ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

طهقان.. ايرون مان


الخميس اللي فات زارتنا أسرة عماد صاحب طهقان الانتيك اقصد الانتيم و عشرة العمر و زميل التطفل اقصد الطفولة و الدراسة و اللي عايش هو و أهله في احد دول الخليج و بسلامته نازل مصر أجازة.
و اللي خلاني افوجأ :اني على ما اذكر عماد ده كان سوفيف و معصعص و شبه الهيكل العظمي بس متغطي بجلد بشري و اللي جالنا ده حاجة كده اللهم صلي على النبي شبه بلالين العيد قال اية؟؟؟عماد بيلعب رياضة و مشترك في جيمينزيوم و بقى عنده مجانص و عضلات ...مش بعيد على ربنا ده يحيي العظام و هي رميم

و قعد سي مجانص يقنع في طهقان انه ضروري يهتم بصحته و يلعب رياضة و اتفق معاه يروحوا يوم الجمعة جيمينزيوم كبير ؛ في فندق خمس غرز اقصد خمس نجوم .


قال اية؟ يلعبوا حديد
و انا سامعة الكلام ده و عمالة اقرقش على ضروسي، اكمنهم يعني قالوا: ان الجيم مختلط؛ ستات و رجالة و مفيش عندهم العقد بتاعتنا دي ،اللي هي عيب و ميصحش و بتاع
و الاكادة ان المرة الواحدة بالشئ الفلاني، مبلغ كبير يأكل عيلة بحالها اسبوع كامل
و بعد ما مشي سي شوازنجر من عندنا دار الحوار التالي:0
طهقانة:جيم ايه اللي اتفقتوا تروحوه ده يا طهقان؟ هو احنا برضه بتوع جيم؟
طهقان: و ماله يا ستي اروح اهتم بصحتي شوية ،بدل ما انا سايب نفسي ازيد و كرشي بقى شبه كرش سي حنفي
طهقانة:طيب ما انا ياما اتحايلت عليك نروح نتمشى في النادي و العيال بتدربوا و انت اللي بتتحجج
طهقان: تراك اية !!و نادي اية!! ده الجو ولعة ..انما الجيم ده مكيف
طهقانة:و ازاي تلعبوا في الجيم و الستات و الرجالة في صالة واحدة؟ينفع كده؟
طهقان: و فيها اية كل واحد في حاله


طهقانة:طيب ان كان كده ابقى اجي معاك بقى ..علشان اشجعك حتى
طهقان: لا لا لا ..تيجي فين؟؟ طيب دول ستات متحررة احنا ناس محافظين
طهقانة:طيب يا سعادة المحافظ.. لما انت محافظ حتروح مكان زي ده ليه!!0
طهقان: يووه..انا خلاص اتفقت مع عماد و حنروح بكرة المغرب نجرب .مش يمكن ميعجبنيش !0
طهقانة:ميعجبكش ازاي و كله مزز؟!0
طهقان: مزز اية يا شيخة دول اكيد ستات شبه الناموس الممصوصة، معصعصين من كتر الرياضة
طهقانة: ناموس؟؟ يا خوفي لناموسة من دول تمصك مني
طهقان:متخفيش يا ستي ابقى رشيني ريد قبل ما اروح الجيم... هههه


و راح سي طوطو نايم ، و سابني انا اتفلق و اهري و انكت في نفسي. ازاي اسيبه يروح جيم مختلط و يتصاحبلي هناك على ستات مايسة من بتوع هاي شله و يرجع مش عاجبه البيت و اللي فيه!!!0
بس انتوا عارفين انا مغلبش... دبرت له مكيدة تمام و ستفتها و الوظتها ،و استنى عليا لما تصحى الصبح يا سي ايرون مان عصرك
اتنديــــــــــــه

صحي طهقان الصبح لقاني شايلة البيت فقاني تحتاني و دار الحوار التالي:0
طهقان: اية ده انتي مهاجرة و لا اية؟
طهقانة:لا يا حبيبي ده انا بغير نظام البيت ، اصل اوضة الليفنج حر قوي و عايزة اجيب الصالون مطرحها و اودي الانتريه مكان الصالون
طهقان: و لزمتها اية بس الهده دي؟!
طهقانة:اهو تغيير يا حبيبي.. يلا ساعدني بقى نشيل المكتبة دي من هنا نوديها هناك
طهقان: دي تقيله قوي
طهقانة:و انت يصعب عليك حاجة ده انت واد جامد و حتشيل حديد، اهو تدريب يا حبيبي يلا يا حواش اقصد يا طهقان ...شيل
طهقان:امري لله..ما انا لو قلتلها تعبان حتقولي متروحش الجيم و ريح بقى
طهقانة:بتقول حاجة يا طوطو؟؟
طهقان: لا مبقولش ..يا قوي ..و ادي شيلة
طهقانة:و بعد ما تشيل المكتبة و تنقل الانتريه عايزاك تشيل ترابيزة السفرة علشان توسع لنفسك و تعرف تنقل الصالون
طهقان: ربنا على المفتري...حاضر

طهقانة: و انا في المطبخ يا روحي... لو عايز اي حاجة اندهلي بس

بس خلاص ..و بعد ما شال التلاجة و النيش و طلع المراتب في البلاكونة تتشمس بصيت لقيته فرهد...مش عارفة ليه!!0
و مسك سماعة التليفون و اتصل بسي عماد مجانص و قاله و هو بينهج:0
طهقان: معلش يا عماد... انا مش حقدر اجي معاك النهاردة خليها وقت تاني ...اصلي مرهق و محتاج ارتاح
طهقانة: احسن برضه يا حبيبي.. اصل في مسرحية حلوة قوي في التليفزيون نسهر نشوفها مع بعض
طهقان: مسرحية اية؟
طهقانة: المتزوجون
طهقان: عاااااااااااااااااااا ..حتروحي فين من ربنا

شاهدين؟؟ وفرت عليه الفلوس اللي كان حيكعها في الجيم و برضه مش عاجبه..مش كفاية كمان اني وفرت تمن علبة الريد اللي كنت حرشها عليه قبل ما يروح
دي حاجة تطهق بجد

اوروفوار
امضاء

60 comments:

بنت القمر said...

اشكرك علي منحي ابتسامه
جعلها الله في ميزان حسناتك
وحفظ لكي السيد طهقان مرشوشا بالريد لنهايه العمر:))))
تحياتي

محمد عبد الغفار said...

اعرف واحد صاحبى زمان كان يقول انا أخرى تغيير كاوتش العربية

بس يا ترى هتعدى بقى تغيرى فى نظام البيت كل يوم والتانى

bos bos said...

ههههههههههههههههههههههه

ضحكتينى قوى يخرب عقلك

ربنا يخليكى ليا وتضحكينى كده على طول

تحياتى

غضبان said...

من ساعة ما قرأت البوسط وأنا عمال أضحك وصعب عليا المسكين طهقان من هول المكيدة انتي حتروحي من ربنا فين ياطهقانة... دمك زي العسل
المرة الجاية حطيله ايسانس اف عشان محدش يقرب منه في الجيم ويرجعلك راكب جمل وشايل خيبة أمل
تمنياتي بمزيد النجاح والتوفيق

fatma said...

ههههههههههههههه
طب تصدقى وانا بقرا فى الاول وانتى بتنويله على اللى هيجرى لما يصحى
قولت يا سلام لو قالت له ننضف الشقه وشيل وحط وكده
ولقيتك بتقولى هنغير نظام البيت
فى منى أمل ابقى طهقانة اهو
:D

la Princesa ... WHiSPeR said...

انا جه

ماكنتش متخيلاكي شريره كده يا طهطوقه هههههه
كده تعملي فى الراجل كده

كل ده علشان مش يصاحب ستات مايسين
ياقلبك ههههه


تشاو بقى

elsha3er said...

البوست رائع حقا ودمك خفيف بس كلمة طهقانة بتحسسنى انى اكب على نفسى جاز واولع احسن بس انشا الله حيكون فى تواصل فى سلسلة كيف تكون سعيدا على مدونتى واوعدك مش حناقش الا مشاكل طهقان

مع تحيات

احمد الشاعر

سمر الشافعى said...

اهو هوا دا التفكير والا فلا برافو عليكى بحس ان انتى النموزج المتحرك اللى بتنطبق عليه (ان كيدهن عظيم)

بطوط حبوب said...

ههههههههههههههه
عارفه انا كل مره بتعلم حاجه بجد

كل مره بتعلم انى بلاش اجى على مراتى
اصلها هتعمل الى هى عايزاه ... يعنى هتعمله فأريحها بمزاجى احسن

ان كيدهن عظيم

قبل ما اتجوز هاجى اراجع على المدونه كلها
:)

مواطن مصرى نايم said...

ههههههههههههههههههههه
ههههههههههههههههههههه

قولى له انه لو راح جيم و بطل بعد كده
حيبقى جسمه وحش جداااااااا
و كمان الكرش حيزيد
و طبعا هو مش ضامن ظروفه يمكن يجى عليه فترة حاجة تشغلة و ما يروحش الجيم
بس خليه يوصف لى انا الجيم
عشان اروح اشوف الناموس
هههههههههههههههههههههه

بوست دمه خفيف كالعادة
تحياتى
اسلام

Nohaz said...

انت ازاي مش بتدربي الاولاد في النادي؟؟

هيطلعوا زينا
مفستيكيين وضعفانيين

lastknight said...

يعنى تجيبى للراجل أنزلاق غضروفى عشان مايروحش الجيم ؟ طب ماتكسرى رجليه احسن .. ده أنتى مفتريه صحيح يا بستوكه
بصى .. و عشان بقينا اصحاب خلاص .. هاقولك على فكره مرعبيه فى الحالات دى بس ربنا يسامحنى بقى
فيه دوا أسمه ميوفين .. باسط عضلات بيستعمله الرياضيين لما بيجيلهم شد عضلى .. الدوا ده بيرخرخ الجسم تماما و يبقى الواحد عامل زى الورقه .. لو اصر تانى يروح الجيم أعمليله كباية عصر قبل المشوار و افتحى فيه كبسولتين ميوفين .. نص ساعه و يبقى الأستاذ مش قادر يرفع أيده .. و يروح الجيم بقى يتكسف و يبقى شكله وحش قوى .. يعنى حتى لو حب يزوغ بعينه مش هايلاقى اللى تبصله .. هاهاه منك لله .. ركبتينى ذنب المسكين طهقان

صدى الصمت said...

والله أنتى عسل وأفكارك جميلة قوى ياريت أتعلم منك حركات مارى منيب الجامدة دى
ربنا يوفقك

أليس في بلاد العجائب said...

اضحك الله سنك :)

قوليله كل يوم من دا :) واهو تدريب من ابو بلاش كده :)

يا مراكبي said...

مش مهم طهقان يروح .. هأروح أنا بداله .. فين الجيم ده؟

المهاجر الى الله said...

ادعوك لزيارة مدونتى المتواضعة
www.eyuon.blogspot.com
وشكرا

طارق الغنام said...

ماشاء الله
استمتعت ببوستك الرائع
وسعيد بدخولى مدونتك
بجد اسلوبك رائع
تقبلى تحياتى
ودمتى بود

واحدة مفروسة said...

هههههههههههههههههه
هههههههههههه
إن كيدهن عظيم
بصي يا طهوقتي
طبعا يا حبيبتي خطتك ناااجحه نجاح السوبر ريد فى قتل الناموس و الصراصير
و لكن تعملى ايه فى اختك الهابله اللى كل يوم جوزها يرجع من الشغل مش على لسانه غير كلمتين على نفس الوزن مع تغير الحروف
جعااان
تعبااان
و من عبطي انا قلتله تعالى معايا الجيم
و بعد محايلات لفك العضلات المتيبسه و منهم عضلة اللسان
قام
وروحنا
و تقوليش يا اختى الرياضه فككت العضلات كلها
هههههههههههههه
بس للاسف فككتها فى الجيم بس
اما فى البيت العضلات ترجع تاني متيبسة
و علشان احل الموضوع اللى وقعت نفسي فيه...اضطريت آسفه انى اقوله اشتراكي خلص...و علشان تيجي معايا تاني لازم اعمل اشتراك جديد بالشيء الفلاني
اللى هو مش كان يعرفه اولاني
هههههههههههههه
و عديكي يا أختي
العضلات كلها اتفككت تاني على دماغي
و خصوصا عضلة اللسان
و سمعت ما لذ و طاب
ههههههههههههههههه
و من يوميها و انا ماشيه فى الشقه عماله اكلم نفسي و اقول
انا اللى جبت ده كله لنفسي
انا اللى جبت ده كله لنفسي
إييييه


كل رمضان و انتي طيبه انتى و طهقان و الاولاد
رمضان كريم

مصر يا موكوسه .....يا مزارع الكوسه said...

بس الله الرحمن الرحيم
بقوم انا ومجموعه من المدونين بعمل حمله لانقاذ اطفال الشوارع
التفاصيل هنا
http://awraqwasrar.blogspot.com/
نرجو انضمام الجميع

appy said...

ههههههههههه معلش يا حبيبتى رجاله مش بتقدر التوفير فى الفلوس
بس والله طلعتى كارثه متحركه ههههههههه وخطه جامده

§a§a said...

اول زيارة للمدونه بس ممتعه وضحكتنى جدا فى البوست دا

تحياتى

د.محمد الدسوقى said...

لا يا طهقانة ... دا أنت طلعت حكاية ... والأمر مش هيفوت بالسهل ... حاكم لا يسلم العضل الرفيع من الأذى حتى يراق على جوانبه ريد وبيروسول وممكن راجون ...
خفة دم طبيعية وبسيطة وعميقة ودا في رأيي اللي بيدي لحروفك بريق وجاذبية...
استمري يا طهقانة وطهقينا معاكي أأأ قصدي ضحكينا معاكي ...
كل تحياتي وأمنياتي بالتوفيق ... ولي عودة مؤكدة إن شاء الله بعد مروري على كل مدونتك لتأكيد جرعة الطهق الكاملة ...
أمنياتي الخالصة

blue-wave said...

هههههههههههههههههههههه
يخرب بيت دماغكم
انتوا مابتغلبوش؟؟؟

almasry said...

فعلا مش بعيد على ربنا بس ازاى عرفت المجانص والترابيس والكلام ده؟


بس فى فى الموضوع كمية غبطه أو حقد مش عارف ايه بالظبط


تحيـــاتى
المصــــــــرى

shirry said...

صحيح كيد النسا لو مال علي حيط يهده

ايه اللي انا بقوله دا
بس صحيح يا طهقانة مغلبتيش
وكمان وفرتي كتير

مسكين طهقان مقدرش يتامسك وفي ارض المعركة وانهار مع اول مكتبة و تريزة

ربنا يخليكوا لبعض

حسن ارابيسك said...

صحيح إنتم معشر الحريم دول يتفات ليكم بلاد وبلاد
ده اسمه جبروت وقهر مقنع
ده اللي اسمه ظاهره حق يراد به باطل
دي اللي بيسموه كيد النسا غلب كيد الرجال..وشوبش
بس على كل ده أنامعاكي في رأيك بكل أمانه
وبعدين مشكفايه الواحد في الزمن ده بيشيل حاجات كتير على قلبه البيت والعيشه ومصاريف البيت والعيال ومدارسهم والفسح وام العيال ودي لوحده شيلها كفايه. ودي أحلى شيله لانها بتبقى على قلبي زي العسل..وخير مافلعتي ياطهقاااانه
تحياتي
حسن ارابيسك

أحمد البطراوى said...

دا التفكير العكلانى ولا بلاش
من حفر حفرة لأخيه لابد أن يجعلها على مقاسه
وإلا تكن فتنة فى البيت وفساد كبير

محمد said...

ستات
كان الله تعالى فى عون الرجال
تحياتى
وكل سنة وانتى والاسرة بخير
وعندكم لحمة وفاكهة
ههههههههههههههههه

محمد

حمامة said...

هههههههههههه

اشطه عليكي
بجد انتى مرررررجع
شاطرة بجد
ربنا يسعدكو ويبعد عنكو العوازل اللى زى مجانص :)

الدفاع said...

هو اللى غلطان
قصدى طهقان يعنى
ايه يشيل ويحط دى؟
ايه اللى يدخله هو فى شغل البيت والكلام اللى يقطم الضهر ده
انا لو منه ؟ اخرج من البيت ولا كانى شايف الشقه فيها حاجه متشقلبه خالص واسيبك تتدبسى فيها واروح مع مجانص حبيبى
هههههههههههههههه
ممكن تديلى رقم تليفون مجانص بيه او عنوانه اصلى بعد الجواز بطلت رياضه وعايز ارجع لها تانى واهو تبقى ضربتى عصفورين بحجر وضمنتى ان حد تانى يشغل مجانص عن طهقان المسكين
وانا اوعدك هاشغله جدا هانسيه اسمه
واروفوار عليكوا
تحياتى

maha zein said...

ههههههههههههههههههههههههه
كنتي فين يا طهقانة من زمان
دمك شربات
سبيني بقه اكمل قراية
اسلوبك لطيف وخفيف علي المعدة
تحياتي ليكي
ولكل الطهقانين

صالح سعيد said...

بجد تسلم ايدك
اسلوبك مميز
سرد اكثر من رائع
وانا اللى فاكر نفسى مدون
ده انا غلبان

bastokka طهقانة said...

اهلا اهلا بيكم نورتوني و اسعدتوني

تليفون الجم و تليفون مجانص من الاسرار الحربية اللي مينفعش اديها لحد
ربنا يتقبل دعائكم اللطيف ليا و يسعد ايامكم

ترقبوا البوست القادم عن
الخدامة الهدامة..سينات

بعد تمام التعليقات الخمسين ان شاء الله

اوروفوار

tote said...

السلام عليكم
انتى نورتينى وياريت تنورينى دايما
وعايزة اقولك سر بجد دمك شربات موت
بس هزعل منك فى حاجة لانى الجيم ده صميم شغلى ومفيش من الحاجات ديه او ى يعنى كدة وخلاص فى ماشين ممكن تتجاب فى البيت ههههههههههه
تحياتى و اوروفوار

رؤية said...

:_:
طهقانة،
بس زوجة مثالية،
اعجبنى البوست كثيرا،
تحياتى لك.

قوس قزح said...

متخفيش عليه
بدام من كنبة و مرتبتين تعب كده يبقى من اول مرة حديد هيرجعلك مش شايف حاجة و يقعد عليها شهر ميفكرش يشيل حاجة :)

elsha3er said...

اشمعنة خمسين تعليق يعنى

شيتوس الاهلاويه اووووي said...

لالالالالا
بجد مدونه زي السكر طهقانه ايه بس
لو الطهقان هيخلي الواحد دمه خفيف كده دي تبقي حاجه جاااامده والله بجد مدونه لذيذه وعجبتني جداااااا وانتي دمك خفيف اوووي
تقبلي مروري وتحياتي ليكي
أختك شيتوس

شيتوس الاهلاويه اووووي said...

اه صح نسيت اقولك .......
اوروفوار
هههههههههههههههه
بااااااااي

Mercy Devil said...

ههههههههههههههههههههههه
حقا " إن كيدهن عظيم" سبحان الله
بس بصراحة 100 100 عليك وعلى تمارينك الجنان دى بس ياترى عرفت هو ليه اتفرهد بعد كل ده ؟
علشان يتفرج ع المتزوجزن معاك
ههههههههههه

عروس البحر said...

حراااااام عليكي
بتموتني من الضحك

koukawy said...

و الله يا اختشي الرجاله دول ما يعجبهمش حاجه
بالك انتي لو كنت جبتي الريد كان اداكي الطريحه اللي هي و قالك يا مبذره معلش استحملي ليكي الجنه انشالله
هههههههههههه

Ahmed Mubarak said...

انتي مشكله .. مشكله ايه !! مصيبه

يا بنتي انا مرمي على الارض من الضحك ارحمينا شويه

وارحمي الراجل ده ..
يا خبر

مش عارف هوا المفروض يحبك لخفه دمك ولا يطهق من الي بتعملي فيه

انتي كاتبه مشكله بجد

شهد الكلمات said...

هههههههههههه

جدعة يا توتو
هما كدة مش بيجوا غير بالعين الخضرا
شطورة

تحياتي

عاشــــــ النقاب ـقــــة"نونو" said...

والله انتي عسل
ضحكتيني وانا بقالي يجي اسبوع ما عملتها من قلبي
ربنا يبارك لك ويبعد عن طهقان الانواع دي
برافو عليكي
ربنا يهدي سرك
تحياتي

مواطن مصرى نايم said...

يعنى لما التعليقات تبقى 50 حتنزلى بوست
طب كده 46

مواطن مصرى نايم said...

47

مواطن مصرى نايم said...

48

مواطن مصرى نايم said...

49
التعليق ال50 هدية منى ليكى عشان تردى
و تروحى تنزلى البوست عشان انا حستنى الخدامة
لا يعنى بوست الخدامة مش الخدامة ذات نفسها
هههههههههه
تحياتى
اسلام

مواطن مصرى نايم said...

و الا اقولك
ادى اهوه التعليق ال 50
نزلى البوست بقى

ذو الوجه المبتسم said...
This comment has been removed by the author.
ذو الوجه المبتسم said...

ههههههههههههههههههه
ههههههههههههههههه
بجد حرام عليكى اللي بتعمليه ده
ربنا يخليكى لنا يا ست طهقانة هانم
ويخليلك ابو الطهقانين كلهم
ههههههههههههههه
تعرفى
بس اوعى تزعلى
نفسي فى وحدة زيك
تحياتى لابتسامتك الجميلة

bastokka طهقانة said...

هههههههههه
طيب على اخر النهار ان شاء الله البوست يكون استوى
ترقبوا

احجز مقعدك من الان
:)
الخدامة الهدامة
حوارات نقاوة


اوروفوار

mohra said...

صحيح ان كيدهن عظيم

شملولي بن سحلولي said...

لا لا لا
انا اشجب وادين واستنكر واحتج والحاجات اللي بتيجي علي نشرات الاخبار دي
واعلنها باني متعاطف ومتضامن مع الاستاذ طهقان واللي حصل ده مؤامرة تستوجب الرد السريع منه
وهو بغض النظر عن ان كل عين الرجالة زايغة انتي بس خايفة ليه من المزز
وبغض النظر ان الرجالة ما يملاش عينيها غير التراب انتي خايفة ليه بس من المزز
وبغض النظر يا آمنة للرجال يا آمنة للمية في الغربال
انتي خايف ليه بس من المزز
وبغض النظر اننا معشر الرجال مسكين وممكن ندبح بنظرة عين
خايفة ليه بس من المزز
اولا يا طقهانة لو انتي واثقة من نفسك مش هيهمك حاجة ولا هتدبري المؤامرة دي
عارف عارف طبعا واثقة ومتاكدة بس انتي مش واثقة من المزز اللي في الجيم
اللي هو الجيم ده عنوانه فين احسن انا يا كبدي عليه حاسس اليومين دول بخساسان في المشاعر

abo salah said...

بعد السلام عليكم

هههههههههههههههه
فعلا .. أن كيدكن عظيم

مش كان عايز يلعب رياضة
اهو لعب رياضة منزلية

بس المرة الجاية بقى هتحضريله ايه ؟

تحياتى

drpharma said...

بقالي زمان ماضحكتش

شموع الليل said...

بجد انت واحده زي العسل انا مش عارفه اقفل من غير مقراها كلها
ربنا يسعدك يارب في حياتك ويهدي سركوا مستنيه زيارتك بقي لمدونتي

Anonymous said...

福~
「朵
語‧,最一件事,就。好,你西.............................................................................................................
..................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘

arab girlscool said...

This is such a nice addition thanks!!!
شات صوتي شات صوتي
عرب كول
شات صوتي مغربي
دردشه صوتيه
انحراف كام
منتديات منتديات عرب كول