ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

ألعاب للمتزوجين- فقط



من ساعة ما حملت و انا بقيت شبه حرف (B) و تطور الموضوع الى حرف (D) و اخيرا لاحظت اني دخلت في زمرة حرف (O) شكلا و موضوعا و بقيت بعرف امشي بجدارة مشية البطة المتزغطة ، و بنهج من مجرد التفكير في اني لازم اقوم اروح الحمام ،و طبعا انتم عارفين ان الحياة اصلا روتينة مملة و انها مليانة هموم و مشاكل و مش ناقصين اقلب عليكم المواجع


و لاني دايما ببحث عن التغيير و التطوير؛ عملت شيرش (الله يمسيك بالخير يا شعبولة) على عمنا جوجل على طرق مبتكرة في تجديد الحياة الزوجية و نعنشتها

و لقيت مواقع كتيرة منزلة أفكار لالعاب زوجية مبتكرة تضيع ممل الروتين اليومي و ترجع الشباب و تصطاد الراجل في سنارة البيت و متنسيش يا أختشي منك لها إن الراجل طفل صغير مهما شعره وقع و أصلع و عجز




و اللعب برضه احسن من الخناق و النقار و الطهق و لا اية؟

بس للأسف معظم الألعاب كان لازم اشتريها من على النت و ده طبعا يدخلنا في كريدت كارد و أبعت و استنى و كلام من ده ،و أنا ست عملية مدبرة زي ما انتم عارفين.. احم ..احم

فقررت اخد أفكار الألعاب دي و اخترع أنا (نظرة شريرة ضاحكة)



لاحظت إن معظم الألعاب بتركز على مفاجأة الخصم (اقصد الشريك) و تنمية الترقب و رفع نسبة الشغف عنده، من الآخر أزاي الست تخرع جوزها !! و بعضها بيعتمد على تنشيط حاسة الشم أو التذوق أو حتى حدة النظر.... و كان ما كان



(طفيت نور الأوضة بالليل)

طهقان:بسم الله الرحمن الرحيم ...اية اللي بينور في الضلمة ده؟؟؟

طهقانة:تراراااااراااا ...اية رايك يا طوطو؟؟؟

طهقان:يا امة...انت حاطة اية على وشك يا طهقانة؟؟

طهقانة:دي الوان فسفورية من بتاعة الواد طوطو الصغير يا طهوقتي حددت بيها مواطن الجمال في وشي علشان تنعم بيها حتى في الضلمة(بربشة سريعة)

طهقان:مواطن اية و معالم اية؟؟!! ده انا قطعت الخلف يا امي ....اية المفأجات الغريبة دي!! نوري النور بسرعة

طهقانة:(نورت النور ) اهو يا طوطو بعملك ريفريش و انت عارف اني ست فيري انترستنج و بحاول اجدد في حياتنا العاتشفية

طهقان:يا ساتر يا رب .. بس ابقى نبهيني بعد كده لحسن يجرالي حاجة.. و التغيير يجي في خانة الحالة الاجتماعية من متزوجة الى أرملة

طهقانة:بعد الشر عليك يا حبيبي... يلا بقى نلعب شوية.. انا مخبية حاجة انت بتحبها في حتة في الأوضة، لو لقيتها ؛حديلك بوسة كبيرة و رغيف بلدي تاكلها بيه

طهقان:ايه؟؟ بوسة؟؟ و رغيف؟؟ هو انا رايح احلق تحت الكبري حتديني بيضة و رغيف!!

طهقانة:يلا بقى متبقاش كسلان.. قوم دور علشان تنمي عندك حاسة الشم ،و ترفع معدلات الترقب و ده حيساعد هرمونات البهجة انها تشع منك

طهقان:هو انا شامم ريحة غريبة !!بس مش عارف مصدرها !!؟؟

.. شااا شااا شااا

(و بعد شوية دعبسة في الادراج و الدواليب)

طهقانة:ها .. قربت ...شمشم كمان

طهقان:يانهار شم النسيم؟!!! اية ده؟؟؟ رنجة؟؟؟ في دولاب اوضة النوم؟؟

طهقانة:اية رايك بقى؟؟ دي مش اي رنجة!! دي من عند حافظ ( ملك الفسيخ) ، اهو شم النسيم على الأبواب و انا عارفة انك بتحبها .. خد الرغيف بقى

طهقان:(في زهول) بس انا بعد ما اكل الرنجة دي مش هرمون البهجة اللي حيرتفع عندي !!! ده هرمون العطش و النوم اللي حيشر مني


طهقانة:كده؟؟ طيب... استنى.. بلاش تاكلها دلوقتي خليها ابقى احبس بيها.

طهقان:احبس بيها اية ؟؟ربنا يستر

طهقانة:مش انت بتحب الشيكولاتة؟؟ انا مخبية في الاوضة عشر شيكولاتات من الصغيرة المدورة (ام& ام ) لو لقيتهم كلهم في اقل من ثلاث دقايق حديلك جايزة فظيعة

طهقان:انا لسة حدور؟؟ يا امي انا عايز انام

طهقانة:يلا بقى متبقاش بايخ ..ده انا تعبت لحد ما خبتهم

طهقان:طيب هاتيلي النضارة من جيب البنطلون.. لما نشوف اخرتها معاكي

طهقانة: لا يا شاطر ..من غير النضارة.. حسس و دور لحد ما تلاقيهم

طهقان:ده اية الذل ده؟؟ انا في اختبارات الفنية العسكرية و لا اية ؟؟ انا شايفك اصلا لما حشوف شوكولاتات نونو مستخبية!!! انت بتعملي فيا كده ليه يا طهقانة؟؟ بتحسسيني بالعجز؟؟

طهقانة:الله؟؟ هي الالعاب جابت نتيجة عكسية ليه كده؟ اممم ...طيب ماشي حنتغاضى عن موضوع النضارة و حسمحلك بيها المرة دي ..

طهقان:ليه هو في مرات جاية!!! يا قوي يا رب

طهقانة:شاطر اديك لقيت اتنين ....تلاتة....اربعة...خمسة...شطور يا طوطو يلا دور كمان

طهقان:لقيت تمانية بس مش لاقي الاتنين الباقيين يمكن تكوني اكلتيهم و ناسية ما انتي بتاكلي الاخضر و اليابس اليومين دول

طهقانة:الله اكبر .. مش باكل لاتنين يا طوطو!!

طهقان:ما انا ملاحظ من ساعة ما دخلتي السابع و انتي استقريتي في المطبخ و بقيتي من سكان التلاجة وعندك نشاط في هرمون السندوتشات و تحاليل المحشي مرتفعة معاكي




طهقانة:طيب يلا قوم غمض عنيك بالايشارب ده و انا اسقفلك و لو عرفت تمسكني حديلك مفاجاة فظيعة

طهقان:طيب ما انا ماخدتش المفاجاة الفظيعة بتاعة اول لعبة!!!

طهقانة:ما انت ملقيتش العشرة كلهم لقيت تمانية بس ..يلا قوم اغمضلك عينك

طهقان:يا بنتي اتهدي الله يهدك... انا لسة حلعب مساكة في السن ده!!

طهقانة:انت لسة شباب يا طوطو.. و انا و انت لازم نكون زي السكينة في الجاتوة على راي اللمبي

طهقان:لا و انت الصادقة لازم نكون زي المسمار الألاوز في الصامولة

طهقانة:(تصفيق منتظم) يلا حاول تمسكني

طهقان:اي...رجلي (رفع الايشارب من على عنينه)

طهقانة:سلامتك يا طوطو دي رجلك خبطت في الكوميدينو

طهقان:ادي اخرة اللعب مع العيال ..فين المفاجاة الزفت دي بقى؟؟

طهقانة:تراتراااااا.. اهية يا سيدي

طهقان:ايه ده؟؟؟؟؟ فاتورة الكهربا؟؟؟كااااااااااااام؟؟ انت فتحتي مصنع ملابس في البيت و لا اية؟؟؟ 700 جنية ليه؟؟؟

طهقانة:ما هي فاتورة الشتا كلة يا طوطو؟؟ و بعدين ما انا طفيت النور و حطيتلك الوان فسفورية معجبكش و قلتلي نوري النور!! اعمل اية تاني



طهقان:حسبي الله و نعم الوكيل (ملامح مجعدة تنم عن ضيق مع غضب مع طهق)

طهقانة:يعني بعد كل التسلية و الفن اللي عملتهولك لسة طهقان ؟!!!

دي حاجة تطهق بجد


اوروفوار
امضاء



pregnancy

25 comments:

روح said...

بدخل مدونتك عشان اضحك
ربنا يكرمك وخلي بالك انك لسة مش زورتيني لغاية دلوقتي براحتك ياست طهقانة

خالتى بمبة said...

حرام عليكي والله ياطهقانة الراجل ده بعد كده مش هيقفل على نفسه باب اوضة واحدة معاكى فسيخ في الدولاب يا مفترية يا شرسة وفى الاخر المكافأة فاتورة الكهرباءطيب كنتى خلتى المكافأة ازازة بيبسي حتى كانت ارحم هتطرى على قلبه بعد ما نشفتى ريقه

Anonymous said...

دمك زى العسل يا طهقانه

nana said...

ههههههه
ما انت يا طقهانة اعطيتيه مفاجأة تسم البدن

بعد كل هادا فاتورة كهرباء ؟؟ حرام عليكي


بس بجد دمك عسل

يا مراكبي said...

طيب وليه الذل ده

مافيش كنبه بره في الصالة ينام عليها ويخلص من وجع القلب ده؟

أحلى حياة said...

السلام عليكم

يلا بالشفا ياطهطوهتي
وخيرها في غيرها إن شاء الله
:D

تقومي بالسلامه ياجميله
ربنا معاكي يارب
:)
ويجعلك ساعه سهله ياحبيبتي
:D:D:D

ahmed_k said...

ههههههههههههههههه
ده كويس أنه لسه فاضل طهقان ومطقش لسه ههههههههه
بقا بعد كل اللعب ده
تطلع المفاجأه فاتورة الكهربا
بس تصدقي مقدمه ظريفه للصدمه دي
هههههه

بنت الغربة said...

ههههههههههههههههههههه
انتى زى العسل ياطهقانه والله ..
انا مش عارفه الواحده تعمل اكتر من كده ايه ...؟؟؟ وبرضه مش عاجب...
بجد حاجه تطهق...
انا رأى تعمليله مساااج جميل كده وتقفى على ظهره
وتتمشى عليه شويه ...هتلقيه بقى ريلاكس على الاخر ...ولو اعترض قوليله دى طريقه جديده فى المساااج ...ومضمونه
اسالينى انا
ههههههههههههههه
تحياتى ياقمر

KIMOOOZ said...

طلعتى بكابيظ الراجل يا وليه شوفيلك مستشفى اولدى فيها

ستات ايه ديه

معندكيش اخت عسل زيك كده للجواز

مش بعاكس و الله

ليلى فى عالم ادم said...

بجد اد ايه ضحكتينى
انت دمك شربات يا طهقانة
والف مبروك على الحمل وربنا يعينك ويقومك بالسلامة
وكلى براحتك زى ما انت عايزة وماتخليش تريقته تضايقك

Anonymous said...
This comment has been removed by a blog administrator.
مهرة سالم said...

السلام عليكم..
طهقانه يا عسل ...
حراااااام عليكي إم&إم
ومن غير نظاره
يامفتريه .....
...........
الله يقومك بالسلامه يا قمر ...
وبما إنها بنوته قمر زي مامتها
أكيد حتسميها نهــار مش كده
ما أنا عارفه...
..
دمتِ بخير

7azem said...

لول لا والله انا كان فيتنى كتير فى النت انتوا ناس زى العسل ودمكم شربات

بجد ربنا يطول عمرك

محمد عتلم said...

هههههههههه
ههههههههههه
هايله اوى الألعاب بتاعتك دى
دانتى هتودى الناس المتجوزين كلهم فى داهيه بسبب العابك المنيله دى يا طهقانه
فاتورة كهربا عاملاها مفاجأه ؟؟
طبعا دمه نشف

@@كريكش@@ said...

الله يحظك يا شيخه .. فكرتينى باللى طفى لزوجته نور غرفة النوم وبعد ترقب و إنتظار ..طلع لها السبحه اللى بتنور ( بلا خيبه ) الله يخللى لك طوطو يا طاطا

بنوتة said...

هههههههههههههههه
هههههههههههه
انا رجعت اهو رديت على تعليقك و نزلت بوست ادخلي و قوليلي رأيك
كل سنة و انت طيبة انهارده عيد تحرير سينا

بنوتة said...

ههههههههههههههههه
هههههههه
ههههههه
الرجالة دول عايزيين تدلعيهم بطريقة مختلفة مش انت بتقولي"و متنسيش يا أختشي منك لها إن الراجل طفل صغير مهما شعره وقع و أصلع و عجز"
خلاص يبقى عمليه دايما كأنه طفل هاتيله الأكل في السرير مش تلعبيه استغمايه ولو عايز تحطي حاجة في عينيكي يبقى حاجة سيمبول متبانش اساسا واحكيله حكاية قبل النوم اللذي منه ولا ايه يا طقطوقتي
اوكيه يا اختشي العوافي بقى
ارفوار

عاشــــــ النقاب ـقــــة"نونو" said...

ان شاء الله تقومي بالسلامة يارب ويجي ولا تيجي بالف سلامة يارب
اضحك الله سنك

t3ban said...

ههههههههههههه
فكرتيني ببابا
كل ما النور يقطع و اطلع من الأوضة متجه للبلكونة و الدنيا ضالمة الاقي حاجة بتقلي متخافش اقع من الرعب

shabfa2re said...

يا عينى بجد
بيصعب عليا اوى الحوامل

jehan said...

هههههههههههههههههههههههههههههههههههه حلو قوووى تشبيهك لشكلك بالحروف الانجليزى بجد تحفه ههههههههههه

ربنا يقومك بالسلامه يارب وتكمليهم 12 طفل وطفله وربنا يخلى طهقان

nshof said...

روووووووووعه يسلموو
اتمنى زيارة الالعاب التالية بموقعي
العاب طبخ

العاب تلبيس
العاب بنات
العاب
العاب فلاش
العاب سيارات
العاب باربي
العاب اكشن
العاب
اطفال

العاب
جديدة

العاب
للبنات

تحميل العاب

العاب ماريو

العاب كرة قدم
العاب مجانية
العاب افلاش

العاب 2009


العاب ذكاء

العاب سباق

trtr388 said...

مساء الخير يا ست طهقانة

انا بعد ما قريت البوست دة .. قررت ارد علشان اطمن على الغلبان " طهقان باشا " يا ترى عامل ايه ...

يا عزيزتى لا تحاولى تجريب كل ما تجديه عند العم جوجل ولا تحاولى تعرب او تمصر افكار الاجانب .. خاصة لو كان الاستاذ طهقان هو حقل التجارب بتاعك

الله يسعدكم و تمر الايام الباقية ليشرف بيتكم (( فرحان ) الصغير .. كتير اسلوبك لذيذ

مودتى

العاب طبخ said...

العاب جميلة

العاب تلبيس said...

العاب روعة