ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

بصل تيرة مش سكرتيرة


العادي و الطبيعي اني ابقى طهقانة من جوزي و عمايله بس المرة دي فوق كل وصف لأن العاملة سودة و كوده و شبه قعر البابور

البيه طهقان جوزي اترقى عقبال اولادكم ،و اخذ منصب عالي و بقى عنده طقم سكرتارية على راسهم بنت خريجة الجامعة الامريكية ( هو في حاجة تيجي من امريكا تسر النفس دي ميجيلناش منها الا وجع القلب)0

مخبيش عليكم البت حلوة و نغشة و طويلة و تقول لزحل قوم و انا اقعد مطرحك، و متقسمة زي ما ويكيبيديا بتقول بالحرف هي مش حلوة ذات ماتش يعني، بس متشطبة نضيف الفينيشنج بتاعها معمول صح - ديلوكس- و اللي فارسني و موقف المية في ركبي انها بنت ال..تيت طويلة حبتين ،الطول ده اللي معندناش منه محلي لا في صيدناوي و لا بنزيون و لا عدس و رغم انها طويلة الا انها بتلبس كعب عالي امعانا في فرستي و نقطتي

و انتم عارفين يا اعزائي ان الراجل من دول ضعيف قدام الكعب العالي، و بيلاقي روحه اسير لطرقعته على البلاط، و بينسى اي اثر ممكن يترتب على هذا التعلق مثل التربنة و الكسر المضاعف او تسقيط المخ و الرقدة في القصر العيني عنبر الارتجاج، ده غير ان الراجل بطبعة بيحب يتفرج و يأخد فكرة ،الخوف انه ما يكتفيش بالفرجة و يفكر يجرب او يشتري من الباعة الجائلين و في الحالة دي يبقى لازم من اتلاف النظر اقصد لفت النظر اني مش حسكت

و من ساعة ما شفت اللي تنزغد و انا بتجيلي حالات من الهلاوس السمعية و البصرية و التهيؤات و احلام اليقظة و الغيرة من الاخر حتاكلني ،طيب اعمل اية و اسوي اية ؟؟اطلع فيها عيب ازاي؟؟ علشان اطفشها و اجيبله واحدة شبه نعيمة الصغير الله يرحمها؟؟!!!!مش عارفة


فكرت اشتريلها سيارة مفخخة من العراق هدية بس خفت من الجمارك.. و فكرت افجر بيها المكتب طيب ماهو طوطو حيروح في الرجلين و بعدين الاقي فين حد اطهقه اليومين دول.. وفكرت اسممها بوجبة فسيخ بايظ و اهو شم النسيم على الابواب و كل شم و انتم طيبين ،بس خفت تسورق من ريحته و تبوظ الخطة

طيب اية العمل!!فكرت اخليها معدية قدامي انا و هو و اقوم ضرباها على ... نمشيها (قفاها) علشان تفتكره بيتحرش بيها و تقوم لافة و رزعاه قلم و تستقيل، بس في احتمال انها تطنش و تعتبر ده غزل عفيف

و اللي زاد و غطى انه عمال يشكر فيها و يعدد مزاياها و يقول :دي بنت مفيش زيها و لما يلمح العين الحمرا مني يقول: شاطرة في شغلها يعني

طيب انا لما اضربه سكينة في دماغة دلوقتي و افتحله مثلث فيثاغورس و اخليه احسن تطبيق للنظرية الهندسية في فتح الراس على السكين و اللي ما يشتري يتفرج يبقى كويس ساعتها


دي اغنية الاخ ايهاب توفيق اللي عملها مخصوص اهدائا ليا علشان يساهم في فرستي شغالة في الاف ام في كواليس الحدث

و عنها و عِرق السيلف ديفينس نأح عليا و هوب... نطت في دماغي فكرة لوزعية متخرش الووتر و هي اني اتصاحب عليها و اجيب لها عريس ننوس يكون طويل زيها و راضع معاها من نفس عود القصب و اهو بكده اكون كسبت فيها ثواب وفي نفس الوقت بعدتها عن عين جوزي و اكيد لما تتجوز حتدهول و تتمرمط و تنسى و تهنج و يمكن تقصر و يبقى مفيش حد اطول من حد و يمكن تطهق و تيجي تعمل لها مدونة هنا و نبقى شركاء كفاح

و لا ايه رايكم؟

اوروفوار

امضاء








55 comments:

بنت القمر said...

ولو اني مش شايفه ان اول تعليق افضل من اي تعليق تاني وكنت بضحك علي الناس بتوع اول تعليق
لكن يبدو ان العداله الالهيه بقا شغاله اوي معايا لاني فرحانه اني اول تعليق
:)))
تانيا يا ست البنات
الحل سهل ولا عريس ولا نيله
الا حسن انك تطوليله
اه والله
بصي انتي تروحي محلات الادوات الرياضيه تجيبي عقله
وتجيبي نجار يعلقهالك لاني عاملا كده
عشان متاخدكيش وتقع
واول ما طوطو يخش البيت
تتعلقي عليها وهات يا مرجحه
:))
آكل يا طهقانه
مفيش لما اخلص مرجحه!!ا
عشان حبنا يا حبيبيبي عشان متبصش بره
القميص فين يا طهقانه ؟؟
اصبر يا طوطو فاضلي 200 مرجوحه
كل عشان حبنا يا حبيبي
!!
طب شاحن الموبايل فين يا طهقونتي
اوعي تردي
وركزي في المرجحه
وكله عشان البيت والولاد وابو الولاد
واوعي تنزلي من علي المرجيحه الا لما تزيدي بتاع عشرين سنتي
وتبقي طول السكرتيرة وكده حاجه من اتنين يا يرفدها
يا يغيرها بواحده قصيرة والقصر علينا حق
في الخباثه .. كل في الخباثه
اوعي تبيني غل ولا حقد يفرح فيكي ويسوق فيها
والحل سهل شويه مراجيح
كتر كلام قدفي وانتي بتتمرجحي ورجلك في وش اللي قدامك
:))
يوة مكنش قصدي
وزودي السرعه
الي المرجحه يا طهقانه
واحكيلي

FaceMoon said...
This comment has been removed by the author.
FaceMoon said...

وحشتينا اوى ياطهقانة
متغبيش علينا تانى
عندك حق تغيرى على جوزك من البنات الحلوة دول بجد البنات بقوا حلوين
وبقوا حاجة تفرس
بس انتى وشطارتك بقى خليكى ذكية وابقى زيها فى عين جوزك متخلهوش اصلا يحس ان السكرتيرة دى حلوة ومش تبينى انك غيرانة منها هو انتى شوية ولا اية خليكى واثقة من نفسك وانا بأيد فكرة العريس عشان تكعبر وتنشغل وتقصر كمان ههههههههه
تحياتى ليكى بوست تحفة

Lobna Ahmed Nour said...

كدة برضو تقولي على البنت الامورة بصلتيرة .. هو فيه بصل بالطول ده
بس ايه الخطط الحربية بتاعتك دي .. اتكلي على الله وجوزيها واضمنلك ان جوزها هيعرف ازاي يقصرها ويكسر رقبتها كمان
وبعدين سيبك من كل ده هو طهقان بيه يقدر يبص لحد غيرك .. خلليكي واثقة في نفسك حبتين .. والا ايه

Ahmed Mubarak said...

افترضي النيه الحسنه يا بستوكه ..

ده كلام برضوة

ديه يا ماما اخته في الرضاعة هيبص على ايه ان شاء الله ..ديه اخته ..
:D

محمد عبد الغفار said...

ربنا ميجعلنا من قطاعين الأرزاق ، رزق وجاى للراجل نبصله فيه

انما طلاما امريكانى يبقى مفيش حاجه هتنفع معاها ابداً هتلاقيها مستعده لكل حاجه ،وقصاد كل جندى هيروح من عندها هتظبطك فى اورطه

الحل الوحيد هى تقويه الجبهه الداخليه وتخلى الشعب "طهقان" يحب الحكومه "طهقانه" عشان الشعب ميحبش امريكا ويقلها تعالى بدل حكومتى

الساحرة said...

بصي يا حبيبتي انتي تصاحبي البنت دي

وعلي اد ما تقدري طلعي القطط الفطسانه في طهقان

ومتسئلنيش يعني ايه قطط فطسانه هههههههه
فالبنت تكرهه وتبقي مش طيقاة

ويمكن تمشي خالص وتريحك

رئـــــيسـة حزب الأحلام said...

السلام عليكم
الله يكون فى عونك ياطهقانة دة الرجالة دول مالهومش امان وعنيهم زايغة ويبقى متجوز واحدة زى الالقمر ويبص لزحل
اسلوبك اكثر من رائع ويشد لواحد لحد الاخر تحياتى

سمراء said...

اعتقد انه اللي معاه واحدة زيك مش ممكن يبص لواحدة تانية ابدا
انت روحك جميلة جدا
اكيد هو مبسوط كمان انك غيرانه عليه
السكرتيرة بتتجوز المدير في الافلام بس
والا انا كنت اشتغلت سكرتيرة من زمان

جميل اسلوبك جدا
اشكرك على زيارتك
سمراء

موناليزا said...

هو فى عرسان دلؤتى عشان تجيبيلها واحد وكمان طولها انتى البسى كعب عالى وخلاص بس خدى بالك وانتى ماشية

мσнη∂ιš said...
This comment has been removed by the author.
мσнη∂ιš said...

الوله سي طهقان جوزك مش ناوي يجيبها البر أبدا
إحنا جايين نهدي النفوس بس
في حد ممكن يزعل قمر زيك ، قمر إيه ؟؟؟ دنتي نجم المجرة كلها
ألا صحيح ، اعملي فيا ثواب و صليني بالبنت المفعوصة دي أنا كمان عايز أكسب في ثواب زيك و لا مؤخدة

Unknown said...

انتي الطول شكلو عاملك ازمه طيب ايه رأيك انتي 172 سم
يعني من نفس زعزوعه القصب
حلوه فكرة العريس دي تبقي طقشتي راسين في الحلال و طوطو فضل عايش

يا مراكبي said...

لأول مرة بأتفق معاكي في الحل اللي إنتي إقترحتيه ده

أنا مستعد أشيل الشيلة دي وأتقدم للبنت دي علشان أريحك منها وأحافظلك على طهقان .. أظن ما فيش جميل أكتر من كده ممكن أقدمهولك

بس إفتكرون بالخير

... said...

عندي حل أوريجينال لم يخطر علي قلب بشر
انت يا بستوكة تروحي لباش محضر علي باب محكمة
وتعكميه كويس
وتخليه يدبج لك شكوي كيدية معتبرة تغزيه بيها عند مديره
ولو مارفدهوش أقله هيقلص صلاحياته وياخد اللي تنقرص من عنده
قوم إية بأة
ينقهر
تظهري انت بأة في اللحظة دي ملاك بجنحه وتواسيه
هتطولي في نظره ويحس إنك ذخرا وإنها نحسا
وتوتة توتة خلصت الحدوتة
وش شيطاني
:D

aya said...

بصى يا طه طه
هو ده الكام
برافون عليكى
سيبك انتى من قصص غرام وانتقام ديه
وادخلى على الحلول العملية

وان شاء الله اضمنلها مستقبل باهر فى التدوين

ربنا يستر عليك يا طوطو

بنوتة said...

البوست حلو وصورة جميلة اوي بزات الي راجل صغير بيزء الكعب العالي

:ملاحظة
انتي لو اتصحبتي عليها وجوزتيها واحد طويل يبقى مش اي حد طويل
عشان ممكن يكون احمد عز وانا حجزا
خلبالك

***********
تحياتي ياقمر وانا مستنية ردك بعد اما تصحبيها

بنوتة said...

على فكرة في حل تاني ياطهقانة انك تلعبي باسكت عشان تطولي زيها

Anonymous said...

اااااااااااااااااااه من الغيرة
والله ليكى حق

احسن حاجة تبقى احلى منها كمان
رتبى امور بيتك مش تكركبيها ...اهتمى بنفسك وبجمالك ..حتى لو دى اول مرة فى حياتك هتغيرى شكلك غيريه

اهتمى يكون بيتك زى مكتبه بالظبط ...هادىء ومنظم وبمواعيد ...والورد والحركات ..والكعب العالى ماتنسيهوش

وان شاء الله عينه مش هتقدر تهوب لحد غيرك ...
ربنا يعينا

momken said...

ايه بس يا طهقانه الى بتقوليه دى

دى تروح فيكى فين
وبعدين الطول اتوزع بين كل الناس بالعدل
فى ستات رجليها طويله
وستات ايدها طويله
وستات لسنها طويل

والموضوع متوزع بين كل الستات بدون ظلم

كده انتهينا من موضوع الطول

بالزمه انتى عاوزة تتحولى من طهقانه لمجرمه وتدخلى ارمدان
وبدل ما نقرا المدونه بتعتك نقرالك الفاتحه زى الاستاذ صدام حسين

مش عيب تروحى فى وحده زى دى
كفايه انها صفرا وناشفه ومعرقبه

اما انتى الى طهقان نشن عليكى والى كان عليكى العين والنيه

انتى احلى حاجه تعمليها تدعى عليها
ايون اكنسى عليها السيده
او شبشبيلها
او اقولك انا هعملك حجاب تحطيه تحت راس طهقان
يخليه يشوفها قرده قدامه
وبكده نخلص منها خالص

اى خدمه
بقيتى انتى مجرمه وحولتينى دجال
اعمل فيكى ايه

تحياتى

أسامه يوسف said...

أنا رأيى انك تحوطيلها فى شنطتها قرش حشيش وتبلغى عنها
او ممكن تبلغى انها من ضمن المحرضين على الاضراب
او انها مرات ايمن نور التانيه بعد جميله
او .. او كفايه كده علشان انا تعبت

واحد من البلد دى said...

والله إنتى هلكتينى من الضحك وبعدين ليه كل القلق ده....إنتى تعمليلها عمل ..وحجاب...وتفتحى عليها الكوتشينة....وتشوفيها فى الفنجان....أو حاجة تانية أسهل من كده....إنتى تروحى لبتاع الفطير اللى جنب البيت عندكم...وتنامى على الرخامة(بضم الراء)وتسيبيه يشوف شغله...ولما توصلى للطول المطلوب..تقومى على طول...بس إوعى تسرحى لغاية ما يدخلك الفرن....أنا متأسف على فكرة إن زيارتى لمدونتك إتأخرت...ما اخبيش عليكى ؟؟؟؟؟أصل عندى سكرتيييييييرة..هههههههههه

أم حبيبه said...

السلام عليكم

بصى يا طهقانه

عندك حلين اعمليهم على التوازى

الاول : انك تشوفى ايه اللى بيعجب زوجك فيها ده طبعا تعرفيه من كلامه من نظراته كده يعنى و تعملى الحاجات اللى عجباه فيها
ايا كانت الحاجه
البسى كعب فى البيت و اقعدى طرقعى لغايت ما يصدع و يكره الكعب

المهم تعملى الحاجات دى كلها

الثانى : انك تشوفى للبنت دى عريس بأسرع وقت ممكن و اديكى حتخدى ثوابها برضه

بس كده ربنا يعينك و ييسرلك حالك

صحيح نسيت
بلاش تبينيله انك غيرانه منها ( و منها هى بالذات)
بينى الغيره الطبيعيه و اللى بتكون من اى حد

سلااااااااام

khobayb said...

ههههههههههه

روعة فعلا

---

هو الحل الجذري فعلا في عريس خريج الجامعة الأمريكية هو راخر

---

دمت بخير

Hosam Yahia حسام يحيى said...

هههههههههههههههههه

ماشاء الله بوست هااايل

تحياتى لحضرتك وللبصل تيره

وللسيد الطهقان طبعا

وحضرتك اتبعى معاها اسلوب النفس الطويل

يعنى صاحبيها وبعدها بشويه اعزميها على اكل

وسممميه
بس

:D
:

مدحت محمد said...

بون سوار
ههههههههههههههههههههه
اسلوبك يهلك من الضحك
اعتقد يامراكبى حللك المشكلة
هو افضل واسلم حل
ويابخت من وفق راسين
فى الحلال

حاجات جوايا said...

عودا حميدا يا طهقانة
اصلا من غير كلام كفاية طهقان يشوف الماوس الساطور ده وهو يحجم عن بنات حواء كلهم

مش انتى عاملة حسابك برضه وساناه ومحضره الاكياس ولا ايه ؟؟؟؟

لو احتجتى اى حاجة انا فى الخدمة

أو بصى طهقان برضه مننا وعلينا
وميهونش علينا مدونته تتقفل

انتى احسن حاجة تعنقليها
وبحقنة هوا تديها
وقهوة سادة على روحها تشربيها

لان صعب اوى انك فى ايامنا دى تجوزيها


ايه رأيك بقا فى الافكار الطيبة جداااااااااااااا دى
ههههههههههههه


سلام يا ريا

قصدى يا طهقانة

دمتى بخير
سالى

أم أحمد said...

انتي بتقولي اجيب لها عريس كدة ..وكأن العرسان مترمين العشرة بقرش
بعيد عنك الشباب عامل إضراب يعني عرسان مش هاتلاقي
أسهل أنك تدوري لطوطو علي شغلانة تانية... ولا أقولك بلغي عن السوكرطيرة مباحث التموين وتقولي سارقة سمنة من الجمعية
وكلنا لها ... سبقناكي في الغيرة
ياقمر
كاس وداير

la3lahakhier said...

بون سوار
واحنا بردوا يهمنا الامريكانى
داحنا الفول ذاته
واروفوار عشان الحموضه

Sara said...

لا احسن حل تثبتيله ان البلدي يوكل
امريكاني ايه وكلام فاضي ايه خليك وثيق من نفسك كده
وايه اديله كام شهر كده اكل بالسمن البلدي المعتبر كرش في التمام وهي مش هاتبصله اصلا دول امريكاااااان

ياقوت الأزهري said...

انا قرأت البوست
وبصراحة اتغميت
وزعلت جدا
لأن محبش خراب البيوت
بس اطقصت واعرفت
انى اسهل واسرع حل للظروف دى
انك تعمليله
حجاب
وليكى الإختيار

سعيد جدا بدخولى لأول مرة

هذه المدونة
الشعبية البسيطة

على فكرة
انا كنت بهزر
بالنسبة لموضوع
الحجاب

سلام

عشان فى واحد معموله عمل
رايحين
نفكه

صيدلانيه طالعه نازله said...

انا جوزى كان عنده سكرتيره زمان كانت فرعه كده زى غاده عبد الرازق فى الحاج متولى وكانت واخده مقلب فى نفسها قوى
مع ان مناخيرها كانت قد البتنجانه
التانيه بقى عسوله بس تخينه شويه بس هى طلعت ناصحه و بقينا صحاب و هى متجوزه فا مفيش منها خوف
بس كل شويه يجى يحكى انها كانت جايبه سندويتشات و عزمت عليا و اكلت
و انا بقى اجز على سنانى
بس تكسبيها باى حاجه تتاكل يعنى فى العيد بعزمها على رقاق و كده
فبقت بتحبنى و بتجبلى الاخبار كلها
اللى عايزه اوصلهولك ان الحرب خدعه لازم تدرسى عدوك و تشوفى نقط ضعفه علشان تهجمى صح
اول مره عندك بس عجبتنى جدا
تحياتى

صيدلانيه طالعه نازله said...

انا جوزى كان عنده سكرتيره زمان كانت فرعه كده زى غاده عبد الرازق فى الحاج متولى وكانت واخده مقلب فى نفسها قوى
مع ان مناخيرها كانت قد البتنجانه
التانيه بقى عسوله بس تخينه شويه بس هى طلعت ناصحه و بقينا صحاب و هى متجوزه فا مفيش منها خوف
بس كل شويه يجى يحكى انها كانت جايبه سندويتشات و عزمت عليا و اكلت
و انا بقى اجز على سنانى
بس تكسبيها باى حاجه تتاكل يعنى فى العيد بعزمها على رقاق و كده
فبقت بتحبنى و بتجبلى الاخبار كلها
اللى عايزه اوصلهولك ان الحرب خدعه لازم تدرسى عدوك و تشوفى نقط ضعفه علشان تهجمى صح
اول مره عندك بس عجبتنى جدا
تحياتى

MAKSOFA said...

بجد دمك زي العسل ، بس والنبي حرام اللي عايزه تعمليه فيها ، هي ذنبها أيه ،اصلك وأنت بتوصفي فيها كده حسيت أنها أموره ولذيذه وبنت ناس، طيب هي ذنبها ايه أن ربنا خلقها حلوه وكميله وطويله،بصي أنا من رأي ركبي لجوزك جهاز أنذار مبكر تقدري تعرفي نيته ، ساعتها تقومي ضرباه بصواريخ أرض أرض وتخلصي

الطائر الحزين said...

اللى تعرف ديتة
........

جوزه

Mafrousa said...

طهقانه و النبى يا حبيبتى العدد من نوفمبر 2007 الى مارس 2008 واقعين....همه فين? عاوره اقراهم ... و ان كنتى يعنى وزك الشيطان و شلتيهم علشان اللى عايزهم يدفعلك مقدم ...فانتى الخسرانه ...معطلكيش انا رايحه مدونه طهقان ...بس الاول حروح أخد دش ... و احط بارفان ...والبس .......ايه مالك اتخضيتى كده.. و الله انتى ظنك و حش... يابنتى جوزى على وصول و لو دخل و لقانى النهارده بنفس الهدوم بتاعة اول اول امبارح و قعدتى هيه هيه اللى متغيرتشى قدام الكمبيوتر...يمكن يعملها بجد النهارده و يوصلنى بنفسه..عند مامتى...و انتى مايرضكيش يا طهقانه كده... و انا مقدرش على انى ابعد عن البيت ..خااااالص...ولا يجينى نوم.....يابنتى اصبرى مش علشااااانه...علشان مامى معندهاش كمبيوتر........!!!!!

صحفية روشة said...

ياااااااااااااه غيبة طويلة اوى يا طهقانة
بس ليه حتى مقلتيش انتى غبتى علينا ليه
المهم كالعادة فطستينى من الضحك
وانا رايى تجوزى البنت بنت السيمافور(السنافور) دى
واهو الاجر والثواب عند الله وربنا يفضحلك حبيب ولا يعريلك ركب
نورينى

Desert cat said...

هههههههههههههه
والله فكرة فى الجون يا طهقانة يا حبيبتى

بس هو لسه فى عرسان
ده حتى شاحين من السوق السودة

Esraa Hamed said...

ههههههههههههههههه
اسلوبك تحفففففة بجد
حلو اوي الحل اللي وصلتيله في الاخر هي ملهاش الا الجواز
بدل ما تمشي ورا السلف ديفنس و في الاخر بقي تصعب عليه و لا حاجة و نقول ياريت اللي جرا ماكان
هههههههههه


اول زيارة ليا لمدونتك و بجد عجبتني جدااا
و ان شاء الله هتلاقيني هنا علطول

تحياتي ليكي يا قمر

خمسة فضفضة said...

السلام عليكم ورحمة اله وبركاته

اه قولي كده بقي يا طوطه
اتاري الاستاذ طهقان فصل نفسه عن البروفايل بتاعك واستقل بمدونته وعامل فرح ومنزل بوست مخصوص وانا اقول ايه اللي حصل

صحيح اذا عرف السبب بطل العجب

ما تسكتيش يا طوطه واحنا وراكي لو محتاجه اي دعم

سلام

رئيس جمهوريه نفسى said...

حلا لمشكلتلك انا مستعد اضحى واخطبها رغم انى رافض مبداء الخطوبه بما انى طويل نوعا ما يعنى وخصوا انك بتقولى الفينش بتعها كويس

أنفاس الصباح said...

عزيزتى طوطة: كبرى دماغك ,مش هتخلصى ,لو جوزتيها هيمشيها ويجيب واحدة اطول !على اى حال الانسان الشبعان مايقدرش ياكل اكتر فسدى نفسه , قصدى شبعيه يعنى.
عوزين تدوينة جديدة بقه .

سكينة said...

أوعي يعرف أنك غيرانة ليفتكر نفسه أمله يعني غيرش هو القلب وما يريد
واللي أعرفه أنك من زمان نفسك حد يخلص ثارك من طوطو وهي دي الشخص المناسب سيبيه يتلوع ويتمايل مع الكعب العالي ومش هيطول حاجة غير وجع القلب أصل المناظر دي من زيادة الطلب عليها بتقى عاملة زي القطر ممكن يقف شوية في محطة لكن ميقدرش يفضل ثابت
وعامة أنا نفسي طوطو يطلع زي ما أنا عارفاه راجل دغري وبتاع شغل وما لوش في الكعب العالي خالص

بنت مصريه said...

ههههههههههههههههههههههههههههه دا انتى زى العسل وقدام جوزك بالزات خليكى واثقه من نفسيتك اه يا اختى حاكم الرجاله دول يحبوا قوى ان الستات تغير عليهم ويتمرعوا عالاخر
خليكى جامده يا اختى

afuoneyiat said...

طهقانه هانم انا عارف ان انتي معزورة لكن جوزك برضه معزور ,واحد صاحي ..نايم اكل....شارب
مع واحده طهقانه متخيله هايعمل ايه

بنت القمر said...

http://bella-kitchen.blogspot.com/
ندعوكم لزيارة مطبخنا والتمتع باشهي
الاطباق
تحياتي

Anonymous said...

اما حتة فكرة

لا بس القنابل برضه ليها طعم تانى

طيب متجبيلها اتنين يرنوها علقه مووت يمكن تقصر ولا حاجه
:)))))))))))))

وحشتينى يا بستوكه متغيبيش تانى كده

سلامى يا قمر
:))

Hossam Nasr said...

قُلْ بِفَضْلِ اللّهِ وَبِرَحْمَتِهِ فَبِذَلِكَ فَلْيَفْرَحُواْ هُوَ خَيْرٌ مِّمَّا يَجْمَعُونَ [يونس : 58]

بتوفيق من الله وفضل تم تحويل طلب الحملة التي تقودها المدونة بشأن سن قوانين للحد من التجديف على الإسلام خاصة والأديان عامة إلى المسئولين في هولندا
http://kawlansadida.blogspot.com/2008/04/blog-post_28.html

ساهم بتوقيعك في مطالبة الحكومة الهولندية بسن قوانين من شأنها حماية المسلمين من العبث بمقدساتهم الدينية خاصة ومن التجديف على الأديان عامة على الرابط التاليhttp://kawlansadida.blogspot.com/2008/04/blog-post_21.html
وجزاكم الله عن إسلامكم خيراً"

DayDreaming said...

هههههههههههههههههههههههه
والله انتي عسل بأه طهقان برده هيسيب
الشربات ده ويبص للسكرتيره ده يبأه معندوش نظر

أنثى الخيـــــال said...

اسلوبك بجد رووووعة في الكتابة
وفيه حس فكاهي
ربنا يبعد عنك الهم والغم
سعدت كتير بزيارتي لمدونتك
وسعادتي أكبر إني تعرفت على شخصك

تمنياتي لك بالتوفيق
أنثى الخيال كانت هنا

el_assel said...

لو علي العريس
فاعملي ثواب في اتنين بقي
انا علي فكرة طويل
طويل
جدا
ههههههههههههههه

بس انا مش عارف انتي زعلانة ليه
لو انتي واثقة فيه
والاهم انك واثقة من نفسك
ما كنتيش حتبقي في الوضع ده


هو اينعم الغيرة مطلوبة حبتين
بس مش للدرجة دي


ولو فعلا الموضوع ده مضايقك
كلميه قوليلوه
وهو لو بيحبك صحيح
وفي لغة حوار ما بنكم
اكيد حيمشيها
او حيرضيكي
او حتي حيقولك ايه مبرراته في انه سايبها في الشغل

سلامـــــــــــــــاتي

وماتنسيش بقي موضوع العريس الطويل ده

son's egypt said...

السلام عليكم
والله فكرة كويسة انك تجوزيها وهي لما تتجوز اتتلخم في العيال والراجل جوزها

yomna said...

طهقانة

حمدالله على السلامية...بقالك كتير مختفية عن الساحة...بس انا فرحانة اوي انك رجعتي تكتبي تاني

و على فكرة لسه دمك زي العسل...

اما بقى السكرتيرة دي فلو جهزتي اسلحتك التقيلة و القنابل العنقودية و بداتي عاصفة الصحراء عليها محدش هيحاسبك


يلا ابدأي الهجوم

Sara Swidan said...

وفقي راسين ف الحلال يا طهقانة ..

أوريفوار!!

:)

قلب صغير said...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه