طهقانة

عودة الست انتوكة

2011-05-16T00:51:00.000-07:00

عدت اليكم من جديد اعزائي القراء بعد طول انقطاع لادون بطعم جديد هو طعم الحرية

فهنيئا لكم الوطن الجديد و هنيئا لنا مصر...الجديدة

وللثورة ميزات عديدة -لا وقت لذكرها- و انما لها سيئة واحدة

الا و هي...

عودة الست انتوكة

فقد وصلت الى ارض الوطن بحمد لله - اه ما ربنا بيتحمد على كل حال -الست انتوكة خالة طهقان النان كونان

و الست انتوكة؛ كائن احادي الخلية ،عرفت تنفد من الجواز- او يمكن الجواز هو اللي عرف ينفد منها - و سافرت الى احد دول الخليج و اشتغلت ادارية في مستشفى كبير لسنين طويلة، و قررت ترجع مصر بعد الثورة ؛ لتبدأ ربيع عمرها في الحرية ،و تقصف ربيع عمري انا

و انا اشك انها من فلول الثورة المضادة ،بالتأكيد بين قوسين انديد

و طبعا لانها مالهاش شقة في مصر ؛ قررنا نستضيفها عندنا كام شهر لحد ما تأسس شقة و تستقر هي، حتى لو اتزعزع استقرارنا احنا مافيش مشاكل ،و كنت اتمنى يستضيفوها في بورتو طرة عشرة خمستاشر سنة على زمة التحقيق

و الست انتوكة ؛سيدة انيقة جدا، تتبع ارفع خطوط موضة الستينيات- حيث انقطعت بعدها عن متابعة عروض الازياء – و ذلك في لبسها و تسريحة شعرها و هي بجانب اناقتها كمان موزة اينعم موزة – بس قديمة شوية - تلعب الرياضة يوميا بانتظام ،و تلعب باعصابنا كذلك و تشجع فريق ريال مدريد و غزل المحلة (من ساعة ما اشترت ملايات المحلة و عجبتها)

و من افضل مميزاتها: انها بتعرف تعمل نسكافية بالبوتجاز

لا ده مش صنف جديد للنسكافية ،الفكرة انها كل يوم تحط اللبن و القهوة على البوتجاز و تروح تعمل أي حاجة، و ترجع تلاقي النسكافيه فار و غرق البوتجاز، و هكذا ابتكرت نوع جديد من المشاريب، و نضفي يا طهقانة او الطمي... واحد

و السيدة انتوكة امرأة منقطعة عن العالم الافتراضي، و لا تعلم عن الانترنت الا انه غير الانترية، (و لذلك ادون براحتي) و لكنها محبة لدرجة الشغف للمسلسلات العربية و التركية و السورية

كل يوم لازم تتفرج على مسلسل الساعة 6 على قناة كذا ،و الساعة 7 و نص مسلسل اخر على قناة تانية ،و تكون شافته قبل كده من سنة و تقعد تحكيلي اللي حيحصل، و بيبقى نفسي اسلمها للمجلس العسكري، او حتى اسلم نفسي علشان اخلص من شواية المسلسلات اللي بركبها يوماتي.

و الساعة 9 مسلسل اخر على قناه عاشرة ،و هكذا حتى الساعة 12 مساءا

تقوم بحركة رشيقة، تقفل التليفزيون و تقول: التلفزيون بايخ الليلادي نقوم ننام احسن

و تطفي الانوار ،و تغسل اسنانها ،و احنا قاعدين نبص لبعض مستنيين تضربنا بالشباشب و تقولنا :على سرايركم يا كلاب

صحيح يا أولاد اللي ماربتهوش الايام و الليالي تربيه الست انتوكة الفوللي

هي امرأة كلها حسنات، ماعدا عيب صغير تحت السجادة، لا يكاد يرى بالعين المجردة ،و هو غياب الحس الامني عندها لدرجة الاختفاء،

و مش ملاحظة ان في بنوتة صغننة عمرها سنتين دلوقت، لازم يتأمن البيت علشانها

فمثلا تدخل مدام كوارث البلاكونة و تحط كرسي جنب الجدار، و تقعد تتفرج على الشارع ،و فجأة تفتكر حاجة تقوم تعملها ،و تسيب البنوتة الصغيرة- خوخة اللي جت بعد دوخة- تتسلق الكرسي و تقف تتفرج على الشارع، و ربنا وحدة اللي ستر و ماوقعتش البنت زرع بصل في الشارع...يا اماااااااااااااااااا

و مرة فتحت زرار الغاز في البوتجاز، و عقدت تدور على الكبريت مالقتهوش فراحت تطلع ولاعة من شنطتها، دخلت الاوضة نسيت هي كانت رايحة تعمل ايه، قعدت تتفرج على المجلات و الغاز مفتوح ، الجيران خبطوا علينا و قالوا: انتم ناويين تنولونا الشهادة و لا ايه؟

....يا لهووووووي

و مرة مسكت السكينة بتقشر تفاحة، و سابتها على الترابيزة و قامت ،رجعت انا لقيت البنت بتلعب بالسكينة ،و الحمدلله ما غزتش اخوها ضبة و مفتاح . و بقيت نفسي ابعتها ليبيا تعمل بيكنيك و تاخد لون قنابل عجب...يا خراااااااشي

ده غير المشروبات الساخنة اللي بتحطها مدام كوارث هنا و هناك و ربنا بينجي البنوتة الصغننة من الحرق بلطفه

ولا الادوية المرمية في متناول الأطفال، و اللي غلبت ارفعها على رف او شوفونيرة مافيش فايدة ، و لذلك انا اشك انها تابعة لامن الدولة المحلول و انها واحدة من اهم كوادره ،مش بعيد لو فتشنا اوضتها نلاقي برنس زي بتلع عدولة

و امبارح فتحت حنفية البانيو علشان تاخد دش و طبعا نسيتها ،و راحت تتعاطى حقنة المسلسل و كانت الشقة حتغرق

هي دي الست اللي لازم نرشحها لرياسة الجمهورية يا جماعة ؛علشان تفتح الهاويس و تنساه و تغرق اسرائيل و نرتاح منهم هما الاتنين

و لان الفراغ وحش...لا تجد الست انتوكة تسليه بجانب المسلسلات غير حشر مناخيرها في كل حاجة فمثلا:

انتوكة:بتدي الشغالة كام؟ ليه كتير؟ماتستاهلش؟ يا عيني عليك يا طهقان فلوسك مرمية على الارض.... مع مصمصة الشفايف

انتوكة:هي صحبتك دي سايبة نفسها كده ليه؟ هي كام كيلو؟ لازم تخس، هي بتشتغل؟ ليه؟ و بتاع ايه ؟مع مصمصة الشفايف برضه

انتوكة: بتسيبي الاولاد يروحوا النادي لوحدهم؟ مش بتخافي من البلطجية؟ ازاي ؟ يا خبر...و طبعااااا مصمصة شفايف

و انا: ...يا دهووووووتي

انا خلاص بقيت بهرب بفتح الباء و الهاء و تشديد الراء

و الابلاتين لسع في الترالالي

و لا شك ان موتور مخي محتاج عمرة

و تعديت مرحلة الطهق لمراحل ابعد بعيــــــــــــــــــــــــــــــــــــــــــــــــــــد و تقريبا تهت و مش عارفة ارجع

لذلك

اخواني القراء

انا من ورطتي هذه ادعوكم للنزول الى ميدان روكسي يوم الجمعة القادم للمطالبة

برحيل انتوكة

و نبعتها شرم او كفر الشيخ

و لتكن الجمعة القادمة هي جمعة التخليص او التخلص ماتفرقش

حكمة اليوم:

من راقب الناس مات كمدا و من راقب انتوكة مات عمدا

دي حاجة تطهق بجد

امضاء

فرح الفورسيزون

2010-12-01T15:51:00.000-08:00

امبارح لقيت سي طهقان جوزي داخل عليا و باين على ملامحة تعبيرات القط اللي بيدبر حاجة من ورا الجزار و مستني الفرصة انه ينقض على حتة عضمة، والفرحة حتنط من عنيه ،بس بيحاول يدعي الوقار و الجدية

و بيقولي:

طهقان: طلعيلي البدلة السودا و القميص الرمادي و الجرافات المقلمة يا طهقانة ؛علشان عندي فرح بكرة

طهقانة:فرح مين؟ و فين ؟و ليه ؟و ايه عندك دي؟ و مايكونش عندنا ليه؟

طهقان: ده فرح شاب زميلنا في الشغل، مسكين.. حيتجوز بكرة و عازمنا احنا زملاؤه في الشغل نقف جنبه و نواسيه في ليله زي دي

طهقانة:و حتروحوا تقروا على روحه ،و تاخدوا معاكم قرص و بلح ابريمي؟

طهقان: اهو..نعمل الواجب و خلاص

طهقانة:و ليه ما اجيش معاك؟

طهقان: بقولك عازم زمايله في المكتب، و الدعوة خاص، يعني حنبقى رجالة كلنا على الترابيزة

طهقانة:و باشمهندسة وفاء !!ماهي زميلتكم في المكتب مش معزومة؟

طهقان: مش عارف؟! يمكن اه و يمكن لأ

طهقانة:اممم.. يعني في ستات اهو

طهقان: ياستي الدعوة باسمي مش باسمي انا و انت، و بعدين انتي حتشبطي زي العيال الصغيرة؟!

طهقانة:ماشي.. ماشي ..و فين الفرح ده ان شاء الله؟

طهقان: في فندق الفور سيزون

طهقانة:نعم يا حبيبي؟ فور ايه؟ يا شيري؟ سيزون ..مش ده بتاع ابو برش اللي اسمه هشام طلعت؟ لا يا حبيبي.. ده فندق افراحه كلها هلس و مسخرة ،و مافيش اقل من الرقاصة (تينا) تيجي ترقص و (زعرور) يغني، مانتاش رايح

طهقان: الجنونة حتطلع بقى و لا ايه؟ انا مالي و مال الرقاصة اللوز دي،و لا كعبور ده؟! انا حروح اسلم و اقعد اشرب كاسين ،اقصد كبايتين شربات و تاني راجع

طهقانة:ماهو بص.. مانتاش رايح يعني مانتاش رايح، و الا ابطح نفسي عليك و تروح فيا ست شهور؟!!

طهقان: طيب اقعدي مع نفسك انتي كده ،و جهزي اللي قلتلك عليه و انا نازل رايح للحلاق يظبطلي شعري ،و ارجع الاقي كله جاهز،مفهوم؟!

و قبل ما ارد و لا اصد كان هابد باب الشقة وراه ،و سايبني اغلي في دمي و لا على باله

و بسرعة عملت اتصلاتي بزوجات زمايله في الشغل و فهمت منهم ان مافيش ولا واحدة رايحة، و ان الرجالة فهموهم انها عزومة رجالي

طيب و ايه العمل يا بت يا طهقانة ؟حتسيبيه يروح يضربله كاسين قال: شربات؟ و يتفرج على الرقاصة اللي بترقص اياه لكسكلياه من غير بنطلون برقبة و لا فانيلة برجلين و يجي، و انت قاعدة زي الكبة في البيت!!

لاممكن ابدا

فكرت و دبرت و التدابير على الله و جه يوم الفرح و دخل سي طوطو اخد دش و طوووول تقولوش هو العريس!! ، و طلع قعد ساعة يلبس ،و انا برة شامة ريحة البرفان فايحة من الاوضة، و قاعد يغني و يصفر لحن اغنية عبد الحليم( تخنوه و عمره ما خانكم)

يعني عقلة الباطن بيأنبه و لسانه بيفضحة

و خرج من الغرفة و كانت المفاجأة

تا را راااااااااا رااااااااااااا

طهقانة:اية رايك؟

طهقان: ايه اللي انت لابساه ده؟ انتي رايحة فين بالصلاة على النبي بلبس السهرة ده؟ مش انا قلتلك مش حينفع تيجي معايا و ان ده....

طهقانة:استني بس..(بدلال ممزوج بسنة استهبال) مين قالك اني رايحة معاك؟ انا معزومة على سهرة حريمي مع صاحباتي..

طهقان:(بشك و ريبة) صاحبات ايه و بتاع ايه؟

طهقانة:(بلهجة اقناع ) صاحباتي مراتات اصحابك اللي معزومين معاك في الفرح، اتفقت معاهم كلهم نتقابل في الفور سيزون في قاعة المطاعم، و نتعشى سوا كلنا على حسابك ، يادوب على ما انت تشرب كاس العذاب اقصد كاس الشربات نكون احنا خلصنا و نروح سوا كلنا

طهقان: عزمتيهم على حسابي ؟!!انت عارفة النفر يتكلف كام هناك؟

طهقانة:و ماله يا حبيبي ما انت حتتعشى هناك و لا انا ماليش نفس؟

طهقان:( يجز على اسنانه و يبرق بعنيه و الوان الطيف تتوالى على سحنته لون لون اخرهم الازرق)

طهقانة:(ببرائة متناهية)مالك يا طوطو ؟ المفاجأة معجبتكش

طهقان:(يخلع جرفتته و يفك زرار القميص) منك لله يا شيخة، امشي خشي جوه مافيش لا فور سيزون و لا فور كات ،و لا كونكت فور حتى

طهقانة:(بابتسامة خبيثة)ليه يا طوطو انت مش رايح؟

طهقان: لا مش متنيل (بصوت واطي يسمونه برطمة) ضيعتي علينا الليلة كان الواحد حيغسل عنيه و يشوف جتت تانية بدل الجثث اللي هنا

طهقانة: بتقول حاجة يا روحي؟

طهقان: (بصوت عالي) لأ مابقولش

طهقانة: كويس برضه ،اما الحق اتصل اعتذرلهم بقى،و اتصل بجاد يبعتلنا سندوتشات فول و طعمية و شكشوكة للعشا.

طهقان: بقى بعد الديك الرومي و الجمبري الجامبو , و القطط اللوكس تصفصف على فول و طعمية و سحلية

(مخدة طائرة تستقر في دماغي)

طهقانة: أأأأأأي....كده برضه يا طوطو؟

دي حاجة تطهق بجد

حكمة اليوم: قصقصي ريش طيرك لايروح الفرح من غيرك

اورفوار

امضاء

خروف..طهقان

2010-11-21T06:01:00.000-08:00

اعزائي البلوجرية.. ازيكم عاملين ايه؟ يا رب تكونوا كلكم بخير و صحة و عافية و كل سنة و انتم طيبين بمناسبة عيد الاضحى المبارك، و يارب نكون كلنا على عرفات السنة الجاية.

و بهذة المناسبة السعيدة؛ حصل حاجة مش سعيدة ،ساهمت في اتساع رقعة الطهقان عندي من 4جيجا ل 120 جيجا ،و حصل تعديل لرامات الغيظ لدرجة مايعرفش عم توشيبا نفسه يعملها

و السبب.. ان سي الاستاذ طهقان جوزي -طيب الله ثراه -اتشملل و راح جاب خروف العيد بدري السنة دي قال ايه؟ علشان يتعلف اسبوعين قبل العيد و يتخن و يربرب و يتعمل عليه احلى شوربة و اجدع فته في بلوجر كله و ريحة التقلية توصل لجوجل و يجي يعزم نفسه عندنا

و طبعا لان ما ينفعش نسيب الاستاذ خروف عندنا في البيت؛ اقترح الاستاذ طهقان انه يسيبه عند البواب، و نبقى ننزله الاكل يوميا (فول بورد)

و يظهر اننا مش لوحدنا اللي فكرنا الفكيرة دي،لاني سمعت من كام يوم( كورال خرفان ) بيمأمئو في المنور و يظهر الجيران كمان سايبين خواريفهم عند البواب.

و يوم الجمعة بعد الصلاة سمعت دوشة و زيطة ،بصيت من البلاكونة؛ لقيت البواب عمال يصوت و يعيط و السكان ملمومين حواليه ،لبست و نزلت جري اشوف ايه الحكاية

لقيت البواب بيقول:و الله يا استاذ انا كنت رابطهم في ماسورة في المنور، و روحت اصلي ،ما اعرفش راحوا فين

الاستاذ جارنا :يعني ايه ؟اتسرقوا و لا هربوا؟

البواب:انا ايش عرفني؟! انا جيت لقيت باب الاوضة مفتوح ،و مافيش و لا خروف في المنور

الاستاذ جارنا: اكيد اتسرقوا،اصل مش ممكن يكون هربوا من الدبح ،و لا جالهم عقد عمل برة؟

البواب: ده انا حتى كنت معلمهم علشان ما يتلخبطوش، و محافظ عليهم على الاخر

طهقان:يعني كنت معلمهم العوم؟ و ايه الفايدة اهم راحوا

البواب: انا كنت كاتب اسم كل ساكن على الخروف بتاعه، يمكن لو حد لاقاهم يجيبهم

طهقان: يعني كنت كاتب اسمي على الخروف يا راجل؟ ده كلام؟ و بعدين انت كنت كاتب اسمي بس و لا رقم تليفوني كمان؟

الاستاذ جارنا: حد يكتب اسم بني ادم على خروف يا راجل انت ؟ ايه بتعملنا دعاية انتخابية على الخرفان؟

البواب: و انا اعمل ايه بس يا بيه؟ دول كانوا 6 خرفان خفت يتلخبطوا مع بعض

المهم معرفناش مصير الخرفان.هل ضاعوا و لا اتسرقوا ، و لا اذا كان حد خطفهم و حيطلب فدية شوالين رز للفتة و لا اذا كانوا اتفقوا مع بعض و اتنكروا و هربوا .و طلع كل ساكن شقته و هو يجر اذيال الخيبة

و في الشقة و انا حموت من الضحك، دار الحوار التالي:

طهقانة: و ايه العمل دلوقت؟ حندبح ايه يا طهقان في العيد؟ نمشيها بط بقى و خلاص؟

طهقان: ماينفعش يا طهقانة لازم حاجة باربع رجلين

طهقانة : ندبح بطتين،يبقوا اربع رجلين

و اللي جالي جالي بالضحك، و طهقان قاعد مفروس من اللي حصل و عمال يقولي: ايه اللي بيضحكك يا ست انتي

طهقانة: كل ما اتصور الخروف و هو بيجري في الشارع و اسمك مكتوب عليه افطس من الضحك

بقولك ايه يا طهقان بما انكم اسمكم زي بعض ما ندبحك و نضحي بيك انت و خلاص

طهقان: شكلي انا اللي حدبحك و اشرب من دمك تشيك بلود فريش

طهقانة : كده برضه؟ دي حاجة تطهق ....بجد

اوروفوار

امضاء

بارانويا متفشتقة

2010-10-14T08:38:00.000-07:00

ايه اللي بيحصل ده؟! هو اللي بنعمله في الناس؛ حيطلع علينا و لا ايه؟

يرضيكم كده يا سادة يا قراء؟ الاقي مع زوجي الهمام و هو جاي من الشغل كتاب عنوانه(كيف تقتل زوجتك!)

طهقانة: ايه اللي انت مشتريه ده يا طهقان؟

طهقان:انا ما اشترتهوش ،ده جاني هدية من حازم صاحبي

طهقانة:و حازم عايزك تقتلني ليه يا سفاح بورسعيد؟

طهقان:لا يا شيخة ده مجرد كتاب ساخر، هزار يعني

طهقانة:على كل حال انا حشيل السكاكين و المقصات احتياطي ،لحسن الكتاب يقلب بغم ،و تفكر تقور مخي و تشيل منه الافكار الاستيطانية و مشاوير الشوبنج و طلبات البيت

و من ساعة ما طهقان جاب الكتاب ؛و هو كل ليلة قبل ما ينام ياخد الكتاب تحت باطه و يدخل السرير، و هاتك يا قراية .و تحول الى دودة كتب انما دودة ايه !اكس لارج

طهقان:هههههه الكتاب ده مسخرة

طهقانة:لا ياشيخ؟ عاجبك قوي؟ و ايه اللي يضحك بقى ؟

طهقان:بيقولك قال ايه؟ اللي عايز يقتل مراته يخليها تسكت يوم بحاله هههههههه، قوم تموت

طهقانة:ده على اعتبار انها حتبلع ريقها، تتسمم تموت، صح؟

طهقان:لأ يقصد يقولك يعني ان الست بتحب الكلام زي عنيها، و السكوت يخنقها

طهقانة:يا سلام ..و ايه كمان؟!

طهقان:و بيقولك طريقة تانية لقتل الزوجة ؛انك تسكنها مع حماتها هههههههه

طهقانة: و ده ليه؟ هي حماتها فيها سلك مكشوف حتكهربها؟

طهقان:لا طبعا ..بس من كتر المشاكل حتتشل و تموت

طهقانة:كلها افكار باكسة و سخيفة و ملهاش طعم

طهقان:لا بالعكس.. دي دمها خفيف خالص

طهقانة: (ممتعضة و رافعة حاجب و منزلة التاني و علامات الاستنكار و القرف باينة على وجهها) يا سلام

تاني يوم الاقي سي طهقان مدوب حاجة في كباية ماية لونها اصفر و بيشرب في المطبخ الصبح على الريق

طهقانة:ايه اللي بتشربه ده؟

طهقان:دي معلقة عسل بدوبها في كباية ماية على الريق مفيدة جدا ، تاخدي بق؟

طهقانة:احمم... لا شكرا ( علامات الترقب و الشك )و دي وصفة من الكتاب اياه برضه؟

طهقان:هههههه لا يا شيخة ده طب نبوي لرفع المناعة بأمر الله

طهقانة: اللهم قوي ايمانك

مش عارفة ليه مجمع الفيران بيلعب تصفيات النهائي في عبي، و حاسة ان طهقان بيدبرلي موته، ما اهو اصله العلم ده سلاح ذو حدين

فكرت و قلت يا بت لازم تصطاديه قبل ما يصطادك و توقعيه في الحفرة اللي بيحفرهالك

و عنها و جمعت شوية ادوات دفاعية في الكمودينو جانبي منها على سبيل المثال لا الحصر:(الشاكوش،مضرب الراكت الكبير،رجل ترابيزة السفرة القديمة...الخ) و كل ده كاجراءات وقائية لاي ضربة موجهة يعقبها رد فعل مدروس فجائي لمحاصرة العدو

و بقيت عايشة في البيت مرووشة، كل ما يقرب مني اتنفض ،و كل ما يقدملي حاجة اكلها او اشربها ارفضها بهلع، اه ماهو حرص و لا تخون

وامبارح، دخلت الحمام اخد الدش بتاعي ،لقيت حد موصل فيشة السيشوار في الحمام و مقربها من البانيو، بحيث اللي يفتح ستارة البانيو يقع السيشوار في البانيو اللي ضروري يكون مليان مية، و يحصل ماس و اتكهرب :(

و هنا اتاكدلي نيته السوداء في التخلص مني ،اكيد عارف اني داخلة اخد دش ؛و مدبرلي موته، يا عيني على شبابي!! بقى انا اموت متكهربة؟! و على ايد مين؟ جوزي ابو عيالي

طلعت من الحمام ،و الشرار بينط من عيني، و وشي احمر من الطماطم ايام ما كنا بنجيبها ،و الصهد طالع من بقى قرب يبقى نار

طهقانة:( ايدي في وسطي) انت يا استاذ؟ بانت نيتك السوداء و عرفت عملتك المهببة ، انا كنت شاكة..شاكة... بس دلوقت اتأكدت

طهقان: ايه في ايه؟ مالك؟ انا....

طهقانة: انت ايه و بتاع ايه؟! عمري ما كنت اتصور ان انت تعمل كده و بعد كل السنين دي؟

طهقان:و الله ما كان قصدي... انت فاهماني غلط انا...

طهقانة:مافيش أي عذر ممكن يسمحلك تعمل اللي عملته ،و مع مين معايا انا؟؟؟؟؟

طهقان:افهميني بس حشرحلك...انا اخدته صحيح بس مش بنيه سيئة، انا أخدت الخاتم الالماس بتاعك اللي جبتهولك شبكة ؛علشان اصلحه و المعه و اركبله الحجر اللي وقع منه؛ علشان تلبسيه بكرة في عيد جوازنا، انت افتكرتيه اتسرق و لا ايه؟

طهقانة: خاتم؟ بتاعي؟ اخدته؟ (علامات الصدمة و الاسبهلال و التفشتق على وجهي)

طهقان:ايوة... امال انت كنت فاكرة ايه؟

طهقانة الصغيرة: ماما.. ماما ..مش عارفة اشغل السيشوار هو بيشتغل ازاي؟ انا بقالي ساعة في الحمام و بحاول معاه مش عارفة اشغله

طهقانة: هو انتي اللي ركبتي السيشوار في الحمام؟!(مكسوفة)

طهقان:كل سنة و انتي طيبة يا حبيبتي،عاملينلك حفلة بكرة بمناسبة مرور 18 سنة جواز ،عقبال المؤبد يا روحي

طهقانة: و انت.....طيب....ان بعض الظن اثم....مؤبد؟؟ ده على اعتبار اني سجناك يعني

دي حاجة ....تكسف بجد

اوروفوار

امضاء

بطيخ ..حبيبي

2010-06-27T07:27:00.002-07:00

صحيح الجو اليومين اللي فاتوا كان حر موت، و البيضة كانت تتقلي على أي كبوت عربية الساعة 12 الظهر، و صحيح ان كل المكيفات اللي في الوطن العربي عيطت من كتر الشغل، و عملت وقفة احتجاجية في معرض كارير تطالب بتخفيض ساعات العمل الرسمية

لكن ده مايديش الحق لطهقان يعمل اللي عمله فيا انا و العيال ده ،و خليكوا شاهدين يا بلوجرية

يوم الاحد اللي فات و اللي كانت حرارة الجو فيه حوالي خمسين درجة ،لقيت جوزي الهمام طهقان باشا خلنجان ؛داخل البيت العصر و في ايديه الاتنين بطيختين من النوع الكبير

فرحت و هللت ،و رفعت شعارات من بتاعة الانتخابات اللي زي :

ربنا ما يحرمنا من دخلتك علينا و ايدك مليانة

و اهي دي الازواج و لا بلاش

و ادخل على مراتك ببطيخة و لا تدخلش عليها بفسيخة

و ملحقتش افرح، اذ لقيت البواب داخل وراه ببطختين تانين في نفس هذا الوقت

طهقانة:اربع بطيخات!! مش كتير يا طهقان؟

طهقان:خلي العيال ياكلوا

طهقانة:اه فعلا مساكين نفسهم مسدودة من الحر، دول ما اكلوش في العشا امبارح الا 5 كيلو خوخ بس

طهقان:يلا ربنا يبارك ،خليهم يبردوا على قلبهم

طهقانة:ربنا ما يحرمنا منك يا مبردنا

و كانت عشوة حلوة مع الجبنة ،شقتين بطيخ لكل واحد، و في اللي اخد فيلامن بابها ،و اللي اكل دوبليكس ،و اهو كل واحد و طاقته الانتاجية في النحت

و عدت الليلة

و فوجئت، لما لقيته تاني يوم ؛داخل عليا باربع بطيخات برضه

طهقانة:تاني يا طوطو؟ ده لسة في 3 بطيخات من امبارح لسة ما ادبحوش

طهقان:ليه كده ؟! شدو حيلكم معايا

طهقانة:نشد حيلنا في اية ؟هو البطيخ نازل في امتحانات الثانوية العامة السنة دي؟ و لازم نذاكره كويس، و لا ايه؟

طهقان:اتصرفي بقى، اعملي مربى، كيكة،انت بتغلبي

طهقانة:اه فكرة برضه و ممكن اعمل ايس كريم او شامبو كمان ما انا ايدي طايلة

و تحول اكلنا في البيت الي بطيخ في بطيخ

الفطار و الغدا و العشا

سندوتشات بطيخ - بطيخ باللحمة- صينية بطيخ بالبشاميل- تورتة بطيخ- عصير بطيخ - بطيخ بالبطيخ

و العيال سابو البلاي استيشن ،و بقوا يلعبوا بالقشر، حتى البت خوخة اللي جت بعد دوخة نابها من القشر جانب

لما بدأت احس ان العيال بقوا مدورين و طلعتلهم قشرة خضرا ، و بقع حمرا ،و بقيت خايفة لا يكحوا بذر

و تالت يوم، قعدت اترقب وصوله، و اقول في عقل بالي: مش معقول يعملها تاني النهاردة

تن تن تاااااااا

نفس مقرر كل يوم اربع بطيخات برضه

و مكدبش عليكم، اضطريت انزل الشعارات بتاعت الانتخابات و ارفع شعارات تانية مناهضة زي:

الرحمة حلوة

و لا بطيخ بعد اليوم

و يا فكهاني كفاية حرام كرهتنا في الشمام

و كتر البذر يجيب بواسير

طهقان:ليه يا جماعة مالكم ؟!ده حتى الجو حر ،و البطيخ مناسب جدا في الظروف دي

طهقانة:مش كده!!! ده احنا كده حناخد جايزة الدولة التشجيعية في النحت،

وعيالك جالهم اسهال من البطيخ، الجيران حيشتكوا ،و حنعمل ازمة في شبكة الصرف الصحي في البلد و مش بعيد يحسبونا على كل شدة سيفون و الفاتورة تيجي عالية

و لكن لا حياة لمن تنادي

و قعدت افكر، ايه اللي مخليه مقبل قوي على البطيخ بالشكل ده!!!

عملت سيرش على النت ،طلعتلي نتايج كتير ،شكيت في ان بعضها يكون السبب وراء عشق طهقان المفاجئ للبطيخ، و منها:

قالت إحدى الدراسات الأمريكية إن قطعتي بطيخ من الحجم المتوسط تعادلان في مفعولهما قرص فيتامين، فهو مرطب للجسم وفاتح للشهية فضلا عن فوائده الصحية المتعددة، فهو يعتبر صيدلية متنقلة تقاوم الأمراض.

يكونش ده السبب؟ بيحاول يجدد شبابه؟

لا بس هو كده بيقضي على شبابنا احنا

و لقيت موضوع تاني في موقع تفسير احلام بيقول:

من راى في المنام انه ياكل بطيخ :فهو رجل صاحب هموم ومريض أو من رأى أنه يأكل بطيخ فانه يخرج من الحبس

يكونش حلم بشادر بطيخ !!و بيحاول يحقق الحلم؟ و ايه موضوع الحبس اللي عايز يخرج منه ده؟ يكونش عايز يخرج من الجواز بنص المدة؟ جايز

المهم..حصل عندي تكدس بطيخي في المطبخ، و كان لابد من ايجاد حلول عمليه للتخلص منه

ندهت للبواب و قلتله:

طهقانة:خد يا عم علي، بطيختين ليك و للعيال يبردوا عليكم في الحر ده

البواب:لا الف شكر يا مدام، ده طهقان بيه منغنغنا ،كل يوم يديني بطيختين

طهقانة:كل يوم؟؟ يديك بطيختين؟

البواب:ايوة يا ست هانم. هو البيه اشترى جنينة بطيخ و لا ايه؟

طهقانة: لا ده اصله اخد مكافأة عينية في الشغل بتاعه، و بيوزع على حبايبه

عقلي الباطن :لا كده الموضوع في إن

كل يوم يجيب البيت اربعة!! و يدي عم على اتنين !!يعني بيشتري ست

بطيخات كل يووووم

و قعدت اترقب

و الشك حاجز في قلبي اوضتين و صالة بمنافعهم و الفار بيلعب اسكيتنج في عبي

وصل طهقان بيه و برضه معاه البطيختين اياهم و ساحب وراه البواب باتنين تانين

طهقانة:اهلا اهلا(بنبرة نعيمة الصغير الله يرحمها)

طهقان:ايه خير في ايه؟؟ النبرة دي انا عارفها ،مالك؟

طهقانة:قول انت في ايه؟ حتقر لوحدك ؟و لا اقررك انا بمعرفتي

طهقان:لا لا لا ..خلاص ،حقر انا (و علامات الاستسلام على وشه)

طهقانة:كويس ،ها؟

طهقان:اصل انا يوم الاحد، و انا طالع بالعربية من الجراج بظهري؛ خبط عربية بطيخ قلبتها و كسرتها ،و الواد بتاع البطيخ قعد يعيط ويقولي :دي فلوس ناس يا بيه و حيموتوني ،فصعب عليا ،واخدت منه حمولة البطيخ كلها ،و اديته فلوس يصلح العربية ، و خلاص.. مش فاضل معايا غير بتاع خمسة و عشرين بطيخة ،بس ادي الحكاية

طهقانة: يا طيبة قلبك يا جوزي ،صعب عليك بياع البطيخ و مصعبناش عليك احنا!! ده عيالك طلعلهم بذر الشباب في وشهم، و بقوا ينحتوا على روحهم بالليل ،لأ و لسة فاضل بتاع خمسة و عشرين بطيخة!!

دي حاجة تطهق بجد

اوروفوار

امضاء