ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

الحلة عالبابور..عشي عيالك





لاحظت في الفترة الأخيرة ان طهقان شعره بقى يقع كتير قوي ، في الأول قلت يمكن من الشتا و الجفاف و بعدين حسيت إن الموضوع بقى كونفدنسيد على الآخر و بقى عامله أزمة نفساوية عميكة فكان لازم أتدخل

أمال؟!! هي الست ليها مين غير جوزها.. و شعره

طهقانة:مالك يا طهقان متضايق ليه ؟و عمال تنفخ 5 نفخات في الدقيقة ؟

طهقان:انتي يعني عدتيهم يا مدام ريختر؟

طهقانة:ايون طبعا امال اية؟ هو أنا ليا مين غيرك

طهقان:الوصفة المنيلة اللي عملتيهالي أمبارح من موقع فلنكات بتاعك ده.. فضحتني النهاردة في الشغل

طهقانة:أولا ..اسمه موقع فتكات و بعدين دي وصفة متجربة لعلاج تساقط الشعر و حتجيب نتائج مزهلة، بس لازم تكررها مرتين في الأسبوع

طهقان:أكررها؟؟ ده على جثتي، أنا مش عارف أصلا طاوعتك أزاي !! في واحد عاقل يحط على راسه زيت زيتون مخلوط بالثوم ؟؟ده أنا كان فاضلي عصره ليمون و ابقى صوص سلطة محصلتش

ده كل زمايلي بقوا يقولوا اية الريحة التقلية دي!! و أنا قاعد في نص هدومي

طهقانة:ليه هو مش أنت غسلته بالشامبو الصبح كويس؟

طهقان:غسيل اية هو ده يحوق معاه غسيل؟؟ دي ريحة الثوم كانت مفحفحة و لا الزيت!! كأني بايت في قرطاس بطاطس محمرة

طهقانة:ما انا قلتلك ..خلينا على وصفة النسكافيه ريحتها مقبولة و بتجيب نتايج هايلة!

طهقان:تقصدي تقولي لبخة النسكافية!!! ...ده أنا يومها كل اللي يسلم عليا يقولي أنت ضارب نسكافية في العضل و لا أية؟

طهقانة:ده بحث ألماني بيؤكد إن الكافيين اللي في النسكافية بيقوي الشعر و يمنع تساقطه.. اعترض عليه بقى

طهقان:و مقالوش بقى نسكافية عادي و لا 3 في واحد؟

طهقانة:خليك كده أفضل أتريق... و أنا عمالة اقدح زناد فكري علشان الاقيلك حل لمشكلتك

طهقان:ما كله بسببك.. هو أنا لولا بشد في شعري منك مكنتش اقرعيت

طهقانة:نعم يا خويا؟؟ انت شعرك بيقع من تلوث البيئة و الدخان اللي إحنا فيه مش مني أنا!! ده أنا بلسم

طهقان:و أنت الصادقة... أنا شعري بيقع من الزمن

طهقانة:طيب يا حبيبي ما دام أنت عارف كده ..ما تبقاش تحلق عنده تاني ..نياهياهاهاهاي

(مخدة طائرة تستقر في دماغي) غير معلومة المصدر قد تكون نيران صديقة



و ماسكتش ..فضلت اعمل سيرش على النت على كل الحاجات اللي بتساعد على عدم تساقط الشعر و اعملها لطهقان، و هو مش مقدر مجهوداتي للمحافظة على عدم التصحر اللي هجم على رأسه

طهقان:اية ده يا طهقانة؟ النهاردة سبانخ!! و أمبارح ملوخية!! و أول أمبارح كبدة؟ انت شغالة في الغوامق ليه؟

طهقانة:اصلي قريت ان نقص الحديد بيسقط الشعر يا طوطو فقلت لازم أسلحك بكام سيخ حديد علشان نسيطر على المشكلة

طهقان:مش كفاية زيت الزنك اللي شربتهولي و عاملي إسهال أمبارح؟!

طهقانة:ما هو اصلي قريت إن الزنك عنصر هام جداً في نمو وقوة الشعر

طهقان:مش كنت اتجوزت واحدة جاهلة..لا تقرا و لا تجرب فيا!!.. أنا استويت الصراحة

طهقانة:بس تعرف في حل كويس لسة مجربناهوش ...بيقولوا إن التنويم المغناطيسي يساعد في علاج الصلع

طهقان:ما تعمليلي عمل احسن!! و تعلقيلي حجاب ضد التساقط و تحطيلي جزمة عيل صغير و تكتبي على ضهري (إن كان الشعر عزيز ما كنش طلع لعبد العزيز)

طهقانة:أقولك أية...العمل عمل ربنا


و نزلت اعمل شوبينج و ليقت حاجة كويسة قوي ترفع من روح طهقان المعدنية و ترجعله ثقته في نفسه بعد ما راسه اصلعت و رغم اني غلبت اقوله اني بحبه رغم صلعه و ان اشهر نجوم الكورة في العالم صلع الا ان الحزن كان مسيطر عليه ، بس هو اللي متجوز ست انترستنج زيي يزعل ابدا..نيفر

طهقانة:جبتلك النهاردة هدية انما جنان من عند بازار ميشو يا طوطو.. بس على الله تعجبك.

طهقان:خير ..اللهم اجعله خير؟؟ جبتيلي زيت و لا سفوف و لا لبوس المرة دي؟

طهقانة:لا لا جبتلك حاجة على الموضة

طهقان:ايه ده؟ راس مين دي؟


طهقانة:دي مش راس حد يا حبيبي دي باروكة رجالي منها تدفيك في الشتا و تحوش عنك الشمس في الصيف و منها ترجعك شباب تاني

طهقان:باروكة.. أنا البس باروكة؟ و ماجبتليش فستان ليه بالمرة؟!!

طهقانة:يا سلام عليك يا طهقان... أنت على طول مكسر مقاديفي كده!!

طهقان:يا ستي أنا مبسوط إني اصلعيت.. و علشان تنبسطي أنا ححلق باقي شعري زلابطة خالص علشان أريحك

طهقانة: اهو أنت كده دايما كاسر خاطري و موقف المية في زوري ...و أنا أقول للناس أية لما يشوفوك أصلع زلابطة و لا زلاوزة كده؟؟

طهقان:قوليلهم طهقان غير اسمه و بقى (((صلعااااااااااان)))

طهقانة: كده؟؟ طيب ...الحلة على البابور عشي عيالك .. أنا رايحة بيت أبويا مش راجعالك

دي حاجة تطهق بجد

أوروفوار

إمضاء





during pregnancy

55 comments:

واحدة مفروسة said...

هههههههههههههههههههههههه
هههههههههههههههه
انا عملت وصفة خل التفاح مع الثوم ديه
ههههههههههههههههه
جوزى قالى يا مفروسة انا شامم ريحة غريبة
قلتله ما غريب الا الشيطان ريحة ايه
قالى ريحة وحشة حاجة كده زي الخل مع الثوم
انا بمنتهى الاستهبال قلتله يبقى نفسك فى الفتة يا حبيبي
قالى لأ بس بجد الريحة مش حلوة
و انا استهبلت على الآخر
المهم انا بقى علشان الخلطة تعمل مفعول جامد قلت انام بيها
نمت قبله
و عديكى لما جه ينام و الصريخ اللى سمعته فزعنى من احلاها نومة
خير فيه ايه بتزعق ليه
قالى ديه رحتك يا مفروسة
و انا بتناحة ريحة ايه بس نام نام
وده ابدا صحاني و مش سابنى غير لما قلتله انا حاطه لوسيون على شعري
و حياتك مانمت تاني الا لما خلانى ادخل اغسل النيلة اللى كنت عاملاها
هههههههههههههههه
رجالة تفرس
هههههههههههههههه

زوجه said...

ههههههههههههههههههههههههه
حلوه صلعان ديه
هههههههههههههههه
اخبار النونه الجديده ايه
بقيتي في الكام ياطهقانه
ربنا يعينك ياختشي

قيس بن الملووووح said...

بصراحه انا لم افهم حاجه من تعليقك عندي بكلمة "اورفوار"
قوام طهقتي مني

صبرني يارب said...

يا لهووووووووووووووووووووي

مالها يا اختي الصالعه ومالهم القرع

وبعدين باستغرب من الرجاله الى بتتعقد وتزعل انهم بيقرعوا دول

اذا كان احنا قربنا نقرع ولله الحمد

وبعدين مالهم القرع حلوين
والنبى حلوين ههههههههههههههههههه

بس شوفي بقى انا بقالي حوالي خمس ست سنين
من يوم ما سمعت البت اختي واصحابها فى فرح اختي التانيه بيغنوا الاغنيه بتاعة
الحله على ا لوبور عشي عيالك دي وانا معجبه بيييييييييها جداااااااااااااااااااا

ونفسي نفسي نفسي اقوله كده مره يا اختي
بس عندي مشكله مش قادره اعالجها

ان انا ساكنه فوق بابا

طبعا لو روحت بيت ابويها هايزقلي العيال من فوق

ولو روحت اي مكان تااااااني هايزقل برضه العيال لامي

غلبانه الست ذنبها ايه

لا لا بس انا باقولها رايحه بيت ابويا وراجعااااااالك

اهااااااا مش هيصه اصل الرجاله ما بتصدق يا اختي


وسلميلى على صلعااااان
هههههههههههههه
وابقى طمنينا على صحتك وصحة البيبى يا جميل

أحلى حياة said...

السلام عليكم

ههههههههههههههههههههههههههههه
مسخره بجد ياطهقانه
مش ممكن اللي بتعملوه دا
دي مغامرات
اقل ما توصف بيه انها مغامراااااااااات
:D:D

تحياتي ليكي ولاستاذ طهقان الصلعان
:D
:)))

عاشقه وغلبانه said...

الصلع علينا حق

تساقط الشعر ده حاجه تطهق بجد
انا بيصعب عليا شعري وانا بسرحه والاقي بالخصل بتنزل منه
بس عادي اتعودت
اهئ اهئ

جربت بتاع الخل والثوم دي مره ( ايه الفته اللي انا فيها دي ) وفضلت اسبوع مابخرجش من البيت


بيقولوا الجاز بيجيب نتيجه مذهله وبينعم الشعر كمان
ههههههههههههههههههههه

اجرب وابقي اقولك يا اوختي


حلوه صوره نو الجنين اللي حطاها تحت البوست دي ربنا يرزقك طفل عشل كده شبهك او شبهي مش مشكله
ههههههههههههههههههههههه

الفراشة الصغيرة said...

هههههههههههههههه
بجد مشكله ن مشاكل الزمن يا طهقانه
مش عارفه اقولك ايه

نوري said...

لالالالالا
ده ايه الراجل ده فعلا
معقول مشعاجبه ريحه التوم
دي حتي تحفه قوي

البوست تحفه واحلى مافيه
الصور
نياهاهاهاهاها

المفروض بقي تعملي مدونه جديده
وتسميها طهقانه وصلعان
ولا ايه

بست وشز فور يو
اند فور صلعان

موناليزا said...

بدون زعل ياطهقانه
فكرة طهقان احسن ودى الموضة كمان

Eng. Ahmed Abo El-Ella said...

هههههه
زلاوزه
لا حول ولا قوة الا بالله

على فكره بأه, الصلع ده ذنبك انتي

ذنب طهفان هيفضل في رقبتك لحد لما شعره ينبت تاني

fashkool said...

طهقانه .. السلام عليكم
والله يا طهقانه انت حتطهقى الراجل من كتر الوصفات بتاعة تطليع الشعر
اسمعى يا طهقانه ......
الشعر اللى حيقع حيقع ولو جبتى له طاسة الخضه برضه حيقع .. ازاى
اصل الدم لما ما يوصلش لفروة الراس ما يلاقيش الشعر اكل عشان ياكل .. يعمل ايه ؟ يمـــــوت
وانا حاقول لك على الوصفه دى بجملة الوصفات .. هى يعنى وصفة فشكول اللى حتقف فى الظور....
شوفى يا ستى
بيقولوا عشان الشعر ما يقعش وعشان الشعر اللى وقع يطلع تانى يقوم الواحد يعمل ايه
.. مش هزار والله دى وصفه طبيه..ازاى
بيقولوا الواحد كل يوم يعمل وقوف على راسه .. يعنى يخلى راسه تحت ورجليه فوق لمدة ربع ساعه .. يقوم الدم يوصل لفروه الراس والشعر اللى وقع يطلع تانى .. اذا كان يقدر اوصفى له الوصفه دى ~.. وحتكون حلوه ان شاء الله
تحياتى

نهــــــــــار said...

السلام عليكم ..
هههههه
عسل إنتي وخلطاتك
بس مسكين فضحتيه فوسط صحابه
.......
طبعا لازم تعدي لجوزك أمل تخليه ينفخ وتعديلو عيب ماتكونيش الزوجه المثاليه..
........
مبروك عليكي صلعاااان أفندي
بس الستات محدش يعرف يرضيهم
باقى هو حيريك من الخلطات والبلاوي إلي بتصرفيها عشان خاطره
ويبقى كده مودرن وعامل تسريحة كل اللعيبه بيحلموا فيها..
تقومي سايباله البيت

.......
الله يتمملك حملك على خير
ويقومك بالسلامه

أحـــمد مبــارك said...

توم .. يا خبر ابيض .. يا لهوي
يا بنتي ومن الحب ما قتل ومن التوم ما عمى

ابقي حطيه ليه وهوا نايم
:)

MaNoOoSh said...

صحيح رجالة مالهاش فى الطيب ومش مقدرين الجهود النسائية والوصفات الثومية لعلاجهم وراحتهم
ههههههههههههههه
ربنا يكون فى عونك يا طهقان ياخويا
طهقانة شكلها كدة مش هتسيبك الا لما تطلعلك الشعر
هههههههههه

Ma 3lina said...

Hair Back plus !!

Howa dah el 7al ;))

esraa said...

هههههههههههه

لأ ياطوطا مالكيش حق
لازم تراعي الحاله النفسيه بتاعة الراجل بردو
لو مكنتيش انتي تقفي جنبه في الظروف دي وتستحمليه مين اللي يستحمله بس

عاشقه الرومانسيه said...

الله بجد المدونه دى تحفه
ودمك عسل
اول زياره ومش الاخيره باذن الله
تحياتى

صدى الصمت said...

ههههههه
وحشتبنى ووحشيتنى بوستاتك ال بتخلى الحياه أحلى
ربنا معاكى همة الرجالة دايماً كدة مايعجبهومش العجب مع إننا بنكون نيتنا خير وقصدنا نخدم
ههههههههه
تحياتى

يا مراكبي said...

البوست ده عن الصلع .. وفيه معلومات تفيدهم

لكن الموضوع ده ما يخصنيش ومش مفيد ليا طبعا

سكسكة said...

مش هاقول حاجة غير يمهل ولا يهمل واللة طهقان دة غلبان بس عارفة برضة عملالة سسبنس في حياتة كل يوم بريحة شكل دة شئ رائع ربنا يعينة الغلبان وفي الاخر تقوليلة الحلة عالبابور يالة قلتلك يمهل ولايهمل

نعكشة said...

وربنا انتي سكر

ربنا يعينك يا طهقان و يكرمك ا طهقانة
و هوه اصلا ميقدرش يعيش من غيرك
كملي انتي بس التجارب بتاعتك و ممكن واحدة فيهم تصيب
اومال اية
لازم الواحد يجرب كتير هيا عمرها بتيجي من مرة واحدة

بقولك اية بالنسبة لصلب الموضوع

انهم يقولون ان زيت الحية و مشتقاتها بتمنع تساقط الشعر

انا مجربتش صراحة بس صحبتي قالتلي انه حلو قوي في الموضوع دة

سلام عليكِ

بنت الغربة said...

انت زى العسل ياطهقانه
انا البوست بتاعى اللى قبل اللى فات كان عن موضوع الشعر اللى بيقع ده ...
والباشا جوزى جاب 10 مستحضرات من السوق علشان شعره يستقر فى مكانه ومايقعش
...بس فيه طريقه جديده بدل الباروكه
صاحب جوزى الانتيخ عملها....
وماقولكيش ..واو كبيرة قوى...
حاجه كميله خااااالص....هههههههههههههه
انا مش عارفه انتى مغلبه نفسك ليه بشعره اللى بيقع ....مايقع ..
ده حتى الرجاااله القرع فيهم ميزااات كتييرة قوى
1-وفر فى الشامبو
2-مافيش استخدام الفرشه ولا المشط
3-بينور فى الضلمه بدل السهرايه
4-ممكن تظبطى الطرحه على انعكاس صورتك على راسه بدل المرايه
4-مش هايقف كتيير قدام المرايه
5- وده الاهم ...مافيش واحده هتبصله
تحياتى ياعسل

Bondoka said...

ههههههههههههههه
معلش يا طهقانه انتى قلبك عليه وهو ولا هنا

معلش صلعان برضه مش وحشه
:)

ليلى فى عالم ادم said...

انا دايما بتعجبنى بوستاتك وبتابع مدونتك بانتظام


تحياتى ليكى وياريت تزورى مدونتى المتواضعة

funckydoctor said...

هههههه
الراجل ده صعب عليا
طب أنا شعرى بيقع أعمل ايه؟
أديها نسكافيه وبرادة حديد :D

fashkool said...

السلام عليكم طهقانه .. والله مش عارف الطهقانين كتروا ليه اليومين دول
تحياتى

ما ادوناش العشره جنيه واكلوها على وكان زمانى الوقت صاحب املاك وفدادين واملك اصله ما لحقش يدى حد حاجه جم الجماعه العسكر وبوظوا البلد خالص وبوظوا كل حاجه ومن يومها لحد الآن كل حاجه بايظه

تحياتى با بسكته

المتبهـدلـون فـي الأرض said...

والله وفــّر

أهوه طهقان الخامس عشر اللي جاي في السكة
مش حيحتاج مراجيح

أهوه يركب على الراس ويتزحلق

ومافيش أحلى من الطبيعي
,,ولو راس طهقان من النوع الثقيل
يبقى إخواته يركبوا معاه

:::
خللي العيال تنبسط وتستلذ

المتبهـدلـون فـي الأرض said...

نسيت
هيه هيه

أحجز التعليق ال27

,,
يادمااغي

koukawy said...

هدي اعصابك يس مش شوية شعر هيسيبوكي البيت مش كده
هههههههههه
ما بيعجبوش العجيب الحقيقي

تايه في وسط البلد said...

هو الموضوع مش موضوع الشعر

هو الموضوع عاوز بس نفس- بفتح النون والفاء!!!ه



اه بالمناسبة فيه كام فيلم وكام كتاب من اللي في البروفيل عاجبني قوي
مفيش منهم علي رجالي؟

تحياتي

mohra said...

المهم اللى فى الراس مش اللى فوقه
يا سلام على الحكم بتاعتى)..
سيبك انتى اجمل حاجه البيبى اللى تحت ربنا ينتعك بالسلامه

hasona said...

hhhhhh
ههههههههههه
يلا - هو اللي عمل في نفسه كده
بقي ولا فيران التجارب
دي عوامل التعرية بقي

الجواز و سنينه said...

هههههههههههههههههههههههههههههههه
يالهوى
الراجل بقى فله
هههههههههههههههههههه
ياترى مين السبب فى اللى وصله ده؟
الشعر بيقع كمان بسبب الظروف النفسيه و شكل طهقان شارب و لحيه كمان
ههههههههههههههههههههتحياتى يا سكر

jessy said...

حلو اوى اسلوبك يا طهقانة ودمك زى العسل

يارب دايما

Esraa Hamed said...

هههههههههههههههههههههههههههههه
هههههههههه

البوست تحححفة


بصي يا ستي دي دعوة مخصووووووص
اتمني ان تقبلبها لحضور توقيع أحيانا و احيانا
يوم الاربعاء القادم

11 مارس 2009
الساعة 7 مساءا
بمكتبة البلد أمام الجامعة الأمريكية
العمارة اللي فيها سيلانترو

http://www.facebook.com/event.php?eid=133120355079#/event.php?eid=133120355079


اتمني ان تشرفيني بالحضور
:)

محمد فوزي said...

بجد موضوع الصلع ده مش مهم خالص المهم الأخلاق والتربيه والسمعه الطيبه آه صحيح انا نسيت إنه جوزك أصلاً هههههههههه

لا بس بجد إستمتعت بالقرايه وإن شاء الله مش هتكون المره الأخيره
وعلى فكره بالنسبه لزيت الحيه فهو فعلا بيفيد في حالات التساقط وبدأت تنتشر المنتجات اللي بتحتوي عليه
إنما في حالات الصلع الوراثي
فمفيش حل وكل ما يستخدم هيكون وسيله لتأخير الصلع فقط لا غير

تحياتي

3abratalsabeel said...

ياختى كلهم كدا
ما بيعجيهمش العجب

ولايعرفوا مصلحتهم فين

حسن ارابيسك said...

الحقيقة اللبخة اللي انتي وصفتهالي صح
وفي كمان وصفة عصير الجرجير ومفيدة جداً
بس على فكرة موضوع الصلع ده مشكلته فقط في منطقة الشرق الأوسط فقط أما في أوربا فتلك الحالة لاتقلق الرجال هناك وليس لها اي تاثير نفسي على الرجل
تحياتي
حسن أرابيسك

خالتى بمبة said...

ههههههههههههههه بجد حلوة بس انتى مسمعتيش عن زيت الرنجة والفسيخ مع بعض بيطلعو الشعر اسرع يلا بقى انطلقى عايزاكى تنقعيه في الرنجة والفسيخ وفرصة اهو شم النسيم قرب ومتنسيش الطحينة والبصل وسلملي على صلعااااااااااااان هيبقى جربااااااااااان بعد كده

Anonymous said...
This comment has been removed by a blog administrator.
nana said...

مغامرة جديدة وجميلة

انت عارفة لسه في وصفات كتيرة ما عملتيهاش ابقي كملي تجارب علشان طقهان يبقى بجد صلعان

الظاهر بوصفاتك ده هي حتكمل صلع


ههههههه
تحياتي

بانتظار الجديد

Anonymous said...

http://kharabeshsister.blogspot.com/

Esraa Hamed said...

3 اسابيع تأخير
بنفع كده
:))


في انتظار جديدك يا قمر

سجل المزورين said...

سجل المزورين
شباب مصر الأوفياء
أمل الحرية وبناة المستقبل
ندعوكم للمشاركة معنا في
التحالف الوطني ضد التزوير
تحالف يضم كافة القوى الوطنية الموجودة على الساحة المصرية
نهدف إلى فضح وتوثيق كافة أشكال التزوير التي تتم في الانتخابات المصرية
نهدف لنشر الوعي الانتخابي وثقافة المشاركة و مبدءا المساواة والحرية
ندعوكم للمشاركة معنا بالإدلاء بشهادتكم و أرائكم حول تزوير الانتخابات وما هو منشور
ندعوا كل صاحب كلمة حرة للتعبير معنا عن رأيه في هذا الداء وطرح صور للدواء
ندعوا كل شريف حر يستطيع مساعدتنا للمشاركة معنا بما لدية من إمكانيات ومواهب ووقت
و نرجوا منكم المساهمة معنا في نشر إعلانات الموقع والجروب والقناة على مدوناتكم الشخصية في سبيل نشر الحق والعدل ومن باب المشاركة في التوعية والتوثيق لحقيقة هذا النظام المزور لإرادة الشعب
نرجوا ممن يضع الإعلان لدية إبلاغنا عبر أيميل الموقع لوضع أسم موقعة او مدونتة ضمن قائمة المواقع الصديقة لدينا
شاكرين لكم حسن تعاونكم معنا

موقعنا www.sgelalmozwreen.com سجل المزورين

لتحميل إعلانات الموقع هنا
http://sgelalmozwreen.com/images/e3lan-1.gif
أو
http://sgelalmozwreen.com/images/e3lan-2.gif
أو
http://sgelalmozwreen.com/images/e3lan-3.gif

لتحميل إعلانات قناة سجل المزورين على اليوتيوب
رابط القناة http://www.youtube.com/Sgelalmozwreen

الاعلانات
http://sgelalmozwreen.com/uploads/you tube.jpg
أو
http://sgelalmozwreen.com/images/1.gif
أو
http://sgelalmozwreen.com/images/1%5C%27%5C%27%20copy.gif
أو
ولتحميل إعلان جروب الفيس بوك
رابط الجروب http://www.facebook.com/group.php?gid=57329097688
الاعلانات
http://sgelalmozwreen.com/images/11%5C%27%5C%27.gif

ضد الظلم said...

هههههههههههههههههههه
حرام والله حرام وفعلا انا بحس ان السيدات الفضليات بيفرحو ان جوزهم بيبقى اقرع عشان محدش يبصلو وهو بالطبيعه مش هيبص لحد عشان كسوفو ( مش كسوفو ده اقليم نحيه روسيا ) واللهع ما انا عارف

تحياتى
ابوالعربى

allfollowsome said...

والله الراجل ده له الجنة

خل مع توم ايه ونسكافيه ايه

هو علشان الراجل فى ضيقة تستغلى ضيقته علشان تبهديله

والاخ اللى بيقول تحطهولى وهو نايم ده شكله كده مش متجوز او شعره تقيل

لك الجنة يا طهقان والله

أيامنا الحلوة said...

يابنتي حرام عليكي طهقتي الراجل ههههههههه
ارحميه شوية

تحياتي

bastokka طهقانة said...

تسعدني زيارتكم و تعليقاتكم و اتمنى دائما ان اكون مصدر استفادة و متعة لكم
اعذروني عن قلة كتابتي الايام دي نظرا لماتش الكورة اللي بيتلعب في بطني و لما نشوف مين حيكسب بعد شهرين ان شاء الله
خالص تحياتي
و
اوروفوار

Anonymous said...

福~
「朵
語‧,最一件事,就。好,你西.............................................................................................................
..................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘

arab girlscool said...

This is such a nice addition thanks!!!
شات صوتي شات صوتي
عرب كول
شات صوتي مغربي
دردشه صوتيه
انحراف كام
منتديات منتديات عرب كول

شركة تنظيف بالدمام شركة تاج said...


شركة رش مبيدات بالخبر

شركة مكافحة حشرات بالخبر

شركة تنظيف فلل بالخبر

شركة تنظيف شقق بالخبر

شركة تنظيف منازل بالخبر

شركة تنظيف فلل بالجبيل

شركة مكافحة حشرات بالجبيل

شركة تنظيف سجاد بالجبيل

شركة مكافحة النمل الابيض بالجبيل

شركة تنظيف منازل بالجبيل

شركة تنظيف شقق بالجبيل

شركة مكافحة حشرات ببقيق

شركة مكافحة النمل الابيض ببقيق

شركة مكافحة حشرات بسيهات

شركة مكافحة النمل الابيض بسيهات

شركة تنظيف بالدمام شركة تاج said...

شركة مكافحة حشرات بالرياض

شركة نقل اثاث بالرياض

شركة رش مبيدات بالرياض

شركة رش دفان بالرياض

شركة مكافحة النمل الابيض بالرياض

شركة تنظيف بالرياض

شركة تنظيف خزانات بالرياض

شركة تنظيف شقق بالرياض

شركة تنظيف فلل بالرياض

شركة تنظيف منازل بالرياض

شركة رش مبيدات شمال الرياض

شركة عزل اسطح بالرياض

شركة عزل خزانات بالرياض

شركة كشف تسربات بالرياض

شركة تسليك مجارى بالرياض

شركة تنظيف بالدمام شركة تاج said...

شركة تاج للتنظيف بالدمام 0551844053


شركة تنظيف منازل بالدمام

شركة تنظيف شقق بالدمام

شركة تنظيف بالدمام

شركة رش مبيدات بالدمام

شركة مكافحة حشرات بالدمام

شركة تنظيف فلل بالدمام

شركة عزل اسطح بالدمام

شركة عزل خزانات بالدمام

شركة تسليك مجارى بالدمام

شركة تنظيف سجاد بالدمام

شركة مكافحة النمل الابيض بالدمام

شركة تنظيف واجهات زجاج بالدمام

شركة تنظيف مجالس بالدمام

شركة تنظيف خزانات بالدمام

شركة رش دفان بالدمام

شركة نقل اثاث بالدمام

قمم التميز said...

شركة تنظيف بالخبر

شركة تنظيف بيوت بالخبر

شركة تنظيف مجالس بالخبر

شركة تنظيف شقق بالخبر

شركة تنظيف خزانات بالخبر

شركة تنظيف منازل بالخبر

شركة تنظيف فلل بالخبر

شركة مكافحة النمل الابيض بالخبر

شركة تسليك مجارى بالخبر

شركة نظافة بالخبر

شركة كشف تسربات المياه بالخبر

شركة تنظيف مسابح بالخبر

شركة عزل اسطح بالخبر

شركة عزل خزانات بالخبر

قمم التميز said...

شركة تنظيف بالدمام

شركة تنظيف خزانات بالدمام

شركة تنظيف منازل بالدمام

شركة تنظيف فلل بالدمام

شركة مكافحة النمل الابيض بالدمام

شركة جلى بلاط بالدمام

شركة تسليك مجارى بالدمام

شركة نظافة بالدمام

شركة مكافحة حشرات بالدمام

شركة رش مبيدات بالدمام

شركة كشف تسربات المياه بالدمام

شركة تنظيف شقق بالدمام

شركة تنظيف موكيت بالدمام

شركة تنظيف مجالس بالدمام

شركة تنظيف بيوت بالدمام

شركة تنظيف سجاد بالدمام

شركة تنظيف كنب بالدمام

شركة تنظيف مسابح بالدمام