ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

الخروف المسورق


الأول كل سنة و انتم طيبين، و ينعاد عليكم بكل خير و سعادة و هنا ،و يا رب العيد الجاي اللي مش متجوز يتجوز علشان يطهق و يجي يقعد جنبنا.
و طبعا مفيش عيد من غير فتة و مفيش فتة من غير لحمة و مفيش لحمة من غير خروف.
بس مش كل خروف زي خروف العيد بتاعنا خروف يطهق بصحيح
أكل ستارة البانيو و بهدل باب الحمام من كتر ما نطحه و كل ده علشان طهقان و هو جايبة من السوق حبسه في شنطة العربية و خاف لينط فقفل عليه الشنطة و على ما وصل البيت كان الخروف أغمن عليه
و طبعا طهقان قعد يفوّق فيه و يرش على وشه ماية و يلطشه بالقلم لحد ما فاق.
و أول ما فاق طلع يجري و طهقان يجري وراه و عم سلطان البواب وراهم الحق يا عم ....حلق يا بيه.... أوعى يا شاطر
و الخروف على صرخة واحدة ماااء... ماااااء
بس على مين ؟؟!!مسكوه متلبس بالفروة بتاعته و جابوه حبسوه عندي في الحمام لحد أول يوم العيد لما يدبحوه
و من ساعة ما دخل البيت و هو عامل لنا خساير و مطلع اللالو على عنينا
الصبح ماااء .....و الظهر ماااء .......و باليل مااء
مش عارفين ننام و لا ندخل الحمام و عامل لنا احتباس في المزلقان
كل شوية أنده على طهقان:
يا بابا تعالى اربط الخروف علشان طهقانة الصغيرة عايزة تعمل بيبيه
لكن الأستاذ خروف عنيد و مبيحبش حد يفرض إرادته عليه، ويصر انه يفضل مفكوك و يعرف بنعمل أية بالظبط في الحمام!! يا خوفي ليكون بيصور و يبهدلنا بلوتوث بعد كده.
و كله كوم و لما طهقان الصغير حب يركبه و يتفسح بيه شوية، فضح الدنيا و كان شوية شوية يطلب لنا البوليس و جمعيات الرفق بالحيوان باين عليه خروف متعلم و حيعمل لنا قلق.
أنا خلاص قطعت العيش البلدي و حمصته بالزبدة و قشرت الثوم علشان التقلية ،و مش فاضل غير سلق اللحمة و عمايل الرز بالسمنة البلدي مع رشة فلفل اسود و ريحة الخل على التقليلة بقى .....يمييييييي .....ما قلقوش
و طبعا كلكم معزومين تفطروا معانا بكرة لو عرفنا ندبح الخروف الرخم ده
و العنوان ميتوهش
مدينة الطهقانين شارع عباس الطهقان تقاطع مطهق طهيق عمارة الست طهقانة
و حتعرفوا الدور و الشقة من ريحة التقلية
و الدعوة عامة
و كل سنة و انتم طيبين


اوروفوار
امضاء


40 comments:

Unique Gurl said...

هههههههههههه
لا خروف ليه شخصية فعلا
انا لسة مشوفتش الخروف بتاعنا عشان احنا مش بنجيبه البيت
بنسيبه عند الجزار لحد ما العيد ييجي
يالا
كل سنة وانتي طيبة انتي وطهقان والطهقانين الصغيرين :):)

أميرة said...

يا ستي تعيشي وتضحي :)

هي مرة في السنة و بنستناها من العيد للعيد

هههههههههه طهقن باينه نقي خروف يكون لايق علي العيلة ولقبها في الطهقااان :)

عيد سعيد عليكم وعلي المسلمين اجمعين يارب

صدى الصمت - عاشقة الورد - said...

كل سنة وانتى وكل الطهقانين بخير
بس انا مش عاوزة فتة أنا عاوزة عيدية وكارت شحن موبايل بس (أنا مش طماعة

Unknown said...

ههههههههههه
والله انتي سكره
انا حسيت الريحه دخلت في نخاشيشي

اما بالنسبه للخروف في الحمام

فكلنا هذا المنزل

يعود عليكي وعلى اسرتك الكريمه العيد بخير يارب

مش تنسيني بطبق فته بقى
عندي مستشفى اول يوم العيد طول اليوم

يعني يا فته ما تمت

blue-wave said...

دا ايه الخروف الفظيع دا؟
الله يكون فى عونكم بجد
وكل سنه وانتوا طيبين

Ahmed said...

كل سنه وانت طيبه

هو الخروف ده انتم شارينه منين؟
من السوق ولا من القسم؟

ربنا يعينكم عليه

المشكله ان لحمته تطلع رخمه زيه
ساعتها يبقى أكبر مقلب ادهولكم حتى بعد مادبحتوه

شبــ اون لاين ـــاب said...

السلام عليكم ورحمة الله وبركاته

كل سنه وانتى طيبه

ايه الخروف المدلع ده

اما عن الفته انتى جوعتينى

طب سلام بقى علشان الحق اركب القطر واجلكم

فى رعايه الله

joker

م/ الحسيني لزومي said...

تقبل الله منا ومنكم
وكل عام وانتم بخير

t3ban said...

و انت طيبة
انا جاي في السكة

وميض ابتسامة said...

ياستى كل سنة وانت طيبة وان شاء الله تقدروا على الخروف المثقف ده بجزار اكثر منه ثقافة .. ونأكلوا الفته اللى شميت ريحتها من دلوقت (ربنا يسامحك بقى) وعلى فكرة انا عملت تحريات على العنوان لقيته مزيف ..هى دى عزومة مراكبية ولا ايه؟؟

عيد سعيد عليك واتمنى الا تغيبى عننا كثيرا

جنّي said...

اورفوار

طيب انشانتيه

وعيد عليكم سعيد

تحيتي

انا حره said...

كل سنه وانتى طيبه ياجميل

بالنسبه للخروف طلعو غيظكو فيه وانتو بتقطعوه ابن اللذينا دا

اوروفوار

خمسة فضفضة said...

السلام عليكم ورحمة الله وبركاته

كل سنة وانت طيبه يا بستوكه ويارب السنه الجايه تبقي علي عرفات

اوعي تقعوا في جزار زي بوحه يسلخ قبل ما يدبح

ههههه


كل سنة وانت طسيبه

سلام

بنت الغربة said...

وحشتينا ياطهقانه فينك من زمان ؟ انا دخلت عندك مره واحده فى البوست الى فات ومن كتر ماعجبنى قريت كل البوستات القديمه وصدقينى كلنا فى الهم سوااااااء -كل سنه وانت طيبه - وياريت تشرفينى بتعليقك فى البوست بتاعى وتقوليلى رأيك ايه -تحياتى ليك

حواء said...

السلام عليكم
ايه الخروف التنح ده
وايه كل الخسائر ديه
كل ده من حته خروف اومال لو كان بقي جموسه ولا عجل ولا ثوووووووور
كان كسر سيراميك الحمام واكل التواليت
ده مسعور بقي
عموما بالهنا والشفي الفتي ولحمة الخروف التنح ده
وكل عام وانتم بخير وسعاده وإلي الله اقرب

son's egypt said...

السلام عليكم
كل عام وانتي بخير
وتقبل الله منا ومنك

bastokka طهقانة said...

و انتم بخير و سعادة و هنا و نعمة و فضل

اسأل الله أن يجعل بسمتكم عاده
وحديثكم عباده وعيدكم سعاده وخاتمتكم شهاده

و كل فتة و انتم بخير و تقلية

اوروفوار

Unknown said...

خروف ذو حيثيه في المجتمع مش اي كلام

كل سنه و انتي طيبه و مطهقه طقهان

مهرة سالم said...

ههههههههههه
ممكن تبعتيلي نصيبي بالبريد السريع
.............
كل عـــام وأنتـــي بخيـــر
وعيـــد سعيـــد

هوندا said...

كل سنة وانتى بخير

kochia said...

(`'·.¸ (`'·.¸*¤* ¸.·'´) ¸.·'´)
♥*** happy feast ***♥
(¸.·'´ (¸.·'´*¤* `'·.¸) `'·.¸)

عاشقه وغلبانه said...

كل عيد وكل خروف وانتوا طيبين
اهي مره من السنه للسنه
تنعاد علي الكل بخير يارب

koukawy said...

هههههههه
طب ما صعبش عليكي بعد كل التوسلات ديه
متعفي عنه و سيبي للعيد الجاي


هههههههههههه

بالهنا و الشفا
و كل سنه و انتي طيبه
و لولا اني نباتيه و اللحمه بتعملي مشاكل كنت جيت و نزلت باراشوت علي صينية الخروف

صبرني يارب said...

لا لا

بتكلمي جد بالذمه ؟؟؟

بجد عملتوا كده يا طهقانه ولا بتهزري ؟؟؟
ههههههههههههههههههههههههه
يا لهوي

فى الحمام

ده انا مره ابويا طلعت فى دماغه وجاب جدي وحطه فوق السطوح

كنت هاموت انا

وبعدين عشان هو يسيب الجدي شهر فوق السطح

عشان يتقل قال

الجيد المفجوع اكل كل الزرع بتاعي
والله زرع كان يسواله بتاع 300 جنيه ايامها من عشر سنين الكلام ده

حديقتى الغناااااااااء

مش هانساهاله

شجرة الياسمين بتاعتي عااااااااااااااااااا

كل سنه وانتم طيبين يا طهقانه

بس بجد ابقى قوليلي ده حقيقى الكلام ولا ايه

اقصوصه said...

كل عام وانتم بخير:)

Anonymous said...

ههههههه
يا رب تكونو عرفتو تدبجوه قبل ما يكون بلغ عنكو جمعيه الرفق بالخرفان :D
بجد البلوج بتاعك جاااامد موووت وبقعد استني كمل بلوج لم تنزليه عشان اقرأ متبقيش تغيبي علينا

إيمان قنديل said...

كل سنه وانت طهقانه
وربنا يعود عليكي الأيام بالطهق والطهقان

صاحب المضيفة said...

كل عام وانت بخير وعافية

ربنا يديم عليكي الافراح والأتراح يارب



كل التحية

Unknown said...

كل سنة وانت طيبة
خلاص بأه الخرفان ادبحت واتسلخت واتأكلت واتهضمت كمان
ربنا يبسطك ويوفقك في حياتي
تقبلي مروري واعتبريني من دلوقتي زائر مستمر ممكن
كل ودي

بحبك اوى said...

معلش بقى



بس دة اسمك اللى انتى كتباه



طهقانة


انا بشكرك على مرورك لمدونتى


المتواضعة


وبهنيكى على مدونتك الجميلة وكلامك


الاجمل


ملـــــــــــــ الرومانسية ــــك



eslam

الملاك الحزين said...

السلام عليكم ورحمة الله وبركاته
كل سنه وانتى طيبه

موناليزا said...

كل سنة وانتوا طيبين
وبالهنا والشفا

nudy said...

اولا كل سنه وانتم طيبين وثانيا يعني الله يكون في عون الخروف هو كمان زمانه بيقول ايه العيله دي طهقتني في عيشتي شوية يحبسوني وشوية يربطوني وكمان عاوزين يركبوني وبعد ده كله يدبحوني ويياكلوني اما عيلة
واما عن الفتة فانا شميت ريحتها من هنا سنيت سناني وحاجي فورا ويجعله عامر

الفراشة الصغيرة said...

ههههههههههههههه
هى دى الخرفان يا طهقانه
كل سنه وانتى طيبه وعيد سعيد

Empress appy said...

بما انى من محبى الخرفان فعرفع عليكى قضيه علشان اللى انتى قولتيه على الخروف وبعدين ايه يركبه دى هو حصان يا جدعان ده حاجه وده حاجه كده حرام
بس بما انك جارتى فى حارة الطهقان يبقى كل سنه وانتم طيبين يا رب

Mafrousa said...

انا جيت
معلشى متأخرة شوية
كنت ملخومة فى أكل اللحمة
مش معقولة حاكل و اعلق
يا آكل يا اعلق
و بعدين بعد العيد
بتعالج من التخمة اللى عملتها اللحمة
ويظهر الخروف كان عنده برد
عداني
هههههههههههههههههه
كل سنة و انتم طيبين
و سنة سعيدة عليكم يارب

Amira said...

كل سنه و انتي طيبه

و عقبال كل سنه ما ترسمي ابتسامه على شفافينا بحكاياتك الطريفه
و انتي بخير

عمرو said...

كل سنه و انتى طيبه و لو انها جات متاخره شويه
و كده يا ست طهقانه انتى جوعتينا على سيرة الفته و اللحمه و انتى المسئوله بقى

Anonymous said...

وحشتينى اوىىىىىىىىىىى يا طهقانه هانم

وايه يابنتى خروف الكارتون الى عامل قلق ده

بس تصدقى واضح انه شخصيته قويه جدا
ههههههههههه

كل سنه وانتى طيبه يا جميل
صحيح متاخرة شويه بس معلش

hasona said...

كل خروف وانت طيبة
أقصد كل عيد وانت طيبة