فلفل شطة

لاحظت الفترة الأخيرة على طهقان انه بقى قليل الكلام قليل الأكل كثير النوم ، و بما إني قارئة في مجال الطب النفسي ،خفت يكون عنده اكتئاب ، يا نهار ابيض في واحد متجوز ست فيري انترستنج زيي و يجيله اكتئاب !!!دي حتى تبقى عيبة في حقي.
فقرت إني أخرجه من الحالة دي بعون الله...
طهقانة: ايه رأيك يا طوطو.. ما تيجي ننزل نتمشى شوية حولين سور الحديقة الدولية؟ رياضة يعني
طهقان: (هز رأسه رافضا) توء
طهقانة: طيب تعالى نروح المول اللي جنبنا نتفرج على المحلات و أعزمك على اتنين كابتشينو على حسابك؟؟
طهقان: (يتململ في جلسته) لأ

طهقانة: شفت مدام هدى جارتنا اشترت بغبغان إنما سكر خالص ، من النوع اللي بيتكلم ،بس يا حرام أول ما جابته ماكنش راضي يتكلم
بقت تحط له فلفل حراق ،و من ساعتها مبطلش كلام هاهاها
طهقان: (أخد نفس عميق و زفير قوي) اه
طهقانة: القطة بتاعة مدام ماجدة كانت حامل و خلفت خمس قطط و... و...
طهقان: (بصوت مرتفع) إفصلي بقى يا شيخة... دي التلاجة بتفصل!0
طهقانة: الله... حمدلة على السلامة ايوة كده صوتك وحشني يا طوطو.. ده أنا كنت خايفة تكون بلعت لسانك و مكسوف تقولي ،بمناسبة التلاجة.. سهام صاحبتي اشترت تلاجة ا ل - جي أربعة و عشرين قدم من السوق الحرة و دفعت بالدولار تصور!!0
قام طهقان و سابني قاعدة و اتجه إلى غرفة النوم ، و أنا وراه ...اسيبه يعني و لا اية؟
طهقانة: انت حتنام تاني و لا اية؟ ما تيجي اشغلك الفيلم اللي بتحبه فيديو و .. و...
طهقان: يا طه طه ارحميني بقى ..أنت عاملة زي مكنة الفيشار بس انتي مكنة كلام !!!اسكتي شوية ..أقولك؟..روحي نامي
و قفل باب الغرفة و قال من ورا الباب
طهقان: انا حنام محدش يصحيني

طيب أنا زعلانة بقى و مقموصة كمان ، ده جزائي اني عايزة أخرجه من دور الاكتئاب اللي عنده
و فكرت شوية.. لاقيت ان نصف الأزواج بيجيلهم الدور ده في مرحلة من مراحل الزواج ، و بنسميها إحنا دكاترة الجواز بالـ ( سكتة الزوجية)0

طيب دي علاجها اية ؟؟
همممم
فكرة كويسة....
سبت طهقان ينام و دخلت المطبخ عملت الغدا ، صينية خضار تورلي عجب و للي ميعرفش التورلي هو الخضار المشكل.
وعملت رز بالشعرية و شوربة و وضبت السفرة و دخلت صحيت سي طوطو يتغدى
قعد مكشر على السفرة ،و قبل ما نبدأ الأكل اتصل بيه صلاح صاحبه
طهقان: انفرجت أساريره (محدش يسئل اساريره دي فين) الو ...هاهاها أهلا أهلا ...آه كنت نايم شوية...يا راجل ..إمتى؟؟...طيب.. نتقابل و نشوف الماتش سوا بقى..... هاهاهاها ... اه و....و ...
شاهدين يا ناس الراجل بيتكلم بربند مع أصحابه و بيضحك و صوته جايب آخر الشارع و مع مراته حبيبته.. النسمة.. الوديعة اللي هي أنا عامل فيها جهاز تلغراف و بيرد بالمختصر اللي مش مفيد كمان
طيب لما نشوف أخرتها
خلص التليفون و بدا طهقان الأكل، و يادوب حط أول معلقة تورلي في بقه و بصيت لقيته عرق و مناخيره ساحت
طهقانة: مالك يا طوطو؟
طهقان: ايه ده الأكل حامي كده ليه؟؟
طهقانة: بجد؟؟ أصلي حطيت قرن فلفل حراق في التورلي
طهقان : (أخد الملعقة التانية) لا لا... ده حراق قوي!!0
طهقانة: كويس انا سمعت إن الفلفل الحامي بيموت الميكروبات
طهقان:( أخد المعلقة التالتة) أنتي متأكده انه قرن فلفل واحد؟؟ ده تقريبا نص كيلو فلفل شطة !!0
طهقانة: طيب كل بالهنا و الشفا

و نجحت خطة مدام هدى مع البغبغان ..الفلفل الحراق جاب نتيجة هايلة، طهقان طول الوقت عمال يتكلم من ساعة ما أكل صينية التورلي ، و مش بس كده و رايح جاي على الحمام ، و معرفش ينزل يشوف الماتش مع صاحبه صلاح و بكده ضربت عصفورين بحجر واحد
نياهاهاي (ضحكة شريرة)0

اعمل اية بس ؟! ما أنا خلاص طهقت من طهقان و عمايله و صمته الرهيب اللي غلب صمت أبو الهول و كان لابد من حل لوزعي لزحلقة الكلام من بقه
و لا إية؟

اوروفوار

إمضاء طهقانة

74 comments

Posted by bastokka طهقانة at 8:51 PM

شقة مفروسة

انا مابقتش فاهمة الراجل دي بيفكر ازاي!!! غلبني و زهقني و طهقني فيري ماتش و جابلي بقابيش في دماغي. اجيله من هنا يجيلي من هناك على رأي الست بوسي سمير .
اتزوق يقولي :مبحبش البهرجة هو احنا رايحين فرح.
اتكلفت يقولي: فكيها شوية هو أنا متجوز غفير!0
لو نمت بدري يقولي: هو أنا كل يوم أسهر اكلم نفسي!!0
و لو سهرت يقولي :انت كل يوم صباحي كده؟؟
مفيش حاجة نافعة معاه ابدا
اقربها الخميس اللي فات قعد يشد في شعره و يضرب دماغه في الحيطة ليه و ليه قولتله: ياطوطو انا شيفاك زهقان و طهقان. إية رأيك نودي العيال عند ماما و تأجرلي شقة مفروشة ؟
طهقان: اية!!! ليه؟
طهقانة: علشان نقضي فيها السهرة، أنا بشوف كده في الأفلام الراجل بيأجر شقة مفروشة لحبيبته و يسهروا فيها
طهقان: ( وش بلاستيك)طيب دي حبيبته.. أنتي مراتي
طهقانة:(بدلال) يا سلام ليه بقى هو أنا مش حبيبتك
طهقان: لا ...يعني اقصد.. انه بيأخد حبيبته بعيد عن عنين و مناخير و ضوافر مراته و يأجر لها مُكنة و كده
طهقانة: مُكنة يعني اية يا طوطو؟
طهقان: يعني حتة يتكنوا فيها
طهقانة: طيب ما تأجرلي مكنة يا طوطو
طهقان: يا ستي ما احنا متنيلين مكنونين في شقتنا اهو
طهقانة: ايوة يا طوطو بس احساس تاني لما نغير جو و نأجر شقة مفروشة و نعمل جو رومانسي كده
طهقان: هي تكلفة على الفاضي و لا اية؟!!0
طهقانة: يا سلام يعني لو ليك صاحبة- اللهي لا توعى ولا تقدر - مش كنت حتدفع دم قلبك و تتحايل عليها علشان تأخدها ليلة في شقة مفروشة!!0
طهقان:اعقلي يا طهطه أنا برضه وش ذلك!؟
طهقانة : طيب بلاش ..خدني المقطم و نركن في حتة ضلمة و نقعد نحكي شوية
طهقان: و اشمعني المقطم يعني ؟؟؟ما احنا نأخد العيال و نروح النادي
طهقانة: عيال اية!! أنا و أنت بس نطلع المقطم و نشوف بوليس الآداب حيجي يمسكنا و لا لأ...
طهقان: اية؟؟؟ بوليس اية يا ولية !!! انت مخك ضرب
طهقانة : ( بكل حماس) ايوة يا ابني.. سسبنس ..نعمل في البوليس مقلب و لما يجي يمسكنا نقوله لا لا لاااااا.. احنا متجوزيــــــن و توريله شهادة القرعة اقصد الرقم القومي و اسمي منور فيه قوم يتكبس و نبقى عملنا حاجة اوريجينال و كده
طهقان: (فتح بقه و ودانه سخنت ) انت اكيد جرى لمخك حاجة عايزة البوليس يمسكني و أنا راكن في المقطم ؟؟!!
طهقانة: (عنيا بتلمع)و يا سلام بقى لو تكون سايب الرقم القومي في البيت و نبات لنا يومين في التخشيبة تبقى تجربة عجب وااااااو و يمكن ربنا يكرم و يتعمل لنا محضر آداب و يبقى سوفينير محصلتش
طهقان: قومي من وشي يا طهقانة قبل ما ارتكب جريمة.
طهقانة: ليه يا طوطو!! مالك بتشد في شعرك ليه؟؟
الله... و كمان بتضرب دماغك في الحيطة؟؟!!! لااااااه و بتقطع في هدومك لا يا طوطو لا
انت بقيت تطهق خالص..
اوروفوار

امضاء طهقانة

39 comments

Posted by bastokka طهقانة at 1:36 AM

ارجوك اعطني هذا الريموت

خبر في جريدة ((طهقانة اليوم))0

((لقد أثبتت التكنولوجيا الحديثة أن ريموت كونترول التليفزيون هو عامود الرجل الفقري في المنزل. ليس هذا و حسب بل انه يعد جزء لا يتجزأ من كرامته و رجولته و كبريائه))0
فعلا صحيح ..الراجل من دول يدخل البيت يدور على الريموت، و اول ما يمسكه في ايده يحس انه امتلك زمام الأمر في البيت ،و تبان على وشة علامات السعادة، و تلمع عنيه برغبات التملك، و يشعر ان ضغطة واحدة من أصابعه الفريدة بتغير قناة- تقوليش قناة السويس يا خي- مما يقلل من إحساس الضغط النفسي عليه

بصراحة هو معذور ضغوط الحياة و مشاكل الشغل بتخللي الراجل حاسس انه قليل الحيلة و انه بيلف في المفرمة مستني السكينة تفتفته. و لما بيفرد قدام التليفزيون بيحس انه بقى مالك زمامه و ده بيعوض الإحساس بقلة الحيلة طول النهار.
و بعد ما تأكدت بنفسي من صحة النظرية دي ،و بإن طوطو مبيحسش بارتياح إلا و هو ماسك الريموت، و يقعد يقلب الستميت قناة في حركة هستيرية ،و هو مش راضي يرسى على قناة علشان ميفقدش متعة الضغط على الريموت و التغيير
قعدت افكر يا ترى هوبيعمل كده ليه؟؟؟
يمكن عنده رغبة دفينة في التغيير و اكمنه مش قادر يغير حياته بيغير قنوات التليفزيون؟؟؟
و لا يكون نفسه يسيطر على ما حوله و مش قادر قوم بيطلع ده في سيطرته على ما يشاهد و يسمع بل و ما يشاهد و يسمع الآخرون
و لا يكون و هو بيغير القنوات بيفكر في مشاكل و بلاوي الشغل و مش مركز مع التليفزيون اصلا و بحركة تلقائية بيدوس على زرار التغيير
تفتكروا ليه بشوف في عنيه متعة السيطرة و هو ماسك الريموت؟؟ ده حتى لما بيقوم يروح الحمام بياخد الريموت في جيبه يظهر بيخاف اخده و هو هناك و اقلب في القنوات و لا حاجة

المهم انتم عارفين أنا بحب اعاكسه و اطهقه فعملت اية بقى؟....!....0
استغليت فرصة اني في العتبة و اشتريت ريموت كونترول للتليفزيون من النوع الصيني اللي بيتباع على الرصيف ده و خبيته تحت شلتة الكرسي.
استنيت لما طهقان اخد مركزه قدام التليفزيون و طلع الريموت من جيبه و بدا رحلة التقليب و وقف عند فيلم أجنبي، و راح قاعد يقرا الجرنال !!0
رحت مطلعة الريموت من تحت الشلتة و مغيرة و جايبة محطة عربية و لا كأني عملت حاجة.
انتبه و بص باستغراب للريموت في ايده، و راح مقلب تاني و جاب النشرة و رجع يقرا الجرنال برضه .
رحت مغيرة و جايبة قناة اغاني
راح هازز الريموت في ايدة و قعد يخبطه و غير تاني جاب ماتش كورة
و قعدت كده بتاع نص ساعة كل ما يجيب قناة و يرجع لقراءة الجرنال اغير انا و اجيب حاجة تانية
بصراحة بيقى شكله عسول خالص و هو متعصب و ودانه حمرا و الدخان بيطلع من مخانيره هاهاهاهاها
لحد ما وقف و قال: لااااه ...اية اللي بيحصل ده الريموت ده بينط لوحده و لا اية؟!0
طهقانة: (ببراءة) مالك يا طوطو؟ مش انت بتقرا الجرنال؟ سيبني بقى اشوف اللي انا عايزاه
طهقان: و انت بتغيري ازاي؟؟
طهقانة : بقلبي يا حبيبي.. انت عارف قلب المؤمن ريموته .
طهقان: لا بجد قولي ازاي بتغيري و الريموت في ايدي؟!
طهقانة: معايا واحد استبن اشتريته من العتبة النهاردة هيهيهيهي

طهقان : كده طيب صبرك عليا..... و طلع يجري ورايا بالجرنال بعد ما برمه و قعد يضربني بصفحة الحوادث ..و يقولي: جننتي اهلي و انا اقول الريموت في عفريت و لا ايه!! انت عايزة تفرسيني؟؟؟
طهقانة: ( و انا بجري) لا يا طوطو عايزة اطهقك بس هاهاهاها
رغم انها كانت علقة حلوة.. بس تأكدت وقتها ان الراجل لا يتقبل أن يدوس احد على طرف ....ريموته في البيت
و انه مستعد التليفزيون يتسرق بس الريموت لااا و الف لا

امضاء طهقانة

33 comments

Posted by bastokka طهقانة at 12:54 PM