ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

الخدامة الهدامة ...سينات

هبطت عليا من السما شغالة جديدة ،بعد بحث مضني عن واحدة تساعدني و خصوصا ان رمضان على الأبواب.... كل سنة و انتم طيبين.
و حبيت انكم تشاركوني الحوارات النقاوة اللي دارت بيني و بينها ، و اللي يعرف عنوان دكتور بيبيع مرارة مستعملة نضيفة يبقى يقولي
يلا بينا.....

حوارات نقاوة...من يوميات الخدامة الهدامة


سينات: في شوية عصير مانجة في التلاجة ..اجيبهوملك بدل ما يحمضوا يا عمو؟
طهقان: على اساس اني البلاعة اللي بترموا فيها الاكل البايظ يعني و لا اية!!0
طهقانة: يا بنتي اسمها تتعشى و لا تنام خفيـــــف


سينات:البوتيجاز مش راضي ينطفي يا ابله ...اطش عليه شوية مية؟؟
طهقانة: يا نهار مش فايت.. عايزة الغاز يخنقنا وتفجري بينا البيت يا زينات!! حرام عليكي
سينات: ليه يا ابلة ما أنا كنت بطفي الكانون كده في البلد!!!0
طهقان: لا ارمي عليه شوية رملة أحسن ...يا مثبت العقل في الراس
طهقانة: اسكت... لتصدقك و تردملنا المطبخ



طهقانة:حتعملي اية بالليفة اللي مليانة صابون دي يا زينات؟
سينات:حصبن بيها البتاع اللي عمو طهقان بيشتغل عليه
طهقانة:بتاع اية ده!!!...مصيبة لتكوني عايزة تصبني اللاب توب
سينات:متخفيش يا ابلة ما انا حاشيل الفيشة الأول
طهقانة: لاااااااااأأأأأأأأأأأأأأأه



سينات: الواد ابنك يا بلة مش راضي يستحمى... مع اني غليت له المية و مليت بها البستلة البيضة الكبيرة اللي في الحمام
طهقانة: غليتي اية؟؟؟ لا يا حبيبتي هو متعودش يتسلق في البانيو
طهقان: مية مغلية ..هي حتحميه و لا حتولده؟!0


سينات: عمو طهقان...الواد ابنك الكبير بيضرب الواد اخوه الصغير اكمنه لابس البوكس بتاعه و انا قلتله سيبه يلعب بالبوكس بتاعك شوية مرضيش
طهقان: بوكس اية يا زينات!!! اسمه بوكسر و مش مفروض يلبس بتاع اخوه
سينات: البوكس يا عمو... اللي بيضربوا بعض بيه في المولد؟؟
طهقان: لا يا بنتي..ده بوكسر... اللي هو الـ... بتاع ابو حجر اللي بدكه ...البت دي حتطير برج من نافوخي


سينات: هو أنتي كنتي عايزة حلة الماية الوسخة اللي على البوتيجاز يا ابلة؟؟؟
طهقانة: مية اية يا بنتي؟؟؟ دي شوربة فراخ حطبخ بيها
سينات : ده انا كبتها في الحوض..... هي هي هي
طهقانة: يا رب صبرك




طهقانة: اية الزيطة دي على الصبح؟؟
سينات: ده الواد ابنك يا ابلة بيسوق العربية الكهربا ام خرطوم.... هي هي هي
طهقانة: يا نهار مش فايت... مقعدة الواد على المكنسة و بتسحبيها من الخرطوم !!!
طهقان الصغير: هي اللي قالتلي يا ماما: اركب و انا اثدك



سينات: ابلة.. انا دعكتلك كل الحلل السودا اللي في المطبخ بالسلكة خليتهملك بيبرقوا
طهقانة: حلل اية يا بنتي كل الحلل نظيفة ...يا دهوتي انت حكيتي الحلل التيفال بالسلك؟....يمهل و لا يهمل

طهقانة: فين زينات يا طهقان يا صغير؟
طهقان الصغير:طلعت البلاكونة و قفلت الثيث وراها يا ماما

طهقانة: ليه بتعمل اية بالليل كده؟
طهقان الصغير:بتلبث هدوم النوم يا ماما اصلها مكثوفة تغير قدامي
طهقانة: يا بوليس الاداااااب




سينات: انا غسلت الهدوم كلها يا ابلة و حطيت كرور في الماية لجل ما تنضف و تبقى فل
طهقانة: يا نهار ابيض...حطيتي كلوركس على البنطلونات الجينز بتاعة عمك طهقان..دي باظت كده يا بنتي
طهقان: شيلي الزفت الكلور من قدام البنت دي ..دي مدمنة كلوركس
دي ممكن تشربة علشان تبيض



طهقان: يا بنت يا زينات فين الروشتات اللي كانت على المكتب هنا؟؟
سينات:شورشتات اية؟ انا لقيت شوية ورق على المكتب رميتهم في الزبالة...بلا كركبة
طهقان: رميتي روشتات ست شهور يا مفترية تساوي 600 جنية ده انا كنت حوديهم الشغل و اخد الفلوس اللي دفعتها.... حتروحي فين من ربنا




سينات: يا ابلة ..الرسمة اللي في الفاليلة بتاعة الواد طهقان الصغير لزقت في المكواه ،قمت انا شداها و حكيت المكواه بالسلكة
طهقانة: سلكة تاني يا زينات..المكوة كده باظت حتفضل كل مرة تلزق، حد يكوي البلاستيك بالمكواه يا زينات؟؟؟






طهقانة: زينات...هو شعرك ماله ملزق كده النهاردة؟؟ انت حاطة عليه اية؟
سينات: اصل لقيت معندكوش جاز... قوم حطيت من المرهم اللي في الانبوبة اللي في الحمام
طهقانة: دهنتي شعرك بمرهم التسلخات يا زينات؟؟؟!! ...كويس برضه اهو مطهر




سينات:ابلة.... السلطنية الازاز نطت من ايدي وقعت اتدشدشت
طهقانة: دي رابع بولة بايركس تطير من ايدك يا زينات!! مش حنلاقي سلاطين نغرف فيها بعد كده ، حناكل من الحلة يا امي.0

الله؟!!!فين السيراميك اللي كنت شايلاه تحت الحوض يا زينات؟

سينات: رميتة من البلاكونة يا ابلة ..انتي كنتي عايزاه؟

طهقانة: اية؟؟؟ رمتية من العاشر يا قادرة؟؟؟ و لو كان نزل على نافوخ واحد جاب اجله !!!كان زمانك مشرفة في ابو زعبل

سينات: متخفيش يا ابلة انا رميتة بالليل هو و صفيحة البوية اللي كنتي مخزناها ..بلا كركبة

طهقانة: اشد في شعري يا نااااااااااس!!!0



طهقانة: اية اللي بتلمعي بيه الترابيزات ده يا زينات؟؟
سينات: ده كيس مخدة يا ابلة
طهقانة: كيس مخدة ؟؟ده بتاع طقم الملاية الكنافاه... ده غالي يا بنتي
سينات: ما انا حخسلة بعد ما انفض بيه الشيش يا ابلة




طهقانة: ايه ده؟؟ ايه الريحة دي؟؟
سينات: يمكن ريحة الدوا اللي تحت حوض الحمام؟ اصل انا لقيته بيلمع البلاط قوم مسحت بيه الحمام
بووووووووووم
طهقان: ااااااااي
طهقانة: مالك يا طهقان؟؟ اتزحلقت يا حبيبي ..معلش اصل زينات مسحت الحمام بزيت اللافندر بتاع التدليك





طهقانة: اية اللي منشراه ده يا زينات؟؟؟؟؟؟؟
سينات: دي اكياس الشاي ابو فتلة.. اللي عمو بيشربه... بعد ما بطلعها من الكباية.. بنشفها و احطهاله المرة اللي بعدها
طهقانة: طيب وطي صوتك... بدل ما يقوم يرجع في حجرك و يطردني أنا و انتي
و متعمليش كده تاني ..يا ربـــــي




طهقانة: زينات ..خدي يا بنتي مرتبك اهوه كــــامل و قبل ما الشهر يخلص كمان، و روحي بلدكم رمضني مع اهلك، و احنا حنبقى نبعتلك فلوسك كل شهر لحد عندك
سينات: ليه يا ابلة؟؟..ده انا لسة كنت عايزة اصبن حيطان اوضة المسافرين بالجاز قبل رمضان
طهقان: ابوس ايدك بلاش... كفاية الصالون الايتامين اللي غسلتيه بالكلور و مرمطي ..اقصد بيضتي اهله
طهقانة: افتكرلك اية يا بصلة!! و انتي كل قطمة بدمعة...روّحي يا بنتي و القلب داعيلك



دي حاجة تطهق بجد


و اوروفوار


امضاء

57 comments:

bastokka طهقانة said...

هيييه اول تعليق ....هههههههه
حاولت اختصار الحوارات و حذف اغلب المواقف حرصا على مرارة الشعب البلوجري الحبيب

صحيح يا ولاد العلم نورن
و الجهل ..مدفعش الفاتورة فقطعوا عنه النور


اوروفوار

Anonymous said...

هههههههههههههههه البوست تحفه موت انا فطست من الضحك بس ان صعبان عليا الواد طهقان الصغير اتبهدل يا عينى

صاحب المضيفة said...

هو الكلام ده بجد فعلا



هو ان كان على طريقة الكلام فهي يجد تحفة

لكن لو المواقف صح بجد


يبقى عندك حق تعملي علامة الماوس في المدونة ساطور


يا مثبت العقل والدين يااااااااااارب

Mahmoud البطراوى said...

هههههههههههههههههه

بجد بت زى القمر
انتوا جبتوها منين؟؟

بتوفرلكم وتنشر الشاى
هههههههههههههههههههههههههههههه

جامد بجد
واسلوبك تحفه

مواطن مصرى نايم said...

لا اكيد هزار مش معقول الكلام ده
اوعى يكون بجد
لو بجد هاتى لى البت دى اقتلها
هههههههههههههههههه
ايه ده
دا انا شعرى وقف
و بطلع دخان من ودانى
ههههههههههههههه
دا غباء بس غباء بافترى
غباء مبالغ فيه
ههههههههه
ربنا يصبرك

تحياتى
اسلام

Anonymous said...

ههههههههههههههههه

حرام عليكى موتينى من الضحك

ايه ده هو ده بجد ولا ايه

هههههههههههههه

كلبوزة لكن سمباتيك said...

كل الاحداث حقيقية حدثت من عدة شغالات على مدار اكثر من 20 سنة
و ما خفي كان اعظم

اوروفوار

جبهة التهييس الشعبية said...

عندي سؤال عايزة عليه اجابة بجد
هي الشغالة دي عندها كام سنة؟

نوري said...

ايه الوليه دي
ايه البت الهبله دي
ده الغباء بيفط من بين رموشها
لا بجد فظيعه
لا تطااااااااااااااااااااااق
يلا بقي ربنا معاكي
ده انتي هتشيلي البيت كله تاني لوحدك بعد كل الي عملته فيكي
يا حرااااااااااام

كل سنه وانتو طيبين

وبست وشز فور يو

كلام حسام said...

اممممممممممم
انا بحب اللي بتكتبيه يا طقهانة ومتابعه من زمان وبيعجبني لدرجة الانبساط ودي درجة نادرة علي ما اوصلها
البوست اتكتب بحرفنة تتحسدي عليها لكن فيه حاجات فلتت منك زي انها تطش البوتجاز بشوية مية معقول يعني فيه حد ما يعرفش البوتجاز ده حتي مطاريد الجبل يعرفوا البوتجاز وانا موصلهم الغاز بنفسي
والحيطان اللي هتغسلها بالجاز
ومش معقول يعني ما تعرفش الشوربة اكيد شربتها مرة في حياتها
كل الكلام اللي كتبتيها جميل ورائع واسلوبك مش احسدك عليها علشان انا عارف عيني عاملة ازاي
بس وقفة صغننة معاكي انتي كتبتيها بطريقة استهزاء علي بنت لا حول لها ولا قوة لا هي اختارت تكون خدامة ولا انتي اخترتي تكوني طقهانة
دي بنت غلبانة حتي لو موجودة في الحقيقة ما تستاهلش بعض المدونين يطلعوا يضحكوا عليها ويقولوا ايه الغباء ده اصل الغباء دي شتيمة وشتيمة مش حلوة كمان
وبعدين انتي متأكدة انك هتبعتي لها مرتبها كل شهر اومال انا بقالي كام شهر محدش بعت لي حاجة باعتباري من صنف الغلابة

كلبوزة لكن سمباتيك said...

سلام عليكم
ازيكم؟
كويسيين ؟؟ الحمد لله
الشغالة دي ملهاش شهادة ميلاد ..ساقطة كيك يعني
و تعمل حوالي 17 سنة، بس بلادهم مش على الخريطة فبجد متعرفش البوتاجاز و اول مرة تتعرف بيه كان في مصر

انا لم اوصفها بالغباء في اي سطر من سطور البوست انا قدمت نص الحوارات اللي دارت بنا
و أجزم انها كبت الشوربة فعلا و بعدها جت سالتني انت كنتي عايزاها!؟
ده حصل فعلا
هدفي من وراء المقال ليس وصمها بالغباء
و انما وصف الجهل بالظلام الذي يقطع على الدماغ اي فرصة لرؤية بديهيات الحياة


تحياتي لنقدكم الحبيب و تمنياتي لكم بالسعادة و الهناء
و
اوروفوار

abo salah said...

بعد السلام عليكم

هههههههههههههههههههههه
ياصبر أيوب

دى منين البنت دى ؟

دا صبركم عليها لو اتوزع على الشعب المصرى كله
هيبقى رجالة الشعب كلهم اسمهم صابر
ونساء الشعب كلهم اسمهم صابرين
ههههههههههههههههه

بجد بوست تحفة
والأسلوب روعة

أعانكم الله على الخدامة الهدامة
وكل سنة وأنتم طيبين

تحياتى

كلام حسام said...

طقهانة بجد بحترم كل اللي بيكتب هنا والمدونة دي غالية عندي لانها سبب في ابتسامتي
بس برضه لسه صعبان علية تصوير لبنت لا حول ولا قوة لها بالشكل ده فيه حاجات كتير اوي كاركتر لكن لما يكون الانسان عفوي اوي اوي ومفيش نية معمدة للاساءة بلاش احنا كمان نسئ له انا عارف الموضوع كله من اوله لاخره ضحك بس اعمل ايه في ابو مخ مخيخي مش راضي ياخد الموضوع كده وواخده من ناحية تانية تانية خالص
عارفة تخيلي معايا اني انا تخيلت رغم اني علي طول عايش في الخيال اني مكان البت دي وربنا اراد ياخد بايدي في يوم من الايام واتثقفت واتنورت وبقيت افك الخط وروحت اخدت دورتين تلاتة كمبيوتر وعملت لي ايميل
اه بجد الخدامة بقي عندهاايميل اقصد البت علي حد وصفك لها العيلة الصغيرة اللي بتقول لطقهان يا عمو
بقي عندها ايميل وعملت مدونة وبالصدفة دخلت هنا ولانها عارفة انك طقهانة معرفة شخصية لقت كل الكلام ده عليها
البت المسكينة عينها دمعت وهي رافعة عينها للسما وبتقول ياربي ما كنت اقصد حاجة وحشة بس انا اللي استاهل احنا كده صنف اتكتب علينا المرمطة
قولتي انك ما قولتيش عليها غبية خالص في اي سطر بس في كل حرف كان بينطق بغبائها
مش عارف ليه انا حسيت بوجع البنت دي حتي لو كانت شخصية وهمية وحكايات اتكررت علي مر عصور الخدم
انا متاكد يا طهقانة ان غرضك شريف ونبيل وما اقدرش انطق بحرف وعارف انك عايزة ترسمي البسمة علي كل وجه في الدنيا
بس كله ابتسم
الا الخدامة
هي اللي بكت

... said...

أعرف هذه النوعية من البشر لكن كنت فاكراهم خلصوا خلاص
كان عندنا واحدة زمان لقيتها بتسأل أمي بعد ذكر اسم رسولنا الكريم عن ما هذه التمتمات التي تقولها
اكتشفنا أنها لا تعرف حتي اسم الرسول ولا صلاة ولا دين ولا حاجة أبدا
قيسي بأة علي باقي مفردات الحياة

Anonymous said...

هههههههههه
لا بجد متقوليش
ربنا معاكي

انا مدخنه بالنيابه عنك والله

mostafa rayan said...

طيب معلش يعني انتي اصلا ليه تجيبي شغالة وتدخلي حد غريب بيتك وتخليه يلخبطلك الدنيا مانتي اعملي حاجاتك بنفسك في لأول والأخر دةبيتك وانتي المسؤولة عنه
ارجو ألا يغضبك رأيي
تحياتي ليكي

جبهة التهييس الشعبية said...

الاخ مصطفى
ما تعملش حاجتها دي على اساس ايه؟
لو المبدأ ان كل واحد يعمل حاجته بنفسه يبقى كمان جوزها يعمل حاجته بنفسه
بمعنى هي تنضف مكانها وهو ينضف مكانه ويتقاسموا شغل الاولاد لانها ما جابتهمش لوحدها ولانه ما اتجوزهاش عشان تشيل وساخته
اذا الرسول بيقول صاحب الحاجة اولى بحملها
يبقى قياسا على كده كل واحد يخلي باله من نضافة مكانه اما الاطفال فهم لسة صغيرين ولما يكبروا شوية المفروض يتحملوا المسئولية شوية بشوية

انما هي تنضف لنفسها ولجوزها ولعيالها عشان هي ايه؟ عبد شرا مال؟
ده حتى العبد الرسول وصى على اننا نساعده
والسخرة حرام دينيا وانسانيا

عشان كده كنت باسأل على سن الشغالة دي

لانها لو اقل من واحد وعشرين سنة مش مفروض تشتغل شغالة

ولو طفلة تبقى حاجة لا انسانية بالمرة عشان دي المفروض تروح المدرسة وتلعب مش تشتغل خدامة في بيوت الناس

لكن لو بنت اكبر من واحد وعشرين سنة يبقى بتشتغل وبتقبض فلوس وده مش عيب انها تشتغل

وهي تبقى بتفتح لها سكة رزق حلال بدل ما تشحت وللا تسرق

قال بيتك ومسئولة عنه قال

طب خلاص بيتها ومسئولة عنه يبقى طهقان باشا يروح يسكن في لوكاندة عشان ماحدش بيوسخ البيت وينكش الدنيا ويتأمر على الاكل وده حادق وده بارد وده مش حلو غير الرجالة

كلام حسام said...

سؤال بريء بيشر براءة
هي صورة البهيمةاللي لابسة فستان اللي في الحوارت دي رمز لمين
!!!!!!!!

كلبوزة لكن سمباتيك said...

ههههههههههه يا نوارة اهدي بس هبشتي في وش الراجل كده على طول
الواحدة متخفش على نفسها في البلد دي وراها ستات جدعة

بالنسبة لمبدأ الاستعانة بخادم ده مبدأ جائز شرعا و قانونا و الرسول صلى الله عليه و سلم كان عنده خادم

في ستات بتوفر تمن الخدامة و تسيب البيت زي الزفت و تقول : اللي انا اعكه احسن من اللي الخدامة حتنيله

بس انا افضل ان كل انسان يعمل ما هو ميسر ليه
عملا بقول الرسول : كل ميسر لما خلق له


زي ما قلتلكم الاحداث دي حصلت من اكتر من شغالة باعمار مختلفة في ازمنة مختلفة بس حصلت فعلا


انا كمان ضد عمالة الاطفال و ارفضها و يصعب عليا جدا ان طفل يعمل اجير

منكرش اني بشغل اولادي في البيت و بيساعدوني و كل واحد بيرتب سريره و مش علشان اوفر ،لكن علشان ينفع نفسه لاني مش حعيش لهم العمر كله و مسيري اموت و هم يضطروا يواجهوا الحياة لوحدهم


ما زالت بعمل استرس على فكرة الجهل المشكلة الرئيسية لاحداث البوست
الجهل هو المسئول عن اي فشل

بدليل ان كان عندي بنت متعلمة كانت هايلة و كانت بتقرا للاولاد قصص و بتفهم كل حاجة بشئ سليم


بحبكم و بتسعدوني
و اوروفوار

lastknight said...

انتى اللى غلطانه برضه يا طهقانه .. حلى الكيس شويه و هاتيلك واحده من الفلبين .. أو حبشيه من بتوع لاجئين دارفور .. أو بصى .. يعنى هى تضحيه بس اطلبيلك واحده من روسيا .. ملقحين فى دبى بخمسه دولار فى اليوم .. بس دى هاتبقى خطر قوى على الأستاذ طهقان
ضحكتينى و فقعتى مرارتى .. كل سنه و انتى طيبه

حاجات جوايا said...

هههههههههههههههههههههههههههه
مش ممكن
هو فيه كده ؟؟؟؟؟؟؟؟؟
ههههههههههههههههه
بجد الجهل وحش

ربنا يصبرك يا بنتى
ويرزقك بواحدة متعلمة ومثقفة
بس متكونش حلوة لدواعى أمنية ههههههههه


دمتى بخير حبيبتى

سالى

Desert cat said...

اللى هى فيه ده مش ذنبها
ذنب ظروف لاقيت نفسها فيها كدا
اورفوار

Nohaz said...

يا مفترية
بقي هي عملت كده؟؟

دي شكلها غلبانة وانت كنت مفترية

كمان منيين دي

ده الفلاحين دلوقت متقدمين عننا وبيتفرجوا علي الدش

http://www.elmessiri.com/articles_view.php?id=4
اقري الموضوع ده

بيلخص لك اكذوبة ارض الميعاد

mohamed ghalia said...

ههههههههههههههههه
أوعى تفرطى فيها دى بنت جامدة وبتعرف تعمل كل حاجة
كل سنة وإنتى طيبة
دمتى بود

عاشــــــ النقاب ـقــــة"نونو" said...

تصدقي وتؤمني بالله
انا فطست من الضحك اه
وبعدين قلت البنت دي تلاقيها سنها صغير والمفروض بتلعب ولا حاجة
ومش عارفة الوم اهلها ولا الوم ظروفهم ولا ايه بالضبط
ربنا يعوض عليكي وما تزعليش منها
غصب عنها والله اشفقت عليها
كل عام وانتي بخير
تحياتي

محمد عبد الغفار said...

على الأقل بتفكر

Empress appy said...

ههههههههههههههه

مغلش بقى بس والله دي مسخره موتتنى من الضحك فعلا

☼♫♪ عمــاد الدين يــوسف ☼♫♪ said...

سلام قول من رب رحيم ، ربنا يستر عليكو منها لتنتحروا بسببها هههههههههههه

صباح الصباح said...

بجد دماغك دى كارثة انسانية
ممممم والموضوع كبر اوى وكلور ولافندر
انتى بجد المفروض تتحطى فى بترينة
هههههههههههههه

منى said...

ههههههههه
انتى تطهقى واحنا نضحك
ربنا يسامحنا ويسامحها
ويصبرك
انتى ليك الجنه لو ده حصل بجد واتحملتى
ولة محصلش تبقى انتى كاتبه حكايه
مرسي لسؤالك ودعائك
تحياتى

شهد الكلمات said...

ههههههههههههههههههه

فكرتيني بشغالة خالتو جابتها تنضف لها الشقة
و في يوم خالتو رجعت من الشغل لاقيت ريحة حلوة في الشقة كلها فابتسال الشغالة قالتلها عجباكي يا سيت اصلي خت من الازازة اللي ع التسريحة دي و حطيت منها في مية الغسيل ههههههههههه
حطيت من برفيوم اصلي في ميةالمسح

مصر يا موكوسه .....يا مزارع الكوسه said...

يا نهار ازرق
فى حد يطرد بت بالمهارة دى
البت دى فينها
انا كنت بدور عليها لحد غالى عليا اوى

موناليزا said...

جبتوها منين دى!!!
هى جاية لوحدها ولا معاها كتالوج

oRiGiNaL HeArT said...

ههههههههههههه
هههههههههههه
هههههههههههههههههههههه
ههههههههههههه
ربنا رحمكو

عين فى الجنة said...

والله البنت ذكية وبتشغل مخها بس انتوا معندكوش قوة ملاحظة
:))
اما رأى نوارة ان طهقان يروح يقعد فى لوكاندة ده يبقى عز الطلب وبركة ياجامع ، ساعتها يقدر يروح الجيم المختلط بدون رقابة

خالد فوده said...

خهههههههههههههههههههههههههههههههههههههههههههههههه
شغاله ايه دي
بقولك ايه
ممكن تبعتي لي العنوان خليني اجيبها لنا
علشان انتحر وخلاص
واهه يبقي الانتحار مش حراااااااااااااااام

مدحت محمد said...

دايما طريقة كتاباتك جميلة ومسلية جدا

ربنا يحفظك يارب

الربان said...

تحياتي

تعرفي ان كثير مما ذكرتيه يحدث فعلا..مع الاختلاف طبعا في بعض التفاصيل...

يجب علي ربة المنزل ان تعلم الخادمة اولا
قبل ان تتركها تتصرف بمفردها...و ان تضعها تحت عينيها حتي تتحقق من انها قد
استوعبت بالفعل...

في بعض البلدان يوجد مدارس او معاهد تعطي دورات في إدارة المنزل...و خريجيها يعملون بالساعة و اجورهم
مرتفعة....


تحياتي و تقديري...وكل سنة و انت و اسرتك الكريمة طيبين بمناسبة قرب شهر رمضان.

momken said...

ماتساليها كده يا ابله اذا كان فى حد تانى عندهم فى البلد
لحسن انا حفيت

وامى متهمانى انى انا الى بقرف الشغاله وامشيها

يعنى يرضيكى وحده كل هويتها تلعب فى منخيرها تقعد عندنا مثلا

ولا وحده مستولا غبائها يخلى اسمها ايه الى عندكوا دى اينشتين

ولا وحده اصلا مرعبه فعلا مرعبه مش بس مرمح لا شخصيتها مرعبه

ابوس ايدك يا ابله خلى مسعده الى عندك تشوفلنا وحده
وليها مكان مستقل تبات فيه

واجازى يومين فى الاسبوع

واربع تنفرار فى البيت هيخدموها
انا وامى وابويا وعم عيد السواق

البوست روعه يا ابله
عاوزاش منى حاجه قبل ناحرق الاروج الى بكتبلك منه

تحياتى

كلام حسام said...

وما زال سؤال البرئ يطرح نفسه محدش هيعبره بقي وياخد بايده من علي الارض بدل ما هو طريح كده
ده حتي اتطرح في زمن اقتصاده صعب
وناوين تسيبوه كده مطروح من غير مرسي

هي صورة البهيمة اللي لابسة فستان دي رمز لمين
!!!!

Mercy Devil said...

ههههههههههههههههههههههههههههههههههههههههههههههههههههههههههههههههههههههههههههههههههههه

كل ده والله حرام بصراحة ربنا يعينك انتى وطهقان

فى البلكونة !!! والحيطان !!! والعربية ام خرطوم
ههههههههههههههههههههههههههه
ايه ده كله
دى اخرة اللى يستعين بخدامة هههههههههههههه

bastokka طهقانة said...

ازيكم؟
تمام؟
الحمد لله
ميرسي على تعليقاتكم اللذيذة و فعلا في زي البنت دي اشكال و الوان في كل مكان و زمان

و على كل حال دي بنت هايلة جدا و احسن من اي فلبينية او روسية لدواعي امنية و توفيرا للشاش و القطن و التربنة

طبعا مقدرش ابعتها لحد فيكم علشان مش حلاقي حد يقرالي بعد كده هههه


مش مفروض اني اقدم تفسير لكل الصور اللي في البوست لاننا مش في حصة مطالعة و الميس لازم تشرح للتلاميذ
مفروض القارئ هو اللي يحس بانطباعه عن الصور و البوست مش العكس

و مع ذلك
صورة البقرة اللي لابسة احمر و اكسسوار: هي رمز لكل واحد عامل ناصح و بتفزلك و كما قال المثل لا تجعل ملابسك هي اغلى ما فيك

بتسعدني تعليقاتكم و حضوركم و اتمنى لكم متعة و استفادة و


اوروفوار

كلام حسام said...

حقيقي اثبت لي انك انسانة راقية جدا
تحياتي

Anonymous said...

هاااااااااااااااي طهقانة حبيبة قلبي اسفة كتير قوي اني بقالي كتير مش متابعة بس انتي لسة بتقولي دخلة رمضان بقي وحاجات كتيييييييييرة عايزة تتظبط وعايزة اقولك ان ربنا رزقني برضة بست جميلة قوي زي اللي بتحكي عنها بس هنعمل اية يا اختشي الحوجة وحشة وعايزة اقول للاخ المحترم اللي عايز الستات يعملو كل حاجة بابديهم اكيد حضرتك من اللي بيسيب الشوربات في الجزمة وعايز زوجتك تكون دايما مبتسمة وجميلة وبيزعل قوي لو هدومة مش جاهزة دايما عموما رجاء نرجع لديننا هنلاقي ستنا الحبيبة خديجة كان عندها خادمات وكانت هية بتحب تشوف طلبات سيدنا النبي بنفسها طبعا لانة حنين ومتعاون وعارف قيمتها كويس قوي وهاقولك اية يا طهقوتي قلبتي عليا المواجع مافيش غير يمهل ولا يهمل لان ربنا مش بيحب الظلم
زكزوكة

Anonymous said...

بس تصدقي ياطهقوتي اية اكتر حاجة صعبانة علية الحلل التيفال اكيد انتي كمان زعلتي عليهم قوي برضة الحمد للة علي نعمة العلم حتي ولو كان نص نص احسن من مافيش خالص كدة وبااااااااااااااااااي
زكزوكة

Hosam Yahia حسام يحيى said...

هههههههههههههههه

احسن حاجه فكره نشر الشاى

توفير

:))
ماشاء الله بوست جميل

دمتم مبدعين يافندم

وكل سنه وحضرتك طيبه

funckydoctor said...

ههههههههه
هموت من الضحك
بس حلو موضوع الشاى الفتلة ده ههههه
ولا البوتجاز
أنا ممكن أوفرلك مرارة مش مستعملة أصلا :D

Anonymous said...

اول مرة ازور مدونتك

قطعة من خفة الدم .. المؤكد انى هاجى كتير جدا

انتو كده هاتجهزوا تانى .. مظبوط؟

ka2en Makboot said...

ههههههههه
لا فزيعة الشغالة ديه اكيد جايه من كفر الطوب عدل بتفكرني باثار الحكيم في دور ظريفة ولا فردوس عبد الحميد لما كانت عاملة شغالة وبتقول ماهو اللي قالي :]

تحيـــاتى لدمك اللي زي العسل

my dream said...

ههههههههههههههههههههههه
مش قادره اكتب اي تعليق من كتر الضحك بجد دي تخفه بس انا مصداقه موضوع البوتوجاز ده لانه حصل مع الشغاله اي كانت بتشتغل عندنا زمان في بيت بابا
ههههههههههههههههههههه ومش هحكيلك لما وريتها المكنسه الكهربائيه وامكانيتها تقوليش سحر وبقت هتتجنن
عموما كل سنه وانت طيبه
مع حبي
مروه

Anonymous said...

("_")

مصطفى نوبى said...

هههههههههههههههههههههههههه

جميل جدا البوست ده

ضحكيتينى بجد من قلبى

ان ساء الله ماتكونش اخر زياره ليا
لان رجلى بقت بتحب تدب عندك

بس خلاص

الكاتب احمد كاجوال said...

السلام عليكم
بعد التحية و السلام نفيدكم علما بأن مدونة
شباب الصحبة
بدأت المرحلة الاولي من العمل و نحن نقدم الان أجرأ و أكثر المقالات التي تتنوع ,, نرجو منكم المشاركة من جديد ابداء الرأي علي المواضيع وبدأ التعليق ,, كما أرجو المشاركة في الاستفتاء

دة أمل ليا و شرف ,, انا حكون سعيد لو تمنحهولي

مجهود أكثر من 5 شهور ينتظر أجابة فرد

و جزاكم الله خيرا علي كافة الاحوال
http://so7bah.blogspot.com/

رفقة عمر said...

بجد كنت محتاجه اضحك جداااااا
مش قادرة اصدق ان فيه حد كدة هما اللى بنشوفهم بيكونوا مش عاوزين يشتغلوا عوزين احنا اللى نشغل
لكن لدرجه انها تغسل الصالون بالكلور وكل الحاجات دى بجد حضرتك المفروض تاخدى جايزة على الحلم والصبر
انا مبسوطه ان حضرتك كلبوزه لكن سامبتيك كانت مفاجاه ليا
المدونتين احلى من بعض
ربنا يزيدك من فضله

bastokka طهقانة said...

السلام عليكم جميعا
متشكرة جدا لتشجيعكم و آرائكم الرقيقة و يا رب دايما مبتسمين و مبسوطين


اوروفوار

سمر الشافعى said...

ازيك ياطهطه كل سنه وانتى طيبه ياقمرايه وكويس انك مشيتى البت دى الواحده مننا عندها مراره واحده بسسسسسس

koukawy said...

ههههههههههههه
انا اكتر حاجه موتتني المثل بتاع البصله عمري ما سمعته قبل كده
ههههههههههههههه
و حلو اوي بتاع الجهل كمان
و الله يا بنتي الشغالات دول عايزين قطم رقابيهم
كنت قومتي عليها طهقان و هو ظبطهالك
يا عني يطلع عينك لوحدك كان ركز مع سنيه شويه و سلبه منك
.......................
طب انا هحكيلك .... عمي كان عندهم شغالات كتير المصريات بيسرقوا
و طلعوا عينين مرات عمي
فبقت تجيب اثيوبيات ..... دول بقي هوانم و بتقبض 300 دولار في الشهر
و مش بتكوي
و مش كل الغسيل بتطبقه
و بتنام من الساعه 7
و مش مسموح حد يخبط عليها
و لازم تمسح بالمساحه اللي بايد من بخيشه و توطي و الكلام ده
و اجازه يوم و نص
و لو تعبانه اجازتها مدفوعه
يعني تقريبا مرات عمي هي اللي كانت بتخدمها
حاجه تفلق