ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

المنــــــــــــــــــــور

احدثكم من المطبخ اعزائي البلوجرية ،و طبعا لان الجو حر موت فتحت شباك المطبخ واكتشفت ان المنور هو:
المتحدث الرسمي باسم سكان العمارة

مدام شهيرة: الانبوبة فضيت يا سعيد
الاستاذ سعيد: الله يقطع سعيد و سنين سعيد، الانبوبة فضيت ،الجبنة خلصت، و معندناش لحمة ،مافيش مرة تقوليلي حاجة عدلة


الاستاذ منير:كل يوم باذنجان مقلي يا منار، شغالة في الغوامق ليه؟
مدام منار:و ماله دة كله حديد و بيوفر ،و بعدين الغوامق موضة السنة دي

الست خديجة: روحي قولي لابوكي يقوم يستحمى؛ السخان شغال و فاضل شوية ماية سخنة
نوال بنت الست خديجة: بابا بيقولك مش عايز يستحمى، اعمليله شاي بالمية السخنة اللي فاضلة


مدام سعاد: اللمبة اتحرقت يا صلاح
الاستاذ صلاح: خليها محروقة ما انا لو غيرتها حتتحرق تاني



الاستاذ محمد: يا مريم تعالي شوفي الصابونة دي بتروح فين!!
مدام مريم: هو انت ماتعرفش تدور على حاجة لوحدك ابدا، كل شوية يا مريم يا مريم اكونش خلفتك و نسيتك

العروسة اللي في الدور الرابع: حبيبي ...يا حبيبي .... اعملك نسكافية و لا شاي مع الكيك؟
العريس : و لا ده و لا ده، ارتاحي انت و انا اللي اعملك اللي انت عايزاه


الاستاذ بدر: ميت مرة اقول تشدوا السيفون بعد ما تتنيلوا ،ايه القرف ده!! العيال: ماما قالتلنا ما تلعبوش في الفلاشر يا بابا، و احنا بنسمع الكلام ....هيييييييه


الاستاذ مرسي: الحمام مبلول ليه؟ لازم اقع تتكسر رقبتي علشان تنشفوه الست مراته: اقع انت بس و لا يهمك ،مافيش اكتر من الجبس في البلد


الاستاذ مفيد: شامة ريحة الكيك و الحلويات اللي جاية من عند ست صباح؟! مش انتي اللي ماتعرفيش تقلي بيضة
الست مراته: و شايف فساتين الست صباح اللي على المنشر؟ ما تعرفش تشتريلي اتنين تلاتة زيهم؟

باختصار اعزائي البلوجرية المنور مكان مسلي جدا ،اجدع من الراديو و ارخص من السينما تقدروا بحركة رشيقة تدخلوا عالم مرح و كوميدي، و احيانا تراجيدي؛ بمجرد ما تفتحوا شباك المطبخ او الحمام.

و خوفا من الفضايح قفلت شباك المطبخ و الحمام، و حرجت على العيال يزعقوا فيهم ،و بقفل بابهم كمان علشان ابرطع براحتي في الشقة من غير ما تتنقل اخباري كلها عند باقية السكان
راح الاستاذ طهقان عامل اية؟؟؟؟
خلاني قاعدة في الليفنج اللي هي اوضة الجلوس و لا بيسموها حجرة القعاد
وانا فاكراه في اوضة النوم ،و راح مزعق بصوته السوبرانوا
طهقان:البنطلون الازرق مقطوع يا طهقانة
طهقانة:كتر خيره ماهو بقاله سنتين عندك
طهقان:طيب ابقى خيطيه
طهقانة:ما ينفعش فيه خياطة ده دايب
طهقان:طيب البس ايه دلوقت؟
طهقانة:الدولاب مليان بنطلونات البس أي واحد تاني
طهقان:طيب هاتيلي واحد اصل انا في الحمام
طهقانة:يا نهار مش فايت........ فين؟؟؟؟؟ كده برضه ترفعنا على السيرفر؟
طهقان:سيرفر ايه يا ست انتي
طهقانة:سيرفر المنور يا راجل ،اشوف فيك اسبوع
دي حاجة تطهق بجد
اوروفوار
امضاء

27 comments:

محمد عبد الغفار said...

كويس انها تقتصر على كده اكيد الرقابه شالت ما هو اعظم

احلى حاجه بقى فى سته اكتوبر العماره ملهاش منور لا على حمام ولا على مطبخ بنسمع من الأود دايركت

Unknown said...

ههههههههههههههه


المنور ده إختراع مصري عبقري .. كوكتيل مش طبيعي من الأسر كلها والناس كلها والكلمات كلها

حاجة أورجانيك يعني

Mafrousa said...

هههههههههههههههه
كل ده سمعتيه من المنور
ده انتى بقا بتلمعى اوكر
هههههههههه
و حلوة رفعتنا على السرفر ديه
انا بقا علشان مش اتفرس ولا من جوزى ولا من السكان
قفلت شباك المطبخ و مكتفيه بالشفاط

لانك ممكن تكونى فى المطبخ با اوختى بتطبخى الغدا
وواحد من الجيران لسة صاحي و فى الحمام
ههههههههههههههه
غير انك ممكن تشمي ريحة.............الطبيخ طبعا اللى بتطبخيه
هههههههههههههههه
ممكن تسمعى الموسيقى التصويرية المصاحبة للوضوء و غسيل الوش
هههههههههههههههه

همسات دافئه said...

هههههههههههههههههههههههههههه
طهقانه موتيني من الضحك
جميله اوي اوي

Anonymous said...

هههههههههههههههههه

و الله بالظبط منورنا الخالق الناطق
دا الواحد بيسمع حاجات يا نهار أبيض

استمرى يا طهقااااااااانة

موناليزا said...

حمدالله على السلامة
كنا مفتقدين موضوعاتك:)

وفعلا المنور ده بيعرض اسرار البيوت

shimaa elkholy said...

الحمد لله يا اختي انا المنور عندي مافيهوش جيران غير بابا

لما اصوت قدام العيال بابا ينده عليا فيه ايه يا بنتى

اقوله مافيش حاجه يا بابا

يقوم شاتمنى
ههههههههههههههههههههههه

Ahmed Mubarak said...

انتي خلتيني هروح اقف في المنور
:D

كيكى عوووووو said...

نوال بنت الست خديجة: بابا بيقولك مش عايز يستحمى، اعمليله شاي بالمية السخنة اللي فاضلة
!!!!
عشان كدة وانا فى الميكروباص كان فى روايح زى الفل
ااه يامااااا
************
هم يبكى وهم يضحك
اه والله

زبادي في الخلاط said...

كلة كوم وإعملي لي شاية بشوية المية السخنة .. هههههههههه
ماألاقيش عندكوا شقة فاضية
وحشنا كلامك العبقري
تحياتي
زبادي في الخلاط )سابقاً)
الوسع في القلوب )حالياًَ)

باحث عن حب said...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
جميله جدا
فكره المنور
ده
بس الحمد
لله
انا
ساكن
فى بيت عيله
كلنا واحد
ومش بتفرق
طهقانه
من
حقك
تقولى اكتر من
كده

Dina mostafa said...

جامدة موووووووووووووووووت يا طهقانة حلوة اخر حاجة على راى الجيل الجديد

bastokka طهقانة said...

منورين يا جماعة
منورين من اللايت يعني مش من المنور

كل واحد يخلي باله من مناويره بقى لحسن الفضايح بالكووووم
و ما خفي كان اعظم


ميرسي على تشريفكم و تشجيعكم
و
اوروفوار

صاحب المضيفة said...

ههههههههههههههههههههههههههه

حلو قوي البوست مع انه كله تصنت بس حلو

Sara Swidan said...

يا نهارك فل يا عبير ...

بجد محدش ف الدنيا بيرسم ابتسامة علي وشي زيك ...

خالتى بمبة said...

ههههههههههههه حلوة رفعكم على السيرفر يعنى نعمل سيرش عليكم على جوجل ولا ياهو نعرف ايه اللى بيحصل عندك في البيت

ولد تحت الصفر said...

ليكي حق تطهقي

ahmed_k said...

هههههههههه ده طلع المنور مشكله فعلا
بس فعلا لازم في تصميم العمارات يؤخذ في الإعتبار الحفاظ على الخصوصيه لكل ساكن
إزاي مش عارف بس بالتأكيد المهندسن عندهم حل

تحياتي

سكسكة said...

ههههههههههههههههه تجنني ياطهوقتي وحشتيني

Anonymous said...

هههههههههههههههههههه المنور دا حاجة زي الفل وكويس انها جت على اد الكلام بس هههههههههههههههه

جمبلة اوي المدونة بتاعتك
وليكي حق تطهقي

فاروق سحير ( فاروق بن النيل ) said...

طهقانة هانم ..........
طهقتينا فى عيشيتنا لما الجواز كدة والعرسان الجداد حلوين ونسمة سيبونا نتجوز كل مانطهق عشان نجدد طهقان ونشوف طهقانه جديدة لسة ماطهقتش بدرى عليها أوى ولغاية ماتطهق نكون إحنا عايشين من غير طهقان والاإيه ياطهقانة موش برضة حاجة تطهق ولا ماتطهقش أن طهقت كلامى خلاص .
المطهوق طهقان طاهق

Anonymous said...

جميل جدا يا ست طهقانه بس الاجمل هو التنوع الراءع فى الجيران واحوالهم انا ساكن قى الارياف يعنى كل الجيران منوره على بعض

شهد الكلمات said...

ادم الجيران تسمعنا
ماحنا برده بنسمعهم يا حورية
هههههههههههههههه

صدى الصمت - عاشقة الورد - said...

هههههه
والله دمك زى العسل
ربنا يسعدك زى ما بتدخلى الفرحة فى قلوبنا بكتاباتك الرائعة
تحياتى

ويكا said...

هههههههههه

بجد ، جميييله اوى نشرة اخبار المنشر دى.

وبالذات الراجل بتاع اللمبه ده ، والله وجهة نظر برده .

وكمان بتاع الميه السخنه ، يا بخته بدماغه

يا مراكبي said...

ده كده مش منور

ده النايل سات شخصيا

ههههههه

Enbee said...

حلوة قوي ؟ كده برضه ترفعنا على السيرفر؟

هههه

تحياتي مع ابتساماتي