ممنوع النقل أو إعادة النشر و من يفعل ذلك يعرض نفسه للدعاء عليه بالحرق بجاز
RSS

أنا و العيال و هواك

أنا و طهقان في نزهة برية

طهقان ...يا طهقان
نعم يا ماما- بقرف
الحق ابنك ضيع الفلاش ميموري اللي عليه البروجكت بتاعه
و اية يعني
ايه؟ اية يعني ازاي امسكه كلمه و زعقله علشان يعرف قيمة الحاجة اللي بنجيبهاله و يحافظ على النعمة
هو يعني انا لما ازعقله و لا حتى اضربه الفلاش ميموري حيرجع؟
لا بس لازم تعلمه يحافظ على حاجته
علميه انتي
----
طهقان الحق
ايه تاني
البنت بنتك بتشتم اخوها و تقوله يو ار تشكن و هو عمال يرد عليها و لا اتنين بيتخنقوا في الشارع
و انا اعمل لهم اية؟
شد عليهم و هددهم انك حتمنع المصروف لو سمعت اي باد ورد تاني
طيب ما تقولي انت البوقين دول و تسيبيني ارتاح
الاولاد لازم يخافوا منك و يعملوا لك حساب علشان لما انا اقولهم حقول لبابا يخافوا
انا مش بحب اسلوب الخوف ده انا عايزهم يحبوني و هم يسمعوا كلامي
----
طهقان يا طهقان
يا نعم
ابنك مرجعش مع اخته في الباص و بتقول انه نزل مع واحد صاحبة علشان يجيب منه سيديهات بلاياستيشن هو استاذن منك؟؟
بعدم اهتمام- لأ
طيب لازم تشد ودانه على العاملة دي
ليه؟ -باستظراف-علشان تكبر؟
علشان يبطل يتصرف من دماغه و يعرض نفسه للخطر
هو مبقاش صغير ده في جريد فور دلوقتي
يعني نسيبه يعمل اللي عايزه من غير توجيه
هو استبدال السيديهات بقى جرم دولي و لا اية-كبري بقى
-------
و هكذا يا اعزائي دايما فارسني و كابسني و موقف المية في زوري و مش عايز ياخد اي موقف شديد مع الاولاد و شايف ان منهجي الجدي في تربيتهم منهج سجون و اصلاحيات و ان الاولاد لازم يحسوا بالحنان و الحب و بلاش عقاب و تعنيف
طيب انا لما بعنفهم على اي غلط بيعملوه بعمل كده ليه؟
علشان بحبهم و عايزاهم يبقوا قد المسؤولية و يعملوا حساب لبكرة و يطلع عضمهم ناشف مش مدلعين و خايبين و ميعرفوش قيمة النعمة
و طبعا قدام سلبيته معاهم بلاقي نفسي مضطرة اني اكون انا اللي بشد عليهم علشان ميخبوش
تعملوا اية لو كنتم مكاني
لمتابعة بوستات زوجي طهقان
دوس جامد على اسمه طهقــــان
امضاء طهقاااااااااااااانة
42 comments

حساس حبيبي كتير



طهقان جوزي انسان حساس جدا-حساس يعني رقيق قدام الناس مش عنده حساسية من البيض و السمك- لكن مش بيبين احاسيسه-لا يسمع لا يرى لا يتكلم- بيلاحظ كل حاجة جميلة-في الستات التانية مش فيه انا-و بيقدر كل مميز-في فتيات الفيديو كلب بس




من فترة جالنا ضيوف من دولة عربية شكيكة و اخدناهم نزهة في خان الخليلي و الحسين و هناك شفت شوية بدل رقص انما شفتشي خالص الضيفة اشترت يجي ست بدل رقص ليها و لاخواتها


انا قلتله: ايةرايك يا طهقان في البدلة دي؟


طهقان:فالجر قوي


أنا: هاهاها ما هي لازم تبقى فلجر مش بدلة رقص


طهقان: لا مش حلوة


أنا: طيب ايه رايك في دي؟


طهقان: اممم بكام دي


أنا: بستميت جنية


طهقان: ينهار اسود دي غالية قوي


أنا: نفاصل فيها و ناخدها بتلتمية


طهقان: ليه انت اتجننتي تلبسي بدلة رقص!!اعقلي يا ماما


أنا: اتلهيت على عيني و سكت
و لما عزمناهم على العشا في مركب سياحية في النيل كان في رقاصة حريفة فلجرة و هو كان قاعد منشكح قوي و وشه محمر لا انا عارفة من الكسوف و لا من الهبو اللي طالع على جتته و كله كوم و لما الرقاصة قربت منه كوم قعد يسقف و لسان حاله بيقول
مش كنت اتجوزت رقاصة
بس يا طهقان يا حبيبي هز الوسط مش كفاية و ميفتحش بيت انا بحبك و مش بس كده ده انا
حرقصك على الشناكل يا حبي


و الغريبة اني اكتشفت ان طهقان نفسه ارقصله و البس بدلة رقص في البوست بتاعه


طيب يا طهقان يا حبيبي اشتري البدلة و لا مشتريهاش و لو رقصتلك من غير الزي الرسمي للرقص تفتكر حتقولي برضه


اعقلي يا ماما؟؟






طهقان حبيبي بيقول عليه تلاجة


يعني انت اللي بابور يا روحي؟


الحب ده مشاعر قبل ما يكون جسد و مش معنى ان صاحبك جابلك برطمان روح العفريت من اندونسيا و ضربتلك منه معلقتين حسسوك انك شمشون الجبار يبقى الجمل طلع النخلة


طيب ادي الجمل و ادي النخلة


بس بشرط بدون تدخل دوائي و لا عشبي و لا دهان و سفوف و لا اسبراي و لا تدخل جراحي




يا زوجي الحبيب انا راضية بيك بامكانياتك المتواضعة الحالية بس عايزاك انت كمان ترضى بنفسك و امكانياتك و ترضى بحبي ليك


الصمت مش دايما بيبقى برود يمكن ساعات بيكون تقدير لظروف شغلك و مزاجك و النوم بدري علشان تصحى بدري




يمكن المشكلة اننا كنا ساكتين السنين اللي فاتت و جه الوقت اللي نتكلم فيه عن مشاكلنا و ناقشها


يمكن متكونش مشاكلنا لوحدنا و يكون ناس كتير مشتركة معانا في نفس الهموم




طهقان كل عيد حب و انا بحبك و برضه طهقانة منك


ها؟؟ حتجيبلي اية بقى في عيد الحب؟؟؟


جزمة برقبة؟


:)
27 comments

طهقانة -اول مرة



انا طهقانة من جوزي و عمايله و تصرفاته اللي تطهق بلدوححكيلكم عن عاملة من عمايله اللي تفرس

كنا قاعدين في الفود كورت في مول كبير انا و هو على ترابيزة واحدة و الاولاد راحو يلعبوا و مستنيين واحد صاحبه و مراته عازمينهم على العشا
و احنا قاعدين مستنيينهم قام يشتري سوفت درينك قبل ما ييجوا و ساب موبيله اخذت الموبيل و دعبست فيه لقيته كاتب اسمه في البلوتوث ((الجامد))و نيلة ايه ي يا ابن الايه جامد ايه يجوا يشوفوا
رجعت الموبيل زي ما كان و لا كاني شفت حاجة و شوية و رجع و شوية كمان و صاحبه و مراته وصلوا و انقسمنا فريقين الستات على تيبل و الرجاله على تيبل
كويس
و انا قاعدة معاها فتحت البلوتوث بتاع موبيلي و كتبت الاسم
(( احب الجامد))
و رحت باعتاله مسج دلع لقيته استقبلها و راقبته لقيت عنيه لمعت و بانت عليه السعادة و الرغبة في البلبطة في بحر المغامرة
طيب لما نشوف حتوصل لحد فين
راح باعتلي مسج فيها رقم موبيله و سميل فيس
اوبا بقى كده طيب استنى عليا اما لعبتك على الشناكل
طلبت من صاحبتنا نقوم نتمشى و نلف على محلات الاكسسوارات و انتهزت الفرصة و دخلت محل موبيل و اشتريت خط هوليداي من اللي بيشتغل 45 يوم و يفصل و رحت مزوغة من صاحبتنا و هي بتسأل على اسعار حاجات في المحل و طلبته و غيرت صوتي و كلمته بدلع و اخنفيت
اصل انا لما اتدلع اخنف الله يمسيكي بالخير يا سكيننة
انا : النووووو
هو:( بدهوله و هطل ) ا لل للو ايوة
انا: الجامد؟
هو: اهلا اهلا
انا: اسيك؟
هو : كويس ازيك انتي؟
انا: كويسه انت قاعد فين ؟
هو: ا ا انا في الفوت كورت قدام محل ...... و ..و
انا: ده انت قاعد قريب مني بقى
هو: ا ه .. بس انا قاعد مع واحد صاحبي
انا : لابس ايه يا جامد
هو: لابس قميص ...و...
انا: اه شايفاك ده انت هاندسم خالص مالص
هو : (بضحكة بلهاء) هاهاها متشكر يا قمر
عرف منين اني قمر الكذاب استنى عليا
انا: طيب اشوفك تاني ازاي؟
هو: اتصلي بيا بس قبل 4 العصر بس استني انت قاعدة فين و لابسة اية و ..و..
انا:اشمعنى بعد 4 انت متجوز؟
هو: لا لا لا...بس علشان نبقى براحتنا
بقى لا يانهار مش فايت امال 11 سنة جواز دول اية؟ و العيال اللي ملقحة دول مين؟
انا: طيب يلا باي بقى

هو: استني عايز اشوفك انت قاعدة فين؟ و..و..
انا : قفلت الخط و بقيت عايزة اشتري ايد هون و انزل بيها على نافوخه بس مسكت نفسي و قلت و النبي لشخلعه و اهشكه و افرجه

رجعت الشريحة بتاعتي في الموبيل و اتصلت بصاحبتنا و رجعنا قعدنا على الترابيزة معاهم و كبست على نفسه لحد ما روحنا و هو طول القاعدة عينه زايغة و عمال يبص على كل واحدة حولينا فاكرها هي الزبونة اللي اتصلت و انا قاعدة جانبه و لا حاسس بيا

و احنا مروحين لقيته منشكح و منهرش و عمال يصفر و يطبل على الدريكسيون اكن فرح خالته
عاملت روحي مش مركزة و قعدت اتكلم مع العيال في اي كلام

تاني يوم.. راح الشغل و على الساعة 11 اتصلت بيه من الشريحة اياها
انا: النوووو
هو:اهلا يا جميل
انا: وحشتني
هو: انتي اكتر كده برضه متخلنيش اشوفك
انا : استنى بس مش نتعرف الاول و بعدين نتقابل
هو:طيب حشوفك امتى
يا نهارك مش فايت و كمان عايز تقابلها مع سبق الاصرار و الترصد
انا: انت عندك كام سنة؟
هو:30 سنة و كام شهر
يا ابن الكذابة مواليد 60 و لسة 30 سنة ليه كنت واخد عشر سنين اجازة رضاعة طفل
انا: ياه انت كبير عليا انا 25
هو: و ماله هو في احلى من كده
انا: بس انا شايفة شعر ابيض في راسك امبارح؟
هو: ها ها ها ها لا ده من الخضة
انا:هيهيهيهيهي (بدلع بس من جوه بابور مولع)
هو: طيب انت بتشتغلي فين؟
انا: حسب ساعات و ساعات
هو: طيب...
قاطعته
انا باي بقى اكلمك بكرة في نفس الميعاد
و قفلت الخط و انا مولعة و فاضلي لتر بنزين و انفجر
و فضلت كده اتصل اتدلع عليه و مديلهوش اي معلومات عني خمس ايام لحد يوم الخميس و طبعا سمعني كلام عجب و كذب يودي كلية الطب و قالي نكت عمره ما حكهالي و هراني مسجات معاكسة و ادالت و غرام و اخيرا فاض بيا و قلت لازم اكشفه قدام نفسه
اتصلت
انا: النووو
هو: اهلا يا حبي
حبي؟!! و انا كل ما اتصل بيه و انا مراته يقولي نعم يا ماما و لو حد ساله مين يقولة ----البيت-----
انا: فاضي بكرة الصبح عندي تدريب في الناتي و عايسة اشوفك
هو: طبعا الساعة كام
انا : 12 كويس؟
هو : اوك يا قمر
انا: اوك سلام
هو : استني بس حعرفك ازاي؟
انا: زي ما قلتلك قبل ده انا شبه نيكول سابا بس للصراحة عنيا مش زارقة عنيا خضرا و حكون لابسة شورت تنس و بادي بينك
هو: اتفقنا يا قمر( و طبعا انا حسيت بالريالة بتنزل على سماعة التليفون و هو بيقول العبارة الاخيرة دي)
استنى اما نشفت ريقك

و لما روح سبع البرومبة قلتله عايزين نفسح الاولاد بكرة يا بيسو
قالي لا بكرة مش فاضي عندي مشوار واحد صاحبنا عنده المرارة و حيعمل عملية و لازم اروح معاه علشان نعمل التحاليل اللي قبل العملية و..و...و.. و عاملي قصة
قلتله: طيب اروح انا عند ماما بقى و لما تخلص ابقى تعالى اتغدى معانا
قالي: لا ما انا يمكن اتغدي معاه
كمان ناوي على غدا طيب حوقف اللقمة في زورك ان شاء الله

تاني يوم من الساعة 10 صحي و لبس و نزل مش عارفة ليه بدري كده بس احسن
اخدت العيال عند ماما و طلعت على النادي و لقيته مستني في المكان اللي اتفقنا عليه و عمال يتصل برقم الزبونة و انا مش مركبة الشريحة اصلا
اتصلت بيه من موبيلي و قلتله
انا:انت فين يا بابا
هو: ايوة...بزهق... ما انا قلتلك مع صاحبي
انا: طيب انا بس حبيت اقولك اننا رحنا النادي علشان ماما عندها ضيوف
هو: اتسرع و اتلجلج و انا شايفاه حط ايده على راسه
و قالي: نادي اية؟
قلتله: النادي الفلاني(اللي هو نفس النادي بتاع الرونديفوه)
هو: ليه كده الجو برد العيال حتعيا خديهم و روحي احسن
انا: طيب طيب

بس و عنها و ركبت شريحة الزبونة و اتصلت بيه
انا: النوووو
هو: انت فين يا جميل الساعة 2 مش تيجي بقى
انا: انت فين بالظبط
هو: جنب ملعب التنس زي ما اتفقنا
انا: طيب انا جايه اهو فايف منتس
هو: اوك(بحماس منقطع النظير)


و رحت واخده بعضي و عملت هجوم مباشر عليه من الخلف
و قلتله:بيسوووو انت هنا
هو: اتلهى و اترزى و بقى عرقه مرقه و قالي انت ايةجابك هنا
انا : انا روحت العيال علشان البرد و قلت اجي الف التراك الله امال فين صاحبك !!!و اية التسريحة الجميلة دي ؟؟انت رحت عند الحلاق؟ و صبغت كمان! واو صغرت 5 سنين يا مضروب
هو: الفار لعب في عبه و قالي لا ..اصله... اجل ... تعالى نروح ناخد العيال و نتغدى برة
انا دوست على ريديل و انا واقفة معاه من شريحة الزبونة و استمتعت بوشة و هو بيجيب الوان و العرق بيفط من سحنته و هو حاسس ان البت جت و حتطب علينا
قالي: يلا يلا الجو برد النهاردة
قلتله: مش حترد على التليفون
قالي: مش مهم بقى
قلتله: طيب استنى حروح التويلت و ارجعلك
قالي: طيب
و انتهز الفرصة وراح متصل على رقم الزبونة
رديت بصوتي الأصلي
انا: الو
هو:بتردد..........انت فين؟
انا: ما انا لسة قايلالك رايحة الحمام
هو: اية(بصدمة)
انا: انت لسة معرفتش يا مدهول اني بشتغلك من اسبوع عاملي فالنتينو يا بيسو
طيب قبل ما تبص برة بص جوة
صدق اللي قال زي القرع تمد لبرة
سلام بقى علشان رايحة اقابل الواد بتاعي

و طلعتله لساني بمنتهى الانشراح اللي يضحك في الاخر هو اللي يضحك اكتر

و قفلت التليفون و رحت عند واحدة صاحبتي اتغديت معاها و سبته طول اليوم يضرب روحه تلاتين صرمة
و الحلقة الجاية حقولكم عملت فيه ايه بعد كده

محدش يقولي سيبيه لاني بحبه رغم حركاته القرعة اللي تطهق بس
بحبه
امضاء
طهقانة
38 comments