ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

تكتك زراعي


اتفقنا انا و طهقان جوزي اننا نروح نصيف يومين في اسكندرية و نستمتع بريحة اليود و المية المالحة و اختلفنا كالعادة نروح من أي طريق انا عايزة نمشي من الصحراوي و هو عايز نمشي من الزراعي
و لانه مستبد و انا حامل في الوديع كالعادة سافرنا على الطريق الزراعي
و احنا ماشيين شفنا جميع انواع التلوث اللي في الكرة الأرضية و شفنا مداخن مصانع مطلعة سرسوب تلوث محندق كده إنما جنان
و الغريبة ان الشبورة في العالم كله بيضه و في بلدنا شبورتنا رمادي لزوم الموضة و الارننة يعني
و اللي عجبني قوي العبارات اللي بتتكتب على ظهر العربيات النقل من عينة:
عضة أسد و لا نظرة حسد
و يا دوب حطيت شريط ام كلثوم في الكاسيت و بدأت تدندن (حيرت قلبي معاك و انا بداري و اخبي) و الاقي العربية عملت قفلة. و سومة لا لحقت تداري و لا تخبي و الكهربا فصلت لا بقى في مكيف شغال و لا الكلاكس بيزمر و طبعا الأنوار و الإشارات الله يرحمها
اوباااا حنعمل اية... الجو حر مش كنا ركبنا مروحة سقف للعربية تنفع في الظروف اللي زي دي
قلت لطهقان: ما تيجي يا طوطو نركن العربية و نأخد لنا تكتك صغنن كده نروح بيه اسكندرية!!! دي تبقى رحلة اوريجينال محصلتش
طهقان: تك.. اية؟ يا بنتي إحنا عايزين لنا دستة تكاتك من دول علشان يكفونا بالشنط و العيال
طهقانة: لا و شوف عامل ازاي!! كأنه قرصة ناموسة
طهقان: اهو ده ميزته الوحيدة إن صاحبه ميغلبش في ركنه، ده حتى ممكن يركنه في البلاكونة
طهقانة: طيب يلا بينا نركن و ننزل نركب واحد يودينا عند أي كهربائي يجي يصلح لنا العربية
طهقان: حاضر يا ستي و ادي ركنة
و شاورنا لتكتك عسول كده فول ابشن و مركب ستاير بشراشيب لزوم الانتكة و لو حد من الزباين عايز برايفسي يعني و لا حاجة و حاطط كاسيت دابيل ديك ديزبيزابول عمولة محصلش
طهقان: لو سمحت تعرف طريق كهربائي سيارات كويس هنا؟
التكتك مان: ايوة يا باشمهندس اركب
طهقانة : و انا كمان
طهقان : لا استني انتي مع العيال في العربية
طهقانة : لا مش ممكن أنا عايزة اركب التكتك.. نفسي اركبه
طهقان : طيب لما نشوف اخرتها اقفلي على العيال العربية و اطلعي


الباب بتاع التكتك ده ..هو بصراحة مش باب هو فاتحة حوالي 25 سم و الكنبة الورانية..هو الصراحة مفيش قدمانية لان السواق قاعد على حاجة كده زي جردل الحمام بس مقلوب
المشكلة في الدخول جوه التكتك..محتاج برطمان فازلين يظفلط الواحد منمنا جوه التكتك و لازم كمان يعملوا الكنبة تيفال علشان الواحد منمنا ميلزقش جوه
وبدأ التكتك في التحرك و هووووب
بووووم
طهقانة : إيه يا أُس اللي حصل ؟ (اس هو اختصار اسطى اكمن التكتك صغير ميستهلش الكلمة كلها )0
التكتك مان: مفيش يا بيه العجلة فرقعت
طهقان: طيب اية العمل؟!0
التكتك مان: مفيش.. انزل بس ارفعلي التكتك بايدك و انا اغيرها هوا
طهقانة: ايه ده!! مفيش كوريك و مفك بلاس و الحاجات دي؟؟
طهقان: لا يا بنتي ده تغير العجلة للتكتك زي غيار البامبرز للعيال الصغيرة بالزبط
طهقانة: طيب سمي عليه و انت بترفعه و استنى اشوفلك معايا بودرة تلك تبدره هيهيهي
و راح طهقان رافع التكتك بكتفه كده و السواق طلع من جيبه مفك زي بتاع البلاي استيشن و في ثواني كان مغير العجلة
و عرفنا نوصل للاستاذ الكهربائي و ناخده معانا في تكتك خصوصي منفصل عن تكتكنا لمكان العربية و كان منظر لطيف قوي و قافلة التكاتك ماشية ورا بعض
و طبعا الحساب لازم يبقى فكة علشان التكتك يعرف يهضمها اصله لسة بيسنن ....هههههه
و بعد تغير شوية فيوزات و حاجات في العربية الحمد لله دارت و رجعت سومة تشدوا من تاني حيرت قلبي معاك و انا بداري و اخبي)0)
و لسة حنقفل الكبوت و نقول بسم الله توكلنا على الله
لقينا العجلة الورانية نايمة ..الله اية الحكاية السفرية دي مبصوص فيها و لا اية؟؟
و العيال هاتك يا تريقة
طوطو ابني: سيبوها نايمة يا مامي و نبقى نصحيها لما نوصل هاهاهاها
طهطه بنتي: معلش يا مامي اصلها كانت سهرانة طول الليل كركركركر
طهقان: مش لو كانت العربية دي تكتك دلوقتي كنت رفعتها بصباعي و غيرنا العجلة و خلصنا
طهقانة: انا بقول نلف و نرجع تاني انتم مش وش مصايف و اهي بركة السبع قدامها 3 كيلو تاخدوا غطس و تننا مروحين
دي حاجة تطهق
اوروفوار
امضاء




38 comments:

lonely said...

ههههههههههههههههه
مش اول زيارة بس اول تعليق

حلوة قوى التوكتوك مان دى
ههههههههههههههههههههههههه
هههههههههههههههههههههههههههه

انتى دمك سكر خالص وربنا
مالوش حق يخليكى طهقانه بصراحه

والطهطهنيينن الصغنططين كمان شكلهم واخدين منكم كتير

واهى بركه السبع حلوة بردو مايضرش

وكل سفرية وانتى طيبة

mohra said...

ولا يهمك ...انا نص سفرياتى بيحصل فيها الحاجات ديه...بس احب اطمنك مع الاصرار هتوصلوا ان شاء الله

بطوط حبوب said...

هههههههههههههههههههههه
3 كيلو وتبقوا فى بركه السبع يعنى كنتوا قريبين من قويسنا
لو كنت اعرف كنت عملت معاكم الواجب
وانتوا عارفين كرم المنافيه

ال بالحق كان غداكم معاكم
هههههههههههههههههههههههههههههههههه

Ahmed Mubarak said...

تكتك عسول

محسساني انك راكبه خيل او بتلاعبي قطه صغننه

:D

Anonymous said...

ازيك ياطهقانة فينك من زماااااااااااان
بس راجعة تجنني مش ممكن نفسي اغير عجلة التكتك انا اتهريت تغيير بامبرز للعيال اهو حتي الواحد يبقي غير لكل حاجة سلامي للطهقانين الصغيرين وحشتوني كلكم وتوصلوا بالسلامة إن شاء اللة
زكزوكة

المـــفـــــــقــــــــوعـــــة مــرارتـهــا said...

ايه المغامرات التكتكية دي
انا عندي العيال يعزوا التكتك اوي اكنه اخوهم الصغنن
انا بأفكر اشتريلي واحد اركبه في البيت اصلي بأتزحلق علي السيراميك

خمسة فضفضة said...

السلام عليكم ورحمة الله وبركاته

هههههههههههه

معلش يا طوطه قليل البخت بقي


:))))))))))))))

Anonymous said...

لأ وعلى ايه بركة السبع؟
مالها عين حلوان؟؟ الكابريتاج ماله؟؟ جنبيه في الهابي داي
انتو بتتعبوا نفسيكوا ليه نا مش عارفة

بقول ايه يا بستوكتي،، ما تكلمينا مرة عن اولادكو طوطو وطهطهه باين ولا اسمها ايه،، عشان خاطري عشان خاطري عشان خاطري

مها ميهوووو

allfollowsome said...

طهقاااان المغلوب على امره والله الطيب الغلبان

توك ايه اللى عاوزة تركبيه من كلامك كده واضح ان طهقان غلبان ومنكسر يعينى وكلمته رقم 2 غالبا


ده غير ان رومانسى وحنين لانه مش هيرضى يكون رقم اتنين بعد كام بوست قريتهم كده الا لما يكون بيتحرك بقلبه مش بمشاعره


وبدل ما تدعيله وتحمدى ربنا على النعمة اللى معاكى الطهقان الطيب ده تشرديله كده امام جموع البشرية يا طهقانه يا مفترية

منكم لله يا ستات اشوف فيكم 45 سنة

:p

R-H-S said...

ههههههههههههه
ايه الشربتات اللي بينقط في قلب التوكتوك دا
بس بجد اكيد التوكتوك كان ممتع خصوصا ان لو حد خبطه بكتفه كنتوا هتتقلبوا في قلب الشارع
طهقان شكله كدا بيروح الجيم وعنده بسم الله ماشاء الله عضلات
تحياتي وhappy masiaf

Mafrousa said...

هههههههههههههههههههه
ههههههههههههههههههه
ههههههههههههههههه
انتي فظيعه اسلوبك يجنن
ههه بيغير العجله كلنه بيغير بامبرز ههههههههههه
وواضح كمان ان ولادك زيك بالظبط...
هههههههههههه
ابقى اكتبي نوادرهم اكيد حتفطس من الضحك
مسخرة التكتك ده ....هههههههه
انا اصلي بفتكر التكاتك اللي كنت باشوفها و تعليقك
ههههههه قاعد على جردل حمام مقلوب ههههههه
انتي عارفه و الله انا شوفت واحد بيسوق حافي و حاطط الكاسيت فوق القف ورابطه بحبال
هههههههه
و الستاير زي ما بتقولي عاملها شراشيب بعقل
ههههههههههه
انا حموت من الضحك يا طهقانه


بقولك ماتيجي معانا المدونه المشتركه و الله حتيقى ظريفه انتي اسلوبك جميل

Fahd said...

هههههههههههههههههه

لااملك حين اقرأ لكم الا الضحك

كويس اني مش بشوفها في الشغل

بقي هو اسمه توك توك مان

ماشي

انا كنت زمان كده كتبت موضوع اسمه توك توك حبيبي اتقلب

سكينة said...

كان لازم تتحدي كل النظرات والبصات التي نالت السفرية وتكمليها
امال تبقى الحياة طقهان على طول ازاي
لما رجعت الناس الي بصت في السفرية بطلت طقهان
ينفع كده
؟!

aya said...

هههههههههههههههههههههه
يا عينى يا بنتى
وياعينى عليك يا باشمهندس

الله يكون فى عونكم

معلش يا طه طه

وابقى بعد كده اتعلمى واشترى تكتك ديسبوزابول للفيوتشر خليه معاكى فى شنطه العربية

وسفرية سعيدة يا حبيبتشى

اورفوار
بون شانس ما بيل

مدونة كل العرب said...

السيدة الكريمة
شكرا لزيارتك لمدونتى
كنت اتمنا مزيد من الايضاح لمدخلة حضرتك

تحياتى

سبهللة said...

شرباااااااااااات
دمك شربات وسكر
ضحكتينى موت على موضوع البامبرز وبيسنن دى
وفكرتينى برحلة بابايا كان عملها لنا من يجيى 12سنة قبل الميلاد وكانت للعين السخنة والاربع عجلات ناموا مننا فى الطريق
كل ما نصلح واحدة التناية تنام
وكانت رحلة ما يعلم بيها الا ربنا
ومن ساعتها نسافر اى حته فى الدنيا الا العين السخنة

طهقان said...

وزي ما بأقول دايما

اللي يمشي ورا العيال....

حسبي الله ونعم الوكيل

انت تسال والكمبيوتر يجيب said...

ايها المواطنون نذيع عليكم بعد قليل خبرا هاما
مارشات عسكريه مارشات عسكريه مارشات عسكريه
كمان مارشات عسكريه
كفايه كده
ايها المواطنون جاءنا البيان الهام التالى
اذاعت كافة وكالات الأنباء الفضائيه والأرضيه وما تحت الأرض ايضا ان السيد عبده الرايق مرشح للفوز بجائزه تقدر بربع مليون يورو ....متتخدوش اوى كده لأن من شروط الجائزه ان يجيب على سؤال بمدونتنا التى تحوى هى وموقعنا كافة التفاصيل والكل مدعو للأشتراك والفوز باحدى جوائزنا الثيمه
ونرجوا ان تستمعوا الى حلقة برنامجنا الأذاعى الذى به ايضا معلومات مثيره فى هذا الموضوع يوم الأحد 29-6 حيث نكشف كافة الأسرار وراء هذا الموضوع والبرنامج يذاع التاسعه وعشر دقائق صباحا على اذاعة مصر الرئيسيه كما يمكن الأستماع اليه من داخل موقعنا على النت اسرة برنامج انت تسال والكمبيوتر يجيب
والعنواين
المدونه ثم الموقع كالتالى
http://netonradio.blogspot.com
http://dear.to/cairo

27 يونيو, 2008 07:47 ص

funckydoctor said...

ههههههههه
حلو قوى البوست
أولادك دمهم خفيف ربنا يخليهوملك
سلاموز

son's egypt said...

السلام عليكم
الرحلة ديه كان فيه حد باصص ليكم فبها
بس حكاية التكتك دية ظريفة بجد
بعد كده الواحد يسافر بتكتك اوفر ليه واريح

Empress appy said...

ههههههههههههه انتى شردتى للتوكتوك كده ليه حرام عليكى ده سكر خالص
عارفه عند ماما فى المنصورة بشوفه هناك اول ما اخترعوه والله كنت بخاف اركب فيه بحس انه هيوقعنى واول خبطه لبطوط عربيتى كانت منه ربنا يهده بجد
انا مسمياه هناك حرب البسله لما بسافر بركن عربيتى واركبه مش حبا فيه بس خوف على بطوط عربيتى ههههههههههههههه

Esraa Hamed said...

ههههههههههههههههههههههههههههههههههههههههههه

البوست تحححححفة بجد
اسلوبك يموت من الضحك

تسلم ايديكي بجد

الطائر الحزين said...

انتى دايما شبطة كدة حتى مش عاتقه الراجل حتى فى التكتك وجالك قلب يا مفترية تسيبى العيال

مش كنتى قعدتى معاهم وجبتم ايس كريم قعدتم تلحسوا فيه لحد ما الراجل يرجع

الطريق الزراعى كله نور
لما توصولوا طنطا قولى اطلع استناكم

كلام على بلاطة said...

انتى هتطلعى طهقك كمان
على التكاتك
كله اللى التكاتك
تحياتى

Desert cat said...

انتى بتتريقى على التوكتوك يا طهقانة
ده انا بمشى اتعكبل فيهم يا حبيبتى
ممكن اصدر لك اتنين لو تحبى دول عاملين بلدنا زى مدينة الملاهى
بس من الواضح ان الطهقانين الصغيرين طالعين لمامتهم وبابهم فى خفة الدم
كل صيف وانتوا مبلبطين فى اسكندرية وراجعين
وبنا يجعله اخر العجل النايم يا حبيبتى

غمض عينيك said...

حمد الله ع السلامة
دا كده كفاية اوي الرحلة باينة من اولها كهربا وتكتك وعجلة نايمة يبقى كويس انكوا رجعتوا بالسلامة
وحلوة اوي على بركة السبع

تحياتي
محمد سمير

momken said...

يعنى بزمتك مش قادره تسالى التوتك مان اشترى البتاع ده منين
كنا نشترى واحد نلعب بيه فى الجنينه ونروح نجيب بيه الفطار
دى كمان ممكن ناجره بالفه قدام البيت ونجيب تمنه فى اسبوع

هههههههههههههه
وواضح فعلا السفريه منظوره
ياترى مين يا واد يا ممكن الى نظرها
مين الى نظرها
مين مين
طهقانه ملفيش حد غير..........يعرف مين الى نظر الرحله دى


تحياتى

رئـــــيسـة حزب الأحلام said...

مبروك ركوبك التكتك
وعقبال ماتركبى طيارة
تحياتى لكى

Ahmed Al-Sabbagh said...

ههههههههه
هههههههههههههه
هههههههههههههههههههههههههههههه

انا مش هعلق انا روحى طلعت

نونو said...

يا عينى علييكى يا طهقانة
واله انتى وطهقان جوزك عسل وشربات
وكل مصيف وانتوة طهقنين

Anonymous said...

بجد بجد
مواقف ظريفه جدا

وعائله جميله جدا

ربنا يخليلكم اولادكم

انت تسال والكمبيوتر يجيب said...

الثنائى الظريف طهقان وطهقانه
يسعدنا ان تكون حكايه من حكاياتك الشيقه موضوع حلقه من خلقت برنامجنا الأذاعى وهو اول برنامج عن النت والمدونات فى الشرق الأوسط
والتفاصيل فى موقعنا ومدونتنا
الموقع
http://dear.to/cairo
المدونه
http://netonradio.blogspot.com
ودعوه كمان لك ولزوار مدونتك
لنا جروب على الفيسبوك اسمه انا والنت
جيث يروى الأصدقاء عن دور النت فى حياتهم لتذاع فى البرنامج
فاهلا بكم وبحكاياتكم
ويمكن الدخول الى الجروب من رابط فى الموقع

Esraa Hamed said...

في انتظار جديدك

FaceMoon said...

ودة وقتة ياطهقانة تشبطى فى التوكتوك ودى حاجة حد يشبط فيها برضة طيب
اشبطى حاجة عدلة شوية
رحلة سعيدة
تحياتى

Sara Swidan said...

بقولك يا طهقانة ...

أنا بعتلك إيميل على ...
bastokka@gmail.com

و ياريتك تردي عليا يا جميلة عشان أنا و إنتِ حنبقى مع بعض ف نفس الحوار ..

:)

M.a.r.y.o.o.o.m said...

ههههههههههههههههههههههههههههههههههههههههههههههههههههه
انتي عسولة اوووووووووي علي فكرة بجد

أسما عواد said...

هههههههههههههه
جميل فكرتيني بنكتة قالهالي ابني
عربية نص نقل اتقلبت ولما عدلوها لقوا تحتهاتكتك بيرضع
وواحدة تانية مسكو مرسيدس نقل راكنة تحت الكوبري وستة تكاتك بيرضعوا منها
شكرا على مرورك بمدونتي وتحياتي

Anonymous said...

ههههههههههههههههه
ايه يا طهقانة ده !!!! السفرية دى بجد مبصوص فيها بس اللى مزعلنى بجد منك انك قفلت العربية ع العيال وروجت مع طهقان للكهربائى

عارف انهم بامان وكده بس فين حنان الامهات !!! عموما رحلة بطوط دى حد ناظرهالكم هههههههههههه