ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

جيش الطهقانين.. يناديكم


طهقانة:يلا يا راجل.. قوم بينا
طهقان:على فين يا ست إنتي؟
طهقانة:يلا بينا نروح نطوع و نعمل جيش عربي مشترك و نحارب إسرائيل
طهقان:اهمدي يا طهقانة... بقى الحكومات العربية مطنشة و أنتي اللي حتجيبي رجل الكيكي من ريشه!!
طهقانة:ايون و فيها إيه؟..تعالى نعمل حملة على الفيس بوك ،و نجمع متطوعين للمشاركة في الجيش العربي المشترك من كل الدول العربية ،علشان المنيلة إسرائيل متعرفش تحارب مين و لا مين ،و يتفرق دمها بين القبائل،و نعرف نجيبها من شواشي شعرها و نمسح بيها بلاط فلسطين
طهقان:و حتجيبي السلاح منين بقى يا ست المرشال طهقانة؟؟و لا تكوني ناوية تضربيهم بالمصاصات و اقلام الروج!!

طهقانة: لأ طبعا...ما هو في بلاد معندهاش متطوعين بس اغنيا، فحيدفعوا فلوس نشتري بيها سلاح و طيارات و دبابات و نبألجهم.
طهقان:آه.. و تنزلي شارع عبد العزيز بقى ..تشتري خماشر دستة بنادق من الصيني على كام نبلة عمولة و تشرخي على فلسطين تحاربي ..مش كده؟!

طهقانة:لا يا ناصح.. حنشتري سلاح من روسيا أو من ايران و ممكن نصنع سلاح كمان، ده مفيش أسهل من الأذية ،بس إحنا اللي كنا مطولين بالنا و عمالين نقول بكرة يعقلوا، و حتى لو معرفناش ..حنشتري عصايات مقشات و رجلين كراسي بمسامير مصدية و نروح نطيح فيهم ...هي موتة و لا أكتر؟!
طهقان:أنت فاكرة الحرب سهلة؟ و لا لعبة؟ يا بنتي أنتي حتحاربي بنت أمريكا البكرية يعني حتتفركي في نصف ساعة أنت و الجيش العربي بتاعك

طهقانة:يعني لا نافعة معاهم المظاهرات!! و لا نافع معاهم الشجب و لا النداءات اللي عمالين ينادوا بيها الحكام طول النهار لما صوتهم اتنبح يا ضنايا!! و لا الاتحاد الاوربي ده كمان... باينة طالع بسبوبة من القصف ده و بيحابي لاسرائيل و لا يمكن متجوزها عرفي ، و مجلس الأمن إكمنه مأمن على نفسه.. بيقول: أيكش تولع ....و أنت جاي تقولي: الجيش و الحرب مش حتنفع؟!!! دي حاجة تطهق بجد
طهقان:دول مش حينفع معاهم غير الدعاء ..اتوضي و صليلك ركعتين و ادعي عليهم ربنا يأخذهم وربنا كبير
طهقانة: و نعم بالله ..ربنا قادر على كل شئ، بس لازم نعمل حاجة عملية قدام عداد الشهداء اللي عمال يرف ده..تبرعات بالدم، بالفلوس ،بالهدوم، بأي حاجة... أي حاجة... أنا حطق
طهقان:حتى التبرعات دي متعرفيش بتروح فين!؟ و لا بيتنهب منها أد أية!؟ و يا ترى بتروح للشعب الفلسطيني المطحون بجد و لا بتروح في كروش السلطة الفلسطينية!؟
طهقانة:يعني إيه؟ أطق؟؟ و أتفرس؟؟ كده ..فطيس كل ليلة و أنا شايفة القصف عيني عينك على الهوا مباشرة
طهقان:تعرفي أحسن حل إيه؟
طهقانة:إيه يا بعلي؟؟ قول ؟
طهقان:تفرمتي الدش، و تشيلي منه كل قنوات الأخبار ،و تسيبي ميلودي هيتس و موجة كوميدي بس علشان ترتاحي و تفرفشي، و تسيبيني أنام
طهقانة:بقى كده؟؟؟؟ طيب... اعمل حسابك تطلع تنام في البلاكونة بقى الليلة، علشان أنا ححول البيت لسكنات عسكرية، لشحن قوى الشعب الثائرة و تجميع أكبر عدد من المتطوعين للتدريب على الحرب الطهقانية القادمة ضد إسرائيل.
طهقان:بلاكونة !!في البرد ده يا مفترية؟؟ واحد اتنين الجيش العربي فين
طهقانة: ها مين يحارب معايا؟؟؟؟؟؟؟؟؟؟؟؟؟؟؟؟؟؟؟؟
أوروفوار
امضاء

33 comments:

bastokka طهقانة said...

لو عندك دم




تعالى اتبرع



--------------
اوروفوار

صبرني يارب said...

ياريت يا طهقانه

ياريت كان ينفع

ياريت كان يبقى فى جيش عربي

نفسي اعرف بنكره بعض ليه ؟؟؟؟؟؟؟؟؟

ليييييييييييييييه؟

nana said...

انا احارب معاكي

موناليزا said...

ماتنسيش تدى لكل واحد فى المعسكر غطا حلة وسكينة مطبخ وحلة يحطها على راسه علشان الحماية

بنت الغربة said...

انا معاكى ياطهقانه
انا هالم فلوس هنا من الناس فى دبى
ونروح الصين نشترى سلاح
وبعدين نحود على ايران ناخد شويه نووى - واوعدك الباقى هنقسمه بالنص
كلمة السر كتكوت
تحياتى ليك ياجميل ودايما زورينى
واروفوار انت كمان

نعكشة said...

في مخي ان شاء الله يا رب يعيني و اتطوع
و بالنسبة للتبرع ان شاء الله هروح انا و العيال

و ربنا يفرج عنهم يا رب

جزاكِ الله خير

سلام عليكِ

afreet said...

على فكرة ياطهقانة سمعت ان البرادعي ناوي يفتش المدونة بتاعتك بحثا عن نووي فاستخبي
وقولي لطهقان يرمي كل البلح بره البيت

نحياتي

Unknown said...

بجد انتي عسل حتي في صولاتك و جولاتك الوطنيه خديني معاكي في الجيش بتاعك

الوضع العربي كلو مش الفلسطيني بس بقي مالوش حل

العرب بياكلو بعض يبقي اليهود هايعملو فينا ايه

عاشقه وغلبانه said...

احلمي احلميبس بس حرام ماتسيبيش طهقان في البلكونه
احنا اخرنا نعمل اوبريت الحلم العربي
واروفوار ياختي

خالتى بمبة said...

ها انا جاهزة هاكل الساندوتش ده واطوع معاكي ماهو مش معقول اطوع وانا جعانة ههههههههههههه موضوع جميل زى اللى كاتباه يا طهقانة

محمد عتلم said...

دخلت المدونه كأنى دخلت خناقه
ايه ده يا طهقانه
انتى طهقانه اوى كده من جوزك ومن اللى حواليكى ومن الحياه كلها ؟؟

Mafrousa said...

مش انا طبعا
لاني مش مع الحرب خااالص
عارفه الحرب اللى تجيب معاهم نتيجة كلهم على بعضهم
حرب الدماغ
اه مستغربه ليه
الدماغ يا قمرة
و يمكرون و يمكر الله و الله خير الماكرين
لغاية النهاردة كل العالم بيفكر فى مظاهرات
و يشجب و يدين و بيتبرع
طيب زي ما قال طهقان تضمنى ان التبرعات بتروح للفلسطنيين الغلابة؟؟؟
يا بنتى الشعوب ديه لو دخلت المساجد و صلت ركعتين و دعت بجد ربك عمرك ما بيضيع دعاء
"لا يرد البلاء إلا الدعاء"
و بعدين لازم خطة ذكية من غير عنف و لا ضرب
هيه ديه الخطط اللى بتنجح و بيبقى ليها مفعول
لو عاوزاني فى حرب العقول
ممكن مفروسة مع طهقانة يعملو خطة
تفرس الاسرائيليين و تطهقهم فى عيشتهم و يقولوا حقنا برقبتنا
اوروفوار
على رأي واحدة صحبتى

bastokka طهقانة said...

يا ريت كان ينفع...و ليه ما ينفعش؟؟ كل البلاد العربية من مصلحتها يكون عندها جيش قوي يحميها و اغلب دول الخليج اغنيا بس معندهمش جيوش ،طيب ..ما نحقق المعادلة الصعبة و نكون جيش على احدث طراز.
و الله اول ما نبدأ بس ..اسرائيل دي حتعمل بيبي على روحها لان ربنا وصفهم بالجبن و الخزلان في (القران الكريم )و اي اعداد للقوة حيرهبهم

و صدقوني.. اسرائيل مش حتنتهي الا بكدة و لو بعد ميت سنة و ساعتها حتقوم القيامة
ده وعد ربنا

--
يمكن خرجت عن روح المدونة و قصتها بس الطهق جزء كبير منه حاصل من اللي بيحصل في غزة ،و الجزء الاكبر من استسلام العرب و مصمصة شفايفهم على اللي بيشوفوه في النشرات ،و بعد كده يروح كل واحد متكلفت و نايم و مشخر و لا كان الدور جاي عليه
!!
اه ..طولت ؟ معلش ..اصلي مبقوقة
ربنا يستر


---
اوروفوار

الجواز و سنينه said...

نحارب؟؟؟؟
يابنى وقت الجد الكل بيهرب
دى ناس اخرتها مظاهرات و بس
وبعدين العرب عايزه تحارب لاخر جندى مصرى
انا شايفه ان اللى شايف نفسه دكر و عايز يحارب يروح بس مالوش دعوه بمصر

يا مراكبي said...

رغم إني طبعا مع طهقان قلبا وقالبا في موضوع فرمتة الدش وقصر قنواته على قنوات ميلودي هيتس إلا إن فعلا الإحساس بالعجز بالشكل الرهيب ده بيخلي الواحد دمه يغلي

حتى المساعدات مش هنعرف نوصلها للي يستحقوها

lastknight said...

و الله العظيم أنتى دماغك زى العسل ... فكرتينى بأكرم ابنى اللى عنده اربعتاشر سنه دلوقتى لما أتكلمنا عن غزه
عموما كنت هاقولك شرفينى عندى تحليل للمووع بس شكله هايبقى دمه تقيل و ينكد عليكى أحلامك الورديه .. بلاش تيجى
و على فكره .. طهقان عنده حق .. ده رب أسره بيتحمل مسؤليته

t3ban said...

احنا وراك أريس

بس انا كان عندي ازتفزار

أحنا ريحين نكوم مين

قليلي بس علشان ان كان صخص ذو أهمية أسترتيتية
ألملو عيال من جمهورية أبو سليمان المتحدة
أو انزلو الاصعي اجبلو سلاح

بنت مصرية said...

معونه ايه و حرب ايه يا اختي هو انتي متعرفيش ان البقره الضاحكه قفل المعبر تماما و سابهم يولعوا و ان حتى الدكاتره المتطوعين اللي جايين عقبال املتك من اليونان واخده بالك من اليونان يعني بتوع الزيتون الكلاماتا احسن مننا واقفين على باب المعبر و بسلامته رافض يعديهم قال ميدخلش اجانب من مصر لفلسطين بس الشهاده لله الناس طلعوا ارجل من العرب و قالوا احنا مش هنتحرك من هنا الا اما تفتحوا المعبر و تعدونا نساعد لكن الباشا شكله زهق و قفل موبايله و شال كبس التليفون من البيت
ولا خدي دي
سفير كوبا في لبنان بيطالب العرب بمنع الغاز عشان يسيطروا على اللي بيحصل لكن طبعا البيزنس مالوش دعوة بالقتل والكلام الفاضي ده ومليزيا لمت مليون دولار هههههههه واحنا حتى مش عارفين نلم شرابات ربنا يلطف بينا و يرحمنا
اسكتي انا مش عايزة اتكلم

عابد الرحمن said...

نأخذ من كل رجل فتيلااااااااااااااا
هههههههههه دمك بجد عسل
شكرا علي كلامك الجميل بس بجد شكلها ملهاش حل الا الدعاء زي ما طهقان قالك بالظبط

ستيتة said...

احنا وراكي انتي الزعيمة مرات الزعيم طهقان
بوست تحفة ضحكت ضحك
النهارده وصلنا لحل برضه
نجيب قرشين من العرب الأغنياء اللي عمالين يشجبوا ويدينوا وهم تحت البطانية زيك انتي وسعادة طهقان باشا
ونشوف لينا كام راجل جتة من بتوع الميليشيات الأفريقية المأجورة يحاربوا لينا حربنا ويدخلوا يدوا اليهود الجبناء علقة مخدهاش حمار في مطلع
بيقولوا ياستي ان 660 اسرائيلي دخلوا المستشفيات من الرعب من اصوات الصواريخ بس
شفتي دول جبنا جدا هم بس حد يخضهم يكشوا زي الفيران (لا يقاتلونكم الا من وراء جدر )
تحياتنا للراجل الإستراتيجي الصح طهقان باشا
اوفيدرزين

Unknown said...

والله بجد لو كان ينفع كان الواحد عملها ع الأقل رقم واحد يموت شهيد وتتغفرله كل ذنوبه وكمان يكون ساهم في رفع راية الإسلام وإعلاء كلمة ربنا نلاقي حاجة تنفعنا يوم القيامة بدل ما احنا قاعدين مش طايلين سما ولا أرض
والله لو ينفع نعمل جيش عربي بجد ويرجع المجد زي زمان
بس أنا متأكد إن في يوم هيجي وينفع يحصل ده كله وربنا قال كده
ربنا يحينا جميعا لحد ما نشوف الإسلام منتصر وعزيز
مودتي

dido said...

السلام عليكم
ازيك يا طهقانه انتي حته سكر والله
عاوزه اقول مثال مقرف شويه ده لو كل مواطن عربي تق علي الصهاينه تفه هتغرق بس نقول ايه مش عارفين غير نقول ربنا ياخدهم بس من غير ما نعمل حاجه
علي رايك
دي حاجه تطهق بجد

آه وكفى said...

بوناسيرا

كل واحد وعلامة بئى
:0))

تفتكري ياطقانة ممكن تحصل المعجزة واذ فجأتن كده ربنا يهديهم ويعملوا حاجة ياسلااااااام
امته اعيش واشوف اليوم ده

Shimaa Esmail said...

الأستاذة/ بسكوتة
صاحبة مدونة / طهقانة
" تحية طيبة" وبعد..
اعتذر عن الخروج من موضوع التدوينة، لكنني أرسلت لك رسالة عبر البريد الإلكتروني تتعلق باستمارة استقصاء بيانات عن المدونات المصرية.
أرجو الاهتمام والرد سريعا بالإيجاب أو السلب.
تحياتي وتقديري
شيماء إسماعيل
باحث ماجستير- كلية الآداب جامعة القاهرة.

وميض ابتسامة said...

وان كان الموضوع يحزن ويطهق بجد بس انا شبه متفق مع طهقان فثلاثة ارباع كلامه صح واللى ضايع ولايص هو الشعب الفلسطينى الغلبان .. لكن المحروسين رؤسائه زى الفل وعايشين احسن عيشة وانا بقيت مش عارف هم صح ولا احنا اللى بنفهم غلط.. المهم ده مش وقت حساب المهم ياريت كل اللى يقدر يعمل حاجة يعملها ان شاء الله بالكلام وربنا يرحم شهداء فلسطين

علا من غزة said...

ههههههه
ضحكتيني وانا مش عايزة اضحك
يا ستي احنا مش عايزين حد يحارب عشان خاطرنا
اعملي زي ما قلك طهقان واتوضي وادعي لربنا دعاء القنوط
كفاية الجرحى الي استقبلتوهم عندكو
والسماعدات الطبية الي بتوصل للناس هناك
ولا يكلف الله نفسا الا وسعها

تحياتي

بنت الغربة said...

ازيك ياطهقانه
ممكن تضمينى لحزب الطهقانين معاك
ونسميه حزب الطهقانين والمخنوقيييييين

وتبعتيلى ساطور من عندك
بس يكون كبير شويه علشان العضمه عندى جامده
تحياتى واروفوار ليك

koukawy said...

انا عندي مغرفتين قدام في البت بس كل واحده فيهم متينه مش اي حاجه
ايه رأيك تنفع؟؟؟؟؟؟؟؟؟

dr. Ahmed Sakr said...

حسبناالله ونعم الوكيل فى الحكام العرب

واللى بيعملوه وقاعدين شايفين اللى بيحصل لإخواننا ولا يتحركون

م/ الحسيني لزومي said...

حمله المقاطعه
لا تستطيع ان تجاهد
لاتستطيع ان تتظاهر
لا تستطيع ان تتبرع بالمال
اذن قاطع وادعو غيرك للمقاطعه
منتجات كل من يدعم العدو
**** هل تعلم أن:-
1- شركه ستار بوكس(للكافيهات والقهوة) تدعم العدو ب 2 مليار سنويا من ارباحها
2- شركة فليب موريس (مارلبورو & مريت ) تدعم العدو وتدفع بصفة يومية ما مقدارة 12% من ارباحها.وعليه فإن مدخني العالم الإسلامي فقط يدفعون كل صباح 12 مليون دولار اي ما قيمته طائرة اف-16 كل اربعة ايام .

*** قائمة المقاطعة
ستار بوكس
ماكدونالدز
برجر كينج
كنتاكي
بيترا كينج
كوكاكولا
بيبسي
فردركرز
شيليز

لنوقف شراء البضائع الأمريكية والبريطانية لشهر واحد فقط

سوف تكون تكلفة هذا الشهر عليهم خسائر مقدارها
37 بليون دولار

zainab said...

أنا مش عارفه و الله ليه العرب كده مع بعض

ربنا يهديهم

تحياتى

عاشــــــ النقاب ـقــــة"نونو" said...

هم يبكي وهم يبكي برضه
ربنا يفرجها يارب

son's egypt said...

السلام عليكم
ياريت كلنا فعلا نتجمع زي ما كنا زمان جيش عربي واحد
زي ما عمل صلاح الدين وغيره