ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

اقراا الحادثة

بعد مكالمة التليفون السودا اقصد الحمرا اللي فاتت لميت هدومي و على بيت ابويا عدل و طبعا لما بابا عرف اللي عايز سي طهقان يعمله قرر يرفع عليه قضية حجر و يطلعله شهادة معاملة اطفال
و بعد هزيمة الأهلى و الاربع شلاليط اللي خدناهم، لقيت يوم الاربع الصبح باب بيت ابويا بيخبط و سي طهقاااااااان لابس احلى قميص و بنطلون بينيتون و معاه بوكيه ورد مستورد من اللي بالشئ الفلاني و على وشه ابتسامة عريضة
و بيقولي: انتي زعلتي يا روحي انا مقدرش على زعلك انتي بس فهمتيني غلط
و قعد يبرر و يشرح موقفه و ان التعبير خانه و حصل سوء التفاهم ده
المهم رغم اني كنت شاكة من بوقين الحنان دول بس قلت يا بت الست مننا ملهاش الا بيتها و لازم ارجع بيتي
و احنا في العربية راجعين بيتنا قالي:عندي ليكي خبر جديد لانج
أنا :خير اية حتعزم الاستاد عندنا على الغدا ،و تبعت دعوة لاسمه اية ده يجي يشجع؟
هو: لا حزري فزري مين جي يقعد عندنا يومين
انا: مين(و بطني كركبت)0
هو:مامااااااا
انا: يانهار اسود اقصد يا خبر .....حماتي؟؟؟؟؟؟
اتاريك يا فرطوس جي تصالحني و ترجعني البيت علشان لما الست الوالدة تيجي تلاقي الأمن مستتب-في سري طبعا-0
هو:ساكتة ليه؟
انا:بلعت ريقي_من الفرحة طبعا جالي ازبهلال
هو:شوفي البيت ناقصه ايه و انا انزل اجيبه بكرة قبل ما اروح اجيبها من على المحطة
انا:طيب

و سرحت بخيالي و كاني وقعت في بير غويـــــــــــــــط و افتكرت اخر مرة جت عندنا و اللي حصل اهيئ اهيئ

حماتي ست كبيرة ربنا يدلها الصحة متعودة تصحى الفجر و متنمش تاني و لا تنيم حد في البيت و طبعا بعد خمستاشر فتح و قفل في باب الاوضة و الحمام انا بقلق و بقوم اشوفها يمكن عايزة تفطر و لا حاجة تقوم هيا مشكورة تدخل ورايا المطبخ و تقعد تسالني عن حاجة حاجة في المطبخ و ده لزمته اية؟ مش مصاريف على الفاضي! و ليه مبتخلليش خيار ؟و لية مش بتنشفي بامية ؟و لازمة الحليب البودرة اية؟ و لية معودة العيال على السندوتشات؟ خليهم يغمسوا افيد! واية لازمة الشغالة؟ده حتى شغل البيت بيجري الدم..و..و مفيش صغيرة و لا كبيرة الا و تدخل فيها و طبعا تمصمص شفايفها امتعاضا و تحصرا علي ابنها و فلوسه اللي بتترمي على الارض و مفيش مانع في السكة كده تفكرني ببنت خالته الست الشملولة اللي بتحشي الزيتون الاخضر جزر مخلل و بتعمل الرز مفلفل و اللي كان نفسها تجوزها لطهقان بس كل شئ قسمة و نصيب بقى


تخلص وصلة حشر المناخير في كل صغيرة و كبيرة تبتدي وصلة العيال..العيال دول مطولين شعرهم كده ليه؟ انت عاملاهم زي البنات!! مش حتخاوويهم بقى؟ انت مش ناوية تلحقي تيجيبي حته عيل كمان قبل ما تكبري؟ و..و..و...............يا دهوتي

اجي على الساعة 11 ابقى زي الفرخة الدايخة عايزة انام الاقيها هي نامت و هي قاعدة تتفرج على التليفزيون بس انا لازم اقوم اتربط في المطبخ و اعمل الغدا علشان النبي حارسه لما يجي يلاقي المحمر و المشمر جاهز و يتفشخر قدام امه بمراته الطباخة الجامعية البريمو
ادخل المطبخ على طراتيف صوابعي الاقيها في قفايا...... ها حتطبخي اية النهاردة؟؟؟...يا مصيبتي
و لما يوصل سبع البرمبة و يقعد معاها يودودوا و ادخل عليهم بصنية الشاي الاقيها سكتت و بطلت كلام كاني دخيلة عليهم و مليش حق اسمع حواراتهم
و يا ويلي لو دخلت انام العصرية بعد مجهود اليوم الطويل اصحى الاقيها ضاربة بوز و تقعد تلقح بالكلام ان نوم العصاري بيوجع الكلاوي و ان كتر النوم بيطخن و انها بتزهق عندنا ماهي قاعدة ياحرام لوحدها و هو يقعد يطبطب عليها و اطلع انا بنت سكستين هوهو....يا حوستي
و حسيت بهزة شديدة فوقتني
اتارية بيفرمل علشان يركن اصل وصلنا البيت
هو:حمدله على السلامة يا روحي
أنا:طهقان
هو :نعم يا حياتي
انا:بصريخ -عايزة ارجع بيت ابوياااااااا عااااااااااااااااااااا عاااااااااااااا عااااااااااااااااااا
---------------------
تحديث
الست الحاجة حماتي شرفتنا و نورتنا و ملت علينا البيت فرح و سرور طبعا حاسين بنبرة مختلفة في صوتي
معلش الجبن سيد الاخلاق
و انا ناصبة اللاب توب في الكوريدور و الست بيني و بنها خطوة و نص لا بتسلم و لا بتبص
و انا من مزنقي هذا احب ان اقول ان حماتي دي
روحي روحي روحي
و اني انام مبكرا لاستيقظ مبكرا و اغسل يدي قبل الاكل و بعده
و اللي مربتوش الايام و الليالي تربيه حماته
اختكم
مزنوقة مؤقتا (طهقانة سابقا)0

82 comments:

Anonymous said...

looooooooool

besar7a el 7amwat 3ala 3eina w rasna.. bas bardo el senn leeh 7okmoh

rabena ye3eenek

FATMA said...

حماتي قنبلة زرية

R.R said...

تعرفى أنا عندى جدتى كده
اما تيجى بردو الفجر تصحى ونفس اللى قولتيه بالظبط هو ده منهج بيتوزع عليهم ولا ايه
بس احنا بصراحه بنقوم معاها بالواجب لحد ما تطفش
قال مره اعترضت على وجود دبانه مسكينه فى اوضتها الى هى اوضتى يعنى وكرشتنى منها

جبتلها بندقية الرش بتاعت اخويا وعاملت نفسى بجرى ورا الدبانه اللى هى جات جنبها
وسمعنا احلى صوييت
وحركات من دى بقى
مش عارفه ليه بطلت تيجى
:)

على فكره انا بحب مدونتك اوى
دمها خفيف
متنسيش تظبطى ولادك على سياسة التطفيش وانتى ولا كانك واخده بالك

انا طبعا بهزر ربنا يخليهالكم
ويجازيكى عنها خير
تحياتى

Ahmed Shokeir said...

:)

really very funny, creative and ironic

Post of the day

Anonymous said...

علي فكره انا اول مره ازورك بس كلامك عاجبني وطلعني شويه من مود الحزن اللي احنا فيه ربنا معاكي

Rivendell** said...

ربنا يعينك يا اوختشيييي


بس جدعة ارجعي بيت الوالد وماتطلعيش منه دلوقتي ابداااا

Incomplete said...

ياعيني يابستوكتي
كلنا لها
معليش ياأوختشي
ربنا يقويكي ويصبرك
هاتي بوسة
اممممممممواه

Layla said...

هههه....معلش..هما الحماوات كلهم كدة

منها لله ماري منيب بقى...هي السبب

Nothing To Lose said...

هههههههههههههههههه
فكرتينى بالحموات الفاتنات

بعيد عن البوست الى يجنن كالعادة

احيكى على اختيار ام كلثوم
بجد رائـــــــعه

الحلم العربي said...

هههههههههههههه
دمك خفيف جدا
أنا مقدرة و الله موضوع الحموات ده . بس حاولى تبصيلها من زاوية انها من جيل تانى غير جيلك و كمان هي دلوقتى فاضية و طبعا الفاضي بيعمل قاضي زي ما انتى عارفة ...
حاولى تبتدي انتى و تشركيها معاكي و خليكى زكية و كمان اسأليها عن رأيها قبل ما هي تقولهولك علشان ما تحسش انك بتخبى عنها حاجة فما تحشرش مناخيرها في كل حاجة..
و عايزة تريحى نفسك حطى نفسك مكانها لو انتى مكانها تحبي مرات ابنك تعاملك ازاي.....
ربنا يعينك و مستنين مغامراتك القادمة

كراكيب عادل said...

وانا بقرا البوست جات في بالي اسئلة كتير

لية حاطة رسمة الساطور في مؤشر الموس بصراحة ؟؟ ناوية علي اية يا مجنونة

ثانيا انتي فعلا لية مش بتخللي خيار
ثالثا فعلا اية لازمة لبن البودرة

بصراحة بصراحة انا اتمني حماتك تعيش معاكي علطول هتظبطلك البيت بجد

علاء عارفين said...

thats truly hilarious :D :D :D

بنت الشاميه said...

ههههههههههه


الموضوع يجنن....والاسلوب ممتع


خل امك تجى تزورك بنفس الوقت .....وشوفى حيصل ايه...... حتبقى مين ماري منيب ؟؟؟؟

ومين ميمى شكيب.......؟؟؟؟؟هههههههههه


الله يكون بعونك...واذا احتجتى اى مساعده....انا واهل الكويت كلهم بخدمتك ........وما تشليش هم

لوووووووووووووووووول

كلبوزة لكن سمباتيك said...

فكرتيني بحماتي الله يرحمها
باين كل الحموات كده
بس معلش اصبري كلها كام سنة و تبقي انت كمان حما
و نقعد على الحيطة و نسمع الزيطة
تحياتي

ody911 said...

هههههههههههههه


أنا واللهى مقدر موقفك

إرجعى أحسن

بس خلى بالك

لما مامتك تيجى هوة بيكون زهقان برضوا



هههههههههههه

هوة كدة كدة لازم حد يزهق


عادى بقة
أودى

Anima said...

الله يعينك يا حبيبتي
اثنين في وقت واحد يا لهوييييييييييي

BackBone said...

و الله انت ست متدلعه

أسوور said...

آه من الحموات ومن عمايلهم
انا حماتى صيدلانية واول مرة جت تزورنى بعد الجواز جابتلى شنطة أدوية هدية

طب والله حصل
تحياتى

BackBone said...

وبعدين يعني اسم الله المامّوا بتاع الأنت بيطحت علي الجرح يطيب

و بعدين ياست البنات والله طالما بتحبيه و هوه بيحبك يبقي تكبري دماغك كده و ياستي مشيها لاجل الورد


و حسنه قليله تمنع بلاوي كتيره






اه خاللي بالك ان زي ماخالتشي كلبوزه بتقلوللك بكره ابنك يتجوز و مراته هتعاملك زي انت ما هتعملي حماتك


فخلي بالك و اعملي لأخرتك علشان ربنا عدل و اللي هتعمليه هيتعمل فيكي


دمك زي العسل

:)

أميرة البلطجية said...

يا عينيييييييييييييييييييييي
بجد والله قلبي معاكي
وبعدين يله كله بثوابه
مش قلتي يومين بس؟؟
بس متريحيهاش اوي لحسن تجدد الاقامة
لا لا حدعيلك
تحياتي
طب اقتراح..متعزمي مامتك عندكو اليومين دول؟؟قالي يعني عشان الاتنين يونسوا بعض
وانا واثقة ان ماتك ان شاء الله حتحميكي
تحياتي

allfollowsome said...

اذا كانت دى حماتك فكان الله فى عونك

متخبلتيش نفسك لما تبقى حماة حتكونى ازاى ؟؟

t3ban said...

حكذا يكون الرجال
السياسة السياسة السياسة

gohayna said...

يسلام لو اجتمعت الحمتين في بيت واحد

تقريبا الحرب العالميه هتقوم

ايه يا بنتي دا

هلكتيني علي نفسي

والظاهر ان دا الي بيحصل في كل البيوت المصريه

تقريبا الحموات اليومين دول نازلين طبعه واحده

نسخ يعني

بس الساطور تحفه سيبك انتي

والصوره تجنن
تسلم ايدك

بعدك على بالى said...

يابسبوسه ياجميلة معلش كبرى الجمجمة على الاخر ، ده انا بقول عليكى بنت ناس وتفهمى فى الاصول... بيت ابنها برضه... يالا معلش عدى ياليلة عدى ياليله .

bastokka طهقانة said...
This comment has been removed by the author.
bastokka طهقانة said...
This comment has been removed by the author.
سكينة said...

فعلا هو فات الميعاد ووصلتي البيت يا بستوكة كان لازم تقولي شروطك قبل ما تنزلي من بيت أبوك فين الحاسسة السادسة أول ماشفتيه متقمع وكمان ورد متستورد
أقول إيه في هيافة وشاعرية النساء
الله المستعان
عموما أنت ميتخفش عليك عاملة احتياطي الساطور دليل على وجودك
أديهم بقى واستغلي الفرصة يصلح كل العطلان في البيت من آخر زيارة للحماة العزيزة
امووووه نورتك
امكسي فيها هيا هتطلع القديم والجديد منه
:)
بس انت طولي بالك شوية وامسكي فيها

LOJAIN said...

ايه يا طاطا هو باك بون ده بيحبك قوى كده ليه؟؟؟
يكونش طهقان راشيه؟؟؟

وبعدين و الله يابنتى كنتى ريحتيلك شوية فى بيت ابوكى دنتى لسة مفوقتيش
ربنا معاكى ياقلبى

مجهول said...

هههههههههههه
ليه بس يا طهقانه
احنا عايزين نهدي النفساويه شويه
استحملي حماتك شويه
اهو يومين وعدوا
بس المشكله لو كررتها تاني
بقول نخلص خالص
ربنا معاكي
ههههههههههه

mohand said...

السلام عليكم
بصراحة الموضوع حكاية
بس يا تري ايه النهاية اصلك سيباها مفتوحة

----------------
يا ريت تيجي مدونة المسابقات وتقوليلنا البوست هتحطية في انهي تصنيف
علي فكره انتي من حقك ترشحي موضوعين انتي عندك مواضيع هايلة
بس من حقك موضوعين بس مش في تصنيف واحد
تحياتي
مهند المصري

shermen said...

أنا أخدتلك بطارك منه روحي شوفي تعليقي
وعلى فكره ده أحسن وقت تسيبيه مع أمه لوحدهم ف البيت خلي أمه تنفعه
ساعتها هيعرف قيمتك
ولا بلاش أحسن أمه تقويه عليكي
ويحصل مشاكل وتدعي عليا
أنا مالي ياأختي
بس أنا لو منك
كنت بهدلت الدنيا
تحياتي يا أجمل طهقانه ف الدنيا

محمد عبد الغفار said...

ليه كده

هى وهو وانت؟؟؟؟؟؟

الربان said...

تحياتي

دائما العلاقات الانسانية ما يكون فيها المد و الجزر...

في رأيي ان التفاهم و المصارحة و الشفافية بين الزوجين مهمه جدا...

يعني لا مانع ابدا ان يستشير الزوج زوجته و يقول لها ان امه ترغب او هو يرغب في ان تأتي امه لتجلس معه يومين
هنا الزوجه ستشعر بأن رايها مهم و انها ستشعر بكيانها و ذاتها...و هذا لا يقلل ابدا من شأن الزوج.
و ايضا هذا ينطبق علي الزوجه.

بالنسبة لموضوع الاستيقاظ المبكر...ممكن بعد وصول الام للمنزل ان تصحبها الزوجة الي المطبخ...و ترشدها لموقع الشاي و السكر ...فين البن ...فين العصير ..الخ... و تقول لها البيت بيتك طبعا و خدي راحتك...و بهذا يمكن تفادي بعض المصاعب...

و أخيرا لنتذكر جميعا ان الزوجه ستصبح حماه و ستمر بنفس الظروف و ياريت الا تفعل نفس ما فعلته حماتها.

تحياتي

حواء said...

الله يكون فى عونك يا بستوكة ياختى انتى حتقوليلى ده انا مجربة كل ده بس بكبر ... الله يكون فى عونك

مصر هى أمى said...

طهقانة

تصدقى بالله انا كل ما افكر انى ادور على بنت الحلال افتكر بوستاتكم
ساعتها بقول انا كده احسن بدل الفضايح اللى على النت ديه

To a friend said...

الحموات تأديب و تهذيب و اصلاح

معلش يا بستوكة يا حبيبتي اسبوع كده و ان شاء الله نقولك كفّارة

و مين عارف يمكن تاخدي افراج في نص المده لحسن السير و انحراق السلوك

طهقان said...

ما بلاااش انت يا ام بدوي

يا ام بدوي بلاااش

مالها مامتي بقا ؟

يعني نجيب الدفاتر القديمة تنقرا؟
وبعدين طالما امي مش غالية عندك..
ليه كل شوية
وخصوصا لما نكون زعلانين مع بعض
تحلفيني بروحها؟
وحياتها؟

وبعدين ... مامتك غالية عندي.....بس دا لا يمنع اني ...
اقول اللي كاتمه في قلبي وساكت

استنونا
قصيدي
استني عليا

Doba said...

صباح الفل على البستوكة المطحونة دائماً وأبدااااااااا---بوسات كتير ليكى

قدامك حل من اتنين يتدى البوز التمام المتين وتقلبى وشك وتعملى لسه زعلان من طهطه حبيبك وكل حاجة اوف ويع وايه ده وانا غلطانة انى رجعت بعد كل ده .........غمزة

يقما تعملى فيها هبلة واعملى كل اللى نفسك فيه نامى زى متحبى واصحى زى متحبى واعملى اى اكل ييجى على بالك مع طحنة كاملة وحرب مستفيضة ودماء ورمال على طهطه لو حاول العتاب بأى شكل---مش كفاية انك رجعتى معاه بعد الجرح الكبير اللى سببهولك---غمزة تانى

وألذ وأحلى حاجة يبقى فيه حبة دلع على مياصة على ضحكة مسرسعة كده قدامها أهى دى اللى هتخليها تاخد استمارة 6 وعلى بيتهم تانى ياختشى الواحد عنده مرارة واحدة وانتى بكده او كده هتفقعيها هتفقعيها----الأنتقااااااااااااااااااام

والسلام ختام وإلى لقاء قريب
دوبا

يا مراكبي said...

بعيد عن الكوميديا في الموضوع .. الموضوع ده حساس جدا جدا

بجد بجد .. موضوع إرضاء الراجل لأمة أو أبوه وتعارضه مع رضاء الزوجة موضوع خطير .. والزوجة لازم تتفهم الموضوع ده كويس وإلا هتضغط جامد على أعصاب الراجل اللي مش ممكن يوجه لأمه أو أبوه أي نقد وخصوصا وهما في السن الكبير ده

قال تعالى: ولا تقل لهما أف ولا تنهرهما وقل لهما قولا كريما .. وأخفض لهما جناح الذل من الرحمة وقل رب إرحمهما كما ربياني صغيرا

والله أعلم

BackBone said...

ايوه كده ياطهقان دول صنف ميجيش الا بالفتح


انا اقصد فتح الدفاتر يعني مش نافوخ البنيه

Me said...

So...are you back home now?
Get your defense mechanism with you and do not worry about a thing!! You can do it!

Anonymous said...

ههههههههههه
مسخرة

حلو شكل المدونة الجديد

Anonymous said...

ههههههههههههه
لا بجد الله يكون فى عونك
هى اصل كل الحماوات كده مفيش نوع تانى
بس انت برضه هتاخدى ثواب على مراعيتها...فمعلش استحملى
تحياتى

اسكندراني في الغربة said...

عزم اربعة....الاهلي اتغلب اربعة
احمدي ربنا انو معزمش الشركة كانت حتبقى فضيحة بجلاجل للاهلي طبعا



زملكاوي مش فرحان فى الاهلي

bastokka طهقانة said...
This comment has been removed by the author.
bastokka طهقانة said...
This comment has been removed by the author.
bastokka طهقانة said...
This comment has been removed by the author.
bastokka طهقانة said...
This comment has been removed by the author.
bastokka طهقانة said...
This comment has been removed by the author.
bastokka طهقانة said...
This comment has been removed by the author.
zordeak said...

هههههههههه

انا شفت الليلة الحمرا عند طهقان

وحقك تدبحيه صراحة

:)

الظاهر ان حماتك قوية الشكيمة خااااااالث

وشكلها هتحط السيخ المحمى فى صرصور ودنك لو شافت الكلم ده


ضحكة شريرة

انا ممكن ابعتلها اللينك

ضحك شريرة تانية


نياهاهاهاهاهاه


:)

bastokka طهقانة said...
This comment has been removed by the author.
Amr Ahmed said...

ايه يا طهقانة
عيب كده

دي برضو مامة طهقان

ولا هو علشان طيب معاكي

انا لو منه مسمحش لحد انه يتكلم علي مامتي كده

هههههههههههه
انا جاي اهدي النفوس

كل الستات مبتحبش حماتها تيجي عندها


هههههههههههههه

تحياتي

Van Gogh said...

لذيذ جدا البوست بتاعك...وعلى فكرة اكيدانتى كونتى مدلعة فى بيت الوالد المحترم...لأن حالتك بتفكرنى بحاله اخواتى البنات...نفس المأساة..بس بينى وبينك انا فرحان فيهم
:)
.شدى حيلك...وافتكرى دايما ان والدتك ممكن هى كمان تكون كدة مع اخوكى...أو مثلاً انتى بعد كام سنة لما تفاجأى ان ابنك العيل الصغير جاى بيقولك انه عايز يتجوز...وفجأة تلاقى واحدة جت وخدته منك على الجاهز اكيد هتكونى اكثر تفهماً...بس صدقينى فى نظر مرات ابنك هتكون بالظبط زى حماتك

اخيراً...استمتعت جدا بمدونتك واكيد هتشوفينى تانى
السلام ختام

sara said...

اولا الماوس الساطور يجنن

ثانيا موضوع الحما بقي ..كل واحدة من الاصل فعلا بتبقي شايفه ابنها امله..وان يا سعدها يا هناها اللي هاتتجوزه ..وبتبقي شايفه ان مرات ابنها بردو ما تستاهلش الامله اللي هي فيه..والامله دي اللي هي جوازها من سبع البرمبه اللي مافيش منه اتنين في البلد...

بس وصفك فعلا لجزئية التدخل في كل حاجه دي واقعيه جدا فعلا ... انا افتكر مرة اني اتهفيت في عقلي وكنت عامله ام علي وكان عندنا حماتي وحمايا زيارة المهم اني قدمت منها ..واكلهوها وعجبتهم والحياة حلوة.. تاني يوم لقيت جوزي بيقولي ..الا صحيح احنا عندنا مكسرات منين ..قولتله عادي يا حبيبي انا ببقي جايبه كميه كبيرة من رمضان عشان تكفيني طول السنه..عشان الحلويات والكبسه والحجات دي ..اشمعني يعني ؟؟
قاللي اصل ماما سألتني انتو جبتو المكسرات منين ..المهم يعني خلاصة الكلام وبعد ما شغلت الاسطوانه الناعمه عشان اعرف اللي حصل بالضبط_اصلي بالخبرة يعني عارفه ان السؤال مش هايبقي برئ _اكتشفت انه ماكنش سؤال دا كان تحقيق ان الفلوس ازاي ضايعه علي المكسرات ..واني ممكن اجيب السوداني ومش عارفه اعمل فيه ايه ..هايتحول لمكسرات بردو غير عين الجمل وعين العفريت وعين جالوت اللي انا حطاه في ام علي ..وختمت في النهايه ان ستات اخر زمن مايعرفوش يوفروا وان الشاطرة تغزل برجل حمار باين ..

المهم يعني ..هادعيلك من كل قلبي ربنا يفك زنقتك يا بستوكتي علي خير

تحياتي يا قمر

همسات دافئه said...

ههههههههههه
أول مره أزورك بس شور مش هاتكون الأخيره البلوج كله تحفه وذى السكر والديزاين رائع بجد برافو عليكى:))
اداكى المخدر ياأختى
(بوكيه الورد والكلمتين الحلوين)
واستدرجك لحد البيت استحملى بأه عشان نفوق المره الى جايه:))

صاحب البوابــة said...

كالعادة

كلما قرأت لكِ اندهشت لأنك لا تكتبي قصص ساخرة تباع بالملايين

بالمناسبة اضمن لكِ ان نشرتِ قصصك ان تباع سريعاً وتنفذ اسرع

تحياتي اختي الرائعة التى استمتع بالقراءة لها

koukawy said...

يا عيني عليكي معلش بس اعتبريها في مقام والدتك برضو و عملي فيها ربنا اهي ست كبيره برضو
و عقبال ما يتفك زنقك

bastokka طهقانة said...
This comment has been removed by the author.
قضية عم أحمد Ahmed Case said...

ههههههههههههه
بصراحة احييك انتى وعم طهقان على البلوج .

بس اقولك حاجه في مثل بيقول كان أدم اسعد الناس لانه لم تكن له حماه واعتقد حواء برده كانت سعيدة بنفس السبب.

تحياتي

Esmeralda said...

ألااااعاااااا
بيقول لك من متطلبات العروسه بجانب الشقه و العربيه ان يكون يتيم الام يا حبه عين امه

و ربنا يكفينا شر البلاوى

معلش هما الستات الكبار لازم يخدوا بالهم من كل حاجه

اصبرى ده حيقعد لك فى ولادك

و اهو كلام و السلام

ابقى تعالى

•«ρяoιd»•™ said...

هههههههههههههههههههههههههه

عسل عسل عسل

ربنا يخليك حماتك يا رب

تحياتي

reri said...

هههههههههههههههههههههه
ربنا معاكي ويعينك عليها... ويديها الصحه وتنوركوا دايما,,, ههههههههه

سلام يا طهقانه

بنت الكويت said...

ههههه
يا ساتر
الله يعينك على حماتك

تقبلي مروري:)

$ سهى $ said...

اة مت الرجالة

هههههههههه

yasmina said...

كلام حلو وخفيف
انا لما بدخل عندك بستريح نفسيا لان مواضيعك هادية
بس نعمل ايه كل الحماوات نفس الشيئ في جميع انحاء العالم
ربنا يستر لما تصيري حماة او انا

انا حعمل عمايل!ههههههههه

Rosa said...

ياعينيييييييي
ربنا معاكي يا رب
بس معلش يا طهقانه اهو كله بثوابه,كله كله

^ H@fSS@^ said...

looooooooooooooooooooooooooooool
looooooooooooooooooooooooooooool
mosh ma32ooool
enti to7fah
ma3lesh el tayeb a7san
slamati leeki wi le tah2an

dr_lazeez said...

enty mabta`7desh hodna `7ales ....
matsafrelek yuman ma3a tah2an 2afandy we `3ayro gaaw :)
ba2d ma7amatek temish law meshet ..
tamaneyatna begada2 2as3ad el 2awkaaat
rabena ma3aky

شيمـــــاء said...

العزيزة طهقانة
او طهطه
اللى تحبيه

انا بعزمك انت و العزيز زوجك طهقان
على الصالون عندى

http://sara7a-khan2a.blogspot.com/2006/12/4.html
و اللينك ده علشان تتعرفى على الصالون

وهاستنى ردك عندى على الايميل
تحياتشى وقبلاتشى
:)

Anonymous said...

ربنا يفك زنقتك

Unknown said...

معلش يا طهطه .. كلنا لها يا عزيزتي.. انا دلوقتي امي بتدعيلي ربنا يرزقك بعريس تكون امه ميته يا اينو يا بنت بطني!!!ـ
مبسوطه اوي اني اكتشفتك

BackBone said...

و الله تلائيكي انت الليزنقاها في الكرويدور



اخ اآآآآآآآآآخ


ستات اخر زمن

صاحب البوابــة said...

مررت لأرى جديدك ؟؟؟

فأين هو ؟؟؟

تحياتي أختي

-_- said...

هههههههههههههه

والله انتم زي العسل

سيكولوبيا *حكايات من العيادة النفسية said...

ههههههههههههههههههههههههههههه

المدونة دى تجنن

دمك زى السكر

انا طهقانة زيك من حوالى 7 سنين

انتى لك كام سنة فى حالة الطهقان دى


تيجى ننفجر سوا


:):):)

HOODY said...

انت سكرة جداا

HOODY said...

انت قاعدت 3 سنين مع حماتى بس لحأت فى فكرة ريحتنى قوى كنت بفكر لو انا مكانها هفكر ازاى وهعمل ايه بكده الحمد الله عدو بسلام وتقريبا بنحب بعض

خمسة فضفضة said...

السلام عليكم ورحمة الله وبركاته

معلش استحملي يا طهقانه يا اختشي

انا بقي حماتي قاعده معايا في نفس البيت في الشقه اللي تحت ، بتراقب كل التحركات والهمسات .......اهئ اهئ اهئ

والنمله ما بتعديش من تحت مناخيرها
ولو عدت لازم تنخور وراها لحد ما تجيبها .عااااااااااااااا

شوفتي بقي
اللي يشوف بلاوي الناس تهون عليه بلوته..هههههه


تحياتي

Unknown said...

معلش ياطهقانة ياختي برده استحملي معلش هتعملي ايه بقه
دمك زي السكر
ايه رأيك تعملي قصة حياتك مسلسل؟

Nohahawary said...

b3d 95 comment what can i write


:D


s
o
k
k
a
r
a


we

3
a
s
a
l
a


we

b
a
s
b
o
s
a
lazem 7ettet gebna estanbolly la7sn khalas nefsy gaza3et :D

c u sooon

بنت القمر said...

بوست رائع ورصدك للتفاصيل اكتلا شئ مميزها تصدقى ان انا طباخه بريمو و حماتى بتشهد بكدا ومرو عملت حله محشى اتجننت عليها وقالتلى ان انا بقيت ممتازة وقالتلى فاكرة يا مونى اللى هو انا لما عملتى لنا عصير جوافه ومكنتيش مصفياها وكان فيها بزر رغم ان الواقعه دى لها حداااااشر سنه.. اما حكايه الساطور فهى مش مريحه واتجنت لحد ما حطيت المدونه على الفيفوريت عندى وكمان الخلفيه غامقه..تحياتى ياقمر