ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

مين يشرب معايا؟


صديقتي من أيام الجامعة... انقطعت بنا الاتصالات و المقابلات لكن لسة بنبعت لبعض إيميلات من وقت للتاني

و فوجئت بإيميل منها ؛إن في اوكازيون فظيع في كارفور المعادي يوم الخميس، و عروض تجنن على الأجهزة الكهربائية و عجبني من ضمن العرض : فرن مايكروويف سعره خيالي

طبعا ما صدقت و جريت على طهقان جوزي الطيب الأمير اللي مفيش زيه

و قلتله

طهقانة: يلا بينا على كرفور يا طهقان يا أمور

طهقان:ليه يا طهقانة ..خير؟

طهقانة:كاروفور عامل اوكازيون جنان ..و لقيت عنده الفرن اللي نفسي فيه و نازل بنص سعره.... يلا نلحق قبل ما العرض ينتهي

طهقان: ما أنتي عارفة... أنا ماليش في اللف و الشوبنج، خدي أنتي الفلوس و انزلي هاتيه... و اهو بالمرة تأخدي معاكي العيال يشمو هوا

طهقانة:و اسيبك لوحدك يا طهقان في يوم الاجازة؟!

طهقان:معلش يا حبيبتي.. أنا حقعد أشوف التليفزيون و أتفرج على برنامج النكد شو و أنتي روحي، و متتأخريش عليا

طهقانة: أنت عارف مشوار كارفور المعادي ده ميقلش عن ساعة رايح و ساعة جاي و يمكن ساعتين لف جواه كمان

طهقان: معلش يا طهقانة... أنا حستناكم بس أبقى هاتلنا حاجة دافية نتعشى بيها سوا

طهقانة:طيب.. أنا حقوم البس الاولاد ،علشان الحق أروح و أجي بسرعة

و فعلا رحت لحد كارفور و اتفاجئت اني مالقيتش لا اوكازيون و لا غيره ،و لا حتى أي عامل هناك عنده فكرة إن كان في اوكازيون من أصله!!

رجعت اجر أزيال الخيبة، ما نابني إلا ساعتين سواقة رايح جاي، و لا جبت اللي كان نفسي فيه

و اشتريت العشا و رجعت لقيت طوطو مطرح ما سبته

طهقان: انتو جيتوا يا حبيبتي ؟ ها ..عملتي اية؟

طهقانة: و لا حاجة ..مالقتش في اوكازيون و لا غيره... يا دوب جبت شوية طلبات و اشتريت العشا و جيت

طهقان:طيب... يلا نتعشى لحسن واقع من الجوع

طهقانة:ما شاء الله يا طهقان أنت نفسك مفتوحة موت الليلة!!.. عيني عليك باردة


----

و فات أسبوع ..و وصلني نفس الايميل مع اعتذار من صاحبتي إن الاوكازيون الأسبوع ده مش اللي فات

و اللي حصل الأسبوع اللي فات هو نفسه اللي حصل الأسبوع ده و رحت مالقتش أي اوكازيون و لا حاجة

و رجعت لقيت طوطو قاعد في سلام و هدوء و بنفس النفس المفتوحة على الأكل

مش عارفة ليه الماوس لعب في عبي ؟!! و مسكت سماعة التليفون و اتصلت على صاحبتي اللي بعتت الايميل ملقتش حد بيرد !!،اتصلت على مامتها وعرفت إنها سافرت الخليج من حوالي سنة و نص مع جوزها

الله!!.. أمال متابعة أخبار كارفور و اوكازيونات مصر أزاي؟

امممم... في حاجة غريبة في الموضوع...

استنيت الايميل بتاعها للأسبوع الثالث و فعلا وصل باعتذار برضه إن الاوكازيون الأسبوع ده مش الأسابيع اللي فاتت و إن الخصم بقى 70 % مش 50 % و إن الفترة محدودة ،و البضاعة معدودة ،و يا الحق يا مالحقش ،و شوي شوية حيرموا البضاعة في حجري و يلموا الفلوس آخر الايميل

آه.. كده بقى مابقاش إعلان على النت، كده تحرض على المشوَرة و بيبعتوني.... بس لمصلحة مين يا ترى؟

مين من مصلحته اسيب البيت في الويك اند تلات أربع ساعات أنا و الأولاد ؟

مين عارف ان نفسي في فرن مايكروويف؟

مين عارف إني أثق في كلام صاحبتي دي؟

مين ؟ يا ترى مين؟

و المرة دي بلعت الطعم بمزاجي ،و لبست العيال و ودعت طهقان ،و نزلت ركبت العربية كأني رايحة على كارفور في الرحلة الأسبوعية للبعتان، و لفيت و ركنت في الشارع اللي قدام العمارة لما نشوف بقى أخرتها أية؟

مفيش ربع ساعة، و لقيت طهقان نازل لابس تريننج و معاه منفضة اقصد مضربة تنس على ضهره و ركب عربيته و طلع

و أنا ....... وراه

و ماقلكوش بقى على نوافير النار اللي كانت بتبظ من نافوخي بألوان الطيف و الدخان اللي كان طالع من مداخن مخي

ماكنتش خايفة غير من صوت سناني و هي بتجز على بعضها ...لا يسمعه طهقان و يتنبه إني وراه

وصل البيه للنادي و نزل في حركة رشيقة ،و معاه منفضة التنس ،و فريرية كان في ملعب التنس، و سلم على بت كده تطلع من دور أحفاده و هاتك يا لعب معاها

و أنا و العيال اتسرسبنا و قعدنا في المدرج نتفرج على طهقان و هو بيتدرب على التنس مع المدربة الشابة المفعصة اللي شبه عصعوصة القصب الممصوص

و كل ما تقع منه الكورة نصقف و نقول: هييييييييه و هو مش واخد باله فاكرنا شلة عيال بتهيس

و كل شوية يبص في الساعة بتاعته ...خايف لا الوقت يسرقه و ارجع من المقلب بتاع كارفور ملاقيهوش في البيت

و مع أول بوينت(جون) يجيبه في الآنسة عصعوصة رحنا أنا و العيال في نفس واحد

قلنا: طوطو.....طوطو....هووو.. هووو

راح لافف و بص علينا و شاف العنين الحمرا اللي بتنط من وشي و الابتسامة الصفرا في الوش البافته و الليلة السودا اللي حيشوفها

باختصار شاف علم مصر في وشي

اتلهى و اترزى و جاب عرق و زيت و سوائل تانية لا داعي لذكرها محافظة على مشاعر مناخير القراء

و في طريق العودة للبيت ..على أساس إن لينا بيت نتخانق فيه، و مايصحش ننشر غسيلنا الديرتي قدام الناس ، و الست الجدعة تدي جوزها برستيجه قدام الناس و تبقى تسحبه منه في البيت ....حصل التالي:

طهقان:و الله أنا كنت حقولك... بس كنت عارف انك حترفضي ..اكمن المدربة ست، و الحصة بمية و خمسين جنية و حتقعدي تقولي هي قلة رجالة يعني !!و تهريني أمثال من عينة: اللي تسكر بيه تتعشى بيه، و تسدديها زي ما سددتي مشوار الجيم

طهقانة:تقوم تبعتني كارفور 3 أسابيع ورا بعض؟؟؟ يا قادر!!!

طهقان:أنا اصلي قابلت ماهر جوز صاحبتك على النت، و قالي انه سافر الخليج ..و قلت أكيد مش حتعرفي تكلميها، قمت قلت اهزر معاكي و اعمل إيميل شبه إيميلها و ابعتلك منه ،علشان عارف انك بتحبي الشوبنج و قلت تتسلي وقت التدريب بتاعي بدل ما تزهقي...

طهقانة: تقوم تشربني المقلب ده؟!! اتاريك.. بتبقى واقع من الجوع بعد التدريب.. و بتلتهم الأخضر و اليابس

طهقان:دي كل الحكاية ساعة تدريب في الأسبوع... اهو الواحد يستعيد شبابه الضائع

طهقانة:شبابه!!؟؟!!...طيب.. أنا حخلصك من شبابك الضائع ده للأبد، علشان ماتدورش عليه تاني

طاااااااااااااخ ......بووووووم ......دييييييييييييج

دي حاجة تطهق بجد

اوروفوار

إمضاء

68 comments:

Eng. Ahmed Abo El-Ella said...

تستاهل ياطوطو
مش عشان انت عملت كده بس عشان اتفقست ياخفيف
لازم تغير من أسلوب الخداع عشان متتفقسش يابرم

kochia said...

موضوع جامد
بس تلات مرات
مش كتير تلات مرات
وكان هيفضل علي كدة لحد كام اسبوع ؟؟؟؟
جرئ

شبــ اون لاين ـــاب said...

هههههههههههههههههههههههه


مش قادر مش قادر


انا حموت من الضحك طبعا علشان المقلب اللى انتى ياعينيى بتقعى فيه 3 اسابيع و را بعض
وطهقان بيعيش حياته

و انتى طيبه فضتلى تصدقى الفتره دى كلها
معلش بقى اللى يعيش ياما يشوف


----------------------------
كان معك من امام الكيبورد
واحد مخه لاسع شويه
شبـــ اون لاين ـــاب
الاسكندريه
-----------------------------

~*§¦§ Appy §¦§*~ said...

ههههههههههههههه
طيب والله فكره عبقريه اللى عملها بجد منها فسحك وعمل التمرين برضه
تصدقى بتعلم منكم المقالب علشان ابقى انفذها هههههههه معلش قلبى عندك هو حرم

... amr said...

لووووول :)))))))))) هههههه

معلش والله ... اصل المبرر طلع بسيط على انة يبعتك كارفور 3 مرات !!! بس انا عايز اعرف بجد ... انتي متضايقة اكتر عشان بيتدرب مع بنت ولا عشان خبى عليكي ؟؟؟؟؟؟

.. وكمان التنس دة بيخلي الواحد نشيط وبيحافظ على رشاقة البني ادم .... بدل مايطلعاو كرش و ياخد تريأة للصبح

ربنا يوفقكوا و يسعدكوا

ههههههههههه said...

لا حول ولا قوة الا بالله ! واضح ان طوطو دا مبتدئ !!

صابر وراضى said...

وعليكم السلااااااااااااام

هو الاسبوع دا فى تخفيضات ولا مفيش؟؟؟؟؟ظظ

صاحب المضيفة said...

بس مشوار رايق وعلقة اروق


كويس ان كل ده حصل في البيت


:):):):)


تحياتي

محمد أبو الفتوح said...

و الله العظيم انتى عبقريه
انا ما بطلتش ضحك
و بعدين اسلوبك ف الكتابه جميل و كأنك بتورينى اللى حصل على شاشه
أنصحك تكتبى سناريو
بلا يوسف معاطى بلا سمير خفاجى و على فكره مش ببالغ

خمسة فضفضة said...

السلام عليكم ورحمة الله وبركاته


هههههههههههههههههه

اكلت الحلاوه يا زكي ....:)))))))


صحيح رجاله فايقه ورايقه ، مش بدل ما يدخل عليكوا بكيس موز ولا اتنين كيلو جوافه رايح يضيع فلوسه علي التنس
هههههههههه
تعيشي وتشربي غيرها يا طوطه


سلام

موناليزا said...

هههههههههه
عجبتينى لما راقبتيه وروحتى كمان تهتفى انتى والعيال لما خسر
حركة فى الجوووون

smart_mody said...

ههههههههههههههههههههههه


روعة خيتو


يعطيكي العافية

لماضة said...

ههااهاهاهاهاهااااااااااااااااايىىىىىىى
انا قريتها اول ما رجعت العصر قعدت اضحك ونمت
صحيت اقرى تاني بضحك اكتر
والله انتوا الاتنين جبارين
بيعجبني فيكي قوي يا طهقانه انك مصحصه لكل حركات طهقان وذكيه قوي بتلمحي المقلب وتشمي ريحته من على بعد 100 ميجا بيت
تحياتي

ملحوظة
المدونة عندي لما عملت معاكي كده اعملي ريفريش للصفحه هتلاقي الكلام ظاهر عكس لون الخلفيه
تحياتي يا ست الكل
انا مقدرش استغنى عن تعليقك ابدا انتي بالذات

Ahmed Mubarak said...

دا انتي مصيبه مسيحه ..
انا عمال اضحك مش قادر بجد ..
كفايه حته علم مصر ديه
:D

الخيلاء said...

هههههههههه
اتاريكي كل اسبوع بتتمشوري
عشان مسيو طهئان ياخذ راحته مع الست المدربه

تقبلي مروري الاول و ان شاء الله مو الاخير

:)

حاجات جوايا said...

هههههههههههههههه
ياربى على الرجالة وحركاتهم
ههههههههههههههههه
بس هو ليه مفكرش انك ممكن تكلميها تسأليها .. ده شئ بديهى انك لما هترجعى ومش هتلاقى حاجة المفروض تكلميها على الاقل عشان تعرفيها ان مفيش أو كازيون

ولا يهمك يا طهقانة يا أختى المرة الجاية بقى تاخدى الولاد وتروحوا معاه تلعبوا تنس انتوا كمان .. كل واحد بـ 150 ج وتبقى جنت على نفسها براقش
هههههههههههههههه
أنا بس بحب أخدم
ههههههههههههههه

سالى

انا حره said...

يعيش ويشتغلك ياخايبه

سومه...مجنونه فى بلد عاقل said...

هههههههههههههه رفعتى راسنا وسط الناس اهى دى اللى تستاهل يتقال كلنا طهقانه مش ليلى هههههه

mohra said...

احسدك على هدوء اعصابك
ربنا معاكى

esraa said...

هههههههههههههه

هو أكيد عمره ماهيعمب كده تاني

بس ده مايمنعش ان الفكره كانت حلوه اوي

الفراشة الصغيرة said...

هههههههههههه
بجد يا طهقانه بوست تحفه
بس كويس يا بت طلعتى ناصحه
وبتفكرى كويس
مش زى البنات الخايبة اللى مش ممكن تفكر فى اجوازها وتقعد تقول جوزى بيحبنى لحد لما تلاقيه بيحب عليها

صدى الصمت said...

طب والله كويس ان الموضوع ال مخبية طلع تدريب تنس وماطلعش فى الآخر ورقة عرفى مع المدربة ولة حاجة
ربنا ستر ، تحياتى

صبرني يارب said...

يا نهاره الوان من الغامقه

طهقانه انتى بتتكلمي جد
هو ده حصل فعلا ؟؟؟

يا لهوي

لا لا الساطور بتاعك ده مش كفاااااااايه
وواحده ست ؟؟

وربنا كان ضاع فيها رقاب عندي
شبااااااابه
طب وهو فين شبااااااابه
والويك اند ؟؟؟

يا لهوي على السواطير الى هاتطلع

شوفي يا بنتى انا جوزي مره وهو فى فرنسا راح حلق شعره فى محل الى شغالين فيه ستات
والى حلقتله واحده ست وحااااامل

من يومها وحياتك ما حدش حلقله الاا نا لا راجل ولا ست
ومش عايزه اقولك على الايام الى شااااااافها اصلااااا بخصوص هذا الشأن

وبلاش اقولك على المترجمه الصينيه بقى والى جراله بعدها

تننننننننس
و150 جنيه؟؟؟؟؟
وواحده ست ؟؟؟؟؟؟

وبعته واشتغاله ؟؟؟؟؟؟؟

انا باحب اهدي النفوووووس

بس انا متغاظه منه لدرجة انى عايزه اجيبلك منشار كهربا من الى بيبقى عند الجزارين الكبار دول

bastokka طهقانة said...

تعليقاتكم احلى من البوست و روحكم المرحة أضفت عليا هالة من السعادة و الرضا
نورتوني و اسعدتوني و اتمنى اكون عند حسن ظنكم دايما
اوروفوار
طهقانة
بستوكة
عبير عبد الشافي

المـــفـــــــقــــــــوعـــــة مــرارتـهــا said...

ابقي سلميلي علي طهقان والمدربة بتاعته
ماعلش انتي اللي غلطانة ياختي
ماهو لو انتي كنتي اخدتيلك كورسات في لعب البلي مش كان زمانك انتي اللي بتديه الدروس دلوقتي


صحيح لاحظت ان كلبوظة في البروفايل بتاعك
اوعي تكوني انتي وهي واحد

المستنصر بالله said...

والله حرام عليه استاذ طهقان
هونتم عليه يبهدلكم البهدله دى
واضح انكم غالين عنده قوووى
خدى بالك المرة الجايه

تحباتى لحضرتك

واحدة مفروسة said...

هههههههههههههههههههههههههه
هههههههههههههههههههههههه
ههههههههههههههههههه
تعيش و تاكلى و تأكليه ضرب يا طهقانه
اما الرجاله دول
ههههههههههههههههه
بس سيبك انتى لفتي نظري لحاجه فظبعه
الراجل أيف اي ميل زي بتاع صحبتك
اقولك الحق انا الماوسات كلها لعبت فى عبي
انتى كده تاخدى بالك يا ماما
انا مش جايه اوقع ولا اكعبل
انا جايه اهدي النفوس
ههههههههههههههههههههههه
التنس ده هيه الخطوة الاولى
ايون
الخطوة الاولى
عايز يرجع شبابة
عايز يغير مراته
ههههههههههه
اومال
دو الرجاله بياكلوها والعه
ههههههههههههههههههه

المهم خلينا فى المهم
150x3=450
انتى بقا أoدتى كااااااااام؟؟؟؟؟؟
لا يا ناصحة اولا و باديء ذي بدء لازمن تاخدى زيهم
ثانيا تاخدى تمن البنزين
ثالثا تاخدى بدل شحططه
رابعا تاخدى بالك من نفسك
لان مع الخامسه
حكون بتكلم مع مدام طهقان جديدة نوفى
ههههههههههههههههههههههههه
هههههههههههههههههههههه

صباح الصباح said...

همممم

الموضوع فية بنت وصغيرة

همممم

لا الموضوع كدة يقلق يا طهقانة

طب ما تقولى لة انك تاخدى خمسين جنية بس وتدربية انتى

ههههههههههههههه

حمامة said...

ههههههههههههه

ياربي
بس بجد ماشاء الله عليكي
يعنى كويس انك تنبهتى ف الوقت المناسب

بقالى كتير مجتش
معلش
وحشتنى المدونة والله

تقبلي مرورى :)

يا مراكبي said...

ودي كانت نهاية فرقة طهقان المسرحية

إنا لله وإنا إليه راجعون

Anonymous said...

تصدقي باه جوزك دا يستاهل تاخدي منه الالف و شوية بتوع الميكروويف من غير لا عرض ولا دياوله و تروحي تجيبي احسن ماركة كمان

عقابا ليه علي القرددة اللي عملها معاكي دي:)

اقصوصه said...

بصراحه!!

ولا الافلام الامريكيه

انذهلت بصراحه

لما عرفت هوية الجاني!!

ويقولون كيدهن عظيم؟

طيب شو تركولنا؟

mero-moory said...

السلام عليكم و رحمة الله و بركاته

هههههههههههههههههههههههههههههه
ياخلاثي ياخلاثي ع العثل وربنا أنا زعلانه إني هنا موش من زمان وانها اول زياره ليا بجد انتي زي الثكر وضحكتيني جدا بالبوست ده من زمان موش ضحكت كده
ربنا يبارك فيكي يارب ويخليلك طهقان والأطفال

بس ليه موش موافقه انه يلعب تنس الرجاله غصب عنها بتمل زينا بالظبط من قعدة البتي متهيألي بالمناقشه هتوصلوا لحل يرضيكوا
ربنا يخليكم لبعض يارب
ومتابعكاكي ياكميلة بجد دمك زي الثكر

بوسيلي الاطفال بقى

في رعاية الله

بنت الغربة said...

والله الرجاله دى حاجه تقرف وتتعب الاعصاب-ولولا العيال كان الواحد سابهم من زمااااااااااااااااان
انا لو مكانك اعمله هو كمان مقلب واروح اتدرب تنس مع ولد امور ومقطقط برضه كده بدل الجيم -وااقوله ياحبيبى عاملالك مفاجاه علشان نلعب سوا بعد كده تنس وشوفى رد فعله ايه؟هتلاقيه عمل اكتر مانتى عملت والبادى اظلم - تحياتى لك -

وميض ابتسامة said...

عارفة لاول مرة احس ان طهقان يستاهل اللى جرى له .. ايه المقلب السخيف ده وثلاثة اسابيع وراء بعض ..ده قادر بجد
وبعدين اخرتها بنت ممصوصة ..ودروس تنس احسن يا طوطو ..وبرافو ياكلومبو عصرك

خالص تحياتى وهارد لك ياطوطو

Guevara said...

بجد بوست هايل
ياة من زمان مضحكتش من قلبي

M.K said...

هما الرجاله كده مالهمش أمان...
.............
وفي طريق العوده
للبيت ..على أساس إن لينا بيت ونتخانق فيه، و مايصحش ننشر غسيلنا الديرتي قدام الناس ، و الست الجدعة تدي جوزها برستيجه قدام الناس و تبقى تسحبه منه في البيت
...........
..عداكي العيب يا حبيبتي
...........
طيب.. أنا حخلصك من شبابك الضائع ده للأبد، علشان ماتدورش عليه تاني طاااااااااااااخ ......بووووووم ......دييييييييييييج
هو ده الكلام...
.........
تقبلي مروري
دمتي بخير..

اجار الدين كشمش said...

يا طهقان ...لا تأمن النساء ابدا ابد

شوف اشلون انت طيب مش عاوز تجرحها ..عملت الايميل حتى تخرج وهي مرتاحه ..لكن النساء مكفرات العشير

شوف ازاي ما قدرت اللي انت عملتوا على شاهنها
وبدات تشكك فيك

مع البنت ذات القوام الحلو اللي هي بتسميها مفعوصه

مش حرام عليها

اخوك
اجار الدين مدير نادي التنس
في امان الله
""""""""""""""""""""""
الخيلاء

اشيايبج هنييه كل مكان اسافرون ..تلاحقونا

هههههههههههههههه

فمالله2

t3ban said...

هههههههههههههههههه
كلنا طهقان
بس الزكي الي ميجبلوش طهقانة

أحمد كمال said...

ما جمع إلا أما وفق ، شوفي القوي في الأقوى منه ، و رغم إن حيلة طهقان جبارة ، إلا إن الواحد ممكن يستفيد منها جدا ، و كله في الخير طبعا ، و الحمد لله إن المدام مش متابعة طهقان و طهقانة :)

م/ الحسيني لزومي said...

اولا انا شاكر لزيارتك مدونتي..واعلم ان الواقع الانتخابي مرير ومحزن لكن ليس امامنا طريق لاحداث التغيير سوي الممارسات الديمقراطيه او طريق العنف وهذر يرفضه الجميع علينا ان نسعي من اجل تغيير الشخصية المصرية والنفسية المصرية كما قال العالم الكبير جمال حمدان...كما اننا لاننسي ان هناك دائما نقطة ضوء في نهاية النفق المظلم

jehan said...

هههههههههههههههههههههههههههههههههه هى دى اخرة الى يستهون بذكاء الستات

برافوا عليكى يا طهقانة رافعا راسنا دايما ههههههههه

Barracuda said...

ماهو لو ماكانش خايف ومقلق منك ما كانش عمل اللفة الطويلة دي كلها!!!...تزوير الميل واستغلال اسم كارفور لأغراض شخصية والتفكير في الفيلم البوليسي ده

قال على رأي المثل الفلاحي الإراري إللي بيقول (إمشي سنة ولا تخطي قنا) .. أهو إنتي القناية اللي خايف يعديها ليقع ويجيله بلهارسيا ويقعدوا صحابه يقولوله : إطلع ياض يا عييييد.. البلهارسيا هتبهدلك !!! ههههههه

خفي على الراجل علشان يطمنلك وما يعملش زي ودنك منين يا جحا !! المرة دي جت على تنس ومضارب وبت مفعصة .. ربك يستر يا مين عارف هتكون المرات الجاية ايه

الرحمة حلوة

تحياتي العطرة

MAKSOFA said...

وده جزاء اللي مايسمعش كلمه طهقانه تقولها

ســمـــر احمد said...

بس انا عندى سؤال يعنى
هل ... يعنى هل استعملتى مضرب التنس فى تنفيض طهقان ولا لا؟؟؟؟

arsenalwy said...

ههههههههه

لذيذة اوى ياطهقانه ايوه كده اديله مترحمهوش

سمكه وحده said...

احسن يستاهل ال تنس ال
بس تصدقي حلوه والله افكاره خبيثه
وافكارك اخبث
ربنا ميحرمكوش من مقالب بعض يا حاجه
تحياتي
سمكه

سمكه وحده said...

انا بعد ما شوفت البوست ده ببص علي المدونه لقيت حجات كتير تموت من الضحك بجد مدونه تحفه ماشاء الله بجد
ربنا يخليكوا لبعض ويسعدكوا ويكرمك يارب بجد تحفه ماشاء الله عليكوا حفه دم فظيعه
سمكه

Matra7na said...

Hii everyone, this is Farah, a student doing a research on Blogging, please 7elo l survey beta3y, i would be more than thankful,

http://freeonlinesurveys.com/rendersurvey.asp?sid=3my3gf38kl7dwn4514955

l survey is totally anonymous, y3ny yareet ma7adesh yezkor esmo

Thank you very much for your help

aloneinlife said...

hahahahah3h3h3h3333333333 tohfa begad....

koukawy said...

اول ملره هقف في صفه
معلش يا طهقانه يا اختشي انتي غلطلنه
سيبي الراجل يلعب رياضه و يفرج عن نفسه، عشان بعد كده يبقي رايق و بدل ما يتحبس و يديكي بوز
سيبيه يمرح شويه عشان تمرحي انتي كمان

شاب مصري مفروس said...

هههههههههه
والله انتو الاتنين حكاية
الحمد لله انها جت على اد الطرااااااخ بس

اوعى تفكر said...

بس والله راجل جدع وبيفكر

Nohaz said...

مفترية
سيبية يعيش حياته

كده اعمل عملية ولا تقولي لي سلامتك

يا رب تكوني بخير

علي فكرة عروض كارفور بتنزل علي النت

واحدة مفروسة said...

انتى فين يا طهقانة؟؟
انتى طهقتي مننا و لا ايه؟؟؟؟

S H A H said...

هههههههههههههه
والله فتحتو عيني لمقالب جمدة جداااااااااااااا

تيتو الحبيب said...

السلام عليكم و رحمه الله وبراكاته

الصراحه انا هموت من الضحك والله حرام عيك

ده مقلب جاااامد علفكرى و دي اول

زياره لياو للمدونه الجميه دي و ان شا ء الله مش هتكون الأخيره

و كل عام وانت بخير

زمن الشيكابالالالا said...

كل عام وانتم جميعاً بخير

إحنــــــا " عضو رابطة هويتي إسلامية" said...

السلام عليكم اختاه
إنتى بجد قلبك كبييييييير وطيب .... أنا لو مكانك

كنت استلفت علم ألمانيا ...وأمريكا ووريته الاتنين وخميس نجمة اللى فيه "العلم " في عز الظهر "وقت تدريب التنس"



:::::::::
كل عام وانتى الى الله أقرب..وعيدكم غير

المتبهـدلـون فـي الأرض said...

دا الطب اتقدم خالص

والأساليب اتطورت

ووصلت للتزوير وتقمص الشخصيات مع سقف الاصرار والترفس

.....

ahmed_k said...

رفع الحجيج أكفهم
يرجون رحمة ربهم
ورفعت كفي أدعوه
يجعل ثوابك مثلهم
وكل عام وأنتم بخير

رواية للنشر الإلكتروني said...

رواية للنشر الإلكترونيّ

الإبداع الحقيقي حري ٌبالتعبير عن ذاته ، والفكر الإنساني لم يخلق ليختنق في ظلام الصدور، والمبدع الحقيقي يمتلك دوماً الحق المطلق في أن تجد أعماله طريقها للنور باعتبارها خلاصة تجربة إنسانية كاملة تستحق النشر .
من هذا المنطلق تعمل دار رواية للنشر الإلكتروني على إفراد مساحة كاملة للنشر لكافة مبدعي الشبكة العنكبوتية بإعتبارها الخطوة الأولي نحو النشر الورقي، وفي سبيل الحلم في أن يصل إنتاجك للجميع تتعهد الدار خدمة النشر الإلكتروني على موقعنا أولاً بصورة تليق بالأعمال مع توفير الدعاية اللازمة والمناسبة له على الشبكة على كافة المستويات ثم تقديم ما يصلح منها لدور النشر المختلفة شرط أن يكون حجم هذه الأعمال صالحاً للنشر الورقي .
بدايتنا هي الحلم المشترك ودافعنا للاستمرار هو الأعمال المميزة من أجل أن نحقق معاً توازناً للنشر الإلكتروني والورقي ... الجديد عندنا هو اختيار أفضل عمل سنوي يصل إلينا كل عام من خلال لجنة تنعقد لذلك وتعتمد في اختيارها في الأساس على استقراء القبول الذي لاقاه العمل المختار لنشره بصفة سنوية في معرض الكتاب مع التزام الدار بتكليف نشره وعمل الدعاية اللازمة له كاملة و بصورة مرضية لصاحبه .
يبقى أن ننوه أننا لن نخضع لشروط النشر المعتاد وتعسف دور النشر التقليدية و يكفي فقط أن يمثل عملك تياراً أدبياً ناضجاً سواء أكان العمل في صورة رواية أو ديوان شعر أو مجموعة قصصية .

لزيارة الدار:
http://rewaya1.blogspot.com/

موقعنا على الفيس بوك
http://www.facebook.com/group.php?gid=41385681402

بريد الكتروني :
rewaya12@hotmail.com
rewaya12@yahoo.com

الفقيرة إلى الله أم البنات said...

لالالا
زوجك شخص يستحق الاحترام
لانه بيخطط صح
بس ازاى انت مدخلش القلق فى نفسك لانه وافق يديك الفلوس من غير منكافه
اصل حتى الكريم منهم لازم برضه يناكف

ربنا يسعدكم ويديم المحبه
ومعلهش فوتى التدريب ورحى شجعى
هناك

mimi said...

اوروفوااار عليكي وعلي كل القراء ،، أنا لو مكانك وكعقاب ليه علي الأرطاس اللي حطك فيه،، كنت طلبت منه يخليني أخد دورات تنس في نفس الناتي بس علي حسابه ( واهه منه رياضة ومراقبة برده)
ولا إيه؟

Anonymous said...

福~
「朵
語‧,最一件事,就。好,你西.............................................................................................................
..................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘

arab girlscool said...

This is such a nice addition thanks!!!
شات صوتي شات صوتي
عرب كول
شات صوتي مغربي
دردشه صوتيه
انحراف كام
منتديات منتديات عرب كول

قمم التميز said...

شركة تنظيف بالدمام

شركة تنظيف خزانات بالدمام

شركة تنظيف منازل بالدمام

شركة تنظيف فلل بالدمام

شركة مكافحة النمل الابيض بالدمام

شركة جلى بلاط بالدمام

شركة تسليك مجارى بالدمام

شركة نظافة بالدمام

شركة مكافحة حشرات بالدمام

شركة رش مبيدات بالدمام

شركة كشف تسربات المياه بالدمام

شركة تنظيف شقق بالدمام

شركة تنظيف موكيت بالدمام

شركة تنظيف مجالس بالدمام

شركة تنظيف بيوت بالدمام

شركة تنظيف سجاد بالدمام

شركة تنظيف كنب بالدمام

شركة تنظيف مسابح بالدمام

قمم التميز said...

شركة تنظيف بالخبر

شركة تنظيف بيوت بالخبر

شركة تنظيف مجالس بالخبر

شركة تنظيف شقق بالخبر

شركة تنظيف خزانات بالخبر

شركة تنظيف منازل بالخبر

شركة تنظيف فلل بالخبر

شركة مكافحة النمل الابيض بالخبر

شركة تسليك مجارى بالخبر

شركة نظافة بالخبر

شركة كشف تسربات المياه بالخبر

شركة تنظيف مسابح بالخبر

شركة عزل اسطح بالخبر

شركة عزل خزانات بالخبر