ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

الإعتراف سيد الميدلية

وحشتوني
لا انكر عليكم البتة ان الكوافيرهرجية اللي عملتلي العَمرة اقصد النيو لوك كانت ايدها تقيلة حبتين و حبت تشتغل بضمير فيظهر انها زودت المونة و ادتلي وشين تلاتة زيادة باين عليها كانت فكراني هربانة من قضية تموين و عايزة اتفادى لجان تفتيش طريق العلمين اكمني يعني كنت وش مصايف و ناوية اشرخ على مارينا
مطولش عليكم قولي طولي طبعا بعد ما اديت لطهقان الطريحة التمام و غسلت اثار التشوية اللي حصلي في وشي و سرحت ليفة الحمام اللي عملتهالي الكوافيرهيرجية سالفة الذكر ضربت الكاجوال و جهزت الشنط و ستفت البراشوتات و عزفنا انا و طوطو الاقلاع على اول عربية الى الساحل الشمالي يومين نكاهة بعد الغم و النكد و الخناق اللي احنا فيه
و زي ما قالوا اللي قبلنا رحت اتفسح جه ورايا يتأنزح و الأنزحة اعزائي البلوجرية كلمة عامية معناها..هم.. يعني مش عارفة
و المقصود اني بعد ما ضربت المشوار الى مارينا اللي هي المفروض قرية سياحية خمس نجوم لصفوة حرامية البلد و اللي تمن الفيلا فيها يقف بكام مليون لقيتها لمت حسالة اشاشة البلد و كل اللي معاه كام ملتوش راح و اجر فيها و ظهرت على شواطئها الحلل و الملايات المحلاوي ام كاروهات و البنطلونات الاسترتش اللي تحت الجلابية و اجري ياما على البحر بلبطي
ياختشييييييييييي
و طبعا لا مانع من بعض العبارات السانتيمنتال اللي بترشق في الودن من عينة
انتشي يا بتششش تشاعلي اطشفحي... سنتوتش المكرونة حيبرد
انت يا ياد يا ابن ال تييييييت ده من باب الهزار و الترويح عن النفس
الولد: اما عايز اتصير...الام: ماعندك البحر اهو اتصير فيه
خلاصة القول بقينا قاعدين انا و طوطو مقهورين على حال البلد اللي وقعت فريسة في ايدين الهليبة و اللي ساوت بين اصحاب الشهادات و الخبرات و المناصب مع اصحاب السيفونات و الشكمانات و النقاشة

و قلنا نهرب من هذة البوتقة محدش يسالني بوتقة يعني اية و نروح ما يسمى شاطئ السيارات و ده شاطئ مغلق لملاك الوحدات في مارينا و مبيدخلهوش غيرهم
قلنا كويس يبقى ملموم و نضيف و مش حنلاقي هناك لا محشي و لا كشري ولا حد ماسك ازازة ملوخية و فحل بصل بيمز بيه
لميت العيال و العوامات و الفوط و ترمس الشاي و الطواقي و رحنا انا و طوطو بصدر مفتوح نامل في غدن مشرق

و عاديكم
اللي حصل لا ينحكي و لا ينقرا و الناس خيبتها السبت و الحد و احنا خيبتنا ما وردت على حد و غطيني يا مامي و ميك فويس و انا لما اقلب انجليزي تعرفوا ان الامر جلل

جعمزت تحت الشمسية و ابتسامة ستة كيلو على وشي و طوطو فرد الشيزلونج و قعد يستجم و فجأة لقيت مزة –في بعض المعاجم بيسموها ملة- بتعدي من قدامنا مع سبق الاسراف و التأصد و هي لابسة ايشارب.........بس
ايون ايشارب بس و كمان الهوا عمال يفسحه شمال و يمين و اللي ما يشتري يتفرج
عنها و لقيت عنين طوطو طلعت من وشه و حواجبه طارت و قلبه خرج من صدره و بقى عمال يدق دمدم تك دمدم تك تك
قلت يا بت متنكديش على نفسك فريش فريش و احنا في رحلة
مفيش ثواني و ست ارشانة معدية بمايوه بكيني و وراها نصف دستة مايوهات بيك من غير ايني و على الشمال توبليس و على اليمين كاش مايوه من غير مايوه
يا دهوتيييييي
انا:ايه جهنم الحمرا اللي جبتنا فيها دي يا سي طوطو قوم بينا
طهقان: و احنا مالنا بس احنا خلينا في حالنا سيبي العيال يبلبطوا في البحر
انا:قوم يا راجل مفيش بحر و لا بلبطة و لا نيلة ده مصيف مهبب من اوله
طهقان: يا ستي يعني لا عاجبك الحلل و الكشري و لا الباتون ساليه اللي معدي ده
انا: اسمع رجع عنيك لمكانها بدل ما وقعهملك و اخليك تصيف في الكيت كات مع محمود عبد العزيز
طهقان:طيب يلا بينا
و سمعته بيقول بصوت واطي :ضيعتي علينا المصلحة و كلام برطمة تاني مسمعتوش
و روحنا البيت مليت البانيو و نزلت العيال تبلبط و عملت لطوطو كباية الشاي ام نعناع اياها و تاني يوم رجعنا قعدنا وسط الملايات المحلاوي و حلل المكرونة و انا كلي سعادة
صحيح يا ولاد مفيش احسن من البنطلون الاسترتش اللي تحت الجلابية و صدق اللي قال
الفقر سترة و نفسي اعرف ابن هرمة مين اللي قال البلد اللي ميعرفوكش فيها شلح و امشي فيها
و الشخص الحكيم اللي قال
قال يا ابويا شرفني قال لما يموت اللي يعرفني
و كفاية بقى

و اوروفوار

54 comments:

سندباد said...

تخيلي بقي اني اول واحد اعلق شوفي بقي دي معناها ايه انا محتاج هدية لاء هدايا ربنا يخليلك طهقان والعيال ويديلك علي قد نيتك ويفرحك يونولك اللي نفسك فيه
فين الهدية بقي

أسامه يوسف said...

ياهوووووووووووووووه طهقانه!!!!
فينك
إيه السؤال الغبى ده فى مرينا طبعاً
ماكنتى خليكى هنا يا طهقانه أحسن واهو كنتى كتبتيلك بوستين وكان طهقان ريحك
وعلى العموم حمدالله عالسلامه
وربنا يعوضك ياطهقان

البدراوى said...

و المقصود اني بعد ما ضربت المشوار الى مارينا اللي هي المفروض قرية سياحية خمس نجوم لصفوة حرامية البلد و اللي تمن الفيلا فيها يقف بكام مليون
يعنى افهم من كلامك يا طهقانه انك انتى وطهقان بقيتوا من صفوة حراا.... البلد ومعاكم ملايين
والله ولعبت معاكم الله يسهلكم
تحياتى الى زوجك العزززززيز

Ma 3lina said...

وحشتينى موز موز موز

ازيك يا اختشى انتى و العيااال
ان شاء الله بخير كده

بقى تسيبى النضافة و تروحى للبلدى مكنش العشم كنتى حبستى طوطو فى الشاليه و انطلقتى انتى و العيال

يالا ما علينا

وهوا البانيو يغنى عن كل حاجة

متبقيش تغيبى عنننا كدا

أبوشنب said...

همه قالو البلد اللي ملكش حد فيها

امشي وشلح فيها
********

مش كنتي قلتي من زمان

بعد ازنكم يا جماعة

وصلة تشليح وراجع لكم

Shower-Mirror said...

اسمه شاطئ نادى السيارات يا جاهله

انا عارف الاشكال دى بتروح مارينا ليه؟؟؟

اوففففففف

انتوا مالكوش الا مارينا واحد و مارينا اتنين بتاعة الحلل و شلح و الحاجات دى



جاتكوا البلاوى مليتوا البلد

السنه الجايه ابقى ارجعى جمصه تانى ياماما انتى و يور فاميلى
*******************************


ملحوظه: شوفتينى وانا بزبس مان ...!! اجنن مش كده؟؟؟؟


هههههههههه

الطائر الحزين said...

السلام عليكم

تعرفى لأول وهلة عندما تحدثتى بسخرية عن الناس اللى لابسين جلاليب والذى منه دول ناس بيحوشوا 15 سنة علشان يطلعوا يوم زى ده
طبعا هذا به بعض السفة
بس تصدقى أنا اتضايقت منك

وكنت هاعلق لو التدوينة وقفت على كدة و اقول لك اما انتى عاوزة العريانين اللى مايشين ولا حد هاممهم لقيتك قلتيها فى النصف التانى من التدوينة وعموما

ليه الاستمتاع دوما بيكون مرادف للتحرر والانفلات ليه ما يكنش الاستمتاع دون معصية

معلهش قلبتها نكد
سامحينى تحياتى

عاشقة الوطن said...

ازيك ياطهقانة ايه اخبارك واخبار طهقان معاكى ايه
البحر كمان اتغير حاله ومش عارفين نتعامل ازاى بعد كده
بس سيبك انتى اهوه حاجة أخف من حاجة
الحلل والكلايات ارحم من البكينى وغيره

مصيف سعيد

الكلام نوعان :كلام فارغ وكلام مليان كلام فارغ said...

ايوه يا عم الله يسهلك
مارينا حته واحده
طيب ماكنتى تخلى طهقان في الباتونساليه
يمكن باله يروق وماينكدش عليكي
ومنعا ان ولادك يسمعوا الكلام العجيب بتاع الناس بتوع الاسترتسش تحت الجلابيه
يلا اهى كلها جهنم الحمرا

SaSo said...

خير ماعملتى اوختشىىىى
المره الجايه بقى عليكى او على بلطيم
سمدلله ع الحلامه وكل مصيف وانتى طيبه

^ H@fSS@^ said...

معلش
خيرها في غيرها
للاسف مافيش اي حاجة في مصر تبقى باعتدال
على راي المثل يا اطخة يا اما اكسر مخه
حاولي تسرحي في البحر و بس
و انسي كل القرف اللي شفتيه في البلاج

تحياتشي يا اختشي

basma saghir said...

مبروك على النيولوك
ومصيف سعيد ان شاء الله...قوليلي بقى مالها الملايات اللف وحلل المحشي والكشري..محدش بيهرب من اصله لا محالة
خليكي فريش وانتو في مصيف علشان لو مفيش حلل محشي اكيد اكيد هيكون في مايهوهات بيك من غير ايني

قلبي عندك

الهادي كملاوي said...

وحشتونا والله طهقانة وطهقان .. وألف حمدالله علي السلامة .. وسعدنا بعودتكم لأننا بصراحة فقدناكم كتير ، بس ما حدش قال لينا أنتو مشيتو بتتفسحوا مع العيال على البحر والبيتش .. بس ما خليتيش طهقان يبقى على البحر شوية مع العيال ..

3abdo me7tas said...
This comment has been removed by the author.
3abdo me7tas said...

هههههههههههههههههههههههههههههههه
ههههههههههههههههههههههههههههههههه
هههههههههههههههههههههههههههههههه
هههههههههههههههههههههههههههههههههه
ههههههههههههههههههههههههههههههههه
هههههههههههههههههههههههههههههههههه
ههههههههههههههههههههههههههههههههههه
ههههههههههههههههههههههههههههههههههه
ههههههههههههههههههههههههههههههههههه
هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
هههههههههههههههههههههههههههههههه
ههههههههههههههههههههههههههههههه
بجد مش قادر أعلق على الموضوع إستنى بقى لما أهدى وهقول على اللى جوايا
دا أول مرة أخش هنا حرام عليكو

Desert cat said...

يا عينى عليك يا طوطو ملحقتش تظبط المصلحة
على العموم بقا كدا عليكى وعلى فايد يا طهقانة حتعجبك جداااااااااااااا
ايععععععععععععع

Anonymous said...

السلام عليكم

لا
وفيه حاجة كمان اسمها

حد عارفني
طب حد شايفنى
طب طز

خدي بالك من اونكل
وبلاش مصايف افضل
قضوها بانيو
عشان لايبقى فيه مصلحة
ولا يبقى فيه باتون سالية

موووووووووا
سلام

نفسنا said...

ندعوكم لزيارة العدد الثالث لمجلة نفسنا

Anima said...

بصي بقى

لو كنت جيتي تصيفي عندنا احسن لك اصلي بيتنا ع البحر على طول

و جيبي معاكي العيال و ما تجيبيش طهقان اصلو عينه زايغة و ما بيختشيش

و بقولك كمان برافو عليكي و بوصل تحياتي بالمناسبة دي لماما و بابا و كل العيلة و حصوة في عين اللي ما يصلي على النبي
دي اتعلمتها جديد


طهقان لو عايز دروس في المغربية قول انت مش محتاج واسطة بس حاديك الدروس في حضور طهقانة

Unknown said...

وأنا أقول برده بستوكة ده كله فين ده كله فيييييييييين
اتاريها كانت بتصيف
المشكلة يا طهقانة ان بلدنا تلاقي يا مثقفين قوووووووي يا مايعرفوش حاجة خالص

يا ناس هاي قوي يا ناس لوو قوي
وفي وسط ده ناس عاوزه تتشعلق في الفوق ومش عارفة توصل

زي بتوع حلل الكشري دول

والناس الهاي فاكرين أنهم كل مايقلعوا أكتر كل مايبقوا هاي أكتر
:))

أقولك؟
بلاش وجع دماغ لا مصيف ولا غيره احنا بتوع مصايف برده؟
ما البانيو أهو موجود
:))

سكينة said...

بلاش مصاريف من غير سبب
يا إما يتصير في البحر
:)
يا إما يضيع الراجل من إيدك؟؟ إيه الغلب ده
!!!
عموما لا مصايف بعد اليوم كله الإ الراجل والفوكبيولاري بتاع العيال
بقالي كثير قوي ماسمعتش تصريف الافعال يتصير دي جاية من فعل صار
:)
حمد الله على السلامة

خمسة فضفضة said...

السلام عليكم ورحمة الله وبركاته

معلش بقي يا طهقانه يا اختشي ...هههههههه

استحملي الحلل والملايات المحلاوي
احسن ما الراجل يضيع من اديكي ، وحتي لو وصلت للبانيو مش مشكله قضيها بانيو وامرك علي الله

بس ارجع واقول انت اللي غلطانه حد يحط البنزين جمب النار ، المفروض كنتي سبتي سي طوطو في مصر ورحتي انت والعيال بس

تحياتشي يا قمر

Unknown said...

يابختك ياعم صيفت
المرة اغلجاية بالش مارينا انتى واخدة النار لكبريت
كل سنة وانتى طيبة

LOJAIN said...

يعنى رايحة وواخدة الراجل للتهلكة
يا واخدة بعضك لقلة القيمة
متفكرنيش يحبيبتى لما كنت فى اسكندرية
كفاية قوى كمية العوامات المصنوعة من قلب كاوتش العربيات
العوامة قطر 120 سم آت ليست

والله انا ريحة الاكل بس ووالله مدخلت الشط و من بره
قلبت معدتى
والعيال المعفنة اللى ملزق عليهاالرمل من المية يتخلله يقايا اكل
حاجة تقرف

بس استنى عليا بس لما امسك رئيس جمهوية
همسكك شئون البيئة وامنجهك
بس ادعيلى انا فى امتحانات

Regards:
Lojain :)

ta5areef said...

حمدا لله ع السلامة
الانزحة للتوضيح معناها الشألطة او الحشكلة
وبعدين قالوا اللى بيسرق بيروح فين
بيروح مارينا طبعا

Esmeralda said...

اولا نعيييييييييييييييما
ثانيا الايشارب ده كان على راسها و لا فين بالظبط؟؟؟؟
حضرتك دلوقت الفلوس هى سيده الموقف و اى ميكروباص و مش مهم المستوى الثقافى او الاجتماعى
يلا بالشفى

حصان بري said...

دايما كابته الراجل كده يا طمطم
الراجل مايعرفش ينضف عينه شويه يعني

بس بجد مسخره
مش كنتي نويتي تنزلي كتاب
هيبقي تحفه

Nooooooo body said...

يا لهوي دي اول مرة أخش بس شكلي مش هاشيلك من البوك مارك خالص.
ربنا يصبر طهقان و يخلي مراتتنا مش زي طهقانة.

مدونة كسبان said...

حمد الله على السلامه
ياطهقانه
سؤال اهبل ومالهوش لازمه

ياطهقانه ايه بس النوايا السيئة دى
لازمته ايه الشك بس

سؤال اهبل ومالهوش لازمه

هو الايشارب كان جامد اوى كده؟

Doba said...

مش تسيبى الرجل يروح عن نفسه شوية - مصيف يعنى تصييف يعنى تغيير يا اوختشى

كده كبستى عالراجل وخلتيه يرجع وهو خالى الوفاض - يلا اهو نصيبه يستاهل

روحى اعمليله انتى بقى مايوهات وحراكت وخاصة الايشارب ومتنسيش تشغلى المروحة علشان تطيره

هههههههههههههههههههههه
تحياتى يا بستوكة
هبة

yasser_auf said...

عزيزي طهقان

علي رايء المثل اللي فات دارة مع مراتة و عيالة اتقل مقدارة و راح مزاجة ...يا ابني اللي عاوز يفسح عيالة اخره معاهم النادي ...مؤمن ...
يالا اديك اتعلمت الادب بالفلوس اللي كعتها ...محدش بيتعلم ببلاش ...الا قولي يا طهقان الكاش مايوة اللي من غير مايوة تحتة دة كان لونة اية ؟طيب مسورتهوش علشان نعملة موضوع عندك !!!

david santos said...

الشكر لك العمل وعلى درجة جيدة في عطلة نهاية الاسبوع

sa7arkash said...

ايه النيه الوحشه دى يا طهقانه..بتوع التوب ليس دول ناس مظاليم بس هاى كلاس..فبدلما يروحوا مولد سيدى اللى مش عارف ايه ويكشفوا راسهم ويدعوا.. بيروحوا مولد سيدى ماينا ويكشفوا ....ويدعوا برضه مش بقول لك مظاليم وانتى اللى نيتك وحشه

بنت القمر said...

حمدلله على السلامه وحشتينا
بجد دى مشكله؟؟ الناس المتوسطه ماهاش مصيف فعل
!!يا اماحلل ومحشى والمصيف يبقى شعبى طحن
يا اما من العينه اللو بتحكى عليها
تدفعى كام الف فى كزا يوم تتقهري عليهم وتحسى انك غريبه فى المكان
؟؟ يعنى بجد الطبقه المتوسطه تروح فين احنا هنا فى اليكس مثلا منقدرش نروح الشواطئ كاها لانها اخرها 25جنيه طول النهار وتبقى قاعدة وجمبك حمو والنبوى وشلاطه والساحل اهو تروحى ترجعى مش طايقه نفسك ومخروب بيتك وجوزك هنده ازبهلال فى الامبلنس!!!اتحياتى وعقبال كل سنه

اسكندراني اوي said...

هههههههههههههههههههه
باظ المصيف
يعني لا كده عاجب ولا كده عاجب طهقتي الراجل
هههههههههههههههههههههههههه

معلش المصيف الجاي روحو سما العريش
لاحتلاقي حلل ولا كاش مايوه

ناردين said...

طهقانة العزيزة
بجد فرحانة اوي انك لاقيالك سكة مع طقهان باشا
بس كنتي سيبي النيولوك شهرين تلاتة كده عقاباً ليه
وبالنسبة للمصيف والإشي إشي
انتي تروحي وتنبسطي وتسيبي الولاد يلعبوا وهو لو بص يمين ولا شمال
يبقى دراعك لامك
ودا علاج بالمثير السلبي
يعني كل بصة .. بقرمة
بس ياخوفي من طهقان
يسيبلك دراعه ويقعد يبص ويتحمل الأمل في صبر الجمال
:)
مبسوطة ان اخييييييييييييييراً فيه بوست جديد
وفعلاً موضوع الايشارب محتاج مزيد من الايضاح
:)

shahy said...

يا فقرية
انتي مش عجبك ولا المحشي ولا العريان
طيب هاتعملي اية يا مسكينة

وبعدين كنتي قعدتي تتفرجي انتي كمان هي صحيح بتبقى مناظر ترفع الضغط وتحرق الدم بس اهو تغيير

عموما رحلة سعيدة وعقبال السنة الجاية
وما تبقيش تغيبي علينا كدة

تحياتي

عروس البحر said...

هي الاماكن
السياحية اللي في مصر كده ياتصرفليك 10الف ج عشان تبسطي يا تدفعي اي هطل و متبسطيش

mohand said...

السلام عليكم
هههههههههههههههههههه
الله يكون في عونك يا طهقان يا خويا
كل مصلحه ومصلحه تروح منك
انت غلطان كنت روحت المصيف لوحدك

عرفت انا ليه لسه اعزب
الحمد لله
----------
ايه ده دا انا بعلق لطهقانه
اه صحيح
أحم
أحم
والله يا طهقانه يا اختشي عين العقل اللي عملتيه
مفيش احسن من البانيو
امال هما عاملينه ليه ؟
بس يا تري هتقاطعي المصايف
اوعي كده هتوفري لطهقان وهيصرف فلوسه في حاجه تانيه
يالا صيف سعيد رائع ان شاء الله
تحياتي

سكوت هنصوت said...

طهقانة
عذرا للمقاطعة
نحتاج الى رأيك ودعمك في حملة القضاء على المخدرات انتظرك هناك
www.tw3ya.blogspot.com

aya said...

برافو يا طهقانة انك قومتيه وبوظتى عليه المصلحة

مش عارفة لبما هما ناوين يقضوا حياتهم يبصوا للستات اللى بره
بتجوزوا ليه
ومش بينوبنا منهم غير التريقة
والمصيبة انه زوقهم
يعنى ماحناش مغصوبين عليهم

يالا ربنا معاكى تقضى على حيله وخططه للتزويغ من الرقابة

وبلاش النيولوكات الجامدة ديه يا مدام طقهانة
احسن اعرف واحدة عملت شعرها مزمبلية دخلت على جوزها فى الضلمة وجاتلوه سكتة قلبية ومات


ابقى خلى بالك والنبى

Anonymous said...

السلام عليكم ورحمة الله وبركاته
الاخت العزيزة الى زى العسل
طهقانه
هذا اور مرورى لى على مدونتك الغاية فى الروعة والجمال فعلا مدونه هادفة وميزه هى وطهقان طبعا
نجحتم فعلا اثارة ما يدور فى الحياة الزوجيه وتناولها بشل فوق الرائع
تقبلى حبى واعتزازى
وفى انتظار المزيد


امضاء

رنيم

Anonymous said...

السلام عليكم ورحمة الله وبركاته
الجميله طهقانه
قراءت موضوع طهقان عاوز اتجوز
وعلقت عليه يا ريت تبقى تقرائى التعليق
وكمان كنت فكرت اطرح عليكى فكرة تناول هذا الموضوع لكن من وجهة نظر الزوجة التى ستجيدين شرحها بالطبع كالعادة
ومداى الاثار النفسية السيئةالتى يتركها الزواج الثانى او مجرد معرفة الزوج لسيده اخرى على الزوجه
او ليس من حق الزوجه
ان نراعى نفسيتها ونتعامل مع الجانب النفسى والمعنوى لها
لان استقرار هذا الجانب لديها وانتعاشه وهدوئه
بالطبع سيعم بالخير والسعادة على جميع افراد الاسرة
واولهم واهمهم الزوج
فى راى عندما تستقر نفسية الزوجه وتهداء خصوصا من جانبه هو كلما دامت السعادة بينهم

وايضا حتى لا تصبح الحياه بالنسبه للزوج من وجهة نظرة قتل لاحلامة واحباط لتحقبق احلامة
وبالتالى تصبح الحياه لديه
اهى عيشة والسلام


بانتظار ردك

فى هذا الموضوع الذى انتى خير من يتحدث عنه بصفتك الاولى زوجه وتستطيعى وصف مشاعر الزوجة بكل دقهخصوصا الجانب النفسى
والثانية اجادتك لفن التعبير

وتناولك للمواضيع وطرحها باسلوب قمة فى الروعة وغايه فى الجمال

اسفة للاطالة


تقبلى تحياتى


رنيم

ftataljanna said...

طهقانتى العزيزة

انا اول تعليق ليا عندك بس مش اول زيارة

انا من ساعة ما عرفت مدونتك انتى وزوجك

وانا قريت كل مواضيعكوا الاول علشان ابقى ماشيه معاكوا على نور

والحمد لله يعني مدوناتكوا ما اخدوش في ايدي يومين
:)

عالعموم اعتبريني صديقه دائمة للبرنامج

قصدي المدونة

Haitham said...

يااااااااااه فينك من زمان
انا بقالي كتييييير بدخل علي البلوج و ملقيش جديد
لا بس بجد و حشتينا
متبقيش تغيبي علينا كتييير كده

safa7_karmooz said...

هههههههههههههههههههههههههههههههههههه

طب فينك يا حج طوطو تجيبى كده انفيتاشن للشط بتاع الباتون صاليه

بس امال دى مارينا

امال شرم كنتى هتعملى ايه

يلا

نازل اصيف فى ترعة المريوطية وراجع :D

روح said...

السلام عليكم
بجد بوستاتك كلها تجنن
الله يجزاكي الخير
الواحد مش بيبطل ضحك طول ماهو
في مدونتك ربنا يخليكي لينا
علي فكرة ليكي عندي تاج
سلام يا احلي طهقانة
طلب : ياريت لو سمحتي شيلي كلمة نقاش
لان النقاش بني ادم ونفسة يروح
مارينا بردوا...
بحبك في الله

yousef said...

فكرتينى بالبراديس يا بسبس

دكتور مستكنيص said...

ههههههههههههههه
والله دمكوا زي العسل
بس مالها مارينا يعني
عكننتي عالراجل وضيعتي من ايده المصلحة
يالا هنقول ايه ياطهقان
خيرها في غيرها
متاخدهاش معاك مصيف بعد كده قولها عندي شغل في المكتب ومسافر مامورية يومين عند فرع الشركة اللي في حلايب وشلاتين
وعيش حياتك
إحم متاخديش في بالك ياطهقانة

Doba said...

عندى تاج تعالو جاوبو عليه - يلا بسرعة قبل مأى حد يسبقكم

مستنياكم
هبة

يعقــــوب .... said...

:D
أول مرة اعلق بس متابعكوا من زمان..كنت عاوز بس اقول والله بتهونوا علينا و بتبسطونا

عمر عاشق القرآن said...

ههههه
طب مش تخلى الراجل يمتع عينيه حبتين

لا صحيح :: مشكلة برضه بتلفت نظرى كتير اوى ان الصحوة الدينية (ولا أقصد الزى الاسلامى او الحجاب ) منتشرة جدا فى الطبقات المتوسطة والفقيرة وكل ما تعلى لفوق شوية تلاقيها بتقل ... ليه ؟؟؟

ااه على فكرة
هو ايه علاقة الموضوع بالعنوان
"الاعتراف سيد الميدالية"
انا لا لقيت اعتراف ولا ميدالية ؟!!

شيرين said...

ههههههههههههههههه فظيعة بجد
اسلوبك تحفة
ويوعدنا يزيارة مرينا ياقدر ياكريم
ومش مهم اني اقابل الناس البيئة عادي يعني انا بحبهم

تحياتي

mostafa rayan said...

عارفة ياطهقانةانالو من طهقان كنت وديتك مع العيال عند الملايات والكشري وروحت انا عند الكاش مايوةوألايشارب
يابنتي النسوان دول نعمة واللي يكرهم يعمي وخصوصا لما يكونوا من النوعية اللي انت حكيتي عنها دي