الهطل المتأخر

طبيعي جدا تشوف عيل صغير مريل، أو ولد مراهق ضارب جل في شعره و واقف على باب مدرسة البنات مسبل،أو شاب روش مسقط البنطلون من وسطه و عامل كول و شوية و البنطلون ينزل في ركبه و يبان العار

كل ده طبيعي

اللي مش طبيعي... انك تلاقي راجل كهل عدا الاربعين و لسة بيراهق ، و قال علماء النفس بيسموها المرهقة المتأخرة و أنا بسميها

الهطل المتأخر

نرجع لمرجوعنا

و احكيلكم عن الشاب المغوار صاحب الكام و اربعين عام اللي اسمه

طهقان

الراجل يا اختي عرف طريق الكوافيرهرجي و كل يوم و التاني ماسك شكل اشي بيشد الوش و اشي بيقشره و اشي بيحفلطه لا و الاكادة انه ربى سوالفه و عامل فيها جيمس دون طيب ربي ولادك الأول

و لما سألته اية حكاية النيو لوك دي يا بيبي

قالي:و فيها اية اكبر مني و بيدلعوا نفسهم

لاااه اكيد الراجل ده شايفله شوفة و ناوي يعط كده و لا كده طيب استنى انا حلبدلك في الدرة و ارئدلك

المهم مطولش عليكم قولي طولي

اكون قاعدة في الصالة و ادخل علية اوضة النوم الاقيه مشغل الديش على قنوات الاغاني و الفديون كليب و اول ما يحس بايدي على اوكرة الباب يقوم مغير القناة

بلعتها مرة و التانية و التالتة مقدرتش رحت بمنتهى البساطة ماسكة الروموت و دايسة على زرار

بروجرم باك اللي بيجيب اخر قناة كنت بتشوفها قبل دي زي الريديل في التليفون كده

طلعت قناة من اياهم اللي بتجيب خالتك شاكيرا و الست ماردونا اقصد مادونا

ينيلك يا منيل انت بتبصبص للنسوان عبر الاثير

ليه هو انا حرماك من حاجة؟ ده حتى اسانس شادية بشترية بالشئ الفلاني و احط منه و لا بيطمر فيك

المهم قلت يا بت خليه ينباسط ماهو الراجل لازم ينبسط يا زينب سيبيه يروح عن نفسه و اهو كله في الاخر ليكي

و جيت في مرة شغلتله القناة بنفسي و قعدت اتفرج معاه قام يا اختي ماسك جرنال و قعد يقرا

الله؟!!!اشمعنا دلوقتي؟ و لا هو في الخباثة حلو و في الهساسة لأ

أنا طهقت من عمايلك يا طهقان مش ناوي تعقل بقى

طهقاااااااااااانة

117 comments

Posted by bastokka طهقانة at 11:35 AM