ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

حدث في مثل هذا اليوم



في مثل هذا اليوم ....من خمستاشر سنة و احنا لسة طهقانين جداد كانت الحياة جميلة رغم انها كانت صعبة
فاكر يا طهقان لما اتجوزنا في الشقة الصغيرة اللي في الدور الثامن و اللي كانت من غير اسانسير و كنا نشتري بجنيه لب و نقعد نقزقز على السلم لحد ما نوصل و نترمي على الكنبة من التعب
و لا يوم الفرح لما اصريت انك تشيلني قلتلي حشيلك من السادس و على ما وصلنا الدور السادس جبت زيت

ولا فاكر الاوضة المثلثة اللي كانت محندقة و يادوب حاطين فيها كنبة نونو و اوضة النوم اللي اضطرينا نهد بلاكونتها علشان توسع شوية و تكفي الدولاب البلاكار، و لا المطبخ كان اتجاه واحد يا رايح يا جاي مينفعش اتنين يدخلوا سوا. و الحمام بقى كان فضيحة لا ممكن ابدا تدخل الا و تسيب الباب مفتوح و اي حد معدي يمسي عليك و انت تقوله: اتفضااااال ، بس تصدق كان حمام ونس و مسلي و كنا بنعرف نتفرج على التليفزيون الاربعتاشر بوصة و احنا بنعزف احلى السمفوكيات
فاكرين نورا في فيلم( جري الوحوش) لما كانت بتقول : قطعت يا اختي كتر الاوض كنا ملمومين في اوضة واحدة دلوقت كل واحد مننا في اوضة و مبنكلمش بعض
فعلا عندها حق


القصد يا اعزائي البلوجرز اننا بدانا حياتنا -قبل عصر اللاب توب- ببساطة شديدة كاي اتنين خريجين جداد معندهمش امكانيات... لأ... كان عندنا اشتراك ابونية في مترو الانفاق و كنت اركب انا عربية الستات و هو العربية اللي قبلي و نقعد نبص لبعض من الشباك اللي بين العربيتين قال يعني الشوق مقطع بعضه بقى لحد ما نوصل
و كانت كل فسحنا تمشية و لا نجرؤ نفكر نتعشى و لا نتغدى بره طبعا ما هي عشوة برة يعني غذا عيش حاف خمس ست ايام أونروح بقى نتسحتج عند حماتي أو عند امي علشان نتغدى و نتحجج انهم وحشونا و اننا منقدرش نغيب عنهم و انت القلب الكبير و حاجات من دي.

فاكر يا طهقان لما عييت مرة و مكنش معانا فلوس نروح لدكتور و اضطرينا نبيع انسيالي الدهب علشان نشتري مضاد حيوي... لا استنى انا مش بسيحلك واللهي... انا بس بفتكر احلى ايام كنا بنميل فيها على بعض في ازمتنا و صدقني مفيش حد في الدنيا مامرش بفترات جفاف و امساك زي دي
0
طيب فاكر عم فرج بتاع الادوات الكهربائية اللي كنا بنشتري منه الحاجات بالقسط؟ كان راجل طيب انا فاكرة مرة اشترينا منه مضرب بيض تمنة حاجة و اربعين جنيه و كنا بندفع قسط 13 جنيه كل شهر. الغريبة اننا مستخدمناش مضرب البيض الا مرة او مرتين بس كان عندنا رغبة اننا نشتري كل كماليات البيت، و كنا بنفرح جدا لما نجيب حاجة جديدة زي السجادة اللي اشتريناها من اوكازيون النساجون الشرقيون.. فاكر! و لا الستارة البلاك اوت اللي جبناها من وكالة البلح بعد طول صبر و نوم في عز الشمس ما هو اصل لما هدينا البلاكونة عملنا شباك الوميتال و حطينا عليه ستارة عادية ماكنتش بتحجب ضوء الشمس
فاكر يا طوطو لما انا دخلت اوضة النوم و قفلت الباب و معرفتش افتح الاوكرة الا لما رجعت انت من الشغل و فتحتلي من برة!! قعدنا وقتها نعيط و نضحك قال يعني اخدت افراج من الحبس الاحتياطي و انت جبت ابو الغيط و جيت تستقبلني

و لا لما كانت الكهربا تقطع كانت المية كمان تقطع و كنا بنعيش العصر الحجري في القرن العشرين فاكر لما كنت تقولي : كوزيه مواه سيلفوبليه
علشان اجيب لك كوز المية تتوضا ههههههه

و لما جاتلك الوظيفة اللي في الشركة الاستثمارية و اشترينا شقة جديدة و جينا نعزل... كنا بنودع الشقة بالدموع لانها رغم ايامنا الصعبة فيها الا انها كانت اجمل ايام

في عيد جوازنا يا طهقونتي بقولك الحب الحقيقي مواقف وتشابك مش كلام... بهديك احلى هدية ممكن حبيبة تهديها لحبيبها
تعبيرا عن مدى الدفا و الود اللي بينا
ربنا يخليك ليا و تفضل طهقان على طول

إمضاء

67 comments:

Sam said...

happy annivarsary...i am sure 6ahkan remembers it all..:o)

اسكندراني اوي said...

كل عيد طهقان وانتم طيبين

بس عارفه يا طهقانه
اه كانت الحيا مأشفره وضاربنا السلك بس كنا بنحب بعض

دلوقتي جت الفلوس وراح الحب

انا بكلم نفسي يا ست حد كلمك دلوقتي
عجايب والله

Unknown said...

يا سلام بعد كل الحياه الجميله ده بقيتي طهقانه طب ازاي التحول ده

khaled adel said...

بجد ما شاء الله عليكوا
ربنا يديموا عليك النعمة دي ويخليكوا مع بعض عالحلوة والمرة

القلم السكندري said...

بصراحة أجمل تدوينة قرأتها عندك

والله ياريت الناس تبطل كلكعة وتعيش حياة بسيطة بعيد عن التعقيد

والنبي بيقول:

أيسرهن مؤنة أكثرهن بركة

الحياة مش تاقصة تعقيد

تحياتي ياطهقانة

ومتغيبيش علينا بروائعك

Anonymous said...
This comment has been removed by the author.
Desert cat said...

حبيبتى طهقانة
" بعد العسر يسرا "
وكمان
" وبشر الصابرين "
الحياة مش بتمشى على وتيرة واحد عسر فى يوم ويسر فى يوم
والحمد لله ربنا عوضك انتى وطهقان كل خير
وكل سنة وانتى وطهقان اسعد زوجين فى الوجود
وعقبال يارب مليون سنة وانتوا مع بعض
بحبك موووت
اموااااااااااه

عصفور المدينة said...

أنا وبصفتي ماشي في الخمشتاشر برضه
أهني رفقائي في السلاح طهقان وطهقانة على حصولهم على الحصانة
انتي بتحكي حكاية الملايين بس متهيألي الأستاذ طهقان بيعزك زي توم وجيري بالظبط ليه بتقولي الحب مابقاش موجود؟

تهنئة حارة من زوجة العصفور
أنتم السابقون

ابن حـجـر الـعـسـقـلانـى said...

والله بعد الكلام الحلو دة .. انا شكلى كدة هاتجوز من بكرة

و كل خمستاشر سنة و انتم طيبين

мσнη∂ιš said...

بجد
ربنا يخليكو لبعضيكو و تفضلو طهقانين العمر كله

a Dreamer with feet on the Floor said...

If that is Ur Real Life..and It is not a fairy tail( In all cases U will B great autor )..if It is So ...then U R the Luckkiest Coupple,,,and shaould choose Other Names...Tahqan & tahqana will B meaningless...U should B ..Stasfied Couple,,,or sweet funny Couple..
I wish U have a sister as sweet as Tahqana as U ..
take care...

Anonymous said...

عسل .. هذا كل مااستطيع قوله

على فكرة أدعوكى لزيارة مدونتى ..لعلى انجح فى اهدائك ابتسامة

تحياتى

مشروع انسان said...

هو ده الحب الحقيقى
فعلا الحب الحقيقى مش كلام بس
ولا مشاعر تحسس
الحب الحقيقى مواقف وحياة يقدر اتنين يعيشوها مع بعض ع المرة قبل الحلوة
والاجمل بقى انهم رغم الحياة الصعبة دى
يبقوا متهنين
مش بس عايشنها مع بعض
لا يبقوا كمان فى كامل حبهم وسعادتهم
ربنا يخليكم لبعض
واذا كانت هذا هو الطهقان
ربنا ما يحرمكوا منه
واذا الوضع اتغير فانه عرفتوا الطريق
وانتوا اجدر ناس ترجعوه تانى
ان شاء الله تتبرعوا لفلسكوا
بس الاهم يبقى الحب ده زى ما هو

ياسمين حميد said...

هههههههههه
كل سنة وانتم طيبين

حلوة حكاية "كوز مواه"ه

Unknown said...

كل سنة وانتو طيببين

ويارب كل ايامكم سوا تكون سعيده ومش طهقانين

وربنا يخليكم لبعض يارب

خمسة فضفضة said...

السلام عليكم ورحمة الله وبركاته

كل سنة وانتم طيبين ، ربنا يديم المحبه بينكم وميحرمكوش من بعض ابدا

oceaneyes said...

كل سنة وانتم طيبين يا رب ...
..
وربنا يجعل ايامكم كلها سعادة وهنا
...
ويبعد الزعل عنكم دايما
..
قولى امين
..
:)

Unknown said...

لاااااااااااااا مش مصدقة نفسىىىىىى

طهقانة اللى مطهقة طهقان وحطاله ساطور بدل الماوس فى البلوج كاتبة بوست كله طقم حنية وحركات وبتاع؟؟؟!!!! لالالالا مش مصدقة بجد

هههههههههههه

معلش ياجميلة اصلى ازبهليت بجد لما قريت البوست .. ورغم انكوا كنتوا السبب وساعدتوا كتييييير فى عزفى عن الزواج إلا انك يعنى قللتى الموضوع شوية بالبوست ده وممكن ابقى افكر فى الموضوع مايضورش يعنى

:D

ربنا يخليكوا لبعض ويفرحوا بأولادكم اللهم آمييييييين

Anonymous said...

كل عيد حب وانتي بخير وكل عيد جواز وانتوا مع بعض تعرفي احلي ما في الموضوع اننا مش بنحس بحلاوة الايام دي الا لما بتمر علينا ياريت الايام الحلوة دي نفتكرها علطول علشان نحمد ربنا على النعمة الي احنا فيها

أحساس لسه حى...كلام من جوه روح لكل روح said...

عزيزتى
بجد ذكريات جميله وعيد جواز الف ان شاء الله
سردك جميل وسلس وسهل اوى ممكن تتقرا اكتر من مره مزهقش منها
يا ريت كل زوجين يطهقوا بعض زيكم
تحياتى يا افندم
سلاااااااااااااااااااااام

Anonymous said...

اهي دي الايام الحلوة ولا بلاش كل عيد زواج وانتو احباب ربنا يخليكو لبعض وربنا يحلي ايامكم دايما

تحياتي لاحلي زوجين

Ahmed said...

كل سنة وانتم طيبين ويدوم عليكم السعادة
انت عارفة انك ادتيني امل بكلامك ده
اصل محسوبك لسه سنتين جواز
بس شاف المر بالضيط زي عيشتكم الاول
وصابر ومستني الفرج
كلامك ريحني جدا
تحياتي

Anonymous said...

ايه دا ياعم

الست دي عتخليني اعيط .. د انا فاضل شويه و الم لكم

بس بجد ذكريات دافيه جدا

كل
annivarsary
و انتو طهقانين
طيبين يا ستي متزعقيش

الباحث عن الحقيقة said...

اجمل واسعد بوست قريته
شكرا على البوست الهايل ده
ده المفروض يتنشر فى كل مكان وكل الناس تقراه
بجد انتم حاجة....تطهق
هههههه
تحياتى

Anonymous said...

كل عيد وانتوا بخير وسعاده وحب
بجد يا بستوكه بوست جمييييييييل
مليان مشاعير دافيه واحاسيس جميييييله
ربنا يديم عليكو السعاده يااااااااارب وتفضلوا دايما حلوين و مش طهقانين
:)))))))))
سلامى يا جميل

Anonymous said...

Happy Anniversary..Rabna ye7'leekom li ba3d! Those are the great memories of a GENUINE love masha Allah!

God bless you all! :)

Anonymous said...

كل عيد حب وانتما مع بعض وربنا يخليكم لبعض

كراكيب عادل said...

تعرفي ان دة احلي بوست ليك

بس مفروض بعد دة كله متكونيش طهقانة ابداااا

فية حجات جميلة جدااا انتي شوفتيها ومريتي بيها

ربنا يسعدك

وكل سنة وانتوا طيبين

مبروك تغير الالوان في المدونة

قوت القلوب said...

السلام عليكم

دي اول مرة اعلق عندك يا مدام طهقانة

بس انا متابعاكي من زمان..وبوستاتك روعة وطريقتك لذيذة اوي في الكتابة..ربنا يحفظك يارب

انا اما كنت بقرأ البوستات واشوف الحكايات اللي بتحكيها والمواقف اللي مع طهقان..كنت بحس انكو بتحبو بعض اوي

وزي ما قلتي الحب مش بيبقى كلام وبس..لا بتبقى افعال ..والمواقف اللي بتحصل بين الزوجين وتكون صعبة وبيقفوا جنب بعض فيها ..دي فعلا بتبين مدى حبهم لبعض

وطبعا الواحد لما بيدخل في مسؤوليات البيت والاطفال بينشغل شوية..بس ياريت يا كل اللي متجوزين متحرموش نفسكوا من لحظات الحب والرومنسية..وخلوا ولادكو يحسوا قد ايه بتحبو بعض..ده بياثر فيهم جامد

وربنا يارب يكرمكو ويديم الحب ما بينكو ويحفظلكوا اولادكو ..آمين

تحياتي

3ala asm masr said...

ربنا يخليكوا لبعض
وكل سنه وانتوا طيبين
وبجد نفسى اكافح مع اللى هتجوزوا كده
رغم ان الحياه بتبقى صعبه بس بتبقى حلوه
ربنا يخليكوا لبعض

kikooooooooo said...

كل سنة وانتوا طيبين
أنا أول مرة بجد أشوف اتنين طهقانين كده وبيحبوا بعض بالشكل ده
بس إذا كان الطهقان ده هو سبب الحب
يا رب تفضلوا علي طول طهقانين وبرضه بتحبوا بعض
كان معكم ..,
كيكوووووووو

يا مراكبي said...

الله على أحلى بوست وأرق بوست .. أيوة كده هو ده الكلام

كل سنة وإنتي وأخويا وحبيبي طهقان بصحة وسعادة وربنا يديم عليكم السعادة لمدة إسبوع واحد حتى على الأقل

آدي دقني لو كملتوا إسبوع

simple girl.. ..simple dream said...

ياريت كل البنات يقروا البوست دة عشان يتعلموا انهم لما يستحملوا صعوبات البداية دة هيكبرهم فى عيون اجوازهم اكتر وهيقوى الصلة اللى بينهم اكتر

خلاص البنات مابئيتش عايزة تتعب
عايزين العريس الجاهز وخلاص ولا عزاء للحب والعواطف


وكمان الاولاد اللى بيترعبوا من سيرة الجواز
خد بنت الحلال اللى بتحبك وكلوها بدقة لحد ما تقف على رجليك
مش احسن من لما تعدى ال 35 وانت لسة من غير جواز


بجد بوست جميل ومؤثر
كل سنة وانتو طيبين ورنا يخليكو لبعض

Shower-Mirror said...

كل سنه و انتوا طيبين ... و عقبال انشاءالله لما تنقلوا على الفيلا بتاعة القاهره الجديده و تفتكروا زكرياتكم فى الشقتين

كلبوزة لكن سمباتيك said...

يعني استحملتيه ايام الضنك و صبرتي معاه و يرجع يقول مطهقاني اما الرجالة دول يستاهلوا الساطور

تحياتي

ZaHrAt El3eN said...

كل سنه وانت مع بعض دايما

كلامك جميل اووووووى يا طهقانه

ربنا يخليكم لبعض دايما وتفضلوا مع بعض

محمد عبد الغفار said...

بزمتك ده كلام ناس طهقانين من بعض

ربنا يملئ كل حياتكم هنا وسعاده

Unknown said...

والله ما عارفه اعلق اقولك ايه
بس بجد انا سعيده جدا جدا بكلامك ده
ربنا يارب يديم عليكوا السعاده والدفا خصصا الشتا قرب كمان
هههههه
بس ياريت كل الشباب والبنات يقروا البوست ده يا طهقانه خصوصا البنات اللى مقبلين على الجواز
واللى كل همهم الشبكه لازم تبقى مش اقل من بتاعه بنت خالتى
وشقه على الكورنيش
وميتعمليش فرح باقل من 50 الف
ياريت يقروا كلامك ده ويستطعموا السعاده اللى فيه لان بجد
فى لحظات مش اى حد بيقدر يحسها
وكل عيد حب وجواز وانتوا طيبين وسعداء يارب ومش طهقانين

Soooo said...

المشكله يا طهقانه ان الكلام ده كان زمان والله

يعني تسعين في الميه من البنات اللي عايزين يتجوزو دلوقتي عايزين شقه اقل حاجه اوضتين وصالة تلات قطع .. زي الفراخ بتاعة كنتاكي مثلا .. وحمامين .. ومطبخ .. ويكون العريس معاه عربيه .. وتكون الشقه قريبه من بيت اهلها
ده لسه ولا اتكلمنا في مهر ولا شبكه ولا فرح ولا الحوارات دي
وطالع موضه بنت لذينا قوي .. قال ايه نفسها تتزف في عربيه ليموزين استرتش
منين تتزف في استرتش ومنين تلبس فستان الفرح ؟؟؟
وبعد كل ده .. تقولك عايزه اروح شرم .. وممكن انضف حته راحتها في حياتها المنصرمه تكون كفر جعيدي في البدرشين مثلا

على اي حال .. ربنا ييسر الامور لكل الشباب ويهدي البنات ويرزقنا الزوجه الصالحه اللي تعيننا دنيا واخره
ويكرمك انتي وطوطو ويباركلكم في ولادكم يارب
ويعود عليكم الايام بالخير
وهنيالك يافاعل الخير والثواب
والسلاموووز ختامووووز

^ H@fSS@^ said...

انتي زي العسل و طعمه و مسكرة
لا ده طهقان لو مدلعكيش اكتر من كده مش حيحصله كويس

هههههههههه
لا بهزر
بجد ربنا يخليكوا لبعض و ان شاء الله تحتفلوا بلميون عيد زواج و تمتعونا بخفة دمكم انتوا الاتنين
زو نستفيد على اديكوا من الدروس الزوجية

تحياتي ليكي و لطهقان

ولــــــــــو said...

اولا كل عيد جواز وانتوا بخير
انا فعلا استمتعت جدا بالبوست ده غير كل البوستات اللي قريتهالكم قبل كده
وتخيلت كل وصف لموقف حكيتيه ماعدا بتاع الحمام ده بصراحه
بجد انا اتأثرت بالكلام ده جدا
ربنا يخليكوا لبعض
ولينا احنا كمان

nadeen_rev said...

كل عيد جوازوانتو بخير
والله دا بيجد احلى بوست قريته ف حياتى
انا بيجد عشت المواقف اللى بتتحكى
وكنت هعيط ولله
كل سنه وانتو مع بعض وبيتحبوا بعض

hamasat said...

كل عيد جواز وانتم طهقانين
علي فكرة احنا كمان تبع الجروب بتاعكم تقريبا نفس فترة الطهقنة ونفس الحب اللي مقطع بعضه دا, آه والله عارفاه بس طهقان بتاعي عمره ما بيفتكر عيد طهقنتنا الظاهر طفح الكيل معه من اول سنه
ربنا يديم ال...والسنه الجايه نبارك لكم بالعيد الجديد
تحياتي

BaTresYa said...

جيت متأخره :(
بس ده مش يمنع اني اقولك كل سنه وانتس وطهقان بخير ...ويخفف عنكم الطهق ده يارب

KIMOOOZ said...

اول مره اشوفك بتتكلى على طهقان عدل
ما الراجل حلو اهوه

هو ده راجل يطهق
ده انا لو ست اتجوزه

الا صحيح معنكيش اخوات بنات ينفع نتجوزهم
بس يكون دمهم زى العسل زيك كده

سجدة said...

كل سنة وانتم مع بعض وبحبك وخير وسعادة ربنا يهنيكوا ببعض يارب

simple girl.. ..simple dream said...

would u plz visit my blog and participate in my poll
i really need ur opinion


with my best regards

شهيدة said...

كل سنة وانتو طهقانين قصدي طيبين

ويارب عقبال ما تبقوا مع بعض ميتين سنة


معاك حق تماما الحب بالذكريات والمعاناة المشتركة

ياترى انا بعد خممتاعشر سنة من دلوقت حيبقى ليه ذكريات زي دي؟

حنستنى ونشوف

تحياتي ليكي ولعمو طهقان هههه

اورفوار

Ma 3lina said...

Happy anniversary we rabna ykhleko li b3ed isa :)))

الأستاذ said...

آه ما أحلى ذكريات ما قبل الطهقان ذات نفسه
ولكن كل سنة وانتم طهانين علطول
ومع أطيب تمنياتي لكم بدوام الطهقان في كل الأوقات
تحياتي

مـحـمـد مـفـيـد said...

كل سنه وانتم بخير وسعاده وود وأخلاص

عصفور اسكندرية said...

كل سنه وانتم طهقانين
بجد فرحت ليكم اوي
ربنا يسعدكم علي طول

الواحد نفسه يبدا حياته كده بكفاح زيكم عشان ربنا يكرمنا زيكم



عيد سعيد

.....

اخر بوست عندي
المواطن المطحون: ملتقي المدونين الاول 2007

Ahmad Hegab said...

تحياتى على البوست الرائع و شكرا على مشاركة تلك الذكريات الدافئة

Ahmed Mubarak said...
This comment has been removed by the author.
Ahmed Mubarak said...

الله ..بجد جو جميل أوي..ربنا يخليكوا لبعض
:)

Unknown said...

على فكره يا طهقانه نسيت اقولك
الاغنيه جامده قوى
فى الجون

محمود على said...


كل سنة وانت مع بعض
وبخير
وحبكم يزيد

Phoenix said...

تعرفى ان الكلام اللى انتى كتابه ده

بجد نصيحه لكل اتنين بيحبه بعض وبيقوله الظروف

مش هتسمح اننا نتجوز

طيب مااهلينا اتجوزه كده بااقل حاجه

وبعدين كبره مع بعض

بجد انا كنت مقتنعه بالكلام ده

بس لما كنت بقوله لحد يقولى بطلى كلام افلام بقا

بس والله من بعد ماقريت اللى انتى قولتيه عرفت انى على حق

وانه مش كلام افلام

ربنا يدوم الحب وتفضله كده
دايما

وادعيلى بقا انا كمان اقدر اقنع اللى بالى بالك (وش بيغمز)

انه يرجع بقا من السفر وكفايه غربه

yomna said...

يا سلااااااام
فكرتيني بالذي مضى
مش انا طبعا...انا لسه مدخلتش دنيا و مش ناوية الصراحة
انا بقول على بابا و ماما
كانوا برده ناس مش مكلكعة كده و بصراحة كان ضاربهم السلك في الاول و لا كان عندهم عربية و لا كيتشن ماشين و لا حاجة ابدا...و شقتنا برغم انى مش فاكراها اوى لكن كانت حاجة كده عاملة زى علبة الكبريت.... و كانوا بيتشعبطوا في المواصلات و كانوا مقشفرين على الاخر لحد ما ربنا كرمهم

هههههه

كفاية فضايح لحد كده...كل سنة و انتوا طيبين و ربنا يجعلها اخر الاحزان

Sara Swidan said...

والله يابنتي الكلام دة اللي أنتي قلتيه ... بيطمنني ...

مش عارفة ازاي ، لكن بيطمنني!

koukawy said...

ربنا يخليكوا لبعض
دي فعلا بتبقي احلي ذكريات

غمض عينيك said...

بجد بجد ربنا يباركلك ويبارك في حياتكوا
كل سنة وانتي طيبه
وكل سنة وطهقان مش طهقان
وياربي يملى حياتكوا سعاده وهنا وحب وووئام ومن قبلهم
رضا

كل سنة وانتوا طيبين

Asmaa mahaba said...

خدنى الحنين بعد السنين جابنى هنا هنا للمكان اللى اتولد فيه حلمنا وبكينا فيه وضحكنا فيه من قلبنا هنا ببلقى نفسى وروحى هنا ببقى انا عديت على البيت اللى كان فيه الحبايب راجع ما بين الشوق ولهفه قلب دايب اجمل صبا وناس طيبه هنا اجدع جران هنا اصحاب زمان هنا حب عدا وفات عليه عشره خمستاشر سنه
بهديلك انتى وطهقان اغنيه محمد فؤاد خادنى الحنين وكل خمستاشر سنه كمان وانتوا مع بعض وربنا يهديلكم الحال
تحياتى ليكى

newtahqana said...

كل عيد جواز وانتم بصحة وسلامة
بصراحة عجبني البوست بتاعك جدا وشجعني جدا جدا
خاصة اني هاطهق جديد قصدي يعني هتجوز جديد
وحسيت انك بتتكلمي على شقتنا انا وخطيبي بالظبط بس اراهنك يكون الحمام بتاعكو زي بتاعنا احنا حمامنا داخل موسوعة جينس
حاجة كده اشي خيال يا ناس
يعني انت تدخل وهدومك تحصلك ماينفعش تدخلوا مع بعض
مرة تانية كل عيد جواز وانتو طيبين

mostafa rayan said...

عقبال العيد 100

Anonymous said...

تعرفى انا بغيب اغيب و ارجع للمدونة دى و البوست ده بالذات لانه فعلا اد ايه رقيق و خارج من القلب بجد لدرجة ساعات عنيه بدمع مع كل مرة بقراه

بطوط حبوب said...

ربنا يخليكوا لبعض بجد
بس سؤال
هو لسه فى منك تانى عشان انا عاوز اجوز
ودامك سنه تدورى لو لقيتى منك تانى قوليلى