزل مراته على اول الشارع غريبة لا؟

سلام

may said...

ليه ياطهقان سوء الظن ده
من حقه يبقي طهقان بسبب عمايلك دي :D

و القادم....أجمل said...

ههههههههههههههههه
ههههههههههههههه
هههههههههههههههههههه

سكر جدااااااااااااا

ربنا يسترها معاكي المرات الجاية

:)))))

sendbad said...

ههههههههههههههههههههههههههههههه
اول مرة اضحك من يومين تخيلي
بس انتي فدائية اوي

reri said...

بيني وبينك وكلام في سرك
طوطو المره دي معاه الحق
دعي الخلق للخالق
بس غريبه أوي في حد بيفطر في كنتاكي
وكمان طلعوا متجوزين
ده إيه الدلع ده
يعني في لسه ناس متجوزه بتحب بعضها
في أمل أهو يا طهقانه

دمك زي العسل وإنتي زارعه فدان الدره ورايحه تستخبي وراه وبدأتي المراقبه
تعيشي وتأخدي دش غيره بس يكون في ماكدونلز
:))))))))

سلامااااااااااات

الطائر الحزين said...

إن بعض الظن إثم

وبعدين انا بصراحة نتغاظ منك يعنى زعلانة منه ومفروسة أوى انه نزلها على أول الشارع ومش زعلانة من لفهم مع بعض فى التراك
وطبعا كنتاكى دى مش بيروحها الا الواحد لما بيكون زهق من اهل البيت أقصد من أكل البيت هتودونا فى داهية

تحياتى

mariamagdolen new said...

لالالالالالالالالالالالالالالا ملوش حق يطهق

YHYيــوســف الـمصـرى said...

فى ايه بقالك كتير مفيش جديد
خير طمنينا
طهقان حصلو حاجة
ولا ايه الى حصل
طمنينا
تحياتى

S H A H said...

مبروك النيو لوك يا قمر, بس اظاهر طهقان فهم غلط اعتقد انه بيموت في البلدي

zordeak said...

هههههههههههههههه


مش حلووووووو علشاااااانك

شفتى اخرة اللى يتدخل فى امور الناس

يعنى ناس انتى متعرفيهمش اصلا تروحى تحشرى نفسك فيهم ليه

شكلك بقى وحشششششش

هههههههههههه

ادى اخرة اللى يروح كنتاكى


ماله مؤمن

:D

زى الهوا said...

ههههههههههههههههههههههه

بجد دمك سكرررررررررر انا بجد ماقدرتش ابطل ضحك , والله يكون ف عون طهقان

ro7 said...

ههههههههه يانهاري مش ممكن انتي محصلتيش اصلا بجد زي العسل ربنا يسعدك دايما

سعيد انحراف said...

ياي .. دول ناس بلدي قوي اللي راحين ياكلوا في كنتاكي دول

ماله زيزو النتن

aya said...

ههههههههههههههههه

طلعت منك اوت يديه المرة دى يا بستوكة
معلش بقى
الجايات اكتر من الريحات
ههههههههههههه
وبصراحة معندوش حق طوطو يطهق
ده حتى يبقى بهرج يعنى
ههههههه
تحياتى اليكى يا الذ طهقانة
بجد دمك زى السكر

جوستيـن said...

هيهيهيهيههيي

RealMan said...

ربنا يستر وما نطلعش جيرانكم احسن انا غير عمو مدحت خالص.

وربنا مع طهقان ويزيده صبر كمان وكمان والله ليه الجنه.

حمامة said...

يا نهار ابيض
موقف من الأااااااااااااااخر
ربنا يكون ف عونك

قلب صغير said...

ممكن سؤال اخت طهقانه
هي حيطة بيتكو
اخر مره اتجددت امتي

المتبهـدلـون فـي الأرض said...

ويبقى هنا تساؤلات بقت غامضة لم تفصح عنها الكاتبة ..!!!لماا نزل مراته عند الناصية ؟؟



ليه راحوا كنتاك .. مش هو مقاطعة برده ؟؟

Anonymous said...

福~
「朵
語‧,最一件事,就。好,你西.............................................................................................................
..................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘

arab girlscool said...

This is such a nice addition thanks!!!
شات صوتي شات صوتي
عرب كول
شات صوتي مغربي
دردشه صوتيه
انحراف كام
منتديات منتديات عرب كول