طهقانة

امسك هدية!

تساؤلات تؤرقني ، ليه الرجالة سمعهم بيتقل لما تيجي سيرة عيد الحب و الهدايا و الشوبنج و المشاوير؟

ايه العلاقة بين طبلة الودن والمحفظة؟
ليه بيفقدوا النطق فجأة أول ما تسئلهم زوجاتهم : ها حتجيبلي ايه في عيد الحب يا حبيبي؟
و كأنهم بينسوا العربي و يبصلك نظره معناها: الست دي بتقول ايه؟

و ساعات بتوصل لمرحلة فقدان في الذاكرة كليا :الست دي مين؟؟؟

امبارح و قبل عيد الحب باسبوع لازم امهد و افرش الاسبوع بقدونس علشان افكر سي طهقان بالرومانسية و افتح قناة بين قلبه و جيبه ،يمكن يحن عليا و يجيبلي هدية زي المقروصين في ركبهم المخطوبين جديد
و دار بينا الحوار التالي:
طهقانة: (بمنتهى الاستمتاع )الله... اسمع بيت الشعر ده يا طهقان :

أبَرْقٌ بدا من جانِبِ الغَورِ لامعُ=== أم ارتَفَعتْ عن وجه حبي البراقِع

طهقان:(وجه ممتعض)ايه الكلام المعقرب ده.. ايه فاقع و واقع ده!!

طهقانة: (بمنتهى الاحباط و الآسى) انت كده ، حابطني و باطتني طول الوقت وما عندكش اي قرون استشعار للرومانسية خالص

طهقان: ( متحفزا )قرون ايه؟ هو انا صرصار!؟
طهقانة: (بربشة سريعة )عايز تقول انك مش عارف ان الفلانتين قرب؟ و انك لازم تجيبلي هدية تعبر بيها عن حبك ليا!
طهقان: (رافعا حاجبه الايسر)و ايه علاقة الحب بالهدية ؟!طيب ما عنتر كان بيحب عبلة حب مهول و مع ذلك ما جابلهاش هدية في عيد الحب
طهقانة: (واضعة يدها اليسرى في وسطها) ليه ان شاء الله ؟؟ما هو جابلها 100 ناقة حمر و كتبلها 100نخلة في الساحل الشمالي
طهقان:( مشوحا بيده اليمنى)لا انت غلطانة اللي جاب الحاجات دي هو شيبوب
طهقانة: ( تمد بوزها ) لا شيبوب قالها : افقعيلي عين و افقعلك عين و نعيش عور احنا الاتنين ،و بعدين انت عمال تلخبط في التاريخ علشان تفكس هدية الفلانتين ليه؟
ده انا حتى استعديت و اشتريت شمع احمر و ورد احمر و قلوب حمرا
طهقان : (مستغرب )ايه جو الحصبة اللي عاملاهولي ده؟

طهقانة:( تتمسكن )علشان نحتفل بالفلانتين يا حبيبي

طهقان: (رافعا حاجباه )و بعدين شمع ليه ؟هو النور حيقطع ليلتها؟

طهقانة: ( بدأت تفقد الأمل )لا شمع للرومانسية و الغموض و كده

طهقان: (رافعا الجريدة منهمكا في القراءة و قد وجد مخرجا من هذا المزنق)اساسا الفلانتين حرام ،و انا مش بحتفل بيه ..هيه
طهقانة: ( بدئت تجيب آخرها)مش لازم تحتفل بيه بس جيبلي هدية، و بعدين ما شم النسيم حرام و مع ذلك بتاكل فيه بيض مسلوق و ملانة و رنجة و فسيخ
و لا اكمن عيد الحب مافيهوش اكل؟

طهقان: ( انفرجت اساريره )و الله فكرة انتي اعمليلنا ليلتها طاجن فتة بالكوارع بصلصة حمرا و خلاص
طهقانة : ( مظهرة وجهها الآخر) انا حعملك تعويرة في دماغك و اسيح دمك و اهي برضه حمرا و خلاص
طهقان:حتضحي بيا في عيد الحب؟!

و قطع هذه المحادثة الرومنتيكية صوت جرس الباب

كل يوم و في نفس الوقت يوصلنا دليفري من السوبر ماركت بحاجات بسيطة بس لا تقاوم مثل:

حلاوة طحينية و قشطة و عيش فينو و شيكولاتة و زبادي بالفواكة و ..و.. و نقول لبتاع الدليفري احنا ما طلبناش حاجة و مع ذلك يصر ان اللي طلب الحاجات دي في التليفون ملاهم الكود بتاعنا

و بعد تفكير قصير، ندفع الحساب و ناخد الحاجة و نلتهمها في هدوء و سعادة

اتكرر الموضوع ده كذا مرة

و المرة دي بعد ما ضربنا المعلوم و حاسبنا على الطلبات و عملنا سندوتشات الحلاوة بالقشطة، لقينا الباب بيخبط و فتحنا الباب لقينا ... (باب)

ايوة باب

باب طويل عريض عنده عنين و رجلين و طالعله عضلات في كل حتة في جسمه شخص من اللي بيسموه بادي بيلدنج

و طبعا المواجهة كانت بين طهقان و(الباب) و انا طبعا براقب الموقف من بعيد و انا ماسكة دليل الجريمة :سندوتش الحلاوة بالقشطة ( شمتانة شماتة السنين و التنين في البيسين)

طهقان: (بصوت متحشرج ) اي .. ايوة يا فندم؟!
الباب: (بصوت جهوري )حضرتك بتاخد الاوردر بتاعي كل يوم ليه؟
طهقان: (رافعا حاجباه الى عنان السماء في بلاهة مفتعلة ) اوردر ايه يا فندم ؟حضرتك هو في حد يقدر ياخد اوردراتك؟
الباب: (بصوت أكثر حدة) الاوردر بتاع السوبر ماركت..

طهقان: آه ...هو حضرتك اللي بتبعتلنا الحاجات الحلوة كل يوم؟ ( بابتسامة باهته) هههههه و الله مش عارفين نشكرك ازاي؟ ده العيال بيـ ..... يقاطعه الباب قائلا:

الباب: ( يتحول فجأة الي طفل صغير زعلان ) حضرتك انا ببقى راجع من الجيم تعبان و جعان و بطلب حاجات انقنق فيها ، تيجي حضرتك تاخدها على الجاهز

و انا ابقى مش عارف اعمل ايه؟ (شوية و حيعيط طوب)

طهقان : (متمسكنا) حضرتك حط نفسك مكاني
الباب: ( اكثر تمسكنا )طيب ما حضرتك تحط نفسك مكاني و تشوف حتعمل ايه؟

طهقان: (بسذاجة )ما انا لو حطيت نفسي مكانك مش حعدي من الباب.

الباب: ( بصوت جهوري ) نعم؟!!
طهقان: ( متداركا تهوره ) لا ابدا ده انا بقول الغلط مردود، نتصل بالسوبر ماركت و نغير الكود بتاعنا واضح انه اتلخبط مع الكود بتاعكم ،و كود عنوانا اتلخبط مع كود عنوانكم يقدر كودكم يتلخبط مع عنوان كودنا زي ما كودنا اتلخبط مع كودكم هههههههه
و تنتهي الازمة بالاتصال بالسوبر ماركت و تعديل كود توصيل الطلبات و يرحل (هاني) اه و الله طلع اسم (الباب) هاني ، ياما الاسامي بتشيل؟!

و بعدين دار بيننا الحوار التالي:

طهقانة :كويس انها جت على حد تعديل عنوان الراجل في السوبر ماركت و ما اخدش معاك تصرف رزيل
طهقان: (بعنترية)يعني كان ممكن يعمل ايه؟
طهقانة : ( بشماتة) كان ممكن يبطحك و يملا الريسبشن بدمك و يكملي مجموعة الاحمرات اللي اشترتها
طهقان: (باستعلاء) يا سلام .. ما يقدرش طبعا
طهقانة : ( بنبرة تهديد )ها حتشتري لي هدية في عيد الحب؟ و لا ابعت اغير عنوانا بعنوان (هاني) تاني في السوبر ماركت و اخليه يرجع يعمل معاك الصح؟
طهقان: (مستسلما )يمهل و لا يهمل
طهقانة : (بابتسامة منتصره )بركاتك يا هااااااني
ها ...حتجيبلي ايه بقى؟
طهقان : (غاضبا) حجيبلك واحد عسكري يقبض عليكي و يخلصني منك
طهقانة :دي حاجة تطهق بجد...

حكمة اليوم: يا مستنية هدية من جوزك في الفانطين ...عمرك ما حتفلطني

اوروفوار
كتبته لكم

46 comments

Posted by bastokka طهقانة at 4:43 PM

عودة الست انتوكة

عدت اليكم من جديد اعزائي القراء بعد طول انقطاع لادون بطعم جديد هو طعم الحرية

فهنيئا لكم الوطن الجديد و هنيئا لنا مصر...الجديدة

وللثورة ميزات عديدة -لا وقت لذكرها- و انما لها سيئة واحدة

الا و هي...

عودة الست انتوكة

فقد وصلت الى ارض الوطن بحمد لله - اه ما ربنا بيتحمد على كل حال -الست انتوكة خالة طهقان النان كونان

و الست انتوكة؛ كائن احادي الخلية ،عرفت تنفد من الجواز- او يمكن الجواز هو اللي عرف ينفد منها - و سافرت الى احد دول الخليج و اشتغلت ادارية في مستشفى كبير لسنين طويلة، و قررت ترجع مصر بعد الثورة ؛ لتبدأ ربيع عمرها في الحرية ،و تقصف ربيع عمري انا

و انا اشك انها من فلول الثورة المضادة ،بالتأكيد بين قوسين انديد

و طبعا لانها مالهاش شقة في مصر ؛ قررنا نستضيفها عندنا كام شهر لحد ما تأسس شقة و تستقر هي، حتى لو اتزعزع استقرارنا احنا مافيش مشاكل ،و كنت اتمنى يستضيفوها في بورتو طرة عشرة خمستاشر سنة على زمة التحقيق

و الست انتوكة ؛سيدة انيقة جدا، تتبع ارفع خطوط موضة الستينيات- حيث انقطعت بعدها عن متابعة عروض الازياء – و ذلك في لبسها و تسريحة شعرها و هي بجانب اناقتها كمان موزة اينعم موزة – بس قديمة شوية - تلعب الرياضة يوميا بانتظام ،و تلعب باعصابنا كذلك و تشجع فريق ريال مدريد و غزل المحلة (من ساعة ما اشترت ملايات المحلة و عجبتها)

و من افضل مميزاتها: انها بتعرف تعمل نسكافية بالبوتجاز

لا ده مش صنف جديد للنسكافية ،الفكرة انها كل يوم تحط اللبن و القهوة على البوتجاز و تروح تعمل أي حاجة، و ترجع تلاقي النسكافيه فار و غرق البوتجاز، و هكذا ابتكرت نوع جديد من المشاريب، و نضفي يا طهقانة او الطمي... واحد

و السيدة انتوكة امرأة منقطعة عن العالم الافتراضي، و لا تعلم عن الانترنت الا انه غير الانترية، (و لذلك ادون براحتي) و لكنها محبة لدرجة الشغف للمسلسلات العربية و التركية و السورية

كل يوم لازم تتفرج على مسلسل الساعة 6 على قناة كذا ،و الساعة 7 و نص مسلسل اخر على قناة تانية ،و تكون شافته قبل كده من سنة و تقعد تحكيلي اللي حيحصل، و بيبقى نفسي اسلمها للمجلس العسكري، او حتى اسلم نفسي علشان اخلص من شواية المسلسلات اللي بركبها يوماتي.

و الساعة 9 مسلسل اخر على قناه عاشرة ،و هكذا حتى الساعة 12 مساءا

تقوم بحركة رشيقة، تقفل التليفزيون و تقول: التلفزيون بايخ الليلادي نقوم ننام احسن

و تطفي الانوار ،و تغسل اسنانها ،و احنا قاعدين نبص لبعض مستنيين تضربنا بالشباشب و تقولنا :على سرايركم يا كلاب

صحيح يا أولاد اللي ماربتهوش الايام و الليالي تربيه الست انتوكة الفوللي

هي امرأة كلها حسنات، ماعدا عيب صغير تحت السجادة، لا يكاد يرى بالعين المجردة ،و هو غياب الحس الامني عندها لدرجة الاختفاء،

و مش ملاحظة ان في بنوتة صغننة عمرها سنتين دلوقت، لازم يتأمن البيت علشانها

فمثلا تدخل مدام كوارث البلاكونة و تحط كرسي جنب الجدار، و تقعد تتفرج على الشارع ،و فجأة تفتكر حاجة تقوم تعملها ،و تسيب البنوتة الصغيرة- خوخة اللي جت بعد دوخة- تتسلق الكرسي و تقف تتفرج على الشارع، و ربنا وحدة اللي ستر و ماوقعتش البنت زرع بصل في الشارع...يا اماااااااااااااااااا

و مرة فتحت زرار الغاز في البوتجاز، و عقدت تدور على الكبريت مالقتهوش فراحت تطلع ولاعة من شنطتها، دخلت الاوضة نسيت هي كانت رايحة تعمل ايه، قعدت تتفرج على المجلات و الغاز مفتوح ، الجيران خبطوا علينا و قالوا: انتم ناويين تنولونا الشهادة و لا ايه؟

....يا لهووووووي

و مرة مسكت السكينة بتقشر تفاحة، و سابتها على الترابيزة و قامت ،رجعت انا لقيت البنت بتلعب بالسكينة ،و الحمدلله ما غزتش اخوها ضبة و مفتاح . و بقيت نفسي ابعتها ليبيا تعمل بيكنيك و تاخد لون قنابل عجب...يا خراااااااشي

ده غير المشروبات الساخنة اللي بتحطها مدام كوارث هنا و هناك و ربنا بينجي البنوتة الصغننة من الحرق بلطفه

ولا الادوية المرمية في متناول الأطفال، و اللي غلبت ارفعها على رف او شوفونيرة مافيش فايدة ، و لذلك انا اشك انها تابعة لامن الدولة المحلول و انها واحدة من اهم كوادره ،مش بعيد لو فتشنا اوضتها نلاقي برنس زي بتلع عدولة

و امبارح فتحت حنفية البانيو علشان تاخد دش و طبعا نسيتها ،و راحت تتعاطى حقنة المسلسل و كانت الشقة حتغرق

هي دي الست اللي لازم نرشحها لرياسة الجمهورية يا جماعة ؛علشان تفتح الهاويس و تنساه و تغرق اسرائيل و نرتاح منهم هما الاتنين

و لان الفراغ وحش...لا تجد الست انتوكة تسليه بجانب المسلسلات غير حشر مناخيرها في كل حاجة فمثلا:

انتوكة:بتدي الشغالة كام؟ ليه كتير؟ماتستاهلش؟ يا عيني عليك يا طهقان فلوسك مرمية على الارض.... مع مصمصة الشفايف

انتوكة:هي صحبتك دي سايبة نفسها كده ليه؟ هي كام كيلو؟ لازم تخس، هي بتشتغل؟ ليه؟ و بتاع ايه ؟مع مصمصة الشفايف برضه

انتوكة: بتسيبي الاولاد يروحوا النادي لوحدهم؟ مش بتخافي من البلطجية؟ ازاي ؟ يا خبر...و طبعااااا مصمصة شفايف

و انا: ...يا دهووووووتي

انا خلاص بقيت بهرب بفتح الباء و الهاء و تشديد الراء

و الابلاتين لسع في الترالالي

و لا شك ان موتور مخي محتاج عمرة

و تعديت مرحلة الطهق لمراحل ابعد بعيــــــــــــــــــــــــــــــــــــــــــــــــــــد و تقريبا تهت و مش عارفة ارجع

لذلك

اخواني القراء

انا من ورطتي هذه ادعوكم للنزول الى ميدان روكسي يوم الجمعة القادم للمطالبة

برحيل انتوكة

و نبعتها شرم او كفر الشيخ

و لتكن الجمعة القادمة هي جمعة التخليص او التخلص ماتفرقش

حكمة اليوم:

من راقب الناس مات كمدا و من راقب انتوكة مات عمدا

دي حاجة تطهق بجد

امضاء

55 comments

Posted by bastokka طهقانة at 12:51 AM

فرح الفورسيزون

امبارح لقيت سي طهقان جوزي داخل عليا و باين على ملامحة تعبيرات القط اللي بيدبر حاجة من ورا الجزار و مستني الفرصة انه ينقض على حتة عضمة، والفرحة حتنط من عنيه ،بس بيحاول يدعي الوقار و الجدية

و بيقولي:

طهقان: طلعيلي البدلة السودا و القميص الرمادي و الجرافات المقلمة يا طهقانة ؛علشان عندي فرح بكرة

طهقانة:فرح مين؟ و فين ؟و ليه ؟و ايه عندك دي؟ و مايكونش عندنا ليه؟

طهقان: ده فرح شاب زميلنا في الشغل، مسكين.. حيتجوز بكرة و عازمنا احنا زملاؤه في الشغل نقف جنبه و نواسيه في ليله زي دي

طهقانة:و حتروحوا تقروا على روحه ،و تاخدوا معاكم قرص و بلح ابريمي؟

طهقان: اهو..نعمل الواجب و خلاص

طهقانة:و ليه ما اجيش معاك؟

طهقان: بقولك عازم زمايله في المكتب، و الدعوة خاص، يعني حنبقى رجالة كلنا على الترابيزة

طهقانة:و باشمهندسة وفاء !!ماهي زميلتكم في المكتب مش معزومة؟

طهقان: مش عارف؟! يمكن اه و يمكن لأ

طهقانة:اممم.. يعني في ستات اهو

طهقان: ياستي الدعوة باسمي مش باسمي انا و انت، و بعدين انتي حتشبطي زي العيال الصغيرة؟!

طهقانة:ماشي.. ماشي ..و فين الفرح ده ان شاء الله؟

طهقان: في فندق الفور سيزون

طهقانة:نعم يا حبيبي؟ فور ايه؟ يا شيري؟ سيزون ..مش ده بتاع ابو برش اللي اسمه هشام طلعت؟ لا يا حبيبي.. ده فندق افراحه كلها هلس و مسخرة ،و مافيش اقل من الرقاصة (تينا) تيجي ترقص و (زعرور) يغني، مانتاش رايح

طهقان: الجنونة حتطلع بقى و لا ايه؟ انا مالي و مال الرقاصة اللوز دي،و لا كعبور ده؟! انا حروح اسلم و اقعد اشرب كاسين ،اقصد كبايتين شربات و تاني راجع

طهقانة:ماهو بص.. مانتاش رايح يعني مانتاش رايح، و الا ابطح نفسي عليك و تروح فيا ست شهور؟!!

طهقان: طيب اقعدي مع نفسك انتي كده ،و جهزي اللي قلتلك عليه و انا نازل رايح للحلاق يظبطلي شعري ،و ارجع الاقي كله جاهز،مفهوم؟!

و قبل ما ارد و لا اصد كان هابد باب الشقة وراه ،و سايبني اغلي في دمي و لا على باله

و بسرعة عملت اتصلاتي بزوجات زمايله في الشغل و فهمت منهم ان مافيش ولا واحدة رايحة، و ان الرجالة فهموهم انها عزومة رجالي

طيب و ايه العمل يا بت يا طهقانة ؟حتسيبيه يروح يضربله كاسين قال: شربات؟ و يتفرج على الرقاصة اللي بترقص اياه لكسكلياه من غير بنطلون برقبة و لا فانيلة برجلين و يجي، و انت قاعدة زي الكبة في البيت!!

لاممكن ابدا

فكرت و دبرت و التدابير على الله و جه يوم الفرح و دخل سي طوطو اخد دش و طوووول تقولوش هو العريس!! ، و طلع قعد ساعة يلبس ،و انا برة شامة ريحة البرفان فايحة من الاوضة، و قاعد يغني و يصفر لحن اغنية عبد الحليم( تخنوه و عمره ما خانكم)

يعني عقلة الباطن بيأنبه و لسانه بيفضحة

و خرج من الغرفة و كانت المفاجأة

تا را راااااااااا رااااااااااااا

طهقانة:اية رايك؟

طهقان: ايه اللي انت لابساه ده؟ انتي رايحة فين بالصلاة على النبي بلبس السهرة ده؟ مش انا قلتلك مش حينفع تيجي معايا و ان ده....

طهقانة:استني بس..(بدلال ممزوج بسنة استهبال) مين قالك اني رايحة معاك؟ انا معزومة على سهرة حريمي مع صاحباتي..

طهقان:(بشك و ريبة) صاحبات ايه و بتاع ايه؟

طهقانة:(بلهجة اقناع ) صاحباتي مراتات اصحابك اللي معزومين معاك في الفرح، اتفقت معاهم كلهم نتقابل في الفور سيزون في قاعة المطاعم، و نتعشى سوا كلنا على حسابك ، يادوب على ما انت تشرب كاس العذاب اقصد كاس الشربات نكون احنا خلصنا و نروح سوا كلنا

طهقان: عزمتيهم على حسابي ؟!!انت عارفة النفر يتكلف كام هناك؟

طهقانة:و ماله يا حبيبي ما انت حتتعشى هناك و لا انا ماليش نفس؟

طهقان:( يجز على اسنانه و يبرق بعنيه و الوان الطيف تتوالى على سحنته لون لون اخرهم الازرق)

طهقانة:(ببرائة متناهية)مالك يا طوطو ؟ المفاجأة معجبتكش

طهقان:(يخلع جرفتته و يفك زرار القميص) منك لله يا شيخة، امشي خشي جوه مافيش لا فور سيزون و لا فور كات ،و لا كونكت فور حتى

طهقانة:(بابتسامة خبيثة)ليه يا طوطو انت مش رايح؟

طهقان: لا مش متنيل (بصوت واطي يسمونه برطمة) ضيعتي علينا الليلة كان الواحد حيغسل عنيه و يشوف جتت تانية بدل الجثث اللي هنا

طهقانة: بتقول حاجة يا روحي؟