ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

أوعى المشاريع


طهقان: يعني من يوم ما خلفتي خوخة و انتي بقيتي من أمهات الكتب أقصد من ربات البيوت، و لا بتروحي الشغل و لا بتبلجري زي زمان، ايه الحكاية؟

طهقانة:ابدا يا طوطو ،بس خوخة واخدة كل وقتي و جهدي ، ده انا شمعة تحترق من كل ناحية، دي بنتك مش مخلياني عارفة احط ديلي تحت مني.

طهقان:هو انتم كده يا ستات ،الواحدة منكم تخلف يقوم يطلع لها ديل و تبقى بقرة حلوب ،و كل همها العيال و البيت ،و تنسى المحروس اللي قانيها


طهقانة:لا لا طبعا يا محروس ..ازاي يا قانيني !! هو انا اقدر؟؟ ده انا في دماغي شوية مشاريع انما اية ..حكاية ، حتنقلي من كادر المرضعات لكادر سيدات الاعمال

طهقان:اوبا..ربنا يستر من افكارك و مشاريعك، بتفكري في اية يا طهقانة؟ طمنيني

طهقانة:شوف يا سيدي.. و ما ستك الا انا طبعا

اول مشروع ..بفكر افتح كوفي شوب تحت العمارة

طهقان:شوفي كوب؟؟ نعم يا معلمة؟! و ده حتروجي فيه مخدرات و لا افلام من اياها؟ و انا ابقى جوز المعلمة بقة؟

طهقانة: لا.. لا ..مخدرات ايه؟ و بتاع اية؟ ده كوفي شوب محترم خمس نجوم ،و انت حتبقى ليك اسعار خاصة ،ما انت مش زبون طياري انت صاحب عتبة

طهقان:لا يا ستي اصرفي نظر عن الموضوع ده ،انا مش فاضي كل يوم اجيبك من القسم ،مرة البلدية و مرة المصنفات الفنية و مرة الصحة، شوفيلنا مشروع تاني

طهقانة:طيب ماشي.. المشروع ده بقى مافيهوش أي مشكلة ،حتقعد في البيت و الارباح تيجيلك لحد عندك

طهقان:استر يا رب.. ها؟؟

طهقانة:حنشتري توك توك، و نشغله و نلم بقى البوندات

طهقان:و لما تجيبي واحد سواق حرامي يسرق البوندات و يقولك ما اشتغلتش ، حتعملي اية؟

طهقانة:لا ما أنا حركب معاه كام شهر الاول ،لحد ما اثق فيه

طهقان:طيب ماتنسيش تبقى تاخدي معاكي العيال بالمرة و تلفوا بيه القاهرة الكبرى زي بلديتنا الستة اللي ركبوا التاكسي السبعة راكب رايح جاي مع السواق و استغربوا مابيكسبوش ليه

طهقانة:طيب بلاش.. شوف بقى المشروع ده مافيش منه ،و حيبقى الاقبال عليه منتظر القبيل اقصد منقطع النظير

طهقان:قولي يا مفرحاني

طهقانة:بفكر افتح مشغل تريكو و اجيب ماكينة تريكو ديجيتال و نعمل بلوفرات و جواكيت و نغرق السوق ،اية رايك؟

طهقان:تفتحي مشغل في البيت ؟ هو البيت ناقص مش كفاية المدرسة الخصوصي اللي فيه ؟!مدرس طالع و مدرس نازل ،لا طبعا ما ينفعش ،و بعدين الماكينة الديجيتال دي اكيد غالية، لا لا شوفي غيره

طهقانة:افرزن خضار؟

طهقان:نعم؟ و عملك اية علشان تفرزنيه؟

طهقانة:انظفه و اعقمه و اشيله في الفريزر يعني، و ابيع لمعارفنا الاول و لما اتشهر...

طهقان:ايوة ..و لما تتشهري تعملي فوازير رمضان ...لا يا ستي كده قلبتي على ربات البيوت مش سيدات اعمال خالص

طهقانة:طيب.....ممم....افتح كوافير حريمي للمحجبات؟

طهقان:لا دول اكتر من الطهق على القلب.. غيره؟؟

طهقانة:اتليه خياطة و تطريز؟

طهقان:ما تنسيش توكلي محامي يجيبك من القسم بعد كل فستان يبوظ و صاحبته تجيبك من شعرك على البوليس

طهقانة:انت كده ..على طول مهمد عزيمتي و مهنجلي افكاري و عاملي ديليت لكل مشاريعي و موقعلي ويندوز طموحي

طهقان:مش بقولك اللي حيحصل!! بدل ما تتورطي و ما تعرفيش تعملي ريستور و يبقى وقت الفرمته عدى؟!!

طهقانة:لا يا سيدي انا كل افكاري اوريجينال و ماعنديش و لا مشروع مفيرس

طهقان:طيب استهدي بالله و شيلي فلاشة سيدات الاعمال دي من مخك بلا مشاريع بلا وجع قلب

طهقانة:لا خلاص انا عملت ريفريش و بروجرس لحياتي و مش حينفع اشت داون

طهقان:انت تقعدي في بيتك ترضعي بنتك وتكرعيها و تغيرلها الدايبر و تشوفي ولادك ..بالدنيا كلها

طهقانة:دلوقت بقت قاعدتي بالدنيا ؟؟ما كنت من شوية من أمهات الكتب ..دي حاجة تطهق بجد

اوروفوار
امضاء


25 comments:

Mafrousa said...

حمدا لله على سلامتك
صحيح اختفيتي من بعد خوخة
كل سنة و انتى طيبة و عائلة الطهقانين كلها طيبة

اما عن موضوع المشاريع
انا من رأي حلو التوك توك
ههههههههه
و اركبوا كلكم معاه علشان مش يخشكوا ولا يسرقكوا
هههههههههههه
انتى مالكيش حل فى اسلوبك
هههههههههههههه
تحياتي

mohra said...

حمد الله على السلامه يا طهقانه
وحشتينا
لكن انا مع طهقان كلها مشاريع رعب الصراحه و امهات الكتب اجدع ناس

يا مراكبي said...

:-)

فعلا بجد بجد .. إوعى المشاريع

هههههه

شوفي هو من حيث المبدأ أنا موافقك .. بس من حيث التنفيذ واضح إنك نسيتي أهم مشروع ممكن تتفوقي فيه بجداره .. ومش هيفرق كتير عن حكاية أمهات الكتب اللي إنتي فيها دي: إفتحي حضانة

وأهو بدل ما بتكرعي وتغيري البامبرز لخوخة بس أهو يبقى جماعة

:-)

Unknown said...

ههههههههههه
مال سي طهقان بقي
مفيش ولا مشروع عاجبه كده ليه؟
مش كفايه انك فكرتي وتعبتي نفسك وخيرتيه بين كام مشروع
هو شكله غيران عشان حس انك هتكوني سيدة أعمال مشهوره
وممكن ياخد المشاريع دي وينفذها هو بقي

MaNoOoSh said...

انا مع مشروع الحضانة بردو

واهو يبقى حضانة ومدرسة في نفس ذاك الوقت

صبرني يارب said...

والله يا اختي الواحد احتار فى الرجاله دول بجد


لعلمك هو ده بالظبط الى بيحصل

اشتغلت يقولها اقعدي ربي عيالك
ما اشتغلتش يقولها بقيتى شبه التلاجه ال16 قدم من القاعده فى البيت

حاجه تجيب صداع يا شيخه

عارفه انا اول مشروع اقترحته على جوزي ايه

قلتله بما انى عايشه فى مصنع البان عشان اكفيكم
فانا هاعمل زبادي وجبنه وقشطه وسمنه وابيعهوملك انت وعيالك يادوب كده

يا امي نشتغل ايه ده الواحد حاسس انه مربوط فى ساقية وياريتنا محصلين البقره يا اختي
البقره بيربطولها عنيها عشان ما تدوخش وبيشمسوها وفى الحر يضللوا عليها بشجره

هيييييييه ما علينا

انتخي يا طهقانه انتخي
دوري على حاجه مسليه كده اعمليها ونفضي للانتاج القومي المحسوب

Saleh Khalifa Salama said...

احمدو ربنا إن في حد بيعبركو كل يوم وتشوفوه ويشوفكم وتطهقوه ويطهقكم

في ناس تانيه طهقتهم البلد وسابوها وسابو اولادهم وزوجاتهم وبيشوفوهم كل سنه مره

فشكووول said...

بصراحه انا اللى طهقت منك انت وطهقان
يا اما كوفى شوب اللى يودى فى داهيه وشهقان مش عاجبه
او توك توك اللى يدوس الناس فى السكك وبرضه طهقان مش عاجبه
او تعملى تريكو

يا ستى ريحى نفسك انت وطهقان واقعدوا فى البيت وخلاص
طهقتونى

تحياتى

Unknown said...

يابنتى إرضاء الزوج غاية لا تنال .. لا بيعجبهم العجب ولا الصيام فى رجب

فكريلنا فى مشروع نطهقهم بيه بدل ماهما مطهقينا كدة
:D

Anonymous said...

هههههههههههه
هههههههههههههههههههههه

اسلووووبك جامد

بس ايه المشاريع دي ما تشتغل موظفة وترحمنا ههههههههههه

بس بجد قعدت البيت ارحم واهو تعقد باليبت للعيال وللراجل الي قانيها

اهم حاجة هي التغيير والتجديد والاهتمام بالزوج مش طول الوقت بترضع الواد وشعرها منكووش :]

مدونة لذيذة ومفيدة جدا

بالتوفيق يارب

حنين said...

حمدالله على سلامتك
اول زياره لى بس اعرفك من فتره طويله وكنت فى انتظار كتابات طهقانه نورتى واتمنى التواصل واحييكى ع المشاريع

Anonymous said...

علي فكرة الرجالة لازم يقولوا كده وموضوع الحضانه مش سهل عايز ترخيص وتفتيش ومدرسات ودادات ودفاتر ومصروفات ---وكل الكلام ده من خبرة صديقة لي وهي حضانتها علي مستوي --- علي العموم اتمني لك كل التوفيق من كل قلبي

ام عندها خبرة قبل منك

sal said...

فى زيارتى الاولى
لاحظت تميزا يستحق الاشارة اليه
دا اولا وتانيا فكرة المراكبى فى حكاية الحضانة فكرة كويسه...بس انا شايف بموهبتك فى الكتابة الساخرة لو واصلت الطريق فممكن كتاباتك تتخطف عشان تتحول الى اعمال تلفزيونية
طهقان وطهقانه

المشروع الكبير امهات الكتب والاستمرار فى الكتابة

تركيبة ناحجة باذن الله

سمراء said...

اعتقد انه مينفعش طهقان يقارن اهتمامك بيه ببنته لان دي علاقة مختلفة عن دي
مفيش واحدة فيهم اهم من الثانية
واعتقد ان اي طفل محتاج وقت لرعايتة اول ما يتولد بس ضروري بعد الفترة دي ينفصل عن امه وده وقت من الافضل ان الام تلاقي شغلانه مناسبة ووقتها مناسب ميجيش عليه ولا على جزها وبتها
اعتقد ان المشاريع ممكن تكون مش مناسبة للفترة دي استني عليها شوية

سعدت بزيارتك

سمراء

Anonymous said...

نورتينا تاني يا طهقانه

و بوسيلي نونو .. قوليلها عمو احمد بيسلم عليكي و بيقولك انه عنده ليكي عريس زي القمر

ولا مرتبطه ولا ايه يا خوخه ؟؟

ههههههه

اما عن موضوع التوك توك .. فعلا موضوع محتاج لتفكير .. و المفروض كل واحد يجيب توك توك فعلا بس عشان يحطه في البيت عشان العيال يخافو منه و يذاكرو .. عشان هيعرفو انهم لو مدخلوش كليات كويسه هيضطرو يسوقو الكائن ده

ههههه

اسلوبك اكثر من رائع .. اول زياره بس مش الأخيره طبعا

و يا ريت تنوريني انتي كمان هنا

http://ahmedabdulmohsin.blogspot.com/

مهرة سالم said...

السلام عليكم..
هما فعلا كلهم طهقانييين
مش عاجبهم دايما ..
...
إنتي عسل
بس أنا أظم صوتي لطهقان المرده دي بس
........
دمتِ بخير

صدى الصمت - عاشقة الورد - said...

حمدالله على سلامتك وحشتينى قوى ووحشيتنى كتاباتك الرائعة المتميزة
معلش لازم تأجلى المشاريع شوية لحد ما خوخة تكبر وتشد حيلها
تحياتى

هبة النيـــــل said...

رووووووووووووووعة

بجد خفيفة الظل جدااااااااااااااااا

تسلم ايدك

ايه الدماغ العااالية دي :)

Unknown said...

:)
عجبني اوي البوست دة
خفيف كدة و بيغير المزاج :)
شكرا

سكسكة said...

وحشتييييييييييييييني قوي ياطهقانه
انا شامه ريحه نفسنه في الموضوع ماله الكوفي شوب زي الفل واحد حلق مشخلل وجلابيه مقلمه وتبقي المعنمه ثم ماله التريكو هو طهقان مش عجبه حاجه خالص كده عموما امرك لله ياطهوقتي خليكي في امهات الكتب يمكن نعجب
و عجبي ...........
سكسكه

He and She said...

Ento feen men zaman ya gama3ah

خالتى بمبة said...

هههههههههه طهقان ده مش شايف قليل منك يا طهقانة ايه ماسورة المشاريع اللى اتفتحت في دماغك دى عموما حلو الفروزن خضار دي اهى يوم مايخسر هناكله وخصوصا ان الدايت مهستكنا اليومين دول اما الكوفي شوب فانا شايفة انك كده بتخبطي في الحلل مع واحده حبيبتنا

Anonymous said...

ههههههههههههههه

مشكلتنا بجد اننا بنخاف نجرب الحاجات الجديدة وبنبص للجانب الوحش

بس حلو مشروع فرزرة الخضار ده أول مرة اسمع عنه

مدونتك جميلة يا بستوكة

------------
ده ردا على تعليقك عندي

#####
bastokka طهقانة
#####

بصي يا بستوكه ( جامد اوي الاسم على فكره ) الثيم مجاني انا كنت منزله من زمان أوي

بس هم دلوقتي عملوا عليه شوية تعديلات
فيه لو حابه تنزليه من اللينك ده
http://www.notepadchaos.com/

لو مش عاجبك الديزاين الجديد وعايزة تنزلي زي اللى موجود عندي دلوقتي دوري عليه بالاسم ده
Notepad Chaos

ولو قابلتك أي مشكلة أنا تحت أمرك

نورتي البتــاعة :)

Maha Shahen said...

هو انا مستغربه قبل ما اعلق علي الموضوع
هو ليه انا مش قادره اشوف الموضوع الجديد
كل ما ادخل الاقى نفس البوست وما صدقت اتغير الاقى مش لاقيه الجديد
دا انا حصلى حاجه ولا البلوجر بيخرف ولا العيب فى مين بالظبط افتينى

مدونتك هايله وطريقتك جميله فى الكتابه
والموضوع اللي اتكلمتى فيه جميل كفكره انك خلتيه يعترف بالحقيقه فى الاخر
طبعا القعده فى البيت مع الاولاد بالدنيا
اهو علي الاقل نشوفك احنا كتير

Tamer Nabil Moussa said...

حمد الله على السلامة


بس طهقان عندة حق

تحيز بقى هههههه

مع خالص تحياتى