ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

وسع للساطور



اني أرى رؤوسا قد اينعت، و حان قطفها

طبعا كلكم ملاحظين اني رجعت الساطور في المدونة، و ده ان دل على شئ فانما يدل على ميول دموية ،و تعطش لاراقة الدماء، و ظهور مرتقب على صفحات الحوادث في الجرايد الالكترونية.

الخبر: مدونة تقتل زوجها بعد ما قفشته في احدى غرف الفنادق مع الموكوسة في أوضاع مخلله بالهباب

و اللي شاغلني دلوقت أذبح و اعلق و اشفي و اعبي في أكياس و لا أوفر مجهودي و اذبح و ارمي من البلاكونة على طول

و لا الدبح بقى موضه قديمة؟ و الافضل اني اكهربه و ادعي انه كان بيلعب مع الفيشة و السلك العريان مسكه



و تبدا الحكاية اعزائي البلوجرية ..عندما كنت اتمشى في شوارع المحروسة، و لمحت عربية راكنة شكلها مش غريب عليا، و لما قربت و تمعنت النظر فيها لقيتها عربية سي المحروس جوزي طهقان افندي الهمام

غريبة هو مش طهقان في الشغل؟ اية جاب عربيته هنا الساعة دي؟

و لما بصيت حوليا ،لقيت فندق 3 نجوم انما مش قد كده ،و محل احذية و مخزن، طبعا اكيد طهقان مش مريح في المخزن ،و ببصة سريعة عرفت انه مش بيشتري مركب.. اقصد جزمة مقاس 45 جديدة بمجدافين

يبقى فين.. فين؟


اكيد في الفندق

و في أقل من ضغطة زر دخلت الفندق و بحلقت بعنيا يمين و شمال و انا زي القطة الوالدة اللي بتجري ورا عيالها ، وعندها استعداد تهبش اللي يقف قصادها

و كانت الطامة الكبرى

البيه الهمام طهقان افندي طالع من احد الغرف

و لقاني واقفة قدامه فاتحة بقى و مبرقة و باخد شهيق مش ناوي يطلع زفير ده حيطلع بركان و حمم و ممكن اعمله تسونامي يغير خريطة وشه و اللي يشوفه رايح يفتكره جاي

طهقانة:سيادتك بتعمل اية هنا يا بيه؟

طهقان:ابدا ..لقيت روحي فاضي،قلت اتسلى

طهقانة:نعم؟ تتسلى !!و ليك عين تقولها قدامي

طهقان:اية يا بنتي فيها اية؟ لقيت روحي قدامي ساعتين على الاجتماع قلت اريح حبة

طهقانة:و ريحت؟ يا سبعي

طهقان:اهو مش بطال.. هي الحكاية كلها لعب عيال بس ماشي الحال

طهقانة:لعب بديلك تقصد !

طهقان:ههههه يا شيخة

طهقانة: هو مش الفندق ده بتاع البت بندقة اللي عاملة مدونة مقلة لب؟

طهقان:باين كده.. انا مش باخد بالي من الاسماء

طهقانة:ايوة صحيح مش بتفرق الاسماء و كنت بتعمل اية في الاوضة دي يا سبعي؟

طهقان: كنت بتفرج بس

طهقانة: يا صلاة النبي ..و اتفرجت؟

طهقان: ايوة بس ماعجبتنيش

طهقانة: زعلتني ،و ليه بقى ان شاء الله

طهقان: اصلها خنيقة و هايفة

طهقانة: هي ايه دي؟




طهقان: لعبة هوتيل سيتي دي يا بنتي دي فارم فيل برقبتها

طهقانة: اه افتكرت ...طيب الحمد لله انها ماعجبتكش



اه طبعا امال انتم فاكرين اية؟ احنا معندناش رجالة تلعب بدليها

يلعب في الفيس بوك اوك انما في الريال لايف ابدا لا ممكن

دي حاجة تطهق بجد


اوروفوار

إمضاء



20 comments:

Maha Shahen said...

هههههههههههههه
كدا برضو تخلى افكارنا الوحشه تتنطط قدام عنينا ونظلمه
طيب نزلى السطور بقى للسلاح يطول
الطيب احسن وبلاش نعور بعضنا

خالتى بمبة said...

هههههههههههه ظلمتى طوطو يا طهقانة بس خلى بالك هم بيهوشو كده مرة ولا اتنين وبعدين يدونا بالقاضية خلى الساطور صاحي قصدى جاهز تحسبا لاي ظروف وكمان خليكى كاتمة الشهيق يمكن نحتاج تسونامي في اى وقت بوست تحفة بجد تسلم ايديكى

يا مراكبي said...

ما فيش فايدة فيكي أبدا

إن بعض الظن إثم

يا عيني عليك يا طهقان ياخويا .. دايما مظلوم وليك الجنة بجد

ahmed_k said...

ههههه طب الحمد لله إنها جات على أد كده سلامات
بس هو اللعب مينفعش غير في فندق ؟؟

Dr-Ibrahim said...

هما الستات كده بيظنوا وحش علطول:)

صمت المشاعر said...

هههههههههههههههه وانا اللي بقول

ان بعض الظن اثم

رجعي بقي الساطور تاني لوقت عوزه

مدونتك لذيذه

دمتي بالف خير

سمكه واحده said...

ياشيخه خضتيني
انا قلت اخيرا
هاااا وبعدين طب ومالو هاا
ايه ها ياله وجووووون
بس طلع اوت
ان بعض الظن اثم
اهو احنا كده ياستات
مفيش فايده فينا
تصبحي علي خير ياجميل
واقفلوا بقي الفيس بوك اللي هوس مصر كلها ده

تحياتي

Anonymous said...

ههههههههههههههه
تعيشي وتاخدي غيرها
حطي بقي عينك في وسط راسك
وخلي الساطور دايما معاكي لوقت عوزه تحتاجيه متلقهوش
تحياتي

shimaa elkholy said...

هههههههههههههههههههههه
انتى عسل يا طهقانه

سكسكة said...

ازيك ياقمر
تجنني برضه انا قلت اللي متجوز طهقانه مش ممكن ولا يمكن ابدا يعمل حركات نص كم دي طهقانه علي سن ورمح ياجدعان

just dream said...

هههههههههههه ايه ياسكوتايه وانا اللى كنت هصدق خلاص اصل بعيد عنك ياحبيبتى الازواج الايام مش طبيعين بقى يتخاف عليهم من الجواسيس ههههه
ربنا يحميكم وتقبلى زيارتى الاولى لمدونتك اللذيذه دى

Anonymous said...

ههههههههههههههههه

طب كويس جت سليمة

:D

دنيا....او حياة said...

رهييييبة ههههههه بجد رهيبة
اسلوبك جامد جدا يارب تمتعي الناس كده على طول ..

راء said...

ههههههههههه..

ظلمتي الراجل..لا لا لا بجد انتي مفترية مش طهقانة

وانا مقهورة اهلا وسهلا تشرفنا ^_^

ايه الاسامي ديه ياربي ديه تجيب الضغط

اسلوبك ممتع بجد تسلم ايدك

ملحوظة: بالنسبة لطريقة القتل ف الحجات ديه بقت قديمة اوي اوي
واضح انك مش متابعة ..قوليلي وانا افطمك ع الجديد
(وش بيغمز وضحكة شريرة )

IBN BAHYA - إبــن بهيـــــــــــــة said...

تدويناتك حميله ونسمة رقيقة في صهد الغم اللي بنعيشه
ربنا يديم عليكم المسرات
تحياتي

Doba said...

الفيس بووك ده مش هيرجع غير لما يقضى على المصريين كلهم

دى حاجة بقت صعبة قوى
وادمان ف نفس ذات الوقت

يلا حصل خير
بالشفا

تحياتى
هبة

أع ـقل مـ ج ـنـونــة said...

هههههههه
وانا اللى دماغي راحت بعيد وال ايه كنت رايحة احضرلك الاكياس واجيبلك ساطور تاني اساعدك بيه :D

لا لازم تتصرفي مع البني ادم الطهقان دا :D

وبطلي طهقان بئة

بجد اسلوب جميل اوي

انا مبسوطة اوي ان انهاردة شوفت مدونات جديدة جميلة اوي كدا زي مدونتك

اتمني التواصل دااااااائما

Anonymous said...

والله وحياتك كل الرجالة عايزة الساطور
هههههههههه
ووسع للساطور... بس هو بيتمسك أزاى عشان عايزة اجربة
بوست يجنن بجد حلو أوى وخلتينى أضحك
تسلم أيدك
سررت بزيارتى لمدونتك وأحب انك تزورينى
دومتى بألف خير

همسات دافئه said...

يا شيخه فرحت وقلت خلاص افشتيه
وهو متلبس
هههههههههههههههههههههههههه
المره اللي جايه ركزي عليزين شغل بجد
حلوه اوي يا بسكوته

Unknown said...


thx

شركه تنظيف