ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

بارانويا متفشتقة



ايه اللي بيحصل ده؟! هو اللي بنعمله في الناس؛ حيطلع علينا و لا ايه؟

يرضيكم كده يا سادة يا قراء؟ الاقي مع زوجي الهمام و هو جاي من الشغل كتاب عنوانه(كيف تقتل زوجتك!)

طهقانة: ايه اللي انت مشتريه ده يا طهقان؟

طهقان:انا ما اشترتهوش ،ده جاني هدية من حازم صاحبي

طهقانة:و حازم عايزك تقتلني ليه يا سفاح بورسعيد؟

طهقان:لا يا شيخة ده مجرد كتاب ساخر، هزار يعني

طهقانة:على كل حال انا حشيل السكاكين و المقصات احتياطي ،لحسن الكتاب يقلب بغم ،و تفكر تقور مخي و تشيل منه الافكار الاستيطانية و مشاوير الشوبنج و طلبات البيت


و من ساعة ما طهقان جاب الكتاب ؛و هو كل ليلة قبل ما ينام ياخد الكتاب تحت باطه و يدخل السرير، و هاتك يا قراية .و تحول الى دودة كتب انما دودة ايه !اكس لارج

طهقان:هههههه الكتاب ده مسخرة

طهقانة:لا ياشيخ؟ عاجبك قوي؟ و ايه اللي يضحك بقى ؟

طهقان:بيقولك قال ايه؟ اللي عايز يقتل مراته يخليها تسكت يوم بحاله هههههههه، قوم تموت

طهقانة:ده على اعتبار انها حتبلع ريقها، تتسمم تموت، صح؟

طهقان:لأ يقصد يقولك يعني ان الست بتحب الكلام زي عنيها، و السكوت يخنقها

طهقانة:يا سلام ..و ايه كمان؟!

طهقان:و بيقولك طريقة تانية لقتل الزوجة ؛انك تسكنها مع حماتها هههههههه

طهقانة: و ده ليه؟ هي حماتها فيها سلك مكشوف حتكهربها؟

طهقان:لا طبعا ..بس من كتر المشاكل حتتشل و تموت

طهقانة:كلها افكار باكسة و سخيفة و ملهاش طعم

طهقان:لا بالعكس.. دي دمها خفيف خالص

طهقانة: (ممتعضة و رافعة حاجب و منزلة التاني و علامات الاستنكار و القرف باينة على وجهها) يا سلام

تاني يوم الاقي سي طهقان مدوب حاجة في كباية ماية لونها اصفر و بيشرب في المطبخ الصبح على الريق

طهقانة:ايه اللي بتشربه ده؟

طهقان:دي معلقة عسل بدوبها في كباية ماية على الريق مفيدة جدا ، تاخدي بق؟

طهقانة:احمم... لا شكرا ( علامات الترقب و الشك )و دي وصفة من الكتاب اياه برضه؟

طهقان:هههههه لا يا شيخة ده طب نبوي لرفع المناعة بأمر الله

طهقانة: اللهم قوي ايمانك

مش عارفة ليه مجمع الفيران بيلعب تصفيات النهائي في عبي، و حاسة ان طهقان بيدبرلي موته، ما اهو اصله العلم ده سلاح ذو حدين


فكرت و قلت يا بت لازم تصطاديه قبل ما يصطادك و توقعيه في الحفرة اللي بيحفرهالك

و عنها و جمعت شوية ادوات دفاعية في الكمودينو جانبي منها على سبيل المثال لا الحصر:(الشاكوش،مضرب الراكت الكبير،رجل ترابيزة السفرة القديمة...الخ) و كل ده كاجراءات وقائية لاي ضربة موجهة يعقبها رد فعل مدروس فجائي لمحاصرة العدو

و بقيت عايشة في البيت مرووشة، كل ما يقرب مني اتنفض ،و كل ما يقدملي حاجة اكلها او اشربها ارفضها بهلع، اه ماهو حرص و لا تخون


وامبارح، دخلت الحمام اخد الدش بتاعي ،لقيت حد موصل فيشة السيشوار في الحمام و مقربها من البانيو، بحيث اللي يفتح ستارة البانيو يقع السيشوار في البانيو اللي ضروري يكون مليان مية، و يحصل ماس و اتكهرب :(

و هنا اتاكدلي نيته السوداء في التخلص مني ،اكيد عارف اني داخلة اخد دش ؛و مدبرلي موته، يا عيني على شبابي!! بقى انا اموت متكهربة؟! و على ايد مين؟ جوزي ابو عيالي

طلعت من الحمام ،و الشرار بينط من عيني، و وشي احمر من الطماطم ايام ما كنا بنجيبها ،و الصهد طالع من بقى قرب يبقى نار

طهقانة:( ايدي في وسطي) انت يا استاذ؟ بانت نيتك السوداء و عرفت عملتك المهببة ، انا كنت شاكة..شاكة... بس دلوقت اتأكدت

طهقان: ايه في ايه؟ مالك؟ انا....

طهقانة: انت ايه و بتاع ايه؟! عمري ما كنت اتصور ان انت تعمل كده و بعد كل السنين دي؟

طهقان:و الله ما كان قصدي... انت فاهماني غلط انا...

طهقانة:مافيش أي عذر ممكن يسمحلك تعمل اللي عملته ،و مع مين معايا انا؟؟؟؟؟

طهقان:افهميني بس حشرحلك...انا اخدته صحيح بس مش بنيه سيئة، انا أخدت الخاتم الالماس بتاعك اللي جبتهولك شبكة ؛علشان اصلحه و المعه و اركبله الحجر اللي وقع منه؛ علشان تلبسيه بكرة في عيد جوازنا، انت افتكرتيه اتسرق و لا ايه؟

طهقانة: خاتم؟ بتاعي؟ اخدته؟ (علامات الصدمة و الاسبهلال و التفشتق على وجهي)

طهقان:ايوة... امال انت كنت فاكرة ايه؟

طهقانة الصغيرة: ماما.. ماما ..مش عارفة اشغل السيشوار هو بيشتغل ازاي؟ انا بقالي ساعة في الحمام و بحاول معاه مش عارفة اشغله

طهقانة: هو انتي اللي ركبتي السيشوار في الحمام؟!(مكسوفة)

طهقان:كل سنة و انتي طيبة يا حبيبتي،عاملينلك حفلة بكرة بمناسبة مرور 18 سنة جواز ،عقبال المؤبد يا روحي

طهقانة: و انت.....طيب....ان بعض الظن اثم....مؤبد؟؟ ده على اعتبار اني سجناك يعني

دي حاجة ....تكسف بجد

اوروفوار

امضاء


21 comments:

آخر أيام الخريف said...

هاهاهاهاهاههاهاهاهاهاها حلوة ... حلوة بجد يعنى

يا ريت تشرفينى فى مدونتى

http://reeeshkalam.blogspot.com/

Mona Hekal said...

حمد الله علي السلامة لللللوووووووووووووولي
اخيرا بوست جديد .
رائع كالعادة كنتي كاتبه علي الفيس توك انك مش عارفة من كتر الغم و الهم تكتبي حاجة اهو ربنا استجاب لدعاك و نتعك بالسلامة متتأخريش تاني

Unknown said...

nice post i like it

كلمات من نور said...

هههههههههههههههههههههه

بارنويا متفشتقة ياله من تعبير فزحلقي

بس بوست يجنن و ربي يديم التواصل بيننا

زهرة said...

حلوة اوى جداً خالص

وكل سنةو انتوا طيبين من غير أى كتب من النوع دة :)

aya abd elkarim said...

مكسوفه بس ديه زمنها بتقول انشقى الارض و أبلعينى...ههههههههههه بس جمييييله جدا
تحياتى ليكى و لمدونتك

Unknown said...

أنا مبسوطه اني مريت على مدونتك و عجبني البوست قوي لأننا ساعات كتير بنسئ الظن بيهم فعلا أنا مدونه جديده و يا ريت تنوريني
و بتمنالك التوفيق

الفقيرة إلى الله أم البنات said...

يعينى يا طهقان والله مظلوم
طيب ممكن أعرف من الجواهرجى بتاعكم لان خاتمى برضه ضايع منه فصين ونفسى البسه...بس المشكله جوازى مر عليه 13 سنه بس
تفتكرى هاستنى 5...اقصد هعيشهم

بوست جميل زيك

Tamer Nabil Moussa said...

شوفتى

بقى كنت ظالمة الرجل

يلا الواحد مش بيتعلم ببلاش

مع خالص تحياتى

أنا - الريس said...

بعد السلام والتحية

اما بعد
من رئيس الجمهورية


لو سمحت سؤال واحد الكتاب دار نشر ايه ؟ ولو تعرفي بيتباع فين عشان أجيبه للعيلة ؟

سلمتي من كل ردي بوست ذو دم خفيف .

الطائر الحزين said...

ايه اللى جاب برعى فى حرف الجيم

لك الله يا طهقان يا خويا

امتى هنشوف الكتاب بتاع طهقان وطهقانة؟

هديل said...

طول عمري بقول المصريين شعب دمه خفيف و لزيز و الله .. شكرا لابتسامة رسمتيها على أكوام الارهاق :)

Alaasalim2 said...

ههههههههههههههه

دايماً الرجاله مظلومين كده
:)
أسلوبك جميل بجد في الكتابة وبجد استمتعت جداً بالقراءة في مدونتك الجميلة

الفراشة الصغيرة said...

هههههههههههههههههههههههههههههههههه

طول عمرك فقرية يا طهقانه

بعد 18 سنه لسه بتشكى فيه

دنيا الحياة.... said...

انا متابعة جديدة ...بس عجبني البوست..وعلى فكرة اللي مكتوب في الكتاب للاسف حقيقي نسبيا..رغم اني اختلف جدا مع المبدأ انه البنت كائن غريب الاطوار
وبالتوفيق

فتــافيت (رحاب الخضري) said...

هههههههههههههههههههه
احنا دايما كده.. ههههههههههههههه
عجبني البوست موز وعنب وبلح كمان

عيد زواج سعيد
وعقبال اليوبيل الفاضي فالذهبي فالماسي في سعادة ان شاء الله

مبسوووطة موت اني اتعرفت عليكي :)

بنت الغربة said...

حرااام عليكى ياطهقانه ظلمتى الرجل
عموما كل سنه وانتى طيبه وعقبال اليوبيل الذهبى..بس برضه ماتأمنيش لطهقان...يامامنه للرجااال ..يامامنه للميه فى الغربال..
تحياتى

tarek alghnam said...

هههههههه
على فكره بس حكايه السكاكين والاكياس دى تخصص ستات بس هما اللى بيعملوها وارجعى لأخبار الحوادث
الرجاله دايما مظلومين
على فكره اسلوبك رائع واحسدك على خفه دمك
وتقبلى تحياتى

فافى said...

ههههههههههههههه مش ممكن بجد دمك خفيف موت و ياريت تشرفينى فى مدونتى

ZakZoka said...

هههههههههة
حلوة خالص
كل سنة و انتي طيبة

يا مراكبي said...

خسارة
:-(

ما بحبش النهايات السعيدة دي