ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

بطيخ ..حبيبي





صحيح الجو اليومين اللي فاتوا كان حر موت، و البيضة كانت تتقلي على أي كبوت عربية الساعة 12 الظهر، و صحيح ان كل المكيفات اللي في الوطن العربي عيطت من كتر الشغل، و عملت وقفة احتجاجية في معرض كارير تطالب بتخفيض ساعات العمل الرسمية

لكن ده مايديش الحق لطهقان يعمل اللي عمله فيا انا و العيال ده ،و خليكوا شاهدين يا بلوجرية

يوم الاحد اللي فات و اللي كانت حرارة الجو فيه حوالي خمسين درجة ،لقيت جوزي الهمام طهقان باشا خلنجان ؛داخل البيت العصر و في ايديه الاتنين بطيختين من النوع الكبير

فرحت و هللت ،و رفعت شعارات من بتاعة الانتخابات اللي زي :

ربنا ما يحرمنا من دخلتك علينا و ايدك مليانة

و اهي دي الازواج و لا بلاش

و ادخل على مراتك ببطيخة و لا تدخلش عليها بفسيخة




و ملحقتش افرح، اذ لقيت البواب داخل وراه ببطختين تانين في نفس هذا الوقت

طهقانة:اربع بطيخات!! مش كتير يا طهقان؟

طهقان:خلي العيال ياكلوا

طهقانة:اه فعلا مساكين نفسهم مسدودة من الحر، دول ما اكلوش في العشا امبارح الا 5 كيلو خوخ بس

طهقان:يلا ربنا يبارك ،خليهم يبردوا على قلبهم

طهقانة:ربنا ما يحرمنا منك يا مبردنا

و كانت عشوة حلوة مع الجبنة ،شقتين بطيخ لكل واحد، و في اللي اخد فيلامن بابها ،و اللي اكل دوبليكس ،و اهو كل واحد و طاقته الانتاجية في النحت

و عدت الليلة


و فوجئت، لما لقيته تاني يوم ؛داخل عليا باربع بطيخات برضه

طهقانة:تاني يا طوطو؟ ده لسة في 3 بطيخات من امبارح لسة ما ادبحوش

طهقان:ليه كده ؟! شدو حيلكم معايا

طهقانة:نشد حيلنا في اية ؟هو البطيخ نازل في امتحانات الثانوية العامة السنة دي؟ و لازم نذاكره كويس، و لا ايه؟

طهقان:اتصرفي بقى، اعملي مربى، كيكة،انت بتغلبي

طهقانة:اه فكرة برضه و ممكن اعمل ايس كريم او شامبو كمان ما انا ايدي طايلة

و تحول اكلنا في البيت الي بطيخ في بطيخ

الفطار و الغدا و العشا

سندوتشات بطيخ - بطيخ باللحمة- صينية بطيخ بالبشاميل- تورتة بطيخ- عصير بطيخ - بطيخ بالبطيخ

و العيال سابو البلاي استيشن ،و بقوا يلعبوا بالقشر، حتى البت خوخة اللي جت بعد دوخة نابها من القشر جانب

لما بدأت احس ان العيال بقوا مدورين و طلعتلهم قشرة خضرا ، و بقع حمرا ،و بقيت خايفة لا يكحوا بذر




و تالت يوم، قعدت اترقب وصوله، و اقول في عقل بالي: مش معقول يعملها تاني النهاردة

تن تن تاااااااا

نفس مقرر كل يوم اربع بطيخات برضه

و مكدبش عليكم، اضطريت انزل الشعارات بتاعت الانتخابات و ارفع شعارات تانية مناهضة زي:

الرحمة حلوة

و لا بطيخ بعد اليوم

و يا فكهاني كفاية حرام كرهتنا في الشمام

و كتر البذر يجيب بواسير

طهقان:ليه يا جماعة مالكم ؟!ده حتى الجو حر ،و البطيخ مناسب جدا في الظروف دي

طهقانة:مش كده!!! ده احنا كده حناخد جايزة الدولة التشجيعية في النحت،

وعيالك جالهم اسهال من البطيخ، الجيران حيشتكوا ،و حنعمل ازمة في شبكة الصرف الصحي في البلد و مش بعيد يحسبونا على كل شدة سيفون و الفاتورة تيجي عالية

و لكن لا حياة لمن تنادي

و قعدت افكر، ايه اللي مخليه مقبل قوي على البطيخ بالشكل ده!!!

عملت سيرش على النت ،طلعتلي نتايج كتير ،شكيت في ان بعضها يكون السبب وراء عشق طهقان المفاجئ للبطيخ، و منها:

قالت إحدى الدراسات الأمريكية إن قطعتي بطيخ من الحجم المتوسط تعادلان في مفعولهما قرص فيتامين، فهو مرطب للجسم وفاتح للشهية فضلا عن فوائده الصحية المتعددة، فهو يعتبر صيدلية متنقلة تقاوم الأمراض.

يكونش ده السبب؟ بيحاول يجدد شبابه؟

لا بس هو كده بيقضي على شبابنا احنا

و لقيت موضوع تاني في موقع تفسير احلام بيقول:

من راى في المنام انه ياكل بطيخ :فهو رجل صاحب هموم ومريض أو من رأى أنه يأكل بطيخ فانه يخرج من الحبس

يكونش حلم بشادر بطيخ !!و بيحاول يحقق الحلم؟ و ايه موضوع الحبس اللي عايز يخرج منه ده؟ يكونش عايز يخرج من الجواز بنص المدة؟ جايز


المهم..حصل عندي تكدس بطيخي في المطبخ، و كان لابد من ايجاد حلول عمليه للتخلص منه

ندهت للبواب و قلتله:

طهقانة:خد يا عم علي، بطيختين ليك و للعيال يبردوا عليكم في الحر ده

البواب:لا الف شكر يا مدام، ده طهقان بيه منغنغنا ،كل يوم يديني بطيختين

طهقانة:كل يوم؟؟ يديك بطيختين؟

البواب:ايوة يا ست هانم. هو البيه اشترى جنينة بطيخ و لا ايه؟

طهقانة: لا ده اصله اخد مكافأة عينية في الشغل بتاعه، و بيوزع على حبايبه

عقلي الباطن :لا كده الموضوع في إن

كل يوم يجيب البيت اربعة!! و يدي عم على اتنين !!يعني بيشتري ست

بطيخات كل يووووم

و قعدت اترقب

و الشك حاجز في قلبي اوضتين و صالة بمنافعهم و الفار بيلعب اسكيتنج في عبي

وصل طهقان بيه و برضه معاه البطيختين اياهم و ساحب وراه البواب باتنين تانين


طهقانة:اهلا اهلا(بنبرة نعيمة الصغير الله يرحمها)

طهقان:ايه خير في ايه؟؟ النبرة دي انا عارفها ،مالك؟

طهقانة:قول انت في ايه؟ حتقر لوحدك ؟و لا اقررك انا بمعرفتي

طهقان:لا لا لا ..خلاص ،حقر انا (و علامات الاستسلام على وشه)

طهقانة:كويس ،ها؟

طهقان:اصل انا يوم الاحد، و انا طالع بالعربية من الجراج بظهري؛ خبط عربية بطيخ قلبتها و كسرتها ،و الواد بتاع البطيخ قعد يعيط ويقولي :دي فلوس ناس يا بيه و حيموتوني ،فصعب عليا ،واخدت منه حمولة البطيخ كلها ،و اديته فلوس يصلح العربية ، و خلاص.. مش فاضل معايا غير بتاع خمسة و عشرين بطيخة ،بس ادي الحكاية

طهقانة: يا طيبة قلبك يا جوزي ،صعب عليك بياع البطيخ و مصعبناش عليك احنا!! ده عيالك طلعلهم بذر الشباب في وشهم، و بقوا ينحتوا على روحهم بالليل ،لأ و لسة فاضل بتاع خمسة و عشرين بطيخة!!

دي حاجة تطهق بجد

اوروفوار

امضاء


23 comments:

Shreef said...

ممكن تتبرعوا بالباقي لأي جمعية خيرية :)) .. بجد تدوينة رائعة و اسلوب متميز .. تحياتي

أنا - الريس said...

هههههههههههه
بجد كتابتك جامدة
ربنا يوفقك في الحياة
واسلوب وتفكير كلماتك
ولا اروع
البيطيخ عموما فوايده كتير جدا
بس مش لدرجة آكل عربية بطيخ
دا ظلم أنا اخري بطختين في الأسبوع
عشان المعدة
ربنا يوفقك علي العموم
تحياتي لكي

t3ban said...

حطي في بطنك بطيخة و هاتي ال 24

Anonymous said...

هههههههههههه بصى من حقك عليا انى اقلك ان دمك خفيف جداااااا وخليتى عنيا دمعت من الضحك ربنا يصلح حالك واحوالك انتى وباقى العائله الكريمه ان شاء الله

ناس الأيام said...

البطيخ ده زي الفل هو فى حد طايل

بجد أسلوبك رائع

Mohannad

عابرة السبيل said...

ههههههههه

لسه الدم الخفيف موجود اه رغم الحر



شكرا على سؤالك واهتمامك
وتنورنا فى المدونة الجديدة :
فى انتظار الفوائد

خمسة فضفضة said...

اااااااااااه يااااااااااني
حاسه بيكي يا شابه

اصلي بعيش نفس المأساه البطيخيه دي

من يوم ما البطيخ طلع وكل يوم بطيخ لحد ما خلاص مش قادره

كل يوم الباشا تبعي يدخل علي ببطختين تلاته

والاكل تحول لجبنه وبطيخ يوميا

المشكله انهم ياكلوا وينبسطوا واحنا نحتاس في القشر ههههههههه

بس انا بقي وصلت للسبب الاصلي ورا الموضوع ده ان اكل نص بطيخه يعادل قرص فياجرا :))

Anonymous said...

هههههههههههههههههههه احتمال يكون بيفكر فى اينتاج قنبلة نووية من قشر البطيخ اوبيحاول يشوف حضرى جديد هههههههههههههههه
بجد توبك خفيف كتير اوى من الحرارة ومن مشاكل اليوم سعيد بتواجدى وخالض تحياتى لحضرك وللاسرة
تقبلى مرورى


يوميات حارة

خالتى بمبة said...

حلوة يا بطيخة بس بجد كويس انه ضرب عربية بطيخ مش عربية موز والا الولاد كانو راحو الجبلاية اهو قدر اخف من قدر هههههههههههههه

العاب طبخ said...

بحب البطيخ
جميل

koukawy said...

طب انا ممكن اخد خمس بطيخات مساعده مفيش مشكله ان اعز البطيخ جداااا

تيمور said...

ههههههههه


جوزك دة ملاك بجد
كل عام وانتى بخير
تحياتى

المتبهدلون في الأرض said...

مش هتنزلي كتاب ..!!؟؟

Unknown said...

هههههههههههههه

عسل يا قلبي عسل
:D

الطائر الحزين said...

كل عام انت بخير

البطيخ مفيد جدا للجبنة

يا مراكبي said...

يا خبر أحمر .. قصدي أبيض
:-)

كل ده عشان خبط عربية البطيخ؟

طيب ما كان اداله فلوس تصليح العربية وخلاص بدل العذاب ده كله

:-))

اقصوصه said...

رمضان كريم :)

بحبك اوى said...

ازيك يا قمر

تحياتى ليكى انا ملك الرومانسية


طيب انا بحزن وكل كلامى حزن

انتى طهقانة ليه

دة حتى انتى عاملة مدونتك باسم سمباتيك صح

ليه طهقانة

عاوز اكلمك دة ايميلى safer_love22


اوك تحياتى مرة ثانية

كلمات من نور said...

انتي فين يا طهقانه؟ لسه بتاكلوا في البطيخ والا إيه؟

عيد سعيد عليكم

Mohammed Salaheldeen said...

انا عايز انصح طهقان وطهقانة
ارحمو العيال شوية والخوخ ده رزقهم
مستكترين عالعيال الخوخ

aya abd elkarim said...

لا بجد روحك و دماغك وكلماتك عاليه اوى
اول مره ليا أمر عليكى و أكيد مش آخر مره تحياتى ليكى

آخر أيام الخريف said...

هاهاهاها حلوة قوى . انا سمعت عن مدونتك كتير بس بصراحة دى أول مرة أدخل و أوعدك مش هتكون ألخيرة ان شاء الله :)))

يا ريت تشرفينى على مدونتى :

http://reeeshkalam.blogspot.com/

Sniper_Murad said...

مشكور يالغالي ودام عزك
http://nadimlove.blogspot.com/