ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

طهقان كريم





طهقانة:رمضان كريم يا طهقان

طهقان:الله أكرم يا طهقانة..مش مرتاح للبوء الناعم ده

طهقانة:أبدا يا حبيبي أصلي عايزة انزل أجيب حاجة رمضان و هدوم المدارس و كل سنة و أنت طيب بقى

طهقان:آه..رمضان و المدارس داخلين في بعض السنة دي عاملين قافلة ..مش كانوا قالوا حيأجلوا المدارس لبعد العيد؟!

طهقانة:لا ..يأجلوا مين؟؟ أمال مين يطلع روحه و يشحت؟؟

طهقان:طيب ابقى خدي فلوس من الدولاب، بس ابقى خفي أيديك في المصاريف، أنت عارفة لسة داخل علينا عيد

طهقانة:متخافش يا حبيبي، أنا حروح هايبر ماركت بيبيع بالجملة أسعاره رخيصة خالص ...اطمن و حط في بطنك بطيخة سلايسز

طهقان:من ناحية مطمن ..فانا مش مطمن، و حاسس إني متركب في سيخ شاورما و حد عمال ينسل من لحمي بسكينة تلمة

طهقانة:انت مقامك سكينة تلمة برضه يا روحي!!! أنت مقامك ساطور فرنساوي و يكون مسنون كمان

اليوم التالي..عندما عاد طهقان من العمل:

طهقان:اية الصناديق دي كلها اللي مالية الصالة؟؟ أنتي فتحتي بقالة هنا و لا إية؟

طهقانة:لا يا حبيبي دي حاجة رمضان

طهقان:اية؟؟!! كل دي؟

طهقانة: أصل الكرتونة ارخص من الفرط ،عندك مثلا كرتونة المكرونة دي، أرخص من لو اشتريت أكياس مكرونة لوحدها بحوالي سبعة جنية، قيس أنت بقى سبعة ؛عشرة جنية في كل حاجة ،ده أنا وفرتلك وفر

طهقان:و الكمية دي كلها حناكلها في كام سنة!!

طهقانة:كام سنة اية؟ اهو رمضان داخل و كل سنة و أنت طيب

طهقان:يا دي كل سنة و أنت طيب، و دفعتي كام في الحاجات دي يا ست الواعية؟؟

طهقانة:أبدا..ألفين جنيه بس، ده غير اني رحت مصنع ملابس المدرسة و اشتريت منه بأسعار ارخص من أسعار السوق.

طهقان:ألفين جنية يا مفترية !!خزين رمضان و هدوم المدرسة؟

طهقانة:لا ده خزين بس..ملابس المدرسة عملت 900 جنيه و لسة الجزم و الشنط والكراريس و ...

طهقان:قومي لمي هدومك يا طهقانة..

طهقانة:حنسافر فين دلوقتي يا طهقان؟..لسة حنصيف ؟؟ لا خلينا نوفر بقى..

طهقان:قومي لمي هدومك و هدوم العيال

طهقانة:طيب مادام مُصَّر بقى، نروح مرسى مطروح علشان إسكندرية رطوبة دلوقتي..اخدلك العوامة؟!!

طهقان: قومي لمي هدومك.. حوديكي عند أهلك يشوفولي صرفة فيكي

طهقانة:كده؟؟بعد اللي عملته ده كله؟؟ طيب اوك ..بس خلي بالك شوال الرز اللي وصيت عليه العطار حيجي الساعة 9 متنساش تاخده من الراجل و تديلة 150 جنية و لو جاب داستة قمر الدين متنساش تــ.....

طهقان:تييييييييت.....تييييييييييييييت

طهقانة: هي وصلت لتيت يا طهقان و كمان بتزمرلي!!!

لا دي بقت حاجة تطهق خالص

أوروفوار

إمضاء


54 comments:

سمر الشافعى said...

انا الاوووول ههههههههه كنت قاعده ورا الباب هقرا بقى واجى تانى

سمر الشافعى said...

يانهارك الوان هتجننى الراجل ياشيخه حرام عليكى

حد يجيب اكل رمضان باالفين جنيه يامفتريييييه ولبس مدرسه ايه دا اللى ب 900 جنيييه

يالا اديكى هتقضى رمضان فبيت اهلك عاجبك كدااااااا

ههههههههههه كل سنه وانتى وطهقان والعيال طيبين

Princesa ... WHiSPeR said...

اول مره اتعاطف مع راجل يا طهقانه ههههههههه
بس اقولك
احسن يستاهل
ماحدش كان قاله يتجوز ويخلف
اصرفي اصرفي
لو انتي ماصرفتيش مين اللى هيتمتع بفلوسه يعني !!!

احمد اشرف said...

ياحول ولا قوة الابالله
حراااااااااااااااااااام الراجل صعب عليا الاول زينات الشغاله والمرادى اكل ب2000 جنيه علشان رمضان دهزنانه اتجنن
حراااااااااااااااااااااااااااام
تفبلى مرورى
تحياتى

lonely said...

كل سنة وانتى طيبة
ورمضان كريم
بس ربنا يكون فى عونه
حد يجيب اكل بالفين جنية غير الشوال ومعرفش ايه
ليه ده كله
يلا بالهنا والشفا

Empress appy said...

حرررررام عليكى يا شيخه والله حرام
بجد انتى جايبه خزين لسنه بس اقول ايه مش انتى لوحدك فيه كتير كده

وتفاديا للتيييييييييت ابقى اعمليه فيبريشن ههههههههههههه كل سنه وانتى طيبه يا قمر

bastokka طهقانة said...

يعني انا غلطانة اني بوفرله و بجيب له سلع رخيصة؟ مش احسن ما اشتري بالاسعار الغالية و لفيت و تعبت نفسي و بعدين الاحاجات دي حنستهلكها مش حتترمي

يا ربي حتى جمهوري مش متشعاطشف معايا
دي حاجة تطهق بجد

اوروفوار

صدى الصمت - عاشقة الورد - said...

حرام عليكى رمضان كريم وخفى على الراجل شوية

أمـ الله ـة said...

كتر خيرك يا طهقان
كل عام وأنتي إلي الله أقرب وعلي طاعته أدوم

Anonymous said...

ههههههههههههههههههههههههههه
هى دى الستات و لا بلاش
و رمضان كريم

سمر الشافعى said...

شوفى احنا مش هنسامحك الا اذا فضلتو تاكلو فالاكل دا يجى تلات شهور كدا وتوفرى تمن الاكل فالشهور دى ايااااااااكى تخلصى الاكل دا فرمضان بس تبقى بجد مقتريه وحقه ميرجعكيش البيت تانى

Mahmoud البطراوى said...

انا طبعا معزوووم فى رمضان

:D

مؤمنه said...

السلام عليكم ورحمة الله وبركاته
لا بصراحه ليه حق يكون طهقان بس هو طهقان من حياته هى طهقانه ليه
بوست قدر ما اضحكنى افادنى فعلا ارتفاع الاسعار وكمان مناسبات كتيره داخله مع بعضها كان الله فى عون الطبقه المتوسطه فما بالك بالفقراء معهم الله طبعا
وربنا يسترها معى عباده
دومتى بكل خير
واوريفوار
والسلام عليكم ورحمة الله وبركاته

خمسة فضفضة said...

السلام عليكم ورحمة الله وبركاته

ههههههههههه

كل سنة وانت طيبه يا بستوكه ، خفي شويه علي الراجل لا يفطس منك

هههههههههههههههه

سلام يا قمر

Unknown said...

ههههههه
استني يا طهقانه نسيتي البلح والياميش
واوعي تنسي شكارة الفول المدمس

lastknight said...

لا مالوش حق طهقان .. دول يادوبك ألفين و تسعميت جنيه عمى .. يقوم يقولك لمى هدومك ؟ لا و الله .. انا لو منه .. أنا اللى ألم هدومى و اجرى عشان افلت بجلدى منك يا مفتريه
هاهاه .. كل سنه و انتى و الأولاد و طهقان المسكين بألف خير و صحه و سعاده .. و تعيشى و تفرتكى .. هو يعنى طهقان بيطلع عينه عشان مين

mohamed ghalia said...

كل سنة وإنتى طيبة
المهم نعيش إيمانيات رمضان صح
دمتى بود
تحياتى

koukawy said...

و الله ما لوش حق
طب مش هجي بعد كده في رمضان يقولك نفسي في الكنافه و الرز بالخلطه
يعني هو انتي هتكلي الأكل لوحدك
و الله انتي عداكي العيب و ازح
و بعدين اطبخي يا جاريه.....ادف حوالي 3 الاف جنيه يا سيدي
هههههههههههههههههه

blue-wave said...

هههههههههه
لا مالوش حق
هوا انتى عملتى حاجه؟
دانتى وفرتيله
دا بدال مايشكرك؟
حتجه فريبه

Zanooba (Zeinab sab9n) said...

هههههه يا عيني طهقان تلاقيه تعبان أوي بعد الفاتورة العملاقة دي :)يعني ليه الإفتره ده مالو التمر و الشعير نعيش على التمر و الشعير ...لكن لاحمة و خضار ليه المصاريف اللي ملهاش لازمة دي...و الله رغم إني ماسكوليست (مناصرة لحقوق الرجل ) بس و الله شايفه هو الغلطان حد قالوا يتجوز مالهم السينجلز بس ...كل سنة و أنتوا طيبين و ينعاد عليكم الشهر بألف خير ...أتمنى دوام التواصل ...و معلش بقى طولت عليكي بس فرحة أول تعليق على المدونة ...سلااااام

Ahmed Mubarak said...

حراااااااام
حراااااااااااام

بجد الراجل ده صعب عليا . علشان خاظري ارحميه شويه مش كده بالراحة عليه

طهان كريم

محمد عبد الغفار said...

صرفتى 2000ج بس والله قسماً بالله العظيم كلام جد طهقانه دى بطله وموفره

صباح الصباح said...

يا ستى حراااام عليكى خليتى طهقان يشد فى شعرة
ومعترضة على تيييت
الفين جنية يا لينا؟ اصدى يا طهقانة
فكرتينى بالمتزوجون لما جابت الفرخة بنص جنية والقفص ب 50 جنية
بالللراحة على الجدع
هههههههههههههههههههه

son's egypt said...

السلام عليكم
اولا كل سنهوانتي طيبه رمضان ودراسة
تانتي حاجة خفي شوية علي طقهان الراجل خلاص اقرب يبع كل حاجة

أحمد أبو القاسم said...

معالجة كوميدية رائعة
لحالة درامية مفزعة

لا ونلاقي حد بيسأل في بلاهة هي الرجالة بتمشي في الشارع تكلم نفسها ليه
ياريت تقولوا للناس دي يشرفوا هنا يشوفوا البوست علشان يعرفوا الاجابة

تحياتي للجميع

ana ga3an said...

هي حصلت يزمرلك وفي بيت الزوجية
الراجل دة لازم ينخلع

مدحت محمد said...

هههههههههههههههههههههههه



ربنا يبلغنا ويبلغ حضرتك وطهقان رمضان يارب

,.-~*'¨¯¨'*•~mr ,.-~*'¨¯¨'*•~monshed said...

يانهار ابيض 2000 جنيه ليه ليه حرام يا شيخةده يبقي اسمه افتراء

انا طبعا بهزر هايل موضوع تحفة شكرا ليكي
منشد

bastokka طهقانة said...

للاسف الشديد الاسعار غالية جدا فوق مستوى المواطن العادي و الحل ان اللي عايز يعيش يفتح سوبر ماركت علشان يشتري سلع بالجملة و تبقى رخيصة عليه

التكافل يا اخواني هو سلاحنا ضد الفقر و على راي المثل المليان يكب على الفاضي و ربنا يقدرنا جميعا على مساعدة الناس
انما يرحم الله من عبادة الرحماء


تحياتي
و اوروفوار

عاشــــــ النقاب ـقــــة"نونو" said...

هههههههههههههههههه
مش عارفة اقول ايه
غير عوضيه بقى وحاولي الخزين يكفي رمضان والعيد
وبقيت شوال
وكل عام وانتم بخير
رمضان كرييييييم
تحياتي

حسن ارابيسك said...

ايه ده ده انتي خليتي الراجل يفطر بدري بدري
بس عارفه انا مش مرتاحله انا متهيأ لي ان ده مكر التعالب
انه عاوز يوفر كل خزين رمضان للشهر اللي بعده فيعمل ايه يبعتك بعثه عند أهلك في شهر زي ده بيكلف كتير
بس على فكرة البوست بتاع سينات ده موتني من الضحك اوعي البت دي تربيها وبعدين تقع في أرابيزنا احنا
كل سنه وانتم طيبين

Ahmad Hegab said...

:D
كل رمضان و انتوا طيبين

Anonymous said...

هاااااااااااي طهقوتي
الاستاذ طهقان دة زودها قوي الموضوع بسيط اية يعني كام الف جنيةصحيح احنا ممكن بالفلوس دي نظبط رمضان عند اكتر من اسرة ونبقي اكلنا واخدنا ثواب لكن محلولة نعمل مائدة
رحمااااااااااااااااان
زكزوكة

Mercy Devil said...

2000 + 900 + 150 وما خفى كان أعظم

فى خروجه واحدة لموسم واحد لعائلة صغيرة
الحمد لله على نعمة العزوبية

Anonymous said...

هههههههههههههههههههههههههه

كل سنه وانتى طيبة

بس كفاية كده حرام عليكى الراجل

aya said...

يا عينى يا بنتى عليكى
وعلى حاجة رمضان اللى هتخرب نص بيوت مصر ديه

القصد

كل سنة وانتم بخير
ومعلش
بكرة يهدى ويحس بالاسعار عاملة ازاى

سلامى لطهقان يا طهقانة

اورفوار واتوت الوير

منى said...

كل سنه وانتم طيبين
وبكل خير

كويس انكم جابتم حاجه رمضان بدرى
فطار اهل المدونات عندكم السنه دى
تحياتى

Oss said...

لا لا لا
طهقان ده بجد بيهرج
يعنى انت جايبله حاجة رمضان بالفين جنيه بس
وموفراله قبل كده فلوس الجيم
وبيقولك روحى
لا
ده عايز وقفه مصريه مصيريه

بس هو فين
ده بقاله كتييييييييييييييييييييييير ماكتبش
بالراحه عليه شويه يا طهقانه
يلا سلام
وسلامى لطهقان ولكل الطهاطيق

tote said...

السلام عليكم
كل سنة وانتى طيبة ههههههههانا مش عارفة اقولك ايه يعنى هو انت كدة وفرتى هههههههههه
امال لو صرفتى هتعميلى ايه
ربنا يوفقك ويقدرك على المصاريف
تحياتى

الفراشة الصغيرة said...

ههههههههههههههههههههه
فقر والله يا طهقانه
كل سنه وانتى طيبه

dido said...

السلام عليكم
طهقانه بجد والله احيكي علي اسلوبك الساخر والكوميدي انتي رائعه
انتي بتموتيني ضحك والله انا اول مره اقعد اقرا في مدونه حد كده وكل البوستات تحفه انتي رائعه والله
كل سنه وانت بالف خير يا رب
ورمضان كريم

bastokka طهقانة said...

ميرسي ربنا يخليكم متشكرة جدا
سامحوني لاني منقطعة تقريبا عن النت اليومين دول و مش عارفة ازور مدوناتكم الحبيبة و القريبة لقلبي
بس ان شاء الله اخلص مشاغيلي جمع مشغول
و ارجع لكم ببوست جديد عن


العين صابتني و رب العرش نجاني يا طوطو


اوروفوار

my dream said...

طهقانه حبيبتي
كل سنه وانت طيبه
بصي انا معاكي ان الي انت عملتيه ده كويس من ناحيه التوفير بس مش لشهر رمضان بس لازم يكفي كم شهر كمان
هههههههههههههههههههههههه بس بجد ربنا يكون في عون طهقان لسبب واحد انه خد الصدمه مره واحده كده مش تديهاله وحده واحده
مع حبي
مروه

abo salah said...

بعد السلام عليكم


هههههههههههههههههههههههه
ايه يا طهقانة دا
انتى كده هتجيبى للراجل الخفيف

ربنا يستر عليه بجد

يوميات جميلة والله يا طهقانة
من واقع الكوميديا السوداء

تحياتى
وكل سنة وأنتى طيبة وأسرتك كلها بخير
وإلى الله أقرب

afreet said...

لاسيبوكم من الكلام ده كله انتم عندكم في الدولاب ثلاث الاف جنيه عشان تصرفوهم وفي آخر الشهر ياعالم ياقادرة يامفترية انا باحسد بصراحة
رمضان كريم وربنا يكون في عونكم

يا مراكبي said...

أنا عارف ليه إنتي منقطعة عن النت .. مطرودة بقى من البيت .. أنا عارف كل حاجة وفرحان فيكي

عالم ماريونت said...

بصي يا بسكوتة:
طبعا بتتكلمي صح بخصوص الفلوس اللي الناس بتدفعها بالعبيط في اكل رمضان وكأننا عمرنا ما هناكل تاني؟
نفسي تعملي بوست على مسلسللات رمضان
دمك خفيف اوي يا بسكوتة
تحياتي الجامدة اوي

Anonymous said...

سبحان الله
على رأي المثل
"لو لم اكن مصرياً لوددت أن أكون مصرياً

أنا بقول ايه .....!!!

واضح إن طهقان منوفي

صباح الصباح said...

باقولك يا طهقانة
ممكن تغيرى اسم البوست
اعتقد ان اسمة كدة حرام
رمضان شهر معظم وما ينفعش نقول كدة
ولو بهزار
ارجو تقبل الملاحظة
وشكرا جزيلا

bastokka طهقانة said...

بالنسبة لتسمية البوست طهقان كريم
فهو لا يعد اهانة او اساءة للشهر الفضيل
فانا لم اصف رمضان باي وصف سئ و لا يمكن ان افعل ذلك
انا وصفت طهقان بالكرم و هو امر عادي

و كون اني استغليت العبارة الشهيرة رمضان كريم و استعرت منها وزنها فلا يعد تعديا على الدين بأي شكل

ربنا يعينا على رفع كلمة الدين و الحفاظ على قدسيته و قدسية كل رموزه

و شكرا لنقدكم الطيب

تحياتي
اوروفوار

وميض ابتسامة said...

ح أقول ايه بعد كل اللى اتقال

حسبنا الله ونعم الوكيل

مش فيك ياطهقانة ..فى الازواج اللى ما بيحسوش دول ..حد يلاقى زوجة موفرة للطاقة مثلك ويعمل معاها كدة ...بصراحة ازواج تجنن!!

انى احبكم فى الله said...

الحقيقه المدونه رائعه وباين عليكى بجد طهقانه

على العموم ربنا يكون فى عونك على العوم
رمضان كريم

تقبل الله منا ومنكم

زور مدونتى لرمضان افضل

ساسو said...

كل سنه وانتي طيبه
كل سنه وانتي طهقانه ومبسووطه
كل سنه وانتي مطهقه جوزك وسعداء
ورمضان كريم

Anonymous said...

أنا لو مراتي عملت كدا مش هقولها على أمك يا حلوة. ولكن هرميها من البلوكونة على طول وبدون أي تردد.