ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

عينه.. حبيبي ..عينه


اليومين دول أنا مشغولة جدا ،و للأسف مش قادرة أتابع مدوناتكم العزيزة ؛ لاني و الحمد لله مسكت شغل جديد و مطحونة فيه ،و اغلب شغلي على الكمبيوتر،فبعد ما بخلص شغل مش ببقى قادرة افتح عيني و ببقى شبه الضفدعة المتبنجة.0
و اللي مستغرباله.. إن طهقان بيعاني من فراغ طاحن و كل ما يشوفني مشغولة يقعد يقولي
طهقان: يا بختك لاقية حاجة تعمليها
طهقانة:يا بختي اية!! د ه أنا طلعان عيني و نفسي افرد ظهري شوية

طهقان:على الأقل لاقية حاجة بتحبيها تعمليها، مش أنا اللي زهقان و طهقان على الآخر
طهقانة:طيب ما أنت قاعد تقلب في التليفزيون و مروق اهو حد طايل؟!
طهقان:لأ و أية..مرتبك أد كده.. و بتروحي الشغل ساعتين و ترجعي.. يعني آخر هنا
طهقانة:ايه يا طهقان؟؟ انت بتقر عليا و لا ايه؟

طهقان:لا يا ستي اشتغلي وهيصي ....و بلاش إحنا
طرااااااااااااااااخ...ريحة شياط...اجواء مضلمة

طهقانة: اية اللي حصل ده ...يظهر النور ضرب
طهقان:لما أروح أشوف في اية!!
بعد دقائق...
طهقان: ده كان في قافلة في النور و أنا صلحتها
طهقانة:اية ده.. الكمبيوتر مش راضي يفتح!!...يوووه ..يظهر الباور سبلاي أتضرب
طهقان:و انتي حتغلبي !!ما عندك اللاب توب
طهقانة:ارحمني بقى لحسن أنت بقت عينك صفرة اليومين دول

اليوم التالي بعد عودتي من العمل

طهقانة: يا ساتر يا رب الجو نار برة
طهقان: و انت بيهمك؟ ما عربية الشغل مكيفة و من الباب للباب ، أمال أنا اعمل اية ؟!اللي بسوق في الزحمة و الحر و إشارات و غرامات و...

طهقانة:أنت شامم من قاسم أفندي ليه اليومين دول يا طهقان!!
طهقان:أنا مش بقر و لا حاجة... أنا عيني باردة ،بس اصل ناس ليها حظ و ناس ليها قانون المرور

يدق جرس الهاتف...ترن ترن ...ترن ترن

طهقانة:الو ..مين..ايوة.. طيب.. حصل خير...أوك ..سلام
طهقان:مين؟ من سيربح المليون بيقولولك: أنك فزتي بعمرة؟
طهقانة:لا يا شرارة بيه.. ده سواق عربية الشغل بيقول : إن العربية أتعطلت و حروح الشغل بكرة بالميكروباز..ارتحت؟؟

في اليوم التالي...
طهقان: اية ده أنت رجعتي بدري كده ليه؟
طهقانة:يا دوب سلمت الشغل و قلت أجي اطبخ لك أكله حلوة
طهقان:و لحقتي تطبخي !! وعملتي سلطة كمان!! ده اية السرعة دي كلها
طهقانة:أي....آه

طهقان:مالك؟ أنت عورتي أيدك بالسكينة..معلش
طهقانة:لا.. لا ..لا..أنت بقى فولتك عالي اليومين دول، و سرك باتع ،كويس إني متحولتش ضفدعة .

بعد المغرب
طهقانة:انا نازلة رايحة عيادة دكتور الأسنان يا طهقان، مش عايز حاجة؟
طهقان:هو أنتي كل أسبوع عنده!!

طهقانة:اعمل اية الحشو وقع و ضرسي مجنني..و لا اكمنك أنت سنانك حديد و معندكش و لا سنة مسوسة حتتريق على المساكين اللي زيي؟؟!!
طهقان:الله اكبر

في عيادة دكتور الأسنان...

طهقانة:الله؟؟؟ طهقان اية اللي جابك؟
طهقان:سناني ..مش قادر...فكي كله بينقح عليا... يظهر ضرسي أتكسر

طهقانة:من اية يا طوطو؟؟

طهقان:مفتاح الدولاب أتعوج ،حاولت أعدله بسناني ،و من ساعتها و أنا حموت من الوجع، يظهر في حد قر عليا و عينه رشقت
طهقانة:مش أنا شووور ...أنت عارف أنا عيني كوول

داخل غرفة الكشف..

طهقان:كويس إني لقيتك يا دكتور، ده أنا تعبان قوي
دكتور الأسنان: أنت لحقتني فعلا.. ده أنا مسافر بكرة سويسرا
طهقانة:عندك مؤتمر لطب الأسنان هناك يا دكتور؟
دكتور الأسنان: لا.. ده أنا رايح أصيف أنا و الأولاد
طهقان:دي سفرية بالشيء الفلاني.. ده كفاية مصاريف الطيران
طهقانة:متنساش يا طوطو إن دكاترة الأسنان بتكسب كويس.. ده الضرس الواحد بيحشوه بقد كده
دكتور الأسنان: اهو.. الواحد يفسح الأولاد و يغير مناظر
طهقان:مناظر أية يا راجل!!..ده أنت حتبقى في نعيم و حتغسل عنيك من الحتت المصري و تشوف السحالي السوسري مين قدك
الممرض: دكتور...في واحد برة بيقول انه مفتش من مصلحة الضرائب .. ادخله؟
دكتور الأسنان: يا نهار مش فايت ..دي مصيبة أية دي؟

طهقانة:طيب ..نستأذن إحنا بقى و نجيلك بعد ما تطلع من السجن اقصد ترجع من السفر بالسلامة
طهقان:آه.. أنا شايف الوقت مش مناسب ...سلام عليكم

في السيارة في طريق العودة للمنزل

طهقانة:طهقان...هو إحنا قرينا على الدكتور؟؟
طهقان:لا يا حبيبتي ده قضاء و قدر
طهقانة:طيب حاسب القطة اللي معدية دي
طهقان: و انتي شفتيها في الضلمة دي؟؟ ياااااه.. نظرك6/6
طهقانة: آه.........عنيـــــــــــــــــــــــا

دي حاجة تطهق بجد
اوروفوار

امضاء

53 comments:

احمد اشرف said...

اول رد ياحلولى يا حلولى
انا خايف اقول رد مش يعجبكم تنشونى عين ابات فى القصر العينى
المهم تعرفى فيه سلسله فكاهيه اسمها فلاش فيها شخصيه اسمها نظير مثلكو راح لدكتور انا ناسى اسمه وعنوانه اخترع له نضاره تمنع الحسد جربوها يمكن تنفعكم (ومن شر حاسد اذا حسد)

محمد عبد الغفار said...
This comment has been removed by the author.
محمد عبد الغفار said...

انا تعبان وعيان ومتخانق مع مراتى اللى اتسرق شنطتها امبارح وكان فيها 1600ج وساعتها البنت وقعت من ايديها اتعورت وعندى مشاكل فى الشغل اللى رفدو منه اتنين مدراء الأسبوع اللى فات

كده أكون فلت منكم بقى ولا ايه

الطائر الحزين said...

وحياة خالتك انت وهو
مقورة ومدورة

=========
الحمد لله على كل حال مش بنتعشى الا كفيار بس ومعندناش الا 3 عربيات عربية لى وعربية للمدام وعربية احتياطى وكل عربية فيها السواق بتاعهاعلشان محدش فينا بيعرف يسوق وكمان له مجبناش عربية للواد الصغير اللى لسه مكملش سنتين شفتى الحالة الضنك اللى احنا فيها

دعيت عليكم بالعربى والانجليزى والفرنساوى يا عيلة

رمضااااااااااااااان كرييييييييم

Lobna Ahmed Nour said...

ياه يا طهقانة ده انتو طلعتو شاطرين اوي في الحكاية دي .. طيب بتنقوا على بعض ماشي .. لكن الدكتور الغلبان ذنب عياله ايه تقعديهم في البيت
.. انتي اخدتي كورس حسد قبل كدة ؟!! ههههه

عايش... ولكن !!!! said...

هههههههههه انا خايف ارد احسن اتنش عين تجيبنى الارض ههههه
بس انا ليا واحده جارتى عينها اشد منكوا انتوا الاتنين
يعنى لو حصلى حاجه هسلطها عليكوا ههههههههههههه
تحياتى
علاء

Unknown said...

قول اعوذ برب الفلق
اعملي زار يا طهقانه ياختى
انا مش هعلق كتير بقى
بخاف على المدونة عندي

بنوتة said...

هيهيهيهيهيهييهيهيهيهيهيهيهيهيهيه
ربنا يحسدك كمان و كمان ايه قصدي ربنا يكرمك كمان و كمان حقوللك ده باللنسبة بالي عادي خالص و انا صغيرة عندي كده بتاع 6 سنين اختي كان عندها10سنين كان بتموت في حاجة
اسمها
شو
كا
لا
تة
شوكالاتة
كنت طيبةجدا جدا جدا بس في الشكل يستحسن تعرفي لوحدك

خالد كامل said...

ههههههههههههههههههههههههه
بوست جميل جداً .. و الحسد مذكور فى القران

بس ايه الحلاوة دى ... و جمال طريقة الكتابة
و عندك لاب توب ؟؟
يا سلاااااااااام
حلم حياتى أجيب لاب توب
هههههههههههههههههههههههههه
تحياتى

bastokka طهقانة said...

هههههههههههه
تعليقاتكم تنفع بوست ناجح 100%0


الخلاصة

إذا رأيت في أخيك ما يعجبك فادعو له بالبركة
أو كما قال الرسول صلى الله عليه و سلم

تحياتي
و اوروفوار

سمر الشافعى said...

النبى على قلبك ماتكلفى خاطرك وتتعبى نفسك وتزورينى ههههههههههه

كل سنه وانتى طيبه ياقمرايه

منى said...

ههههههههههههههههههههههههه
سلامه عينك يا طهقانه

والله انتى سكره
بس ربنا ينجينا من عنيكم
هههههههههه
كل سنه وانتم طيبين
تحياتى

Empress appy said...

انا مجتش هنا اساسا

باى باى

صدى الصمت - عاشقة الورد - said...

فكرتينى بمحمد صبحى وسعاد نصر لما كانوا بيحسدوا فى المسرحية صاحبهم الغنى وقالها سيبيلى انا الطلعة دى يا أمى إنتى إشتغلتى كتير النهاردة وتعبتى وراح راشقة عين جابة الأرض

Unique Gurl said...

يامامي
الواحد يخاف منكم بعد كدة
لووووووووووووول
كل سنة وانت طيبة يارب اني و طهقان والاطفال :))

lastknight said...

أنا قريت البوست بالعدسه عشان نظرى ضعيف قوى و على قدى .. و فاقد حاسة السمع .. و مش عارف افرد ضهرى .. قوليلى أرش ملح ازاى على النت ههاهاهاههدمك خفيف لدرجه مرعبه .. باتكلم جد .. ماتجربى تنافسى بلال فضل ؟ اسلوبك فعلا رشيق

dido said...

السلام عليكم
الحمد لله النهارده الخميس وكل سنه وانتوا طيبين
المهم بجد انا فطست من الضحك فعلا
ههههههههههههههههههههههههههههههه
ربنا يتولاه الدكتور

صباح الصباح said...

طو طو اية بقى
وعينيا كووول وحركات
حتى الدكتور
عنيكى يا حورية!!
ههههههههههههههه

خمسة فضفضة said...

السلام عليكم ورحمة الله وبركاته

هههههههههه
ايه الحسد العائلي اللي منه فيه ده
طيب بدل ماتحسدوا بعض شوفولكوا حد تحسدوه وكويس انها جت في دكتور السنان اصلي مش بحبهم

كل سنة وانت طيبه يا قمر
سلام

Mafrousa said...

طهوقتي
ادخل يا عنيا ولا حتنشيني عين؟؟؟؟؟؟
يعني ممكن على السريع كده اقولك كل سنه و انتي طيبه
و رمضان كريم
والعين الصفرا انيل من العين الحمرا
و انا مجرباااها و طلعان عيني منها
اما العين الحمرا
ممممممم
بلاش احراج؟؟؟

اي اي اي
شوفتي اهي رجلى اتلوت و انا خارجه
حروح اربطها بقا
اوورفوارين و حنه

bastokka طهقانة said...

انا عيني كول دايما و الله و كل ما اشوف حاجة تعجبني بقول بسم الله ما شاء الله
و بتمنى الخير لكل الناس
بس في ناس فعلا مش بتحب تشوف حد مرتاح و بتتمنى زوال نعمة غيرهم و بيستكتروا النعمة على الناس

ربنا ما يجعلنا منهم و يديم علينا و عليكم نعمه

و رمضان كريم

اوروفوار

Anonymous said...

هااااااااااااااي طهوقتي
انا باشبهه علي الحوارات دي بالظبط دة بيحصل بيني وبين سي السيد بتاعي بس الحمد للة من غير النتائج الجامدة قوي دي اقدر اقول كدة ان عنيينا كووووول والحمد للة وربنا يجعل كلامنا خفيف عليكم .......... بوست تحفة ويجنن مااااااااااااااااااااااشاءالله
زكزوكة

عيله مفتريه سابقا said...

واضح يا طهطوقه انكم اتحسدتوا من حد تالت
شكله الدكتور باين؟
يمكن هو ياختشى

لالالالالالالالالالالالالالا
انا معنتش هروح لدكاترة اسنان ابدا
كويس انى عرفت منك

من شر حاسد اذا حسد

سلامى يا طهقانه
ورمضان كريم

Anonymous said...

ممكن من سكات لو سمحتي تعملي الخلطة دي وتحطيها تحت باط سي طهقان "صورة واحد بيعيط"...منغير مايحس
جناح فرخة مطلقة وديل نملة عورة وعرف ديك عامل البواسير وكمان ضوفر سلحفة تايهة

المهم اخلطيهم وما تقلقيش
لإنه ماحدش يستجري يبص عليكوا "من الريحة "....ومضان كويم
معلش اصلي الدغ في النون

blue-wave said...

يا نهار
هوا انتى منهم؟
ربنا يحفظنا:))
كل سنه وانتى طيبه

يا مراكبي said...
This comment has been removed by the author.
يا مراكبي said...

إحم

أنا خايف أكتب أي حاجة تقوموا تحسدوني

ربنا يستر

إجري يابني من هنا منك له

شهد الكلمات said...

هههههههههههههههههه

انتوا كونتوا عايزين دكتور عنين مش اسنان
ههههههههههههههههههه

بوست جامد جدا يا طوطو

كل رمضانو انتي و طهقان و الاولاد بخير

تحياتي

أية الشقية الشعنونة said...

ههههههههههههههههههه
انا فطسانة من الضحك
ايه القدرة الجميلة على السرد والحكاوى دى
انا اول مرة ادخللك بس بجد مبسوطة جدا
وساطور وبتاع
ههههههههههههههههه
شكلك هتقطعينا من طهقك
عموما هدى نفسك بقا كل سنة وانتى طيبة رمضان كريم

jehan said...

بصى يا طهقانة انتى وطهقان

انا طالبة منكم خدمة على السريع كدة

عايزاكوا تركزوا عنيكم على الفقر الى انا فيا اقوم اغتنى ههههههههه

Esraa Hamed said...

ههههههههههههههههه
البوست تحححححححفة بجد

بجد موتني من الضحك
انا عارفة اني مقصرة في متابعتك بس و الله ظروفي كانت صعبة الايام اللي فاتت

البوست بجد يجنن
كل سنة و انتي طيبة يا قمر

جنّي said...

السلام عليكم ورحمة الله وبركاته

كل عام وأنتم بخير
كل عام وأنتم صائمون
كل عام وأنتم مصلون
كل عام وأنتم قائمون
كل عام وأنتم قانتون
كل عام وأنتم متصدقون
كل عام وأنتم مغفور لكم
كل عام وأنتم معتمرون
كل عام وأنتم قائمون ليلة القدر
كل عام وأمتكم الإسلامية منتصرة

اللهم بلغنا رمضان وأهلّه علينا بالسلامة والإسلام واليمن والبركات والنصر والتمكين

أخوكم
سعيد

جابر المصري said...

اولا ده مروري الأول علي مدونتك

بجد خفيفة الدم جدا

ربي يسعدك يارب

وعموما انا كنت داخل طهقان من الدنيا
لقيتني ببتسم بمنتهى العفوية علي كلامك اللذيذ

تقبلي مروري
وزيارتي الدائمة لمدونتك

أختكم فى الله said...

السلام عليكم

ايه المدونة الجميلة دى كانت فين من زمان

ما شاء الله دمك زى العسل

انا موت من الضحك خلاص

اسمحيلي بدوام المتابعة

تقبلى مرورى

Amr Abodraiaa said...

ربنا يسترها عليكو من نفسيكو
ههههههههههههههههههههههههههه

Anonymous said...

مشكلة
انتي مششششكلة
هقول ايه ههههههههههه

عموما يا طهقانتي يا حلوة رمضان ييجي عليكي وتدعيله لطهقان دعوتين حلوين لا يفضل كده لا تقدري تقومي تصلي ولا تعملي فطار ولا يحزنون

يجعل كلامنا خفيف

انا هختفي ف رمضان بأه وبصراحة وحشني وجودك عندي ومن زمان ما شفتكيش وكان نفسي الاقيكي ف بوست عيد ميلادي
ياللا حوصول خير
ممممممموااااااه
دي بوسة نياهاهاها

اشوفك بعد رمضان يا جميل

مها ميهوووو

Anonymous said...

جزاكم الله خيراً يا طهقانة ....هانم"لزوم الإحترام..وربنا يعيد رمضان عليكي دايماً بالتقوي والصلاح وزيادة الإيمان والعمل للإسلام

مستنين منك جدول الذكر اليومي لرمضان والقيام ومواعيدة والادعية فيه "دا إقتراح كعمل جماعي...أرجو تقبُله

ahmed_k said...

هههههههههههههه
ربنا يجعل مروري خفيف على طهقان
بوست فكاهي ورائع
تسلم ايدك عليه

وكل سنه وانتي طيبه
ورمضان كريم

وميض ابتسامة said...

الاخت الفاضلة طهقانة

مش عارف اقولك ايه ..فعلا انت البسمه الجميلة فى الوقت المناسب
اسأل الله ان يعطيك أطيب ما فى الدنيا " محبة الله "
وأن ينفعك بأنفع الكتب "كتاب الله "
وأن يجمعك بأبر الخلق " رسول الله "
وكل عام وانت بخير

على عبدالله said...

والله بوست جميل ورائع
حلو قوى والله من غير حلفان

بس مش عارف الواحد ليه يومين كده تعبان وقرفان
وعنيا مش باشوف بيها كويس
واسنانى وجعانى خالص
وايدى مش عارف اكتب بيها كويس
وصحتى يعنى بقت على قدها خالص
واترفدت من الشغل

ههههههههههه

كل سنة وانتى طيبة

Mostafa Abdelmoneam Badr said...

أربعيين تعليق
ده أنتى معارفك كتير قوى
شكلك ما بتقوميش من على الكومبيوتر
ياااه
عرفتى الناس دى كلها إمتى وإزاى
بس أكيد علشان دمك خفيف
مستوى ذكائك مرتفع
وعايشه الحياه مفخفخة ومروقة
شغلك يادوب ساعتين
وعلشان كدة مربربة وكلبوظة
بس إيه سمبتيك وإيه يعنى
وتلاقيكى بتلعبى رياضة كل يوم
يااااااااااااا بخ....تك

كل رمضان وإنت بالخير سباقة

تقبلى أجمل تحياتى
السلام عليكم ورحمة الله

Anonymous said...

السلام عليكم طهقانة

وانا والله اول مرة اتشرف بزيارة مجونتك اللى زي العسل

ربنا يخليك شغلك وطهقان

وأنا اتعلمت حاجة مهمة ......أنى لما اجى اصيف ما اصيفش قى ىسويسر هههههه

يلا سلام

الهادي كملاوي said...

أنا اللي جيت متأخر يا طهقانة .. أكون أول واحد أقول ليكي مبروك رمضان تصومي وتفطري على خير

blackcairorose said...

كل سنة وانتم طيبين والقر اقل من كل سنة

قوس قزح said...

يارب
كلما طرق هذا العبد بابك
أفتح له كنوزك
و سخر له عبيدك
و ابسط له رحمتك
اللهم اجعله من الصائمين القاثمين
الركع السجود
و بارك له فى شعبان و بلغه رمضان
فى يسر و سلامة و امان
اللهم امين

كل سنة و انت الى الله اقرب

Anonymous said...

ومن شر حاسد اذا حسد
حدرجة بدرجة من كل عين زرقا .. حوشوا يا أسياد

كده بقى ندخل برجلينا اليمين

القصة دى جد ولاهزار؟ اصل انا ماباحبش الهزار واصل

تحياتى لبوست جميل قبل دخول رمضان .. كل عام وانتم بخير جميعا

Ehab said...

جميل ... رائع ... بل أروع ..


انتي موهوبة بالفعل ... أسلوبك وطريقة كتابتك مميزة وممتازة وشيقة ومسلية إلى درجة مستفزه !! :)


فلقد انجرفت مع البوستات لمايزيد عن الساعه ونصف الساعه ولك ان تتخيلي ذلك ...


في المفضله بلا كثير من الإسهاب ...


وتقبلي مني فائق الاحترام والتقدير ...


وفي انتظار جديدك ...

محمد فاروق الشاذلى said...

كل رمضان وحضرتك بخير
اللهم بلغنا ليلة القدر واجعلنا من عتقاء هذا الشهر

Unknown said...

مرور للتهنئة بقدوم شهر رمضان وتمنياتى بان ننال منه الكثير ...لا تدع الفرصة تفوتك باغتنام هذا الشهر الذى فضله الله على باقى الشهور
ودعواتى لكم جميعا بقبول اعمالكم وعباداتكم وان نكون مع الرسول ان شاء الله ..سعيد بزيارتى ومرورى والى لقاء قريب لك كل التحية والتقدير

كـــيــــــــارا said...

هههههههههههههههههه

الواحد يقول المعوذتين بقي

بجد بوست لذيذ

كل سنه وانتي بخير

Unknown said...

هههههههههههه

ماشاء الله عليكم انتم الانتنين

كل سنة وانتي طيبه ياجميله
يارب رمضان يكون سعيد عليكي
(:

المتبهدلون في الأرض said...

استرها علينا يارب
استر يا ستار
..................
أنا دخلت برجلي الشمال وضربت السيفون ورايا وانا طالع

لزوم النظافة

oRiGiNaL HeArT said...

ههههههههه
هههههههههه
هى كل المواضيع اللى هنا كلها ضحك ضحك
كدة
مفيش نكد ابدااااااا
ههههههههه
انا مش بحسد ولا حاجة
انا بؤر بس
ههههههههههه