ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

حتى الخرم لهفوه

بما ان اخبار الدنيا ما تسرش، و دخلنا على سيزون النكد اقصد كاس العالم و امتحانات الثانوية ، و كل ما حنقلب قناة حنلاقي كورة ، حتى برامج الطبخ حيقدموا بسلة بول بدل الفوت بول


و نفتح النت نلاقي الفيس بوك مولع مرة علشان غزة ربنا يفك اسرها، و مرة علشان الشاب اللي اتقتل و هو بيدافع عن كرامته من الامتهان ، و تويتر شرحه، كله هاتش تاجات يحاسب عليها القانون ، و تسحب على لازوغلي ؛و لازوغلي للي ما يعرفش الفرع السري لامن الدولة ، بس مكان اوريجينال خالص بقى، اللي بيقولوا عليه ورا الشمس

و افتح الايميل الاقي صورتعذيب و مظاهرات و احتجاجات و اعتصامات، و افتح بلوجر الاقي ملخص للهم و الغم اللي فات كله

لكل ما تقدم

قررت

اني اخلع

لا مش حخلع طهقان، ده انا حخلع من البيت ، و لان لسة بنوتي الكبيرة بتمتحن فمش حخلع لبعيد، ده انا قررت اخلع على فوق

لا لا

مش حنتحر والعياذ بالله، و لو انه بقى موضة اليومين دول، و الناس طلعت من هدومها، و تلاقي الواحد شكله يبكي و هو مدلدل كده من فوق الكوبري (لا حول و لا قوة الا بالله)

لا ده انا قررت انا و جاراتي اننا نعمل خرم في حيطة الزهق نفلفص منه لبرة و نتنفس ،قررنا نعمل





روف جاردن شبه اللي في الصورة ده

و للي مايعرفش ايطالي ؛روف جاردن يعني= قاعدة على السطوح

كل واحدة من جاراتي حتطلع كرسي او فوتيه زايد عندها في البيت ، و اللي مستغنية عن ترابيزة و اللي كنبة و اللي قصرية...

زرع يا جماعة مش التانية بتاعة ايام الطفولة

و نعمل ركن كده على قد الحال، نهرب فيه كلنا وقت الماتشات و من مذاكرة العيال وقت الدروس ، و الاهم هربا من عصبية السادة الازواج ساعة الماتش






تلاقي الواحد من دول مصري و ابوه مصري و قال ايه بيشجع اسبانيا كانه مولود هناك و لا يمكن بعتوا جابوله الداية و الخيط اللي ربطوله بيه الحبل السري من هناك

و يزعل و يتحمق قوي لما ايطاليا تجيب جون و يقلب البيت غم، انما لما اسبانيا تكسب يشغلنا اغنية ::و الله و عملوها الرجالة و رفعوا راس اسبانيا بنت خالتنا::






هي ديتها ترمسين شاي، واحد اسيبه لسنيور طهقان اللي بيشجع اسبانيا ، واحد اخده معايا فوق السطوح نمزمز فيه انا و جاراتي

و فعلا بدات التجهيزات، و اللي في عندها حاجة مكركبلها البيت طلعتها فوق السطوح و عملنا واحة جميلة في الهواء الطلق


و جه يوم الجمعة و فتحت عنيا لقيت طهقان مش موجود!! قلت يمكن راح يصلي الجمعة و جاي

غاب... غاب

دخلت المطبخ عملت الغدا ، و قلت اروح الصالة اقعد شوية، و اذ فجأتن

حرامــــــــــــــــــــــــــــي

اتسرقنا

اتصلت بطهقان

طهقانة:الحقني يا طوطو

طهقان:في ايه؟

طهقانة:حرامي .....التلفزيون و الريسيفر اتسرقوا

طهقان:تلفزيون ايه و حرامي ايه!! انا اللي اخدتهم

طهقانة:وديتهم فين؟

طهقان:طلعتهم السطوح ، اما لقينا قاعدة انا و الجيران ما حصلتش في الهوا الطلق ، حنتفرج على كاس العالم هنا و نسيبكم براحتكم

طهقانة:نعم (علامات الدهشة ممزوجة مع علامات الامتعاض تتخللها رعشات في الجفن)

طهقان:مالك؟ قطعتي شحن؟ و لا شبكتك وقعت؟

طهقانة: بقى الخرم اللي بقالنا اسبوعين بنرتب فيه ؛تاخدوه على الجاهز و تسيبونا محبوسين في البيت و كمان تاخد التليفزيون

اما حاجة تطهق بجد

امضاء

طهقانة



10 comments:

يا مراكبي said...

والله مش عارف أشكرك ازاي

أنا كمان كنت بفكر أدور على مكان في الهوائ الطلق أشوف فيه المباريات ... ومادام الحكاية عندكوا كده يبقى أنا هنضم لجوزك العزيز ونشجع أسبانيا سوا

trtr388 said...

كل ما احس نفسى " طهقان " بسرعه ابحث عن مدونتك حتى اخرج من الزهق ..

اسعد الله قلبك اضعاف من تدخلى البهجة والابتسام على كل من يقراء تدويناتك الباسمة والخفيفة

ولنا عودة بعد كاس العالم

حسن ارابيسك said...

طهقانة اذيك
الحمد لله انه مازال لدى الست المصرية خفة الدم والبسمة التي تستطيع أن تخرجها في أوقات صعبة لتخفف عن عائلتها الصغيرة صعاب وهموم تلك الحياة
فتدوينة مثل تدوينتك هذه تحمل تلك الميزة كما انها أيضا تحمل فكرة الرووف الجميلة
تحياتي
حسن أرابيسك

موجة said...

بوست رائع..
يسرني زيار تك..

!!! عارفة ... مش عارف ليه said...

طب والله فكرة:)

أورح انكد على طهقاااااانة
اللي تبعي

اصلها خنقتني بالشيف شراااابيني

وبرامج نون النسوووة اللي رادمة قناة الحياة

أهاجر انا بقى على الرووووف اللي حدانا

ثانكس

Maha Shahen said...

ههههههههههه
دمك زى السكر يا طهقانه والله
وبعدين فعلا انا كنت مكتئبه بسبب كل ما اقلب الاقى كوره طيب واللي مبيحبش الكوره يعمل ايه يموت نفسه
يلا اهو توفير من تشغيل التليفزيون اللي مش بشغله اصلا الا نادر ما يكون
اهم وفرو النادر لحد ما هيبقى تواجدنا فى الدنيا نادر برضو
معلش لمى الزميلات الافاضل الجيران وفى اقرب بلكونه واعملو زنقة الستات ههههههه ولب بقى ومقولكيش متنسيش الحاجات الغير حضاريه من رمى القشر فى الشارع وكأنه مش تحت البيت او اقولك اطلعى علي قلب طهقان وكل ما يجى جون فى اى حد قولى هييييييييييه يقولك ازاى تشجعى الفريق التانى قوليله معلش مبعرفش لغات
دومتى مسكره ومنوره حياتنا ببسمه بسبب كلماتك وافكارك اللي ملهاش حل

ZakZoka said...

ههههههههههة
بجد مدونتك رائعة
و توبيك رائع
انا بكرهه الماتشات عشان بابا بيستولي علي التليفزيون
ربنا يعدي كاس العالم علي خير يا رب

Anonymous said...

طهقانة انتي ضحكتيني بجد
بالنسبة للجاروف جاردل ده علىرأي عبد الله ابن خالة ونيس في المسلسل لما كان بيتكلم عن الروف جاردن فهيا وسيلة رائعة للهرب من البيت.. هرب قريب مش بعيد فعلا وفكرة تحفه

بس انهم ياخدوه منكو هي دي الكوميديا بجد اللي كنت محتاجة اقراها ع المسا

طهقانة... ممممممممممموااااااااه

مها ميهوووو

Nouran said...

:D:D
ya 3eny b3d dh kolo ya5doh 3la el gahz:D:D
tb 3mlty eh ???:D

سكسكة said...

هههههههههههههههه تجنني ياطهوقتي وبعدين جيتي علي الوجيعه عند كل الستات
سكسكه