ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

كلاكيت..خامس مرة


في سهرة صفا و دفا تحت البطانية و قدام التليفزيون و الست سومة بتغرد(كلموني تاني عنك..فكروني) و كباية الشاي بلبن و الكيك عاملين جو دافئ جميل، انتهزت الفرصة و قلت أمهد لطهقان الشارع و ارصف الرصفان و أشجر كام شجرة كده في شارع جوزانا المصون..و دار بنا الحوار التالي:

طهقانة:ياختي جماله حلو ..بص يا طهقان صورة النونو ده جميل ازاي ..يا حلاوته كدة و هو عامل زي كيلو الملبن بالمكسرات

طهقان:مكسرات؟؟ تقصدي تقولي بالمدشدشات ..هي دي عيال دي ؟ العيال اهيه نايمة جوة ، أربع عفاريت بيدشدشوا البيت كل يوم

طهقانة:لا يا طوطو..ده نونو صغنون في البيت كده يعمل حس و يتنطط و الرايح و الجاي يلاعبه و يبوسه ..شكل تاني برضه

طهقان:ايوة فعلا شكل تاني..اهو ده الشكل اللي أنا اعرفه

طهقانة:ههههه ..طيب و الله عسول برضه ..كل البيبيهات امورة و هي نونو كده

طهقان:امورة اية و نيلة اية.. انتي ناسية الواد طهقان الصغير لما كان نونو كان بيسهرنا للصبح احنا و الجيران و طول الليل يأوأ و يخليني اروح الشغل عامل زي الصرصار اللي بايت في علبة بودرة صراصير

طهقانة:أصل أنا كنت وقتها صغيرة و مش فهماله ،و لما بيعيط بقعد اعيط جنبه ، بس دلوقتي خلاص بقيت مخضرمة

طهقان:و لا البت (طهقانة الصغيرة) كانت عضوة في الفريق السوبرانوا بتاع الأوبرا و هي لسة في اللفة، و كان صوتها يصحي الميت

طهقانة:(طهقانة الصغيرة) !!..دي كانت قمر و هي صغيرة ،يا سلام كده على حتة كتكوت صغنن يملى علينا البيت فرحة و سرور

طهقان: تقصدي ديناصور يملى البيت بامبرز و سيريلاك و كع يا أبو الطهقانيين، و شوية و الديناصور يكبر و عايز يدخل المدرسة و اجري يا ابو الطهقانين، و الديناصور عيان و عايز دكتور و الحق يا ابو الطهقانين ، لما ابو الطهقانيين خلاص جاب زيت وموتوره فوت.

طهقانة:يا سلام عليك يا طهقان ..دي حتى العيال بتيجي برزقها ، على الأقل تلاقي حد يحبك ويحن عليك لما تكبر

طهقان: من الحب ما قتل ...و بعدين يا اختي .. انت خسرانة حاجة!! ما انتي بتخلفي و انا اللي بتربط في الساقية

طهقانة:ساقية اية بس يا طوطو !!..ده حتى الأب بيفرح اكتر من الأم بالنونو الجديد ،و بيحس انه لسة شباب منتج فعال في المجتمع ،و انه مسلمش النمر و اتسحبت رخصه في الحياة.

طهقان: لا أنا عايز تتسحب رخصي و اخد غرامة و عنديش مانع يسحبوا العدة كمان..

قال يفرح... قال... فاكرة الواد (طهقان الثالث) لما فتح درفة المطبخ و احنا نايمين ومسك قزايز الزيت و أكياس الدقيق و عمل لوحة تشكيلية على بلاط المطبخ ..فاكرة يومها أنا كنت حموت من الغيظ ازاي!؟

و لا الواد (طهقان الرابع) لما وقع اتعور ساعة الفطار في رمضان و بقيت بجري بيه على المستشفيات مش لاقي حد يخيطه

طهقانة:بكرة أفكرك.. لما حتبقى مزقطط من الفرحة

طهقان:بكرة اية؟؟؟ حبقى مين؟؟

طهقانة: الله..هو أنا مقلتلكش؟

طهقان: أنا شامم ريحة شياط... قولتيلي اية؟؟

طهقانة: (ابتسامة ساحرة)مش أنا ...... حامل في الرابع و حكملك الطهقانين خمسة !!

طهقان: اية؟؟؟؟؟؟؟؟؟ مين؟؟؟؟؟؟؟؟ امتى؟؟؟؟؟ ازاي؟؟؟؟؟؟

طهقانة: شفت؟؟ حتموت من الفرحة ازاي!!

طهقان: عااااااااااااااااااااا(برطمة كتيرة.. الرقابة خذفتها)

طهقانة: ده بدل ما تقولي مبروك يا حبيبتي.. نفسك في اية اجيبهولك؟؟؟و أوعي تشيلي تقيل و ارتاحي في السرير... زي ما بشوف في الأفلام؟

دي حاجة تطهق بجد


اوروفوار

امضاء



during pregnancy

57 comments:

عاشقه وغلبانه said...

ماشاء الله
بجد فرحانالك جدا جدا جدا
ربنا يرزقك باللي في نفسك وتقومي بالسلامه
يتربي في عز مملكه الطهاقنين

عاشقه وغلبانه said...

بس سؤال..
انتي جايه تقولي لجوزك في الرابع ياطهقانه
4 شهور مالحظش
غريبه دي

bastokka طهقانة said...

ههههههه و الله ده اللي حصل انا نفسي ملاحظتش
الله يبارك فيكي
:))
اوروفوار

Anonymous said...

هههههههههههههههههههه

كل ده حصل بجد الله يكون فى عون طهقان

ههههههههههههههههه

ومليييييييييييييييييييييون مبروك لو الكلام ده بصح يعنى

تحياتى

Ahmed said...

الله يكون في عونك ياطهقان
هو أنت هتلاحق على مين ولا مين

ألف مبروك يافندم
بس الله يكرمك خلي بالك على الغلبان اللي مربوط في الساقيه ده

Unknown said...

ربنا يتملك على خير يارب
مودتي
مبوووووك

мσнη∂ιš said...

ألف مبروك يا طهقانة، نفسك ف إيه أحيبهولك؟؟؟

يا مراكبي said...

ههههههه

مبروك

عقبال السادس كمان .. لازم تجيبي حد يلعب مع الخامس بقى

Mafrousa said...

هههههههههههههههههههه
انتى مشكلة كبيرة بطريقتك ديه
اولا الف الف الف الف الف
مبروك
ربنا يعينك على حسن تربيتهم يارب
و ربنا يهديلك طهقان علشان مش يطهق منك انتى و العيال
ههههههههههههههههههه
مبروك يا حبيبتى الف مبروك يارب
يتربوا فى عزك و عز ابوهم


بس طهقانة انتى عارفه اسلوبك البارد ده مع جوزك
هههههههههههههههههههه
يفرس
ههههههههههههههه

''' ''' ''' ''' '''
(*!*) (*!*) (*!*) (*!*) (*!*)
\*/ \*/ \./ \ٌ/ \×/

Che said...

الف الف مبروك
بس انتى مش شايفه انك كده منتى عامله كمين و مستنيه يقع فيه
ربنا يتملك على خير

مهرة سالم said...

السلام عليكم...
ألف مبروك يا حبيبتي والله يتمملك على خير وتقومي بالسلامه
وتجبيلنا طهقون أو طهقونه صغنن كده نبوسه ونلعب بيه..
........
هو دي الوقت طهقان بس أما يشوف البيبي حيبقى فرحان أفندي...
........
بالرابع إيه يا بسكوته
كل ده ومش كنتي تحسي..
...........
دمتي بخير

mohra said...

الف الف مبرووووووووووووووك
يلا شدى حيلك و خليهم 5 فى عين العدو و فى عين طهقان

حاجات جوايا said...

ههههههههههه
ماشاء الله
الف الف مبروك يا طهقانة
كده صدمتى طهقان
كنت هموت من الضحك هههههههههههههه

بس كده شهور الوحم عدت .. مش هتعرفى تقوليله نفسى فى حاجة هههههههه

ربنا يتمم لك على خير يارب ويرزقك صلاح اولادك وبرهم

الف مبروك يا جميل
وعقبال كلاكيت سادس مرة ان شاء الله

سالى

Ahmed Mubarak said...

الف الف الف مبروووووووووك

بجد اتبسطت ليكي اوي يا بستوكه
وعقبالنا كده لما نتجوز ونجيب ديناصوؤات صغيره

تحياتي

koukawy said...

مبروك و عقبال متكمليهم 11
و تعملي فريق كوره ينافس الأهلي

يتربي في عزك

صدى الصمت - عاشقة الورد - said...

والله أنا مش عارفة انتى بتتكلمى بجد وله بتهزرى لكن لوجد بيقى ألف مبروك وربنا يقومك بالسلامة وتشوفيهم عرسان وعرايس

dido said...

السلام عليكم
هههههههههههههههههههههههههههه
طهقانه انتي حته سكر والله وهتجيبي حته سكر زيك ان شاء الله ربنا يديكي الصحه ويقومك بالف سلامه ويصبر ابو الطهقانين هههههههههههههههه

t3ban said...

مبرووووووووووك
مشاء الله
بس مش كثير
مبتشوفوش ماما كريمة

Empress appy said...

الف مبروك بس حلو التمهيد اهو يا حبيبتى يعنى مجتش له صدمه مفاجاه ربنا يخليهم لكى يا رب

bastokka طهقانة said...

الله يبارك فيكم متشكرة قوي على دعواتكم الرقيقة و ربنا يتقبل دعائكم
ايوة شدوا حيلكم معايا في الدعاء لحسن الصحة مش ولابد الحمد لله

الموضوع ده بجد فعلا يعني تدوينة من واكع الحياة
هههههههه
ربنا يفرجها علينا و على اهل غزة و ينجينا و ينجيهم و يهد اللي في بالنا و اسرائيل
اوروفوار

آه وكفى said...

مبرووووووووووك

ممكن اخده اربيه لحد مايبئى عنده 9شهور واديهولك تاني اصل انا بحبهم وهما نونات بس

وميض ابتسامة said...

العزيزة طهقانة

بصرف النظر عن ان كان ماقلت دعابة اوحقيقة (مبروك) فأنا مبهور بذكاء وطرافة الحوار الذى قاد المسكين طهقان الى النهاية السعيدة
بس والله شوية صور عسل ولكن انا صعبان علية الاخ طهقان .. ممكن اعرف هو لسة فى البيت ولا هاجر.. مجرد سؤال؟

زمن الشيكابالالالا said...

إن شاء الله ربنا هيديكى توأم عشان يبقى جوزك ضرب الرقم القياسى فى التحمل بين الأزواج وكمان تعملى فريق كورة ينصفنا فى كأس العالم
ههههههههههههه
ألف مبروك

شهد الكلمات said...

لولولولولولولولووييييييييييييييييي

مبروك با طوطو و الله فرحتلك ربنا يتمم لك على خير و يبارك لك فيهم و ربنا يعين السيد طهقان ههههههههههه

اسفة على عدم المتابعة الفترة اللي فاتت اصلي مشغولة في جواز اختي عقبال كدة ما تفرحنا زيك بطهقان صغنون

مبروك يا جميلة

تحياتي

صبرني يارب said...

مش فاهمالك يا طهقانه وانتى مش بتردي عليا

هو بصحيح البوستات دي ولا ايه

عموما لو انتى حامل مبروووووك

انا عندي الوضع بالعكس تماااااااما
جوزي الى عايزنى اخلف وانا مش راضيه
او مش قادره اخوض التجربه دي من جديد

ودايما اقوله لما تبقىتفضى تربي ال 3 الى جبتهم ابقى هات غيرهم يا حلو

وساعات تانيه اقوله مااااااشي بس قبل مااحمل عايزه شغاله وعربيه
مبرووووووووووك

موناليزا said...

ربنا يكملك على خير ياحبيبتى وتقومى بالسلامة

Unknown said...

مبروووووووووووووووك
طيب المره دي بقى سميه لمض
او لماضة يا طهقانتي
ربنا يارب يقومك بالف سلامه ويتربى في عزك يا طهقان افندي
طيب انا كده هفكر اتخصص اطفال فعلا
هكسب من وراكم دهب
هههههه
بعد الشر على الكتاكيت يارب
ويقومك بالسلامه يا جميله
لو الكلام ده بجد

دينا حامد said...

الف مبروك
ربنا يقومك بالسلامة يارب
ويبقى هو او هي سبب ان اسم طهقان يتغير لروقان


تحياتي

الفراشة الصغيرة said...

ههههههههههههههههه
مبرووووووووك يا طهقانه
بس كده مش هتعملى ازمه سكانيه
ربنا يكون فى عونك يا طهقان

سحلوب الكُـشُـكْ said...

بسم الله ما شاء الله
ألف مبروك يا بستوكة هانم
و ربنا يكون في عون طهقان أفندي
بإذن الله يبقوا تؤام كده و تفرحي بيهم
أو 3 توائم
أو أربعة
ماتعرفيش
ده ربنا فضله واسع
:-)
ربنا يدّيكي الصحة و تقومي بالسلامة

السلام عليكم

yoyo said...

طيب الحمد لله ان فى اولى زيارة ليا لمدونتك يبقى فى خبر حلو اوى كدا
الف مليون مبروك وان شاء الله ربنا يتم عليكى بالف مليون خير

تحياتى
يويو

بنت الغربة said...

الف مليون مبروووك ياطهقانه
والله فرحتلك قوى
انا عندى تلاته ونفسى اجيب الرابع بس الباشا مش راضى بتاتا البته
قولت اعملها من وراه بس برضه ربنا مارادش
لكن الحمد لله ربنا يخليلى العيال
تحياتى ليك وربنا يقومك بالسلامه
ويعينك عليهم يارب

إيثار said...

لا يا طهقانة
كده كتير
ده طهقان
زمانه بيشد في يشعرو

لازم نراعي مشاعره بردو

عموما الف مبروك
عقبال السادس

Anonymous said...

هيييييييييييييه
يعنى انا لما اجى الاقى الخبر الحلو ده
:))))))
انا مبسووووووووطه او عشانك يا بستوكه
بجد الف الف الف مبروووووووووووك
ويتربى فى عزكو كده انشاءالله

سلامى ليكى الجامد اوى
:))

أحمد (زوج مخنوق ). said...

طهقان: لا أنا عايز تتسحب رخصي و اخد غرامة و عنديش مانع يسحبوا العدة كمان.

هههههههههههههههههههههههههههه

موتتني من الضحك بجد
الراجل موافق على اي عواقب بس ما يبقاش فيه انزر طهقان

ربنا يقومك بالسلامةو و يرزقكم برزقهم يا رب

تحياتي ليكي و قلبي مع طهقان

الملاك الحزين said...

بجد الف الف الف مبروووووووووووك
ربنا يكملك على خير ياحبيبتى وتقومى بالسلامة
الله يكون في عونك ياطهقان
تحياتى

م/ الحسيني لزومي said...

هل انتهت الحرب علي فلسطين؟
هل انتهي التأمرالرسمي العربي والدولي علي المقاومة؟
كيف نفعل روح المقاومة المدنية بيننا؟
كيف نطور الهبة الشعبية العربية والاسلامية لصالح القضية الفلسطينية ؟
شارك معنا بافكارك واطروحاتك
حتي لايكون جهدنا قبض الريح
مدونة مواطنون ضد الشعب
نحن في انتظارك

Wish I were a Butterfly ... said...

دمك خفيف أوي
:)

و الصور اللي بتختاريها في مدونتك كمان لذيذة أوي

ألف مبروك. ربنا يباركلك في كل أولادك يارب
بس خلي بالك من طهقان

تحياتي

Anonymous said...

mabroul el babe el geded o rabena yekremo o yerzo2ko b rez2o
salamo 3alekom

son's egypt said...

السلام عليكم
الف مبروك
وربنا يبارك ليكي فيه

Epitaph1987 said...

مبروك ربنا يكرمك بالذرية الصالحة ان شاء الله
وطهقان المفروش ميطهقش الصراحة :)

Anonymous said...

صباح الفل
ازيك ياطقوتي ياللي دايما مفاجانا كدة بحاجات غريبة كنت فاكرة ان الطقانين كدة وبس لكن ربنا يزيد ويبارك ويرزقك برزقهم ويعين طهقان عليكي وعليهم الراجل دة صعبان علية دايما باحس انة بيتعرض لمؤامرة شوفي حتي وانتي بتقوليلة علي عملتك وديتية وجبتية وفي الاخر ياعيني صدمتية يالة ماحدش بياخد اكتر من نصيبة بس سيبك انتي انا نفسي موووووووووت اشيل طؤق طؤق الصغير ربنا يسعدة
خالتو سكسكة

القلم السكندري said...

منذ زمن وأنا أفتقد الكلمة الساخرة ..



مبروك إن كان بصحيح

وكان الله في عون طهقان



تقبلي تحياتي

حواء said...

السلام عليكم
ازيك ياطهقانه
والف الف مبروك
ويارب تقومي بالسلامه
وتيجي بنوته زي القمر اصلي بحب البنات اوي

mohamed said...

أبتسامه وضحكه وقهقه من القلب
أما الاستفاده فهى أن أخى طهقان
هو الذى أنعم الله عليه بزوجه عبقريه مثلك وليس أنا , والا لكنت مع قدرتك الفائقه على الاقناع وأسلوبك التفاوضى المتميز قد رفعت الرايه البيضاء
ملحوظه
أرجو أن تعلمى المفاوضين العرب كيفية التفاوض بدل من الخيبه التى يحملوها على أكتافهم لآنهم لو كانوا مثلك
أوكد لك كنا وصلنا الى القمر وما بعده
مبرو ك
مبرو ك
مبرو ك

Anonymous said...

Alf Alf Mabrouk
Rabena yetamem be7'air
I really liked your way in telling your husband
and I really envy you for being bold and becoming pregnant for the the 5th time.
I really like you and your way and I wish I have the ability to do so
I have been married for a year now and I'm scared to even have one baby, actually scared to death and keep on postponing this issue.
Allah be with you :)

علي جاد said...

.. سلام
والله ما عارف اقولك ايه يا شيخةايه ده
المدونة بتاعتك ملهاش حل ليها بس سؤال انت عملتيها إزاااااى
على العموم بلاش أنكدعليكى فى بداية المعرفة بع
دين نبقى نتفاهم لما تقومى بالسلامة
وتجيبى "طوطو"صغير
سلام

محاولات مخنوقة said...

الف الف مبروك يا طهقانة
ويتربي في عزك انتى وطهقان
ورينا يقومك بالسلامة ويرزقم ببيبي امور

hasona said...

الف مبروك
والف الف مبروك لطهقان ( جالك ولد ))هههههه
والله يكون في عونه
كل ثلاث سنين تكرري وتقرري انك تفرحيه كده
،،،
ومعني كده انك ستأخذي أجازة وضع وتخلعي من التدوين شوية
،،،
طيب ويوميات البيبي ( الطهقان الاصغر) مين اللي هيكتبها بقي

،،

تحياتي

عابرة السبيل said...

الف مبروك يا طهقانة وربنا يتمم على خير ويجى ينور الدنيا

يا ستى احمدى ربنا انه عمل كده فى الرابع

انا بعلى اول ما عرف تنح وسكت سكوتا رهيبا-رغم ان ده اول حمل الحمد لله - وبعدين ولا قال مبروك ولا حاجة بس بعديها بشوية لما استسلم للامر الواقع بدا يبان عليه الفرحة
كلهم بيخافو من المسؤلية

بس برضه مبروك
وخدى بالك من نفسك وما تشيليش حاجة تقيلة

قيس بن الملووووح said...

عندما يمضي بنا قطار العمر تسقط منا الكثير من التفاصيل الصغيرة التي قد تحول حياتنا الي براكين في الوقت التي لا تتحمل فيه الهزات البسيطة"

شبــ اون لاين ـــاب said...

♥♫Happy♫ ♥ ♫ ♥♫ VaLnTiNe♫ ♥♫ ♥♫ DaY♫ ♥ ♥ ♥ ☺ √♫

المـــفـــــــقــــــــوعـــــة مــرارتـهــا said...

ياعيني عليكي ياطهقانة
ربنا يقومك بالسلامة ياختي
ماتشيليش حاجة تقيلة ونامي كويس المهم صحتك تبقي تمام ياختي

Unknown said...

ربنا معاكى ومع طهقان بجد صعبان عليا بس يلا بقى لازم يتحمل مش هو رب الاسرة
مبروك

bastokka طهقانة said...

الله يبارك فيكم كلكم
اعتذر عن التاخير في الرد نظرا لبئر النوم اللي واقعه فيه من ساعة ما عرفت اني حامل بنام نوم الفيل
تقريبا عاملة بيات شتوي لحد الولادة
بس متقلقوش
البوست الطازة في السكة
خالص تحياتي
و
اوروفوار

Unknown said...

ألف مبروووووووووك ياقمر
ربنا يكملك علي خير ان شاء الله
ربنا يخلهولكم هو واخواته يارب

عاشقة الشهاده. said...

يعنى هو ينفع كدا يا جماعه
يرضيكو يعنى
ههههههههههههههههههههههه
اول زياره اتبدهل وانا داخله
كل ما انزل صوره تحت تخوفنى عن اللى قبلها


عموما ياستى طهقانه بلاش بس زعل كتير


ربنا يوفقكك للى فيه الخير

ويكرمك يارب

تحياتى:عاشقة الشهاده.