ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

أهلي ..بيب..بيب..طوارئ



طوارئ.. طوارئ ...طوارئ.. و لجان تفتيش في كل حته في الفسحة و الكوريدور، و كذا كمين قدام التليفزيون و أسلاك شائكة حولين الريموت كونترول

اه... ما هو النهاردة في ماتش للنادي للأهلي.
يعني حال البيت يقف و محدش يجرؤ يطلب أي طلب، أو حتى يقترح أي اقتراح ؛ لان مزاج السيد المبجل المحترم طهقان أفندي متوتر بسبب الماتش
و أنا و العيال بنشجع إجباري غصبن عن حبة عينا
و اقعد أصلي ركعتين قضاء حاجة علشان الأهلي يكسب، ما هو لو خسر حتبقى ليلة ملهاش نهار عليا و على العيال و تلاقي العيال قاعدين يبتهلوا و يدعوا
طهقان الصغير: يا رب الأهلي يكثب علثان بابا يودينا تمرين الثباحة
طهقانة الصغيرة : آمين و كمان يا يب يجيب اجوان كتيه علشان بابا يفيح و ييضى يعشينا بية
طهقان الصغير: آمـيـــــن
طهقانة: يا رب النور يقطع علشان ينزل يشوف الماتش برة و اعرف اشوف أنا المسلسل
العيال الطهقانين في نفس واحد: آمــــــــــــــــــين





و هكذا يا أعزائي.. طهقان بيعمل لنا حظر تجول يوم الماتش، و مكهرب لنا البيت ، و ملغم لنا التليفزيون، و رافع الأحكام العرفية
يعني مثلا ممنـــوع حد يعدي قدام التليفزيون أثناء الماتش
ممنـــوع حد يرد على التليفون أو يتصل بالتليفون أثناء الماتش
ممنـــوع حد يلمس الريموت كنترول
ممنـــوع حد يلبس أي لون غير الأحمر

ممنـــوع طبخ أي صنف من غير صلصة طماطم يوم الماتش و الا يبقى فال وحش
ممنـــوع النفس و الكلام و التعليق و التنهيد و محدش يكح في البيت غيره ، طبعا ساعة الماتش


و أنا و العيال متعلقين في كعب جزمة لعيبة الكورة ، لو كسبوا ....يبقى عصر رخاء علينا نخرج نتعشى برة، و يفضل يزمر طول ما هو سايق تعبيرا عن السعادة ، و لا كأننا في زفة فرح بنت العمدة، و يخلي العيال يطلعوا أي حاجة حمرا من شبابيك العربية، فانيلة قديمة ماشي أو حتى بنطلون مقطوع بس المهم يكون أحمر.

و لو خسروا يبقى البيت ضلمة، يطفي الأنوار و يقعد في البلاكونة لوحده في الضلمة و يشرب قهوة سادة و شوية شوية يشغل مرشات عسكرية و ينيمنا من المغرب زي الكتاكيت .

اتفقت مع العيال اننا يوم الماتش نخرج نتفسح لوحدنا و نسيبه يتفرج على الماتش لوحده يمكن يحس بعدم وجودنا و يحس بقيمتنا
و فعلا استمتعنا جدا لان الشوارع كانت فاضية و المولات رايقة ، يظهر إن الشعب المصري كله زي طهقان بيحفروا خندق قدام التليفزيونات يوم الماتش
و الحمد لله بعد الماتش اتصل بينا فرحان و قال
طهقان: انتم فين انا بعد الماتش ما خلص ملقتكوش في البيت
طهقانة: لسة حاسس دلوقتي!! احنا في المول من قبل الماتش ما يبدأ بساعة
طهقان : طيب أنا جيلكم نتعشى سوا .
طهقانة: كويس إن الأهلي كسب.
طهقان: عرفتي منين!! هو أنت كنتي بتشوفي الماتش عندك؟؟
طهقانة: لا اصل لو كان خسر كنت قلتلنا باتوا عندكم في المول النهاردة
دي حاجة تطهق

و........0

أوروفوار
إمضاء

53 comments:

lonely said...

هههههههههههههههههه
اتارينى عماله اسمع الستات بتزغرد والشباب بيخبط ويزمر
انا فاكرة فى فرح جاى فى قاعة الافراح اللى جنبنا مجاش فى بالى ان الاهلى بيلعب وكده

وبالهنا والشفا

صدى الصمت - عاشقة الورد - said...

كان نفسي أكون أول تعليق بس مش مشكلة الحقيقة أنا مش عارفة الماتشات عموماً لزمتها اية غير انها بتفور الدم أكتر ماهو فاير يعنى هية الناس ناقصة حرقة دم ؟

funckydoctor said...

هههه
بس طهقان عمل ايه النهاردة أصل الأهلى خسر من روما ربنا يتولاكم

aya said...

هههههههههههههه
الله يكون فى عونك الليلادى بقى

مش عارفة ليه حاسة انى اعرف طهقان
او حد شبهه
وبعيد عنك بقى
ماما هى اللى بتحفر الخنادق واخويا وابويا فاضلهم تكة وياخدوا التليفزيون بالحضن
بفضل انا لوحدى جوا ادعى ربنا يعدى الليلة ديه على خير

الله يكون فى عونك يا طه طه

afreet said...

هو طهقان بيقرا الكلام ده لو بيقراه يبقى ربنا يستر عليكي عشان الأهلي خسر النهارده
الغريب ان مصر كلها بتخرج بالملايين للشوارع بعد الماتشات كأن بلدنا بقت جنة والأسعار نزلت وبقى عندنا حرية والأنتخابات بطلوا يزورها مش عارف البلد هي الغريبة ولا انا اللي مش طبيعي
المهم استخبي النهاردة في التلاجة
مع تحياتي

خالد كامل said...

هههههههههههههههههه
الحمد لله ان الواحد مش بتاع كورة
ولا ليه فى الكورة أصلاً
بس مجرب الحاجات اللى بتحصل ساعة الماتشات دى
و أصحابى بقى اللى لازم علشان أخرج معاهم أقعد على القهوة بالعافية و اتفرج على الماتش بالعافية
هههههههههههههههههه
تحياتى

عروس البحر said...

ربنا يصبرك يا حبيبتي انا مبشوفش ماتشات غير بتاع الكاس
ربنا يصبرك بس ايه القواعد الجديدة دي اللي نزلت اثناء مشاهدة الماتش
تحياتي

Princesa ... WHiSPeR said...

يييييييييييي
ماتشات ونيله
يعني انا سايبه الماتشات في التليفزيون اصلهم بيتفرجو على التعليق والاعاده
اجي الاقيكي بتتكلمي عن الماتشات

بصراحة بحس بناس عندها فراغ عالى اوي لما بيرهنو خطة يومهم بالماتش

يلا خليني ساكته علشانماحدش يزعل مني

ع فكره اول شرط في فارس احلامي انه يكون مابيتفرجش على كوره

عاشــــــ النقاب ـقــــة"نونو" said...

ههههههههههههههههه
اهلي وكورة
يا ساتر الشر برا وبعيد
الحمد لله هذه المدعوة ليس لها اي وجود في حياتي
تحياتي

محمد عبد الغفار said...

افهم من كده ان انت والأولاد قضيتوها رصيف امبارح

صباح الصباح said...

ماهو لو النور قطع انتى كمان مش هتشوفى المسلسل.. هههههههه
هوة معلش.. ماتش يفوت ولاحد يموت.. وبعدين ماهو احنا عارفين كدة كدة الاهلى كسبان...

خمسة فضفضة said...

السلام عليكم ورحمة الله وبركاته

هههههههههههههه

حاولي يا طوطه يحبي اللي بيحبه طهقان باشا
وايه يعني لما تقعدي تشاركيه مشاركه وجدانية وتشجعي الاهلي بقلب كده وحماس

ولو لا قدر الله الاهلي خسر تزعلي برضو من قلبك

ماهو طالما الكلام علي الاهلي يبقي هاتلاقيني عليطول في صف طهقان
:))))))))))))))))))
وربنا يا ستي ما يجيب هزايم

سلام

Geo Amr said...

موضوع الماتشات دة كلام فاضى وبجد الله يكون فى عونك وفى الاخر اللعيبة هى الى بتاخد الفلوس

شهد الكلمات said...

الكلام ده كان امتي
ادينا اتغلبنا من اس روما امبارح و اتفضحنا من الزمالكوية العلوج
:(
و بيب بيب اهلي

ذو الوجه المبتسم said...

ازيك
انتى برده لسة طهقانة
تعرفى انا زعلت جدا على الهزيمة
مع انى كنت باشجع الاهلى بتعصب
الاهلى لعب بجدية
لكن النصيب ؟؟؟؟
على فكرة انا زملكاوى

Desert cat said...

يا شيخه ده انا مبصدق يكون فى كورة
علشان الشوارع تبقى فاضية واجرى واتنطط فيها براحتى

bastokka طهقانة said...

اعزائي
السلام عليكم و رحمة الله
ازيكم جميعا عاملين اية بتسعدني ضحكاتكم جدا و بفرح بتعليقاتكم الجميلة
اشكر لكم جميعا مروركم
و اتمنى لكم وقتا ممتعا
على الدوام

اوروفوار

Mercy Devil said...

هههههههههههههههههههههههههههههههههههههههههههههههههههههههههههههههههههههه

ساعات كنت باقول الله يكون فى عون طهقان أفندى إنما الان ربنا يكون فى عونك طهقانة هانم

ههههههههههههه
وفى عون أستاذ طهقان الصغير وميس طهقانة الصغيرة برضه

Mahmoud البطراوى said...

انا جيت امبارح وكتيبت تلات كومنات
والبلوجر مرضيش
مش عارف ليه
بس انا حبيت البوست ومش هقول اكتر من كده لانى البلوجر مضطهدنى

مواطن مصرى نايم said...

طب انا زملكاوى
دلوقتى اعمل معاه ايه
عموما انا مش زملكاوى متعصب
حتنازل المرة دى و اقول
(حسبى الله و نعم الوكيل فى الاهلى)
امال حقول ايه غير كده يعنى
هههههههههههههه
بجد الف شكر انك علقتى عندى و انا كنت مقرر امسح البلوج
لان التعليقات بجد سبب كبير من انى ارجع
ربنا يكرمك
تحياتى
اسلام

Anonymous said...

اه انا زمااااااان ايام اعدادى كنت زى طهقان كده وكان حبلى للاهلى والكوره وصل لدرجة حبى للون لغاية لما فى يوم عينى شافت حاجه اسمها كاس العالم ومن ساعتها طهقت من حاجه اسمها الاهلى والزمالك والكوره المصريه بالعموم ثم تدرج الامر انى كرهت حاجه اسمها كوره من اصله بس بعد ما شرف عبد الرحمن ابنى بقيت بحبها بس عشان العب معاه انما اضيع ساعتين من عمرى اتفرج على ماتش كوره على رقبتى ولاا تحصل ...لقد تاب الله علينا ااقولك عقبال طهقان ولا دى هتبقى دعوه وحشه...فى رعاية الله يا طهوقه هانم..

maiosha said...

طهقانة
إزيك يا حبيبتى .. قلبى عندك
أصل إمبارح الأهلى إتوكس وكسة ما يعلم بيها إلا ربنا
3/0
يا ترى جوزك عامل فيكم إيه؟؟

ربنا يستر إبقى طمنينى

د. مونى said...

حقيقي مدونتك هتبقي زي قعدتي مع شلة البنات صحابي زماااااااان كانت جميلة ضحك ولعب وجد وحب فعلاااا حاجة كده رايقة وجميلة تروق الدم
اما بالنسبة للبوست الجميل اوي ده فانتي وضحتي بشكل مرح ولذيذ اليوم في البيت لما الاهلي بيلعب تفتكري كام واحد في الشارع عندكو اهلاوي؟؟؟؟؟؟
تحياتي ليكى ياطهقانة

blue-wave said...

ههههههههههههههههه
على فكرة كلنا هذا الرجل:))
لكم الله بجد

TAFATEFO said...

هما الأهلاويه كده.. الحكومه تعمد لسياسة القطب الواحد .. لازم يتعود الشعب ان في بطل واحد الحزب الوطني والأهلي .. وان لازم البطل يكسب

بس قوليلنا .. عمل ايه بعد ما الأهلي اتغلب 3 من روما؟

:D:D

مصر يا موكوسه .....يا مزارع الكوسه said...

والله فرحت فى الاهلى
بلا هبل
بدل ما الشباب يروحو ينفعو نفسهم باى حاجه
لا يتفرجو على الاهلى
بلا خيبه

Anonymous said...

لا حول ولا قوة الا بالله انتى معلقتيش ولاا تعليق على التعليقات ليه يا طهقانه دا من اثر هزيمة امبارح ..ارجو انه ميكنش حصل نتايج الهزيمه اليى ذكرتيها فى البوست قلبى معاكى ...ربنا يلطف الجو ويفتح عن الاحمر ويبقى بمبى..فى رعاية الله..وامنه ..عايزين نشوف اوررروفوارر.

بنوتة said...

هههههههههههههههههه
ههههههههههههههههه
هههههههههههههههه
هههههههههههههه
هو طهقان من النوع ده عشاق الكرة
لأ ده شئ فظيع مريع امال يوم كاس العالم عمل ايه.؟؟؟؟؟؟؟؟؟؟؟؟؟؟؟؟؟؟؟ ربنا يكون في عونك و في عون طهقانينك الصغيرين و ابقي واديهم تمرين السباحة

أميرة said...

اضحك الله سنك و اسعد ايامكم :)

فكرتيني والله عندي ابن خال هو و جوزك فولة و اتقسمت نصين .. ان مكانش التاني مجنون عن كده .. لو الاهلي خسر ممكن يبيت مراته في المستشفي او يبات هو في القسم علشان الازعاج اللي بيعمله للجيران و يفضل يزعق و يهرتل و ينادي علي التايهين ... الله يهدي

ابن خالي التاني زملكاوي بس اعقل من دا ووقعتهم سودة لو اتجمعوا في مكان الاهلاوي ممكن يقاطع الزملكاوي لو الزمالك كسب و نفضل باه في مفاوضات و مباحثات لحد ما يلين و يحس علي دمه ان دي كورة .. مقتلش حد من بيته يعني:(

انا مش فاهمة الناس بتعمل ليه كده .. دي حته حاجة بتاخد بالجزمة يعني :)

الله يهدي

maged stephen said...

انا شايف ان التعصب الكروى ده والمبالغة اللى تجنن الجن وتعفرت العفريت ممكن يكون سببها الاحتلال العنجليزى لمصر ومن عاشر القوم كام يوم
ملحوظة دى مجرد وجهة نظرى أيام ماكان عندى نظر

يا ريت ياعبير تروحى ل تمر حنة وتدلها الجمعية وبلاش تعملى ذى كل شهر

ملحوظة نحيفة جدا
اذا كنتى مش فاكرانى يبقى انا متأسف على الهزار ده مقدما يعنى
اه العمر مش بعزقة يعنى

Nada said...

هههههههههههههههههههه
دمك زى العسل والله يا طهقانة
اوعى طهقان يشوف الكلام دة
لحسن حظر التجول يكون 24 ساعة
هههههههه

حمامة said...

ههههههههههههههههه

انا بحب تكون خير الأمور الوسط
اصله كسب او خسر احنا استفدنا ايه
ما كله للى بيلعبوا :D

Anonymous said...

احم
وبالنسبة لو عرف انك تعرفي واحدة اسمها مها ميهو وبتشجع الزمالك
تفتكري هيعمل فيكي ايه وفي الكمبيوتر كمان؟؟
نعم؟؟
نعم؟؟
ايوه زملكاوية فيه حاجة؟؟ لو فيه قولولي على طول

مها ميهوووو

Eman Henaish said...

المشكلة اني لما أعد أفكر كدة ايه سر الاعجاب الشديد بكرة القدم
وشعبيتها اللي تفوق كل الرياضات الآخري

ما بعرفش ايه السبب

دي حتة كرة غلبانة يا عيني وحبة ناس أعدين يبهدلوا فيها وشطوها ويرزعو فيها وخلاص

وتلاقي الجمهور أعد يقطع في بعضه كل واحد علشان فريقه

عجبييييييييييييي

Mina said...

ربنا يكون في عونك من انكل طهقان
بس علي فكرة انا اهلاوي
تحياتي ليكي علي المدونة الجميلة

Anonymous said...

هههههههههه
انتى عامله زينا
بابا برضه بيعمل خندق ساعه الماتش

بس الصراحه احنا بنقعد معاه فى الخندق برضه
هههههههههههههههه

ده الاهلى الى بيلعب مش اى حد
:))))))))))

(المهاجر الى الله) said...

ادعوك لزيارة مدونتى المتواضعة والمساهمة بارائك وتعليقاتك
www.eyuon.blogspot.com
وشكرا

... said...

يا عزيزتي
احنا مفروض نسيب الديل وندبح الراس
دلوقت الدنيا قايمة ولسه ما قعدتش علشان قناة الأهلي
لأن باقي النوادي هتعمل كدة وهتلاقيه بعد شوية لامم تليفزيونات البيت ومخصص لهم حائط وقاعد يلعب بالريموتات لعب
فاحنا لازم نلعب علي كذا محور
نبعت رسايل لاتحاد الكورة بمنع فتح قنوات للنوادي
ونبعت رسايل مؤيدة لتشفير المباريات
ونكشف راسنا وندعي علي الإية آر تي يفلسوا
او كي

Dr/ walaa salah said...

السلام عليكم ورحمه الله وبركاته

حبيبتي طهقاته

اتتني رسائل كثيره عباره عن اجزاء من مدونتك على ايميلي

وكم تمنيت ان اعرف من هى صاحبه هذه الرسائل الجميله

كان نفسي من مده اعرف كل رسائلك

لكِ روح لطيفه جداً

ودمك ظريف وخفيف ومقبول

مدونتك ايضاً رائعه

إلى الأمام دائماً

خالتى بمبة said...

بيييييييييب بيييييييييب اهلى دايما يا اهلى وانت غايظ كل الستات وكسبان كل الماتشات ومش مهم تتعشي بدرا يا ست طهقانة

محمد فاروق الشاذلى said...

طب ربنا يسترها عليكم لحسن الفترة اللى جاية فى مشاكل فى النادى بسبب القناة الفضائية وده ممكن يخلى طهقان يكسر التليفزيون
خلوا بالكم وخدوا ساتر

Anonymous said...

hahahahahaha
ahly ahly 1oh 2oh
ahly 7aded zamalek saya7oh
3ala fekra el bveet 3andena keda bardo
bas ana bardo 2ahlawaya bas ba2aly 2 years mesh 2a3raf 2ay 7agah 3anhoom\mala el olimpic games mesh 2a7la bardo
salamo

bastokka طهقانة said...

الحمد لله الماتش عدى على خير اطمنوا انا مازلت اجاهد في الخندق في انتظار الماتش الجاي
اهلا بيكم دايما منورين المدونة و بتسعدوني

ميرسي
و
اوروفوار

Nohaz said...

ربنا يبارك لك يا قمر

انا هعمل الي قاله سمسم ولو ان مش غاوية التمر


شفتي الاهلي عمل اية و موضوع البث الفضائي للمباريات

والله بيلهونا عشان نسيب مصايب البلد واولها رغيف العيش

Anonymous said...

والله ضحكتينى رغم حالة الحزن المسيطرة عليا الايام دى

دعـاء عـلى said...

أهلىىى أهلىىىى بيب بيب :)
معلش يا طهقانه حاولى تستحملى
انتى عارفه الأهلى بقى ظاهره وطنيه اليومين دول
و ابقى استغلى الفرصه و اخرجى كل ماتش :)
سلاماتى

zOzO said...

ههههههههه
ههههههههههههههههه

يخربيت كلامك
ومدونتك
حلوه
حلوه

تسلم ايديكي
الحمد لله انا اهلاويه

تجربه المحب said...

بجد المدونه بتعتك زى العسل وكلامك حلو وبيمس القلب على رأى عمك عبد الوارث عسر
وانا بما انى اختك ف الانسانيه المعذبه احب أطمأن عليكى انتى والاولاد بعد وقعه هزيمه الاهلى امام اى اس روما
اكيد كان يوم اسود على دمغنا احنا شخصيا
انا بس عايزه اطمأن عليكوا انتوا بخير؟؟؟
واخيرا احب احييكى على المجهود الرائع ف المدونه والكتابه لانك بجد بتسعدينا وكفايه ثواب انك رسمتى على وش واحد مكتئبه البسمه اشكرك
اتمسى بالخير

تجربه المحب said...
This comment has been removed by the author.
على باب الله said...

الحمد لله أن طهقان أفندي مش زملكاوي

رينـــــــــــا said...

هههههههههههههههههههه
دا حال كل الرجاله والله يابنتى
انا مش بيفرسنى كل اللى قلتى
انا بيفرسنى فيهم بئا اكتر انهم يتفرجوا على التحليل قبل الماااتش
والتحليل بعد المااااااتش
طب ما انت خلاص اتفرجت
لازم يعنى التعلق والتحليل والتفحيص والتمحيص دا !!!

على رأيك حاجة تتطهق

هديـــل الـروح said...

ما شاء الله دمك خفيف جدا وروحك مرحه ولطيفه بارك الله لك فى زرجك وأطفالك وأزال عنكم ذلك الملل وأنعم عليكم بالهدوء والسكينه ان شاء الله

koukawy said...

علي فكره الكلام ده انا بسمعه فعلا من ناس محيطين بينا كتير ...جوز خالتي كان بيعمل فيهم كده بالظبط
رجاله هايفه انه ينكد علي مراته عشان ماتش ايه الهبل ده
الحمدللهههههه انا جوزي مش بيحب الكوره اوي يعني تفاريح