ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

النظارة السوداء و البتاع الاسود



الراجل طهقان ده طهقني خالص و مبقتش قادرة استحمله اكتر من كده و يظهر اني حضطر استخدم الساطور بتاعي في تقسيم البادي بتاعه و توزيعه على محافظات الجمهورية ليكون عبرة لامثاله من الطهقانين
من ساعة ما الشقة اللي في العمارة اللي قدام عمارتنا ما سكنت و هو معسكر في البلاكونة و شوية شوية يبني كشك سجاير و يسترزق منه بالمرة

اصل انتم متعرفوش الشقة سكنتها ست غندورة اربعينية و ده نسبة الى انها عندها اربعين سنة مش انها ام اربعة و اربعين بس ست من اللي بيترسموا على علب الصابون اللي هي يعني صحتها مسعداها و عندها الرئتين مليانين هوا نقي مش عادم سيارات و ميكروباصات زي حالتنا و بتتعامل مع كوافيرهرجي بريمو تشطيبه نضيف سوبر لوكس
لا و الاكادة انها على طول حرانة ،طراوة مش طراوة هي لابسة بتاع كده قصير اسود بحمالات و دايرة بيه في الشقة و مفتحة الشبابيك و لافة شعرها بالبكر تونتي فور اورز و عمكم طهقان مركب في عنيه تيليسكوب مش علشان يشوف هلال رمضان -كل سنة و انتم طيبين -لا بس علشان يحدد مقاس الشقة بالسنتيمتر المكعب
و علشان يسبك الدور اشترى نضارة شمس سودا علشان معرفش عنيه بتبص فين و مجلة نص الدنيا و قاعد في البلاكونة قال اية بيقرا ،سبع ايام بيقرا نفس المجلة باين حيمتحن فيها
طهقانة: ادخل من البلاكونة يا طوطو شمس عليك
طهقان: هه..لا اصل انا بتشمس
و بالليل
ادخل من البلاكونة يا طوطو برد عليك
طهقان : لا اصل انا بتهوا
و مش قادرة اقوله انت قاعد تبص على الست جارتنا دي لحسن يعملي فيها يوسف وهبي في فيلم اعترفات زوج و يقولي كده تشكي فيا يا نظنظ
و قاعدة بقرقش على سناني مستنياه يقع في غلطة و اهو حصل
الاسبوع اللي فات قلتله
طهقانة: مش حتيجي معانا النادي علشان تمرين الاولاد يا طوطو؟
طهقان: لا انا حقعد اتفرج على الماتش
طهقانة : براحتك يا روحي
و شوية و بصيت لقيته بيلبس و خارج
طهقانة: الله.. مش انت قلت مش خارج؟
طهقان: لا اصل افتكرت ان الحلاق حيمشي اقصد حيقفل اقصد حيبقى فاضي ساعة الماتش و اهي فرصة احلق
طهقانة: طيب(الله يطولك يا روح)0
و طلعت ابص عليه من البلاكونة لقيته فتح كبوت العربية و واقف يبص على العفشة تقريبا وحشته قال يطل عليها
الغريبة لا بيغير زيت و لا بيزود مية امال اية !!اه ده مشبه عليا العنكبوت اللي بيفرش شبكته علشان يصطاد الدبانة
شوية و لقيت الست الغندورة جارتنا نازلة تتمخطر ببتاع كده لابساه بلبيسة او يمكن دهنت جتتها زيت تموين علشان تعرف تدخل جواه و حاطة احمر و اخضر و حمصي و اللي فرحني اني اخيرا شفت شعرها من غير بكر، و ندهت على السايس جاب لها العربية و عمكم طهقان واقف يرمقها بنظرات حالمة تميل الى الكوابيس و ملزق حواجبة بالسوليتيب لفوق اصله خايف ليربش و يضيع عليه ثانية من المشهد و فاتح بقة خمسة و اربعين درجة و امطار من العرق بتنهمر على سحنته باين من هبو الصدمة

اعمل اية يا ربي ارمي روحي عليه من البلاكونة اجيب اجله بس الخوف اني اتعور، طيب ارمي عليه انبوبة غاز خسارة دي بالشئ الفلاني ده غير اني مركبة غاز طبيعي و معنديش انابيب ابقوا فكروني اوصي حد نازل من العرلق يجيبلي معاه سيارة مفخخة تنفع في يوم زي ده
المهم الست طلعت بالعربية و سي طوطو وراها
حيطلعلي واحد من الجماهير يقولي ان بعض الظن اثم مش يمكن الراجل رايح يحلق فعلا و الست نزلت صدفة
حقوله سيادتك لو سمحت اقعد لنا على جنب علشان سي طوطو رجع بعد نص ساعة من غير حلاقة و لا غيره قال ايه ميمي الحلاق زحمة و قال يروحله بعدين ما احنا مش حنخلص كل نص ساعة ينط في الشارع على حس الحلاقة مش كان يبقى اقرع و يريحني
و دي ميزة الراجل الاقرع للستات اللي مبتقدرش الصلع لا يقولك رايح احلق و لا اصبغ و لا افرق هو الفرق عنده رباني
المهم الست الغندورة جارتنا زودتها قوي و كل يوم البتاع ابو حمالات يقصر عن اليوم اللي قبله مش فاهمة بيكش في الغسيل و لا هي اللي بتطول حاجة تطهق بصحيح
و عملت خطة محكمة و لمحتها بتجهز نفسها تنزل قمت نطيت نزلت الشارع قبلها و قعدت اتكلم مع البواب في اي كلام لحد ما نزلت
اخدتها في اهلا وسهلا و العمارة نورت و اموة اموة و..
طهقانة: ان شاء الله تكوني مبسوطة في الشقة الجديدة
الغندورة: اه جميلة جدا
طهقانة: بس انا ملاحظة انها قبلي و يظهر حر حبتين ده انت يا حرام مش طايقة هدومك و طول النهار لابسة اسمه ايه ده ...هي هي هيء مش خايفة يا حبيبتي يجيلك برد في سلسلة ضهرك و لا انت مركبة سلسلة ابلاتين هاهاها انا بس خايفة عليكي لحسن بعدين يجيلك روماتيزم في ركبك و لا التهاب رئوي في صدرك و لا....0
الغندورة: فرصة سعيدة خالص باي(وشها احمر و اتكسفت طلع عندها شوية دم)0

يومين اتنين يا اخوانا و كان الجنود البواسل لشركة قبنوري النوري كونوري بيركبوا التند على الشبابيك بتاعتها و لا خط برليف قطعت عن سي طوطو مية و نور و حرمته من لذة العبور و رجع تاني يقعد في الليفنج و اعتزل قاعدة البلاكونة

طهقانة: الشمس حلوة برة يا طوطو ما تطلع تتشمس
طهقان: لا ما خلاص
طهقانة: خلاص اية؟
طهقان: اصل الشمس غابت اقصد بقت حامية
و بالليل
طهقانة: الجو حلو برة.. ما تتطلع تتهوا
طهقان: مش عايز اتهوا و لا اتنيل سيبيني في حالي

شاهدين عليه يا اخوانا طهقني موت مش عارفة اعمل معاه اية




امضاء


طهقانة

53 comments:

3abdo me7tas said...

ههههههههههههههه
إن بعض الظن إثم
سيبى الراجل يغير بقى
:P

طهقان said...
This comment has been removed by a blog administrator.
عصفور المدينة said...

ربنا يهديك يا طهقان
ويبلغنا وإياك رمضان
والحمد لله إن التند ركبت بدري بس مش عارف حتشوف الهلال ازاي

اسكندراني اوي said...

لا لا لا
دا انتي كده بتتصيديله الاخطاء بقى
مش تحسني الظن ببعلك كده وتروقي
يلا الحمد لله ان الشمس راحت
ههههههههههههههههههههه

أشرف حمدي said...

حرام عليكي يا طهقانة والله
مش بدل ما يغلط بجد والعياذو بالله
ما تسيبي الراجل يفرفش شوية وأهي تفاريح لا راحت ولا جد

بس انا ماكنتش أعرف ان الستات في الأربعين بيكونوا جامدين كده !!!
الشعب المصري في تقدم .. وصحته في الطالع

الا صحيح هي العمارة اللي ساكنة فيها الغندورة عنوانها ايه ؟

يا مراكبي said...

الستات اللي في سن اليأس ده بيكونوا حكاية فعلا .. كده أنا تأكدت إن طهقان ده أخويا بصحيح

هههههههههه

وبمناسبة قرب إستطلاع هلال رمضان .. ممكن بس العنوان علشان آجي عندكم أستطلع القمر الأوروبي ده؟

سجدة said...

عليكى خطط تحفة
تصورى انا قلت هتقولها الشقة دى اصلا مسكونة
واتقتل فيها واحد وبيحصل فيها حاجات غريبة
بس خطتك طلعت جامدة جدا

Pink Unicorn said...

برافو عليكى
ادى الستات الحازمة وللا بلاش ...
واصلى الجهاد يا طهقانة وربنا يعينك و يعيننا على عنيهم الزايغة ...

غمض عينيك said...

كده بردو ياطهقانه
كنتي ادي الراجل فرصة
مومتاخفيش لا كان هيعبر ولا بتاع
كان هيقضيها استطلاع

:):)

فى القلب said...

واللهى يا بنتى أنتى نفسك طويل
ده لو كان المحروس تبعى عمل كده
من أول مره كنت اتسرفت بالستور

عاشقة الوطن said...

السلام عليكم

ازيك ياطهقانة
ايه الحل العبقري ده عرفتى تنقذى الموقف بكلمتين
شاطرة ياطهقانة
وبعدين الرجالة عاوزين اللى يوقف لهم أول بأول ويعرفهم ان الله حق

وربنا يهدي الست الغندورة

وربنا يهديك ياطوطو

وربنا معاكى ياطهقانة ياحبيبتى

نسرين - أمة الله said...

السلام عليكم
والله الرجاله دى الواحد مش عارف يعمل معاهم ايه
دايما اللى بره عاجبهم اكتر من اللى جوه
طيب ما تقفلى البلكونه انتى احسن

Ma 3lina said...

ههههههههههههههههههههه


يا عينى عليكى يا طهقة معلش يا اوختى بس برده كان لازم زى مهيا مقصرة الفستان الاسود انتى قصرى برده ضاربة احمر انتى برده اى حاجة كده ان شاء اللله تضربى عصير فى الخلاط

بس طلعتى شخصية و الست خافت منك برافو عليكى

Mohammed Fouly said...

الغندورة اللى ساكنة فى الشقة جديد بالتأكيد محتاجة كهربائى أو سباك أو نجار أو أى حاجة ياريت لو تدولها عنوانى و انا أعملها اللى هي عايزاه ان شالله اشيل لها ميدالية المفاتيح وبالمرة اونسها فى وحدتها و اهو كله بثوابه و احنا بنحب نعمل الخير

عروس البحر said...

الله علي البوست ده يموت من الضحك بس ايه الغندورة دي شكلها مكس من هيفا و رولا سعد و نانسي عجرم

Desert cat said...

ليه كدا بس يا حبيبتى تقطعى على طهقان وتحرميه من قراية المجلة 24 ساعه فى اليوم
بس ما اشاء الله دماغك طلعت عاليه والخطط بتنجح
خدى بالك من طهقن بقا
اورفوار

أسامه يوسف said...

لالالالا
حرام عليكى الراجل يا طهقانه
الراجل نيته خير
وارجعى لموضوع هتجوز اللى فى البلوج بتاعه
نيته خير بإذن الله وعلى سنة الله ورسوله

وبعدين انت ما قريتيتش بيت الشعر اللى بيقول

إذا الشعب يوماً أراد الحياه
فلا بد أن نزيل التند

ألا صحيح الست ما قالتلكيش حاجه بعدها

الطائر الحزين said...

انتى مفكرة انها عملت التند علشان طهقان ما يبصش عليها

خايبة وخيبتك قوية كمان دى لعبه مدبرينها علشان يعموا عنيكى و تبقى انتى فى التوهان

انا بهدى النفوس بس معلهش يا طهقان يا اخويا كشفت لعبتك

خلى بالك من رمضان يا طهقان

تحياتى

بنت القمر said...

يا قلبك يا اعصابك كان ممكن ترد عليكى رد بااااايخ وتحرجك مش كل الطير...انا رايي كان لازم تفكري قبل ما تكلميها
وعموما رجاله ما يملاش عينها الا....ولابلاش

aya said...

ههههههههههههههه
يا عينى عليكى يا طهقانة
لا المرة دى ليكى حق
هو غلطان
بس برافو عليكى اللى انتى عملتيه
هو ده الشغل بتاع المصريات ولا بلاش

Unknown said...

والله يا طهقانة
مش عارفة اقولك اية بس حلو انك احرجتيها
اقولك متجربى كدة تعملى زيها وتحطة شوية حمصى يمكن طهقان يفرح بيكى

мσнη∂ιš said...

يـــــــا دي الكسوف، جوزك يا طهآنة عايز قطم رقبته، أنا لو منك أبلط البيت كله و مخليش فتحة وحدة من غير الباب بس

He and She said...

Hi
By the way. This is my first time to enjoy being in your funny blog.
I am sorry I dont have an arabic keyboard.
commenting on your post. You behave like all wives, taking care of the kids and forget the needs of the husband and when your husband meet a woman who cares for herself and appeal to him you blame him
ma te3meli zayaha lamma gozek bey7eb keda, howa 3eeb? ento la ter7amo wala tesebo 7amet rabbena tenzel. ente metgawwiza kol el seneen de wa lessa mosh 3arfa ta2theer el 7agat de 3ala el ragel aih? la elaha ella Allah

شذى مولوتوف said...

والله العظيم انتو جوز اجواز عسل
هههههههههههههه
ماشاء الله على التفاهم
ههههههههه
والله بجد لازم يقدمولك جايزة
ايوة كده خلي عينيكى مفتحة


انا مش عارفة انتى هاتلاحقى على العيال ولا ابوهم؟؟
هههههههههههههه

دى اول مرة ادخل فيها مدونتك بس ان شاء الله مش اخر مرة

ربنا يهدي سركو

محمود على said...


هههههههههههههههههههههههههه

استعملي الساطور
احسن
او حطيله مزيل شعر في الشامبو وريحي دماغك

ضـوء الـقـمر said...

هههههههههههههههههههههه
عارفه انا كل مرة اجي هنا اقرا البوست وامشي من البلوج من غير ما اعلق عشان بجد مش بلاقي كلام اقوله بعد كل الضحك اللي بدحكه
احمدي ربنا انها طلعت بتتكسف وقفلت مية ونور وهوا
تحياتي يا طهقانه

نانو said...

والله برافو عليكى يا طهقانة فكرة بنت لذينا متجيش على بال حد بس برضه لو هى مكنتش بتتكسف كانت ممكن ولا تهتم وتزود الموضوع وتغير من الأسود للأحمر للبمبى المسخسخ وكان سي طهقان زمانه ممتع عينيه ونازل قرايه قى المجلة

البدراوى said...

ياعينى عليك يا طهقان يا اخويا
دايما مظلوم مع الست المفترية دى

محمد عبد الغفار said...

ابدعتى

بس ليه متجربيش البتاع الأسود اللى بيكش

محمد عبد الغفار said...
This comment has been removed by the author.
القلم السكندري said...
This comment has been removed by the author.
LOJAIN said...

ايه يختى اللى داخل على الرجالة بص بره بالشكل ده
مصيبةايه اللى احنا فيها دى يخواتى

اللى يفقع انه بيحسسونى انه دى حاجة استيراد المريخ ولا حاجة مفيش منها
امه واخته و مراته مش نفس النوع
والاغرب بيبقوا واله العظيم فى اغلب الحلات قرود و متايفة
والموضوع مش اكتر من شوية نكشه شعر على الوان مية .. وعلى راى الولية بتاع ريا و سكينة
علبة بويا من واحد نقاش و اعمل فوشة كده و فوسة كده

على يدى يا طهقان
رينشارد جير ,, اخته الكبيرة كانت عايزاها و هى على نغمة واحدة مخدوش يابابا مخدوش يابابا

سابت ريتشارد جير و اختارتك انت
لولا انه يمهل ولا يهمل لكنت وصيتك وصية مثبت فعاليتها فى تربية الازواج

ربنا معاكى
Regards:
Lojain :)

طهقان said...
This comment has been removed by a blog administrator.
Anima said...

و الله ووقعت يا واد يا طهقان

يا حلاوة يا ولاد قطعوا عنه النور يا حرام

ما تجيبي لو هيفا وهبي يا طهقانة يمكن يشبع الحرمان العاطفي اللي عنده المسكين

ههههههههههههه

Unknown said...

هههههههههه
الله عليكى يا طهقانه
هى دى الستات الواعيه ولا بلاش انتفى شعره قصدى ريشه قبل ما يبص بره
وعلى رايى المثل
اصبر على الجار السو يا يرحل يا تجيله مصيبه تاخده

طهقان said...
This comment has been removed by a blog administrator.
القلم السكندري said...

بصراحة موقف تحسد عليه

اللي بيعملوه ده ارهاب فكري وعاطفي

ومينفعش معاهم غير هيئة مكافحة الارهاب النسائي

مشروع قديم ليا

بس للاسف محتاج شوية تضافر جهود برده

ودولة الظلم ساعة

القلم السكندري said...

anti_woman

http://www.kg80.com/vb/showthread.php?t=1613

Layla said...

يا سلام عليكي يا طهقانة...دائما كدة ظالمة طهقان

الراجل كان بيقعد في البلكونة عشان يقدر النعمة اللي معاه في البيت...بيشوف الوحش عشان يعرف قيمة الجميل اللي قاعد جنبه

وكل ما يبصلها اكتر..كل ما محبتك تزيد في قلبه اكتر

هههههههه

موضوع جميل كالعادة...تحياتي

Unknown said...

طيب معلش يا طهقان
اصبرى عليه شويه برضه يا طهقانه
انتى عارفه احسن حاجه تعمليها
زى ما الست دى لبست اسود
اغريه انتى يا ريا

. said...

طهقانة
كرهتيني غالجواز من اساسو مش عاجبو القمر الي قاعد معاه وبيبص لمو اربعة واربعين دي
الرجالة دووول ....ما علينا
تحياتي

Unknown said...

يانهاااااااااار

هما عايزينى اتجوز عشان اهنيه وابسطه واخد بالى منه ومن اكله ومن عياله وفى الاااااااااااااخر يبصلى براااااااااا

لامومكن ابداااااااا

عارفة كل ده حصل ليه؟؟
عشان شايلة الساطور من المطبخ وحطاه هنا فى المدونة هو بقا نسى الساطور وهاص بقا

الساطور والاكياس بتوع زمان يا طهقانة فكراهم؟؟؟

يلا إلى الأمام وكل بنات حوا بتشجعك

جو جو جو

وابقى طمنينا على الأكياس

:D:D:D

FOrty said...

يعنى نكدتى على الراجل و حرمتيه من شويه بص كان بيفك بيهم عن نفسه فقط لا غير هى دى المشكله الحصار اللى بتعمله الست على جوزها و لا الحصار الاقتصادى بتاع امريكا على العراق سابقا
يا جماعه شويت نفس هواء بدل الراجل ما يتخنق و يفطس فى ايدك طب حتعملى ايه فى القنوات الفضائيه و التليفزيون اهى مليانه اكتر من جارتك و البركه فى هيفاء و نانسى ولا انتى مخبيه الريموت و ظابطه التليفزيون على قناة الجزيره

Unknown said...

معلش ياطهقانة هتعملي ايه نصيبك بقي
:))

لكن أنتي تمام كدة بتعرفي تتصرفي ومابتديلوش فرصة

ربنا يهديهولك ان شاء الله

sa7arkash said...

شوفى يا ستى
يا مآمنة للرجال يا مآمنة للمية فى الغربال

وشوفى طيرك قبل ما يلوف على غيرك

وبرة وجوة فرشت لك وانت مايل واية يعدلك

والسلام عليكم ورحمة الله وبركاتة

ده واجب صغنن مع طهقان

KIMOOOZ said...

انتو الاتنين عجبتونى طحن
فعلا لسانى واقف مش عارف اقولكوا ايه
ما شاء الله
عندكوا روح عاليه اوى بينكم
ربنا يكرمكم

بجد هيبقى شرف كبير ليا لو دخلتوا مدونتى المتواضعه
و يا سلام لو لقيت تعليق منكم
هيبقى شىء جميل جدا
بجد حبيتكوا اوى

FATMA said...

يا قادرة

Echo Of Silence said...

دة كان تعليقى على تعليقك عندى فى المدونة
وانا اسف انى بنسخهولك هنا - بس كان لازم - وهاتعرفى لية لما تسمعى الكلام وتزوى البوست الاول او البروفيل
التعليق هو


ست الكل - طهقانة
قبل ما اقول اى كلمة- ليا عندك طلب - افتحي اول بوست فى المدونة - وشوفى رايك اية ؟
ولا بلاش دى - افتحى البروفيل بتاعى وقولى رايك - لان كدة مش حلو خالص

شوفى بقى وانا اخوكي - على راى السعوديين
بالنسبة لاحلامك ان يكون عندنا هيئة فى مصر - دة مش اسمة حلم - دة يبقى كابوس - صدقينى
ممكن نقول ياريت يبقى عندنا توعية بشكل جديد - انما تحكمى بشر على بشر وتقوليلي بيطبقوا الشريعة - لا - معلش بقى - مش معاكي خالص
مش ناقصة كبت حريات هى
وفكرى تانى فى البوست او شوفى البوست اللى جاى - وبعديها قررى - نفسك فى هيئة ولا ما نفسكيش
اورررفوااار
وكل سنة وانت طيبة

Soooo said...

علمك علمك علمك
مش انا شاب اقرع اهه .. لكن باروح للحلاق اكتر من اي حد تاني
اه طبعا .. مش في دقن .. وفي بشره لازم يتعمللها ماسك وبتاع
اي نعم الحاجات دي ولا هتحليني ولا اي هباب .. بس انا حر
وقريب ان شاء الله عهمل كصة حياتي (مزكرات شاب اقرع) .. وستكون كصه رائعه وتحمل بين طيات ملابسها المطاوي والمعاني
وستكون نداء صريح لكل العالم القرع ان يفتخرو بقرعتهم البهية
وستكون تصريح لكل مراكز زرع الشعر ان يرخصو اسعار الزرع ويتجهو الى رش المبيدات والسباخ جيدا قبل الزرع
كما ستكون تمرد على كل محلات بيع الطواقي والكابات والايس كابات والشرابات .. عشان لو في حراميه قرع

وبالنسبه للست جارتكم .. اممكن يعني تقوليلي ايه العلوان وتشوفيلي شقة قصادها .. او تكسبي في ثواب وتجيبيلي رقم المحموم بتاعها ..
لعل وعسى

والسلاموووز ختامووووز

koukawy said...

كويس انها طلعت ست عندها دم
مش من اللي بتحب تتشاف

mostafa rayan said...

طيب ماتلبسي انتبتاع من الأسود اللي كل شوية بيقصردة
واهو بدل مانستورد نستخدم المنتج المحلي

mostafa rayan said...

سوري بس في حاجة عايزاقولهاهوالبوست حلو قوي لكن صورة القرد دي رخمة قوي ياريت لوتشيليها يبقي احسن كتير

chereen said...

حبيبة قلبى طهقانه ممكن اعرض مذكراتك عندى فى المنتدى تحت اسم زوجه طهقانه ارجو الرد
بجد بحس بالمتعه ولنا بقراها