ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

مين يزعق الأول


ظبط المنبه يوم الجمعة اللي فات على الساعة 7 صباحا، و طبعا كلنا عارفين ان يوم الجمعة فاكانس و كونجيه ،بس انا كنت عايزة اصحى الاول قبل طهقان علشان ابدا اليوم من ((ناحيتي))0

و طبعا اللي مش متجوز مش حيفهم النظرية دي و لذلك حشرحهالكم يلا طلعوا الكراريس(الكايه)
اليوم اللي طهقان يصحى فيه الاول و يبدأ فيه بالزعيق و الشخط في العيال ؛ اقوم انا على ملا وشي و اقعد اهدي فيه و اسايس في اعصابه علشان يهدى و انفذ له كل طلباته عملا بمبدأ اوعى من وشه الساعادي و بما اني تعبت من المدادية و الطبطبة و بونو بونو؛ فقررت اني ابدأ انا الزعيق و الشخط يوم الجمعة على الريق على اتفه الاسباب - زي ما هو بيعمل- و اشوف هو حيعمل اية ... اتنديه


و فعلا دخلت الحمام لقيت الفوطة مش في مكانها رحت فاتحة الحنجرة و بدأت في وصلة زعيق سوبرالي-وده ملوش اي علاقة بالسجاير السوبر و لكن ينتمي الى الغناء الاوبرالي بس النوع العالي منه-وتهديد و وعيد للعيال و اضرب المربوط يخاف السايب و معروف من اول بوست مين هو السايب


عنها و صحي سي طهقان و قالي: مالك بتزعقي على الصبح كده ليه
طهقانة: شوف احوال البيت السايب ده اللي مش لاقي حد يحكمه
طهقان: طيب اهدي بس كده فيه اية؟
طهقانة: مفيش حاجة في مكانها و العيال مش بيسمعوا الكلام و مش بيخافوا منك ..سيتامبوسيبل
طهقان: طيب اقعدي في حتة بس و انا حشوف في اية

و بكده ثبتت صحة نظريتي و بدأ طهقان يهدي فيا و انا ازودها علشان انعم بمساحة أكبر من الطبطبة و المدادية ...يعني يا سي طوطو لازم ازعق و افتعل النرفزة علشان تسحب ناعم معايا و تبقى كيوت ؟؟ هو لازم يكون في حد فينا متعصب و التاني يعمله الكمادات؟؟!! ليه منبقاش احنا الاتنين رايقين و حلوين مع بعض و زي السكينة في السيمون فيميه؟!!!!0

سيترو 00 يجوا يشوفوا اللي عايزين يتجوزوا و يقولوا يا جواز

و نجحت نظرية اللي يصحى بدري يبتدي اليوم من ناحيته و اتغدينا برة اليوم ده و العيال هيصت و انبسطت صحيح انا كنت مصدعة من الصحيان بدري، و دماغي ناقصها مفتاح انجليزي يلف الصواميل اللي اتفكت من الزعيق ؛ بس فرحت اني كسبت يوم من ال365 يوم فيه حنية و طبطبة

و صدق الرائد المجدد الحكيم حكيم حيث قال:0

ان مكنتش انت تدلعني مين حيدلعني

حاجة تطهق بجد
اوروفوار
إمضاء
49 comments