ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

الست ظي ظي الحيزبون


محدش يجي جنبي... و لا يهوب ناحية البوست ده ...علشان في حاجات بتتحدف، و لهاليب نار بتفط ،و طوب بيتزئل من كل ناحية ،و من الآخر كده أنا نــــــار ...على زيت حار الساعة دي .
و السبب إن الست زيزي جارتنا عادت من أرض المهجر ،و قررت تشتي عندنا في عمارتنا المتواضعة ،بعد ما كانت مقيمة عند أبنها في أمريكا النيكة كونيكا ،و هي أمريكا كده متحدفش علينا إلا البلاوي


و الست ظي ظي يا جماعة ...ست كبيرة في السن بس صحتها مسعداها، تهبط علينا زي العمل الرضي كل عام شهر أو شهرين في السنة ،و هي دكتوراه في توصيل الخناقات للمنازل، تقدروا تقولوا إنها مهندسة في تسليك بوابير الجاز و البوتاجازات الستة شعلة، تعرف ترمي فتيل الخناقة من دول في حجر الزبون ،و تولع في الديناميت و تتوكل على الله ...بس يا معلم.. و تلاقي الخناقة شعللت في البيت أول ما الست ظي ظي تخلع رجلها من الشقة.

و عندها القدرة على تحويل شهر العسل إلى شهر مش و فسيخ و زعابيب و أمطار و كل المصايب اللي تتخيلوها.

تصحى الصبح الساعة 7 ،و تدق عليا جرس الشقة ،و يادوب افتح الباب ..الاقيها زي الطلقة دخلت اقتحمت الصالون و تقوم قاعدة و ضاربةرجل على رجل في ثانية، و تهبد السيجارة في بقها و تبدا تسلك البابور تمهيدا للتسخين و يدور بنا الحوار التالي:

ظيظي هانم:ازيك يا طهقانة؟ أخبارك اية؟ واضح ان الحال مش اد كده... انا ملاحظة بقالك سنة و نص مغيرتيش العربيةبتاعتك.

طهقانة:أصل..

ظيظي هانم:أنا عارفة ...اكيد طهقان قارص عليكي في المصروف ...زي ما عمل كاظم ابن اخت مدام صافيناز صاحبتي قعد يقرط على مراته ... اتضح بعد كده انه بيحوش علشان يتجوز واحدة تانية

طهقانة:لأ....دا...

ظيظي هانم: ايوة ايوة ...ما هو انت اخر من يعلم... مين عارف هو بيصرف فلوسه على مين ؟؟مش يمكن مصاحب ؟و لا لايف على واحدة من اياهم ؟مفضية جيوبه اول باول

طهقانة: لا يمكن...

ظيظي هانم: انت اصلك لسة متعرفيش حاجة ...قومي اعمللنا فنجالين قهوة و انا احكيلك بلاوي الرجالة

طهقانة: حاضر..

(في عقل بالي : اية الست الأومليت دي!!! أنا ناقصة حموضة على الصبح)

طيب...لما نشوف اخرتها معاكي.....أنا قررت الف الفتيل و ابرمه و اوجهه الناحية اللي جاي منها و يا يفرقع في وشي يا يفرقع فيها و يبقى عليا و على اعدائي و لما رجعت بفنجان القهوة قلتلها:

طهقانة:في حد يسيب اوكازيونات موسم الكريسماس في أمريكا و ينزل مصر يا ظيظي هانم؟!!!!

ظيظي هانم:لا... اصل...

طهقانة: هو ابنك نزلك مصر علشان متشتريش في الاوكازيونات و لا اية؟؟اه اكيد... ما انت تلاقيكي بتفلسيه و تلاقيه عايز يحوش علشان يهاجر جزر القمر و متعرفيش توصليله

ظيظي هانم: لا ...ده أنا...

طهقانة: ايوة ما انا عارفة... انت مسكينة متقدريش تقوليله انا عايزة ارجع اميركا تاني احضر الكريسماس و ابقى انزل مصر بعدين...ده مستحيل يوافق..و لا تلاقيه واخد مراته و طالع رحلة ، و نزلك علشان يوفر مصاريفك ..يا مسكينة صعبانة عليا

ظيظي هانم:(سرحت شوية و قالت:) اه تصدقي ممكن ...انا كنت بشوف مراته بتكلم شركات سياحة و أول ما أدخل عليها تقفل الخط!! و لما أسألها تقولي :ده أنا بدور على تذاكر مخفضة علشان تنزلي مصر يا حماتي..

طهقانة: شوفتي بقى..جالك كلامي..أكيد بيجهزوا لرحلة لجزر الباهاما يقضوا الكريسماس هناك ..أنا لو منك.. الحق أرجع علشان أسافر معاهم..استني.. أنا حتصلك بشركة السياحة أحجزلك على أول طيارة

واللي فرسني اني صحيت النهاردة الصبح على صوت دوشة و خبط و جر ...أتاري إبنها المحروس (جيمي) جاب عياله و نزل مصر يقضي الكريسماس معاها بعد ما لقى تذاكر مخفضة ليه و لعياله .

يا دهوتي يعني فيها شهرين تلاتة الست ظيظي قاعدة فيهم على قلبي، و كل يوم تشلني بمحاضرة شكل

افرهد ...و اتفرس... و اطهق بقى ...و لا لأ؟!!!

مفيش غير إني أدب معاها خناقة و أقاطعها ....و لا احدفها بشوز مقاس 46... ما هم الأمريكان مبيجوش الا كده

دي حاجة تطهق بجد

أوروفوار

إمضاء



27 comments:

Ahmed said...

عسل ياطهقانه

بس خلي بالك أنا حاسس أنك عندك نفس الموهبه
(أسلك بوابير الجااااااز)
هههههههههههههه

Ahmed Hishmat said...

متشكر قوي ليكي
إني دخلت مدونتك
وعجبتني بالشكل ده
.............
مدونتك جميله قوي
.............
في أسئلة مهم جدا
إنك تجاوبيني عليها
ممكن تشرفيني
وتنوريني
...........
happy new year

أحمد (زوج مخنوق ). said...

ما هو جاور السعيد يسعد
و من جاور ظي ظي اتعلم تسليك البوابير و البوتجازات التسعة شعلة
هههههههههههههههه
بس واضح ان الفتيل فرقع عندك انتي يا طهقانة
اهي جابتلك الفاموليا كلها تقضي الكريسماس معاكي
بس تعرفي
اهو لما يبقوا قدامك تعرفي تولعيها اكتر و براحتك

خدي بالك المرة الجاية لاحسن البابور يهب في وشك و طهقان يبقى عنده عذره يتجوز المرة دي

تحياتي

وميض ابتسامة said...

من الآخر الجزمة هى الحل ... دول عالم عايزين الدق على نفوخهم بجد .. ولكن انت مش ملاحظة ان كل الحكاية شهرين فى السنة ..يعنى انت محظوظة انك بتقعدى مرتاحة عشرة شهور بحالهم ..اجمدى كدة يا شيخة كلها شهرين وتتعدل

هههههههههههه

انا حره said...

لالا بصى عارفه الجزم الحريمى بتاعت زمان دى اللى كان ليها كعب عالى ورفيع وف اخره حته حديد كدا اهو هليكى وعليها وتروحى ناقراها ببوز الكعب فنص راسها وتخلصى

Empress appy said...

هههههههه ايوه انتى قطعيها خالص وسيبك منها يا حبيبتى مبحبش اللى تحشر مناخيرها دي حاجه صعبه

maha zein said...

شوف ياختي
دي الناس بقت غريبة ليه كده
الناس بتاكل بعدها يا اوختشي صدقيني
اهم حاجة جابتلك هدية هي من امريكا ولا جت ايد ورا واي اودام

يا مراكبي said...

إذا كنتي محتاجة الجزمة بتاعتي مقاس 4520 إياها أنا في الخدمة

الساعة بخمسين ريال

Anonymous said...

يا بنت الايه يا طهقانتي

ده انتي كنتي وحشاني اوي

مها ميهوووو

صبرني يارب said...

لا حلوه صحيح يعنى

ههههههههههههههه

ولعععععععععه

ايه ده انتى بتهدي النفوس زيي ؟؟
بس المشكله ان القنبله ما فرقعت يلا مش مهم بقى اهو يمكن تتلهي فى ابنها

عاشقه وغلبانه said...

ولا ظي ظي ولا بوجي وطمطم حتي
احنا بعون الله نطهق بلد برجالتها وستاتها وعاوجزها
ظي ظي دي تشوفيلها شويه رز تنقيهم ولا كيلو كوسه تحشيه
فكرتيني بالست بتاع مسلس جميل وهناء السوري
هههههههههههه

ولا تطهقي روحك ياختي
ان شالله ظي ظي والبلد اللي جايه منها كلها

koukawy said...

يا ساتر انيل حاجه الجيران المزعجين و الحشريين و البصاصين
اللي ما بيسيبوكيش في حالك
ربنا ما يجعلنا جار و اسمه ظيظي

blue-wave said...

ههههههههههههههههههههههههههههه
بجد فطست على روحى من الضحك
ماتنزلى بوست كل يوم؟؟؟

الفراشة الصغيرة said...

يا عينى يا طهقانه
بس بقولك ايه
خليكى ماشيه فى رتم
اديلوا مترحمهوش
افتكردى اسلم طريقه ليكى
بس بصراحه هى مرهقه قوى
انك تحاولى تلاحقى واحده زى دى فى الكلام

بسمه عبدالباسط said...

هههههههههههههههههه

ضحكتينى بجد

ايه المواهب دى كلها

تحياتى يا قمر

ابقى طمنينى عليكى

سمكه واحده said...

لا انا هقلك علي حل حلو مش هي جرتك وست كبيره ولوحدها قبل ما المحروس ابنها يجي انا اقلك تعالي علي الساعه 3 بليل افتحي باب شقتك واحدفي اي حاجه واعملي اصوات وسريخ وحركات ارعبيها خليها متعرفش تقوم من علي السرير وعليكي بكده كام يوم وتحدفي شباشب ودزم علي باب الشقه وخبط وهبد واحري اقفلي اقبل ما حد يشوفك
وانا عيله صغيره كنت بسرع الجيران وكنت بعمل كده بس خدت حته علقه من بابا مخدهاش حمار في مطلع
تحياتي

صدى الصمت - عاشقة الورد - said...

ابقى حطيلها فى العصير سم فران واخلصى منها
سلام

خالتى بمبة said...

لا انتى خديها لحد اقرب فرع لزلط دى مش هكفيها واحدة بس مقاس 46 دي عايزة طلبية كاملة تتنسل على دماغها وترجع امريكا زى البووش قصدى الشوز هههههههههها

حمامة said...

هههههههههههههههههه

يا عيني
اقولك هاجري انتى ف اى حته لحد ما تمشى هي :D

دردشة على الماشى said...

البوست رائع بجد زى كل كتاباتك بس أنا مش عارفة لية بتغيبى علينا أنا فعلاً نفسى تكتبى يومياً
بس أحب أقولك إنك مش حتعرفى تجارى واحدة متمكنة فى تبويظ العلاقات الزوجية لأن دى مواهب مانقدرش عليها ربنا يبعد عننا اللى زيها
ويصبرك عليها
سلام

جنّي said...

السلام عليكم

كان الله مع اهل غزة وليغفرالله لنا تقصيرنا معهم ..

كل من له عينان يرى التواطؤ الكريه من حكومة فاسدة وحزب فاسد .. اما وانه قد خدع رئيس اكبر دولة اسلامية .. فهو غير كفيل بحكمنا .. نتحدث عن تواطؤ رئيس جاهل وحزب فاسد وحكومة اقرب الى الصهيونية ..ان لم تكن كذلك ..
اما حماس فيكفيها فخرا انها لم تستسلم كما استسلم غيرها .. لم تسرق اموال الشعب الفلسطيني كما فعل غيرها ..
حماس التي قدمت فخر شبابها شهداء في ساحة الجهاد والزود عن شرف الامة العربية والاسلامية ..
حماس العزة والكرامة والشرف ..
ولكن ماذا نحن فاعلون ؟

اقول لا للوقفات والاستنكارات ولكن اجمعوا المال والمؤن والسلاح وليفعل كل منا ما يستطيع لايصال المال والمؤن والسلاح لاهل غزة ..

ويارجال سيناء الشرفاء قوموا بايصال المال والمؤن والسلاح لاخوانكم في غزة الصامدة..

ولعنة الله على الكلب الذي استقبل العاهرة اليهودية للتواطؤ لضرب غزة ..

وحسبنا الله ونعم الوكيل

سندريلا said...

هههههههههههه عجبتنى بجد اقولك اعملى لها تذكره عوده ورجعيها تانى بلدها هى البلد نقصه هههههههه

Unknown said...

الله يكون فى عونك!! مع جارة زى دى
جمعت مابين صحة الامريكان ونشاطهم
ورزالة وسماجة الحموات الفاتنات
لو منك ولو اقدر اسكّن شقتى مفروش واروح حتة تانية

sampateek said...

مش قادرة اقول لكم كل سنة و انتم طيبين او هابي نيو يير لان الاحداث اللي بتحصل في غزة دامية و حزينة و مش مخليا حد فرحان لا بسنة جديدة و لا عنده امل اللي جاية تكون احسن
بس ربنا على المفتري و ربنا يهد اسرائيل على راس اهلها

اوروفوار

الملاك الحزين said...

السلام عليكم
كل سنه وانتي طيب
و يارب يجعل السنه الجديده خير علينا كلنا

تحياتى وأتمنى لك التوفيق

dido said...

السلام عليكم
طهقانه انتي زي السكر والله
هههههههههههههههههههههههههههه
اقولك كهربي جرس الباب علشان لما تيجي ترن تتربي ومترنش تاني وتبقي جت من عند ربنا

Unknown said...

شركة رش مبيدات بالقطيف
شركة نقل عفش بالقطيف
شركة نقل اثاث بالقطيف
شركة جلى بلاط بالقطيف
شركة عزل اسطح بالقطيف
شركة عزل خزانات بالقطيف
شركة كشف تسربات المياة بالقطيف
شركة تسليك مجارى بالقطيف
شركة تسليك وتنظيف مجارى بالقطيف
شركة شفط بيارات بالقطيف
شركة تنظيف بيارات بالقطيف