ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

حساس حبيبي كتير



طهقان جوزي انسان حساس جدا-حساس يعني رقيق قدام الناس مش عنده حساسية من البيض و السمك- لكن مش بيبين احاسيسه-لا يسمع لا يرى لا يتكلم- بيلاحظ كل حاجة جميلة-في الستات التانية مش فيه انا-و بيقدر كل مميز-في فتيات الفيديو كلب بس




من فترة جالنا ضيوف من دولة عربية شكيكة و اخدناهم نزهة في خان الخليلي و الحسين و هناك شفت شوية بدل رقص انما شفتشي خالص الضيفة اشترت يجي ست بدل رقص ليها و لاخواتها


انا قلتله: ايةرايك يا طهقان في البدلة دي؟


طهقان:فالجر قوي


أنا: هاهاها ما هي لازم تبقى فلجر مش بدلة رقص


طهقان: لا مش حلوة


أنا: طيب ايه رايك في دي؟


طهقان: اممم بكام دي


أنا: بستميت جنية


طهقان: ينهار اسود دي غالية قوي


أنا: نفاصل فيها و ناخدها بتلتمية


طهقان: ليه انت اتجننتي تلبسي بدلة رقص!!اعقلي يا ماما


أنا: اتلهيت على عيني و سكت
و لما عزمناهم على العشا في مركب سياحية في النيل كان في رقاصة حريفة فلجرة و هو كان قاعد منشكح قوي و وشه محمر لا انا عارفة من الكسوف و لا من الهبو اللي طالع على جتته و كله كوم و لما الرقاصة قربت منه كوم قعد يسقف و لسان حاله بيقول
مش كنت اتجوزت رقاصة
بس يا طهقان يا حبيبي هز الوسط مش كفاية و ميفتحش بيت انا بحبك و مش بس كده ده انا
حرقصك على الشناكل يا حبي


و الغريبة اني اكتشفت ان طهقان نفسه ارقصله و البس بدلة رقص في البوست بتاعه


طيب يا طهقان يا حبيبي اشتري البدلة و لا مشتريهاش و لو رقصتلك من غير الزي الرسمي للرقص تفتكر حتقولي برضه


اعقلي يا ماما؟؟






طهقان حبيبي بيقول عليه تلاجة


يعني انت اللي بابور يا روحي؟


الحب ده مشاعر قبل ما يكون جسد و مش معنى ان صاحبك جابلك برطمان روح العفريت من اندونسيا و ضربتلك منه معلقتين حسسوك انك شمشون الجبار يبقى الجمل طلع النخلة


طيب ادي الجمل و ادي النخلة


بس بشرط بدون تدخل دوائي و لا عشبي و لا دهان و سفوف و لا اسبراي و لا تدخل جراحي




يا زوجي الحبيب انا راضية بيك بامكانياتك المتواضعة الحالية بس عايزاك انت كمان ترضى بنفسك و امكانياتك و ترضى بحبي ليك


الصمت مش دايما بيبقى برود يمكن ساعات بيكون تقدير لظروف شغلك و مزاجك و النوم بدري علشان تصحى بدري




يمكن المشكلة اننا كنا ساكتين السنين اللي فاتت و جه الوقت اللي نتكلم فيه عن مشاكلنا و ناقشها


يمكن متكونش مشاكلنا لوحدنا و يكون ناس كتير مشتركة معانا في نفس الهموم




طهقان كل عيد حب و انا بحبك و برضه طهقانة منك


ها؟؟ حتجيبلي اية بقى في عيد الحب؟؟؟


جزمة برقبة؟


:)

25 comments:

Ahmad Hegab said...

هو فى بدلة رقص مش فالجر

اه منكم انتو يا ستات ميعجبكوش العجب
ما الراجل بيظبط نفسه و عمال ياخد فى ادويه علشان يرضيكى وطبعا دى مش مشاكلكوا انتم بس دى تقريبا مشاكل 96% من الشعب المصرى

[متأكده ان البرطمان اسمه روح العفريت] اصل فى واحد صاحبى بيدرس فى اندونسيا و احتمال يجى قريب

Hannoda said...

أنا مش مستوعبة شوية حكاية بدلة الرقص ده
وحتى لما شفته بيتكلم عنها في البوست بتاعه أفشت منها
بس على فكرة... ومش تأثرا بالمناحة اللي عملها دفاعا عن المصيبة اللي عملها
أعتقد انه هايختلف كتير في معاملته اذا حسستيه انك مبهورة بعقله و شخصيته ودماغه

وواضح انه محتاج منك انك تمدحي فيه و فشبابه وروشنته

ساعات الرجالة بيكونوا أطفال كبار لما بنعاملهم بالمبدإ ده حبنا ليهم بيزيد


بس أنا بكرر تاني و ماتزهقوش مني

انتوا نجحتوا فنقل الجو اللي انتوا عايشين فيه و بجد خلتوني أندمج معاكوا قوي
بس معلش بقى ... مانجحتوش في انكوا تقنعونا انكم طهقانين

طهقان said...

hannoda

فهمت مقصدي

الراجل منا عامل زي العيل الصغير

مش بالفلجرة

يحيا الحب

اه ممكن يكون في شوية فلجرة في اوقات معين

ولكن
بالكلمة الحلوة

عائشة الكيلاني ممكن تبقا احلى زوجة في الدنيا
تفتكروا ايه اللي خلى الامير اسمه ايه ده ابو وليام وهنري أمير بريطانيا
يسيب المرحومة ديانا علشان كارملا؟
مع ان المقارنة بينهما غير جائزة شرعا ولا منطقا ولا قانونا
ولكن
فيما بينهما
ممكن بتكون فعلا محسساه انه امير

لا امير ايه بقا
ماهو امير اصلا
ممكن تكون معطياه اللي نفسه فيه
عرفت تتعامل معاه


الراجل محتاج الست اللي تفهم مفاتيحه
والرجال انواع
في واحد مثلا زي حسن عابدين في فيلم خمسة باب
"انا عايز واحدة تهزئني تهزئني"
مراته لازم تديله بالشبشب
حتى لو كان رئيس مجلس إدارة

في واحد عامل زي يحي شاهين في الثلاثية
مراته لازم تحسسه انه سي السيد
حتى لو كانت
مريكل مستشارة المانيا

فهمتوني

وللحديث بقية
:)

كتيبة الضحك said...

مش ماسك روحي من الضحك يا طهقانه بس
لو تبطلي لغه حواديت قبل النوم
هيبقي مستواكي جنان ونفطس اكتر


بس هما ياختي كده الرجاله عند الفلوس ويجيبو روا

يا مراكبي said...

طهقان وطهقانة

على قد إعجابي بصراحتكم في مواجهتكم لبعض بالحقيقة .. على قد ما أنا مش معاكم في عرض المواضيع دي على الملأ

مش كده وإلا إيه؟

-_- said...

والله كلامك مظبوط

الانسان لازم يبص في اللى ناقص فيه قبل ما يبص في اللى ناقص في شريك حياته

الأباصيرى said...

فكرتينى بأبن عمى لما جة من أمريكا هو ومراتة
كان هيتجنن ويشترى بدلة رقص لمراتة

أية المشكلة أنة يشترى بدلة رقص
لو المشكلة فى الفلوس يبقى معاة حق
600 جنية مبلغ كبير برضة
بس غير كدة عادى.. أنتى مراتة ومش هترقصى لحد غريب


أولا انتى ليكى الحق تكتبى فى المدونى أى حاجة تخطر على بالك
بس أنا مش معاكى فى عرض الموضوع بتاع روح العفريت

تحياتى

Ahmad Hegab said...

محدش له دعوة بروح العفريت

انشالله انا ناوى استور منه و ابيع

حنكسب دهب يا جدعــــــــان

frozen love said...

دي اول زيارة ليا في المدونة دي..واللي هتوديني عند طهقان كمان

دمكم خفيف قوي...بس بلاش مواضيع روح العفريت

لاحسن فالجر قوي
lol

ليا عودة...وامنى لكم السعادة على طول

أميرة البلطجية said...

والله قلت الجواز ارحم
ربنا يهديكوا لبعض

koukawy said...

بصي المفروض اي اتنين متجوزين يعملوا لبعض كل حاجه في الدنيا اللي متخليهوش يبص بره و لا هي كمان00
بس

أشرف حمدي said...

فكرة مدونة جميلة جدا بالرغم من انني مقبل علي الزواج ومش عاوز احباط حرام عليكم
الجواز جميل إلى إشعار آخر
تحياتي

أميرة said...

والله انتو ناس زى العسل بجد

مستنية منكوا مواضيع زى الفل

معلش ياطهقانة ياختى رجالة عنيها زايغة صنف واحد كلهم

Diyaa' said...

والله عايز أضحك
بس لو انتي و طهقان بتتكلموا جد فده رأيي وليكم مطلق الحرية
السعادة ممكنة والحب ممكن من غير تلاكيك ولا حجج
يعني كل واحد يستغل الامكانيات المتاحة ويحاول بنية صافية يدي اللي أدامه
وطالما بتحبوا بعض.أكيد الأخذ هيكون ليه مقابل وهو إيه ؟
العطاء ...شاطرين
طبعاً كلام المدارس ده كبير وممل
بس ممكن تقعدوا مع بعض وتقضوها صراحة ؟يعني كل واحد يحكي مخاوفه والحاجات اللي متعقد منها وبيحسها غلط وبتخليه بيمشي حياته بشكل مختلف تماماً عن اللي كان متوقعه
خليكم كتاب مفتوح لبعض
وهتبقوا واحد واتقسم نصين ...والله الموضوع مش صعب ...القرآن عرفنا الزواج غرضه ايه
ممكن تقروه ؟
وكل عيد حب وانتم بتحبوا بعض ومش طهقانين من بعض

Hannoda said...

على فكرة انتوا بتتكلموا عن مصطلح مش فاهماه
بس ما علينا

لكن اشمعنا طهآن اللي بيرد و فين طهآنه؟؟

على فكرة.. انت محتاج للحب و الكلمة الحلوة.. وهي محتاجة برضه حاجة مهمة قوي.. الإحساس بالأمان و الإخلاص

واطلبوا من بعض اللي محتاجينه حاتلاقوه سهل مادام كل الحب اللي بينكم ده موجود

أناحاسة اني واعظة و عايشة الدور

بس هي طهقانة مختفية ليه
أنا رايحة أدور عليها

bastokka طهقانة said...

hanoda
انا موجودة و متابعة الكومنتس
بس مش بعرف ارد اقول اية
انا اكتب بوستات بس لسة موصلتش لمرحلة الرد
ميرسي

LAMIA MAHMOUD said...

ناقشتي مشكلة لذيذة .. بخفة دم .. بس تصدقي حلو حوار بدلة الرقص ده

admelmasry said...

مالكيش حل
بصراحه فاجرة

ههههههههههههههههههه

أسوور said...

هم بس يحبوا يبصوا على الرقاصات لكن لما تلبسيلهم بدلة رقص يبدأوا يقروا الجرايد

بوست جنان .. حلو قوى

استمرى يا نصيرة المراة المتزوجة الغلبانة المقهورة

بالمناسبة فاكرة البوست بتاعى الخاص بمشكلة بين زوجين

الزوج عمل مدونة مخصوص عشان يعرض فيها وجهة نظره فى التعدد ولأى حد عاوز يحاوه

عنوانها

http://nagibidris.blogspot.com/

الأباصيرى said...

ياطهقانة لازم تردى على الناس وتوضحى وجهة نظرك، مش تطرحى المشكلة وتطلعى تجرى
:)

أروح اقرا البوست الجديد بقى

سلام

طهقان said...

انا موجود برضه ومتابع التعليقات
لكن نأسف لعدم الرد على كل تعليق

وليا اضافة

احنا قعدنا مع بعض كتيييير
اكترل من عشر سنين
وبرضه المشاكل مااتحلتش
ولو كان القعاد جاب نتيجة ....كانت مشاكلنا وصلت لصفحات الانترنت..
حسبي الله ونعم الوكيل

Diyaa' said...

i feel it like a big movie
not real
guys....many things r not matching in ur stories !!

جبهة التهييس الشعبية said...

الله؟

مش هو اللي قال عايز مراتي تلبس بدلة رقص

وللا عايزك تجيبيها على حسابك؟

طب استني كده اشوف وجهة نظره ايه

وانت راخرة استهدي بالله كده

اتبطي شوية

اركزي ما تبقيش لا على حامي ولا على بارد كده على طول

نفسي اخش مرة واحدة الاقيكوا مش متخانقين

moondream said...

5151

moondream said...

بجد يا طهقانه انا بحب كتباتك جيدا
واسلوبك جميل ويجنن
انتى وطهقان
بس اكيد الجحياه بتبقى يوم وحش ونص يوم حلو
وانتى مشاااء الله عليكى ربنا يحفظك
وبجد احسن حاجه المسايسه وتكبير الدماغ وانك تكونى عارفه تتصرفى ازاى
من غير ما تخسري حاجه او مشاكل
وياريت يا طهقانه لو تنورينا فى المنتدى هينور بوجودك
انا اسمى بوسي عليه
www.zenzanh.com