ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

استراتيجية الهزيمة


من يوم ما اتسرقت تدوينتي و اتنشرت في المنتديات بدون وجه حق و انا معنوياتي و معنويات طهقان في الارض و حسينا اننا متقلبين في بلدنا في كل حاجة مش فاضل غير يسرقوا الفانلة من تحت السديري والقميص ابو ست زراير و الجرفتة المقفولة
و من كام يوم حبيت ارفع معنويات طوطو شوية فقلتله تعالى نلعب كونكت فور في البلاكونة.
عنها و رحت عملاله مج شاي بالنعناع معتبر و ناصبة اللعبة على التربيزة و بسم الله نويت اتغلبله- طبعا في سري
و دي يا جماعة المدونين تسمى ((استراتيجية الهزيمة)) اللي بتنص على ان الست مننا لما تلاقي جوزها لا بيهش و لا بينش و موده واقع من الدور العاشر و معدي عليه قطر لازم تفرفشة و تهيصه و احسن وسيلة لكده انها تلعب معاه اي لعبة و تسيبه يغلب فيها علشان يفتكر نفسه عنتر و ياخد نيشان اذكى اخواته و اهو كله تدريب لقدراته النفسية و نفخ في عبقريته و نصاحته و اللي ميعرفش يقول...يلا ما علينا
و اتفقنا الفورة تبقى من خمسة و اتغلبت دور و التاني و لقيت طوطو بدأ يتحمس و يحس ان زمانه ضحكله و انه شرب من نهر العبقرية الجاري و قلت في عقل بالي اكسبي الدور ده يا بت لحسن حتبقى مكشوفه و يحس اني بتغلبله قصد و فعلا كسبت الدور التالت قام اتعدل في قعدته و قالي



طهقان: مخدش بالي اصلك مقربة اللعبة منك و انا مش شايف كويس
القصداتغلبت-بمزاجي- الدور الرابع و الخامس و السادس و هييييييييييه




طوطو كسب يا بلوجرز



العاب نارية و مرشات عسكرية



لقيت وشه احمر من الفرحة وصغر يجي عشرين سنة و بانت عليه علامات العبور و الانتصار و فرحت لان خطتي نجحت و لسة حجني ثمار الاستراتيجية لقيت سي طوطو بيرفع سماعة الموبيل
طهقان: الو..سيد...ما تيجي نسهر في النادي ...انا جايبلك لعبة حلوة قوي.... اسمها كونكت فور.... حتعجبك خالص..... طيب نتقابل بعد ساعة... سلام

يا نهار مش فايت بقى يا طوطو انا اضحي و اتغلبلك علشان ارفعلك روحك المعنوية و انت تسيبني بهزمتي و تنزل تلعب مع صحابك
و تلعب معاهم اية؟؟ كونت فور؟؟؟ يا عيني على ولادك يا مصر
صحيح يا اولاد
يا مأمنة لطهقان يا مأمنة للحلة في المزلقان

و نزل سي طوطو بمعنويات مرتفعة و رجع الساعة 12 بالليل معنوياته في الحضيض
انا: مالك يا طوطو منزل ودانك تحت ليه ؟
طهقان: اللعبة دي سمجة قوي
انا: ازاي ما هي كانت عجباك
طهقان:لا لا دي بايخة خالص ده حتى سيد كسبني 17 -2
انا:كتمت ضحكة و قلت امال فاكره حيتغلبلك زيي
طهقان : ليه انا كسبتك بشرف
أنا: كسبتني اية ده انا قلت افرفشك شوية و اتغلبلك علشان ارفع معنوياتك رحت انت النادي و نكدت على نفسك

طهقان: طيب تعالي العبي معايا فورة تانية و انا اثبتلك اني حريف فيها
انا : لااااا انا حنام تصبح على خير

و من ساعتها يا اخوانا و طهقان ضارب خيمة في البلاكونة و قاعد يلاعب نفسه كونكت فور مش فاهمة بيتدرب و لا بيثبت لنفسه انه يقدر يكسب...نفسه!!؟
مش دي برضه حاجة تطهق؟؟؟؟


امضاء



92 comments:

سجدة said...

معلش يا أختى بعد كل التعب والهزيمة دى يروح يلعب مع اصحابه كان لعب كورة احسن له
حاجة تتطهق بجد

عصفور المدينة said...

بيتدرب عشان العبور الثاني
والانطلاقة نحو المستقبل

Anonymous said...

هم الرجاله كلهم كده .. صنف مالوش امان
ولا يهمك المرة الى جايه اكسحيه عشرين صفر ولا يهمك
سلام

shahy said...

ههههههههه
طبعا مش هاقولك انك موتيني من الضحك دي حاجة بقت عاديةخلاص

والله صعب عليا طهقان كان لازم ماتخليهوش ينزل كنتي قلتيلة يقعد يتدرب شوية
كدة اهو اتغلب 17 شوفي بقى هاتصلحي معنويتة تاني ازاي
يعني كل اللي عملتية صاحبة هدهولك بقى دة اسمة كلام
ربنا معاكي وفكري في خطة تانية
سلااااااام

الأباصيرى said...

أوووووووة

كدة الرجل جاتلة أنتكاسة فورية

يعنى بالعربى أتبستر زى اللبن بالظبط

معلش ياطهقان ياخويا يمهل ولايهمل

طيب تيجى تلاعبينى ونشوف مين فينا اللى هيدمر معنويات التانى

هاخد بتارك ياطهطق يابن عمى

ta5areef said...

والله انتى حرام عليكي اللى بتعمليه فى الراجل ده
لنا الله يا طهقان
كلهن قادرات

خمسة فضفضة said...

السلام عليكم ورحمة الله وبركاته

احسن يستاهل ، بقي كده يسيبك وينزل يلعب مع صحابه ، يحمد ربناانه اتغلب 17 -2 بس

بس حلوه اوي الصوره التالته دي ومعبره كمان ،الاحساس بالهزيمه ده بيعمل بلاوي ...ههههه

الطائر الحزين said...

السلام عليكم
عارفة انا هاعلق بس يمكن ابعد شوية عن الموضوع
مهم جدا ان نعلى من شأن الانتصار وان نسلم بالهزيمة انها هزيمة ولا نعطيها مسيات اخرى الا لاستراتيجية
يعن لما بنقول على هزيمة 67 انها نكسة وان حرب اكتوبر كانت لعبة
ده اسمة كلام
معلهش جه فى بالى كدة لما اتغلبتى له والواد سيد صبى القهوجى غلبة الا انتوا كنتوا بتلعبوا ايه يا ختى؟؟؟؟
زرتى المدونة ولم تكتبى تعليق ده اسمه كلام احنا فينا من كدة؟

EnGinE said...

بجد أنا بكره عندي امتحان - بكالوريوس هندسة-

بس

هههههههههههههههههههههههه جداً


ما شاء الله عليكي

أنا نفسي ألاقي في يوم من الأيام حد يفكر فيا كده..

يتغلبلي وأنا أتغلبله 24/24
بس فييين ؟؟؟
كله بيدور على الأقرع الأخضر

بصراحة يا هندسة انت محظووووووووووووووظ بيها
ما شاء الله الله أكبر

و غش انت بتلاعبها حمرق كده و اعمل مشاكل قبل الهزيمة

جمييل قوي جو الغش خصوصا لما اللي قدامك يكتشف ان اضرب على......

كلنا بنعمل كده واحنا بنلعب

أو لا عبها Playstation على العشاء من بره

ههه

ربنا يبارك فيكم من قلبي والله

Ahmed said...

هههههههههههههههههه
بجد انا مضحكتش كده من مدة طويلة دا مش انا وبس دا كمان مراتي قاعدة جانبي بتشجعك وبتقول يستاهل بس والله طهقان غلبان هو يعني علشان ابن حلال وطيب
يتعمل فيه كده
يالا ما علينا
بوست تحفة
احييكي عليه

تحياتي

ابو العربى said...

ههههههههههه
والله مفيش حل ذكاء المراءه اهم مميزاتها

تحياتى

سندباد said...

ما علينا نيجي كده نروح كده محدش يقدر يغلبكم لا حول ولا قوة الا بالله

Amr Ahmed said...

وطهقان دلوقتي عامل معسكر مغلق
وجايب مدرب احمال

وبيفكر يتعاقد مع جوزيه

وفيه كلام عن صفقة مع ابو تريكة

اووووووووووه طهقاناواييي

Incomplete said...

وحشتيييييييييييييييييييني
والله ياطهقانة جالي اكتئاب وطهقت ..كل ماجي ادخل على مدونتك انتي وطهقان ألقى الكلام النحس بتاع انك هتوقفي تدوين..وأقول لأ مش هسيب تعليق علشان هترجع إن شاء الله..كان قلبي حاسس
هييييييييييييييه
هيييييييييييييييييييييييييه
هييييييييييييييييييييييييييييييييه
فرحت قوي لما لاقيت بوستك ده
حمد الله على سلامتك..وبجد وحشتيني قوي والله
وسلامة طهقان من الزهق والإكتئاب
ياعيني الملل قاتله لدرجة انه يلاعب نفسه
:)
النبي ياشيخة تتغلبي لك كام دور كمان..يمكن تتفك عقدته.. وأهو كله عند ربنا
فرحانه جداً لعودتك ياقمرتي
ربنا مايحرمنا منك ولا من خفة دم بوستاتك
هاتي بوسه
امممممممممممممواه
:) :) :)

LOJAIN said...

ازييييييك يا سكرررر
وحشتينىىىىىىىىىىىىىىى

البوست فظيع و يموت ضحك
ويبين كمان انتى قد ايه معندك اصيل وماشاء الله بتخدى رد فعل ملائم خالص

يالله منتى بتعملى الخير و ترميه البحر هتقولى ايه
مش عارفة ليه فكرتينى باسماعيل ياسسن وهو بيعلب مع الحرامية على الهدوم

ماتجربى؟
;)

Regards:
Lojain :)

Reemo said...

توتا
أنا مبسوطه انك رجعتى تانى
بصى موضوع السرقه ده عاااادى جدا
انتى لو كتبتى كلمه من أى بوست عندك وعملتى عليه سيرش
هتشوفى مهازل والله
فأحسن حاجه انك مش تحطى فى بالك
بخصوص استراتيجيه الهزيمه فكره حلوه والله
والله انتى قلبك طيب يا قمر
بس على فكره خلى بالك
هو بيتدرب وبيستعد يعنى مش تتبعى استراتيجيه الهزيمه دى معاه تانى
واحد متدرب يبقى يلعب بجد
القلب الطيب خليه على جنب فى اللعب يا توتا
وركزى كده
عايزه التدوينه الجايه تبقى النتيجه 25 - صفر
محبتى

Shower-Mirror said...

هو ده اخركوا .... ؟

بتلعبوا كونكت فور ؟؟؟؟

امال لو كنتوا مرتبطين كنتوا لعبتوا ايه ..... اكس او ؟؟



و الافندى بتاعك مبسوط قوى انه بيغلبك فى الكونكت فور ..!!!؟

اخص عليك يا طهقان كسفتنا ....

ههههههههههه

momken said...

جميل يا طهقانه بخب خيالك الخصب وبحب طريقه عرضك للموضوع
استمرى انتى هايله جدا انا كمان على فكره بيتسرق منى حجات كتير وتصورى بتوصلنى انا بالميل
صحيح الكلمه تلف نلف وترجع لصحبها

تحياتى لطهقان

test said...

أكيد بعد مارجع من البلكونة كان مغلوب برضه!!! ياعينى على الرجالة

Ma 3lina said...

يخر بيت عقلك ايه المسخرة دى

هوا بجد لازم نتغلب للرجالة؟؟

دول الستات طلعوا عباقرة و الله

بس كونكت فور دى جامدة جدا كنت بغلب بابا فيها كتير

متخيلة شكل طهقان و هوا راجع و اثار الهزيمة على وشه لازم تدربيه علشان يكسب صحابه فى النادى

Doba said...

هههههههههههههههههههه
والله معاكى حق

على فكرة انا بطبق استراتيجية الهزيمة دى كتير، مش فى اللعب بس فى المواضيع كلها انتى تفكرى وتحلى وترميلى الحل فى الطريق ويبقى هو العبقرى اللى مفيش ومحدش بيفهم زيه

والله العظيم احنا غلابة وحاجة تطهق بصحيح، اتعلميله الطاولة بقى ونافسيه واتغلبيله برده ده هما كمان غلابة والله ومن كتر الطهق مبقوش بيعرفو يفكروووووووو

تحياتى وقبلاتى يا بستوكة
واوعى تغيبى تانى
هبة

يا مراكبي said...

أنا شاكك في نتيجة المباريات دي .. إحنا بعد كده نجيب حكم أجنبي .. وأفضل إن الحكم يكون واحدة ست

أي خدمة يا طهقان يا أخويا

الربان said...

تحياتي

مسكين طهقان...بتتعلمي فيه ثقافات جديدة... و تنشري سلبياته علي الملأ...
و حتي مج الشاي بالنعناع...العالم الله ماذا و ضعتي له في المج...هل نعناع بجد؟
هههههه.

يعجبني اسلوبك...تحياتي و تمنياتي بالتوفيق دائما.

admelmasry said...

ربنا يخليكو لبعض
.
.
بصراحه انتوا تفتحوا نفس اي واحد للجواز
هههههههههههه
تحياتي
والسلام

bo_sale7 said...

محنا كمان بنطبق الاستراتيجية ديه بقالنا سنين والمصيبة انكم تعودتو عليها !

ياااه ...يا ما نفسي اغلب ولو مرة وحدة :)

Desert cat said...

يعنى انتى تضحى علشانه وتتحملى روح الهزيمة وهو يفتكر نفسه 7 فى بعض ويروح يلعب مع صحابه احسن برضه اللى حصل له ده من اعماله
يا شماتة ابله ظاظا فيك يا طوطو

هشام علاء said...

عسل و الله

دمك زى العسل

اول مرة ازورك و بصراحة اسم طهقانة و طهقان ده مش جذاب اوى و كنت خايف لتكون دموناتكم سودولوية او كئيبة بص طلعتوا انتوا الجوز زى العسل و فى منتهى الظرف

بس انا كنت سالت طهقان كده على سؤال و كنت احب اسالك برضه هل انتوا فعلا شخصيتينى متجوزين و بتتحدوا بعض بالتدوين؟

هل اموضوع ده كله بجد ولا افتراضى و لا نص جد و نص افتراضى؟

خالص تحياتى

Anima said...

مجنون ده ولا ايه؟

مسلم said...

ظريف

الهادي كملاوي said...

بصراحة يابستوكة مدونتك رائعة ,, وسعدت بزيارتها .. وما حانقطع ابداً عنها

bastokka طهقانة said...
This comment has been removed by the author.
bastokka طهقانة said...
This comment has been removed by the author.
bastokka طهقانة said...
This comment has been removed by the author.
Unknown said...

ههههههههههههههههههههههه

ايه يابنتى ده انا تعبت من كتر الضحك

بقا اول مرة ازورك تعملى فيا كدة بردو

بس حلوة الإستيراتيجة دى اوى بجد .. هبقى اجربها لما اتجوز ان شاء الله

بس ربنا يستر ومايروحش النادى مش عارفة ساعتها ممكن اعمل فيه ايه هههههههههههههههههههههه

تحياتى يا جميلة

:D

رفقة عمر said...

بجد شكرا ليكى كتير
اولا لدعاءك ليا فى المدونه ثانيا لانك ضحكتينى جدا بس واضح ان طهقان غلبان قوى معلش العبى معاه تانى واتغلبيله

بسمه عبدالباسط said...

هههههههههههههههه
ضحكتينى بجد
هما كده مفيش حاجة تتمر فيهم
تحياتى

أميرة البلطجية said...

ايه الحكمة دي كلها بس..بس في النهايو قعد ف البلكونة..هديها البلكونة دي يا بنتي
ههههههه

Unknown said...

أيوة كدة يا شيخة وحشتنا بوستاتك ياجميل
وأوعي تقفلي أو توقفي المدونة
هنعيش ازاي احنا من غير حكايات طهقانة وطهقان:)))
ودي تبقي عيشة دي؟؟
حلوة قوي استراتيجية الهزيمة دي وبتجيب نتايج هايلة والمرة الجاية اكسبيه طالما بيسيبك وينزل بعد ماتخسريله البيه عرفيه مستواه الحقيقي في اللعب بقا
تحياتي

^ H@fSS@^ said...

والنبي انتي زي العسل و بنت اصول يا ريت بس طوطو يكدرك حك تكديرك
تحياتي

sakayar said...

مسألة سرقة المواضيع دي بقت منشرة جدا ... لكن كونهم سرقوا موضضوع ف ده دليل على حلاوة الموضوع ... لينا واحد صاحبنا اتسرق الشعر بتاعه وتقريبا اللي سرقه خد جايزة باين أو حاجة زي كده ... فكان بيضحك ويقول أنا المفروض أبقى مبسوط لإن سرقة شعريس معناه إنه عاجب الناس لكن ف نفس الوقت زعلان لإن اللي سرقه مستأذنش إنه ينقله حتى ...أما بالنسبة لطهقان فخليه على راحته اليومين دوووول وخدوا هدنة لحد ما نفسيتكو تتظبط
هههههههه تحياتي
سلالم ... يعني سلامو عليكو

LOJAIN said...

عثل عثل عثل

انا بعت لك ميل صحيح
ابقى شوفيه

امووووواه

Regards:
lojain :)

أسامه يوسف said...

ماكانش لازم تهبطى معنوياته يا طهقانه
خلاص كنتى كملى جميلك
وبعدين أنا أول مره أخش هنا
إيه الساطور ده
حرااااااااام عليكى طهقان

yasmina said...

بجد يا طهقانة تدويناتك جميلة جدا وبتعبر عن كل النساء العربيات
اللي عايشين وبيقولوا بس يا رب الستيرة مع الرجل
ويا ريت عاجب
انتي تعمليله كل شي يرضيه وهو يعمل اللي عاوزه وبس

سلام

عاشقة الوطن said...

طهقانة حبيبتى
ازيك ياطهقو عاملة ايه

ايون كده هما دول الستات اللى بيفكوا عن أزواجهم وتفرحيه لما يكون مضايق

بس ياختى الرجل يسيبك ويطلع على النادى
لا يابنتى متسكتيش بعد كده ابقي أغلبيه

وهى ديه الاستراتيجية المية مية

شكرا ياطهقو على زيارتك مدونتى
نورتيها ياجميل

يالا بقي مش عاوزة حاجة
سلاااااااااام

زحل الفلكي said...

انا لسه مباركتلكيش على عوده المدونة

عوداً حميداً ووحشتنا بوستاتك

ايوه حلوة حكاية تتغلبيله دي
بس يعني مهو كويس انه مقالكيش انزليلي 10 طاولة وساعتها مكنتيش حتعرفي تتغلبيله للأسف يعني

:D:D:D:D
بس حركة حلوة والله وسيبك هو عامل معسكر علشان لازم التدريب يكون في معسكر مغلق منعاً لتسرب الاسرار

ody911 said...

هههههههههههههههه

طيب ياشيخة كنتى فطمية قبل ما ينزل يلعب فى النادى


قوليلوا اللعبة بتاعت الجيران وعوزين يلعبوا بيها

أى حاجة يعنى


ألا صحيح لية كل الرجالة بيحبوا يغلبوا فى اللعب


مش عارف


عادى بقة
أودى

R.R said...

ايوه كده
عودا أحمد
وحشاااااانى جداااا يا جميله وحكايتكم المثيره
بس هنعمل ايه فى الرجاله لازم نتغلبلهم عشان معنوياتهم
ربنا يقدرك على فعل الخير
:)
سلامااات

Rivendell** said...

حلوة الاستراتيجية دي

سجليها بقى براءة اختراع

mahmoud said...

ههههههههههههههه
بجد استراتيجية تحفففففففففة
هقوم عليها لحبيبتى
بس حبيبتى ايه بقى ده فيها ضرب
بس والنبى كفايه الراجل غلبان باين كدة والله اعلم وانا بصراحه مليش فى اللعب ومش هاخالى فى البيت اى حاجة يتلعب بيها على البلاط
بس المدونة فظيييييييييعة

zordeak said...

هههههههههههه

اولا حمد الله عالسلامة يا طهطه

ثانيا

انا بحييكى على الفكرة الجميلة بتاعتك دى

استراتيجية الهزيمة

استراتيجية عالية فعلا

انك تتغلبى علشان تحسسيه بقدراته

ودى استراتيجية مبيعملهاش غير الستات اللى فاهمين اوى بجد

يحسسو الراجل انهم محتاجينله

وانه هوا العظيم اللى بارم ديله

مع انهم مكن يكونو احسن منه

بس اللاستراتيجية عالية فعلااااااا

النبى يا شيخة

حياة النبى

تتغلبى شوية كمان علشان الراجل مكتئب ومش عارف يكتب اى حاجة من ساعةالحلاق مكشف سره

كل ما افتح البوج الاقى الحلاق فى وشى لما قرفت

قوليله بقى يرجع لجمهوره

زى ما انتى رجعتى للجمهور

:)

نقطة مية said...

اولامعلش الله يسامح اللي سرق تدويناتك...ثانيا
بس هو حصل كدة بسبب الكونكت فور امال لو جربتي تلعبي معاه شطرنج ايه اللي هيحصل؟؟!
تحياتي

bastokka طهقانة said...
This comment has been removed by the author.
bastokka طهقانة said...
This comment has been removed by the author.
bastokka طهقانة said...
This comment has been removed by the author.
dr_lazeez said...

yasalaaaam
ana 3agebny 2awy el gaw el sha3ary dah.
awel mara 3araf 2en connect 4 leah ta2ser fel 3elakat el zaygeya .
totoooo ta3ala wana hadrabak :)

محمد العدوي said...

مش واخدة بالك . مهو اكيد لازم يضرب خيمة في البلكونة .. يعني لو هم بس غلبوه في الكونكت فور كانت هانت لكن يعرف انك سيبتيله فارغة .. يعني لبستيه العمة علشان تراضيه ..

دا حقه ينط من البلكونة مش يضرب فيها معسكر ..


اوروفوار

... said...

حلوة فكرة استراتيجية الهزيمة
يعنى من حيث المبدأ
بس شفتى النتيجة؟؟
أهو برضه راح يعمل فيها بتاع على اصحابه
والله لو لعبت طاولة زيى
واتغلبت لنك فعلاً مش عارفة اليك من الجهار
برضه نفس الحال

جربتى الزار؟

:)

أخف دم said...

دى الناس الفقرية م الآخر .. ما هو كان قاعد كافى خيره شره وهيروح ينام وهوه سبع الليل .. كان لازم يعنى يعمل فيها ابو العريف ؟؟
يللا أهو خد جزاته .. استحملى يا شابة

bastokka طهقانة said...
This comment has been removed by the author.
bastokka طهقانة said...
This comment has been removed by the author.
الدفاع said...

السلام عليكم شكرا لكما على العوده مره اخرى وانا من هنا بادعو كل الرجاله انهم ياخدوا دورات فى الكونيكت فور وغيرها من العاب البلكونات

reri said...

ههههههههههههههههه
يعني في الآخر بعد ما تتغلبيله يروح لأصحابه
أحسن إن سيد غلبه
علشان يا طيري تعرف عشي من عش غيري
هههههههه
بس هو بيتدرب علشان يهزمك المره الجايه بشرف
بس حلوه إستراتيجية الهزيمه دي

مبسوطه إنك رجعتي للمدونه تاني يا طهقانه
أما اللي بينقلوا من المدونه
فقطع إيديهم
وربنا عليهم


سلاماااااااااااااات

sara said...

بستوكتي الجميله

عودٌ احمد وابراهيم وسيد وعبد الله

هو مبدئيا فكرة اللعب حلوة

بس انا رأيي يا طهوقتي ..ان الاستغمايه كانت هاتبقي احسن في مثل هذة الحالات

واحمدي ربنا علي كل حال انك ماتهورتيش ولاعبتيه شطرنج ..كان زمانه جالك بعدها بست ايام مغلوب 17 2 بردو

هاتي بوسه بقي عشان وحشتيني بجد

أشرف حمدي said...

كونكت فور ايه بس ده كان زمان ؟
انا ومراتي بنلعب سلاحف الننجا علي الكمبيوتر .. كل واحد عامل اشتراك وبيلعب لوحده
وأنا سبقتها طبعا
هي في المرحلة الثالثة وانا وصلت للسابعة ولما هي بتتزنق في حتة بعديهالها
هي هي هي هي
تدوينة رائعة كالعادة
تحياتي

truelove said...

يعني يا اختي يا طهقانة بعد ما تتطلعي بنفسيته سابع سمة تعملي فيه كده وهو رجعلك بخفي حنين يا اختي كنتي كملتي جميلك وقولتيله اكيد صحبك ده خمك ما انت لسة كاسبني وتكوني احسن منه

أيامنا الحلوة said...

هههههههههه في حد يتغلب في الكونكت فور يادي الخيبة

بقولك ايه ياطهقانة ابقى فوتي عليا في المدونة وعلميني اللعبة دي في الخباثة كده ماشي

تحياتي

أيامنا الحلوة said...

طهقانة ياريت تغير نظام التعليقات ده

YHYيــوســف الـمصـرى said...

السلام عليكم
ربنا يخليكى للشعب وتمتعونا انتى والاخ طهقان كده ديما
تحياتى

Unknown said...

مش حرام عليكي ..بعد ما رفعتي معنويات طهقان .. تنزليها تاني وتصدميه بالحقيقه المره

احمدي ربنا انها جت علي قد كده و حيقعدله اسبوعين تلاته نقاهه في البلكونه
بس المره الجايه خلي بالك بقي
انا مش مسئول عن اللي حيحصل

gohayna said...

انتي خليكي ناصحه

فين مجهودك واصرارك علي الفوز

انتي بتخذي العين علشان ميحسدكيش ولا ايه

خليكي انصح منه والعبيها صح

معلس بقي هما الرجاله كدا كلهم صنف واحد

يلا يا قمر ما علينا

تحياتي يا جميله

BackBone said...

ايه ده قاعد بيلعب في البلكونه لوحده ليه؟؟؟؟


امال فين الخدامه

انا بحب اهدي النفوس

رينـــــــــــا said...

هههههههههههههههههههههههههههههههههه
والله وحشتنى خفه دمك يا قمر
الف حمد الله على السلااااااااااااااامه

ياستى خليه يلعب:P
مش احسن ما يقعد على النت :P
والا يقعد على القهوة
اديكى ربطتى برده :D:D:D

Unknown said...

طب كنت كملتي جميلك ومعرفتهوش انك اتغلبتيله
كنت تقولي النادي هو اللي وشه وحش عليك, ولا يمكن كان النادي دوشه ماعرفتش تركز كده يعني
وطبعا هيفضل يتدرب في البلكونه لحد مايبقي حريف كونكت فور((:

شتاء2007 said...

حبيبتى طهقانه : ليش تعملين جذى فى طهقان .

والله الريال طيب وايد ويحبج وايد
وعندى اكبر دليل على كلامى

لازال طهقان صامد وعلى العهد الذى قطعه لك بان يعتزل الكتابه
بناء على التعليمات التى اصدرتيها له

ومسكين لحد الان لم يكتب ولا كلمه
ما يدرى انك خونت فيه وتكتبى من وراه

لك الله يا سى طهقان

وانصحك اليوم اللى تصحى فيه وتكتشف عمايل مراتك

تعمل فيها اللى ماعمله احد قبلك فى زوجته

احنا متشوقين وايد لهذا اليوم

علشان نقعد جنب الحيطه ونسمع الزيطه

مصطفى حسان said...

انت لو منك اتنين كانت الحياة بقت زي الفل .. تصدقي ان طوطو فعلا ما عندوش دم ... انتي عارفه هو لو عارف قدراتك في اللعبه دي هابعرف انك مغلوبه بمزاجك .. انما هاتقولي ايه بقى ؟؟

سكينة said...

ادي آخرة اللي يجي على الولايا ويفرتك تعبهم

khaled said...

هههههههههههههه
خلاص يا طهقان مش عايزك تزعل نفسك
الموضوع مايستهلش لكل ده
وبعدين ابقه اخد اللون الاحمر اصله بيكسب

FATMA said...

طهقانة
الحقيني انا مش عارفة العب خالص
حاجة تتطهق

Unknown said...

والله الموضوع الأولانى دا عندك حق فيه بس انا عرفت المدونة من مقال منقول منها ومكتوب تحته طهقانه
أما موضوع اللعب دا مش قادر اكتب من الضحك حاجة حلوه اوى المعسكر بتاع البلكونة بيفكرنى بموضوع زى دا حصلى هههههههه

Esmeralda said...

كنتى تقنعيه يلاعب البواب لو مصر يلاعب حد تانى
مش لازم تعرضيها اوى كده يعنى

كراكيب عادل said...

لا ويقولوا ان المرأة مسكينة

ومغلوبة علي امرها

اخ منكم اخ

تعملوها وتخيلو

Anonymous said...

السلام عليكم

ههههههههههههههه
بوست جميل كالعادة

عشان يعرفوا قيمة اللي احنا بنعمله
خيرا تتهزم شرا ينزل يلعب مع أصحابه
تؤ
تؤ
تؤ

سلاماتي

smraa alnil said...

هههههههههههههه
لاعبته كل الالعاب
كيك علي العالي وكيك علي الواطي
ولعبته استغماية ومن يوميها ماشفتوش
طب كتي العبيله لعبة تانية ارفعي من روحه
يمكن يكون في امل

Enbee said...

سكر... سكرررررر

بس يعني هو نفسيته ما تتعدلش إلا لما يغلبله دورين ؟؟؟ والنبي ساعات ولا بينفع دورين ولا عمارة بحالها
عموماً والله حركة حلوة..و محظوظ انه بيلاقي حد يتغلبله من أصله ههههه

بس.. إقعدوا بالعافية :)

Unknown said...

والله الصراحة صحيح
ان كيدهن عظيم

بأه الانهزام كمان استراتيجية ؟؟؟؟؟


واخبار طهقان ايه ؟
انشاء الله فرفش بعد الهزيمة الكبيرة :))

منة الله said...

طهقانة

ادعوك للمشاركة في استطلاع راي

عن اكثر عشرة مدونات تاثيرا في قرائها

عل مدونتك واحدة منهم

اليك الرابط

http://www.6ef.blogspot.com/

دعاء علي فؤاد said...

بس اكيد مش كل الرجالة
زي طهقان
لامؤاخذة يعني



تحياتي

Anonymous said...

انا اول مره اشوف بوست ليكي
تحياتي ليكي وان شاء الله اكون من المتابعين للاسلوب الجميل دا

واحــ الفكر و القلم ــة said...

ما شاء الله عليكى يا طهقانة انتى وطهقان بجد اسلوبكم جميل اووووى اوووووى ... وعايزة اقولك انى عرفت المدونات على ايديكوا .. وحبيتها بسببكم .. وياريت تشرفونى فى مدوناتى وتقولولى رايكم ...

http://daymann-domo3.blogspot.com/
http://banota-masreya.blogspot.com/

ومنتظرة ابداعاتكم دائما ..
اختك .. ام دودو

فبركة said...

يا خراااااااااااااابى
كل دى تعليقات
قد ايه نعمة ان الناس تحبك للدرجة دى
بجد انتى هايلة وعظيمة وبتكسبى ثواب على كل حد بيضحك من قلبه على كلامك اللى زى العسل
ربنا يكرمك يا رب
ومستنى زيارتك لمدونتى المتواضعة

صاحب البوابــة said...

السلام عليكم

اشكر كل من تساءل عن غيابي

ووقف بجانبي في محنتي

تحياتي لكل شريف حر

sosoooo said...

طهقانتي ،، جوتن مورجن،، احييكي علي الروح الانهزامية أأقصد الروح الرياضية دي ، برافو عليكي فكرة والله، انا ساعات بعمل كده مع ماما لما تكون مخاصماني اقوم اخترع لها اي مشكلة عندي (أألف موضوع كاموفلاش يعني)وهاتك يا رغي في المرغي لحد ما تنسي انها كانت مخاصماني ، لما اتجوز همل مع جوزي كده واللي تغلب به العب به هههههه