ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

مودي و مودك و اتفرقوا المودات


خليكو شاهدين يا بلوجرز على سي طهقاااااااااان


يوم الخميس اتفقنا نخرج نفسح الاولاد في الميريلاند بعد المغرب وهو اتغدى و نام شوية و صحي قبل المغرب لا بيه و لا عليه وشه مقلوب و حواجبه تمنيات(^^)عملت له الشاي و لبست الاولاد و لبست و هو قاعد في الريسبشن مطفي النور و عايش في فيلم الشموع السوداء و فاضل يجيبلي( روي)0


أنا: مش يلا تلبس يا طوطو


هو:ايوة(بسئالة)0


أنا: طيب يلا علشان نروح بدري(بدلال)0


هو:مستعجلة على اية هو الميريلاند حيدوّر و يطلع(بغتاتة)0


أنا:لا بس علشان الاولاد متعودين يناموا بدري و ساعتين و حيقفّلوا ،يلا قوم بقى(بدلع)0


اما اشوف اخرتها معاك يا سي يوسف وهبي القرن الواحد و عشرين(في سري طبعا)0

قام دخل الحمام نص ساعة قلت يا بت و ماله تلاقيه بيحلق دقنه و طلع من الحمام دخل يلبس نص ساعه تانية ،في الوقت ده الولد الصغير كان اكل كريم كراميل و بهدل هدومه و دخلت اغيرله


نسيت اقولكم الشغالة اجازة خميس و جمعة و انا باخد لقب اوشين لحد ما ترجع


و لما استغيبته دخلت لقيته لابس اقدم بنطلون جينز عنده و تيشرت كانت عنده من سنتين و بيلبسها لما يروح يغير زيت العربية او يشحم


قلتله :خير مكجول ليه؟


قالي :عادي


قلتله: ليه ملبستش حاجة شيك؟


قالي :العيال حيبهدلوني انسب حاجة لهم الجينز


طيب انا ذنب مامتي اية؟ تخرج معايا كده و بعدين محلقتش ليه؟


قال: بريح دقني في الويك اند


قلت : يعني طول الاسبوع تحلق الصبح و انت رايح تقابل المهندس فخري و الاستاذ لمعي و يوم ما تيجي تخرج مع مراتك تنزل بعبلك ده انت فاضل تعلق فوطة صفرا


دي كانت استفتاحية الخناقة اللي انتهت بفصل القوات و لم بطانيته و مخدته و راح نام في المغضبة اقصد في اوضة الصالون


نصيحة::: لكل حديثي الزواج يجيبوا كنبة الصالون مريحة علشان في الغالب حيناموا عليها كل ويك اند


و هكذااااا يا اساتذاااااا

اكتبوا عندكم القاعدة الفيزيائية دي
مودي كويس =مودك طهقان
مودي طهقان= مودك كويس
مودي+مودك=ليلة كحلي
ليه كده ؟باستمرار لما انا اكون مفرفشة و فاني و عايزة اضحك و اهزر الاقيك انت معكنن و ملكش مزاج و منزل ودانك لتحت

و لما تنكد عليا و توصلني لمود الطهق تبتدي انت تفرفش و تروق و كانه واجب
قومي بتحاول تؤديه باستماته كل مرة
و الغريبة انك بتستغرب قوي و تقول: الست دي منكده ليه؟
ما هو انت لو تراجع تصرفاتك الخمس ست ايام اللي فاتوا حتعرف انا اية وصلني للهم ده
و على فكرة الست مننا لما بتدخل في مود نكد بيبقى صعب تطلع منه بنكتة بايخة و كانك بتغير محطة التليفزيون بالريموت
كده تسليك كده توليع
كده تنكيد كده تهريج
لا لا و الف لا دي حاجة تطهق


امضاء طهقانة
--------------------------------------------------------------------
تحديث:::
تم نقل البوست الاول من قبل شخص يدعى تامر فرج و ذلك لمنتدى كريزي كريزي
و طبعا لم يذكر المصدر
ليه كده؟؟
حاجة تطهق بصحيح
--------------
تحديث2:::
ادارة المنتدى عملت تصحيح و وضعت اسم المدونة و الحمد لله
انا بس كنت طمعانة في عشرة جنية بدل نقل
اشتري للعيال 2 كيلو موز بس معلش البوست الجاي

66 comments:

نبيــذ said...

آه والله حاجة تطهق

Anima said...

يا اختي ايه صبرك ع الراجل الغريب ده

أنا لو مكانك تطلق منه

ده ولا كإنه حيطة ما بيحسش

Shower-Mirror said...

نفس الكلام بتاع مراتى

و بالذات موضوع الدقن ده

انتوا بتجيبوا الكلام ده منين


:)

واحد زهقان said...

حيرتوني معاكوا....اقرى كلامك اقول فعلا معاها حق تزعل منه...ازاي تعمل كدة

واشوف كلامه اقول فعلا معاه حق في اللي بيعمله...مالهاش حق تزعل منه

انتوا خلااااص هتجننوني...ههههه

esraa said...

ليه كده بس ياطهقان, كده تزعل طهقانه بس بردو تلاقيه كان في حاجه مضيقاه وعشان كده طلعها فيكي بقي, معلش استحمليه حبه, ولما يروق قوليله وعرفيه ان ده ضايقك.

صاحب البوابــة said...

صدقينى

تعجبنى روح الدعابة الطاغية دائما على مدونتك انتى وزجك الغالي

تحياتي لكما

واتمنى ان تظلا سعيدين دائما

صاحب البوابــة said...

تحياتي لخفة دمك الواضحة

وتحياتي لروح الدعابة بينك وبين زوجك

اتمنى ان تظلا سعداء دائماً

تحياتي

Sampateek said...

تعرفي بقى ساعتها البسي و اتشيكي و خدي مفاتيح العربية و اشرخي
و سيبيه هو يشحم عربيات براحته
و لما يقولك ليه سيبتيني

قوليله خليك في كوزك لما نعوزك

رجالة عايزة الدبح
انا بهدي النفوس بس

بقولك ابقي حطي دبابيس في كنبة الصالون
و بالشفا

تحياتي

يا مراكبي said...

الإخوة اللي عمالين يسخنوا دول .. بالراحة شوية مش كده .. مش تسألوا الأول الطرف التاني عن أصل الحكاية .. مش جايز كان فيه حاجة شغلاة في الشغل ومنكدة عليه؟ مش يمكن غياب الشغالة مأثر على نفسيته؟

لازم نتعلم نهدي النفوس .. مش نسخن على طول كده

أي خدمة

طهقان said...

ربنا يخليك ليا يا ماراكبي

اهو دا الراجل اللي فاهم صح

ويقدر يعالج الامور بحكمة

لازم نسمع الطرف التاني

بس ايتنوا لما يخف بالسلامة



نبيذ

مش كده والله....!
حاجة تطهق...
بس مين يطهق مين؟

انيما

نفسي اشوف لك تعليق حلو
خليكي محضر خير يا مؤذية

ميررو

مش عارف الدقن يا أخي غيظاهم في ايه؟؟

واحد زهقان

انا نفسي ساعات باتلخبط واقول يا ولا انت الغلطان ،
وساعات اقول.. ينعل ابو دي عيشة

اسراء
ربنا يخليكي يا رب
هي دي الناس اللي جاية تهدي النفوس صح

صاحب البوابة
الواحد هايعمل ايه بس.. يا تن تن يا تن تن

يا يطهق يا يهرج.
يا يجليوا لوسة

سعيدين....؟ انت اكيد بتتكلم عن حد تاني

سامباتيك

يا طهقانة...بلاش تسمعي كلام الناس اللي بتولع
والزمي حدود الخصام

يا ماراكبي..

احييك يا راجل

كراكيب عادل said...

ههههههههههههههه اوضة المغضبة
اقولك الصراحة الضغوط الي بتكون موجودة عن الراجل في نهاية الاسبوع غريبة هو بيكون زهق من برة وعايز يستكن شوية وسط عيالة ومراتة بس برضو العيال ليهم حق يتفسحوا انا من رأي حد ياخد العيال يفسحهم وانتوا خليكم في اوضة المغضبة وغيروا اسمها سوا

الراجل مش غلطان قوي يعني وبعدين هو هيفضل مشدود علطول حالق دقنة وملمع ومتشيك بجد زهق زهق انا في نهاية الاسبوع بكعبل نفسي مخصوص الصراحة

أميرة البلطجية said...

انا فعلا لما ححب احمد ربنا على عدم الجواز حاجي ازورك يا اوختشي
الحمد لله
الحمد لله
الحمد لله

7elwakeda said...

والله سيادتك عايزة تخرجي معاه وهوه متشيك يبقى ترمي عيالك عند الجيران أو عند الست ماماتك ... هوه أنتي عايزة تتفسحي ... ولا تفسحي العياااااااال؟؟؟
طبيعي جدن عنده حق الولاد هيبهدلوه ... يبقى ما ينفعش يلبس بدلة مثلا وهوه خارج يلعب.... لكن لو طالع مع القمر لواحده ... فضروري جدن ... يلبس جلبية مقطعة بقى وشبشب من أبو فرده مقطوعة..... ولا إيه؟؟؟

Mohamed A. Ghaffar said...

انا اول مراتى متبدأ لبس الطرحه اقوم انا عشان ابدا لبس وبخلص قبلها

حكايه مودى ومودك ده انانيه ، وبعدين الستات بتفتكر ان الارجل بيتقمع طول الأسبوع بمزاجه مش عارفين انه مكره فأما بتيجى الأجازه بيبقى عاوز يفك بقى فبيلبس زى طهقان ويسيب دقنه وممكن ميستحماش كمان

حريه بقى

انما طهقانه تسيبه فى حاله لاممكن ابداً ، وبعدين انا جايب غرفه اضافى بسرير كبير زى غرفة النوم بالضبط وما احلى النوم عليه

Noony said...

ببساطة..الرجالة عندها انفصام حاااد في الشخصية

:)

نوني

Horas said...

ايه الجديد نفس الكلام نفس الحوار حقيقا لا أجد موجود ايجابي مفيد في مدوناتك من فترة ضروري يكون في حاجه هادفة ومفيدة حتي ولو كانت مضحكة

None said...

بستوكتي يابستوكتي

مبروك الاول علي النيو لوك بتاع البلوج

البوست يجنن يا طهقوتي ..بجد انتي حطيتي ايدك علي مربط الفرس ..فعلا الموود مش بيتغير بالريموت ..والست بالذات لو دخلت في موود نكد بتخرج منه بصعوبه ..وقبل ما يقولو علينا نكديين لازم يشوفو الاسباب والدوافع التي ادت الي هذا الموود المنيل ..واللي بيكون اغلبها تراكمات من حجات ممكن تكون صغيره جدا في نظرهم ..لكنها بتعلم عندنا
بس تفتكري بقي المود دا بيكون متعمد عشان ندخل احنا مود الكئابه ويعيشوا هما موود الضحيه....
سؤال يطرح نفسه
كان معكم نادر سيف الدين من قناة الحقيقه للأخبار...وعفت الشربيني

dr_lazeez said...

walahy el regala dool ma3andohomsh dam :))
bass 7awly tet kalemy ma3ah shewaya .....
ana 3aref hat 2oly etkalemt keteeer le7ad mazehe2t
bass 7awly tany we tany
wes ta`7demy se7r bent 7awa :)
wish u luck and happness

Incomplete said...

وحشتييييييييني يا بستوكتي
هو بس عايزك تبقي هيفاء ونانسي..واما يجي ينزل معاكي بتقمص لي فيها دور سايس الجراج
مش ليه حق طبعاً..اعملي بقى زي مابيعمل..واديها فرجة على كليبات وائل الكافوري وكاظم الساهر وعمرو دياب ورامي عياش.. وماتنسيش جاد الشويري
:D :D :D
واتنهدي وسبلي وبتاع..واما تشوفي كاظم في حفلة ولا حاجة..تجري على المونيتور وتقولي كاظم حبيبي.. كاظم حياتي.. وتسورقي ويغمان عليكي وكده
وهو يتعدل ويتظبط انا متأكده
بصي يامزتي كمان بالنسبة بقى لموضوع المود..امشي معاه خلف خلاف مادام بيعمل معاكي كده..يعني لو كان موده وحش وحتى لو كنتي متضايقة عليكي تعملي مبسوطة وفرفوشة وبتاع..والعكس صحيح
أيوان
إني أطالب بالمساواة في الحياة الزوجية
____
طهقان مش كده يعني دي طهقانه بستوكة رقيقة ومش ممكن أبداً تلاقي زيها.. الحق نفسك بقى قبل ماتسمع كلامي وتنفذ النصايح وكده
:P :D

lojain said...

الغريب ان كل راجل حاسس فى نفسه احساس النبى المنزه وعنده استعداد يحط مبررات رهيبه عشان يثبت ان هو صح
مع ان بجد نقلا عن كلام واحدة حبيبتى قوى يعنى كل الرجالة عندهم نوع من الشذوذ الفكرى وتلاقيه بيفتخر بنفسه قوى وهو بيقولك انا طول عمر ماما متقوليش الا انى مبيعجبنيش العجب
ومخليتكش جمبها ليه يا حبيبى

بتفكرينى بموضوع الدقن ده بمسلسل عربى اسمه البشاير كانت الممثلة مرات احمد بدير فيه بتقوله اه لماالضيفة جت بتحلق دقنك كل ساعة ومعانا سايبها زى عش العنكبوت
:((((

ربنا معاكى ياحبيبتى ايه ده
ده حاجة تقصف العمر

R.R said...

ههههههههههههه
انتى لذيذه جدا
بس تصورى فعلا ده بيحصل مع المتجوزيين الجداد
كويس انا اما اتجوز بعد عمر طويل يعنى
هبقى اجيبله سرير بدل كنبة الصالون
عشان تعرفى اننا قلوبنا رحيمه بيهم
بصى اما تحسى انه عاوز يقلبها نكد
اعملى نفسك مش واخده بالك واخرجى معاه حتى ولو بالبجامه
ده هيغيظه اكتر

وبردو عشان خاطر الكتاكيت

انا سعيده بمعرفة مدونتكم
وبالفكره نفسها
التانيب بالكتابه
واكيد هو بيقرء
تحياتى لكى

mesh2dra said...

ياستي ..بسيطة
عديها

ياسمين said...

فعلا طول عمرى باسأل السؤال دة
هو ليه لما ابقى مفرفشة ومنعنشة ومنغنشة ألاقيه مش طايق نفسه
يعدينى هو بآكبته اصل الكآبة مرض معدى جدا .. شديد العدوى
وبعدين يخف هو يبصلى بقرف ويقول كئيبة .. نكدية
ليه مش افهم
كانى اتولدت كدة
أو كأنى قررت فجاة انى ابقى كئيبة ورحت اشتريت حبوب الكآبة من الأزخانة
اقولك سر أنا اكتشفته
السر ان الراجل الشرقى اتربى على ان الست مش من حقها أى حاجة
حتى انها تزعل أو تكتئب
وما بيفهمش ان غضبها .. ألم
وان دموعها .. حزن
وأن عبوسها .. مراية له
تحياتى

الربان said...

تحياتي

الحياة قصيرة... و لابد من الاستمتاع بها طالما من الله سبحانه و تعالي علينا بها...
ياريت كلنا نفتكر...ان التبسم في و جه الاخر صدقة... و ان الجنيه الذي يصرف علي اهل البيت لنا به ثواب..
ياريت كلنا نفتكر ان الدنيا لا تدوم و علينا ان ننتهز لحظات السعادة لنسعد انفسنا و الاخرين أيضا.

تحياتي... و اسلوبك الساخر جميل.

Horas said...

تصدقي والله عندك حق
تحياتي

fad-fadat nour said...

انا معاكي قلبا و انقلابا يا بستوكة يا حبيبتي يا حامل في الوديع انتي
:D

بس عارفة فعلا في اخر الاسبوع الواحد بيبقي نفسه لو حايخرج من البيت يخرج بالبوجاما او اي حاجة شبهها

قال يعني كأنه كده ما نزلش من بيتهم

ايه رأيك تضربي الحتة الجينز القديمة مع تي شيرت البي تي بتاع ايام المدرسة و تنزلوا سوا ؟

Tamer Nabil said...

ههههههههههههه

ديما ظالمين الرجالة كدة

الله يكون فى عونك ياطهقان يااحوى

ههههههههه

تحياتى

Anima said...

زواج طهقان من طهقانة باطل
باااااااااااااااااطل

طيب يا سي طهقان لما انت بتحبها كدة و مش قادر تستغنى عنها ليه بتزعلها؟

سأعطيك المجال بعد الفاصل

ياأخت طهقانة السيد طهقان سبك و شتمك و قال فيك كل العبر الوحشة تردي بإيه

سأعطيكي المجال

sabrina said...

وفي الأخر روحتوا الميرلأند ولأايه!!!!!!!!!

zordeak said...

هههههههههه

يا لهوى

اديتينى نظرة مبعدية مشرقة للحياة الزوجية

كويس والله


يعنى ما ازعلش بقى انى متجوزتش

ولا اقول نفسى اتجوز والكلام التعبان ده

خلينى كده احسن

مع نفسى


:)

zordeak said...

نسيت اقوك ان البلوج بتاعك تحفة


وشكلى هاجى هنا كتيير


وادينى بتعلم برضه

عشان اعرف اعامل بنت الحلال صاحبة النصييب


واهو تبقى خدتى فيا ثوااااااب


:)

بعدك على بالى said...

مودى ومودك واتفرقوا المودات... والله عندك حق.. اول لما تقوليى للراجل من دول تعالى اخرج مع مراتكم وولادك كانك بتحكمى عليه بالاشغال الشاقة، لكن لو جاله تليفون من صحابه يتزوق ويفرفش وجرى ..
يالا معلش خليها عليكى ياجميل، هى جت على دى
تحياتى

shayma said...

ههههههههههههههههه
اولا دمك زى السكر
فعلا دى حاجه تطهق
المشكله ان ده على ما اسمع موود عام للرجاله ...يعنى مش طهقان بس..ولاونى مش عارفه ليه .... بس هى فعلا حاجه تطهق
سلامى ليكى وربنا يكون فى عونك
:D

الأرمـوطــي said...

انا هقولك حاجة اول مرة اقولها لحد الجواز بالنسبه ليا هوا السعادة الى مستحمل حياتى لحد متيجى يعنى هيا امل عايش عليه وبصبر بيه نفسى البوست بتاعك اكد كلام ناس كتير ان حياة الانسان قبل الجواز احسن من بعده والله حرام عليكم تحرمونى حتى من الحلم مفيش احلى من جملة من اغنية عبد الحليم اختم بيها
ليه تصحينى فى عز الجنة بنار ودموع دموع كنت ارحمنى وسبنى شويه اعيش اعيش مخدوع......اعييييييييش مخدوع
سلام

ody911 said...

إستنوا بقة ما إنتوا كمان زعات بتخلوها نكد


أنا شايف إنى فى ناس كتيير كانت جاية تهدى النفوس


أنا بقولهم إنسوا


دول إثنين بيحبوا بعض

وهيفضلوا كدة على طووول


حتى لو كانوا طهقانين



قلتله :خير مكجول ليه؟



قالي :عادي


عادى بقة
أودى

Doba said...

صباح الخيرات على كل الباستوكات القمرات ، انا بس حبيت أقول انكو مجموعة مطرقعة جدا، وعموما كل الطهقانين محتاجين يبقو متدلعين علشان يبقو مبسوطين، وقت ميحب يتعامل كطفل عامليه ووقت ميحب يبقى سيد الرجالة اعمليله طنط أمينه وهكذا وإلى لقاء آخر قريب.

دوبا

ايــــــــــــــــــوب said...

اول مرة اجى هنا
واول مرة من زمان اقرى مدونة من زمان
ومن زمان بردو ما ضحكتش كدا

yasser_auf said...

تهاطيكوا

ازيك يا ست الطهقانين

بصي انا قرائت الموضوع و بعد اذنك حبا في اننا نفضل اصدقاء لن اعلق علي الموضوع و لاكن حعلك علي الليلة الحمراء في الصفحة بتاعت حبيبك طهقان

بس عموما بقي انتوا ال2 عاوزين
بتفكروني بخالف تعرف او بمعني اصح انتوا اتفقتوا علي الا تتفقوا

و ربنا معاكي بقي النهارضة في اللمة الي عندك بالبيت بتاعت الماتش
حد و النبي يعمل ليلة حمراء في البيت مع صحابة
هي اية فاكرها قهوة بلدي و مشغلين فيها الاية ار تي بالمشاريب

تحياتي

سهر الليالى said...
This comment has been removed by the author.
سهر الليالى said...

بتقلبى عليا المواجع ليه نفس الموديل عندى منه والله حاجه تطهق فعلا مافيش موديلات معدله خالص امرنا لله هنعمل ايه ربنا يصبرنا على ما ....وخلاص
تحياتى

Epitaph said...

فعلا ليه الاتنين مش بيكونوا مبسو
ين
ليه دايما عاملين زي استاذ خلف خلاف المحامي

:))

ينصر دينك يا استاذ نفيييييييييييسة

Summer said...

I love your blog and Mr. tah2an's blog too...really fun to read.

Moh said...

انا عجبتني جدا فكرة المدونة واسلوبها واسلوبك واسلوب زوجك وحكايتكم واسم المدونة نفسة يعني حتي الان معجب بكل حاجة ليها علاقة بالمدونة دية حتي باللي بيرد عليها واتعطلت عن الشغل عشان اقرا مدوناتكم
انتي وزوجك وبرايد اكتر حاجة بتهون علينا غربتنا بتحسسنا اننا عايشيين معاكم في مصر لسة
بس اهم حاجة متتقلوش العيار علي بعض عشان حنزعل قوي لو زعلتم من بعض بجد
وبلاش فضايح كتير عشان الاولاد

Mala2e6 said...

طهقانة

اول حاجة عايزة اعرفك بنفسي

ملائط غسيل من الاردن

اللي كتبتية حلو اوي و بيحصل في احسن العائلات

و كله حكم يا طهقانة

و هاسيب كل حاجة و امسك باخر كلمتين

(قبل الاقتباس يعني

و على فكرة الست مننا لما بتدخل في مود نكد بيبقى صعب تطلع منه بنكتة بايخة و كانك بتغير محطة التليفزيون بالريموت
كده تسليك كده توليع
كده تنكيد كده تهريج


دي باة الرجالة ما يفهموهاش

يعني تزعلي ..و لو جه يصالحك يبقى لازم ترضي ولا بعدين هتقوم خناقة جديدة

بس برضة طهقان ما يهونش عليكي

gamal said...

طهقانه
تشرفت لأول مرة بالدخول لمدونتك
ولم أستطع أخرج منها الا وقد تصفحتها كامله
وخرجت فى النهايه للتعليق الأتى
مش عارف ليه انا حاسس انك يا طهقانه
مجننه الراجل بطريقتك معاه ممكن يكون أسلوبك مستفز واحنا مش شافين حاجة
رجاء غيرى المــود بتاعك معاه يمكن يتحسن أداءه معاكى من جديد
جربى واحنا متابعينك
لكى كل التحيــه.... البوست كله رائع وجميل

koukawy said...

هههههههههههه
تصوري فعلا المود في اغلب الأوقات بيبقي بالعكس
و موضوع انهم يعملوا العمله و يجوا يتصرفوا عادي كأن محصلش حاجه بتخنق اوي
معلش يا بنتي ليكي الجنه

bentfalestine said...

طهقانه ازيك يا عسل؟ سمعت انك زعلانه و بمعسكرك طمنينا عليكي :-)

فبركة said...

ابنك على ماتعوديه وجوزك على قد ما تدلعيه لأن الراجل طفل كبير

Doba said...

أوعى تكونى بصحيح اتجننتى وروحتى لبيت أهلك زى مقولتى فى الليلة الحمرا.......أهو طلع نأبهم على شونه وخسروا المطش وليلتهم اتقلبت كحلى بعيد عنك....والله ده انا اتريقت عليهم كلهم تريقة وخليت جوزى واخواته (أصلهم كانوا عاملين قاعدة زى اللى عندك).......دافعين فلوس أد كده علشان بتوع برشلونة يهزقوهم وكمان عاملينها ليه ومكسرات وعصاير بس على مين اهم عرفوا مقامهم بين الباقيين. أتمنى أننا نسمع عنك خير----بصراحة بيت أهلك مش ناقص كفاية اللى فيه.....إلى لقاء قريب

دوبا

smraa alnil said...

هههههههه

معلش يا طهقوقتي

وبعدين دة انتي كيبة اوي
اديتيلوا بطانية ومخدة
يا بنتي نيميه في البانيو خليه يتعلم
اهو بالمرة يحلق دقنه

رجاله اخر زمن صحيح

بنت الشامية said...

حلق الذقن لماتخرج معها ا.....الظاهر مشكله دوليه فى كل مكان

ليه ملو ش نفس يتزوق ويتهن

دم لما يخرجوا ويانا

شؤال يحتاج بحث.........ء

Eman Eltaher said...

هههههههههههه

دى بجد أول مرة أزور مدونتك أو أقصد مدونتكم و بجد دمك زى الشرباااااات يا بختو بيكى

و ربنا يديمها عليكو سعادة

بس عايزة أقولك خبر هام تقدرى تتطلعى عليه ف مدونتى و تقدرى تخليه هوا كمان يقراه عشان يتعظ

موضوع يخصكم جدا و يخص كل المتزوجات

صحيح انا لسه بنوتة و صغيرة على قدى بس ما تستغربيش و تقوليلى جبتى الكلام ده منين

أنا نفسى معرفش

عموما اقروا الموضوع و ادعولى و بقول لطهقان حتما هتدعى عليا

بس و النبى بلاش الدعا يكون جامد لاروح فيها

أول مرة said...

المشكلة أنكم مبتفكروش إلا في نفسكم و راحة بالكم مش متخيلين أن اللفندي يدلعدي طالع روح أمه سوري..( مامته )و بيحرق في أعصابه في الشغل وهو الواحد مننا ايه غير شويه أعصاب و أنتي لا علي بالك و ايه.... عايزه ايه ...تتفسحي طيب دوقي شويه قرف من اللي بشفهم بره
و المعادله تبقى
مودي في الشغل كويس = مودي في البيت فل
مودي في الشغل زفت + شويه نكد من بتوعك = أنتي طااااااالق

توتة توتة said...

ربنا يكون في عونك

محظوظة said...

هههههههههه



مين معايا

انا فين ومين

واية الى جبنى هنا
ههههههههههه

سلاموز

ماما عبير said...

مش عارفة ياطهقانة

هما برة البيت اخر شياكة وتسمعى منهم احلى كلام

جوة زى ما يكون عفريت بيركبهم


ربنا معانا
هنعمل اية
قدرنا

dr_lazeez said...

2akalemholek :)
2enty to2moreny

عين ضيقة said...

حلو موووووت النيو لوك دا

ولو انى متأخرة بس مبروك

وكفاية خنقة بقى والنبى

سلام

yasmina said...

هذه الحالة اكيد موجودة عند كثير من الازواج
كلامك حلو بس حتخلي البنات متحبش الجواز انت عايزة تطهقينا من دلوقت
لاني اعرف كثير طهقانات من صديقاتي
سلام

david santos said...

Thanks for you work and have a good weekend

•«ρяoιd»•™ said...

انتي هتكرهيني اني افكر مجرد التفكير اني اتجوز

بس بجد اسلوبك حلو قوي

ربنا يخليكوا لبعض يا رب

في حاجه واحده بس عصبتني قوي

ان كلامك حد خده و نشره من غير ما يقول المصدر

عشان ده كتير حصلي

و في منتديات برضه

و اللي كان بيجنني انهم مشرفين اقسام

بس الحمد لله انهم صححوا و وضحوا ان ده كلامك

تحياتي

سكينة said...

أفتكر قلبان مزاجنا بمزاجهم بيقوي احساسهم أنهم الحاكم بأمره
تصدقي لا ملامة عليهم أبدا
احنا نستاهل .... وكمان كل اللي بيجرى لنا
حدش قال نخلي هطلنا وحبنا بلا حدود
ولولا الهطل ده كان ممكن نرفع شعار خليك في كوزك... وبعون الله مش هنعوزك
:)

أميرة ويلز said...

انا عاجبنى اوى الساطور دة ممكن ابقى اخده لفة يااوختشى

:))

اللي شايل همه said...

هي ليه "طهقانة"ما رديتش على التعليقات في حين قام بذلك المدعو"طهقان"...؟

Anonymous said...

福~
「朵
語‧,最一件事,就。好,你西.............................................................................................................
..................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘

arab girlscool said...

This is such a nice addition thanks!!!
شات صوتي شات صوتي
عرب كول
شات صوتي مغربي
دردشه صوتيه
انحراف كام
منتديات منتديات عرب كول